На чырвоныя землі і частку шэрых зямель Аклахомы апошнія дажджы падалі мякка і не размылі сухую, патрэсканую глебу. Плугі ўдоўж і ўпоперак прайшліся па канаўках - слядах дажджавых ручайкоў. Пасля дажджоў кукуруза хутка прарасла, на абочынах дарог сям-там вышугалі трава і бур'ян, і пад зялёным покрывам пачалі знікаць шэрыя і цёмна-чырвоныя фарбы. У канцы траўня неба зрабілася бялёсым, і аблокі, што ўсю вясну віселі кучкамі высока ў небе, паступова расталі. З дня ў дзень сонца апякала гарачымі промнямі падрослую кукурузу, і па краях зялёных расткоў пачалі праступаць карычневыя беражкі. Хмары наплывалі і хутка знікалі, а неўзабаве і зусім перасталі збірацца. Ратуючыся ад сонца, пустазелле набыло цёмна-зялёны колер і ўжо не перакідвалася на новыя ўчасткі. Паверхня зямлі запяклася ў тонкую цвёрдую скарынку, і па меры таго як выцвітала неба, выцвітала і зямля - чырвоная ружавела, а шэрая выгарала да белізны.
У размывах, што засталіся пасля дажджоў, зямля асыпалася сухімі струменьчыкамі. Шмыгаючы па іх, суслікі і мурашкаеды абрыналі маленькія лавіны пяску. Дзень за днём жорстка паліла сонца, і лісце маладой кукурузы траціла пруткасць і прамізну - спярша ліст крыху прагінаўся пасярэдзіне, потым падоўжная жылка яго слабела і ён панікаў долу. У чэрвені сонца пачало пячы шалёна. Карычневыя палоскі па краях кукурузных лістоў шырэлі, падбіраліся да галоўнай жылкі. Пустазелле зморшчылася, яго бадыліны паніклі верхавінкамі да каранёў. Паветра зрабілася празрыстае, неба зусім зліняла, зямля таксама з кожным днём усё больш блякла.
На дарогах, - там, дзе па іх хадзілі работнікі, дзе зямлю крышылі колы павозак і рассякалі конскія капыты, скарынка запечанай гразі ператваралася ў пыл. Усё, што рухалася па гэтых дарогах, падымала яго ў паветра - пешаход узнімаў верхні пласт пылу сабе па пояс, фургон віхурыў пыл на вышыню агароджы, за аўтамашынай ён клубіўся воблакам і потым доўга не асядаў на зямлю.
Калі чэрвень ужо напалову прайшоў, з Тэхаса і Мексіканскага заліва насунуліся вялікія хмары - цяжкія, навальнічныя. Людзі на палях задзіралі ўгору галовы, уцягвалі носам паветра і выстаўлялі насліненыя пальцы, каб праверыць, ці ёсць вецер. Коні трывожна пераступалі з нагі на нагу. Чорныя хмары крыху апырснулі зямлю і імкліва паплылі далей, у іншыя краі. Пасля іх неба засталося такое ж бледнае, сонца па-ранейшаму моцна пякло. Дажджавыя кроплі прабілі ў пыле маленькія ямкі, сям-там абмылі кукурузнае лісце - і толькі.
Услед за хмарамі павеяў мяккі ветрык, ён гнаў іх на поўнач і лёгка пагойдваў падвялы кіяшнік. Мінуў дзень, і вецер набраў сілы, але дзьмуў роўна, без парываў. Пыл падняўся з дарог у паветра і апускаўся на пустазелле, што расло ўзбоч палёў, і ўскрай іх на кукурузу. Потым вецер падзьмуў моцна і рэзка, накінуўся на ўжо засохлую глебу. Мала-памалу неба пацямнела ад вірлівага пылу, а вецер усё шастаў па зямлі, крышыў яе і зносіў з сабой. Неўзабаве ён яшчэ больш разгуляўся. Сухая скарынка зямлі пад яго напорам лопнула, і над палямі падняўся густы пыл, які цягнуўся шэрымі, касматымі, як дым з коміна, пасмамі. Кукуруза змагалася з ветрам, шапочучы сухім лісцем. Тонкі пыл не асядаў на зямлю, а высока ўзнімаўся і знікаў у пацямнелым небе.
А вецер усё мацнеў, шмыгаў пад камяні, выдзьмуваў усё - і салому, і леташняе лісце, і камячкі зямлі, адзначаючы імі свой шлях. Паветра і неба зусім пазмрачнелі, сонца, што прабівалася скрозь морак, здавалася чырванаватым. Ад пылу пяршыла ў горле. Ноччу вецер зусім раз'ятрыўся, спрытна прабіраўся між каранёў кукурузы, якая адбівалася ад яго аслабелым лісцем, пакуль ён не вырваў яе з зямлі, і тады сцябліны стомлена паваліліся набок, вяршынямі паказваючы кірунак ветру.
Пачало світаць, але не разаднела. У шэрым небе выплыла сонца - мутна-чырвоны круг, які свяціўся сутонлівым, кволым святлом; да вечара сутонне паступова зноў перайшло ў змрок, а над паваленым кіяшнікам завываў і плакаў вецер.
Людзі сядзелі ў дамах, а калі даводзілася выходзіць, яны закрывалі нос хусцінкай і надзявалі акуляры, каб не засыпала вочы пылам.
Зноў настала ноч, апраметная цемра, бо зоркі не прабіваліся скрозь заслону пылу, а святло з вокнаў толькі крыху разбаўляла цемрадзь каля самага жытла. Пыл перамяшаўся з паветрам, і ў гэтай завісі з пылу і паветра было пароўну і таго, і другога. Дамы былі зачыненыя наглуха, дзвярныя і аконныя шчыліны заканапачаныя анучамі, але пыл непрыкметна пранікаў у памяшканне і тонкі, быццам кветкавы пылок, клаўся на сталы, на посуд. Людзі счышчалі яго з плячэй. Вузенькія палоскі пылу прымятала да парогаў.
Сярод ночы вецер пакінуў гэты край, наступіла цішыня. Змешанае з пылам паветра прыглушала гукі нават больш, чым туман. Лежачы ў ложках, людзі пачулі, што вецер сціх, - яны прачнуліся, калі шум яго замёр удалечыні. Яны ляжалі, напружана ўслухоўваючыся ў цішыню. Неўзабаве заспявалі пеўні, але галасы іх гучалі глуха, і людзі нервова заварушыліся ў ложках, нецярпліва чакаючы раніцы. Яны ведалі, што тонкі пыл асядзе не хутка. Раніцой ён туманам вісеў у паветры, сонца было ярка-чырвонае, як свежая кроў. Цэлы дзень неба сеяла пыл на зямлю і наступны дзень таксама. Зямля ўкрылася гладкай шэрай коўдрай. Пыл апусціўся на кукурузу, асеў кучкамі на слупах агароджаў, на правадах, заслаў сабой дахі, траву, абсыпаў дрэвы.
Людзі выходзілі з дамоў і, удыхнуўшы пякучае, як жар, паветра, паспешліва прыкрывалі чым-небудзь нос. Дзеці таксама выбягалі на двор, але не насіліся з крыкам па ім, як гэта бывала пасля дажджу. Мужчыны застылі каля агароджаў і пазіралі на звялую кукурузу, якая хутка сохла і Толькі дзе-нідзе вызірала зелянінай скрозь пласт пылу. Мужчыны маўчалі, амаль не адыходзячы ад агароджаў. І жанчыны выходзілі з дамоў і стаялі каля мужоў, стараючыся вызнаць, ці хопіць сілы ў мужчын вытрываць усё гэта. Жанчыны крадком прыглядаліся да іх твараў - кукуруза, што ж, няхай прападае, абы засталося ўсё астатняе. Дзеці стаялі побач, выводзячы пальцамі босых ног узоры на пыле, і таксама стараліся чуццём выведаць, ці хопіць сілы ў гэтых мужчын і жанчын. Дзеці кідалі косыя позіркі на дарослых і асцярожна чыркалі па пыле нагамі. Коні падыходзілі да вадапойных карытаў і, матаючы мордамі, разганялі налёт пылу на паверхні вады. Нарэшце з твараў мужчын сышла роспачная атарапеласць і ўступіла месца злосці, лютасці і ўпартасці. І тады жанчыны зразумелі, што ўсё абышлося, што мужчыны не зламаюцца. Яны пыталіся ў іх: што ж цяпер рабіць? Мужчыны адказвалі: самі не ведаем. Але цяпер было ўжо не страшна, і дзеці таксама зразумелі - не так страшна. Жанчыны і дзеці цвёрда ведалі: няма такой бяды, якую нельга сцярпець, абы толькі мужчын яна не зламала. Жонкі вярнуліся да хатніх спраў, дзеці заняліся гульнёй, але напачатку не вельмі дурэлі. На працягу дня сонца з кожнай гадзінай рабілася ўсё менш чырвоным. Яно палівала спёкай укрытую пылам зямлю. Мужчыны сядзелі на ганках сваіх дамоў - хто круціў у руках пруток, хто падкідваў і лавіў далонню каменьчык. Сядзелі моўчкі... думалі... разважалі...
Каля прыдарожнага рэстаранчыка-бара стаяў вялізны грузавы аўтафургон. Вертыкальная выхлапная труба глуха вуркатала, над ёю слаўся ледзь бачны воку шызаваты дымок. Зусім новенькі грузавік пабліскваў свежай чырванню, футавыя літары па баках абвяшчалі: ТРАНСПАРТНАЯ КАМПАНІЯ АКЛАХОМА-СІЦІ. Шыны на падвойных колах былі новыя, на засаўцы шырокіх задніх дзверцаў стаяў тарчком медны вісячы замок. За загароджанымі сеткамі дзвярыма і вокнамі бара іграла радыё - спакойная танцавальная музыка, уключаная зусім ціха, як бывае, калі няма каму слухаць. Маленькі вентылятар бязгучна круціўся ў круглым гняздзе над уваходам, мухі зласліва гулі, б'ючыся аб металічныя сеткі. У бары быў толькі адзін наведнік - вадзіцель грузавога фургона. Ён сядзеў на табурэце каля стойкі, абапершыся на яе локцямі, і паўзверх шклянкі з кавай глядзеў на хударлявую буфетчыцу, якая нудзілася ад самоты. Ён вяла перакідваўся з ёю словамі, пераскокваючы з аднаго на другое, - такія гутаркі часта заводзяцца між людзьмі ў прыдарожных барах. Шафёр сказаў:
- Я стрэў яго месяцы тры назад. Пасля аперацыі. Яму там нешта выразалі. Запамятаваў што.
А яна:
- Толькі ж на тым тыдні яго бачыла. Здаровы быў з выгляду. Хлапец нядрэнны, пакуль не набярэцца.
Мухі раз-пораз з ціхім гудзеннем наляталі на металічную сетку дзвярэй. Кававы агрэгат за спінай буфетчыцы запыхкаў парай, і жанчына, не азіраючыся, працягнула руку назад і выключыла яго.
Па абочыне шашы ішоў чалавек. Убачыўшы грузавік, павярнуў да яго. Не спяшаючыся, падышоў, крануў рукой бліскучае крыло і зірнуў на наклейку на ветравым шкле: «Пасажыраў браць забаронена». Ён намерыўся ўжо ісці далей сваёй дарогай, але раптам перадумаў і сеў на падножку грузавіка, якая была схавана ад бара кабінай. З выгляду яму было не болей за трыццаць. Цёмна-карыя вочы з жаўтаватымі бялкамі, рэзкія шырокія скулы, дзве глыбокія маршчыны на шчоках і па кутках рота. Верхняя губа ў яго выцягнулася, бо зубы выдаваліся наперад, а ён стараўся трымаць рот закрытым. Рукі былі агрубелыя, з шырокімі пальцамі і тоўстымі, цвёрдымі, як створкі ракавінак, пазногцямі. На западзіне паміж вялікім і ўказальным пальцамі і на падушачках далоняў святлелі мазалі.
На ім было ўсё новае - новае і таннае. Брылёк шэрай кепкі не паспеў яшчэ пагнуцца, гузік на ёй яшчэ не адарваўся. Кепка не страціла формы, не абвісла, як бывае, калі служыць дадаткова яшчэ і сумкай, і ручніком, і насоўкай. Танны гарнітур з шэрай шорсткай баваўнянай тканіны таксама быў такі новы, што на штанах трымалася складка. Сіняя кашуля была гладкая і каляная ад яшчэ не вымытага крухмалу. Пінжак мехавата вісеў на ім, штаны былі не па росце, кароткія, а ён чалавек быў высокі. Плечавыя швы апускаліся занізка, але рукавы ўсё роўна не даставалі да запясцяў, а крыссе пінжака матлялася на жываце. На нагах у яго былі новыя карычневыя чаравікі апошняга армейскага ўзору, падбітыя цвікамі і з жалезнымі падкоўкамі на абцасах. Седзячы на падножцы, ён зняў з галавы кепку, выцер ёю твар, зноў надзеў, пацягнуў за брылёк, і з гэтага моманту пачала набліжацца пагібель яго галаўнога ўбору. Потым ён глянуў на свае чаравікі, нахіліўся, аслабіў шнуркі і так, незавязанымі, пакінуў. Над галавой з выхлапной трубы дызель-матора борзда, адзін за адным, вынырвалі лёгкія шызыя воблачкі дыму.
Музыка ў бары сціхла, з дынаміка пачуўся мужчынскі голас, але буфетчыца прыёмнік не выключыла - не заўважыла, што музыка скончылася. Толькі што яна намацала пальцам прышчык за вухам. Намагалася разгледзець яго ў люстры, што вісела ззаду над стойкай, ды так, каб наведнік не заўважыў, і таму рабіла выгляд, што папраўляе пасмачку валасоў. Шафёр сказаў:
- У Шоні вялікія танцы былі. Кажуць, забілі там некага ці штосьці такое. Нічога не чулі?
- Не, - адказала буфетчыца і пяшчотна памацала прышчык за вухам.
Чалавек падняўся з падножкі, паглядзеў цераз капот на бар. Потым зноў сеў і дастаў з бакавой кішэні капшук з тытунём і кніжачку курыльнай паперы. Не спяшаючыся, умелымі пальцамі скруціў цыгарку, з усіх бакоў агледзеў яе, акуратна падраўняў табачынкі, нарэшце запаліў і ўтыцнуў непатушаную запалку ў пыл пад нагамі. Набліжаўся поўдзень, сонца пакрысе паглынала цень ад грузавіка.
У бары шафёр расплаціўся за каву і ўсунуў здачу - дзве пяціцэнтавыя манеты - у проразь ігральнага аўтамата. Цыліндры закруціліся, але нічога не выдалі.
- Яны так хітра зроблены, што ніколі не выйграеш, - сказаў шафёр буфетчыцы.
Яна адказала:
- Аднаму тут вялікі выйгрыш выпаў. Не болей як гадзіны дзве таму. Калі назад праедзеце?
Ужо адчыніўшы дзверы, шафёр адказаў:
- Праз тыдзень ці дзён праз дзесяць. У Талсу еду, а там заўсёды замінка.
Буфетчыца буркліва сказала:
- Мух напусціце. Ідзіце ці дзверы зачыніце.
- Да хуткага, - сказаў шафёр і выйшаў.
Дзверы за ім з грукатам зачыніліся. Стоячы на санцапёку, ён здзіраў абгортку з жавальнай гумкі, грузны, плячысты, ужо з прыкметным жывоцікам. Румяны твар, вочы блакітныя і вузкія, як шчылінкі, ад прывычкі жмурыцца на яркім святле. На ім былі армейскія штаны і чаравікі з высокай шнуроўкай. Паднёсшы жавальную гумку да губ, ён крыкнуў буфетчыцы праз сеткаватыя дзверы:
- Ну дык паводзь сябе добра, а то да мяне ўсё роўна дойдзе.
Буфетчыца стаяла тварам да люстра. Яна нешта буркнула ў адказ. Шафёр паволі пачаў раскусваць гумку, шырока адкрываючы рот і энергічна працуючы сківіцамі. Потым пайшоў да грузавіка, на хаду размінаючы жвачку зубамі, нарэшце засунуў яе пад язык.
Падарожнік, які стараўся ехаць на спадарожных машынах, падняўся з падножкі і скрозь акенцы кабіны паглядзеў на шафёра.
- Можа, падкінеце, містэр?
Шафёр глянуў на бар.
- Хіба не бачыш, што ў мяне на ветравым шкле?
- Ну ясна - бачу... Але прыстойны чалавек заўсёды застаецца прыстойным, нават калі якая-небудзь багатая сволач прымушае яго ездзіць з такой наклейкай.
Шафёр марудна палез у кабіну, разважаючы над гэтымі словамі. Адмовіш, дык не толькі абняславіш сябе, але яшчэ і прызнаеш, што цябе прымушаюць ездзіць з такой наклейкай, пазбаўляючы людской кампаніі ў дарозе. А возьмеш пасажыра, дык прылічыш сябе да людзей прыстойных, якія да таго ж не дазваляюць усякай багатай сволачы распараджацца табой, як ёй захочацца. Ён разумеў, што трапіў у пастку, але выйсця з яе не бачыў. А яму вельмі хацелася быць чалавекам прыстойным. Нарэшце ён зноў глянуў на бар.
- Як-небудзь прымасціся на падножцы да таго вунь павароту, - сказаў ён.
Чалавек нырнуў уніз і ўхапіўся за дзвярную ручку. Матор зароў, счапленне бразнула, і вялізны аўтафургон скрануўся з месца - першая скорасць, другая, трэцяя, потым машына пранізліва заскрыгатала і перайшла на чацвёртую скорасць. Перад вачамі чалавека, што прыпаў да падножкі, з галавакружнай хуткасцю праносілася дарога, зліваючыся ў мутную пляму. Першы паварот быў за мілю ад бара, там грузавік збавіў ход. Чалавек на падножцы выпрастаўся, прачыніў дзверцы і прабраўся ў кабіну. Шафёр зірнуў на яго праз шчылінкі вачэй, не перастаючы жаваць гумку, быццам думкі яго і ўражанні прыводзіліся ў належны парадак з дапамогай сківіц і толькі пасля гэтага пранікалі ў мозг. Яго позірк затрымаўся спачатку на новай кепцы, потым на новым касцюме і нарэшце слізнуў да новых чаравікаў пасажыра. Той усеўся ямчэй, зняў кепку і прамакнуў ёю пот на лбе і падбародку.
- Дзякуй, дружа, - сказаў ён. - А то капыты мае забаставалі.
- Новыя чаравікі, - прамовіў шафёр. У голасе ў яго была тая ж змоўніцкая хітрынка, што і ў позірку. - Хіба ж можна пускацца ў дарогу ў новых чаравіках, ды яшчэ такой спёкай!
Чалавек глянуў на свае запыленыя жоўтыя чаравікі.
- Другіх не было, - сказаў ён. - Што ёсць, тое і носіш.
Шафёр уважліва паглядзеў праз ветравое шкло на дарогу і крыху павялічыў скорасць.
- Далёка выбраўся?
- Ага. Я асіліў бы дарогу да канца, каб капыты не забаставалі.
Шафёр распытваў яго так, быццам вёў тонкі допыт. Закідваў сеткі, ставіў пасткі.
- Шукаеш працы?
- Не. У майго старога тут участак - сорак акраў. Ён арандатар-здольнік, але сям'я наша даўно ўжо ў гэтых месцах.
Шафёр шматзначна паглядзеў на палі ўздоўж дарогі, на палеглую, занесеную пылам кукурузу. З-пад пласта пылу сям-там вызіраў дробны пясчанік. Шафёр сказаў быццам сам сабе:
- Так і сядзіць на сваіх сарака акрах? І пыл яго не засыпаў, і трактары не сагналі?
- Апошні час я з дому вестак не меў.
- Значыць, даўнавата не меў, - сказаў шафёр. У кабіну заляцела пчала і з гудзеннем пачала біцца аб ветравое шкло. Шафёр працягнуў руку і асцярожна пасунуў пчалу да акенца кабіны, і там яе падхапіў вецер. - Здольнікам цяпер хана, - зноў загаварыў шафёр. - Адным трактарам адразу дзесяць сем'яў зганяюць. Трактары такога нарабілі! Заворваюць участак, а арандатара - прэч. Як гэта толькі стары твой утрымаўся? - Яго язык і сківіцы зноў заняліся забытай ужо гумкай, сталі жаваць яе і перакідваць з боку на бок. Кожны раз, як ён адкрываў рот, між губамі ў яго відаць быў язык, які ганяў гумавую жвачку з месца на месца.
- Я даўно не меў вестак з дому. Сам пісаць не люблю, бацька таксама не аматар. - Пасажыр паспешліва дадаў: - Але пісаць мы ўмеем, была б толькі ахвота.
- Працаваў дзе-небудзь? - Зноў такі ж дапытлівы, хітравата дагодлівы і быццам абыякавы тон. Шафёр зірнуў на палі скрозь паветра, якое трымцела ад спёкі, і, засунуўшы гумку за шчаку, каб не перашкаджала, плюнуў у акно.
- Канешне, працаваў, - адказаў пасажыр.
- Так я і думаў. Па руках відаць - мазолістыя. Кірка ці сякера, а то і кувалда. Я такое заўважаю. Ганаруся гэтым.
Пасажыр пільна паглядзеў на шафёра. Колы грузавіка, коцячыся па шашы, напявалі сваю бясконцую песню.
- Цябе яшчэ што-небудзь цікавіць? Дык я раскажу. Чаго табе дарма галаву ламаць.
- Ну вось, ужо і зазлаваў. Я ў чужыя справы не соваюся.
- Я сам усё раскажу. Мне таіць няма чаго.
- Ды кінь ты, не злуй. Проста я люблю да ўсяго прыглядацца. Хутчэй час ідзе.
- Я ўсё раскажу. Зваць мяне Джоўд, Том Джоўд. Бацька таксама Том Джоўд. - Вочы пасажыра заслала смугой, калі ён глянуў на шафёра.
- Кінь злаваць. Я гэта проста так.
- Я таксама проста так, - сказаў Джоўд. - Стараюся жыць ціха, нікога не крыўдзіць. - Ён змоўк, паглядзеў на сухія палі, на змардаваныя спёкай купкі дрэў, што віднеліся ўдалечыні скрозь гарачае паветра. Тады дастаў з бакавой кішэні капшук і паперу і скруціў цыгарку - між каленяў, там не так цягнула ветрам.
Шафёр жаваў сківіцамі мерна і задумліва, як карова. Ён моўчкі чакаў, калі згладзіцца ўражанне ад таго, што было сказана, і ледзь толькі пачуццё няёмкасці рассеялася, сказаў:
- Хто не сядзеў цэлымі днямі за рулём, той не ведае, што гэта такое. Гаспадары не дазваляюць браць спадарожнікаў. Вось і ганяеш з канца ў канец адзін, як пракляты, калі не хочаш нарвацца на звальненне. А з табой я, чаго добрага, нарвуся.
- Цаню, - сказаў Джоўд.
- Некаторыя хлопцы ў дарозе чорт што вырабляюць. Адзін, паверыш, вершы складае, каб хутчэй ішоў час. - Ён крадком глянуў на Джоўда, ці не зацікавіць яго такое незвычайнае паведамленне. Джоўд маўчаў, утаропіўшыся на дарогу, на белую дарогу, што бегла ўдалячынь мяккай хвалістай лініяй па ўзгорках. Не дачакаўшыся адказу, шафёр пачаў гаварыць далей: - Адзін яго верш я крыху памятаю. Там пра яго самога і двух яго прыяцеляў - раз'язджаюць па свеце, п'янствуюць, дэбашыраць. Шкада, не магу ўсё пераказаць. Ён там такіх доўгіх слоў накруціў, сам гасподзь бог не разбярэцца. Памятаю толькі адно месца: «Нам раз стрэўся афрыканец, у яго пратуберанец, нібы хобат у слана». Пратуберанец - гэта выступ такі. Ён сам мне ў слоўніку паказваў. Ні на момант са сваім слоўнікам не расставаўся. Пад'едзе да закусачнай, закажа кавы з пірагом, а сам уткнецца носам у слоўнік. - Шафёр замаўчаў. Гаварыць аднаму так доўга было не вельмі прыемна. Краем вока ён глянуў на пасажыра. Той сядзеў моўчкі. Шафёру стала ніякавата, і ён зрабіў яшчэ адну спробу ўцягнуць Джоўда ў гутарку. - Ты чуў ад каго-небудзь такія даўжэзныя словы?
- Ад прапаведніка, - адказаў Джоўд.
- Проста шалееш, калі чуеш такія слоўцы. Прапаведнік - справа іншая, з ім лясы тачыць не будзеш. Наогул, злосць бярэ, калі так гавораць, але хлопец той быў весялун. Усе ведалі, што ён смехам гэта робіць, а не дзеля выхвальства: вось які я разумны! - Шафёр супакоіўся - цяпер, прынамсі, пасажыр яго слухаў. Ён зрабіў круты паварот, ажно шыны віскнулі. - Вось я і кажу, - працягваў ён гаварыць, - некаторыя хлопцы немаведама якія штукі адпальваюць. Даводзіцца. Здурэць можна - сядзіш увесь час адзін, і толькі дарога перад вачамі мільгае. Пра вадзіцеляў грузавікоў балбочуць, нібыта яны толькі і робяць, што жаруць. Ездзяць з аднаго бара ў другі і булачкі з катлетамі ядуць.
- І днююць і начуюць у барах, - уставіў Джоўд.
- Прыпынкі мы, вядома, робім, але не дзеля таго, каб есці. Нам есці рэдка калі хочацца. Едзеш-едзеш - абрыдне дарэшты. Спыняцца можна толькі каля бараў, а раз ужо спыніўся, дык трэба што-небудзь заказаць. Пачэшаш язык з дзяўчынай за стойкай, папросіш кубак кавы, пірага кавалак. Трохі адпачнеш. - Шафёр паволі жаваў гумку, падпраўляючы яе языком.
- Цяжка вам даводзіцца, - абыякава прамовіў Джоўд.
Шафёр падазрона зірнуў на пасажыра - у яго словах яму пачулася насмешка.
- Вядома, нялёгка, - раздражнёна сказаў ён. - Здаецца, што тут такога: адседзеў за абаранкам свае восем, дзесяць ці чатырнаццаць гадзін у дзень - і ўсё. Але дарога табе ў душу ўядаецца. Даводзіцца нешта рабіць. Хто спявае, хто насвіствае. Радыёпрыёмнікі ставіць кампанія не дазваляе. Некаторыя бяруць з сабой бутэльку, але гэты сорт людзей у нас доўга не трымаецца. - Крыху фанабэрліва ён дадаў: - Я ў дарозе ніколі не п'ю.
- Ніколі? - перапытаў Джоўд.
- Ніколі! Трэба ў людзі выбіцца. Задумаў я паступіць на завочныя курсы. Механікам буду. Справа няцяжкая. Сядзі сабе дома ды вучыся, урокі лёгкія. Я гэта сур'ёзна надумаў. Тады ўжо не буду вадзіць грузавікі. Няхай іх хто іншы водзіць.
Джоўд дастаў з бакавой кішэні пляшку віскі.
- Можа, глынеш, хочацца ж? - падражніў шафёра Джоўд.
- Не, слова даў. І не дакрануся. Што-небудзь адно: альбо піць, альбо вучыцца.
Джоўд адкруціў каўпачок, два разы пацягнуў з рыльца, зноў закрыў бутэльку і засунуў яе ў кішэню. Па кабіне разліўся моцны і рэзкі пах віскі.
- Ты ўвесь нейкі ўзбуджаны, - сказаў Джоўд. - Што з табой - дзяўчыну завёў?
- Гэта само сабой. Але галоўнае - трэба ў людзі выбівацца. Свае мазгі я даўно ўжо трэнірую.
Ад віскі Джоўд адчуў сябе вальней. Ён скруціў яшчэ адну цыгарку і запаліў.
- Цяпер ужо мне недалёка, - сказаў ён.
Шафёр таропка загаварыў:
- Мне піць няма як. Я ўвесь час трэнірую сваю памяць. Два гады назад спецыяльны курс прайшоў. - Ён паляпаў правай рукой па абаранку руля. - Дапусцім, я праязджаю міма пешахода. Я да яго ўважліва прыглядаюся, а як праеду, стараюся прыгадаць усё - і якая ў яго адзежа, якія чаравікі, галаўны ўбор, яго паходку, рост, колькі ён прыблізна важыць, і асаблівыя прыкметы на яго твары, калі яны ёсць. У мяне гэта нядрэнна атрымліваецца. Іншы раз думаю, ці не заняцца мне яшчэ вывучэннем дактыласкапіі, тады можна сапраўдным экспертам стаць. Проста дзіва, колькі чалавек можа ўсяго ў памяці ўтрымаць.
Джоўд хуценька глынуў з бутэлькі. Апошні раз зацягнуўся дымам разлезлай самакруткі і мазольнымі пальцамі раздушыў гарачы кончык. Старанна расцёршы недакурак, высунуў руку ў акенца, і вецер садзьмуў труху з яго далоні. Вялікія шыны бадзёра спявалі сваю песню, коцячыся па шашы. Джоўд утаропіўся на дарогу, і ў яго спакойных цёмных вачах зайграла хітраватая ўсмешка. Шафёр замаўчаў, насцярожана пакасіўся на пасажыра. Доўгая верхняя губа Джоўда расцягнулася, агаліўшы зубы, і плечы яго затрэсліся ад бязгучнага смеху.
- І доўга ж ты падбіраешся, прыяцель.
Шафёр не павярнуў у яго бок галавы.
- Да чаго я падбіраюся? Пра што ты?
Губы Джоўда зноў стуліліся, схаваўшы яго вялікія зубы, ён аблізнуў іх, як сабака, двума заходамі, ад сярэдзіны да куткоў рота.
- Сам ведаеш, пра што, - у голасе ў яго пачуліся рэзкія ноткі. - Ты мяне з ног да галавы вокам абвёў, як толькі ўбачыў. Думаеш, не заўважыў?
Пазіраючы праз ветравое шкло, шафёр з такой сілай сціснуў рулявое кола, што пабялелі кісці рук.
- Ты добра ведаеш, адкуль я іду, - сказаў Джоўд.
Шафёр маўчаў.
- Ведаеш, ці ж не так? - не сунімаўся Джоўд.
- Ну ведаю... Праўдзівей, здагадваюся. Толькі мяне гэта не тычыцца. Мне сваіх клопатаў хапае. Што мне да таго? - адным духам выпаліў шафёр. - Я ў чужыя справы не лезу. - Ён змоўк, відаць, чакаючы адказу. Пабялелыя рукі ўсё яшчэ моцна сціскалі абаранак руля.
Праз акенца ў кабіну заляцеў конік, апусціўся на прыборны шчыток і пачаў чысціць крыльцы сваімі каленчатымі спружыністымі ножкамі. Джоўд працягнуў руку, раздушыў пальцамі цвёрдую, падобную на чэрап, галоўку насякомага і выкінуў яго за акно, на вецер. Зноў бязгучна засмяяўшыся, ён пацёр пальцамі, каб сцерці з іх рэшткі раздушанага коніка.
- Памыляецеся, містэр, - сказаў ён. - Нічога я хаваць не збіраюся. Так, я сядзеў у Макалестары. Чатыры гады адседзеў. Адзежу мне гэтую далі там перад выхадам. Пляваць мне, няхай усе ведаюць. Цяпер я дадому іду, да бацькі, на працу мне наймацца не трэба, дык навошта адмоўчвацца?
Шафёр сказаў:
- Мяне гэта не тычыцца. У чужыя справы я носа не соваю.
- Не соваеш? У цябе ж нос на восем міль наперад вытыркнуўся. Ты мяне ім так абнюхаў, як авечка капусту.
Шафёр насупіўся.
- Ты мяне не так зразумеў... - пачаў ён вяла.
Джоўд засмяяўся:
- Ты хлопец што трэба - падвёз мяне. Ну, адбыў я тэрмін. Дык што? Хочаш ведаць, за што мне далі?
- Мяне гэта не тычыцца.
- Цябе нічога не тычыцца - ганяеш сваю чортаву махіну ўзад і ўперад і больш ведаць нічога не хочаш. А цяпер глянь - бачыш палявую дарогу?
- Ну.
- Там я выйду. Ты, пэўна, у штаны напусціў - так карціць даведацца, за што мяне пасадзілі. Ну, не буду мучыць цябе. - Рокат матора стаў глушэйшы, песенька шын паніжэла тонам. Джоўд дастаў сваю бутэльку і зноў разок прыклаўся да рыльца. Грузавік пад'ехаў да грунтавой дарогі, якая пад прамым вуглом адыходзіла ад шашы, і затармазіў. Джоўд вылез і стаў каля акна кабіны. Выхлапная труба ленавата выпускала свой шызаваты дымок. Джоўд нахіліўся да шафёра. - Чалавеказабойства, - скорагаворкай прагаварыў ён. - Вось табе яшчэ адно доўгае слова. А прасцей кажучы, забіў я чалавека. Атрымаў сем гадоў. Мне скінулі да чатырох, бо сядзеў я ціха, як мыш.
Шафёр правёў позіркам па твары Джоўда, стараючыся запомніць яго рысы.
- Ні пра што такое я ў цябе не пытаўся, - сказаў ён. - Мая справа старана.
- Можаш раззваніць па ўсіх забягалаўках, адсюль і да самай Тэксалы. - Джоўд усміхнуўся: - Ну, бывай, дружа! Хлопец ты неблагі. Толькі памятай: хто пасядзеў у каталажцы, той здалёку пачуе, куды вецер вее. Ты і рота яшчэ раскрыць не паспеў, а мне было ўжо ўсё ясна. - Джоўд пляснуў далонню па металічных дзверцах: - Дзякуй, што падвёз. Бывай! - Ён павярнуўся і пайшоў на палявую дарогу.
Хвіліну шафёр моўчкі глядзеў яму ўслед, потым крыкнуў:
- Шчасліва!
Не азіраючыся, Джоўд памахаў рукой. Матор зароў, заскрыгатала перадача, і вялікі чырвоны аўтафургон скрануўся з месца.
Бетонную стужку шашы з бакоў абступала густая высахлая трава з паніклым, пераблытаным бадыллём, і каласкі і галоўкі яе ашчацініліся асцюкамі і калючкамі: аўсюк - каб учапіцца ў сабачую поўсць, лісахвост - каб уплесціся ў конскую шчотку, канюшына - каб ухапіцца сваімі шчацінкамі за авечую воўну; не абуджанае яшчэ жыццё чакала, калі яго рассеюць, разнясуць на ўсе бакі, кожнае семечка было ўзброена адмысловым прыстасаваннем - кручочкам ці парашуцікам, дроцікам ці клубочкам з вострымі іголачкамі, і ўсё гэта чакала якой-небудзь жывёліны ці ветру, манжэтаў мужчынскіх штаноў ці падола жаночай спадніцы, чакала бяздзейна, але мабілізаваўшы ўсе свае сродкі, нерухома, але ў поўнай гатоўнасці да вандроўкі.
