Дзе знайсці чарадзейныя словы,
Ці падслухаць у ніў ці ў дубровы,
Каб падзяку з іх шчырую скласці
Роднай партыі — маці любімай —
За вялікую долю і шчасце.
Дзе знайсці незвычайныя словы,
Каб яны сталі слаўнай асновай
Для сардэчнай і радаснай песні
Аб табе, наша партыя-маці,
Яснай праўды і шчасця прадвеснік.
Ад тваёй цеплыні і ад ласкі
Сталі явай легенды і казкі,
Ад тваёй мудрай волі і сілы,
Наша добрая партыя-маці,
За плячыма ў нас выраслі крылы.
Табе роўнай няма ў цэлым свеце,
Ты, як сонца, і грэеш, і свеціш,
І наперад вядзеш у паходы
Да вялікай зары чалавецтва
За сабою рэспублік народы.
Ты і сіла, і мужнасць народа,
Ты адвага яго і свабода,
І сумленне, і гонар дзяржавы.
Дык няхай жыве партыя-маці,
Ей і нашая песня і слава!