Вакол іх белы-белы мох
І пах бяссонны багавіння.
Выпрошваць не магу трывог
Асеннім днём у павуціння.
Прыйшла да нас ва ўсёй красе
Часіна бабінага лета.
Крумкач ля возера пасе
Няспелых журавін палетак.
К саням прыладзіць палазы
Даўно мяцеліцы павінны,
Прывезці ж трэба маразы,
Каб спелі журавіны.
Без поля жаўруку не жыць,
Без васілька самотна жыту,
Без журавін імху тужыць,
А рэчцы плакаць па ракітах.
Адменны журавінны квас,
Незамянімыя з іх лекі,
Яны на слаўным месцы ў нас,
Яны — бальзам лясной аптэкі.
Гамоняць з ветрам і шумяць
Над возерам лясным асіны.
Халодным полымем гараць
На белым моху журавіны.