Сонечныя промні падалі на траву і грэлі яе, а ў цяні пад былінкамі варушыліся і снавалі казюлькі - мурашкі і мурашыныя львы, што ставілі ім пасткі; конікі, якія раз-пораз выстрэльвалі ў паветра, бліснуўшы жаўтлявымі крыльцамі; падобныя да маленечкіх армадзілаў макрыцы ўпарта прабіраліся кудысьці на сваіх незлічоных кволых ножках. А па траве ўсцяж дарогі, міма палатна, паўзла, цягнучы выгнуты купалам панцыр, балотная чарапаха - то ў адзін бок паверне, то ў другі. Яе шурпатыя лапы з жоўтымі кіпцямі разграбалі траву, не ступалі па ёй, а прадзіраліся праз яе, цягнучы на сабе грувасткі шчыт. Ячменнае зерне саслізгвала па ім, варсістае насенне канюшыны падала на яго і кацілася на зямлю. Цвёрдая дзюба чарапахі была трохі разяўлена, халодныя вочы насмешліва пазіралі наперад з-пад арагавелых надброўных дугаў. За ёю цягнуўся след - каляіна прымятай травы, наперадзе ўзгоркам узвышаўся дарожны насып. Чарапаха спынілася, высока задрала галаву, паміргала, прыжмурыла вочы, зіркнула ўгору, потым уніз і пачала ўзбірацца па адхоне. Кіпцюрастыя пальцы пярэдніх лап выпрасталіся, але зямлі не крануліся. Заднія ногі пачалі падпіхаць панцыр, і ён зашоргаў па траве, потым па жвіры. Чым круцейшы рабіўся насып, тым упарцей працавала чарапаха. Заднія лапы коўзаліся, зрываліся, падштурхоўваючы панцыр, лускаватая галава вытыркнулася наперад на ўсю даўжыню доўгай шыі. Панцыр памалу падымаўся па адхоне, пакуль шлях яму не перасек бетонны борцік шашы ў чатыры цалі вышынёй. Заднія ногі, нібы незалежныя ад тулава, падштурхнулі яго ўгору, да самага краю бар'ера. Шыя выцягнулася, і чарапаха глянула цераз борцік на шырокую цэментавую гладзь. Тады пярэднія лапы, якімі яна ўпіралася ў борцік, напружыліся, пасунуліся вышэй, і панцыр паволі палез уверх і перадам лёг на борцік. Тут чарапаха дала сабе адпачыць. Чырвоная мурашка шмыгнула пад панцыр, пад мяккае брушка, і раптам галава і ногі чарапахі схаваліся і браніраваны хвост шуснуў убок, пад свой шчыт. Чырвоную мурашку раздушыла паміж брушкам і лапай. Пад панцырам апынуўся і каласок аўсюка, змецены туды пярэдняй лапай. Чарапаха доўга ляжала нерухома, потым зноў высунулася галава на доўгай шыі, і халодна-насмешлівыя старэчыя вочы паглядзелі па баках, а з панцыра зноў высунуліся лапы і хвост. Заднія ногі заварушыліся, напружыліся, панцыр пераваліўся цераз борцік, і пярэднія ногі павіслі над палатном шашы. Але заднія падштурхоўвалі панцыр усё далей і далей, і нарэшце цэнтр цяжару перамясціўся, пярэдняя частка тулава нырнула ўніз, кіпці заскрэблі па бетоне, і чарапаха апынулася на насціле дарогі. А на яе пярэдніх лапах, абвіўшыся вакол іх сваёй бадылінай, засеў каласок аўсюка.
Цяпер ісці было лягчэй, і затэпалі ўсе чатыры нагі, панцыр, пагойдваючыся, папоўз наперад. Насустрач ехала адкрытая машына, за рулём сядзела жанчына гадоў сарака. Яна заўважыла чарапаху і крута збочыла ўправа, шыны віскнулі, узвіхрыўся пыл. Пярэднія колы на імгненне падскочылі ў паветра і адразу апусціліся. Шыны зноў счапіліся з палатном дарогі, і машына пайшла далей, толькі не так хутка, як раней. Чарапаха схавалася ў панцыр, але цяпер зноў высунулася з яго і пачала паспешліва перабіраць нагамі, бо бетон быў пякучы.
Наперадзе паказаўся невялічкі грузавічок, і, пад'ехаўшы, шафёр убачыў чарапаху і скіраваў проста на яе. Пярэдняя шына чыркнула па самым краі панцыра, падкінула чарапаху ўгору, як завостраны шпянёк, закруціла, як манету, і чарапаха скацілася з шашы. А грузавічок зноў вярнуўся на правы бок дарогі. Чарапаха доўга ляжала на спіне, схаваўшыся ў панцыр. Нарэшце высунуліся ногі, заварушыліся, шукаючы апоры, каб перавярнуцца. Пярэднія лапы намацалі абломак кварцу, панцыр пачаў пераварочвацца і неўзабаве плёхнуўся на траву купалам угору. Каласок аўсюка вываліўся, і тры востраканечныя зернеткі ткнуліся ў зямлю. Чарапаха папаўзла з насыпу і сваім ніжнім шчытком прысыпала іх пяском. Потым выбралася на палявую дарогу і, паторгваючыся, пасунулася па ён, выворваючы панцырам плыткі хвалісты равок у пыле. Старэчыя насмешлівыя вочы глядзелі проста наперад, арагавелая дзюба трохі разявілася, лапы з жоўтымі кіпцямі раз-пораз слізгалі па пыле.
Калі Джоўд пачуў, што грузавік зрушыў з месца і паехаў, набіраючы хуткасць, а дарога перарывіста загула пад напорам гумавых шын, ён спыніўся, павярнуўся і глядзеў яму ўслед, пакуль машына не знікла з вачэй. Ён так і застаўся стаяць, узіраючыся ў мігатлівае блакітнае марыва. У задуменні выняў з кішэні сваю пляшку, адкруціў металічны каўпачок, асцярожна пацягнуў з рыльца, правёў у ім языком і аблізаў губы, каб да канца адчуць смак віскі.
Ён паспрабаваў прыгадаць: «Там нам стрэўся афрыканец...», але далей ніяк не ішло. Тады ён адвярнуўся ад шашы і паглядзеў на дарогу, што пад прамым вуглом ішла ў поле. Шчодра прыпякала сонца, аселы пыл ляжаў, не патрывожаны ветрам. Каляіны на дарозе да краёў засыпала пылам. Джоўд зрабіў некалькі крокаў, і лёгкі, як мука, пыл заклубіўся перад яго новымі жоўтымі чаравікамі, зацерушыў іх і зрабіў шэрымі.
Ён нахіліўся, развязаў шнуркі і адзін за другім зняў абодва чаравікі. З асалодай размяў потныя ногі, пераступаючы імі ў гарачым пыле і прасейваючы яго струменьчыкамі між пальцаў, пакуль скура на ступнях, падсохшы, не сцялася. Тады зняў пінжак, закруціў у яго чаравікі і засунуў скрутак пад паху. Нарэшце ён пакрочыў па дарозе, узнімаючы перад сабой пыл, які потым слаўся нізкім воблачкам за яго спінай.
З правага боку дарогі цягнулася агароджа - дзве ніткі калючага дроту на вярбовых калах. Слупкі былі крывыя, няроўна абрэзаныя. Калі развіліна была на належнай вышыні, дрот ляжаў на ёй, калі не - яго трымаў абвязаны вакол слупка ржавы абрывак пакавальнага дроту. За агароджай, паваленая ветрам, спёкай і сухменню, ляжала кукуруза, і лісцевыя пазухі на сцёблах былі даверху забітыя пылам.
Джоўд ішоў дарогай, і воблачка пылу цягнулася па яго слядах. Крыху наперадзе ён убачыў выпуклы панцыр чарапахі, якая марудна паўзла па пыле, неяк рыўкамі перастаўляючы няўклюдныя ногі. Джоўд спыніўся - захацеў паглядзець на чарапаху, і цень яго ўпаў на яе. Галава і ногі імгненна схаваліся, кароткі тоўсты хвост шуснуў убок, пад панцыр. Джоўд падняў чарапаху і перавярнуў дагары нагамі. Спіна ў яе была шаравата-карычневая, пад колер пылу, а ніжні шчыток крэмава-жоўты, чысты і гладкі. Джоўд вышэй падсунуў пад паху свой скрутак і правёў пальцам па брушным шчытку, потым націснуў на яго. Ён быў мякчэйшы за верхні. Чарапаха высунула лускаватую галаву - намагалася зірнуць уверх, на палец Джоўда, сутаргава торгаючы нагамі. Яна намачыла Джоўду на далонь, не перастаючы бездапаможна біцца ў яго ў руках. Джоўд перавярнуў яе спінай угору і ўкруціў у пінжак разам з чаравікамі. Ён адчуваў, як яна валтузіцца там, тыцкаецца і перабірае лапамі. Джоўд пайшоў далей, прыспешыў крок, крыху заграбаючы мяккі пыл пятамі.
Наперадзе, узбоч дарогі, чахлая, абсыпаная пылам вярба адкідала на зямлю рабы цень. Яе ўбогае, кволае вецце згіналася над дарогай, рэдкая, чэзлая крона нагадвала аблезлую курыцу. Джоўд абліваўся потам. Сіняя кашуля пацямнела на спіне і пад пахамі. Ён насунуў кепку на лоб, пацягнуўшы за брылёк, і той перагнуўся пасярэдзіне, кардонная пракладка зламалася - цяпер ужо кепка ніколі не будзе выглядаць, як новая. Ногі неслі яго ўсё шпарчэй да адзінокага дрэва. Ён ведаў - там будзе цень, прынамсі, хоць палоска ценю ад ствала, бо сонца прайшло ўжо зеніт. Гарачыя промні апякалі патыліцу, у галаве злёгку шумела. Ён не бачыў падножжа вярбы, бо яна расла ў маленькай западзіне, вільгаць там не так хутка высыхае, як на роўных месцах. Ён ішоў усё хутчэй - спяшаўся ўцячы ад сонца, і нарэшце пачаў спускацца па схіле. Раптам ён апасліва запаволіў крок, бо палоска ценю была ўжо кімсьці занятая. Прыхінуўшыся спінай да камля, на зямлі сядзеў чалавек. Сагнутыя ў каленях ногі ён склаў крыж-накрыж, і босая правая ступня дасягала амаль галавы. Ён засяроджана насвістваў мелодыю факстрота «Так, сэр, гэта мой бэбі» і таму не чуў крокаў Джоўда. Задраная ўгору ступня мерна адбівала такт. Тэмп быў не танцавальны. Чалавек перастаў свістаць і заспяваў тонкім кволым тэнарком:
Так, сэр, ён мой збавіцель,
Хрыс-тос мой збавіцель,
Хрыс-тос мой збавіцель, сэр.
Чорта, клянуся,
Я ўжо не баюся,
У мяне ёсць збавіцель цяпер.
Ён пачуў крокі Джоўда, толькі калі той ступіў у рэдкі цень ад аблезлай кроны, перастаў спяваць і павярнуў у яго бок галаву. Доўгая, кашчавая, з туга нацягнутай скурай на твары, яна сядзела на шыі, мускулістай і жылістай, як бадыль сельдэрэю. Запаленыя, чырванаватыя павекі прыкрывалі ад сонца вялікія, выпуклыя вочы. Безвалосыя смуглыя шчокі льсніліся, поўныя губы выдавалі не то насмешку, не то пажадлівасць. Скура так шчыльна абцягвала яго дзюбасты, касцісты нос, што прасвечвалі храсткі пераносся. Ні на шчоках, ні на доўгім бледным ілбе не было ніводнай кропелькі поту. Лоб у яго быў ненатуральна высокі, з тонкімі блакітнымі жылкамі на скронях. Не менш як палова твару была над вачыма. Жорсткія сівыя валасы распаліся няроўнымі пасмамі - відаць, зачэсаныя пальцамі. На ім былі штаны-камбінезон і сіняя кашуля. Баваўняная куртка з меднымі гузікамі і карычневы, залаплены, у тлустых плямах капялюш ляжалі на зямлі каля яго. Шэрыя ад пылу парусінавыя туфлі на гумавай падэшве валяліся паасобку там, дзе ён іх скінуў з ног.
Чалавек доўга глядзеў на Джоўда. Сонечнае святло глыбока пранікала ў яго карыя вочы і запаліла ў зрэнках залатыя іскрынкі. Калі ён падняў галаву, жгут мускулаў у яго на шыі яшчэ больш наструніўся.
Джоўд моўчкі стаяў у дзіравым цяні. Ён зняў кепку, выцер ёю спацелы твар і разам са скручаным пінжаком кінуў на зямлю.
Не высоўваючыся з ценю, чалавек выцягнуў ногі і зарыў пальцы ў пыл.
Джоўд сказаў:
- Фу! На дарозе пячэ, як у пекле.
Чалавек пільна паглядзеў на яго.
- Ці не Том гэта Джоўд, сынок старога Тома?
- Ага, - сказаў Джоўд. - Ён самы. Дамоў іду.
- Мяне ты, пэўна ж, не памятаеш, - сказаў чалавек, і пухлыя губы яго скрывіліся ва ўсмешцы, адкрыўшы вялікія конскія зубы. - Ды дзе табе помніць. Ты толькі тое і рабіў, што дзяўчатак за косы цягаў, замест таго каб мае казані слухаць. А ў адной дзяўчынкі ўсё наравіў коску з каранямі выдзерці, а слова святое міма вушэй прапускаў. Ты, напэўна, забыўся, а я памятаю. Давялося мне і цябе, і дзяўчо тое далучыць да ласкі боскай. Абаіх у арашальнай канаве ахрысціў. А ўжо ж адбіваліся як, вішчалі, што тыя кацяняты.
Джоўд паглядзеў на яго зверху і раптам засмяяўся:
- Дык ты ж прапаведнік! Вось ты хто - наш прапаведнік! Мо толькі якую гадзіну назад я пра цябе аднаму хлопцу расказваў.
- Былы прапаведнік, - спахмурнеў чалавек. - Прападобны Джым Кейсі - з секты «Неапальная купіна». Горла драў у славу гасподню. І грэшнікаў-пакаянцаў ледзь што - у канаву; наб'еш яе імі да краёў, так і глядзі, патопяцца. Але цяпер я ўжо не той. - Ён уздыхнуў. - Цяпер я проста Джым Кейсі. Няма ў мяне тае адданасці богу. Усё ў галаву грэшныя думкі лезуць... грэшныя, але, на мой погляд, цвярозыя.
Джоўд сказаў:
- Калі ўжо што ў галаву палезе, тады і задумаешся. Я не забыў цябе. Ты ў нас неблагія маленні наладжваў. Памятаю, неяк раз ты стойку зрабіў і так, на руках ходзячы, такую пропаведзь закаціў! І завываў як апантаны. Маці маёй ты быў больш за іншых па душы. А бабка, дык тая казала, што дух з цябе божы так і б'е ў нос. - Джоўд запусціў руку ў скрутак, намацаў бутэльку і выняў з кішэні пінжака. Чарапаха варухнула лапай, але Джоўд закруціў пінжак тужэй. Потым адкруціў каўпачок з рыльца і падаў бутэльку Джыму Кейсі. - Глынеш?
Кейсі ўзяў бутэльку і тужліва паглядзеў на яе.
- Больш я ўжо не прапаведую, толькі зрэдку. Цяпер у народзе няма ўжо таго духу боскага, што быў раней. А горш за ўсё, што і ўва мне яго ані кропелькі не засталося. Бывае, праўда, калі-нікалі ўвойдзе ў цябе дух, ну і склічаш людзей на маленне. А яшчэ, здараецца, перад ядой богу малітву скажаш, калі да стала хто запросіць. Але душу я цяпер ужо ў гэта не ўкладаю. Проста просяць людзі, і я не адмаўляюся.
Джоўд зноў выцер твар кепкай.
- Няўжо ты такі ўжо святоша, што ад віскі адмаўляешся? - сказаў ён.
Кейсі глянуў на бутэльку, быццам толькі што ўбачыў яе ў сваіх руках. Потым паднёс да рота, перакуліў і зрабіў тры вялікія глыткі.
- Ну і пітво! - пахваліў ён.
- А ты як думаў? - сказаў Джоўд. - Не самагон які - фабрычнае. Яму цэлы даляр цана.
Перш чым аддаць бутэльку, Кейсі яшчэ раз прыклаўся да рыльца.
- Так, сэр! - прамовіў ён. - Так, так, сэр!
Джоўд узяў з яго рук бутэльку і адпіў, з далікатнасці не абцёршы рыльца рукавом. Потым апусціўся на кукішкі і прыставіў бутэльку да скручанага пінжака. Падабраў з зямлі сухую галінку - каб запісваць ёю свае думкі ў пыле. Змёў лісце ўбок, разраўняў далонню чысты квадрацік і пачаў выводзіць на ім рысачкі, куты і кружочкі.
- Даўнавата цябе не бачыў, - сказаў ён.
- А мяне ніхто не бачыў, - адказаў прапаведнік. - Аднаго дня ўзяў і пайшоў ад іх, цяпер усё больш сяджу адзін і сам з сабою разважаю. Боскага духу я не страціў, толькі цяпер ён нейкі іншы. Сумненні пачалі адольваць.
Кейсі сеў крыху раўней спінай да ствала. Вавёркай юркнула ў кішэню кашчавая рука і выцягнула адтуль чорную, абкусаную з усіх бакоў плітку тытуню. Ён старанна сцёр з яе саламяную труху і іншае кішэннае смецце, адкусіў кавалачак і засунуў за шчаку. Джоўд адмоўна памахаў галінкай, калі Кейсі падаў яму плітку. Чарапаха ў скрутку зноў пачала валтузіцца. Кейсі паглядзеў на пінжак, які варушыўся, нібы жывы.
- Што гэта там у цябе - курыца? Глядзі, задыхнецца.
Джоўд тужэй скруціў пінжак.
- Чарапаха, - сказаў ён. - На дарозе падабраў. Вялізная, як трактар. Браціку нясу. Малыя любяць чарапах.
- Рана ці позна яны ўсе імі абзаводзяцца. Але чарапаху пры сабе доўга не ўтрымаеш. Торкаецца, тыцкаецца сюды-туды, пакуль не знойдзе лаза, выберацца на волю, і шукай ветру ў полі. Вось і я так. Няма таго, каб проста разгарнуць Евангелле, што ляжыць пад рукой. Не, усё круціш яго, гартаеш, шукаеш нечага - адны шматкі застаюцца. Бывае, натхнюся боскім духам, а што ўслаўляць, не ведаю. Прызначэнне маё - весці людзей, але ж няма куды.
- А ты вадзі іх кругом і навокал, - сказаў Джоўд. - Доўга не думай, штурхай іх у арашальныя канавы. А свой розум мець захочуць, скажы ім, што ў пякельным агні гарэць будуць. На чорта табе ведаць, куды іх весці? Проста вядзі, і справе канец.
Цень ад ствала вярбы падаўжэў. Джоўд з радасцю перасеў у цень і зноў расчысціў і разраўняў маленькі квадрацік пылу, каб, крэслячы на ім сваім прутком, запісваць думкі. Міма іх бегла па дарозе жоўтая калматая аўчарка. Падкурчыўшы вялы хвост, нізка звесіла галаву і высунула язык, з якога капала сліна. Яна гучна, задышліва сапла. Джоўд свіснуў, але аўчарка яшчэ ніжэй апусціла галаву і пабегла трушком да толькі ёй адной вядомай мэты.
- Вось бяжыць кудысьці, - сказаў крыху закрануты за жывое Джоўд. - Пэўна, дадому.
Прапаведніка нічым нельга было адцягнуць ад яго думак.
- Кудысьці бяжыць, - паўтарыў ён. - Правільна - кудысьці кіруе. А я вось... куды кіравацца, не ведаю. У мяне на маленнях людзі, бывала, так наскачуцца, налямантуюцца, нагарланяцца на славу боскую, што як нежывыя падаюць на дол. Некаторых, каб прывесці ў прытомнасць, даводзілася акунаць у канаву. А пасля, ведаеш, што я рабіў? Пацягну якую-небудзь дзеўку ў густую траву і лягу з ёю. І так кожны раз пасля малення. А потым каяцца пачынаю. Малюся-малюся, а карысці ніякай. Другі раз зноў усе боскім духам прасякнемся, і я зноў за сваё. Нарэшце зразумеў: дайшоў я да краю - крыўлю душой перад богам. Хоць сам таго не жадаю.
Джоўд усміхнуўся і, прасунуўшы кончык языка між доўгіх зубоў, аблізнуў губы.
- Пасля такіх набажэнстваў самы раз у кусты іх цягнуць, - зазначыў ён. - Па сабе ведаю.
Кейсі ўсхвалявана падаўся наперад.
- Вось бачыш! - усклікнуў ён. - Я нарэшце зразумеў гэта і задумаўся. - Ён мерна махаў сваёй кашчавай рукой з вузлаватымі пальцамі ў такт словам. - Вось як пачаў я разважаць: я прасякся ласкай боскай, і паства мая так прасяклася ёю - аж скача і нема крычыць. А тут кажуць, што вадзіцца з жанчынай - сатанінскае насланнё. Але ж чым больш у жанчыне богам дараванай ласкі, тым мацней яе цягне ў кусты. Дык вось я і падумаў: як жа гэта так, чорт вазьмі... ох, прабач мне... як жа сатана падбярэцца да жанчыны, калі дух святы так і бруіцца з яе? Ужо ж тут, здаецца, сатане, як ні хітруй, ні з якага боку не падступіцца. А на справе выходзіць зусім іншае. - Вочы ў Кейсі блішчалі ад хвалявання. Ён паварушыў шчокамі і губамі і плюнуў. Плявок пакаціўся па зямлі, абвалокся пылам і ператварыўся ў шэры, цвёрды з выгляду шарык. Прапаведнік выставіў наперад руку, уставіў вочы на далонь, быццам на разгорнутую кнігу. - Вось я які... - ціха прамовіў ён. - Вось які я: у мяне ў руках чалавечыя душы, я адказваю за іх і адчуваю, якая вялікая ляжыць на мне адказнасць, а сам кожны раз пасля малення кладуся з жанчынай. - Ён глянуў на Джоўда. На твары ў яго была разгубленасць. У вачах - заклік аб дапамозе.
Джоўд старанна вывеў галінкай у пыле жаночы торс - грудзі, клубы, таз.
- Прапаведнікам я ніколі не быў, - сказаў ён, - таму не зяваў, калі што ў рукі плыло. І рознымі думкамі галаву сабе не забіваў - падвернецца што дзе калі, і я сам не свой ад радасці.
- Ну ясна, ты ж не прапаведнік, - упіраўся Кейсі. - Табе дзеўка - проста дзеўка. Што табе да яе. А мне жанчына - сасуд свяшчэнны. Я ратаваў іхнія душы. І вось, узяўшы на сябе такую адказнасць, я спачатку ўсяляў у іх дух святы, а потым цягаў іх у кусты.
- Можа, і мне не пашкодзіла б зрабіцца прапаведнікам, - уголас падумаў Джоўд. Ён дастаў з кішэні тытунь і паперу, скруціў цыгарку. Запаліў яе і скрозь дым пакасіўся на субяседніка. - Даўно ўжо я без жанчыны. Давядзецца наганяць.
Кейсі гаварыў далей:
- Я давёў сябе да таго, што начамі не спаў. Ідзеш на пропаведзь і зарок сабе даеш: «Сёння, далібог, не буду». Але яшчэ не дагаварыўшы, ужо ведаю - буду.
- Ажаніцца табе трэба, - сказаў Джоўд. - У нас жыў адзін прапаведнік з жонкай. Егавісты. Наверсе ў нас спалі. На маленне народ прыходзіў да іх у гумно. А мы, дзеці, падслухоўвалі, як жонцы ад яго даставалася пасля кожнага вячэрняга малення.
- Добра, што ты мне гэта сказаў, - ажывіўся Кейсі. - А то я думаў, што я адзін быў такі... Нарэшце не вытрымаў, кінуў усё і пайшоў. З тае пары ў мяне толькі адно ў галаве. - Ён падцягнуў калені да падбародка і пачаў выкалупваць гразь між пальцаў ног. - І вось спытаўся я ў самога сябе: «Што цябе мучыць? Юрлівы сверб?» І сам адказваю: «Не, не сверб, а тое, што ўсё гэта грэх». І зноў пытаюся: «Як жа гэта так? Чалавек, поўны вялікай павагі да бога, павінен, здавалася б, як мул, упірацца, каб не ступіць на грэшны шлях, дык жа ж не - яму карціць хутчэй штаны расшпіліць». - Ён мерна паляпаў двума пальцамі па далоні, быццам акуратна кладучы на яе словы радком. - Кажу я сабе: «Можа, ва ўсім гэтым няма ніякага грэху? Можа, людзі і павінны быць такімі? Можа, дарэмна мы мардуем сябе, выганяючы д'ябла?» І згадаў я, як некаторыя сёстры сцябаюць сябе метровымі абрыўкамі правадоў. І падумаў: можа, ім гэта прыемна, можа, і мне прыемна сябе мучыць? Я ляжаў тады пад дрэвам, думаў, думаў ды заснуў. Прачынаюся, гляджу - ноч, апраметная цемра. Недзе паблізу скуголіць каёт. І раптам само сабой так голасна ў мяне вырвалася: «К чорту ўсё! Ніякага грэху на свеце няма, няма і праведнасці. Ёсць толькі тое, што людзі робяць. Адно без другога не існуе. У людзей некаторыя справы добрыя, некаторыя нядобрыя, вось і ўсё, і то з якога яшчэ боку на гэта паглядзець». - Кейсі змоўк і адарваў вочы ад далоні, на якой ён нібы раскладаў словы.
Джоўд слухаў прапаведніка з усмешкай, але позірк яго быў востры і ўважлівы.
- Ты сваю веру ўсю ператрос, - сказаў ён. - З усіх бакоў абсмактаў.
Кейсі зноў загаварыў, і ў голасе яго гучалі боль і разгубленасць.
- Я пытаюся ў сябе: «Што такое боскі дух і парыванне?» І адказваю: «Гэта любоў. Я так люблю людзей, што, бывае, сэрца крывёю абліваецца». Зноў пытаюся: «А Ісуса ты хіба не любіш?» Думаю, думаю і нарэшце кажу: «Не, я нікога з такім імем не ведаю. Гісторый розных пра яго чуў шмат, але люблю я толькі жывых людзей. Сэрца разрываецца ад любові да іх, і хочацца мне зрабіць усіх іх шчаслівымі, і таму прапаведую ім тое, што можа прывесці іх да шчасця». А потым... Ну і нагаварыў я табе чортаву прорву ўсяго. Табе, можа, дзіўна, што я такія брыдкія словы ўжываю? Ніякіх тут брыдкіх слоў, на мой погляд, няма. Так усе гавораць, усе людзі, і нічога дрэннага яны гэтымі словамі сказаць не хочуць. Ну, добра, хай. А цяпер я скажу табе яшчэ нешта, да чаго я сваім розумам дайшоў, толькі прапаведніку казаць такое - кашчунства, і таму я не маю права быць прапаведнікам, бо ўвесь час думаю пра гэта і веру ў гэта.
- Пра што ты? - спытаўся Джоўд.
Кейсі хітравата глянуў на яго.
- Калі твой слых разане, не крыўдуй, га?
- Я крыўдую, толькі калі мне нос расквасяць, - сказаў Джоўд. - Ну, што ты там такое надумаў?
- Разважаў я пра духа святога і пра Ісуса: «Чаго гэта мы ўсё горнемся да бога і да Ісуса? Можа, - думаў я, - мы проста людзей любім - мужчын і жанчын? Можа, дух святы - гэта і ёсць душа чалавечая, вось і ўсё. Можа, усе людзі разам і ўтвараюць адну вялікую душу і часцінку яе знойдзеш у кожным чалавеку?» Доўга сядзеў я так, думаў, думаў і раптам усё зразумеў, усім нутром, і так ува мне гэта і засталося.
Джоўд апусціў вочы, быццам яму было не пад сілу вытрываць шчыры позірк прапаведніка.
- З такімі думкамі ні ў якай царкве не ўтрымаешся, - сказаў ён. - За такія думкі цябе прагоняць з нашых краёў. Што людзям трэба? Паскакаць і павыць. Гэта ім самая вялікая ўцеха. Бабка наша, бывала, як пачне лямантаваць, рады ёй даць было нельга. Аднаго разу здаравеннага псаломшчыка кулаком з ног зваліла.
Кейсі задуменна пазіраў на Джоўда.
- Вось я хачу спытацца ў цябе пра нешта, - сказаў ён. - Душу мне гэта кроіць.
- Што ж, пытайся. Часам і я ў чым-небудзь разбіраюся.
- Вось што... - нерашуча пачаў прапаведнік. - Я хрысціў цябе найлепшым чынам у той дзень, калі боскае ззянне сышло на мяне. З вуснаў маіх словы Хрыстовы ліліся. Ты, пэўна, нічога не памятаеш, бо ўвесь час коску тую цягаў.
- Чаму ж не, памятаю, - адказаў Джоўд. - Гэта была Сюзі Літл. Праз год яна мне ледзь палец не адарвала.
- Дык вось... Пайшло табе на карысць тое хрышчэнне? Лепш табе зрабілася ад таго?
Джоўд, падумаўшы, адказаў:
- Н-не, я нават нічога не адчуў.
- Так... А шкоду табе гэта зрабіла? Толькі падумай.
Джоўд падняў з зямлі бутэльку і адпіў.
- Нічога я не адчуў - ні добрага, ні дрэннага. Мне тады проста весела было, больш нічога. - Ён падаў бутэльку прапаведніку.
Кейсі ўздыхнуў, прыгубіў бутэльку, потым паглядзеў, колькі ў ёй на дне засталося, і зрабіў яшчэ адзін маленькі глыток.
- Вось і добра, - сказаў ён. - А то я ўсё мучыўся - ці не нарабіў я сваім умяшаннем якой-небудзь шкоды людзям.
Джоўд глянуў на свой пінжак і ўбачыў чарапаху - яна выбралася на волю і ўжо спяшалася ў тым жа кірунку, у якім паўзла, калі ён падабраў яе. Джоўд паназіраў за ёю, тады ўстаў на ногі, падняў чарапаху з зямлі і зноў закруціў у пінжак.
- Ніякіх падарункаў дзецям не прыпас, - паясніў ён. - Хоць гэту старую чарапаху прынясу.
- Дзіўная рэч, - сказаў прапаведнік. - Якраз калі ты падышоў, я старога Тома Джоўда прыгадаў. Падумаў, ці не завітаць да яго. Я заўсёды лічыў яго бязбожнікам. Як ён там жыве, стары Том?
- Не ведаю. Чатыры гады я ўжо дома не быў.
- Хіба ён не пісаў табе?
Джоўд замяшаўся.
- Тата на пісьмы не вялікі мастак і наогул пісаць не ахвочы. Прозвішча сваё чын чынам падпіша, не горш за іншых, і нават аловак паслініць. Але пісьмаў не піша. Тата заўсёды казаў: чаго нельга выказаць голасам, таго і алоўкам не варта.
- Увесь гэты час ты па свеце бадзяўся? - запытаўся Кейсі.
Джоўд недаверліва глянуў на яго.
- А ты хіба нічога не ведаеш? Ва ўсіх газетах пра мяне пісалі.
- Нічога. А што? - Кейсі закінуў нагу на нагу і ссунуўся па ствале ніжэй. Дзень ужо зайшоў далёка за поўдзень, і сонца налівалася чырванню.
Джоўд, палагаднеўшы, сказаў:
- Казаць, дык адразу ўсё, і скончым з гэтым. Але калі б ты і цяпер яшчэ быў прапаведнікам, я асцярогся б расказваць, бо ты пачаў бы маліцца за маю душу. - Ён дапіў рэшту віскі і шпурнуў паўлітэрку ўбок, і пляскатая бутэлька мякка слізганула па пыле. - Я чатыры гады праседзеў у Макалестары.
Кейсі крута павярнуўся да яго і так насупіў бровы, што высокі яго лоб зрабіўся яшчэ вышэйшы.
- Табе неахвота пра гэта гаварыць, так? Я не буду распытвацца, што ты там такое нарабіў.
- Я і цяпер зрабіў бы тое самае, - сказаў Джоўд. - Я забіў аднаго малойчыка ў бойцы. Мы добра напіліся з ім на танцах. Ён нажом мяне пырнуў, я схапіў рыдлёўку і прыкончыў яго. Размажджэрыў яму галаву.
Бровы ў прапаведніка занялі сваё звычайнае месца.
- Значыць, саромецца табе няма чаго?
- Няма, - адказаў Джоўд. - Мне далі толькі сем гадоў, бо ён першы пачаў - пырнуў мяне нажом. Выпусцілі праз чатыры гады - умоўна.
- І ніхто з тваіх не пісаў табе ўсе чатыры гады?
- Чаму ж, пісалі. Два гады назад ад маці паштоўку атрымаў, а на мінулыя Каляды бабка прыслала. О, Езус, і смеху ж было ў нашай камеры! Паштоўка з малюнкам - ёлка ўся ў блішчынках, быццам снегам абсыпаная. І вершык:
У свята светлае Каляды
Будзь жыццю, хрыстосік, рады,
І пад ёлачку ты глянь.
Падаруначак дастань.
Бабка, відаць, і не чытала яго. Пэўна, у разносчыка купіла, выбрала самую прыгожую і бліскучую. Хлопцы ў камеры жываты надрывалі ад рогату. З таго дня ўсе мяне «хрыстосікам» дражнілі. А бабка і думаць не думала, што з мяне смяяцца будуць. Бачыць, святочная паштоўка, прыгожая, бліскучая, навошта чытаць? У той год, калі мяне пасадзілі, яна свае акуляры згубіла. Да гэтага часу, думаю, яшчэ шукае.
- А як абыходзяцца яны там з вамі, у Макалестары?
- Ды нядрэнна. Кормяць па гадзінах, адзяваюць чыста, і памыцца ёсць дзе. Без жанчын толькі цяжка. - Джоўд раптам засмяяўся: - У нас там неяк аднаго тыпуса ўмоўна выпусцілі. І месяца не прайшло, як ён праштрафіўся і зноў вярнуўся да нас. У яго спыталіся, чаму ён парушыў падпіску. А ён кажа: «Якога чорта! У бацькавай халупе выгод ніякіх. Ні табе электрычнасці, ні душа. І кніжак няма, і ежа паганая». Вярнуўся, кажа, бо тут хоць якія выгоды ёсць і жратва па гадзінах. На волі, кажа, адзін супраць цэлага свету - не ведаеш, што рабіць, куды падацца. І ён украў машыну і зноў сеў. - Джоўд дастаў свой капшук, падзьмуў на курыльную кніжачку, каб аддзяліць адзін бураваты лісточак, скруціў цыгарку. - Што ж, хлапец ён не дурны, - дадаў ён. - Як падумаў я ўчора, дзе ноч буду спаць, дык страх мяне ўзяў. Прыгадаўся мне ложак і той чокнуты, што з намі быў у камеры, падумаў: што ён цяпер робіць? У нас аркестр там быў. Добры струнны аркестр. Адзін казаў, што мы маглі б нават па радыё выступаць. А сёння раніцай прачынаюся і не ведаю - падымацца ці яшчэ рана. Ляжу і чакаю, калі пабудку дадуць.
Кейсі хмыкнуў:
- Гэтак можна і не пачуць, як лесапілка вішчыць.
Жаўтавата-пыльнае святло кранула зямлю пазалотай. Кукуруза ўся залацілася. Чародка ластавак пранеслася ў небе - відаць, да нейкай вады. Чарапаха ў Джоўдавым пінжаку зрабіла яшчэ адну спробу ўцёкаў. Джоўд перагнуў папалам брылёк кепкі, і цяпер брылёк стаў падобны на крывую дзюбу вароны.
- Ну, відаць, патупаю, - сказаў Джоўд. - Скварыцца на сонцы не вельмі люблю, але цяпер ужо не так пячэ.
Кейсі рашуча падняўся.
- Старога Тома я цэлы век не бачыў, - сказаў ён. - Даўно хацеў зірнуць, як ён там. Я ж колькі часу да вас хадзіў са словам божым, грошай ніколі не браў, глыну толькі чаго-небудзь...
- Гайда, - сказаў Джоўд. - Бацька табе рады будзе. Ён заўсёды казаў, што ў цябе дзюба занадта вялікая для прапаведніка. - Джоўд падняў з зямлі пінжак і шчыльней абкруціў ім чаравікі і чарапаху.
Кейсі падабраў свае парусінавыя туфлі і ўсунуў у іх босыя ногі.
- Я не такі смелы, як ты, - сказаў ён. - Чаго добрага, яшчэ на калючы дрот наступлю ў пыле ці на шкло. Страх як баюся палец парэзаць - няма нічога горшага.
