Да лясных я прыслухаўся трэляў,
Яны поўны нязгаснай красы.
Птушкі зноў на вясновых арэлях
Правяраюць свае галасы.
Гэта спроба запевак для песень,
Гукі флейт і цымбал на зары,
Што нядаўна развесілі ў лесе
На ўсіх дрэвах яго жыхары.
Гэта спеўкі. Заняткаў пачатак.
У крылатых — крылаты напеў.
Будзе ў пушчы зялёнае свята,
Каб ад шчасця я плакаў і млеў.
На вячэрніх і ранішніх сходках
Мы не ўдзельнікі, а слухачы.
Заліваюцца песняй салодкай
Берасцянкі, гняздо віючы.
Дзяцел пробуе бубен драўляны,
А жаўрук — галасісты званок.
Будзе ў маі спяваць апантана
Дрэва кожнае, кожны лісток.
Вецер з сонца заранак накрэсліў
І павесіў з аблок дываны.
Я з увагаю слухаў на ўзлессі
Урачыстыя песні вясны.