Данута Бічэль-Загнетава

Літанне

Святая зямля нашых продкаў,

застанься апорай нашчадкаў.

 

Замглёная зорка Рагнеды,

не была ты пасцельніцай здрайцаў.

 

Чарадзейны меч Усяслава,

вырвіся з логнаў на ворагаў нашых!

 

О сонейка Ефрасінні,

умацоўвай дзявочыя сэрцы.

 

Ясны месяц Скарынавай кнігі,

асвятляй нашу сумную долю.

 

Высокі талент Кірылы Тураўскага,

паўтарыся яшчэ раз.

 

Запалай, наша роднае слова,

спрадвечным святлом нашых душаў

і дазволь цябе піць, як жывую ваду

з лубянога карца ля крыніцы,

прадвяшчаць, як нясеш сабой праўду,

і таіць, як нясеш таямніцу.

 

На дзейнасць са шчодрым плёнам

паспрыяй нам, сучассе.

 

Вецер болю, прасейвай Палессе

праз адчай спапялёных вёсак.

Прадонне бяды нашай — Прыпяць,

каб жа дзецям цябе не піць!




Крыніца: Бічэль-Загнетава, Д.I. А на Палессі : Вершы і балады / Данута Бічэль-Загнетава. - Мн. : Маст. літ., 1990.- 158 с.

Беларуская Палічка: http://knihi.com