Яны нерашуча пастаялі, перш чым пераступіць лінію ценю, і раптам рушылі наперад, як два плыўцы, што спяшаюцца дабрацца да другога берага. Шпарка прайшоўшы некалькі крокаў, яны сцішылі хаду і пайшлі няспешна, быццам у роздуме. Кукурузнае бадыллё кідала на дарогу косыя шэрыя цені, у паветры стаяў душны пах нагрэтага пылу. За кукурузным полем пачаўся цёмна-зялёны бавоўнік - цёмна-зялёнае лісце з зачаткамі насенных каробачак пад пялёнкай шэрага пылу. Усходы былі няроўныя - густыя ў западзінах, дзе даўжэй трымалася вільгаць, і зусім пляшывыя на высокіх месцах. Расліны ўпарта змагаліся з сонцам. А бліжэй да гарызонту далеч зацягнулася непрагляднай рудаватай смугой. Пыльная дарога адбягала ўдалечыню хвалістай стужкай. Вербы, што раслі па берагах ручая, збочвалі разам з ім на захад, а на паўночны захад ад іх няўроблены ўчастак зямлі ўшчыльную падыходзіў да нізкага і рэдкага кустоўя. Тхала распаленым пылам, паветра было такое сухое, што слізь у носе засыхала скарынкай, а з вачэй цяклі выратавальныя слёзы.
Кейсі сказаў:
- Бачыш, як добра падымалася кукуруза, пакуль яе пылам не засыпала? Багаты быў бы ўраджай.
- Кожны год, - сказаў Джоўд, - кожны год, як я сябе памятаю, выспяваў добры ўраджай, але ні разу так і не выспеў. Дзед казаў, што зямля толькі першыя пяць гадоў добра радзіла, пакуль яшчэ перагной ад старога пустазелля ў ёй заставаўся.
Дарога апусцілася па схіле ўзгорка і паднялася на другі пакацісты груд.
Кейсі сказаў:
- Адсюль да старога Тома будзе не болей за мілю. За трэцім узгоркам, здаецца, так?
- Правільна, - адказаў Джоўд. - Калі толькі дом наш не ўкралі, як некалі бацька зрабіў.
- Дом украў?
- Ага. Знайшлі пусты мілі за паўтары адсюль і ўкралі. Сям'я, што там жыла, перабралася ў іншае месца. Дзед, бацька і Ной, брат мой, хацелі перацягнуць увесь дом цалкам, ды ён не даваўся. Толькі з паловай справіліся. Таму ён у нас такі дзіўнаваты з аднаго боку. Рассеклі на дзве часткі, у адну палову ўпрэглі дванаццаць коней і два мулы і перавезлі на свой участак. Вярнуліся па другую палову - хацелі прыбудаваць яе да першай, але раней за іх туды паспеў Уінк Мэнлі са сваімі хлопцамі і з-пад носа сцягнуў тое, што засталося. Дзед з бацькам злыя хадзілі, як чэрці, ды неяк раз выпілі з Уінкам, і ўсе трое толькі за жываты трымаліся ад рогату. Уінк кажа: дом мой цяпер як жарабец, прыводзьце вашу палову, мы іх злучым, і, можа, ад іх добрыя «шпакоўні» пойдуць. Стары Ўінк, як вып'е, мог такое вытварыць! Пасля гэтага бацька і дзед моцна з ім пасябравалі. Знаходзілі любую магчымасць выпіць разам.
- Стары Том малайчына, - пагадзіўся Кейсі. Узнімаючы пыл, яны спусціліся па схіле ўзгорка і на пад'ёме запаволілі крок. Кейсі выцер рукавом лоб і зноў надзеў свой пляскаты капялюш. - Так, Том малайчына, - паўтарыў ён. - Блюзнер, але малайчына. Бывала, на маленнях, памятаю, прасякнецца святым духам зусім крышачку, а скача ледзь не пад столь. Калі ўжо старога Тома праняло, дык сцеражыся - а то нагамі затопча. Што племянны жарабок у стойле.
Яны ўзышлі на вяршыню наступнага ўзгорка, а там дарога апусцілася да крывога рэчышча ручая з няроўнымі, абсыпанымі берагамі, збарозненымі дажджавымі вымоінамі. Кладка была з камянёў. Джоўд асцярожна перабраўся басанож на другі бераг.
- Вось ты ўсё пра майго бацьку дзяўбеш, - сказаў Джоўд. - А ты паглядзеў бы на дзядзьку, калі яго хрысцілі на Поўлкавым падворку. Бегае, гойсае, скача. Перамахнуў нават цераз разлапісты куст вышынёй з піяніна. Раз! - туды пераскочыў; раз! - назад пераляцеў і вые, як здзічэлы сабака ў месячную ноч. Бацька лічыў сябе найлепшым скакуном ва ўсёй акрузе, і як убачыў гэта, аблюбаваў такі ж шырачэзны куст, удвая толькі вышэйшы, завішчаў не сваім голасам, як свіння, што бітым шклом апарасілася, пераскочыў з разбегу цераз куст і вывіхнуў правую нагу. Тут з яго дух божы і вылецеў. Прапаведнік усё лезе памаліцца, каб нага выправілася, а бацька кажа: не, ну яго к богу, падавай мне доктара. А дзе яго ўзяць, доктара? Дантыст тут нейкі бадзячы трапіўся, ну ён яму косць і ўправіў. А прапаведнік усё роўна за сваё - памаліўся-такі.
Яны паволі адолелі нястромкі пад'ём па другі бок яра. Цяпер, калі сонца хілілася на захад, спёка пачала спадаць, і хоць паветра па-ранейшаму было яшчэ гарачае, сонечныя промні абрыналіся ўжо з меншай сілай. Па краях дарогі стаялі такія ж крывыя калы з нацягнутым на іх калючым дротам. Справа драцяная загарадзь пайшла праз баваўнянае поле, але няспелы бавоўнік быў аднолькавы з абодвух бакоў - сухі, цёмна-зялёны, зацярушаны пылам.
Джоўд паказаў рукой на межавую загарадзь:
- Вось наша мяжа. Папраўдзе, агароджа нам была без патрэбы, але ў нас завёўся дрот, і бацьку закарцела абгарадзіць поле. Цяпер, кажа, адчуваеш: сорак акраў - гэта сорак акраў! Толькі не было б ніякай агароджы, каб неяк раз ноччу дзядзька Джон не прывёз у сваім фургоне цэлых шэсць шпуль дроту. Выменяў у бацькі на парася. Дзе ён узяў гэты дрот, так і засталося тайнай. - На пад'ёме яны пайшлі цішэй, цягнучы ногі па мяккім, глыбокім пыле і адчуваючы пад ступнямі зямлю. Вочы ў Джоўда нібы ўзіраліся ў мінулае. Здавалася, ён паціху пасмейваецца сам з сябе. - Дзівак у нас дзядзька, - сказаў ён. - Узяць хоць парася гэтае, - ён хіхікнуў і моўчкі пайшоў далей.
Кейсі нецярпліва чакаў, калі Джоўд зноў загаворыць. Але працягу не было. Ён даў Джоўду яшчэ трохі часу, каб сабрацца з думкамі, і нарэшце не вытрымаў і крыху раздражнёна спытаўся:
- Ну і што ж ён з парасём гэтым зрабіў?
- Га? А-а... Ну, ён тут жа, на месцы, закалоў яго і загадаў маці пліту распаліць. Тады выразаў адбіўных і паклаў на гарачую патэльню, а рэбры з кумпяком у духоўку засунуў. Адбіўныя з'еў, тым часам рэбры згатаваліся, а як рэбры абгрыз, кумпяк падрумяніўся. Узяўся за кумпяк - адхопіць нажом добры кавалак і пхае ў рот. Мы, дзеці, ад яго не адыходзім, клянчым, і ён, нарэшце, пачаставаў нас, а бацьку ні дробачкі не даў. Нарэшце так аб'еўся, што яго званітавала, і тады ён залёг спаць. Пакуль спаў, мы з бацькам з кумпяком тым расправіліся. Раніцай дзядзька Джон падымаецца і другі кумпяк бразь - у духоўку. Бацька пытаецца: «Няўжо, Джон, ты ўсяго падсвінка з'есці сабраўся?» А той кажа: «Сабраўся, Том. Баюся толькі, каб ён не пратух, перш чым я яго ў страўнік адпраўлю, а я тухляціны не ем, хоць і страшэнна люблю свініну. Пакладзі трохі сабе на талерку, а мне аддай назад дзве шпулі дроту». Ну, сэр, бацька мой не з дурных. Даў дзядзьку Джону абжырацца, а як надышоў час таму ехаць, яшчэ больш за палову засталося. Бацька і кажа: «Ты яе засаліў бы, Джон». Але ж дзядзька не такі: захоча свежаніны, дык ты яму цэлую свінню падавай, а наб'е жывот, нават паху яе не церпіць. Паехаў, а што засталося, бацька засаліў.
Кейсі сказаў:
- Калі б я быў, як раней, прапаведнікам, дык зараз жа вывеў бы з гэтага мараль і наставіў бы цябе на шлях ісцінны. Але больш пропаведзяў ніхто ад мяне ўжо не пачуе. Як думаеш, чаму ён гэтак зрабіў?
- Не ведаю, - адказаў Джоўд. - Проста прагны на свініну. Мне і самому, як успомніў, страшэнна захацелася. За ўсе чатыры гады толькі чатыры кавалкі смажанай свініны з'еў - па адным на кожныя Каляды.
Тонам прапаведніка Кейсі прамовіў:
- Можа, Том зарэжа адкормленае цяля свайму блуднаму сыну, як у Пісанні?
Джоўд пагардліва засмяяўся:
- Ты, браце, бацькі не ведаеш. Калі ён курыцу рэжа, дык не столькі крыку ад яе, колькі ад яго самога. Не можа ён такое рабіць. Свінню заўсёды беражэ на Каляды, а яна ў верасні задзірае капыты - ад перакорму ці ад хваробы якой, пасля чаго есці яе нельга. Затое дзядзька Джон, як захочацца яму свініны, дык наесца ўжо да адвалу. Свайго не прапусціць.
Яны падняліся на грэбень узгорка і ўнізе ўбачылі ферму Джоўдаў. Том спыніўся.
- Тут нешта не так, - сказаў ён. - Зірні на дом. Штосьці нядобра. Нідзе ні душы.
Абодва стаялі, пазіраючы на невялікую купку будынін.
Землеўласнікі пачалі наведвацца на свае землі, але часцей замест сябе пасылалі пасрэднікаў. Агенты гэтыя паяўляліся на палях у лімузінах, шчупалі і расціралі пальцамі сухую зямлю, а то заганялі ў глебу земляны бур і бралі пробу. З-за парканаў сваіх апаленых сонцам падворкаў арандатары з трывогай сачылі за лімузінамі, што снавалі ўздоўж палёў. Нарэшце пасрэднік уязджаў у двор і, не выходзячы з кабіны, заводзіў гутарку з арандатарам праз акенца. Падышоўшы да машыны, арандатары першыя хвіліны стаялі, потым апускаліся на кукішкі і вадзілі па пыле падабранымі з зямлі пруткамі.
Праз адчыненыя дзверы дамкоў вызіралі кабеты, а з-за іх спін цікавалі дзеці - светлавалосыя, пад колер кукурузы, дзеці з шырока расплюшчанымі вачамі, - пачухваючы пальцамі адной босай нагі галёнку другой. Жонкі і дзеці не спускалі вачэй са сваіх мужчын, якія размаўлялі з прадстаўнікамі гаспадароў зямлі, і зацята маўчалі.
Адны агенты гаварылі мякка, бо ім брыдка было рабіць тое, на што іх паслалі; другія - раздражнёна, бо ім брыдка было праяўляць жорсткасць, а трэція - холадна-спакойна, бо даўно ўжо зразумелі, што гаспадар павінен быць халодным і спакойным. І кожнага з іх учэпіста трымала нейкая неадольная сіла. Некаторыя з іх ненавідзелі матэматыку, якая даймала іх, другія баяліся сваёй матэматыкі, а іншыя абагаўлялі яе, бо ў ёй яны знаходзілі збавенне ад думак і чалавечых пачуццяў. Калі зямлёй валодаў банк ці фінансавая кампанія, агент гаварыў: банк ці кампанія хоча... адчувае патрэбу... настойліва патрабуе... не можа абысціся... быццам банк ці кампанія - нейкая пачвара, надзеленая розумам і пачуццямі, страшыдла, якое завабіла іх у свае цянёты. Агенты не неслі адказнасці за дзейнасць банкаў і кампаній, яны былі ўсяго толькі людзі, нявольнікі, а банкі - гэта ж машына! Яна і валадар. Сёй-той з агентаў нават нямала ганарыўся тым, што ён нявольнік такіх халодных і магутных валадароў. Агенты сядзелі ў машынах і тлумачылі людзям: вы ж ведаеце, зямля спустошылася. Бог ведае колькі ўжо гадоў вы капаецеся ў ёй.
Седзячы на кукішках, арандатары ківалі галовамі, гадалі і прыкідвалі, выводзячы ўзоры ў пыле, - ага, так, ведаем, далібог. Калі б зямлю не засыпала пылам, калі б не выветрываўся верхні пласт глебы, тады б яшчэ можна было цярпець...
Пасрэднікі гнулі сваё: вы ж ведаеце, што зямля з кожным годам яшчэ больш спусташаецца. Не мне вам казаць, што з ёю робіць бавоўна, - губіць, высмоктвае з яе ўсе сокі.
Арандатары згодна ківалі галовамі: яны ўсё разумеюць, бог сведка. Калі б увесь севазварот... зямля зноў налілася б сокамі.
Гэта праўда, але цяпер ужо позна. І агенты тлумачылі механіку дзеянняў і ход думак пачвары, што схапіла іх саміх такой мёртвай хваткай.
Чалавек можа сядзець на зямлі, нават калі яму хапае толькі на пракорм і на выплату падаткаў. Такое ж зусім магчыма.
Так, такое магчыма, пакуль не здарыцца неўраджай і не прыйдзецца браць пазыку ў банку. Але, разумееце, банку ці кампаніі трэба зусім не тое - яны ж не паветрам дыхаюць і ядуць не мяса. Яны дыхаюць прыбыткам, ядуць працэнты з капіталу. Калі ім гэтага не даць, яны памруць, як мы з вамі памерлі б без паветра і без ежы. Усё гэта сумна, але так яно ёсць. Нічога не зробіш.
Людзі, што сядзелі на кукішках каля лімузінаў, узнімалі вочы, намагаліся зразумець. А ці нельга яшчэ пабыць нам тут? Можа, наступны год выдасца ўраджайны? Адзін бог ведае, якая ўродзіцца бавоўна праз год. А войны? Хіба ўгадаеш цяпер, якія цэны будуць на бавоўну? З яе ж робяць узрыўчатку, ці не так? А абмундзіраванне? Будуць войны, і цэны на бавоўну падскочаць. Можа, ужо нават у наступным годзе. Арандатары пытальна ўзнімалі ўгору вочы.
На гэта разлічваць нельга. Банк - пачвара, яна бесперапынку павінна паглынаць падаткі. Чакаць ёй няможна. Бо памрэ. Не, падаткам не павінна быць спыну. Калі пачвара застыне ў росце, ёй смерць. Ёй нельга спыняць свой рост.
Выпеставаныя пальцы пачыналі пастукваць па нізе аконнай аправы ў кабіне; заскарузлыя пальцы мацней сціскалі пруткі, што нястомна чыркалі па пыле. Жанчыны ў дзвярах прапаленых сонцам хацін уздыхалі, пераступалі з нагі на нагу, адна ступня церла другую ступню, пальцы не пераставалі варушыцца. Сабакі падыходзілі да машын, абнюхвалі іх і адно за адным палівалі ўсе чатыры колы. Куры ляжалі на гарачым пыле, распушыўшы пер'е, каб сухі пыл дабраўся да самай скуры і пачысціў яе. А ў хлеўчуку над бруднымі рэшткамі пойла просьбітна рохкалі свінні.
Людзі, што сядзелі на кукішках, зноў апускалі вочы. Што ж вы ад нас хочаце? Хіба можна памяншаць нашу долю ўраджаю, мы і так галадаем. Дзеці ніколі дасыта не ядуць. Адзежы няма - адны лахманы. Калі б у суседзяў было лепш, мы ад сораму на малітоўныя сходы хадзіць перасталі б.
І нарэшце агенты гаспадароў раскрывалі ўсю паднаготную. Арэнда сябе не апраўдала. Адзін чалавек на трактары можа замяніць дванаццаць - чатырнаццаць фермерскіх сем'яў. Плаці яму жалаванне і забірай сабе ўвесь ураджай. Мы вымушаны так рабіць. Мы ідзём на гэта неахвотна. Бо пачвара занядужала. З ёю здарылася нешта нядобрае.
Вы ж бавоўнай зямлю загубіце.
Мы ведаем. Нам трэба паспець зняць некалькі ўраджаяў, перш чым загіне зямля. Потым мы пусцім яе ў продаж. Шмат сем'яў ва ўсходніх штатах захочуць купіць тут участак.
Арандатары спалохана падымалі вочы да кабін. А з намі што будзе? Як мы пракормімся?
Вам давядзецца пакінуць свае ўчасткі. Плугі пройдуцца проста па вашых дварах.
І тады арандатары ў гневе падымаліся з кукішак і станавіліся ва ўвесь рост. Мой дзед першы прыйшоў на гэтую зямлю, ён ваяваў з індзейцамі і прагнаў іх адсюль. А бацька тут нарадзіўся і таксама ваяваў - з пустазеллем і змеямі. Потым абрынуўся няўрод, і бацька ўзяў у пазыку крыху грошай. І наша тут таксама радзіма. Вунь, бачыце, у дзвярах нашы дзеці? І яны нарадзіліся тут, у гэтым доме. Бацька быў вымушаны ўзяць пазыку. І тады зямля перайшла да банка, але мы засталіся на ёй, і нам крыху перападала з таго, што мы вырошчвалі.
Нам гэта добра вядома. Вельмі добра вядома. Мы тут ні пры чым, усё гэта банк. А банк не чалавек. І гаспадар, у якога пяцьдзесят тысяч акраў, таксама не чалавек. Ён - пачвара.
Яно так, казалі арандатары, але ж зямля гэта наша. Мы абмерылі яе, мы ўзаралі цаліну. Мы нарадзіліся на ёй, на ёй гібелі, на ёй паміралі. Няхай зямля высілілася - усё роўна яна наша. Яна наша таму, што мы на ёй нарадзіліся, яе ўраблялі, на ёй паміралі. Вось што дае права ўладаць ёю, а не паперка з нейкімі там лічбамі.
Нам вельмі шкада, але мы што? Гэта ўсё яна - пачвара. У банку няма нічога чалавечага.
Яно так, але ж банк складаецца з людзей.
Не, вы памыляецеся, вы груба памыляецеся. Банк і людзі - розныя рэчы. Бывае, што людзям, кожнаму з іх, ненавісна тое, што робіць банк, і, аднак, банк робіць сваю справу. Паверце, банк - гэта нешта большае, чым людзі. Банк - пачвара. Ствараюць яго людзі, але ўправіцца з ім не могуць.
Арандатары абураліся: дзед тут ваяваў з індзейцамі, бацька знішчаў змеяў, змагаючыся за гэту зямлю. Можа, трэба знішчыць банкі - яны страшнейшыя за індзейцаў і змеяў. Можа, давядзецца ваяваць за сваю зямлю, як ваявалі нашы дзед і бацька.
І тут пачыналі ўжо абурацца агенты гаспадароў. Прыйдзецца вам ехаць адсюль.
Дык жа зямля гэтая наша, усклікалі арандатары. Мы...
Не, не ваша. Яна належыць банку-пачвары. Вам прыйдзецца ехаць.
Мы выйдзем са стрэльбамі, як дзед наш выходзіў насустрач індзейцам. Што тады?
Што ж - спачатку прыйдзе шэрыф, потым - войска. Калі ўчэпіцеся за свае ўчасткі - вы грабежнікі, а за стрэльбы возьмецеся - вы забойцы, і так і гэтак вы - злачынцы. Банк - пачвара, не чалавек, але можа прымусіць чалавека рабіць, што захоча.
А калі нам ісці, дык куды? І як мы пойдзем адсюль? У нас грошай няма.
Вельмі шкада, гаварылі агенты. Банка - уладальніка пяцідзесяці тысяч акраў - гэта не датычыць. Вы седзіце на зямлі, якая вам не належыць. Дзе-небудзь у іншых штатах вы, можа, увосень ноймецеся на збор бавоўны. Магчыма, атрымаеце дапамогу. А чаму б вам не падацца ў Каліфорнію? Там заўсёды ёсць праца і ніколі халадоў не бывае. Там варта толькі руку працягнуць - і рві апельсіны. У Каліфорніі заўсёды што-небудзь збіраюць - толькі працуй. Чаму б вам не перасяліцца туды? І агенты запускалі маторы і ад'язджалі.
Арандатары зноў апускаліся на кукішкі і вадзілі пруткамі па пыле, прыкідвалі, разважалі. Асмаленыя спёкай цёмныя твары, вылінялыя ад няшчаднага сонца вочы. Жанчыны асцярожна спускаліся з ганка і шлі да мужоў, за імі баязліва краліся дзеці, гатовыя ў любы момант пусціцца наўцёкі. Старэйшыя сыны садзіліся на кукішкі побач з бацькамі - гэта дае табе адчуванне, што ты ўжо мужчына. Крыху счакаўшы, жанчыны пыталіся: чаго ён прыязджаў?
Мужчыны на імгненне адрывалі позірк ад зямлі, і ў вачах у іх таіўся боль. Давядзецца ехаць адсюль. Трактар, упраўляючы - тут будзе ўсё, як на фабрыцы.
Куды ж мы паедзем? - пыталіся жанчыны.
Хто ж ведае? Хто ведае?
Жанчыны таропка і моўчкі вярталіся ў хаціны, гонячы перад сабой чародку дзяцей. Яны ведалі: калі мужчыну бярэ такая крыўда, такая роспач, ён можа сарваць злосць на дарагіх яму людзях. Яны пакідалі мужчын адных - няхай думаюць, няхай мяркуюць, дапамагаючы сабе чырканнем па пыле.
Неўзабаве арандатар азіраўся навокал - кідаў позірк на пастаўленую яшчэ дзесяць гадоў назад вадакачку з доўгай, як гусіная шыя, помпай; на калоду, на якой паклала галаву не адна сотня курэй; на плуг пад паветкай і на падвешаную да бэлькі кармушку ўласнага вынаходства.
А ў хаце жанчын абкружалі дзеці. Што ж мы рабіць будзем, мама? Куды мы цяпер?
Жанчыны адказвалі: ніхто яшчэ нічога не ведае. Ідзіце, гуляйце. Толькі да таты блізка не падыходзьце. А то ён можа і набіць вас, калі не ў пару падлезеце. І жанчыны зноў браліся за працу, але ні на момант не спускалі вачэй з мужоў, што сядзелі на кукішках у пыле, збянтэжаныя і апанаваныя трывожнымі думкамі.
Трактары ехалі па дарогах і збочвалі на палі - вялізныя машыны на гусенічным хаду. Яны паўзлі, як насякомыя, і, як насякомыя, былі неверагодна энергічныя. Яны паўзлі па зямлі - апускалі гусеніцы, каціліся па іх і падбіралі іх ззаду. Дызельныя маторы пафырквалі, калі працавалі ўхаластую, а калі трактары краналіся з месца, маторы ўзнімалі аглушальны роў, які паступова пераходзіў у аднастайны рокат. Жалезныя страшыдлы ўздымалі клубы пылу і, пратыкаючы іх сваімі тупымі рыламі, ішлі напрасткі па мясцовасці, удоўж і ўпоперак, скрозь агароджы, праз двары, ныралі ў яры і вынырвалі з іх, не адхіляліся ў бакі. Ім было няважна - ёсць дарога ці няма, яны самі пракладвалі сабе дарогу. Ім было ўсё хоць бы што - узгоркі, лагчыны, канавы, агароды, будынкі.
Чалавек на жалезным сядзенні не падобны быў на чалавечую істоту: рукавіцы, вялікія акуляры, гумавая маска ад пылу на носе і роце - ён здаваўся часткай гэтай махіны, робатам. Грукат цыліндраў разносіўся па ўсёй акрузе, пранізваў паветра і зямлю, і зямля і паветра адгукаліся гулам і здрыгаліся ў лад яму. Трактарыст не меў улады над машынай - яна ішла напрасткі, кроячы дзесяткі фермаў, і таксама напрасткі вярталася назад. Лёгкі перавод рычага - і гусеніцы павярнулі б убок, але рука трактарыста не магла перавесці рычаг, бо пачвара, што стварыла трактар і паслала яго сюды, завалодала рукамі трактарыста, яго мозгам, яго мускуламі, начапіла яму шоры, надзела наморднік - шорамі зацямніла яму розум, наморднікам прыглушыла словы, зацямніла свядомасць, прыглушыла пратэст. Ён не бачыў зямлі такой, якой яна была, не мог адчуць яе сапраўднага паху; ногі яго не разміналі камякоў гэтай зямлі, не адчувалі яе цеплыні, яе сілы. Ён сядзеў на жалезным сядзенні, ногі стаялі на жалезных педалях. Ён не мог ні падбадзёрваць, ні біць, ні лаяць, ні падганяць гэту жалезную сілу і таму не мог ні падбадзёрваць, ні біць, ні падганяць самога сябе. Гэтай зямлі ён не ведаў, не валодаў ёю, у яе не верыў, ні аб чым яе не прасіў. Калі кінутае ў зямлю зерне прарастала, яго гэта не тычылася. Калі маладыя атожылкі вялі ў засуху ці гінулі ад праліўных дажджоў, трактарыста гэта хвалявала так мала, як і сам трактар.
Зямлю гэтую ён любіў не болей, чым любіў яе банк. Ён мог захапляцца трактарам - яго адшліфаванымі паверхнямі, яго магутнай сілай, выццём яго цыліндраў, але трактар не належаў яму. Трактар цягнуў за сабой бліскучыя дыскі, якія рэзалі зямлю вострымі лёзамі - не ворыва, а хірургічная аперацыя; узняты пласт падаў направа, а другі рад дыскаў крышыў яго і валіў налева. Вострыя лёзы ззялі, адпаліраваныя зямлёй, у якую яны ўгрызаліся. А за дыскамі ішлі бароны, жалезнымі зубамі прачэсвалі зямлю - разбівалі дробныя камякі і пакідалі за сабой гладкую паверхню. Следам за бараной цягнулася сеялка - дванаццаць жалезных дзетародных членаў, выкаваных на заводзе, па волі механізмаў вывяргалі семя, метадычна і бясстрасна гвалтуючы зямлю. Трактарыст сядзеў на жалезным сядзенні і ганарыўся прамымі барознамі, пракладзенымі міма яго жадання, ганарыўся трактарам, да якога не адчуваў любові і які яму не належаў, ганарыўся сілай, над якой не меў улады. А калі ўраджай выспяваў і яго збіралі, ніхто не размінаў гарачых камякоў зямлі пальцамі, не прасейваў яе між імі. Нічые рукі не дакраналіся да насення, ніхто з заміраннем сэрца не чакаў новых усходаў. Людзі елі тое, што яны не вырошчвалі, паміж імі і хлебам знікла сувязное звяно. Зямля радзіла пад жалезам і пад жалезам паволі памірала; яе ні любілі, ні ненавідзелі, да яе не звярталіся ні з малітвай, ні з праклёнамі.
Апоўдні трактарыст спыняўся каля фермерскага дамка і даставаў сняданак - сандвічы, загорнутыя ў васкаваную паперу: белы хлеб з марынаваным агурком, з сырам, з каўбасой і торцік з кляймом, як на дэталі машыны. Ён еў без смаку. А яшчэ не выселеныя арандатары выходзілі да яго з дамоў, з цікавасцю пазіралі, як ён знімае акуляры і гумавую маску, пад якімі засталіся белыя кружкі вакол вачэй і вялікі белы круг вакол носа і рота. Выхлапная труба ціха пафырквала, бо гаручае каштавала танна і не было ніякага сэнсу выключаць дызель, каб потым зноў праграваць яго. Цікаўныя дзеці абступалі яго чародкай, абарваныя дзеці з аладкамі ў руках. Яны адкусвалі па кавалачку і прагнымі вачамі сачылі, як трактарыст раскручвае з паперы сандвічы, завостранымі ад голаду насамі ўдыхалі пах агуркоў, сыру, каўбасы. Яны не загаворвалі з трактарыстам, толькі ўважліва сачылі за рукой, што падносіла ежу да рота. Яны не глядзелі, як ён жуе, - іх вочы не адрываліся ад рукі, у якой ён трымаў сандвіч. А неўзабаве падыходзіў арандатар, які адмаўляўся пакідаць свой участак, прысаджваўся на кукішкі ў цяні трактара.
- Ці не сын ты Джона Дэвіса?
- Ён самы, - адказваў трактарыст.
- Навошта ж ты пайшоў на такую работу - супраць сваіх?
- Тры даляры ў дзень. Надакучыла поўзаць перад кожным з-за кавалка хлеба. У мяне жонка і дзеці. Трэба ж нешта есці. Тры даляры ў дзень і пастаянная праца.
- Усё так, - гаварыў арандатар. - Але праз твае тры даляры пятнаццаць ці дваццаць сем'яў сядзяць галодныя. Ледзь не сотні людзей давялося зняцца з месца, і цяпер усе яны блукаюць па дарогах. Усё праз твае тры даляры ў дзень. Ці ж гэта справядліва?
Трактарыст адказваў:
- Я пра ўсіх думаць не магу. Мая справа думаць пра сваіх дзяцей. Тры даляры ў дзень і пастаянна. Цяпер зусім іншы час, містэр, хіба не ведаеце? Калі ў цябе няма двух, пяці, дзесяці тысяч акраў зямлі і трактара, на жыццё не заробіш. Такой драбязе, як мы з вамі, няма чаго і думаць пра свой участак. Вы ж не станеце скандаліць з тае прычыны, што не можаце выпускаць «форды» альбо кіраваць тэлефоннай кампаніяй? Тое самае і з зямлёй. Нічога не зробіш. Пашукайце лепш дзе-небудзь работу за тры даляры ў дзень. Адзінае выйсце.
Арандатар пачынаў разважаць:
- Дзіўная справа: калі ў чалавека ёсць маленькі ўчастак, ён з зямлёю гэтай як бы адно цэлае, яна - частка яго самога, усё роўна - што ён, што яна. Ён ходзіць па сваёй зямлі, прыкладае да яе свае рукі, бядуе, калі яна дрэнна родзіць, калі яе залівае дажджом, бо ён і зямля - адно цэлае, толькі ён адчувае сябе мацнейшым за яе, таму што ён - гаспадар. Нават калі ўдача яго абмінае, ён усё роўна, калі мае зямлю, адчувае над ёю сваю сілу. Вось яно як.
Арандатар працягваў думаць уголас:
- А калі ў цябе вялікі зямельны ўчастак, ты яго не можаш нават вокам акінуць, не маеш часу памацаць зямлю сваімі пальцамі, адчуць яе пад нагамі, і гаспадаром робіцца не чалавек, а зямля. Чалавек не вольны рабіць тое, што хоча, не вольны думаць, як хоча. Зямля мацнейшая за яго, яна - гаспадар. А чалавек робіцца маленькім. Уладанні яго вялікія, але ён толькі прыслугоўвае ім. І гэта таксама праўда.
Трактарыст дажоўваў аштампаваны торт і кідаў скарынку ўбок.
- Час цяпер іншы, хіба не ведаеш? З такімі думкамі ў галаве дзяцей не пракорміш. Зарабляй свае тры даляры ў дзень, кармі сям'ю. Трывожыцца за чужых дзяцей не твая справа. А то пойдзе пра цябе дрэнная пагалоска, і тады не бачыць табе і гэтых трох даляраў. Думай толькі пра свае тры даляры, ні пра што іншае, а не, дык заправілы не дадуць табе і іх.
- Праз твае тры даляры мо сотня людзей блукае па дарогах. Куды нам дзецца?
- Добра, што нагадаў, - ажыўляўся трактарыст. - Выбірайцеся хутчэй. Пасля абеду я заару ваш двор.
- Калодзеж ты яшчэ раніцай заваліў.
- Ага. Баразну трэба весці роўна. Вось пад'ем і заару двор. Барозны павінны быць прамыя. І яшчэ... раз ты ўжо ведаеш майго старога, Джо Дэвіса, дык я, няхай сабе, скажу. На выпадак, калі арандатарская сям'я яшчэ не выехала, у мяне ёсць загад... Ну, усякае бывае... сам разумееш: пад'ехаў крыху заблізка да дома, лёгенька крануў яго трактарам... і за гэта мне якія два лішнія даляры. Малодшанькі мой яшчэ ніколі не насіў чаравікаў.
- Я сваімі рукамі будаваў гэты дом. Выраўноўваў старыя цвікі на абшыўку. Дротам прыкручваў кроквы да бэлек. Дом мой. Я сам яго будаваў. Пасмей толькі яго паваліць! Я стану ў акне са стрэльбай. Толькі паспрабуй пад'ехаць блізка, і я падстрэлю цябе, як труса.
- А я тут пры чым? Ад мяне нічога не залежыць. Калі я не выканаю загаду, мяне з работы прагоняць. А цяпер падумай... Ну, дапусцім, ты заб'еш мяне. Цябе павесяць, але яшчэ задоўга да таго, як на шыю табе накінуць пятлю, сюды з'явіцца другі трактарыст і паваліць твой дом. Не таго ты збіраешся забіваць, каго трэба.
- Усё так, - гаварыў арандатар. - А хто даў табе такі загад? Я да яго дабяруся. Вось з кім трэба канчаць.
- Зноў памыляешся. Ён сам атрымаў такі загад ад банка. Банк сказаў яму: «Усіх прагнаць, а не, дык вас з работы прагонім».
- Значыць, дырэктар банка... Ці праўленне. Наб'ю магазін патронамі і пайду са стрэльбай у банк.
Трактарыст гаварыў:
- Ад аднаго чалавека я чуў, што банк атрымлівае загады з усходу краіны. Апошні загад быў такі: «Дамажыцеся, каб зямля давала прыбытак, інакш мы вас закрыем».
- Дзе ж канец? У каго страляць? Перш чым памерці з голаду, я заб'ю таго, хто давёў мяне да галоднай смерці.
- Не ведаю. Можа, страляць і няма ў каго. Можа, людзі тут не вінаватыя. Можа, ты праўду кажаш: зямля сама імі распараджаецца. Ва ўсякім разе, я папярэдзіў цябе.
- Трэба падумаць, - гаварыў арандатар. - Усім нам трэба добра падумаць. Не навальніца ж гэта і не землятрус. Зло ўчынена людзьмі, і людзі павінны яго выправіць.
Арандатар адыходзіў ад трактара і садзіўся на ганак, а трактарыст запускаў грымлівы матор і кранаўся з месца. Гусеніцы апускаліся і, выгінаючыся, падымаліся, барана прачэсвала зямлю, сеялкі гвалцілі зямлю. Трактар перасякаў двор, і цвёрдая, утаптаная зямля ператваралася ў засеянае поле; трактар паварочваў, і неўзараная паласа звужалася да дзесяці футаў. Трактар рабіў новы заход, жалезны буфер угрызаўся ў вугал, крышыў сцяну, зрываў дамок з фундамента, і той валіўся набок, расціснуты, як казюлька. Трактарыст быў у аўтамабільных акулярах, гумавая маска закрывала яму нос і рот. Трактар ішоў напрасткі, зямля і паветра дрыжалі ад грукату матора. Арандатар пазіраў яму ўслед са стрэльбай у руцэ. Поплеч стаяла жонка, ззаду - прыціхлыя дзеці. І ўсе пазіралі ўслед трактару.
