Я нічога не шкадую
І нямногага хачу.
Толькі песню веснавую
Да сябе не прыручу:
Хай жыве, пяе, смяецца,
Нібы сонечны прамень,
Хай усцешыць маё сэрца
У асенні хмуры дзень.
Я нічога не шкадую,
А ні смутку,
Ні бяды.
Я са словамі вандрую,
Не тамлюся ад хады.
Мне, асенняму,
Не спіцца,
Не хачу праспаць вясну,
Гукі срэбранай крыніцы
Я зімой сцюдзёнай сню.
Я нічога не шкадую,
З сэрца радасці не рву,
Па сваёй зямлі вандрую
І надзеямі жыву.
Я люблю напеў таполяў,
Шэпат клёнаў і бяроз,
Зачарован жытнім полем
Я да радасці і слёз.
Я нічога не шкадую,
З песняй па жыцці вандрую.