А я касіў, і жыта жаў,
І за драчом ганяўся.
А ён, той драч,
Мяне стамляў,
А я? А я злаваўся.
Цыбаты, даўганогі драч,
Даруй цяпер старому,
Па хлебу быў у хаце плач,
А ты ж тады быў скорам.
Загончык вузкі
З маці жну
Перад світальным небам.
Здаецца, сонца праглыну,
Яно ж, як бохан хлеба.
А перапёлкі прад зарой
Свае спяваюць песні.
Туман, нібыта сырадой,
Ты ж з голаду —
Хоць трэсні.
Дзіцячы не забыць адчай
На тым іржышчы колкім...
А не злавіў я ні драча,
Ні ў жыце перапёлкі.