Аляксандар Пушкін

Кветка

Яе засохлай, не духмянай,

Забытай бачу ў кнізе я;

І тут жа мараю жаданай

Душа напоўнена мая:

 

Дзе і якой цвіла вясною?

Ці дацвіла? і хто сарваў,

Знаёмай ці чужой рукою?

Нашто яе сюды паклаў?

 

На памяць першага спаткання,

Альбо разлукі векавой,

Ці адзінокага гуляння

У полі, ці ў цішы лясной?

 

Дзе той ці тая, што кахалі?

Жывуць яшчэ і ў нашы дні?

Ці і яны ужо завялі,

Як гэта кветка ў цішыні?



Пераклад: Юрась Свірка

Беларуская Палічка: http://knihi.com