З вяршыні ўзгорка прапаведнік Кейсі і Том Джоўд пазіралі ўніз, на сядзібу Джоўдаў. Маленькі нефарбаваны дамок з праламаным вуглом ляжаў на баку, ссунуты з падмурка, і сляпымі пярэднімі вокнамі глядзеў у неба значна вышэй рысы далягляду. Агароджы як не было, і бавоўна расла на самым двары, шчыльна падступала да паваленага дома, акружала свіран. Прыбіральня таксама валялася на баку сярод кустоў бавоўны. Двор, колісь утаптаны босымі нагамі дзяцей, конскімі капытамі і шырокімі коламі фургона, быў цяпер узараным, уробленым полем, што зарасло цёмна-зялёным запыленым бавоўнікам. Том Джоўд доўга глядзеў на касмыкаватую вярбу каля рассохлага вадапойнага карыта для коней, на бетонную аснову, на якой раней стаяла помпа вадакачкі.
- О, Езус! - нарэшце вымавіў ён. - Чорт ведае што тут было! Нідзе ні жывой душы.
Ён паспешліва спусціўся па схіле, следам за ім - Кейсі. Зазірнуў у свіран - пуста, на падлозе рассыпана сечка. Глянуў у кут на стойла мула; калі зазірнуў туды, нешта зашаргацела па падлозе - гэта мышыны вывадак шмыгнуў, хаваючыся ад яго, пад салому. Джоўд спыніўся каля ўвахода ў паветку для гаспадарчых прылад - нічога, акрамя зламанага лемяша, клубка зблытанага вязальнага дроту ў кутку, жалезнага кола ад сенавалакушы, згрызенага мышамі хамута для мула, пляскатай бляшанкі з-пад машыннага масла, пакрытай засохлай сумессю масла і гразі, і падранага камбінезона на цвіку.
- Нічога не засталося, - сказаў Джоўд. - А ў нас было добрае гаспадарчае начынне. Не засталося нічога.
Кейсі сказаў:
- Калі б я быў яшчэ прапаведнікам, я вось бы як разважыў: гэта рука божая вас пакарала. А цяпер проста не ведаю, што і казаць. Даўно я тут не быў. І нічога такога не чуў.
Яны пайшлі да бетоннага века калодзежа - проста праз бавоўнік, на якім завязаліся ўжо каробачкі, усё дварышча было ўзарана і засеяна ім.
- Мы тут ніколі нічога не садзілі і не сеялі, - сказаў Джоўд. - Двор быў як двор. А цяпер тут з канём і не павернешся, адразу ўсё патопча.
Яны спыніліся каля сухога вадапойнага карыта; травы, што звычайна расце ў такіх месцах, ужо не было, і тоўстая старая калода рассохлася і патрэскалася. На веку калодзежа тырчалі балты, да якіх раней мацавалася помпа, разьба заржавела, гаек не было. Джоўд зазірнуў у калодзеж, плюнуў і прыслухаўся.
- Добры быў калодзеж, - прамовіў ён. - А цяпер без вады. - Яму, відаць, не хацелася падыходзіць да дома. Стоячы ля калодзежа, ён кідаў у яго камяк зямлі за камяком. - Можа, усе памерлі? Дык я пачуў бы пра гэта. Хто-небудзь сказаў бы мне.
- А можа, яны пакінулі ў доме пісьмо ці што-небудзь такое. Ці маглі яны дазнацца, што цябе выпускаюць?
- Не ведаю, - адказаў Джоўд. - Малаверагодна. Мне самому толькі тыдзень назад сказалі.
- Давай глянем у дом. Вунь як ён скасабочыўся. Здорава яго дзеўбанулі!
Яны паволі пайшлі да пахіленага дамка. Два слупы, што падпіралі стрэшку над ганкам, былі вывернуты, і стрэшка ўткнулася адным краем у зямлю. Вугал дома быў праламаны, праз расшчэпленыя дошкі віднеўся кутні пакой. Уваходныя дзверы адвіслі ўсярэдзіну, а нізкая моцная загарадка перад імі адкінулася на скураных завесах у другі бок.
Джоўд ступіў на ніжнюю прыступку ганка - тоўсты брус дванаццаць на дванаццаць цаляў.
- Ганак на месцы, - сказаў Джоўд. - Але ў доме нікога... ці, можа, маці памерла. - Ён паказаў на загарадку. - Калі б маці была недзе тут, загарадка была б на засаўцы, - позірк яго пацяплеў. - Усё з таго дня, як у Джэйкабсаў свіння з'ела дзіцянё. Мілі Джэйкабс пайшла па нешта ў свіран. Вяртаецца, а свіння дзіця ўжо даядае. Мілі была цяжарная і так зайшлася ад крыку і енку, што з розуму кранулася. Так і засталася ненармальная. А маці нашай гэта паслужыла перасцярогай. Ніколі загарадку зачыніць не забывалася. Значыць, так... з'ехалі або памерлі. - Ён падняўся на развернуты ганак і глянуў у кухню. Шыбы ўсе паразбіваныя, на падлозе каменне, масніцы і сцены перакошаныя, на ўсім тонкі пласт пылу. Джоўд паказаў рукой на асколкі шкла і каменне. - Дзеці, - сказаў ён. - Яны дваццаць міль прабягуць, абы акно дзе выбіць. Я сам такі быў. Яны нюхам чуюць, дзе пустуе дом. Ледзь толькі хто выедзе, яны - раз! - і там. - На кухні было пуста - ні стала, ні табурэткі, ад пліты толькі след, праз круглую адтуліну коміна свіціцца неба. На палічцы над зліўной ракавінай - штопар і відэлец без тронкаў. Асцярожна ступаючы, Джоўд прабраўся ў пакой, і пад ім застагналі дошкі. Каля самай сцяны на падлозе валяўся стары нумар штотыднёвіка «Леджэр» з пажаўцелымі, загнутымі ў ражках старонкамі. Джоўд зазірнуў у спальню - ні ложка, ні крэслаў. На сцяне каляровая ілюстрацыя - дзяўчына-індыянка, подпіс: «Чырвонае Крыло». Каля сцяны жалезная перакладзіна ад ложка, у куце - высокі жаночы чаравік на гузіках з задраным угору наском і дзіркай у пад'ёме. Джоўд падняў яго, з усіх бакоў агледзеў.
- Яго я памятаю, - сказаў ён. - Ён мамін. Зусім разваліўся. Яна яго шмат гадоў насіла. Яе любімыя чаравікі. Цяпер ясна - яны паехалі... і ўсё з сабой пазабіралі.
Сонца апусцілася нізка, і цяпер яго промні пранікалі ў пакой праз верх нахіленых вокнаў і паблісквалі на вострых тарцах пабітых шыб. Нарэшце Джоўд павярнуўся і выйшаў. Спусціўся з ганка, сеў на яго, паставіўшы ногі на шырокую ніжнюю прыступку. Па палях разлівалася вячэрняе святло, ад кустоў бавоўны падалі на зямлю доўгія цені, палыселая вярба таксама адкідала выцягнуты цень.
Кейсі прысеў каля Джоўда.
- Няўжо яны зусім нічога табе не пісалі? - запытаўся ён.
- Не. Я ж казаў табе. Яны не з тых, што пішуць пісьмы. Бацька мог бы, але не хацеў. Ён не аматар пісаць. Ад адной толькі думкі пра гэта яго ў дрыжыкі кідала. Бланк якога-небудзь заказу ён запоўніць табе не горш, чым хто іншы, а каб ліст напісаць - нізашто.
Яны сядзелі побач, пазіраючы ўдалячынь. Джоўд паклаў свой згорнуты пінжак каля сябе. Рукі яго машынальна скруцілі цыгарку, разгладзілі яе і запалілі; ён глыбока зацягнуўся і пусціў дым праз нос.
- Нешта тут нядобрае, - сказаў ён. - А што такое, даўмецца не магу. Розная дрэнь у галаву лезе. Дом павалены, нікога няма...
Кейсі сказаў:
- Вунь там канава была, у якой я вас хрысціў. Ты хлопчык някепскі быў, толькі дужа натурысты. Учапіўся дзяўчынцы той у коскі, як бульдог. Я вас - хрысціць у імя духа святога, а ты яе не адпускаеш. Стары Том кажа: «Ты яго з галавой». Я і піхнуў цябе пад ваду, і ты, толькі калі ўжо бурбалкі пачаў пускаць, пальцы расчапіў. Нядрэнны ты быў, толькі вельмі ўпарты. З такіх вось малых часцяком адчайныя мужчыны вырастаюць.
Худая кошка, крадучыся, выйшла са свірна, прабралася праз кусты бавоўніку і падышла да ганка, бясшумна скокнула на яго і, нізка прынікшы да насцілу, падпаўзла да людзей. Спынілася між імі крыху ззаду і распластала на дошках хвост, паторгваючы кончыкам. Яна сядзела, пазіраючы ўдалячынь, - туды ж, куды глядзелі людзі. Джоўд азірнуўся.
- А божухна! - усклікнуў ён. - Глянь, хто тут! Выходзіць, усё ж такі нехта застаўся. - Джоўд працягнуў руку да кошкі, але тая адскочыла, села крыху далей, падняла лапку і пачала лізаць падушачкі. Джоўд здзіўлена пазіраў на яе. - Цяпер я ведаю, што тут было, - раптам сказаў ён. - Кошка падказала мне, якая ў нас тут бяда ўчынілася.
- Калі б толькі тут... - прамовіў Кейсі.
- Ага. Не толькі ў нас, на нашай ферме. Чаму кошка не пайшла да суседзяў - да Рэнсаў? І чаму ніхто не садраў абшыўкі з дома? Ён ужо тры ці чатыры месяцы пустуе, а ніхто ні дошчачкі не ўзяў. Свіран з добрых тоўстых дошак, на доме не горшыя, аконныя рамы на месцы - ніхто не паквапіўся. Так не бывае. Гэта мне і было дзіўна, і я ўсё галаву ламаў - што такое здарылася?
- І да чаго дадумаўся? - Кейсі нахіліўся, зняў з ног туфлі, паставіў босыя ступні на прыступку і паварушыў доўгімі пальцамі.
- Толкам ні да чога. Думаю, і суседзяў нікога не засталося. Ці ж уцалела б уся гэтая габлёўка, калі б хто з іх астаўся? Дзе там! Неяк раз на Каляды паехаў Альберт Рэнс у горад Аклахому - з усім кодлам: з жонкай, дзецьмі, з сабакамі і ўсякай там усячынай. У госці да стрыечнага брата выбраўся. А суседзі падумалі, што Альберт зусім з'ехаў, нікому ні слова не сказаўшы, - можа, ад крэдытораў ратаваўся ці ад якой помслівай жанчыны ўцёк. Праз тыдзень вяртаецца, а ў хаце пусценька - ні пліты, ні ложкаў, вокны без рам, у сцяне з паўднёвага боку прарэха ў восем футаў - пакой проста з двара ўвесь перад вачамі. Пад'язджае Альберт да дома, а М'юлі Грэйуз дзверы і калодзежную помпу вывозіць. Потым Альберт тыдні два хадзіў па суседзях - дабро сваё збіраў.
Кейсі з асалодай пачухаў голыя пальцы ног.
- А ніхто не заўпарціўся? Так усё і аддалі?
- Аддалі, а што? Яны ж не кралі. Думалі, што ён зусім паехаў, ну і ўзялі хто што. Ён назад усё ў іх забраў, акрамя падушкі ад канапы з вышытым індзейцам. Альберт усё казаў, што дзед наш яе ўзяў. Маўляў, у жылах у яго індзейская кроў, вось і пацягнула яго на падушку тую. Што ж, дзед наш і праўда ўзяў яе, толькі напляваць яму было, што там індзеец. Проста старому яна дужа спадабалася. Паўсюль цягаў яе з сабой - дзе сядзе, там пад сябе і падсоўвае. Так і не аддаў Альберту. Кажа: «Калі яму без падушкі гэтай жыццё не міла, няхай прыходзіць. Толькі каб са стрэльбай, а не, дык я мазгаўню яму знясу, калі сунецца да мяне па сваю падушку». Пад канец Альберт здаўся і падарыў дзеду падушку. А неяк раз дзеду яшчэ ўбілася ў галаву. Пачаў курынае пер'е збіраць. Надумаў пярыну сабе на ложак зрабіць. Ды толькі ў яго з гэтага нічога не выйшла. Якраз завёўся ў нас пад домам скунс - бацька ашалеў ад злосці. Гакнуў яго брусом два на чатыры, каб не смярдзеў, а маці ўсё пер'е дзедава спаліла, каб дух паганы адбіць, а то проста хоць з дому ўцякай. - Джоўд засмяяўся. - Дзед у нас крутога нораву. Сядзіць, бывала, на падушцы і кажа: «Няхай Альберт толькі заявіцца. Я, кажа, блазнюка гэтага навыварат выверну, як споднікі».
Кошка зноў падкралася да людзей і села між імі, выцягнуўшы на дошках ганка хвост і паторгваючы вусамі. Сонца зусім нізка апусцілася да гарызонту, пыльнае паветра здавалася залаціста-чырвоным. Кошка асцярожна выцягнула лапку і кранула Джоўдаў пінжак. Джоўд азірнуўся.
- Чорт! Зусім забыўся пра чарапаху. Навошта яна мне цяпер?
Ён раскруціў чарапаху і засунуў яе пад дом. Але яна адразу вылезла адтуль і папаўзла, як і раней, на паўднёвы захад. Кошка скокнула і ўдарыла чарапаху лапай па выцягнутай галаве, драпанула кіпцюрамі па нагах. Старая насмешлівая лускаватая галава схавалася, тоўсты хвост шуснуў убок пад панцыр, і, калі кошка, знудзіўшыся ад чакання, адышла ад яе, чарапаха зноў пакіравала на паўднёвы захад.
Том Джоўд і прапаведнік Кейсі глядзелі, як чарапаха ідзе, - няспешна перабірае нагамі і штурхае свой цяжкі выпуклы панцыр дакладна ў адным кірунку. Кошка нейкі час кралася за ёю, потым тугім лукам выгнула спіну, пазяхнула і, тоячыся, вярнулася да людзей, што сядзелі на ганку.
- І куды яе панесла? - запытаўся Джоўд. - Колькі я ўжо гэтых чарапах пабачыў на сваім вяку! Заўсёды некуды паўзуць. Заўсёды ім кудысьці трэба.
Шэрая кошка зноў села між імі, крыху ззаду. Павекі яе раз-пораз зліпаліся. Шкурка на спіне торгнулася да шыі ад блышынага ўкусу і паволі адышла назад. Кошка падняла лапку, абнюхала яе, выпусціла кіпцюры, схавала іх і лізнула падушачкі бледна-ружовым языком. Чырвонае сонца кранулася гарызонту і распаўзлося, як медуза, небасхіл над ім пасвятлеў і нібы ажыў. Джоўд разгарнуў пінжак і ўзяў свае новыя жоўтыя чаравікі. Перш чым надзець іх на ногі, ён змахнуў далонню пыл з голых ступняў.
Раптам прапаведнік, які ўглядаўся праз палі ўдалячынь, сказаў:
- Сюды нехта ідзе. Глядзі! Вунь, проста праз бавоўнік.
Джоўд павярнуў галаву ў той бок, куды паказваў пальцам Кейсі.
- Ага, праўда нехта ідзе, - сказаў ён. - Такі пыл падняў, што і не разгледзіш. Каго гэта чорт нясе? - Яны сачылі за постаццю, што набліжалася да іх у вячэрнім святле, і пыл, які ўзнімаўся з-пад яе ног, заходняе сонца афарбавала ў чырвань. - Мужчына, - сказаў Джоўд. Чалавек падыходзіў усё бліжэй, і, калі ён параўняўся са свірнам, Джоўд сказаў: - Гэ, я яго ведаю. І ты яго ведаеш - гэта М'юлі Грэйуз. - І гукнуў: - Гэй, М'юлі! Здарова!
Чалавек раптам спыніўся - спалохаўся вокліку, а потым пайшоў шпарчэй. Ён быў худы, нізкаваты ростам. Рухі яго былі рэзкія і хуткія. У руцэ ён трымаў джутавы мех. Сінія джынсы на каленях і ззаду злінялі, стары чорны пінжак ад былога гарнітура быў увесь у плямах, рукавы на плячах выдраліся з проймаў, на локцях працерліся да дзірак. Чорны капялюш быў такі ж брудны, як і пінжак, і стужка трымалася толькі адным канцом - другі матляўся пры кожным кроку. Твар у М'юлі быў гладкі, без маршчын, але насуплены, як у капрызнага дзіцяці, губы сцяліся ў вузкую шчылінку, у маленькіх вочках ці то гнеў, ці то горыч.
- Ты памятаеш М'юлі? - запытаўся Джоўд у прапаведніка.
- Вы хто такія? - крыкнуў ім на хаду М'юлі Грэйуз. Джоўд не адказаў. М'юлі падышоў бліжэй, яшчэ бліжэй і нарэшце разгледзеў твар тых, хто сядзеў на ганку. - Тфу ты, чорт! - выгукнуў ён. - Гэта ж Томі Джоўд! Калі цябе выпусцілі, Томі?
- Два дні назад, - адказаў Джоўд. - Дабіраўся дамоў на спадарожных машынах. І глянь, што я ўбачыў. Дзе ўсе мае, М'юлі? Чаму дом развернуты, а двор бавоўнай засеяны?
- Дзякуй богу, што я міма ішоў, - сказаў М'юлі. - Стары Том вельмі непакоіўся за цябе. Калі твае сабраліся выязджаць, я тут у вас на кухні сядзеў. Сказаў Тому, што адсюль нікуды не пайду, так і сказаў, далібог, праўда, а Том мне кажа: «Баюся я дужа за Томі. Раптам ён вернецца, а нас нікога няма. Што ён падумае?» Я кажу: «Можа б, ты яму пісьмо напісаў?» А Том мне: «Можа, і напішу. Падумаю. А калі не, дык ты ўжо на ўсялякі выпадак паглядай, калі застанешся: Томі, можа, вернецца». «Я застануся тут, кажу, аж пакуль усе чэрці ў пекле не перамерзнуць. Яшчэ не нарадзіўся той чалавек, які згоніць М'юлі Грэйуза з гэтай зямлі». І так і не сагналі пакуль што.
Джоўд нецярпліва перабіў яго:
- Дзе ж мае ўсе? Як ты тут ваяваў, потым раскажаш. Куды мае падзеліся?
- Калі банк пачаў усё заворваць трактарамі, яны таксама вырашылі не здавацца. Дзед твой выйшаў са стрэльбай, пачаў страляць і пацэліў у фару, а трактар усё роўна ідзе. Хлопца, што сядзеў за штурвалам, стары забіваць і не думаў, а гэта быў Уілі Філі, і Ўілі ведаў, што баяцца яму няма чаго - папёр проста на дом і як дзеўбане яго, як трасяне, ну як сабака пацука. Тут старога Тома ўсяго і перакруціла. Нешта з ім сталася. З таго часу сам не свой зрабіўся.
- Дзе ж яны цяпер?
- Дык я ж расказваю. Тры разы ганялі фургон дзядзькі твайго Джона. Пліту вывезлі, помпу і ўсе ложкі. Ты толькі паглядзеў бы, як ложкі везлі, - разам з малымі, бабка з дзедам прымасціліся ў галавах, а брат твой Ной сядзіць сабе, пакурвае цыгарэтку і сплёўвае цераз борт, быццам гэта яго не тычыцца. - Джоўд адкрыў рот, каб нешта сказаць, але М'юлі апярэдзіў яго: - Яны ўсе ў дзядзькі Джона.
- А-а!.. у Джона! А што яны там робяць? Пачакай жа хвілінку, М'юлі, не лапачы, спачатку адкажы мне, а потым гавары сабе што хочаш. Што ж яны там робяць?
- Бавоўну акучваюць - усе, нават малыя і дзед твой. Грошы збіраюць, машыну хочуць купіць і на Захад ехаць - там лягчэй жывецца. Тут зусім кепска. За акучванне пяцьдзесят цэнтаў з акра, ды яшчэ і такую работу трэба вымольваць.
- Яны яшчэ не паехалі?
- Не, - адказаў М'юлі. - Думаю, не. Апошні раз чуў пра іх дні чатыры назад: Ноя сустрэў - ён паляваў на трусоў, сказаў, што яны збіраюцца ехаць тыдні праз два. Джона таксама папярэдзілі, каб выязджаў. Ты да Джона ідзі - усяго восем міль. Усе яны там - набіліся ў хату, як на зіму суслікі ў нару.
- Ну добра, - сказаў Джоўд. - Цяпер садзіся на свайго канька і давай. Ты ні кропелькі не перамяніўся, М'юлі. Пачнеш расказваць пра адно, а цябе цягне на другое - тыцкаешся то туды, то сюды.
М'юлі агрызнуўся:
- І ты ж не перамяніўся. Малым як быў развязны нахаба, такі і застаўся. Ці не вучыць мяне, як жыць, сабраўся?
- Не, ані. Калі табе закарціць усунуцца галавой у кучу бітага шкла, ніхто ўжо цябе не адгаворыць - усё роўна палезеш. А прапаведніка нашага ты пазнаеш, М'юлі? Гэта ж яго прападобнасць Кейсі.
- А як жа, вядома, пазнаю. Я на яго адразу проста не паглядзеў. Добра яго памятаю.
Кейсі падняўся з ганка, і яны паціснулі адзін аднаму рукі.
- Рады бачыць цябе, - сказаў М'юлі. - Чорт ведае колькі часу ты ў нашых краях не паказваўся.
- Я пайшоў адсюль, каб разабрацца ў некаторых сумненнях, - адказаў Кейсі. - А што тут такое нарабілася? Чаму людзей з зямлі зганяюць?
У М'юлі так моцна сцяліся губы, што верхняя, як дзюбка папугая, навісла над ніжняй. Бровы насупіліся.
- Мярзотнікі! Сукіны дзеці! - сказаў ён. - Будзьце пэўныя, я з месца не скрануся. Ад мяне яны так проста не збавяцца. Як прагоняць, я зноў вярнуся, а калі яны думаюць уціхамірыць мяне, загнаўшы на той свет, дык добра, я прыхаплю з сабой дваіх-траіх гэтай сволачы за кампанію. - Ён паляпаў рукой па выпнутай кішэні пінжака. - Нікуды адсюль я не пайду. Бацька мой прыйшоў сюды пяцьдзесят гадоў таму назад. І я адсюль нікуды не пайду.
Джоўд запытаўся:
- А навошта спатрэбілася ім зганяць людзей з зямлі?
- О, яны тут шмат чаго нагаварылі! Ты ж памятаеш, як было апошнія гады. Пыл узнімаўся такі, што ўсё скрозь засыпаў і паганіў, і ўраджаю не хапала нават на тое, каб заткнуць зад аслу. Усе ў даўгі залезлі да бакалейшчыка. А ты ведаеш, што гэта такое. Тады тыя, каму належыць зямля, пачалі гаварыць: «Арандатары нам больш не па кішэні. Тая доля, якая ідзе ім, - гэта той мінімальны прыбытак, які мы не можам дазволіць сабе страціць». І яшчэ: «Калі мы збяром усю нашу зямлю ў адно, дык і тады яна ледзь-ледзь акупіцца». І трактарамі ўсіх здольнікаў з фермаў сагналі, усіх, акрамя мяне, і, далібог, праўда, я адсюль не пайду. Ты мяне ведаеш, Томі. Колькі жывеш, мяне ведаеш.
- Чыстая праўда, - сказаў Джоўд, - колькі жыву.
- Дык вось, разумееш, я не дурань. Канешне, зямля тут не вельмі добрая. І ніколі добрай не была, на ёй толькі скаціну пасвіць. Цаліну тут дарма разворвалі. А пад бавоўнай яна амаль зусім як мёртвая стала. Калі б мяне ніхто адсюль не гнаў, я, можа, даўно ўжо з'ехаў бы ў Каліфорнію - вінаград там еў бы і апельсінчыкамі, як захочацца, ласаваўся. Але калі сукіны гэтыя сыны загадваюць мне выбірацца... дык Хрыстом-богам клянуся, не падпарадкуюся я такому загаду!
- Правільна, - сказаў Джоўд. - Проста розуму не дабяру, чаму гэта бацька так лёгка скарыўся. І дзіўна, што дзед нікога не падстрэліў. Ён нікому не дазваляў над сабой верхаводзіць. І маці не цярпела ніякіх указчыкаў. Я раз бачыў, як яна вандроўнага гандляра рондалямі жывой курыцай біла за тое, што ён ёй слова насуперак сказаў. У адной руцэ курыца, у другой сякера - збіралася галаву ёй адсекчы. Пайшла на чалавека з сякерай, але забылася, што ў якой руцэ, і давай яго курыцай лупіць. Курыца гэтая нам так у талерку і не трапіла. Нічога ад яе не засталося - адны ногі ў руцэ. Дзед ледзьве са смеху не лопнуў. Дык чаму ж гэта мае так адразу з месца зняліся?
- Ды вось прыехаў да нас сюды адзін малойчык і пачаў угаворваць і мазгі нам круціць. «Вам, кажа, трэба ехаць адсюль. Толькі я тут не вінаваты». - «Дык хто ж, пытаюся, вінаваты? Скажыце хто, і я ведаю, што з ім зраблю». - «Гэта ўсё Зямельна-жывёлагадоўчая кампанія Шоўні. А я ўсяго толькі загад выконваю». - «А хто ён такі, гэты Шоўні?» - «Чалавека такога няма. Гэта кампанія». Проста да шаленства давёў. Выходзіць, і скардзіцца няма на каго. Шмат хто страціў надзею знайсці каго-небудзь, на кім можна было б гнеў свой спагнаць, а я стаю на сваім. У мяне ўся кроў кіпіць. Я нікуды адсюль не пайду.
Вялізная чырвоная кропля сонца памарудзіла над гарызонтам, потым упала ўніз і знікла, неба над тым месцам заззяла, і рванае воблачка акрываўленай анучкай павісла на небакраі. Усходнюю частку неба зацягнула празрыстай імглой, і на зямлю з усходу папоўз змрок. Скрозь сутонне трымцела, пабліскваючы, першая вячэрняя зорка. Шэрая кошка пракралася да свірна і ценем шмыгнула ў адчыненыя дзверы.
Джоўд сказаў:
- Ну, восем міль да дзядзькі Джона мы сёння ўжо не асілім. Капыты мае агнём гараць. Можа, пойдзем да цябе, М'юлі? Гэта ж усяго каля мілі.
- Ніякага толку. - Выгляд у Грэйуза зрабіўся збянтэжаны. - Мае ўсе ў Каліфорнію паехалі - і жонка, і дзеці, і швагер. Не было чаго есці. Яны не так азлобіліся, як я, сабраліся і паехалі. Нідзе тут няма ніякай ежы.
Прапаведнік нервова заёрзаў на месцы.
- Табе таксама трэба было ехаць, М'юлі, - сказаў ён. - Сям'ю нельга разбіваць.
- Не мог я. Ну вось быццам нешта ўчапілася ў мяне і не пускае.
- Божа, як я прагаладаўся, - сказаў Джоўд. - Цэлыя чатыры гады еў па гадзінах - хвіліна ў хвіліну. А цяпер кішкі марш іграюць. Ты што будзеш есці, М'юлі? Як ты цяпер кормішся?
М'юлі сарамліва адказаў:
- Спачатку еў жаб, вавёрак, зрэдку сабачак лугавых. А што было рабіць? Але цяпер я стаўлю драцяныя сілкі на праторынах у сухім хмызе каля ручая. Зайцы трапляюць, а то і цяцерка пападзецца. Здараецца - скунсы, яноты. - Ён нахіліўся, падняў свой мяшок і вываліў з яго ўсё на ганак. Два трусы і заяц глуха шмякнуліся на дошкі мяккімі пушыстымі камячкамі.
- Божа мілы! - усклікнуў Джоўд. - Я ўжо больш за чатыры гады ў рот не браў свежай дзічыны.
Кейсі падняў аднаго труса і спытаўся, трымаючы яго ў руцэ:
- Падзелішся з намі, М'юлі Грэйуз?
М'юлі неяк няёмка пакруціўся.
- Выбіраць не даводзіцца, - сказаў ён і змоўк, збянтэжаны недалікатнасцю сваіх слоў. - Не тое хацеў я сказаць. Не тое. Я меў на ўвазе... - ён запнуўся, - я вось што меў на ўвазе: калі ў аднаго чалавека ёсць харч, а другі стаіць побач галодны... дык тут выбіраць не даводзіцца. Ну дапусцім, я забяру сваіх трусоў, адыду ўбачок і сам іх праглыну, адзін... Разумееш?
- Разумею, - адказаў Кейсі. - Яшчэ як разумею. Бачыш, Том, М'юлі да нечага дадумаўся. За нешта такое ўхапіўся, толькі яно задужа цяжкое яго разуменню, і майму таксама.
Том радасна пацёр рукі:
- У каго ножык ёсць? Зараз мы возьмемся за гэтых небарак грызуноў. Ужо ж мы іх разбяром!
М'юлі ўсунуў руку ў кішэню штаноў і выняў вялікі складаны нож з рагавымі тронкамі. Том Джоўд узяў яго, адсланіў адно лязо і панюхаў. Потым некалькі разоў ткнуў лязом у зямлю, зноў паднёс да носа, выцер аб калашыну і паспрабаваў вастрыё вялікім пальцам.
З задняй кішэні штаноў М'юлі дастаў вялікую пляшку з вадой і паставіў на ганак.
- На ваду не вельмі налягайце, - сказаў ён. - Гэта ўсё, што ёсць, а калодзеж тут завалілі.
Том узяў труса.
- Схадзіце хто ў свіран, пашукайце там дроту пакавальнага. Агонь распалім з паламаных дошак абшыўкі. - Ён агледзеў труса. - Труса разабраць няма лягчэй. - Ён адцягнуў шкурку на спінцы, крыху падрэзаў яе, усунуў у дзірку пальцы і рвануў. Скура знялася, як панчоха, - саслізнула з цельца да самай шыі, да лапак. Тады паклаў шкурку на зямлю, успароў трусу жывот; вываліў на шкурку вантробы і кінуў усё ў бавоўнік. На ганку ляжала амаль гатовае да смажання маленькае цельца з аголенымі мышцамі. Джоўд адсек усе чатыры нагі і разрэзаў удоўж мясістую спінку. Калі ён ужо ўзяўся за другога труса, да ганка падышоў Кейсі са зблытаным скруткам дроту. - Цяпер раскладзіце агонь і ўваткніце ў зямлю калю, - сказаў Джоўд. - Божа, які ў мяне апетыт разыграўся на гэтых звяркоў! - Ён выпатрашыў другога труса і зайца, парэзаў іх і нанізаў кавалкі мяса на дрот. М'юлі з Кейсі адарвалі ад развернутага вугла некалькі дошак, распалілі вогнішча і з двух яго бакоў усадзілі ў зямлю па калку для дроту.
М'юлі падышоў да Джоўда.
- Глянь, ці няма на зайцы гнайнікоў, - сказаў ён. - Не люблю есці зайцоў са скуламі. - Ён выняў з кішэні маленькі мяшэчак і паклаў на ганак.
Джоўд сказаў:
- Заяц чысценькі, як яблычак. Ох, М'юлі, ты і соллю запасся! У цябе ў кішэні, можа, і талеркі выпадкам знойдуцца і палатка? - Ён адсыпаў сабе на далонь солі і пасаліў кавалкі мяса, насаджаныя на дрот.
Затрапяталіся высокія языкі полымя, адкідваючы цені на сцены дома, сухое дрэва патрэсквала і страляла. Неба ўжо амаль зусім пачарнела, на ім выразна вылучаліся зоркі. Шэрая кошка выйшла са свірна і, мяўкаючы, пабегла да агню, але каля самага вогнішча скіравала ў кусты бавоўніку, да кучкі вантробаў. Яна кусала і прагна глытала, і з яе рота звісалі доўгія кішкі.
Кейсі сеў каля вогнішча, кідаў у агонь трэскі і падсоўваў у яго доўгія дошкі, калі яны абгаралі на канцах. Кажаны гойсалі ўзад і ўперад у слупе святла над вогнішчам. Кошка, нізка прыпаўшы да зямлі, выйшла з кустоў, села і пачала аблізвацца, мыць пыску, чысціць вусы.
Джоўд узяў аберуч дрот з нанізанымі на яго кавалкамі мяса і падышоў да вогнішча.
- Ану, М'юлі, бярыся за адзін канец. Накруці вунь на гэты калок. Ага, вось так, добра. Цяпер давай тужэй нацягнем. Лепш было б пачакаць, пакуль касцёр не выгарыць, але ў мяне ніякага ўжо цярпення. - Ён напяў дрот, падняў з зямлі палачку і перасунуў кавалкі мяса так, каб яны апынуліся над самым агнём. Агонь пачаў лізаць мяса, яно зацвярдзела і пакрылася глянцавітай скарынкай. Джоўд сеў на зямлю і стаў палачкай паварочваць мяса, каб яно не прыпяклося да дроту. - Зараз пабалюем! - сказаў ён. - У М'юлі ўсё ёсць - і соль, і вада, і трусяціна. Вось каб яшчэ і гаршчэчак мамалыгі знайшоўся ў яго ў кішэні! Гэта верх майго жадання.
М'юлі сказаў цераз вогнішча:
- Вы, хлопцы, пэўна, думаеце, што я ненармальны і што гэтак жыць нельга.
- Яшчэ чаго - ненармальны! - сказаў Джоўд. - Калі ты ненармальны, дык хай бы ўсе былі такія.
М'юлі гаварыў далей:
- Вось што дзіўна, панове. Калі мне загадалі з месца знімацца, са мной сам не ведаю што такое зрабілася. Спачатку вырашыў: пайду і пераб'ю ўсіх без разбору. Потым мае ўсе паехалі на Захад. Пачаў я бадзяцца па наваколлі. Усё недзе тут. Далёка не адыходзіў. Спаў дзе папала. Сёння надумаў у вас заначаваць. З гэтым і прыйшоў сюды. Бадзяюся з месца на месца, а сам сабе кажу: «Трэба і наглядаць за чужым дабром, каб усё было ў парадку, калі людзі вернуцца». Але я ведаў, што гэта няпраўда. Няма за чым тут наглядаць. І ніхто сюды ўжо не вернецца. А я блукаю тут, як здань на могілках.
- Чалавек прывыкае да месца, яму з ім цяжка расстацца, - сказаў Кейсі. - І да думак сваіх таксама прывыкаеш, ніяк ад іх не пазбавішся. Я ўжо больш не прапаведнік, але бясконца лаўлю сябе раптам на тым, што, сам таго не ведаючы, малітвы кажу.
Джоўд перавярнуў кавалкі мяса на дроце. З іх ужо капаў сок, і ў тым месцы, куды падалі кроплі, успыхваў язычок полымя. Гладкая паверхня мяса пачала маршчыніцца і рабіцца бледна-карычняватай.
- Панюхайце, - сказаў Джоўд. - Вы толькі гляньце і панюхайце!
М'юлі не замаўкаў:
- Як здань на могілках. Абышоў усе памятныя мне месцы. Вось ёсць за нашым надзелам кустоўе ў лагчынцы. Я там першы раз з дзяўчынай лёг. Было мне тады чатырнаццаць, і я тупаў, тузаўся і соп, як рагач, і быў настырны, як казёл. Прыйшоў я туды, лёг на зямлю, і быццам зноў са мной усё гэта адбылося. А яшчэ ёсць месца каля павеці, дзе бацьку бык насмерць забадаў. Там яго кроў на зямлі, і цяпер яна там засталася. Ніхто ніколі не змываў. І я паклаў руку на зямлю, што насыцілася крывёю майго таты. - Ён памаўчаў. - Вы думаеце, я ненармальны?
