Выпі горыч і слодыч да дна,
Узвалі гора й радасць на плечы...
Сэрца адно і радзіма адна
У мяне і ў цябе, чалавеча.
Сэрцаў другіх і радзімы другой
Нам, таварыш, не трэба, не трэба.
Да радзімы сваёй
Прыкіпелі душой,
Разам з ёю расцём аж да неба.
Молат, і Серп,
І дзяржаўны наш Герб —
У праменнях, у спелым калоссі,
З імі шчасце навек абнялося.
Як не вычарпаць мора да дна,
Так не вычарпаць радасці поўнай...
Сэрца адно і радзіма адна
У мяне і ў цябе, друг шаноўны.
Крочым разам з табой
Па дарозе адной,
Нам крывулек ухабных не трэба.
Над тваёй галавой,
Над маёй галавой
Трэба чыстае, чыстае неба.