Аляксандар Пушкін

У Сібір

У глыбіні сібірскіх руд

Хавайце гордае цярпенне,

Не згіне праца вашых рук

І дум высокае імкненне.

 

Няшчасцю верная сястра,

Надзея ў змрочным падзямеллі

Скаваны дух абудзіць смела,

Надыйдзе вольная пара:

 

Сяброўства і любоў да вас

Пранікнуць скрозь муроў затворы,

Як ў вашы катаржныя норы

Даходзіць мой свабодны глас.

 

Аковы цяжкія спадуць,

Цямніцы знікнуць, і свабода

Вас прыме шчасна ля ўвахода,

І меч браты вам аддадуць.



Пераклад: Алесь Звонак

Беларуская Палічка: http://knihi.com