Джоўд паварочваў мяса, позірк у яго быў задумлівы. Кейсі падцягнуў калені да падбародка і ўтаропіўся на агонь. Крокаў за пятнаццаць ад людзей сядзела сытая ўжо кошка, акуратна абвіўшы хвастом пярэднія лапкі. Вялікая сава з крыкам праляцела над вогнішчам, і агонь асвятліў знізу яе белае пер'е і распасцёртыя крылы.
- Не, - сказаў Кейсі. - Проста ты нудзішся ад адзіноты, але ты нармальны.
Маленькі, туга абцягнуты скурай твар М'юлі быццам скамянеў.
- Я паклаў руку на тое самае месца на зямлі, дзе яшчэ і цяпер яго кроў. Убачыў бацьку з дзіркай у грудзях і адчуў, як ён дрыжыць, прыціснуўшыся да мяне. Потым ён паваліўся на спіну і выцягнуў рукі і ногі. Вочы памутнелі ад болю, пасля ён заціх, вочы зноў сталі ясныя... і ў неба глядзяць. Я быў яшчэ зусім малы, сяджу, не плачу, не крычу, проста сяджу і маўчу. - М'юлі таргануў галавой. Джоўд усё важдаўся з мясам на дроце. - А яшчэ я зайшоў у пакой, дзе нарадзіўся наш Джо. Ложка няма, але пакой як быў, такі і застаўся. Усё, што было, не знікла - засталося там, дзе адбылося. Там з'явіўся на свет Джо. Шырока раскрыў рот, уцягнуў паветра і як закрычыць - за мілю чуваць было, а бабка стаіць побач і ўсё прыгаворвае: «Красачка ты мая, ах ты мая красачка!» Паўтарае і паўтарае. І так заганарылася ўнукам сваім, што за адзін вечар тры кубкі разбіла.
Джоўд адкашляўся.
- Думаю, можна ўжо есці.
- Няхай прасмажыцца як след, дай яму падрумяніцца амаль да чарнаты, - сярдзіта сказаў М'юлі. - Мне пагаварыць ахвота. Даўно ўжо я ні з кім не гаварыў. Ненармальны... ну і хай ненармальны - і канец. Як здань на могілках, блукаю начамі ад аднаго суседскага дома да другога. Да Пітэрсаў, да Джэйкабсаў, да Рэнсаў, да Джоўдаў... Дамы стаяць цёмныя, як пацуковыя норы, а быў час - госці з'язджаліся, скакалі. Маленні, воклічы на славу гасподню. Былі вяселлі - і ўсё тут, у гэтых дамах. І ўзяло мяне жаданне пайсці ў горад і забіць каго трэба. Прагналі людзей трактарамі, а што ім дасць гэтая зямля? Што яны возьмуць з яе, каб забяспечыць сабе «мінімальны прыбытак»? Яны возьмуць майго бацьку, што загінуў на гэтай зямлі, нашага Джо, які з крыкам зрабіў свой першы ўдых, мяне, які торгаўся ноччу, як казёл, пад кустом. Што яшчэ яны возьмуць? Зямля спустошаная, бог сведка. У нас тут ужо колькі гадоў ва ўсіх быў недарод. А гэтыя сволачы за пісьмовымі сталамі - яны рассеклі людзей на дзве паловы дзеля сваіх «мінімальных прыбыткаў». Проста рассеклі папалам. Людзі і зямля, на якой яны жывуць, - адно цэлае. А калі яны блукаюць бяздомныя па дарогах у набітай хатнім скарбам машыне, дык яны ўжо толькі напалову людзі. Яны мерцвякі. Іх забілі гэтыя сукіны дзеці. - М'юлі змоўк, але яго тонкія губы яшчэ варушыліся, грудзі цяжка ўздымаліся. Ён сядзеў, уставіўшыся на свае асветленыя вогнішчам рукі. - Я... я даўно ўжо ні з кім не гаварыў, - сказаў ён ціха выбачлівым тонам. - Усё шастаю па наваколлі, як здань на могілках.
Кейсі падсунуў доўгія дошкі ў вогнішча, і агонь лізнуў іх і зноў шугануў угору, да падвешанага на дроце мяса. Сцены дома звонка патрэсквалі, астываючы ў начным паветры. Кейсі спакойна сказаў:
- Трэба пабачыць людзей, што пусціліся ў дарогу. Адчуваю, мне абавязкова трэба іх пабачыць. Ім патрэбна дапамога - не пропаведзі, а дапамога. Спадзявацца на царства нябеснае, калі яны яшчэ і на зямлі не пажылі? Які ўжо тут святы дух, калі ўласны іх дух зрынуты ў смутак і скруху? Ім патрэбна дапамога. Яны павінны жыць, бо паміраць ім яшчэ рана.
Джоўд нервова крыкнуў:
- Госпадзі, давайце ўжо есці, а то мяса зробіцца меншае за вараную мыш! Вы толькі гляньце. Панюхайце, які пах! - Ён ускочыў на ногі і перасунуў падсмажанае мяса далей ад агню. Тады ўзяў нож, які даў яму М'юлі, падрэзаў адзін кавалак і зняў з дроту. - Гэта прапаведніку, - сказаў ён.
- Казаў жа табе, што я ўжо больш не прапаведнік.
- Ну добра, не прапаведніку, дык чалавеку. - Джоўд адрэзаў яшчэ адзін кавалак. - А гэта табе, М'юлі, калі яшчэ не расхацеў ад засмучэння есці. Зайчаціна. Цвярдзейшае за буйвалінае мяса. - Ён сеў і ўсадзіў свае доўгія зубы ў мяса, адхапіў імі вялікі кавалак і пачаў жаваць. - Ого, як храбусціць! - Ён з прагнасцю адкусіў яшчэ.
М'юлі сядзеў, пазіраючы на сваю долю ежы.
- Можа, мне не трэба было так гаварыць, - сказаў ён. - Такое лепш трымаць у галаве.
Набіўшы поўны рот мясам, Кейсі глянуў на яго цераз вогнішча. Прапаведнік жаваў і глытаў, і ў яго на шыі пад скурай энергічна працавалі мускулы.
- Не, гаварыць трэба, - сказаў ён. - Часам апанаваны горам чалавек вылівае ўвесь свой боль у словах. Часам чалавек, які рашыўся на забойства, вылівае сваю злосць словамі, і тым усё і канчаецца. Ты правільна зрабіў, М'юлі. Нікога не забівай, перасіль сябе, калі можаш. - Кейсі зноў адкусіў мяса.
Джоўд кінуў косткі ў агонь, ускочыў і зрэзаў з дроту яшчэ адзін кавалак. М'юлі жаваў паволі, і яго маленькія неспакойныя вочкі прабягалі з аднаго свайго сутрапезніка на другога. Джоўд еў з прагнасцю звера, вакол яго рота пабліскваў тлушч.
М'юлі доўга глядзеў на яго ледзь не з бояззю. Потым апусціў руку, у якой трымаў мяса.
- Томі, - сказаў ён.
Джоўд падняў вочы, не перастаючы ўгрызацца ў мяса і жаваць.
- Га? - сказаў ён з поўным ротам.
- Томі, ты не злуеш на мяне за тое, што я загаварыў пра забойства? Ты не пакрыўдзіўся, Том?
- Не, - адказаў Том, - не пакрыўдзіўся. Што было, тое было.
- Мы ўсе ведалі, што ты невінаваты, - сказаў М'юлі. - Стары Тэрнбул гразіўся адпомсціць табе пасля турмы. Ён, кажа, забіў майго сына, і я яму не спушчу. Але суседзі адгаварылі яго, абразумілі.
- Мы п'яныя былі, - ціха сказаў Джоўд. - Падпілі на танцульках. Сам не ведаю, з чаго ўсё пачалося. Раптам пачуў, што мяне нажом пырнулі, і працверазеў. Бачу, Херб зноў замахваецца на мяне нажом. А тут ля сцяны школы рыдлёўка стаяла, і я схапіў яе і ўдарыў Херба па галаве. Я ніколі не меў нічога супраць яго. Хлопец быў добры. Яшчэ малым увіваўся вакол сястры маёй Разашарны. Не, мне Херб нават падабаўся.
- Ну, ягонаму бацьку ўсе так і казалі і нарэшце ўціхамірылі. Ад некага чуў, быццам у яго роднасць з Хэтфардам па маці, вось ён і фанабэрыцца. Не ведаю, праўда гэта ці не. Яны ўсёй сям'ёй паехалі ў Каліфорнію яшчэ паўгода таму.
Джоўд зняў з дроту апошнія кавалкі мяса і раздаў іх сваім субяседнікам. Тады зноў сеў каля вогнішча і еў ужо не так паспешліва, як раней, разжоўваў мяса старанна і выціраў рукавом тлушч з губ. А яго цёмныя прыплюшчаныя вочы задумліва глядзелі на ачахлы агонь.
- Усе падаліся на Захад, - сказаў ён. - А я падпіску даў нікуды адсюль не адлучацца. Мне ў іншы штат нельга.
- Падпіску? - запытаўся М'юлі. - Я нешта чуў пра іх, пра гэтыя падпіскі. А што гэта азначае?
- Ну, я выйшаў датэрмінова - на тры гады раней. І падпісаў умовы, якія я павінен выконваць, а калі парушу іх, мяне зноў засадзяць. Час ад часу трэба наведвацца ў паліцыю.
- Як там з вамі абыходзяцца, у Макалестары? У маёй жонкі стрыечны брат пабыў у гэтай турме, дык яму там не соладка давялося.
- Не так ужо там і блага, - адказаў Джоўд. - Не горш, як у іншых турмах. Буяніць будзеш, спуску не дадуць, гэта праўда. Але там жыць можна, калі толькі наглядчык не прыдзіраецца, бо тады ўжо справа дрэнь. Я жыў сабе нічога. Не соваў носа, куды не трэба. Навучыўся здорава арудаваць пяром. Ну птушкі там розныя і ўсякае такое - не толькі словы пісаць. Старэча мой зазлуе, калі ўбачыць, як я птушку адным росчыркам пяра малюю, а то і зусім ашалее. Не любіць ён такіх фокусаў. Калі проста пішуць яму, і то не любіць. Баіцца, думаю. Бо кожны раз, як ён убачыць што-небудзь напісанае, з яго хто-небудзь абавязкова нешта спаганяе.
- І не білі цябе ці што-небудзь такое?
- Не, я нікуды не лез. Вядома, калі цягнеш такую лямку з дня ў дзень цэлыя чатыры гады, дык гэта каго хочаш да ачмурэння давядзе. Калі ты натварыў такога, што і ўспамінаць сорамна, ёсць пра што падумаць. Але, чорт вазьмі, калі б Херб Тэрнбул палез на мяне з нажом вось хоць бы цяпер, я зноў бы гваздануў яго рыдлёўкай.
- Кожны на тваім месцы зрабіў бы так, - сказаў М'юлі.
Прапаведнік утаропіў вочы на вогнішча, і ў змроку, які рабіўся ўсё гусцейшы, яго лоб здаваўся зусім белым. Блікі ад маленькіх язычкоў полымя ігралі на яго жылістай шыі. Ён сядзеў, абняўшы калені, і патрэскваў суставамі пальцаў.
Джоўд кінуў у агонь апошнія аб'едзеныя косткі, аблізаў пальцы і выцер іх аб штаны. Тады падняўся, прынёс з ганка бутэльку з вадой, ашчадліва адпіў і, перш чым сесці зноў, перадаў бутэльку па крузе.
- Мяне вось што больш за ўсё непакоіць, - зноў загаварыў ён, - тое, што ва ўсім гэтым няма ніякага сэнсу. Калі карову маланка заб'е альбо палі залье разлівам - тут асаблівага сэнсу шукаць ніхто не будзе. Такое бывае, што зробіш? Але калі цябе бяруць і садзяць на замок на чатыры гады, тут ужо павінна быць нейкая рацыя. Людзям належыць да ўсяго сваім розумам даходзіць. Вось запраторылі мяне за краты, трымалі там, кармілі цэлыя чатыры гады. А з якой мэтай? Нібыта каб паставіць на правільны шлях і адвучыць закон пераступаць ці застрашыць карай і адбіць ахвоту другі раз рабіць такое... - Джоўд памаўчаў. - Але ўсё роўна я тое самае зраблю, калі Херб ці хто іншы палезе на мяне з нажом. Не паспею нават апамятацца. Асабліва на падпітку. Вось гэтая бязглуздзіца і трывожыць душу.
М'юлі зазначыў:
- Суддзя казаў: табе вынеслі такі мяккі прысуд таму, што не ты адзін быў ва ўсім вінаваты.
Джоўд гаварыў:
- У Макалестары сядзеў адзін пажыццёвік. Усё чытаў і вучыўся. Сакратаром пры начальніку хадзіў - перапіску за яго вёў і ўсё такое. Надта разумны, у законах разбіраўся і яшчэ ў сім-тым. Аднаго разу я з ім загаварыў пра тое, аб чым думаў, ён шмат з кніг навучыўся. І ён сказаў мне: кніжкі тут не памогуць. Я, кажа, пра турмы ўсё перачытаў - і пра сённяшнія, і пра даўнейшыя, і цяпер яшчэ менш разумею, чым калі толькі браўся чытаць. Тут, кажа, такая неразбярыха, сам чорт нагу зломіць, і ніхто рады даць не можа, а каб што-небудзь перамяніць, дык на гэта ні ў кога мазгоў не хапае. Толькі, крый божа, не ўздумай, кажа, за кніжкі засесці. Па-першае, заблытаешся яшчэ больш, а па-другое, страціш павагу да тых, хто пры ўладзе сядзіць.
- Я і так іх ні ў грош не стаўлю, - сказаў М'юлі. - Над намі тут адна толькі ўлада - «надзейны мінімальны прыбытак», ён і правіць намі. Але вось чаго і ніяк не магу ў розум узяць: як гэта Ўілі Філі згадзіўся сесці на трактар, ды яшчэ надумаў хадзіць за начальніка тут, на той самай зямлі, з якой сагналі яго сям'ю. Вось што грызе мне нутро. Калі б каго чужога прыслалі, тады, што ж, тады справа іншая, а то Ўілі ж тутэйшы. І так мяне разабрала, што я пайшоў і спытаўся ў яго ў самога. Ён проста ашалеў. У мяне, кажа, двое малых. У мяне, кажа, жонка і цешча. Ім есці трэба. Загарэўся, як чорт. Я, кажа, перш-наперш пра іх думаю. А іншыя няхай самі пра сябе паклапоцяцца. Яго, відаць, сорам узяў, вось ён і кіпеў ад злосці.
Джым Кейсі ўсё сядзеў, утаропіўшыся на апошнія язычкі полымя ў вогнішчы, вочы яго былі шырока расплюшчаныя, мускулы на шыі выпнуліся. Раптам ён усклікнуў:
- Цяпер зразумеў! Калі на чалавека можа сысці хоць каліва боскае шчырасці, дык я ўсё зразумеў! - Ён ускочыў на ногі і пачаў хадзіць узад і ўперад, ківаючы з боку ў бок галавой. - Адзін час у мяне была пераносная кафедра. Народу вечарамі находзіла чалавек з паўтысячы. Даўно гэта было, вы мяне яшчэ тады не ведалі. - Ён спыніўся, паглядзеў на Джоўда і М'юлі. - Наогул, вы заўважалі, што я ніколі не збіраў грошай пасля пропаведзі - і ў адрынах, і пад адкрытым небам?
- Бог сведка, ніколі, - сказаў М'юлі. - Тут нашы ўсе так да гэтага прывыклі, што іх злосць брала, калі іншыя прапаведнікі хадзілі па радах з капелюшом. Так, сэр, усё праўда.
- Ад ежы я не адмаўляюся, - гаварыў Кейсі. - Штаны браў, калі свае зносяцца, ці пару там старых чаравікаў, калі падэшвы ў маіх прадзіраліся так, што ходзіш амаль босы. Але з пераноснай кафедрай было інакш. Здаралася, за дзень дзесяць, а то і дваццаць даляраў збяру. Толькі радасці мне з таго не было ніякай, і я кінуў усё гэта, і як быццам на душы палягчэла. Цяпер я, здаецца, усё зразумеў. Толькі словамі выказаць не ведаю як. Бадай што, і спрабаваць не буду... але здаецца мне, што цяпер прапаведніку знойдзецца месца. Думаю, я зноў магу з пропаведзямі да людзей ісці. Яны блукаюць самотныя па дарогах, без зямлі, без прыстанішча. А калі няма даху над галавой, трэба даць ім нейкую іншую прыстань. Можа стацца... - Кейсі стаяў над вогнішчам. Шматлікія мускулы ў яго на шыі яшчэ больш напяліся, водбліскі агню глыбока пранікалі ў вочы і распальвалі там чырвоны жар. Ён стаяў і глядзеў на агонь, напружыўшы твар, нібы прыслухоўваўся да нечага, а рукі, заўсёды такія ўвішныя, гатовыя сваімі рухамі ўдакладніць, падкрэсліць або адхіліць свае ці чужыя думкі, цяпер вяла павіслі і паволі пасунуліся ў кішэні. Кажаны кружылі ў цьмяным святле вогнішча, здалёку, з палёў, глуха даносіўся ледзь чутны клёкат начной драпежнай птушкі.
Том Джоўд спакойна палез у кішэню, выняў адтуль свой капшук і пачаў рабіць самакрутку, пазіраючы паўз яе на вуголле. Ён ніяк не рэагаваў на ўсё, што гаварыў прапаведнік, быццам лічыў, што гэта асабістая справа Кейсі і абмеркаванню не падлягае.
- Начамі ляжыш на турэмным ложку, - загаварыў ён, - і ўсё думаеш: як там усё будзе, калі дамоў вярнуся? Напэўна, думалася, дзед ужо з бабкай памруць і, можа, яшчэ малыя народзяцца. Можа, нораў у бацькі крыху памякчэе. Можа, маці ўжо адпачынак сабе дасць і перакладзе хатнія клопаты на Разашарну. Я ведаў: як было, так ужо не будзе... Ну што ж, давайце спаць, а як развіднее, пойдзем да дзядзькі Джона. Я дык абавязкова пайду. А ты, Кейсі, што вырашыў - пойдзеш?
Прапаведнік усё яшчэ стаяў, пазіраючы на вуголле. Ён паволі прамовіў:
- Ага, пайду з табой. А калі твае рушаць у дарогу, паеду з імі. А там, дзе будуць людзі, буду і я.
- Калі ласка, - сказаў Джоўд. - Маці заўсёды ставілася да цябе з прыхільнасцю. Казала, такому прапаведніку можна давяраць. Разашарна тады яшчэ маленькая была. - Ён павярнуўся да М'юлі: - А ты, М'юлі, пойдзеш з намі? - Той глядзеў на дарогу, па якой прыйшлі Джоўд з Кейсі. - Дык як, пойдзеш, М'юлі? - зноў запытаўся Джоўд.
- Га? Не. Мне няма да каго ісці і няма каго пакідаць. Вунь, бачыш, святло скача ўверх і ўніз? Напэўна, аканом тутэйшага ўчастка едзе. Відаць, нехта заўважыў наша вогнішча.
Том скіраваў позірк на дарогу. Святло фар паўзло ў іх бок цераз грэбень узгорка.
- Мы нічога дрэннага не рабілі, - сказаў ён. - Пасядзелі тут трохі, толькі і ўсяго. Ніякай шкоды нікому.
М'юлі рагатнуў:
- Ха-ха! Адно тое, што мы прыйшлі сюды, ужо дрэнна. Парушэнне чужых правоў уласнасці. Тут аставацца нікому нельга. Мяне ўжо два месяцы ловяць. Вось што: калі гэтая машына едзе сюды, мы пойдзем у бавоўну і заляжам там. Далёка неабавязкова забірацца. Няхай паспрабуюць знайсці! Давядзецца ім кожны кусцік абшнарыць. Галавы толькі не падымайце.
Джоўд запытаўся:
- Што з табой сталася, М'юлі? Ты ж раней у хованкі гуляць не любіў. Злосны быў.
М'юлі пазіраў на святло фар, якое набліжалася да іх.
- Ха! - сказаў ён. - Я злосны быў, як воўк. А цяпер я злосны, як ласка. Калі ты палюеш на дзічыну, ты паляўнічы, а значыць, у цябе ёсць сіла. Такі нікога не баіцца. Але калі на цябе самога палююць - гэта ўжо зусім іншае. З табой нейкая перамена адбываецца. У цябе ўжо сілы няма. Злосць застаецца, а сілы няма. На мяне даўно ўжо палююць, я ўжо больш не паляўнічы. Можа, яшчэ і падстрэлю каго-небудзь у цемры, але кала з агароджы ўжо не вырву і нікога не пакалечу - гэта ўжо ў мінулым. І няма чаго нам з табою ашукваць адзін аднаго. Вось так.
- Што ж, - сказаў Джоўд, - ідзі хавайся. А мы тут з Кейсі пра сёе-тое пагаворым з гэтай сволаччу. - Палоска святла была ўжо зусім блізка - скокнула ў неба, знікла і зноў скокнула ўгору. Усе трое стаялі, сочачы за ёю.
М'юлі сказаў:
- Тут ёсць яшчэ адна асаблівасць, калі на цябе палююць: ты востра адчуваеш небяспеку. Калі сам палюеш, пра яе зусім не думаеш, нічога не баішся. Ты ж сам казаў: варта табе толькі ў чым-небудзь правініцца, цябе зноў запратораць у Макалестар, і прасядзіш ужо там ад званка да званка.
- Правільна. Так мне сказалі. Але хіба гэта парушэнне, калі сядзеш тут адпачыць ці ноч на голай зямлі захочаш пераначаваць? Нікому ніякай шкоды. Гэта ж не тое, што напіцца ці дэбашырыць.
М'юлі засмяяўся:
- Вось убачыш. Пасядзі тут, дачакайся машыны. Можа, гэта Ўілі Філі, ён тут цяпер за шэрыфскага наглядчыка. Ён запытаецца ў цябе: «Чаму парушаеш правы ўласнасці?» Ты ж ведаеш, ён добры паганец, і ты яму скажаш: «А табе што?» Тады Ўілі ўзлуецца і зараве: «Марш адсюль, а то арыштую». А ты ж не дазволіш кожнаму Ўілі Філі камандаваць табой і раз'юшвацца з перапуду. Ён ужо ўлез, і яму трэба неяк выблытвацца, а ты таксама цуглі закусіў і напралом ідзеш... Не, чорт, залегчы ў міжраддзі куды прасцей, няхай шукаюць. І да таго ж весялей, бо яны шалеюць ад злосці, а зрабіць нічога не могуць, а ты ляжыш сабе і толькі пасмейваешся. Паспрабуй пагавары з Уілі ці з якім іншым начальнікам, яны цябе давядуць, ты кінешся на іх, а яны цап! - і арыштуюць, і вернешся ты ў свой Макалестар яшчэ на тры гады.
- Талкова разважаеш, - сказаў Джоўд. - Кожнае тваё слова разумнае. Але вельмі ўжо не хочацца скакаць пад іхнюю дудку. Рукі так і свярбяць на гэтага Ўілі.
- У яго стрэльба, - сказаў М'юлі. - Уілі будзе страляць,бо ён шэрыфскі наглядчык. Значыць, альбо ён прыстрэліць цябе, альбо ты яго, калі стрэльбу ў яго адбярэш. Ну пайшлі, Томі. Ты проста скажы сабе: я схаваюся і яны ў дурнях застануцца. Галоўнае настроіць сябе - і ўся справа. - Яркае святло фар цяпер скіравалася проста ў неба, ужо выразна чуўся роўны гул матора. - Пайшлі, Томі. Далёка забірацца не будзем - радоў за чатырнаццаць-пятнаццаць. Адтуль пасочым за імі.
Том падняўся.
- Правільна кажаш, далібог, - сказаў ён. - Будзе так ці гэтак, мне ўсё роўна нічога не свеціць.
- Дык гайда. Вось сюды. - М'юлі абагнуў дом і вывеў іх крокаў за пяцьдзесят у баваўнянае поле. - Гэтага досыць, - сказаў ён. - Галаву толькі ніжэй апускайце, калі фары на вас накіруюць - і ўсё. Во будзе пацеха! - Усе трое разлегліся на ўвесь рост на зямлі і аблакаціліся. Раптам М'юлі ўскочыў на ногі, кінуўся да дома, праз момант-другі вярнуўся і кінуў у кусты скрутак - пінжак і загорнутыя ў яго чаравікі. - А то павязуць, каб у даўгу не заставацца, - паясніў ён. Святло фар паднялося па схіле, потым нырнула ўніз і скіравалася проста на дом.
Джоўд запытаўся:
- А не пойдуць яны з кішэннымі ліхтарыкамі шукаць нас тут? Шкада, палкі няма.
М'юлі хіхікнуў:
- Не, не пойдуць. Казаў жа я табе, што я злосны стаў, як ласка. Неяк раз ноччу Ўілі паспрабаваў сунуцца, дык я яго ззаду калом з агароджы агрэў. Зваліўся, як калода. Пасля ўсім расказваў, што на яго пяцёра напалі.
Машына пад'ехала да дома, успыхнуў пражэктар.
- Галовы ніжэй, - сказаў М'юлі. Паласа халоднага белага святла працягнулася над імі і пачала гойсаць па полі. Уцекачы не бачылі, што робіцца каля дома, але пачулі, як бразнулі дзверцы машыны, і галасы. - На святло пабаяцца выходзіць, - прашаптаў М'юлі. - Я разы два страляў па фарах. Цяпер Уілі асцярожны. Сёння не адзін прыехаў. - Яны пачулі скрып маснічын, потым убачылі святло ліхтарыка ў доме. - Можа, пальнуць? - шэптам спытаўся М'юлі. - Яны не ўбачаць, адкуль стралялі. Няхай галаву пачэшуць.
- Не трэба, - прашаптаў Кейсі. - Якая карысць? Пустая справа. Трэба так рабіць, каб ва ўсім сэнс быў.
Недзе каля дома пачуліся рыплівыя гукі і шолах.
- Жар топчуць падэшвамі, - шапнуў М'юлі. - Пяском засыпаюць. - Зноў бразнулі дзверцы машыны. Святло фар калыхнулася, зрабіла паўкруг і скіравалася на дарогу. - Ніжэй! - сказаў М'юлі, і ўсе трое ўткнуліся галовамі ў зямлю. Прамень пражэктара пралёг над імі і прачарціў поле ў розных напрамках, потым машына кранулася з месца, пачала аддаляцца, паднялася на грэбень узгорка і знікла з вачэй.
М'юлі сеў на градку.
- Уілі заўсёды робіць апошнюю спробу пражэктарам. Так не раз ужо было, і я прывык да гэтага. Ён думае, што неймаверна хітры.
Кейсі сказаў:
- Можа, хто-небудзь прытаіўся ў доме? Мы пойдзем, а нас схопяць.
- Усё можа быць, - адказаў М'юлі. - Вы тут пачакайце. Я ўсе іхнія штучкі ведаю. - Ён асцярожна пайшоў да дома - толькі лёгка пахруствалі сухія камякі зямлі пад нагамі. Кейсі і Джоўд напружана ўслухоўваліся, але там, куды пайшоў М'юлі, было ўсё ціха. Праз колькі хвілін з боку дома да іх данёсся яго голас: - Няма нікога! Ідзіце сюды!
Яны адарваліся ад зямлі, падняліся і пакіравалі да чорнай пляміны дома. М'юлі чакаў іх каля кучкі пяску, з якой выбіваліся струменьчыкі дыму, - усё, што засталося ад іхняга вогнішча.
- Я так і ведаў - нікога ў засадзе не пакінулі, - сказаў М'юлі з гордасцю. - Уілі я тады з ног збіў, па фарах разок-другі стрэльнуў - цяпер яны асцерагаюцца. Адкуль ім ведаць, хто тут хаваецца. А я ім так проста ў рукі не дамся. Каля жытла не начую. Калі хочаце, хадзем са мной, я пакажу вам, дзе можна пераначаваць. Там аб вас ніхто не спатыкнецца.
- Вядзі, - пагадзіўся Джоўд. - Мы пойдзем з табой. Ніколі і ў галаве не было, што на бацькаўскай ферме давядзецца хавацца ад каго-небудзь.
М'юлі выйшаў у поле, Джоўд з Кейсі пайшлі следам. Ступалі проста па кустах бавоўніку.
- Табе яшчэ шмат ад чаго і ад каго давядзецца хавацца, - сказаў М'юлі. Яны ішлі адзін за адным цераз грады. Неўзабаве апынуліся перад глыбокай прамыінай і саслізнулі на падэшвах на самае дно.
- Э! Я ведаю, куды ты нас завёў, галаву кладу! - усклікнуў Джоўд. - Пячора ў адхоне?
- Правільна. А як ты здагадаўся?
- Сам яе капаў, - адказаў Джоўд. - Разам з братам Ноем. Усім гаварылі, што золата шукаем, а на самай справе мы проста капалі пячоры, як усе малыя. - Берагі былі цяпер вышэй іх галоў. - Недзе тут, ужо блізка. Помніцца, павінна быць ужо зусім блізка.
М'юлі сказаў:
- Я прыкрыў яе ламаччам, каб не знайшлі. - Дно яра выраўнялася, ногі цяпер ступалі па пяску.
Джоўд сеў на чысты пясок.
- У пячору я спаць не пайду, - сказаў ён. - Лягу вось тут. - Ён згарнуў пінжак і падклаў пад галаву.
М'юлі рассунуў рукамі сухое галлё і запоўз у пячору.
- А мне добра тут! - крыкнуў ён адтуль. - Прынамсі, адчуваеш сябе ў бяспецы.
Джым Кейсі сеў на пясок каля Джоўда.
- Паспі крыху, - сказаў яму Джоўд. - Як толькі развіднее, рушым да дзядзькі Джона.
- Я спаць не буду, - адказаў прапаведнік. - Ёсць над чым галаву паламаць. - Ён сагнуў ногі ў каленях, абняў іх рукамі, падняў вочы ў неба і ўтаропіўся на яркія зоры. Джоўд пазяхнуў і закінуў руку за галаву. Абодва маўчалі, і мала-памалу зноў ажыло мітуслівае жыццё зямлі - норак, падземных хадоў і хмызу: зашнарылі суслікі, асцярожна падкрадаліся да зялёнага лісця трусы, снавалі мышы паміж камякамі зямлі, а крылатыя драпежнікі бязгучна ляталі ў небе.
У гарадах, на гарадскіх ускраінах, пасярод палёў, на пустках - паўсюль паркі ўжываных аўтамабіляў, машын, адноўленых пасля аварыі, гаражы з зазыўнымі шыльдамі і плакатамі: Ужываныя машыны. Добрыя ўжываныя машыны. Танны сродак перавозкі, тры прычэпы. «Форд» 27-га года, новы матор. Правераныя машыны, якасць гарантуецца, бясплатнае радыё. Машына і 100 галонаў бензіну ў прыдачу. Заходзьце, самі пераканаецеся. Ужываныя машыны, накладныя выдаткі ў кошт не ўваходзяць.
Невялікі ўчастак і будыначак, у якім ледзь хапае месца сталу, крэслу і сіняй канторскай кнізе. Пачак бланкаў, загнутых па ражках і змацаваных сашчэпкамі, побач - акуратны стос яшчэ чыстых, не запоўненых бланкаў. Вечная ручка - сачы толькі, каб у ёй заўсёды было чарніла і каб пісала. Здзелка не адбылася толькі таму, што ручка закапрызіла.
Вунь тыя сукіны дзеці нічога не купяць. Такія швэндаюцца па ўсіх гаражах. Проста разявакі. Ім абы падзівіцца. Машыны такім не патрэбныя, толькі час забіраюць. Ім напляваць на твой час. А вунь, глянь, парачка - не, тая, што з малымі. Пасадзі іх у машыну. Пачні з двухсот і паступова збаўляй. З выгляду на сто з чвэрцю пацягнуць. Пракаці іх. Вунь у тым драндулеце. Дай ім жару! Толькі час з імі марнуем.
Гаспадары машын з падкасанымі рукавамі. Прадаўцы - акуратненькія, бесстароннія, маленькія ўважлівыя вочкі нічога не прапускаюць.
Зірні на твар той вунь жанчыны. Калі жонцы спадабаецца, старога мы абломім. Пачні з «кадзілака». Урэшце навяжы ім «б'юік». Калі пачаць адразу з «б'юіка», яны яшчэ запатрабуюць «форд». Трэба спяшацца, доўга так не працягнецца. Пакажы ім вунь той «нэш», а я пакуль што падпампую дзіравую камеру «доджа-25». Як будзе гатова, клікну.
Машына вам для язды патрэбная, ці ж не так? Не ў цацкі гуляць. Што ж, абіўка працерлася. Ды хіба колы круцяць падушкі?
Шэрагі машын стаяць насамі наперад - капоты ржавыя, шыны спушчаныя. Стаяць упрытык адна да адной.
Жадаеце паглядзець вунь тую? Ну якая ж гэта турбота. Зараз я яе выведу.
Няхай адчуваюць сябе абавязанымі. Няхай забіраюць твой час. Не давай ім забыцца пра гэта. Пакупнікі - народ большасцю далікатны. Ім непрыемна турбаваць людзей. А ты прымусь іх турбаваць цябе, потым прыціснеш іх.
Шэрагі машын мадэлі «Т» - высокія, тупарылыя, руль, як павернеш, скрыпіць, тармазныя пракладкі сцерліся. «Б'юікі», «нэшы», «дэ-соты».
Так, сэр, «додж» 22-га. Найлепшая мадэль, якую Додж калі выпускаў. Зносу не мае. Нізкая кампрэсія. З высокай кампрэсіяй першы час рэзвасці многа, але метал нядоўга вытрымлівае. «Плімуты», «рокнесы», «стары»...
Госпадзі! Адкуль узяўся гэты «аперсан» - з Ноевага каўчэга, ці што! А «чалмерс», а «чандлер»? Іх ужо ж колькі гадоў не выпускаюць. Мы не аўтамабілі прадаём, а жалезны лом на колах. Але чорт! Каб больш такіх драндулетаў. Даражэй за дваццаць пяць ці трыццаць мне не трэба. Ідуць па пяцьдзесят, а то і па семдзесят пяць. Навар неблагі. Бог ты мой, ці шмат настрыжэш на новай машыне? Каб больш такіх драндулетаў. Не паспееш купіць, ужо іх хапаюць. Усё, што хочаш, абы не за дзвесце пяцьдзесят. Загані ты, Джым, сюды таго старычыну, што на бакавой дарожцы. Ён не адрозніць асла ад калдобіны. Паспрабуй уціснуць яму «аперсан». А куды ён дзеўся, гэты «аперсан»? Прадаўся? Калі мы не займеем яшчэ такіх драндулетаў, дык хоць кантору зачыняй.
Сцяжкі - бела-чырвоныя, бела-сінія - па абочыне пляцоўкі. Ужываныя машыны. Добрыя ўжываныя машыны. На памосце - машына, на якую сёння зніжана цана. Не падумай прадаваць яе. Яна - прыманка для публікі. Калі прадаць гэтую дзяшоўку за такую цану, дык і цэнта лішняга не пакладзеш у кішэню. Гавары, што прададзена ўжо. А перш чым аддасі машыну, знімі з яе наш акумулятар. Пастаў вось гэты хлам. Госпадзі, што ім яшчэ трэба за іхнія медзякі? Закасай рукавы - наляж. Так доўга працягвацца не будзе. Каб больш такіх драндулетаў, і праз паўгода можна было б і на спачын.
Слухай сюды, Джым. У гэтага «шаўрале» шум у заднім мосце. Быццам там бутэлькі трушчаць. Засып туды кварты са дзве пілавіння. І ў каробку скорасцей не забудзь. Гэты гнілы лімончык трэба прадаць за трыццаць пяць даляраў. Той прахвост абвёў мяне вакол пальца. Я даваў яму дзесяць, а ён упёр мне яе за пятнаццаць, ды яшчэ, сукін кот, інструмент увесь ухітрыўся забраць. Божа літасцівы! Каб нам штук пяцьсот такіх развалін! Гэтак доўга не працягнецца. Што, шына яму не даспадобы? Скажы, што ў гэтых шынах запасу яшчэ на дзесятак тысяч міль, і скінь паперкі паўтары.
