У Празе,
златай Празе,
многа славутых мясцін:
каменных градаў і храмаў,
мадэрных палацаў са шкла і бетону —
аж разбягаюцца вочы.
Ды сэрца вядзе
на Гібернскую вуліцу,7,
у Народны дом,
дзе ў студзені 1912-га
праходзіла VI Усерасійская
канферэнцыя РСДРП.
У Празе,
златай Празе,
стаяла тады зіма,
не такая суровая, як у Расіі,
але ўсё ж зіма
з лёгкім калядным марозікам.
Як некалі ў Шушанскім,
вярнуўшыся з палявання,
Уладзімір Ільіч
абтрусіў на ганку снег з шапкі
і адчыніў дзверы Народнага дома —
не толькі для сябе.
У Празе,
златай Празе,
на Гібернскай вуліцы, 7
не зачыняюцца дзверы Народнага дома —
з усіх кантынентаў прыязджаюць людзі,
каб наведаць музей Уладзіміра Леніна.
У Празе,
златай Празе,
не толькі ў пакоях Народнага дома —
на ўсіх вуліцах і плошчах,
на заводах і ў кватэрах
гучыць голас вялікага Леніна,
які абудзіў прыгнечаных
і пакрыўджаных
і згуртаваў працоўных
на штурм капіталу.
У Празе,
златай Празе,
на Гібернскай вуліцы, 7
ёсць Народны дом,
які стаў Міжнародным домам —
месцам сустрэч
чыстых сэрцам людзей.