Шчупак хвастом па лёдзе трэснуў —
Зламаўся лёд!..
Бушуе Нёман,
Нясе з лугоў і пералескаў
Грачыны грай, зялёны гоман
У падарунак плытагонам.
Шануе Нёман працавітых,
За працу плаціць шчодрай платай;
Напоўніў боты, шапкі, світы
Настоем тым, які разліты
На беразе рачною мятай;
Духмянай юшкі акунёвай,
Мяньковай...
Юшка — будзь здароў!..
А дзесьці стануць пабудовай
Плыты з наднёманскіх бароў.
Магчыма, хлыне ў клубе песня,
Пачуе дом вясельны гоман?..
Шчупак хвастом па лёдзе трэснуў —
Зламаўся лёд!..
Бушуе Нёман.