Груды ржавага лому навалам каля агароджы, у заднім канцы двара валяюцца ламаныя карпусы, крылы, замаслены хлам, блокі матораў, скрозь цыліндры прарасла трава. Тармазныя цягі, зваленыя ў кучы выхлапныя трубы - як клубкі змеяў. Разлітая змазка, бензін.
Схадзі пашукай, ці няма дзе цэлай запальнай свечкі, а то ўсе трэснутыя. Чорт, каб раздабыць штук пяцьдзесят прычэпаў, даляраў за сотню, вось быў бы прыварак! Чаго гэта ён там скандаліць? Наша справа прадаць машыну, а дадому няхай ён сам яе піхае. Здорава сказана, ха, мы яе яму дадому не піхаем! Галаву кладу, можна і ў гумарыстычным часопісе «Манслі» надрукаваць. Думаеш, ён так нічога і не купіць? Дык гані яго ў шыю. У нас тут і так спраў шмат, няма часу важдацца з такімі, што самі не ведаюць, чаго хочуць.
Знімі пярэднюю правую пакрышку з «грэхема», павярні яе латай усярэдзіну. Астатняе - проста шык! Пратэктар нават яшчэ не сцёрся.
Абавязкова! Гэтае старое жалеззе яшчэ пяцьдзесят тысяч міль прабяжыць. Толькі больш масла залівайце. Бывайце. Шчасліва.
Падбіраеце машыну? А што б вам хацелася? Знайшлі што-небудзь прыдатнае? Нешта ў горле суха. Як наконт таго, каб прапусціць па маленькай? Давайце пойдзем, а жонка ваша няхай пакуль што паглядзіць на гэты «ласаль». Вы «ласаль» не хочаце? Так, падшыпнікі знасіліся. Праз меру масла бярэ. Магу прапанаваць «лінкольн» 24-га года. Вось гэта машына! Вечная. Пераробіце ў грузавік.
Гарачае сонца на ржавым жалезе. Зямля ў масленых плямах. Людзі азадачана расхаджваюць, ім патрэбна машына.
Вытры ногі. Не прыхінайся да гэтай машыны. Яна брудная. Якую выбраць? Колькі наогул яны каштуюць? Пасачы за дзецьмі. Цікава, колькі яны хочуць за гэтую. Зараз спытаем. За спрос грошай не плоцяць. Спытацца ж можна. Больш за семдзесят пяць ні на адзін пяціцэнтавік даць не магу, а то да Каліфорніі не дабяромся.
Госпадзі, ну каб хоць яшчэ з сотню гэтых дамавін на колах! На хаду ці не на хаду - мне няважна.
Пакрышкі, старыя сцёртыя пакрышкі, наваленыя высокімі штабелямі; камеры - чорныя, шэрыя - вісяць, як кілбасы.
Латкі на камеры? Парашок для чысткі радыятараў? Іскравы кандэнсатар? Укіньце вось гэту пілюльку ў бензабак і атрымаеце лішніх дзесяць міль з кожнага галона. Вось палітура - усяго пяцьдзесят цэнтаў, і кузаў будзе як новенькі. «Дворнікі», рэмень вентылятара, пракладкі? Ну што для вас значыць адзін пяціцэнтавік?
Выдатна, Джо. Ты іх яшчэ крыху апрацуй і вядзі да мяне. А я ўжо іх абламаю - уламлю або зламлю. Толькі балбатуноў не прыводзь. Хачу бізнес рабіць.
Калі ласка, сэр, заходзьце, заходзьце. Вам гэта проста знаходка. Так, сэр. Усяго восемдзесят даляраў, проста знаходка.
- Больш за пяцьдзесят я даць не магу. Мне ваш чалавек сказаў - пяцьдзесят.
Пяцьдзесят... Пяцьдзесят? Ён ачмурэў! Я сам заплаціў за гэту красуню семдзесят даляраў. Ты што, Джо, з глузду з'ехаў? Хочаш пусціць мяне з торбай? Давядзецца прагнаць гэтага ёлупа. Можа, сыдземся на шасцідзесяці? Вось што, містэр, дзень кароткі. Я чалавек дзелавы, а не махляр. Можа, у вас ёсць што-небудзь узамен грошай?
Ёсць пара мулаў, я даплаціў бы імі.
Пара мулаў? Гэй, Джо, ты чуеш? Ён прапануе расплаціцца муламі. А вы хіба не ведаеце, што мы жывём у век машын? Мулы цяпер ідуць толькі на сталярскі клей.
Добрыя, дарослыя мулы - аднаму пяць, другому сем гадоў. Што ж, пашукаю ў іншым месцы.
У іншым месцы? Прыходзіце да занятых людзей, час забіраеце і ідзяце з пустымі рукамі. Джо, хіба ты адразу не зразумеў, што маеш справу са жміндам?
Я не жмінда. Мне патрэбна машына. Мы ў Каліфорнію едзем. Мне машына патрэбна.
Ну добра, няхай я прасцячок. Джо лічыць мяне прасцячком. Калі будзеце, кажа, здымаць з сябе апошнюю кашулю, з голаду здохнеце. Вось мы як зробім: я вазьму вашых мулаў па пяць даляраў за галаву на корм сабакам.
Не, навошта ж на корм.
Ну, я мог бы раскашэліцца і даць па сем ці дзесяць. Дык я скажу вам, як мы зробім. Я бяру вашых мулаў за дваццаць і яшчэ павозку ў прыдачу, згодны? Пяцьдзесят вы заплоціце наяўнымі, а на астатнія дасце вэксаль і будзеце пагашаць па дзесяць даляраў у месяц.
Вы ж сказалі - восемдзесят.
А хіба вы ніколі не чулі пра накладныя выдаткі і пра страхоўку? Гэта крыху павышае цану. За якіх чатыры-пяць месяцаў вы ўсё выплаціце. Распішыцеся вось тут. Мы пра ўсё паклапоцімся.
Проста не ведаю...
Паслухайце. Я гатовы аддаць вам сваю апошнюю кашулю, а вы столькі часу ў мяне аднялі. Я ўжо трох пакупнікоў адпусціў бы за той час, што на вас патраціў. Проста прыкра. Ага, так, распісвайцеся вось тут. Цудоўна, сэр. Джо, схадзі залі бак гэтаму джэнтльмену. Дадзім яму яшчэ і бензіну.
Ну, Джо, дасталося ж нам з табой. Колькі я аддаў за гэту калымагу? Трыццаць зялёненькіх... а не трыццаць пяць? Не я буду, калі не заганю гэтую вупражку за семдзесят пяць, а то які ж я дзялок? Ды яшчэ пяцьдзесят наяўнымі і вэксаль на сорак. Ну так, я ведаю, не ўсе людзі сумленныя, але часам дзіву даешся, як яны ўхітраюцца заплаціць доўг. Адзін выплаціў сотню праз два гады пасля таго, як я спісаў гэтыя грошы ў расход. У заклад іду - гэты выплаціць усё да апошняга. Эх, мне каб толькі раздабыць соцень пяць такіх драндулетаў! Ну, закасвай рукавы, Джо, бярыся за справу. Пайдзі апрацуй яшчэ каго і да мяне прышлі. З гэтай апошняй здзелкі табе перападзе дваццаць зялёненькіх. Ты малайчына, Джо.
Сцяжкі млява паніклі пад дзённым сонцам. Сёння ўцэненая машына - «форд» выпуску 29-га года - «пікап», у поўнай спраўнасці.
А што вы хочаце за пяцьдзесят даляраў - «зефір»?
Конскі волас закручанымі космамі вытыркаецца з падушак, памятыя, аблупленыя крылы. Расхістаныя бамперы вісяць коса. Элегантны двухмесны «форд» з маленькімі каляровымі лямпачкамі - уверсе на радыятары, на крылах і ззаду. Шчыткі ад пырскаў. На рычагу пераключэння скорасцей вялікі штамп фірмы. На кажуху для запасной шыны - яркай фарбай прыгожая дзяўчына і надпіс: «Кора». Папаўднёвае сонца іскрыцца на ветравым шкле.
Госпадзі! Нават пад'есці няма калі. Джо, пашлі хлопчыка па булачку з катлетай.
Перарывісты роў лядашчых машын.
Вунь нейкі ёлупень вытрашчыў вочы на «крайслер». Схадзі дазнайся, ці ёсць манета ў яго ў штанах. Сярод гэтых фермераў трапляюцца і прайдохі такія, што ого! Абгаблюй яго і цягні да мяне. Ты малайчына, Джо.
Так, яна куплена ў нас. Гарантыя? Мы гарантавалі, што гэта аўтамабіль. А мамку прыстаўляць да яго не браліся. Слухайце сюды. Вы набылі машыну, а цяпер гарлапаніце. Будзеце пагашаць доўг ці не, мне напляваць. Вашага вэксаля ў нас тут няма. Перадалі яго ў фінансавы банк. Спаганяць будзе ён, а не мы. У сябе мы вэксаляў не трымаем. Што? Паспрабуйце толькі скандаліць, я зараз жа паклічу фараона. Нічога падобнага, пакрышак мы не падмянялі. Гані яго прэч, Джо. Купіў машыну і яшчэ незадаволены. А што, калі б я купіў кавалак мяса, ад'еў палову, а рэштку панёс бы назад? У нас тут дзелавая ўстанова, а не багадзельня. Як ён табе падабаецца, Джо? Гэй, Джон, зірні! У яго бірулька - ласіны зуб. Знак секты Элка. Дагані яго. Няхай паглядзіць «панціяк» 36-га года. Ну і ну!
Квадратныя насы, круглыя насы, іржавыя насы, насы лапатай, прадаўгаватыя абцякальныя формы, плоскія паверхні яшчэ «даабцякальных» выпускаў. Сёння шмат уцэненага тавару. Дапатопныя пачвары з мяккай абіўкай - іх лёгка ператварыць у грузавікі. Двухколыя трайлеры - на восях яркае сонца выразна высвечвае ржу. Ужываныя машыны. Добрыя ўжываныя машыны. Матор перабраны, зусім спраўны.
Госпадзі! Ты толькі зірні. Да якога стану давялі машыну.
«Кадзілакі», «ласалі», «б'юікі», «плімуты», «пакарды», «шаўрале», «форды», «панціякі». Рад за радам, фары пабліскваюць на сонцы. Добрыя ўжываныя машыны.
Ты іх апрацоўвай, Джо. Эх, каб займець тысячы такіх драндулетаў! Ты іх толькі разахвоць, астатняе ўжо мая справа.
У Каліфорнію едзеце? Вось якраз тое, што вам патрэбна. З выгляду з'ездзілася, але прабяжыць яшчэ тысячы міль.
Выстраіліся адна да адной. Добрыя ўжываныя машыны. За бясцэнак. Матор перабраны, зусім спраўны.
Неба між зорак зрабілася шэрым, ушчэрбны месяц здаваўся бязважкім і празрыстым. Том Джоўд і прапаведнік шпарка крочылі па дарозе, праўдзівей - па каляінах, пракладзеных праз баваўнянае поле коламі і гусеніцамі трактароў. Толькі няўстойлівы стан неба выдаваў набліжэнне досвітку - на захадзе яно злівалася з зямлёй, на ўсходзе яго аддзяляла ад зямлі ледзь прыкметная лінія. Абодва ішлі моўчкі, уцягваючы праз ноздры пыл, які ўзнімалі ў паветры іх чаравікі.
- Спадзяюся, ты добра ведаеш дарогу? - сказаў Джым Кейсі. - А то развіднее, і акажацца, што мы забрылі к чорту на балота.
Баваўнянае поле ажывала разам з жыццём, якое паступова абуджалася, - раннія птушкі перапырхвалі з месца на месца ў пошуках корму, патрывожаныя трусы паспешліва ўцякалі па камякаватай зямлі. Прыглушаныя пылам гукі крокаў і пахрустванне сухіх камякоў пад нагамі падарожнікаў зліваліся з таемнымі шолахамі блізкага ўжо світання.
Том сказаў:
- Я з заплюшчанымі вачамі дайду куды трэба. Уся штука ў тым, каб не думаць пра дарогу. Проста забыцца, што яна існуе, і тады я дайду цюцельку ў цюцельку. Я ж тут як-ніяк нарадзіўся. Малым бегаў па гэтых мясцінах. Тут павінна быць дрэва - ага, вунь яно, бачыш? Ужо разглядзець можна. Бацька на ім мёртвага каёта некалі павесіў. Доўга вісеў, поўсць як расплавілася, а потым адпала. Зусім высах. Эх, можа, мама там ужо снеданне гатуе! У жываце бурчыць.
- У мяне таксама, - сказаў Кейсі. - Хочаш табакі пажаваць? Голад не так чуваць. Дарэмна мы пусціліся ў дарогу ў такую рань. Пры святле лепш ісці. -Ён змоўк і адгрыз кавалак жавальнага тытуню. - Так добра спалася.
- Гэты вар'ят М'юлі мяне падняў, - сказаў Том. - Я з перапуду як ускочу! Пабудзіў і кажа: «Бывай, Том, мне пара. Трэба сюды-туды наведацца. А вы, кажа, таксама збірайцеся, каб, як разднее, вас ужо тут не было». Баязлівы зрабіўся, як суслік, ад такога жыцця. Нібыта за ім індзейцы гоняцца. Па-твойму, ён крануўся з розуму?
- А хто яго ведае. Ты ж бачыў, як учора машына прыкаціла на наш агеньчык. Развернуты дом бачыў? Тут нядобрыя справы творацца. Не без таго - М'юлі трохі крануўся. Шнырыць, крадучыся, па наваколлі, як каёт, - мімаволі чокнешся. Яшчэ заб'е каго і дачакаецца, што яго сабакамі зацкуюць. Можаш лічыць гэта прароцтвам. Чым далей, тым ён усё горшы робіцца. Кажаш, адмовіўся з намі ісці?
- Наадрэз, - адказаў Джоўд. - Па-мойму, ён людзей стаў баяцца. Яшчэ дзіва, што ён да нас падышоў. Да світання будзем у дзядзькі Джона. - Колькі часу яны ішлі моўчкі, і запозненыя совы праляталі ў іх над галавой, спяшаліся да свірнаў, да дуплаў, да сваіх гнёздаў на цыстэрнах для вады, каб паспець схавацца ад дзённага святла. Неба на ўсходзе пасвятлела, і ўжо можна было разглядзець кусты бавоўніку абапал дарогі і яшчэ шэрую зямлю пад нагамі. - Проста розуму не дабяру, як яны там у дзядзькі Джона ўсе размясціліся, дзе спяць. У яго ўсяго адзін пакой з летняй кухняй і хляўчук. Цяпер там, пэўна, і не павернешся.
Прапаведнік сказаў:
- Я не памятаю, ці была ў Джона сям'я. Па-мойму, ён жыў адзін. Я мала што помню пра яго.
- Самы адзінокі чалавек на свеце, - сказаў Джоўд. - Вар'ят неймаверны - накшталт М'юлі, толькі, бадай што, яшчэ ў сім-тым горшы. Дзе толькі ты яго не ўбачыш - то ён у Шоўні аб'явіцца п'яны, то да адной удавы завітае за дваццаць міль ад дому, а то раптам пачне капацца ў сябе на ўчастку ноччу з ліхтаром. Зусім ачмурэў. Ніхто не думаў, што ён так доўга пражыве. У такіх адзінокіх людзей век кароткі. Дзядзька Джон старэйшы за майго бацьку. Год ад году толькі больш жылісты робіцца і наравісты. Ён круцейшы норавам, чым нават дзед.
- Глядзі, віднее ўжо, - сказаў прапаведнік. - Як срэбра. А што, у Джона ніколі жонкі не было?
- Была. І вось слухай, да чаго давяла яго ўпартасць. Бацька расказваў. Узяў дзядзька сабе маладую жонку. Пражыў з ёю месяцы чатыры. Яна зацяжарала. Неяк ноччу ёй зрабілася дрэнна, нешта ўсярэдзіне забалела, і просіць яна Джона: «Прывядзі доктара», а ён сядзіць сабе і не шманае. «У цябе, кажа, проста расстройства жывата. Аб'елася. Выпі чаго-небудзь болесуцішальнага. Набіла жывот, вось і баліць». Раніцай пачала трызніць і сканала да чатырох дня.
- Што з ёю было? - папытаўся Кейсі. - З'ела што-небудзь?
- Не, у яе лопнула нешта ўнутры. Нейкі ап... апендзік. Ну, дзядзька Джон наогул душой добры і цяжка перажываў. Не мог дараваць сабе. Доўга ні з кім ні слова не прамовіў. Ходзіць, як сляпы, і ўсё малітвы пад нос сабе мармыча. Толькі праз два гады ачомаўся, але з тае пары зусім перамяніўся. Як ашалеў. Спакою ад яго не было. Ледзь толькі ў каго з малых глісты завядуцца ці там рэзь у жываце, ён зараз жа доктара цягне. Нарэшце бацька сказаў яму канчаць. У дзяцей, маўляў, жываты заўсёды баляць. Джон лічыў, што жонка па яго віне памерла. Дзівак. Увесь час выкупляў сваю віну - то малым падарункі нясе, то каму-небудзь на ганак мукі мех падкіне. Амаль усё нажытае раздаў, а на душы лягчэй у яго не стала. Бывала, начамі ўсё ходзіць і ходзіць адзін. А гаспадар ён добры. Зямлю спраўна даглядае.
- Няшчасны чалавек, - сказаў прапаведнік. - Няшчасны і адзінокі. А ў царкву ён часта пасля смерці жонкі хадзіў?
- Не, не хадзіў. Ён людзей цураўся. Шукаў адзіноты. А малыя проста ў захапленні ад яго былі. Бывала, ціхенька прыйдзе да нас ноччу, і мы раніцай адразу здагадваліся, што ён прыходзіў, бо кожнаму ўсуне ў ложак пачак жавальнай гумкі - прачнемся, а гумка збоку ляжыць на пасцелі. Мы яго за госпада бога лічылі.
Прапаведнік ішоў, апусціўшы галаву. Ён нічога не адказаў. У першых ранішніх промнях лоб яго нібы ззяў, а рукі, якімі ён размахваў пры хадзе, то высвечвала святло, то паглынаў паўзмрок.
Том таксама маўчаў, быццам засаромеўся сваёй залішняй шчырасці. Ён прыспешыў крок, і прапаведнік падладзіўся пад яго хаду. Цяпер у шэрым сутонні яны маглі бачыць крыху далей перад сабой. З радоў бавоўніку, паволі выгінаючыся, выпаўзла на дарогу змяя. Том адразу спыніўся і пачаў прыглядацца да яе.
- Такія на суслікаў палююць, - сказаў ён. - Няхай сабе паўзе.
Яны абышлі змяю і пакрочылі далей. Неба на ўсходзе злёгку паружавела, і амаль адразу над зямлёй разаслалася панылае святло золку. Сям-там зазелянеліся кусты бавоўніку, зямля набыла буры колер. З твараў людзей сышло шараватае адценне. Пры святле твар Джоўда здаўся цямнейшым.
- Цудоўная пара! - сказаў Том Джоўд ціха. - Хлапчуком я, бывала, падымаўся на золку і паходжваў адзін. Што гэта там наперадзе?
На дарозе ў гонар сучкі сабралася сабачая хеўра. Пяць сабак - нечыстакроўныя аўчаркі, шатландскія колі і іншыя сабакі, чыю пароду нельга вызначыць з прычыны свабоды нораваў у сабачым племені, - былі занятыя заляцаннем да сучкі. Кожны далікатна абнюхваў яе, потым цырымонна адыходзіў да куста здзеравянелай хадою, урачыста падымаў заднюю нагу, паліваў яго і вяртаўся назад. Падарожнікі спыніліся панаглядаць, і Джоўд раптам весела засмяяўся.
- О божа! Вось дык відовішча!
Сабакі сышліся ў кучку, поўсць у іх на хібах натапырылася, яны пачалі гыркаць, не кранаючыся з месца, чакаючы, хто першы пачне грызню. Раптам адзін сабака асядлаў сучку, і астатнія адступілі перад неабвержным фактам і сталі з цікавасцю назіраць, высунуўшы языкі, з якіх капала сліна.
- Вось дык відовішча, - паўтарыў Джоўд. - Гэта ж, здаецца, наш Стракаты. А я думаў, ён даўно ўжо здох. Стракаты, да мяне! - Джоўд зноў засмяяўся. - Чорт! Калі б мяне паклікалі ў такі момант, я таксама не пачуў бы. Прыгадаўся мне выпадак з Уілі Філі - быў ён тады яшчэ хлапчуком. А сарамлівы быў! Страшэнна сарамлівы. Дык аднаго дня загадалі яму завесці цялушку да Грэйузавага быка. Дома ў іх нікога не было, акрамя Элсі, дачкі Грэйуза, а Элсі сарамлівасцю пахваліцца не магла. Уілі стаіць перад ёю, а сам рота раскрыць не можа. Элсі кажа: «Я ведаю, чаго ты прыйшоў. Бык у хляве, на заднім двары». Ну, завялі яны туды цялушку, самі на паркан палезлі і цікуюць. Неўзабаве Ўілі пачаў ёрзаць на паркане. Элсі зірнула на яго і пытаецца, быццам ёй няўцям: «Што гэта з табой, Уілі?» А таго так разабрала, ледзь на паркане трымаецца. «Эх, кажа, вось бы мне гэтак!» А Элсі яму: «Ну дык чаго ты? Цялушка ж твая».
Прапаведнік ціха засмяяўся.
- Паверыш, - сказаў ён, - я вельмі рады, што больш ужо не прапаведнік: ніхто пры мне падобных гісторый не расказваў, а калі, здаралася, хто-небудзь і расказваў, дык я пасмяяцца не мог. І нават вылаяцца не мог. А цяпер магу аблаяць усё, што хачу і калі хачу, і ад сэрца ў мяне неяк адлягае.
Небакрай на ўсходзе азарыўся чырванню, на зямлі заскакалі і гучна зацвыркалі птушкі.
- Глянь, - сказаў Джоўд. - Вунь, наперадзе. Дзядзькава цыстэрна. Ветрака не відаць, а цыстэрна вунь стаіць. Бачыш на фоне неба? - Ён пайшоў шпарчэй. - Толькі б дома былі ўсе.
З-за ўзгорка выступілі абрысы вадзяной цыстэрны. Ад паспешлівых крокаў Джоўда клубы пылу ўзнімаліся яму да самых калень.
- Хоць бы мама...
Завіднеліся ўжо распоркі цыстэрны, дом - маленькі, падобны да скрыні, нейкі голы, нефарбаваны, і свіран - нізенькі, пахілы. З бляшанага коміна ішоў дым. Двор быў увесь беспарадкава застаўлены: зваленая ў кучу мэбля, крылы і механізм ветрака, ложкі, сталы, крэслы...
- Э! Яны ладзяцца ехаць! - выгукнуў Джоўд.
На двары стаяў грузавік з высокімі бартамі - нейкі дзіўны з выгляду грузавік: пярэдняя частка ў яго была, як у лімузіна, а ззаду верх быў зняты, і кузаў прыстасаваны для перавозкі грузаў. Падышоўшы бліжэй, падарожнікі пачулі стук, і, калі над гарызонтам выплыў асляпляльны абадок сонца і яго промні ўпалі на машыну, яны ўбачылі чалавека, у руках у якога, узлятаючы ўгору і апускаючыся, пабліскваў малаток. Сонца ярка гарэла на шыбінах вокнаў. Пацямнелыя ад часу сцены дома зрабіліся светлыя. Дзве рыжыя курыцы быццам запалалі пад адлюстраваным святлом.
- Не гавары моцна, - сказаў Джоўд. - Непрыкметна падкрадзёмся, - і так пашыбаваў, што клубы пылу падымаліся цяпер яму да пояса.
Яны апынуліся на краі баваўнянага поля. Увайшлі ў двор. Зямля тут была цвёрдая, утаптаная, як ток, і толькі дзе-нідзе на ёй прабівалася трава. Джоўд пайшоў цішэй, нібы баючыся чаго. Гледзячы на яго, і прапаведнік збавіў крок. Потым Том паволі пасунуўся наперад і нерашуча збочыў да машыны - шасціцыліндравага легкавога «гудзона», верх якога быў рассечаны на дзве паловы простым, відаць, зубілам. Стары Том Джоўд стаяў у кузаве і прыбіваў верхнія планкі бартоў. Твар яго з пасівелай шчэццю нізка схіліўся над дошкай, з рота тырчаў пучок цвікоў. Ён прыставіў цвік і з грукатам увагнаў яго малатком у дрэва. У доме бразнула канфорка пліты, пачуўся дзіцячы плач. Джоўд падышоў да машыны і прыхіліўся да борта. Бацька глянуў на яго невідушчымі вачыма. Тады паставіў другі цвік і ўбіў у дошку. Галубы чародкай узляцелі з цыстэрны, зрабілі вакол яе круг, вярнуліся на месца і, важна ступаючы, падышлі да самага краю, глянулі ўніз - белыя галубы, блакітнаватыя, шэрыя, з вясёлкавым адлівам на крылах.
Джоўд абхапіў пальцамі ніжнюю планку борта. Глянуў на пастарэлага, з сівізною, чалавека, што стаяў на грузавіку. Лізнуў губы і ціха прамовіў:
- Тата...
- Ну чаго там? - буркнуў стары Том, не вымаючы цвікоў з рота. На ім былі заплямлены капялюш з чорнага фетру з шырокімі абвіслымі палямі і сіняя кашуля пад камізэлькай без гузікаў; штаны падпярэзваў шырокі рэмень з вялікай меднай спражкай - і скура, і метал блішчэлі ад заўсёднай носкі; чаравікі былі патрэсканыя, падэшвы растаптаныя і загнутыя ўгору - шмат гадоў пахадзілі ў спёку, у слоту, па пыле. Пад рукавамі кашулі, якая шчыльна абцягвала яго плечы, напяліся мускулы. Жывот і сцёгны яго былі худыя, а ногі - кароткія, масіўныя і моцныя. Абрамлены шчаціннем твар звужаўся да вытырклага валявога падбародка, калючая шэрсць на якім яшчэ не паспела зусім пасівець, што надавала яму большую цвёрдасць і рашучасць. Скулы ў старога Тома былі цёмныя, як пяньковае валакно, скура разбягалася ад куточкаў вачэй праменьчыкамі маршчынак, бо ён жмурыў вочы, цёмна-карыя, як карычневая кававая гушча; прыглядаючыся да чаго-небудзь, ён выцягваў шыю, бо гэтыя некалі зоркія вочы пачыналі ўжо здаваць. Губы, што сціскалі доўгія цвікі, былі тонкія і чырвоныя.
Ён занёс руку з малатком, збіраючыся ўвагнаць у дрэва яшчэ адзін цвік, і глянуў цераз борт грузавіка на Тома, глянуў зласліва, нездаволена, што яму перашкаджаюць працаваць. І раптам падбародак яго выпнуўся яшчэ больш, вочы ўтаропіліся на твар Тома, і мала-памалу мозг старога Тома Джоўда ўсвядоміў тое, што ўспрынялі яго вочы. Рука з малатком паволі апусцілася, другая выняла з рота цвікі, і ён здзіўлена прамовіў, нібы паведамляючы сабе жыццёвы факт:
- Гэта Томі... - І зноў паведаміў сам сабе: - Наш Томі вярнуўся дамоў. - Рот яго зноў раскрыўся, у вачах мільгануў спалох. - Томі, - ледзь не шэптам сказаў ён, - уцёк? Ты хаваешся? - Ён напружана чакаў адказу.
- Не, - адказаў Том. - Я даў падпіску. Мяне выпусцілі. Дакументы пры мне. - Ён схапіўся за ніжнія планкі борта.
Стары Том акуратна паклаў малаток на дно кузава і ўсунуў цвікі ў кішэню. Перакінуў нагу цераз борт і спрытна саскочыў з машыны, але, апынуўшыся побач з сынам, нерашуча замяўся.
- Томі, - сказаў ён, - мы едзем у Каліфорнію. Збіраліся напісаць табе пісьмо. - І дадаў, быццам не верачы вачам сваім: - Але ты вярнуўся. Можаш ехаць з намі. Паедзеш з намі! - У доме бразнулі накрыўкай кафейніка. Стары Том азірнуўся цераз плячо. - Зробім ім сюрпрыз, - сказаў ён, і вочы яго заблішчалі ад захаплення. - Маці ўсё мучыцца прадчуваннем, што больш цябе не ўбачыць. Вочы ў яе сталі сумныя, быццам у доме нябожчык. І ў Каліфорнію не вельмі хоча ехаць, бо тады, кажа, я ўжо яго ніколі больш не ўбачу. - На кухні зноў грукнулі нейкай накрыўкай. - Зробім ім сюрпрыз, - паўтарыў стары Том. - Увойдзем так, быццам ты ніколі з дому не адлучаўся. Паглядзім, што маці скажа. - Нарэшце ён дакрануўся да Тома, але толькі да яго пляча, баязліва, і зараз жа адхапіў руку. Ён зірнуў на Джыма Кейсі.
- Та, ты памятаеш нашага прапаведніка? - запытаўся Том. - Ён са мной прыйшоў.
- Ён таксама з турмы?
- Не, мы з ім у дарозе стрэліся. Ён даўно ўжо тут не быў.
Бацька паважна падаў прапаведніку руку.
- З добрым прыбыццём, сэр.
Кейсі сказаў:
- Я рады, што прыйшоў да вас. Як цудоўна, калі сын вяртаецца дадому. Цудоўнае відовішча!
- Дадому... - ціха прамовіў бацька.
- Да сваіх родных, - паспешліва паправіўся Кейсі. - Мы пераначавалі на старым месцы.
Бацька выпнуў падбародак і якую хвіліну пазіраў на дарогу. Потым павярнуўся да сына.
- Ну дык як мы гэта зробім? - усхвалявана загаварыў ён. - Можа, я зайду і скажу: «Вось тут прыйшлі двое, хацелі б паснедаць у нас». А што, калі ты зойдзеш адзін і будзеш стаяць, пакуль яна цябе не ўбачыць? Можа, так і зробім? - Твар яго радасна ззяў.
- Гэтак можна і напужаць, - сказаў Том. - Пужаць яе не трэба.
Дзве даўганогія аўчаркі з лагодным выглядам прыбеглі ў двор, але, ледзь толькі пачулі чужы пах, яны прадбачліва адступілі, насцярожыліся і паволі, у нерашучым чаканні, памахвалі хвастамі, напружыўшы зрок і нюх, гатовыя да любых варожых выпадаў незнаёмцаў, да небяспекі. Адна аўчарка, выцягнуўшы шыю, асцярожна пасунулася да Тома, падкралася да яго ног і шумна абнюхала іх. Потым адышла ўбок і, пазіраючы на старога Тома, стала чакаць яго знаку. Другі сабака, яшчэ шчанюк, не меў такой смеласці. Ён агледзеўся навокал, шукаючы, на што пераключыць сваю ўвагу без шкоды сваёй годнасці, убачыў рыжае кураня, якое тэпала міма, і наляцеў на яго. Пачулася пранізлівае кудахтанне разгневанай квактухі, у паветра паляцела рыжае пер'е, і курыца кінулася наўцёкі, лопаючы куртатымі крыламі. Шчанюк з гордасцю паглядзеў на людзей і разлёгся ў пыле, задаволена паляпваючы хвастом па зямлі.
- Дык пайшлі, - сказаў бацька. - Пайшлі, чаго чакаць. Хай яна ўбачыць цябе. А я пагляджу, які ў яе зробіцца твар. Гайда. Праз якую хвіліну яна пакліча ўсіх снедаць. Я даўно ўжо чуў, як яна пляснула саланіну на патэльню.
Ён пайшоў да дома па мяккім пыле. Ганка не было - адна прыступка, і адразу дзверы; каля іх стаяла калода, пасечаная і рыхлая - многа гадоў праслужыла. Драўляная абшыўка сцен крышылася, праедзеная пылам. У паветры патыхала паленым вярбовым голлем, а падышоўшы да самых дзвярэй, трое мужчын пачулі пах смажанага мяса, жытніх праснакоў і востры пах кавы, што клекатала ў кафейніку. Стары Том стаяў на парозе, загарадзіўшы сваім каржакаватым целам уваход.
- Ма, - сказаў ён, - тут двое падарожнікаў пытаюцца, ці не знойдзецца ў цябе чаго перакусіць.
Том пачуў матчын голас, памятны яму, - спакойны, стрыманы, працяжны, які гучаў прыязна і ціхмяна:
- Няхай зойдуць. Ежы хопіць. Скажы, каб рукі памылі. Хлеб гатовы. Зараз я мяса зніму. - І на пліце пачулася сярдзітае сквірчэнне сала.
Бацька ступіў з парога на кухню, Том зазірнуў туды і ўбачыў маці. Яна знімала з патэльні выгінастыя скваркі. Духоўка была адкрытая, і там відаць была шырокая патэльня з ужо гатовымі жытнімі праснакамі. Маці глянула праз дзверы на двор, але сонца свяціла Тому ў спіну, і маці ўбачыла толькі цёмны сілуэт, выразна акрэслены на яркім сонечным святле. Гаспадыня гасцінна кіўнула галавой і сказала:
- Заходзьце. Добра, што я сёння спякла многа хлеба.
Том стаяў, зазіраючы ў кухню. Маці была грузная, але не тлустая - проста пацяжэла ад родаў і працы. На ёй была свабодная сукенка - некалі ў рознакаляровыя кветачкі на шэрым полі, але цяпер кветачкі злінялі, і ад іх засталіся толькі светлыя плямкі. Сукенка спадала ёй да шчыкалатак, і яе моцныя, шырокія голыя ступні лёгка і жвава ступалі па падлозе. Рэдкія сівыя валасы з блакітнаватым адлівам былі сабраныя на патыліцы ў кволы жмуток. Моцныя, спярэшчаныя рабаціннем рукі былі адкрытыя да локцяў, кісці - поўныя і далікатныя, як у пухлявенькай дзяўчынкі. Яна глядзела на заліты сонцам двор, і на яе шырокім твары адбівалася не ласкавасць, а спакойная добразычлівасць. Цёмныя карыя вочы быццам зведалі ўсе чалавечыя бядоты і трагедыі, і, адолеўшы боль і пакуты, яна паднялася па іх, як па прыступках, да найвышэйшага спакою і разумення. Яна ўсведамляла, прызнавала і з радасцю прымала сваё становішча ў сям'і: яна была яе апорай, цвярдыняй, якой ніхто не мог авалодаць. І паколькі стары Том і дзеці не пранікаліся болем і страхам, пакуль боль і страх не апаноўвалі яе саму, яна не давала пачуццям гэтым авалодаць яе сэрцам. А калі здаралася што-небудзь радаснае, яны чакалі яе радасці, бо ў яе ўвайшло ў звычку выклікаць вясёлы смех, нават калі асаблівых прычын для весялосці не было. Але стрыманасць лепш за весялосць. Вытрымка - рэч больш надзейная. І высокае і сціплае становішча маці ў сям'і надало ёй годнасць і чыстую, ціхмяную душэўную прыгажосць. Яе роля сямейнай лекаркі надала яе рукам упэўненасць, цвёрдасць і размеранасць; яе роля сямейнага трацейскага суддзі зрабіла яе бесстаронняй і бездакорнай у сваіх прысудах, як багіня. Яна, відаць, ведала: калі яна пахіснецца, сямейныя ўстоі таксама пахіснуцца, а калі яна завагаецца або ўпадзе ў роспач, сям'я разваліцца, страціць волю да жыцця.
Яна глядзела на заліты сонечным святлом двор, на цёмны сілуэт мужчыны. Бацька стаяў побач і ўвесь калаціўся ад нецярплівасці.
- Заходзьце ж! - крыкнуў ён. - Чаго стаіце, заходзьце, містэр.
