Упэўнена жаданням веру,
Пад гоман маладых хваін
Шырока адчыняю дзверы
У свет і казак, і былін.
Сабралася ў душы іх многа
За пройдзены жыццёвы шлях
Аб святах сэрца, аб трывогах,
Аб баявых, працоўных днях,
Аб даўніх і забытых сцежках,
Аб марах добрых і жальбе,
Аб светлых сонечных усмешках,
Якія носім мы ў сабе.
Аб шчасці жыць на белым свеце
І праслаўляць працоўны шлях,
Высока несці па планеце
Радзімы непагасны сцяг.
Я знаю, збудуцца надзеі,
Жыву я імі, веру ім.
Расту я з імі, маладзею
Пад сінім небам веснавым.