Да паўночы Анікей
ля тэлеэкрана,—
любіць ён глядзець хакей
па ўсіх трох праграмах.
Сядзе, зліўшыся з тахтой,
захінецца пледам:
«Пераможа сёння хто —
«Сокал» ці «Тарпеда»?
І на ўсю катушку гук,
затыкайце вушы,
бо па хаце стук ды грук —
аж ляскочуць клюшкі.
— Каб ты спрах ужо...— бурчыць
жонка Пелагея.—
Галава мая трашчыць
ад твайго хакея.
Сівізна на галаве,
а нібы здзяцінеў...
Вунь галодныя ў хляве,—
чуеш? — стогнуць свінні...
Пакасіўся частакол...
Зарасла сядзіба...
ты ж адно равеш, як вол:
«Го-о-л!» — аж звоняць шыбы.
— Згода, згода...— Анікей
жонцы не пярэчыць
і... сядзіць, глядзіць хакей
кожны божы вечар.