Том збянтэжана пераступіў парог.
Маці ветліва паглядзела на яго, падняўшы галаву ад патэльні, над якой яна зноў схілілася. І тут рука яе паволі апусцілася, відэлец грукнуўся на дашчаную падлогу. Вочы яе шырока расплюшчыліся, зрэнкі расшырыліся. Яна цяжка задыхала, раскрыўшы рот. Потым заплюшчыла вочы.
- Дзякуй богу, - прамовіла яна. - Ой, дзякуй богу! - Вочы яе раптам затуманіліся трывогай. - Томі, цябе не шукаюць? Ты не ўцёк?
- Не, ма. Я даў падпіску. Тут у мяне дакументы, - ён дакрануўся да грудзей.
Яна падышла да яго, лёгка і бясшумна ступаючы босымі нагамі, і на твары ў яе адбілася здзіўленне. Маленькая далонь кранулася яго рукі вышэй локця, адчула яго мускулы. Потым маці, як сляпая, прыклала пальцы да яго шчакі. Радасць яе межавала са смуткам. Том моцна прыкусіў ніжнюю губу. Яе здзіўленыя вочы глянулі на заціснутую між зубоў губу, убачылі нітачку крыві, што праступіла скрозь зубы і тоненькім струменьчыкам пабегла па падбародку. Яна зразумела ўсё, самавалоданне зноў вярнулася да яе, і яна адняла руку ад яго твару. Дыханне гучна вырвалася з яе грудзей.
- Ну вось! - усклікнула яна. - А мы ледзь без цябе не паехалі. Усё галаву ламалі, як ты нас знойдзеш. - Яна падняла з падлогі відэлец, памяшала гарачае сала, падхапіла з патэльні падгарэлую скварку. Потым адставіла на край пліты кафейнік з успененай кавай.
Стары Том рагатнуў:
- Абдурылі мы цябе, ма, га? Так і задумалі. Спецыяльна. А яна стаіць, як авечка, якую абухом агрэлі. Шкада, дзеда тут не было. Цябе быццам хто па лбе кувалдай гакнуў. Дзед надарваў бы жывот са смеху, зноў бядро сабе вывіхнуў бы, як тады, калі Эл пальнуў у той вялізны армейскі самалёт. Тут, ведаеш, Том, аднаго разу пралятаў такі вялікі - з паўмілі, можа, даўжынёй, дык Эл як схопіць сваю трыццаціміліметроўку ды як смальне! Дзед крычыць: «Не страляй на галапупках, Эл, пачакай, пакуль дарослыя птушкі прыляцяць!» - і так з рогату выкручваўся, што бядро сабе вывіхнуў.
Маці ціхенька хіхікнула і зняла з паліцы горку алавяных талерак.
Том запытаўся:
- А дзе ён, дзед? Я гэтага старога чорта яшчэ не бачыў.
Маці паставіла талеркі на кухонны стол і каля кожнай - кубак. Сказала, панізіўшы голас:
- Яны з бабкай у свірне спяць - ім часта даводзіцца падымацца па начах, на дзяцей натыкаюцца.
Умяшаўся бацька:
- Ага. Дзед кожную ноч як шалеў. Спатыкнецца аб Уінфілда, той - у крык, а дзед з перапуду ў споднікі напусціць і ад злосці закіпіць, а там, глядзіш, такі гвалт у доме ўзнімецца, што хоць вушы затыкай. - Ён гаварыў пасмейваючыся. - О, тут у нас вясёленька бывала. Адной ноччу раскрычаліся ўсе, завяліся, і брацік твой Эл, цяпер ён у нас красамоўны стаў, кажа: «Чаму ты, каб цябе чорт, у піраты не падаўся?» Ну, стары зусім азвярэў і па стрэльбу пабег. І давялося Элу спаць той ноччу ў полі. А цяпер дзед з бабкай у свірне начуюць.
Маці сказала:
- Цяпер яны па патрэбе ўстаюць і на двор ідуць. Тата, скажы ім, што Томі вярнуўся. Дзеда наш Том заўсёды любіў.
- Зараз, - сказаў бацька. - Зусім з галавы выпусціў. - Ён выйшаў з кухні і, энергічна размахваючы рукамі, пайшоў цераз двор.
Том глядзеў яму ўслед і раптам пачуў голас маці.
- Томі, - прамовіла яна нерашуча і бянтэжліва.
- Што? - Яе збянтэжанасць толькі ўзмацніла збянтэжанасць яго самога, прывяла ў нейкае незразумелае замяшанне. Кожны з іх здагадваўся пра душэўны стан другога, і іх гэта яшчэ больш бянтэжыла.
- Томі, я хачу ў цябе запытацца... ты не азлобіўся?
- Азлобіўся?
- Злосць не заслала табе вочы? Ты ні да кога не пранікся нянавісцю? Турма не давяла цябе да таго, што ты зусім страціў розум?
Том паглядзеў на яе скоса, дапытліва, і вочы яго быццам пыталіся, адкуль яна ўсё гэта ведае.
- Н-не, - адказаў ён. - Можа, толькі спачатку. Я не такі горды, як іншыя. З мяне як з гусі вада. А чаму ты пытаешся, ма?
Цяпер ужо яна глядзела на яго, крыху раскрыла рот, быццам так было лепш чуваць, і ўпілася ў яго вачамі, каб лепш разабрацца ў ім. Яна шукала таго адказу, які словы часта ўтойваюць. І нясмела загаварыла:
- Тут у нас быў Красунчык Бой Флойд. Я маці яго ведала. Добрыя былі людзі. Бой быў страшэнны свавольнік, не без таго, ну, як кожны здаровы хлопчык. - Яна памаўчала, потым словы яе паліліся патокам: - Пра ўсіх іх мне невядома, але пра яго я ведаю ўсё. Ён нешта там натварыў, і яго моцна пабілі - злавілі і збілі, і ён азлобіўся і зноў нешта такое ўчыніў, ужо са зла, дык яго зноў пабілі. Да таго давялі, што ён зусім ашалеў. У яго стралялі, як у драпежнага звера, а ён адстрэльваўся. Цкавалі сабакамі, як каёта, а ён скаліў зубы і агрызаўся, як воўк. Зусім розум страціў. І не хлопец, і не мужчына - не чалавек, а жывёліна нейкая. Але хто яго ведаў, той не крыўдзіў. На такіх у яго злосці не было. Нарэшце яго зацкавалі сабакамі і забілі. У газетах бог ведае што пра яго пісалі, а на справе вось як было. - Яна змоўкла, аблізнула перасохлыя губы. На ўсім яе твары было напісана, што яе мучыць. - Я хачу ведаць, Томі. Цябе жорстка білі? Ты таксама сам не свой ад злосці?
Поўныя губы Тома былі шчыльна сцятыя. Ён зірнуў на свае шырокія гладкія далоні.
- Не, - адказаў ён. - Я не з такіх. - Ён памаўчаў, разглядаючы свае абламаныя пазногці, шурпатыя, як ракавінкі. - У турме я стараўся ні ў што не ўблытвацца. У мяне такой злосці няма.
Яна ўздыхнула і амаль шэптам прамовіла:
- Дзякуй богу.
Ён ускінуў на яе вочы.
- Калі я ўбачыў, ма, што зрабілі з нашым домам...
Маці падышла да яго зусім блізка і з хваляваннем сказала:
- У адзіночку нельга біцца, Томі. Цябе зацкуюць, як каёта. Вось, Томі, я ўсё думала, меркавала, гадала. Такіх, кажуць, сагнаных з месца сотні тысяч. Калі б мы ўсе, як адзін, узгневаліся, Томі... нас не зацкавалі б... - Яна змоўкла.
Том паволі апусціў павекі, і цяпер яго вочы толькі ледзь паблісквалі між веек.
- І шмат хто так думае? - запытаўся ён.
- Не ведаю. Людзі ўсе цяпер як ашаломленыя. Ходзяць нібы ў сне.
З дальняга канца двара данёсся скрыпучы старэчы голас:
- Хвала богу, наша ўзяло! Наша ўзяло!
Том зірнуў у той бок і ашчэрыўся ўсмешкай:
- Вось і бабка ўжо ведае, што я дома. А цябе, ма, раней я такой ніколі не бачыў.
Матчын твар пасуравеў, вочы зрабіліся халодныя.
- Раней мне ніколі не даводзілася бачыць, як дом мой рушаць. Раней мне ніколі не даводзілася бачыць, як сям'ю маю выганяюць на дарогу. Ніколі не даводзілася распрадаваць... усё... Вось, ідуць ужо. - Яна вярнулася да пліты і вываліла з патэльні на дзве алавяныя талеркі пышныя праснакі. Падбіла мукой густое сала для падліўкі, і рука яе пабялела ад мукі. Хвіліну Том глядзеў на яе, тады падышоў да дзвярэй.
Праз двор ішлі чацвёра. Наперадзе ішоў дзед. Хударлявы, жвавы, неахайна апрануты стары паспешліва чыкільгаў, прыпадаючы на правую вывіхнутую нагу. На хаду ён зашпільваў штаны, і яго старэчыя пальцы ніяк не маглі разабрацца ў гузіках, бо ён усунуў верхні гузік у другую пятлю і гэтым парушыў увесь парадак. Штаны былі пашарпаныя, падраная сіняя кашуля расхрыстаная, доўгая шэрая ніжняя сарочка таксама была расшпіленая. З-пад яе вызіралі кашчавыя белыя грудзі, зарослыя сівой шэрсцю. Дзед страціў надзею зашпіліць прарэх, пакінуў яго незашпіленым і нялоўка заняўся гузікамі сарочкі, потым кінуў і гэта, не давёўшы справы да канца, і пачаў падцягваць карычневыя падцяжкі. Твар у яго быў худы, нервовы, з маленькімі жвавымі вочкамі, хітраватымі, як у свавольнага хлапчука. Сварлівы, капрызны, гарэзлівы, смяшлівы твар. Дзед быў задзірака і спрачальнік, аматар салёных анекдотаў. Як быў у маладосці, так і застаўся стары грахаводнікам. Зласлівы, жорсткі і нецярплівы, як шкадлівае дзіця, і да таго ж весялун. Калі дарываўся да спіртнога, ён не ведаў меры, праз меру еў, калі было што, і безупыну малоў языком.
За дзедам кандыбала бабка; яна ўмудрылася дажыць да глыбокай старасці толькі таму, што была такая ж злосніца, як і яе стары. Яна ахоўвала сваю незалежнасць з лютасцю фанатычкі, не ўступаючы дзеду ў грахоўнасці і буйстве. Аднойчы, яшчэ не прыйшоўшы ў сябе пасля малення і галосячы ўрыўкі псалмаў, яна разрадзіла ў мужа абодва ствалы драбавіка і амаль ушчэнт разнесла яму адну ягадзіцу. Пасля гэтага стары прасякся такой павагай да жонкі, што больш ніколі ўжо не мучыў яе, як дзеці мучаюць казюлек. Яна ішла, падабраўшы да калень прасторную сукенку, і тонкім галаском, падобным на бляянне, выкрыквала свой баявы кліч: «Хвала богу, наша ўзяло!»
Дзед з бабкай кульгалі па шырокім двары навыперадкі. Яны вечна змагаліся адно з адным - ніхто не хацеў ні ў чым уступаць другому. Яны любілі гэтае змаганне, без яго не маглі існаваць.
За імі няспешнай хадой ішлі бацька і Ной, яго першынец - высокі, нейкі дзіўнаваты з выгляду, з неўразумелым выразам на твары, звычайна спакойным і задумлівым. Ной ніколі ні на кога не злаваў. Ён глядзеў на тых, хто злаваў, са здзіўленнем і пачуццём няёмкасці, як глядзіць здаровы чалавек на душэўнахворага. Рухі ў Ноя былі няспешныя, гаварыў ён рэдка, а калі гаварыў, дык так марудна, што людзі, якія яго ведалі, часам лічылі Ноя за дурня. Але Ной не быў дурны, толькі дзівакаваты. Ён мала думаў пра гордасць, не адчуваў цягі да жанчын. Праца і сон па чарзе змянялі адно другое надзіва пунктуальна, і гэта задавальняла яго. Ён любіў сваіх блізкіх, але ніколі не выказваў гэтай любові. Хоць старонняму цяжка было сказаць чаму, але Ной рабіў уражанне чалавека, у якім ёсць нешта ненармальнае - ці то ў форме галавы, ці то ў тулаве, ці ў нагах, а можа, нават і ў розуме; толькі прыдрацца да чаго-небудзь пэўнага было нельга. Бацька, той ведаў, чаму Ной быў не такі, як усе астатнія яго дзеці, але саромеўся расказваць. Бо той ноччу, калі яго першынец з'яўляўся на свет, бацька застаўся ў доме адзін з парадзіхай, з яго няшчаснай жонкай, якая заходзілася ад немага крыху, і ён ашалеў ад страху. Яго рукі, моцныя яго пальцы, як абцугі, выцягнулі, выкруцілі дзіця з чэрава маці і памялі яго. Павітуха, што крыху запазнілася, убачыла бясформенную галоўку нованароджанага, яго выцягнутую шыю, перакрыўленае цельца і ўправіла яму шыю і нібы нанава вылепіла сваімі рукамі яго цела. Бацька ўвесь час памятаў гэтае здарэнне, і яму было сорамна. З Ноем ён быў ласкавейшы, чым з іншымі дзецьмі. Па шырокім твары Ноя, па яго далекавата расстаўленых адно ад аднаго вачах, па доўгім вузкім падбародку бацька пазнаваў памятую, знявечаную галоўку дзіцяці. Ной рабіў усё, што ад яго патрабавалася, мог чытаць і пісаць, умеў працаваць і ацэньваць зробленае, але ўсё гэта ён, здавалася, рабіў без цікавасці; ён зусім абыякава ставіўся да ўсяго таго, чаго людзі дамагаліся, да чаго імкнуліся. Быццам жыў у нейкім дзіўным, маўклівым доме і спакойнымі вачамі паглядаў адтуль на свет. Ён быў чужы ў гэтым доме, але самоты не адчуваў.
Усе чацвёра ішлі праз двор, і дзед крычаў:
- Дзе ён? Дзе ён, чорт на вас? - Яго пальцы зноў пачалі перабіраць гузікі на штанах, потым у забыўлівасці палезлі ў кішэню. І тут у дзвярах ён убачыў Тома. Дзед раптам спыніўся і затрымаў астатніх. Вочкі яго злосна заблішчалі. - Вось, палюбуйцеся, - сказаў ён. - Арыштант! Джоўды чорт ведае колькі па турмах не сядзелі. - Яго розум пераскочыў на другую тэму: - Ніхто не меў права саджаць яго ў турму! Я на яго месцы тое самае зрабіў бы. Якое гэтыя сукіны дзеці мелі права? - І зноў пераскочыў на другое: - А гэты Тэрнбул, старая смярдзючка, яшчэ хваліўся: застрэлю яго, хай толькі з турмы выйдзе. Ува мне, кажа, цячэ кроў Хэтфарда. А я загадаў яму перадаць: «З Джоўдамі не звязвайся. У мяне, кажу, кроў, можа, самога Маккоя». І яшчэ кажу: «Ты толькі пакажыся дзе блізка ад Тома, і я смальну табе ў задніцу». Напужаў яго страх як.
А бабка тым часам вішчала, не слухаючы дзеда:
- Хвала богу, наша ўзяло!
Дзед падышоў да дзвярэй і паляпаў Тома па грудзях, вочы яго заблішчалі любоўю і гордасцю.
- Ну як ты, Томі?
- Парадак, - адказаў той. - А ты як маешся?
- На двор яшчэ сам хаджу. - І зноў яго розум скочыў убок. - Казаў я - Джоўда ў турме не ўтрымаеш! Яшчэ тады сказаў: «Том уцячэ, праб'ецца, як бык праз загарадку». Вось і ўцёк. Прапусці, я згаладаўся. - Ён праціснуўся ў дзверы, сеў за стол, наваліў сабе ў талерку свініны, паклаў наверх два вялікія праснакі, заліў густой падліўкай, і не паспелі астатнія ўвайсці ў кухню, рот у яго ўжо быў поўны.
Том замілавана ўсміхнуўся яму.
- Во стары чорт! - сказаў ён. А ў дзеда быў такі набіты рот, што ён і гуку вымавіць не мог, але яго маленькія лютыя вочкі ўсміхаліся, галава ярасна заківалася.
Бабка з гордасцю сказала:
- Другога такога грахаводніка і шэльмы на свеце не знойдзеш. У пекла проста на качарзе ўедзе, ну і дзякуй богу! - І з'едліва дадала: - Захацелася яму, бач, грузавіком кіраваць. Дык вось, не выйдзе!
Дзед папярхнуўся, вываліў сабе на калені недажаваны кавалак праснака і квола закашляўся.
Бабка зларадна ўсміхнулася Тому:
- Во неахайнік, га?
Ной стаяў на прыступцы перад Томам, але яго шырока расплюшчаныя вочы нібы глядзелі міма. Твар у яго быў абыякавы. Том сказаў:
- Ну, як ты, Ной?
- Добра, - адказаў Ной. - А ты як? - І ўсё. Але Тому і гэтага было досыць.
Маці сагнала з падліўкі мух і сказала:
- За сталом усім месца не хопіць. Бярыце талеркі і ўладкоўвайцеся дзе папала. Ці на дварэ, ці дзе.
І тут Том спахапіўся:
- Гэ! А дзе ж прапаведнік? Толькі што быў тут. Куды ён дзеўся?
Бацька сказаў:
- Я бачыў, ён некуды пайшоў.
Пачуўся вісклівы голас бабкі:
- Прапаведнік? З табой прапаведнік? Вядзі яго сюды. Памолімся перад ядой. - Яна паказала пальцам на дзеда: - А гэты ўжо паспяшаўся есці. Схадзі прывядзі прапаведніка.
Том апусціўся на прыступку.
- Гэй! Кейсі! Джым Кейсі! - гукнуў ён і пайшоў па двары. - А, Кейсі, вось ты дзе!
Прапаведнік вылез з-пад цыстэрны, сеў на зямлі, пасля падняўся і пайшоў да дома.
Том запытаўся:
- Ты што, хаваўся?
- Ды не. Толькі навошта чужому совацца ў сямейныя справы. Я проста ляжаў і думаў.
- Пайшлі паямо, - сказаў Том. - Бабка хоча, каб ты малітву сказаў.
- Дык я ж ужо больш не прапаведнік, - запратэставаў Кейсі.
- Кінь, пойдзем. Скажы ёй малітву. Табе нічога не станецца, а ёй гэта люба. - Яны ўвайшлі ў кухню разам.
Маці спакойна сказала:
- Сардэчна запрашаем.
І бацька сказаў:
- Сардэчна запрашаем. Паснедайце з намі.
- Спярша малітву, - рашуча прамовіла бабка.
Дзед ушрубаваў свае лютыя вочкі ў Кейсі і нарэшце пазнаў яго.
- А-а, той самы прапаведнік, - сказаў ён. - Ну, ён нічога сабе. Я ўпадабаў яго, яшчэ як толькі першы раз вока на яго кінуў... - Дзед пахабна падміргнуў яму, а бабцы пачулася нейкая непрыстойнасць, і яна прыкрыкнула на яго:
- Змоўкні, стары юрлівы казёл!
Кейсі нервова правёў пальцамі па валасах.
- Павінен сказаць вам, што я ўжо больш не прапаведнік. Мне прыемна быць у вас і хацелася б чым-небудзь аддзячыць добрым гасцінным людзям, і, калі гэтага дастаткова... што ж, я скажу малітву. Але я даўно ўжо не прапаведнік.
- Гаварыце, - сказала бабка. - І не забудзьцеся ўзгадаць пра тое, што мы ў Каліфорнію едзем.
Кейсі схіліў галаву, і ўслед за ім усе астатнія. Маці апусціла галаву і склала рукі на каленях. Бабка нагнулася так нізка, што ледзь не ўткнулася носам у залітыя падліўкай праснакі. Том, які стаяў, прыхінуўшыся да сцяны з талеркай у руцэ, крышачку нагнуў галаву, а дзед выкруціў яе ўніз і ўбок, каб сваім калючым і вясёлым вокам сачыць за прапаведнікам. На твары ў прапаведніка была не набожнасць, а задуменнасць, і словы яго гучалі не як малітва, а як роздум.
- Я ўсё думаў і разважаў, - пачаў ён. - Блукаў сярод узгоркаў і думаў, амаль, сказалі б вы, як Ісус, калі ён адышоў у пустыню, каб разабрацца ва ўсіх сваіх турботах і нягодах.
- Хвала госпаду! - прабляяла бабка, і прапаведнік здзіўлена глянуў на яе.
- Ісуса так адолелі турботы і нягоды, што Ён не мог вырашыць, як яму быць далей, і Яго ўзяло сумненне: на чорта яму ўсё гэта наогул, якая карысць ламаць сабе галаву - усё думаць і думаць? Знямогся Ён дужа, знямогся і духам упаў. Яшчэ трохі, дык так і вырашыў бы: к чорту ўсё! І тады адышоў Ён у пустыню.
- Ама-ан, - прабляяла бабка. Шмат гадоў устаўляла яна свае рэплікі ў час паўз у малітвах. І шмат ужо гадоў не даводзілася ёй слухаць іх і дзіву давацца.
- Я не хачу сказаць, што я раўня Ісусу, - гаварыў далей Кейсі. - Але я стаміўся, як і Ён, і заблытаўся ў сваіх думах, як і ён, і пайшоў, як і Ён, у пустыню, не ўзяўшы з сабой нічога для прывалу. Ноччу ляжаў я на спіне і пазіраў на зоркі, раніцай сядзеў і сачыў, як узыходзіць сонца; удзень глядзеў з пагорка на ўзгорыстую зямлю; вечарам праводзіў вачмі сонца. Часам маліўся, як і раней. Толькі не мог зразумець, за што малюся, чаго. Навокал узгоркі, я сярод іх, і мы ўжо не існавалі асобна. Мы зліліся ў адно. І гэтае адзінства святое.
- Алілуя, - сказала бабка і заківалася ўзад і ўперад, стараючыся ўвесці сябе ў рэлігійны экстаз.
- І я задумаўся. Толькі разважаў ужо цяпер не так, як раней, цяпер думы мае былі глыбейшыя. Я думаў пра тое, што ва ўсіх у нас была святасць, калі мы жылі адной грамадой, і ўсё чалавецтва было святое, пакуль яно было адзінае. Але святасць пакінула нас, калі адзін нікчэмны чалавек ухапіў зубамі ладны кавалак і пабег з ім, адбіваючыся рукамі і нагамі. Вось такі чалавек і загубіў нашу святасць. А калі мы ўсе працавалі талакой, не адзін на аднаго, а гуртам, як бы ў адной вупражцы, тады было добра, у такой працы была святасць. Вось так я разважаў і раптам спахапіўся: а ці ведаю я наогул, што такое святасць? - Прапаведнік змоўк, але яго слухачы не паднялі галоў, бо, як выдрэсіраваныя сабакі, чакалі знаку: «аман». - Цяпер я не магу ўжо маліцца, як бывала. Мне прыемна быць на вашай ціхай трапезе. Я радуюся, што між вамі ёсць любоў. - Схіленыя галовы не падняліся. Прапаведнік агледзеўся навокал. - Праз мяне снеданне ваша стыне, - сказаў ён і раптам успомніў: - Аман, - сказаў ён, і ўсе разам паднялі галовы.
- Ама-ан, - сказала бабка і ўзялася за ежу, разгрызаючы прамочаныя падліўкай праснакі сваімі бяззубымі і цвёрдымі старэчымі дзяснамі. Том еў паспешліва, бацька паволі жаваў з поўным ротам. Пакуль снедалі, ніхто не вымавіў ні слова, чулася толькі, як хрумсцяць на зубах праснакі і як з хлюпатам сёрбаюць гарачую каву. Маці глядзела на прапаведніка, які таксама еў, і ў яе позірку была цікаўнасць, дапытлівасць і разуменне. Яна глядзела на яго, быццам гэта быў дух, голас якога данёсся да яе аднекуль з-пад зямлі.
Скончыўшы есці, мужчыны паставілі на стол талеркі, дапілі рэшткі кавы ў кубках і выйшлі на двор - бацька, прапаведнік, Ной, дзед і Том пакрочылі да грузавіка, абыходзячы зваленую ў кучу мэблю, драўляныя ложкі, механізм ветрака, стары плуг. Пакраталі рукамі новыя барты з сасновых дошак.
Том падняў капот і пачаў разглядаць вялікі, запэцканы маслам матор. Да яго падышоў бацька:
- Калі мы куплялі, брат твой Эл усё праверыў. Казаў, парадак.
- А што ён разумее, гэты сапляк? - сказаў Том.
- Летась ён працаваў у адной фірме. Грузавік вадзіў. У сім-тым разбіраецца. Бойкі хлопец. З галавой. Матор сам можа сабраць - яму гэта раз плюнуць.
Том запытаўся:
- А дзе ён цяпер?
- Швэндаецца недзе. Блудзіць, як кот памаўзлівы, сябе не шкадуе. Шалапуту гэтаму ўжо за шаснаццаць, ну, прырода яго і падганяе. У галаве толькі дзеўкі адны і машыны. Шалапут. Дома ўжо тыдзень не начаваў.
Дзед усё важдаўся з гузікамі на грудзях і нарэшце ўхітрыўся прасунуць гузікі сіняй кашулі ў прарэшкі нацельнай сарочкі. Пальцы адчувалі, што нешта не тое, але не сталі шукаць прычыны. Рука пацягнулася ўніз, зрабіўшы яшчэ адну спробу справіцца з мудрагелістым прарэхам на штанах.
- Я быў горшы, - сказаў ён радасна. - Нашмат горшы. Я быў, можна сказаць, сарвігалава. У Салісе, памятаю, сабраліся на маленне пад адкрытым небам, яшчэ малы я тады быў, крыху, праўда, старэйшы за Эла. А ён яшчэ сапляк, малакасос. Я быў старэйшы гадамі. Вось пайшлі мы на маленне. А там чалавек пяцьсот, а дзевак маладых - хоць гаць гаці!
- Ты, дзед, і цяпер яшчэ такі ж адчайны, - сказаў Том.
- Не без таго. Толькі не, да ранейшага далёка. Вось пачакайце, прыеду ў Каліфорнію, буду там апельсіны есці - захочацца, і сарву апельсінчык. Ці там вінаград. Нічога такога ніколі ў рот не браў. Сарву цэлую гронку з куста, ці там з чаго, раздушу на твары, і сок пацячэ па падбародку.
Том запытаўся:
- А дзядзька Джон дзе? Дзе Разашарна? А Рут, а Ўінфілд? Пра іх ніхто слова не сказаў.
- А ніхто і не пытаўся, - адказаў бацька. - Джон паехаў у Саліса распрадаць сёе-тое з нашага набытку: помпу, інструмент, курэй - усё, што мы прывезлі сюды з нашай фермы. Узяў з сабой Руці і Ўінфілда. Яшчэ на досвітку паехалі.
- Дзіўна, як гэта мы не стрэліся з імі на дарозе, - сказаў Том.
- Дык ты ж, пэўна, па шашы дабіраўся, а яны паехалі ў аб'езд праз Каўлінгтан. А Разашарна і Коні ў ягоных бацькоў. Э-э, ды ты ж не ведаеш, што яна выйшла за Коні Рыверса! Павінен памятаць яго. Хлопец добры. А ёй ужо радзіць месяцы праз тры-чатыры ці, можа, пяць. З дня ў дзень пышнейшай робіцца. Прыемна глянуць.
- Вось яно як! - сказаў Том. - Разашарна пры мне была яшчэ дзяўчо малое. І вось на табе - радзіць збіраецца. Калі не жывеш дома, чаго толькі не здарыцца за чатыры гады. На Захад калі рушыць думаеш, та?
- Ды вось дабро трэба прадаць. Думаў, як Эл вернецца, пагрузім усё на машыну, і ён завязе ў горад на продаж, а заўтра ці паслязаўтра і паедзем. З грашыма ў нас тугавата, а тут адзін казаў, што да Каліфорніі цэлыя дзве тысячы міль набярэцца. Чым раней паедзем, тым лепш. А то грошы так і цякуць. У цябе ёсць што з сабой?
- Два даляры. А ты як раздабыў?
- Ну, мы прадалі ўсё, што маглі, - адказаў бацька, - а потым усім гуртам бавоўну акучвалі, нават дзед.
- А чаго ж, - сказаў дзед.
- Усё разам склалі - дзвесце даляраў. Семдзесят пяць вось за гэту машыну аддалі, мы з Элам знялі верх і насціл зрабілі.
Сонца вісела проста над галавой і нясцерпна паліла. Ад грузавіка падалі на зямлю цёмныя палосы ценю, ад яго патыхала нагрэтым маслам, цыратай і фарбай. Куры пайшлі з двара і схаваліся ад спёкі ў павеці. Свінні, лежачы ў хлеўчуку ля самай перагародкі, дыхалі цяжка і раз-пораз пранізліва, нібы скардзячыся, вішчалі. Абодва сабакі расцягнуліся ў чырванаватым пыле пад кузавам грузавіка, высунуўшы запыленыя языкі. Бацька насунуў капялюш на вочы і прысеў на кукішкі. У гэтай, відаць, прывычнай яму позе для роздуму і назірання ён акінуў Тома крытычным вокам, паглядзеў на яго новую, але ўжо са слядамі старэння кепку, на касцюм, на новыя чаравікі.
- Усе грошы на гэта патраціў? - запытаўся ён. - Намучышся ў такім уборы.
- Мне выдалі, - адказаў Том. - Перад выхадам. - Ён зняў з галавы кепку, замілавана паглядзеў на яе і выцер ёю лоб, потым зухавата насунуў яе на вуха і пацягнуў за брылёк.
Бацька зазначыў:
- Чаравікі далі табе нішто.
- Ага, - пагадзіўся Том. - Даволі добрыя, толькі ў такую спёку ў іх многа не находзіш. - Ён таксама прысеў побач з бацькам.
Ной паволі прагаварыў:
- Можа, калі б ты да канца абладзіў барты, маглі б ужо і грузіцца. Пагрузім, а тут, можа, і Эл падыдзе, дык мы...
- Я ўмею грузавіком кіраваць, - сказаў Том, - калі толькі ў гэтым справа. У Макалестары я вадзіў грузавік.
- Вось і добра, - сказаў бацька і раптам уставіў вочы на дарогу. - Калі не памыляюся, гэта ён, шалапут, дадому хвост свой цягне. Ледзь ногі перастаўляе.
Том і прапаведнік глянулі ў той бок, і шкадлівы Эл, убачыўшы, што за ім сочаць, расправіў плечы і фанабэрлівай паходкай, перакідваючыся з нагі на нагу, як певень, што сабраўся закукарэкаць, увайшоў на двор. Ганарліва падышоў да людзей зусім блізка і толькі тады пазнаў Тома. Пыхлівасць імгненна сышла з яго твару, у вачах заззялі захапленне і глыбокая павага, і ад яго фанабэрыстай паставы нічога не засталося. Ні каляныя джынсы, падкасаныя на восем цаляў, каб відаць былі боты на высокіх абцасах, ні рэмень тры цалі шырынёй з меднымі фігурнымі бляхамі, ні нават чырвоныя рызінкі на рукавах сіняй кашулі і хвацка ссунуты набакір стэтсанаўскі капялюш не маглі паставіць яго на адну дошку з братам, бо брат яго забіў чалавека, а гэта ніколі не забудзецца. Эл ведаў, што нават ім самім захапляюцца яго равеснікі, бо брат яго забіў чалавека. У Салісе ён неяк раз пачуў: «Гэта Эл Джоўд. Яго брат улажыў аднаго рыдлёўкай».
І цяпер, ціхмяна падыходзячы да брата, Эл убачыў цёмныя хмурныя вочы і турэмны спакой худога голенага твару, які прывык нічым не выдаваць пачуццяў, не выказваць ні супраціўлення, ні рабскай пакорлівасці. І Эл адразу перамяніўся. Падсвядома падрабіўся пад брата, і прыгожы яго твар нахмурыўся, плечы апалі. Ён не памятаў, які Том быў раней.
Том сказаў:
- Здарова, Эл! Вырас, як ляшчына! Я цябе не пазнаў бы.
Трымаючы руку напагатове на выпадак, калі Том захоча яе паціснуць, Эл збянтэжана ўсміхнуўся. Том працягнуў руку, і рука Эла тарганулася насустрач. Яны яўна спадабаліся адзін аднаму.
- Кажуць, ты грузавік здорава водзіш, - сказаў Том.
Эл зразумеў, што пахвальбой брату не дагодзіш, і адказаў:
- Ды не, не вельмі.
Бацька сказаў:
- Швэндаешся ўсё недзе. Зусім, бачу, выматаўся. Ладна, трэба адвезці сёе-тое ў Саліс на продаж.
Эл паглядзеў на брата.
- Паедзеш? - папытаўся ён як мага больш абыякава.
- Не, не магу, - адказаў Том. - Трэба тут памагчы. Яшчэ будзем разам... у дарозе.
Эл не стрымаўся, запытаў:
- Ты... ты ўцёк? З турмы?
- Не, - адказаў Том. - Адпусцілі па падпісцы.
- А-а... - Эл быў крышачку расчараваны.
У маленькіх дамках людзі варушылі і перабіралі сваё дабро, дабро бацькоў сваіх і дзядоў. Выбіралі, што везці з сабой на Захад. Мужчыны распраўляліся са сваім скарбам бязлітасна - усё роўна мінулае жыццё пайшло прахам, але кабеты ведалі, што мінулае яшчэ не раз горка абзавецца.
Мужчыны ішлі ў свірны і павеці. Вось плуг, вось барана - не забыў, як сеялі гарчыцу ў вайну? А памятаеш, прыязджаў адзін, усё ўгаворваў нас каўчукавы хмыз разводзіць - нейкую гваюлу? Разбагацееце, казаў. Ану давай сюды вунь тыя прылады - некалькі даляраў за іх атрымаем. За гэты плуг аддалі васемнаццаць даляраў ды яшчэ за перавозку - па каталогу крамы «Сірз Роўбак».
Збруя, двухколкі, сеялкі, матыкі ў звязках па некалькі штук. Нясі іх сюды. Валі ў адну кучу. Грузі на фургон. У горад завязеш. Колькі дадуць - аддавай. Коней і фургон таксама прадасі. Больш ужо не спатрэбяцца.
Пяцьдзесят цэнтаў за такі добры плуг малавата. Сеялка каштавала мне трыццаць восем даляраў. Два даляры малавата. Ды не цягнуць жа табе ўсё гэта назад... Добра, забірай, і маю горыч таксама. Грузі помпу калодзежную і вупраж. Аброці, хамуты, гужы, пастронкі. І гэтыя шкляныя падвескі на налобнік, бачыш - пад шклом чырвоныя ружачкі. Гнядому купіў. Памятаеш, як ён падкідваў ногі на рысі? Старызна, зваленая ў кучу пасярод двара. Ручны плуг цяпер ніхто не купіць. Пойдзе на лом - жалеза цэнтаў на пяцьдзесят пацягне. Цяпер у хаду толькі дыскавыя плугі да трактароў.
Добра, бярыце ўсё... усё гэтае жалеззе і давайце пяць даляраў. Вы купляеце не толькі гэтае ламачча, але і зламанае жыццё. Мала таго... самі пераканаліся... вы купляеце маю горыч у прыдачу. Купляеце плуг, які засыпае сваім адвалам вашых дзяцей, вы купляеце зброю і волю, якія маглі б уратаваць вас. Не чатыры, а пяць. Не цягнуць жа мне ўсё гэта назад... добра, няхай чатыры. Але папярэджваю - вы купляеце тое, што заарэ вашых дзяцей. Не заўважыце, як гэта здарыцца. Не паспееце заўважыць. Бярыце за чатыры... Ну, а колькі дасце за коней з фургонам? Зірніце, якія коні! Абодва гнядыя, масць у масць, і хада ў іх аднолькавая, нага ў нагу. Як нацягнеш лейцы - сцёгны і крыж напружацца ў абодвух у адно і тое ж імгненне, у долю секунды. А пры ранішнім святле адліваюць золатам. Паглядаюць цераз перагародку, пасопваюць - прынюхваюцца, навостраць вушы і стрыгуць імі - прыслухоўваюцца, ці не ідзе гаспадар. А чубкі зусім чорныя! Ёсць у мяне дачка. Дык яна любіць заплятаць ім грывы і чубкі - запляце коску і завяжа чырвонай стужачкай. Дужа ёй падабаецца гэта. А цяпер - усё, канец. Я мог бы расказаць вам забаўную гісторыю пра дачку і таго вунь прыпражнога. Вось вы пасмяяліся б! Прыпражному восем гадоў, а гэтаму гнядому - дзесяць, а зладзіліся працаваць, быццам жарабкі аднаго прыплоду. Во, бачыце? Зубы. Ніводнага гнілога. Лёгкія глыбокія. Капыты роўныя і чыстыя. Колькі? Дзесяць? За абодвух? І яшчэ фургон?.. О, Езус! Ды лепш я прыстрэлю іх сабакам на корм. Ат, бярыце! Хутчэй бярыце, містэр. Вы купляеце заадно і маленькае дзяўчо, якое заплятала ім чубкі - знімала ў сябе з галавы стужачкі і завязвала ім коскі банцікам; адыдзе назад, галава набок - палюбуецца і патрэцца шчочкай аб мяккія цёплыя ноздры. Вы купляеце доўгія гады працы, цяжкай працы на санцапёку, вы купляеце скруху, якую не выказаць словамі. Але беражыцеся, містэр. Вы атрымаеце надбаўку за ўсю гэту кучу хламу і за гнядых коней... за маіх прыгажуноў... - пакецік гневу, які прымецца ў вашым доме, пойдзе ў рост і калі-небудзь забуяе пышным цветам. Мы маглі б стаць вашымі збавіцелямі, але вы падсеклі нас; настане дзень, калі і ваша жыццё падсякуць, і не будзе каму ратаваць вас.
І арандатары вярталіся пеша дамоў, засунуўшы рукі ў кішэні, апусціўшы капелюшы на самыя вочы. Некаторыя куплялі бутэльку віскі і тут жа апаражнялі, каб аглушыць сябе адразу. Але, выпіўшы, яны не смяяліся, не пускаліся ў скокі. Не спявалі, не перабіралі струны гітар. Вярталіся на свае фермы, трымаючы рукі ў кішэнях і нізка апусціўшы галовы, і з-пад іх чаравікаў узнімаўся чырвоны пыл.
Мажліва, пачнём жыццё нанава ў новым багатым краі - у Каліфорніі, дзе растуць фрукты. Пачнём з самага пачатку.
А хіба можна пачынаць спачатку? Спачатку пачынае жыццё толькі дзіця. А мы з табой... у нас ужо ўсё ззаду. Хвілінныя ўспышкі раздражнення, тысячы карцін мінулага - гэта мы. Палі, чырвоныя палі - гэта мы; дажджлівыя гады, пыльныя гады, засушлівыя гады - усё гэта мы. Нам нанава жыццё ўжо не пачаць. Азлабленне, якое мы прадалі скупшчыку старызны, - яно будзе з ім, але і нас не пакіне. І тое, як гаспадары загадвалі нам выбірацца, таксама з намі; і тое, як трактар з ходу парушыў дом, застанецца з намі да самай смерці. У Каліфорнію ці яшчэ куды - мы, як тамбур-мажоры на парадзе, павядзём за сабой нашы крыўды, наша абурэнне. І настане дзень, калі ўсе арміі абураных пойдуць адным шляхам. І будуць яны крочыць у нагу, і поступ іх будзе грозны.
Арандатары брылі дамоў, на свае фермы, праз чырвоны пыл.
Калі ўсё, што можна было прадаць, было прададзена - пліты і ложкі, крэслы і сталы, маленькія кутнія буфеты, тазы і бакі - засталіся яшчэ кучы хатняга скарбу; і жанчыны сядзелі сярод іх, перабіралі рэч за рэччу, азіраліся назад, у мінулае - малюнкі, квадратныя люстэркі, а вось ваза...
Ты і без мяне ведаеш, што можна ўзяць з сабой, а што нельга. Мы ж будзем рабіць прывалы ў полі - спатрэбіцца посуд гатаваць яду і мыць бялізну, матрацы і прашываныя коўдры, ліхтары, і вёдры, і брызент... З яго зробім навес. І бітон з-пад газы. Ведаеш, што з яго будзе? Печка. А адзежа - адзежу ўсю бяры. Стрэльба?.. Без стрэльбы як без рук. Калі не будзе ўжо ні чаравікаў, ні адзення, ні ежы, ні нават надзеі, у нас астанецца стрэльба. Калі дзед прыйшоў сюды, здаецца, я расказваў табе, у яго з сабой былі толькі перац, соль і стрэльба. Больш нічога. Гэта пойдзе. І яшчэ бутэлька на ваду. Ну, здаецца, больш ужо няма куды. Вышэй бартоў. Малыя залезуць на паклажу, а бабку пасадзім на матрац. Прылады - рыдлёўку, пілу, гаечны ключ, абцугі. І яшчэ сякеру. Сякера гэтая служыць гадоў ужо сорак. Бачыш, як лязо сцерлася? І вяроўкі, канешне. Астатняе? Кінь тут... ці спалі.
Падыходзілі і дзеці.
Раз Мэры бярэ ляльку, гэту рваную завэдзганую ляльку, дык я вазьму свой індзейскі лук. Мне без яго ніяк нельга. І яшчэ палку - яна пад мой рост. Раптам спатрэбіцца. Яна ў мяне ўжо даўно - цэлы месяц ці нават год. Я без яе не магу. А якая яна, Каліфорнія?
Жанчыны сядзелі сярод асуджаных на пагібель рэчаў, перабіралі іх, глядзелі скрозь іх, вярталіся ў мінулае. Вось кніжка. Бацькава кніжка. Ён любіў чытаць. «Шлях паломніка». Часта чытаў яе. Вось яго надпіс. І люлька яго - яшчэ і цяпер пахне тытунём. Малюнак - анёл. Я ўсё на яго глядзела перад першымі трыма родамі... ды нешта не памагло. Можа, узяць гэтага фарфоравага сабачку? Яго цётка Сэндзі прывезла з кірмашу ў Сэнт-Луісе. Проста на ім і напісала. Ды не, не варта. Ліст ад брата - за дзень да смерці напісаў. А вось капялюшык - старамодны. З пер'ем... Не любіла я пер'е і яго не насіла. Не, месца ўжо няма.
Як можна жыць, калі ў нас забралі жыццё? Як мы пазнаем саміх сябе, калі нас пазбавілі мінулага? Не. Кінь. Спалі.
Яны сядзелі, пазіралі на старыя рэчы і стараліся выпаліць іх з памяці. Як будзеш жыць, калі за парогам дома - незнаёмая зямля? Прачнешся раптам сярод ночы і ведаеш: вярбы той няма. Ты можаш жыць без вярбы? Не можаш. Вярба - гэта ты. Пакуты на гэтым матрацы... жахлівыя пакуты... - гэта ты.
А дзеці: раз Сэм бярэ свой індзейскі лук і доўгую палку, дык і я вазьму дзве рэчы. Ляльку і пуховую падушку. Гэта мая падушка.
І раптам усе пачыналі нервавацца. Трэба хутчэй пускацца ў дарогу. Чаго чакаць? І яны навальвалі пасярод двара астатні скарб і падпальвалі. Нейкі час стаялі, пазіраючы на агонь, потым з ліхаманкавай паспешнасцю грузіліся на машыну і ехалі, знікаючы ў клубах пылу. Пыл яшчэ доўга вісеў у паветры.
Калі грузавік паехаў, напакаваны даверху розным інвентаром, цяжкім інструментам, ложкамі, спружыннымі матрацамі - усёй рухомай маёмасцю, якую можна было прадаць, Том пачаў бадзяцца па ўчастку. Пастаяў у свірне, зазірнуў у апусцелыя стойлы, зайшоў у павець для гаспадарчага начыння, падчапіў нагой розны хлам, што застаўся, перавярнуў чаравікам адламаны зубец касілкі. Ён абышоў усе памятныя мясціны - чырвоны берагавы адхон, дзе гняздзіліся ластаўкі, вярбу, што навісала над свінушнікам. Дзве чорныя свінні, разамлелыя на сонцы, з рохканнем пацягнуліся да яго рыламі цераз перагародку. Тут яго паломніцтва скончылася, і ён вярнуўся да дома і сеў на прыступку, куды толькі што перакінуўся цень. За яго спінай на кухні завіхалася маці - мыла дзіцячую бялізну ў начоўках; з локцяў яе моцных вяснушкаватых рук падала мыльная пена. Як толькі Том сеў на прыступку, яна перастала церці, выпрасталася і доўга глядзела на яго збоку, а калі ён павярнуўся і ўставіўся на заліты сонцам двор, - на патыліцу. Потым зноў узялася за бялізну.
- Спадзяюся, Том, у Каліфорніі някепска, - сказала яна.
Ён азірнуўся і глянуў на маці.
- З чаго ты ўзяла, што там можа быць кепска?
- А ні з чога. Толькі неяк задужа ўсё цудоўна. Тут адзін чалавек раздаваў рэкламныя лісткі. Чаго толькі там не напісана - і працы шмат, і плата высокая, і ўсё такое іншае; потым прачытала ў газеце, колькі народу патрабуецца на зборы вінаграду, апельсінаў і персікаў. Работа прыемная, Том, - персікі збіраць. Нават калі не дазволяць ніводнага з'есці, усё ж такі які-небудзь гнілы ападак праглынеш. А пад дрэвамі добра працаваць - цень. Так ужо ўсё цудоўна, ажно жах бярэ. Не веру я. Баюся, нешта тут не так.
Том сказаў:
- Не заносся вышэй за арла, не будзеш поўзаць разам з чарвякамі.
- То праўда. Гэта са свяшчэннага Пісання?
- Здаецца, адтуль, - адказаў Том. - Як прачытаў кніжку «Перамога Барбары Ўорт», у мяне свяшчэннае Пісанне мігам з галавы выбіла.
Маці ціха засмяялася і зноў узялася церці і паласкаць бялізну ў начоўках. Пасля пачала выкручваць рабочыя камбінезоны і кашулі, і мускулы ў яе на руках напяліся, як вяроўкі.
- Дзед твой з бацькавага боку раней таксама ледзь што - выслоўі з Бібліі прыводзіў. Але блытаў страх як. Усё збіваўся на «Веснік доктара Майлса» - медыцынскі даведнік. Ён яго ад першага да апошняга слова чытаў нам уголас. Там было шмат пісьмаў ад бяссоннікаў і ад тых, у каго ламала паясніцу. Потым суседзям пераказваў ім на навуку і дадаваў: «Гэта прытча з Пісання». Твой бацька і дзядзька Джон на смех яго падымаюць, а ён з сябе выходзіць. - Яна кінула на стол выкручаную бялізну, як бярэмя дроў. - Кажуць, ехаць нам дзве тысячы міль. Гэта вельмі далёка, Том? Я бачыла карту - высокія горы, як на каляровых паштоўках, і прабірацца нам трэба проста праз іх. Як ты думаеш, Том, колькі часу датуль ехаць?
- Не ведаю. Тыдні два, а калі пашчасціць, дзён дзесяць. Паслухай, ма, кінь непакоіцца. Вось я раскажу табе, як людзі жывуць у турме. Пра тое, калі цябе выпусцяць на волю, думаць нельга. З розуму кранешся. Думаць трэба пра сённяшні дзень, пра заўтрашні, пра бейсбол які-небудзь у суботу. Так і трэба жыць. Так жывуць турэмныя старажылы. А навічкі - тыя лбом аб дзверы б'юцца. Усё лічаць, колькі ім яшчэ сядзець засталося. Навошта табе гэта? Жыві з дня на дзень.
- І праўда так лепш, - сказала маці, зняла з пліты і наліла ў начоўкі гарачай вады, кінула туды брудную бялізну і пачала мясіць яе ў мыльнай вадзе. - І праўда так лепш. А ўсё ж прыемна думаць, як добра, напэўна, будзе ў Каліфорніі. Халадоў там не бывае. Скрозь - фрукты, людзі жывуць у прыгожых мясцінах, у маленькіх беленькіх доміках сярод апельсінавых дрэў. Вось каб і нам так... я хачу сказаць: калі ўсім нам знойдзецца праца... можа, і мы зажывём у адным з гэтых беленькіх домікаў. Малыя выйдуць за парог і будуць рваць апельсіны проста з галін. Паспрабуй стрымай іх - зойдуцца ад плачу.
Том глядзеў, як яна важдаецца з бялізнай, і вочы яго смяяліся.
- Табе, я бачу, ад адных такіх думак лягчэй робіцца. Я ведаў аднаго з Каліфорніі. Ён гаварыў неяк інакш, чым мы. Па гаворцы адразу пазнаеш, што ён здалёку, не з нашых мясцін. Дык ён расказваў, што там дужа шмат народу набралася, усе працы шукаюць. І яшчэ казаў, што зборшчыкі фруктаў туляцца там у брудных старых халупах, жывуць надгаладзь. Плата малая, работу знайсці цяжка.
Па твары маці прабег цень.
- Не, гэта не так, - сказала яна. - У бацькі ёсць лісток з такой жоўтай паперы - і там надрукавана, што патрэбны работнікі. Ніхто ж не браў бы на сябе такі клопат, калі б работы не было. Лісткі гэтыя немалыя грошы каштуюць. Навошта ж маніць ды яшчэ плаціць за сваю ману?
Том пакруціў галавой:
- Што я магу сказаць, ма? Зразумець цяжка, чаму гэтак робяць. Можа... - ён глянуў на двор, на залітую гарачымі сонечнымі промнямі зямлю.
- Што - «можа»?
- Можа, усё добра будзе, як ты кажаш. А куды дзед знік? Дзе прапаведнік?
Маці пайшла з кухні, несучы ў абярэмку памытую бялізну. Том адсунуўся, даючы ёй прайсці.
- Прапаведнік сказаў, пахадзіць хоча. А дзед спіць у пакоі. Ён іншы раз сярод дня заходзіць у дом крышачку паляжаць. - Маці выйшла на двор і стала накідваць на дрот выцвілыя сінія камбінезоны і доўгія шэрыя споднікі і кашулі.
Том пачуў у сябе за спінай шаркатлівыя крокі і азірнуўся. Са спальні выходзіў дзед і, як і раніцай, вазіўся з гузікамі на штанах.
- Чую, тут гамоняць, - сказаў ён. - Сукіны дзеці, паспаць не дадуць. Калі ў вас, шчанюкоў, шэрсць абсохне, тады, можа, зразумееце, што старому чалавеку трэба даць паспаць. - Яго нецярплівыя пальцы ўхітрыліся расшпіліць два ўжо зашпіленыя гузікі, і ён забыўся, што хацеў зрабіць. Рука забралася ў прарэх і з задавальненнем паскрэбла пад пахвінай.
Маці вярнулася на кухню з мокрымі рукамі, далоні ў яе былі набрынялыя і зморшчаныя ад гарачай вады і мыла.
- Думала, ты спіш, - сказала яна. - Дай зашпілю. - І хоць дзед і адбіваўся, яна ўсё ж утрымала яго і зашпіліла яму ніжнюю сарочку, кашулю і штаны. - А то ходзіш - адна любата! - сказала яна і адпусціла старога.
Ён злосна замармытаў:
- Дажыў-ткі, дажыў чалавек - ужо зашпільваюць яго. Дайце мне самому зашпільваць свае штаны.
Маці жартаўліва сказала:
- У Каліфорніі не дадуць табе расхрыстанаму шпацыраваць.
- Не дадуць? Ха! Дык я ім пакажу! Вучыць яшчэ мяне там будуць, як жыць. Захачу - з голым перадам расхаджваць буду, калі ўжо на тое пайшло.
Маці сказала:
- Такі вольны стаў на язык! Год ад году ўсё горш і горш. Перад табой, відаць, казырыцца, Том.
Стары выпнуў шчаціністы падбародак і ўставіў на дачку хітрыя, калючыя, гарэзлівыя вочкі.
- Так, сэр, - сказаў ён, - хутка ўжо ў дарогу рушым. І, далібог, праўда, вінаград там проста гронкамі вісіць пры дарозе. Ведаеце, што я зраблю? Нарву яго поўны таз і сяду на яго прама ў штанах ды яшчэ патаўкуся, і няхай сок пацячэ па калашынах.
Том засмяяўся:
- Слова гонару, хоць дзвесце гадоў дзеду будзе, яго ўсё роўна не ўтаймаваць. Значыць, дзед, у дарогу пускаемся?
Стары падцягнуў да сябе скрынку і цяжка апусціўся на яе.
- Так, сэр, - сказаў ён. - Даўно пара. Брат мой сорак гадоў таму назад туды паехаў. З таго часу ад яго ні гуку. Прайдзісвет быў, сукін кот. Ніхто яго не любіў. Уцёк з маім адназарадным кольтам. Вось сустрэнуся з ім або з яго дзецьмі, калі ён імі абзавёўся ў Каліфорніі, і запатрабую назад свой кольт. Я яго ведаю, гэтую кукушку: калі дзеці ў яго і былі, дык жывуць яны ў чужых гнёздах, куды ён іх падкінуў, так у чужых і жывуць. Канешне, я з радасцю паеду ў Каліфорнію. Там, адчуваю, памаладзею. Як прыеду - адразу на збор фруктаў.
Маці кіўнула галавой:
- Дзед гэтак і зробіць. Ён толькі апошнія тры месяцы не працуе - з таго дня, як бядро сабе скруціў.
- Святая праўда, - пацвердзіў дзед.
Седзячы на прыступцы, Том паглядзеў праз двор.
- Вунь і прапаведнік ідзе, аднекуль з-за свірна.
Маці сказала:
- Ніколі не чула такой незвычайнай малітвы, як сёння раніцай. Гэта ж не малітва была. Проста гаварыў, але гучала, як малітва.
- Нейкі ён дзівакаваты. І гаворыць дзіўна. Быццам размаўляе сам з сабой. Але не дзеля таго, каб заваражыць і набіць сабе цану.
- А ты глянь на яго вочы, - сказала маці. - Быццам ласка боская на яго сышла. Словы яго проста ў душу даходзяць. Ён як богам блаславёны. Ходзіць, апусціўшы галаву, і ўсё пад ногі сабе пазірае. На ім нябеснае бласлаўленне. - Яна змоўкла, бо Кейсі падыходзіў ужо да дзвярэй.
- Сонечны ўдар схопіш - расхаджваеш па такой спёцы, - сказаў яму Том.
Кейсі адказаў:
- Ага... усё можа быць... - І раптам загаварыў, звяртаючыся да ўсіх разам, - да маці, да дзеда, да Тома. - Мне таксама трэба на Захад. Абавязкова трэба. Можа, вы возьмеце мяне з сабой? - Ён сам здзівіўся з сваіх слоў і застыў на месцы перад імі.
Маці пытальна паглядзела на Тома, бо адказваць павінен быў ён - мужчына, але Том маўчаў. Даўшы яму час скарыстаць сваё права, маці нарэшце сказала:
- Нам гэта вялікі гонар. Але цяпер, разумееце, я вам нічога абяцаць не магу. Бацька сказаў, сёння ўвечары мужчыны ўсё абгавораць і вырашаць, калі ехаць. Давайце лепш пачакаем, пакуль усе не збяруцца - і Джон, і бацька, і Ной, і Том, і дзед, і Эл з Коні. Усё і вырашаць, як толькі ўсе вернуцца. Калі месца будзе, нам гэта, вядома ж, вялікі гонар.
Прапаведнік уздыхнуў.
- Усё роўна я пакірую туды, - сказаў ён. - Што тут робіцца! Я пахадзіў - дамы пустыя, зямля пустая, усё наваколле апусцела. Тут я не застануся. Пайду туды, куды ўсе ідуць. Буду ў полі працаваць і, можа, зарадуюся.
- А прапаведаваць будзеш? - запытаўся Том.
- Прапаведаваць не буду.
- І хрысціць не будзеш?
- І хрысціць не буду. Я ў полі працаваць буду, на зялёных палях, увесь час з людзьмі буду. Вучыць іх болей не стану. Сам лепш павучуся. Дазнаюся, чаму людзі ходзяць у густую траву, прыслухаюся, як яны гавораць, паслухаю іхнія песні. Пачую, як дзеці ядуць маісавую кашу. Як муж з жонкай таўкуць матрацы па начах. Буду есці з людзьмі, вучыцца ў іх. - Вочы яго былі вільготныя і блішчалі. - І сам паваляюся ў траве з той, што пажадае легчы са мной, - адкрыта, без хітрыкаў. І клясціся буду, і бажыцца, і ўслухоўвацца ў паэзію людской мовы. Усё гэта святое - раней я не разумеў. Гэта ўсё - даброты жыцця.
Маці сказала:
- А-мін.
Прапаведнік ціхмяна сеў на калоду каля дзвярэй.
- Не ведаю, што яшчэ рабіць адзінокаму чалавеку.
Том далікатна кашлянуў.
- Калі чалавек вырашыў больш не прапаведаваць... - пачаў быў ён.
- Ат, я проста занадта гаваркі, - сказаў Кейсі. - Ніяк ад гэтага не магу збавіцца. Але прапаведаваць не буду. Прапаведаваць - гэта значыць нешта тлумачыць людзям. А я задаю ім пытанні. Хіба гэтак прапаведуюць?
- А я ведаю? - адказаў Том. - Пропаведзь - гэта і тон голасу, і пэўны погляд на рэчы. Пропаведзь - справа добрая, калі толькі пасля яе не хочацца забіць прапаведніка. У мінулыя Каляды прыйшлі да нас у Макалестар з Арміі Выратавання. Тры гадзіны бітыя ігралі на карнетах, а мы сядзім і слухаем. Абыходзіліся з намі ласкава, а паспрабуй хто з нас падняцца і пайсці, адразу карцэр заробіш. Вось табе і пропаведзь! Улагоджвалі людзей нявольных, якія не могуць даць ім па карку за такую пропаведзь. Не, які ты прапаведнік! Глядзі толькі не ўздумай тут на карнеце іграць.
Маці падкінула голля ў агонь.
- Зараз вы перакусіце, вось толькі малавата ў мяне.
Дзед выцягнуў на двор сваю скрыню, сеў на яе і прыхінуўся да сцяны. Цень ад дзённага сонца падаў ужо на двор.
Грузавік вярнуўся пад вечар, падскокваючы і грукочучы ў клубах пылу. Пыл пластом ляжаў на насціле кузава, і капот быў увесь укрыты ім, а фары слаба свяціліся, нібы зацярушаныя чырвонай мукой. Сонца садзілася, і ў яго апошніх промнях зямля была чырвоная, як кроў. Эл сядзеў, прынікшы да руля, горды, сур'ёзны і дзелавіты, а бацька з дзядзькам Джонам займалі ганаровыя месцы побач з вадзіцелем. Стоячы ў кузаве і трымаючыся за планкі бартоў, ехалі астатнія: дванаццацігадовая Руці і дзесяцігадовы Ўінфілд - мурзатыя і дзікія, вочы стомленыя, але поўныя захаплення, пальцы і куткі рота чорныя і клейкія ад лакрычных ледзянцоў, якія яны выкленчылі ў бацькі ў горадзе. Руці, у доўгай, за калені, сукенцы з ружовага міткалю, трымалася, як паненка. Але Ўінфілд быў яшчэ дзіця - з тых, што бегаюць смаркатыя, падоўгу бавяцца недзе за свірнам, падбіраюць і кураць чужыя недакуркі. Тады як Руці ўжо разумела, якую годнасць ёй надаюць, якую адказнасць на яе накладаюць пачаўшыя ўжо прыкметна выдавацца грудзі, Уінфілд быў яшчэ гарэзлівы і дурненькі, як цялятка, хлапчук. Побач з імі, лёгка абапіраючыся на дошкі борта, стаяла Ружа Сарона. Стараючыся захаваць раўнавагу, яна пагойдвалася на насках, прымаючы штуршкі грузавіка каленямі і бёдрамі. Ружа Сарона была цяжарная і таму вельмі асцерагалася. Яе валасы, заплеценыя ў косы, ляжалі светла-попельнай каронай вакол галавы. На круглявым твары, такім пачуццёвым і прываблівым яшчэ толькі некалькі месяцаў назад, цяпер паявілася ўжо адчужанасць цяжарнасці, самазадаволеная ўсмешка, упэўнены і горды выраз, і яе поўнае цела - налітыя мяккія грудзі і жывот, крутыя клубы і ягадзіцы, якія раней так спакусліва пагойдваліся, нібы запрашаючы пляснуць па іх далонню ці пагладзіць, - усё яе цела набыло адбітак стрыманасці і самавітасці. Усе яе думкі былі скіраваныя ў сябе ўнутр, на дзіця, ва ўсіх яе рухах выяўляўся клопат пра яго. Дзеля яго яна цяпер старалася захаваць раўнавагу, стоячы на насках. Ёй здавалася, што ўвесь свет носіць у сваім лоне плод, і мысліла яна толькі з пункту гледжання прадаўжэння роду і мацярынства. Яе дзевятнаццацігадовы муж, Коні, які ўзяў за жонку пухленькае і палкае дзяўчо-гарэзу, спалохана і недаўменна прыглядаўся да перамены, якая адбылася з ёю, бо цяпер не было ўжо ні кашэчай валтузні ў пасцелі, ні кусання і драпання, ні прыглушаных смяшкоў і заключных слёз. Ён бачыў перад сабой стрыманую, абачлівую і мудрую істоту, якая сарамліва ўсміхалася яму, але не ўступала. Коні ганарыўся Ружай Сарона і баяўся яе. Як толькі выпадаў момант, ён дакранаўся да яе рукой, стаяў блізка, зусім блізка, каб адчуць целам яе бядро ці плячо, і гэта жывіла пачуццё блізкасці, якое магло зусім пакінуць яго. Коні быў хударлявы, з рэзкімі рысамі твару юнак тэхаскай пароды, і яго блакітныя вочы то гарэлі пагрозаю, то свяціліся ласкаю, то цямнелі ад страху. Ён быў добры, старанны працаўнік і мог бы стаць добрым мужам. Ён выпіваў, але ў меру, пускаў у ход кулакі, калі інакш было нельга, ніколі не выхваляўся. На людзях паводзіў сябе ціха, і ўсё ж яго прысутнасць адчувалася, з ім лічыліся.
Калі б дзядзьку Джону не было пяцідзесяці і не быў бы ён па праву роднасці адным з важакоў сям'і, ён палічыў бы за лепшае адмовіцца ад пачэснага месца побач з вадзіцелем і з радасцю ўступіў бы яго Ружы Сарона. Але гэта выключалася, бо яна была яшчэ маладая, і да таго ж жанчына. Дзядзька Джон адчуваў сябе ніякавата, засяроджаныя, неспакойныя вочы яго глядзелі тужліва, і ў моцным хударлявым целе адчувалася напружанасць. Амаль усё жыццё адзінота адгароджвала яго ад людзей, ад натуральных чалавечых пачуццяў. Але пачуцці спелі, збіраліся ўсярэдзіне і нарэшце вырываліся вонкі. Тады ён прагна накідваўся на ежу і аб'ядаўся да рвоты, або глушыў самагон ці віскі, пакуль не ператвараўся ў бяссільнага паралітыка з чырвонымі слязістымі вачамі, альбо пажадліва распуснічаў з якой-небудзь шлюхай у Салісе. Пра яго расказвалі, што аднойчы ён дабраўся да самага Шоўні і паклаў адразу трох прастытутак у адну пасцель і цэлую гадзіну шумна валтузіўся з трыма абыякавымі жаночымі целамі. Але, чым-небудзь насыціўшыся, дзядзька Джон хадзіў сумны, прысаромлены і, як і раней, адзінокі. Хаваўся ад людзей і стараўся загладзіць сваю віну падарункамі. Крадком забіраўся ў дамы і засоўваў дзецям пад падушкі жавальныя гумкі, сек дровы і не браў за гэта грошай. Раздаваў другім усё, што ў яго было, - сядло, каня, пару новых чаравікаў. Тады нікому не ўдавалася пагаварыць з ім, бо ён уцякаў, а калі сутыкаўся з людзьмі твар у твар, ён сцінаўся і паглядаў на іх спалоханымі вачамі. Смерць жонкі і доўгія месяцы самоты, што настала пасля таго, далі свой плён - згрызоты сумлення і сорам, і адзіноту яго нішто не магло парушыць.
Але было і такое, чаго ён ніяк не мог пазбегнуць. І вось цяпер дзядзька Джон едзе побач з вадзіцелем, бо ён быў адным з галоў сям'і, а сям'ёй трэба кіраваць.
Тры чалавекі, што сядзелі ў кабіне, панура вярталіся дамоў па пыльнай дарозе. Эл, схіліўшыся над рулём, паглядаў то на дарогу, то на прыборны шчыток - сачыў за стрэлкай амперметра, якая падазрона падрыгвала, за індыкатарамі ўзроўню гаручага і нагрэву. І ён у думках адзначаў слабыя месцы ў паводзінах машыны. Прыслухоўваўся да падвывання - можа, у заднім мосце не хапае масла; чуйным вухам сачыў за работай клапанаў. Ён трымаў руку на рычагу пераключэння скорасцей, адчуваючы далонню работу механізма счаплення. Націскаў на педаль - правяраў тармазныя калодкі. Можа, Эл іншы раз і блудзіў, як казёл, але цяпер ён адчуваў сваю вялікую адказнасць - за грузавік, за яго ход, за яго стан. Калі што-небудзь разладзіцца, гэта будзе яго віна, і хоць ніхто не скажа яму і слова папроку, усе, і найперш сам Эл, будуць ведаць, што вінаваты ён. І Эл правяраў машыну, сачыў за ёю, прыслухоўваўся да яе. Твар яго быў сур'ёзны, поўны пачуцця адказнасці. І ўсе паважалі яго і тую адказнасць, з якой ён ставіўся да свайго абавязку. Нават бацька - галава сям'і - з ахвотай узяў бы гаечны ключ і выканаў бы распараджэнні Эла.
Усе на грузавіку былі змораныя. Руці і Ўінфілд стаміліся ад вулічнага тлуму, ад натоўпу, ад вымольвання ў бацькі лакрычных ледзянцоў; яны стаміліся ад таго захаплення, якое выклікаў у іх дзядзька Джон, калі ён употайкі соваў ім у кішэні жавальныя гумкі.
І людзі, што сядзелі побач з вадзіцелем, былі змораныя, узлаваныя і сумныя, бо ім удалося выручыць толькі васемнаццаць даляраў за ўсю рухомасць з фермы - за коней, за фургон, за інвентар і за ўсю мэблю. Васемнаццаць даляраў. Яны наваліліся на скупшчыка, спрачаліся з ім, але адступілі, калі інтарэс яго раптам звяў і ён заявіў, што яму нічога не трэба ні за якую цану. Тады яны зразумелі, што прайгралі, здаліся і атрымалі на два даляры менш, чым скупшчык прапанаваў ім спачатку. І цяпер яны ехалі стомленыя і запалоханыя, бо ім давялося сутыкнуцца з рэчаіснасцю, якую яны не разумелі, і рэчаіснасць гэтая перамагла. Яны ведалі, што запрэжка з фургонам каштуюць куды даражэй. Яны ведалі, што скупшчык выручыць за іх значна больш, але як зрабіць гэта самім, заставалася загадкай. Гандаль быў для іх таямніцай.
Пераводзячы вочы з дарогі на прыборны шчыток, Эл сказаў:
- Малойчык гэты не тутэйшы. Гаворка ў яго не мясцовая. І адзежа таксама нейкая не такая.
І бацька паясніў:
- Калі я заходзіў у скабяную краму, я гутарыў там са знаёмымі. І яны сказалі, што шмат такіх сюды наехала, скупляюць усё, што людзі вязуць на продаж перад ад'ездам. Заезджыя гэтыя парадкам нажываюцца на нас. А мы зрабіць не можам нічога. Можа, трэба было Томі з намі паехаць. Ён, магчыма, даражэй прадаў бы.
Джон сказаў:
- Але ж скупшчык і браць нічога не хацеў. Не назад жа цягнуць.
- Мае знаёмыя там, у краме, наконт гэтага мне гаварылі, - сказаў бацька. - Скупшчыкі заўсёды гэтак робяць. Запужваюць людзей. Мы проста не ведаем, як з імі справу весці трэба. Маці вельмі засмуціцца. Зазлуе і засмуціцца.
Эл сказаў:
- А калі ты, та, думаеш ехаць?
- Яшчэ не ведаю. Вечарам усё абмяркуем і вырашым. Я рады, што Том вярнуўся. З душы камень зваліўся. Том добры хлапец.
- Тут адзін казаў, што Том даў падпіску. І быццам бы праз гэта яму нельга адлучацца з нашага штата, а калі паедзе і пападзецца, дык яго на тры гады пасадзяць.
Бацька здрыгануўся:
- Так і сказалі? Як табе здалося - яны ведаюць, што кажуць? Можа, проста трэплюцца?
- Хто іх ведае. Яны гаварылі між сабой, а я не выдаў ім, што ён мой брат. Стаяў побач і слухаў.
Бацька сказаў:
- Божа мой, не думаю, што гэта праўда! Нам без Тома ніяк. Я спытаюся ў яго. Непрыемнасцей і без таго досыць - не хапае яшчэ, каб за намі гналіся. Спадзяюся, гэта няпраўда. Трэба з ім пагаварыць начыстую.
Дзядзька Джон сказаў:
- Том сам ведае, як яму быць.
Усе змоўклі. Грузавік грукатаў па дарозе. Матор барахліў, стукацеў, тармазныя цягі бразгаталі. Колы парыпвалі, як драўляныя, са шчыліны ў каўпачку радыятара струменьчыкам вырывалася пара. За грузавіком віўся чырвоны слуп пылу. Ён з грукатам адолеў апошні пад'ём, калі палова сонечнага дыска яшчэ вісела над рысай гарызонту, і, нырнуўшы ўніз, пад'ехаў да дома, калі сонца зусім схавалася. Тармазы завішчалі, і гук гэты адціснуўся ў Элавым мазгу словамі: «Усё - пракладка паехала».
Руці і Ўінфілд з віскам пералезлі цераз борт і саскочылі на зямлю. Яны крычалі:
- Дзе ён? Дзе Том? - І раптам убачылі яго каля дзвярэй і збянтэжана спыніліся, потым паволі падышлі і нясмела зірнулі на брата.
І калі Том сказаў: - Вітанне, малыя, як справы? - яны адказалі:
- Вітанне! У нас усё добра, - і, стаўшы ўбаку, пачалі разглядаць свайго вялікага брата, які забіў чалавека і сядзеў за гэта ў турме. Ім прыгадалася, як яны гулялі ў турму ў куратніку і ваявалі між сабой за права быць арыштантам.
Коні Рыверс зняў з задняга борта высокую папярэчыну, саскочыў з грузавіка і памог Ружы Сарона злезці; і яна з годнасцю прыняла яго дапамогу і ўсміхнулася сваёй усёведнай, самазадаволенай усмешкай, неяк манерна скрывіўшы куткі губ.
Том сказаў:
- Ды гэта ж Разашарна! А я не ведаў, што ты разам з імі прыедзеш.
- Мы ішлі пеша, - сказала яна. - Машына нас дагнала і падвезла. - І дадала: - Пазнаёмся з Коні, маім мужам. - Яна прамовіла гэта, як велікасвецкая дама.
Том і Коні павіталіся за руку, змерыўшы адзін аднаго позіркам, уважліва прыглядаючыся адзін да аднаго, і засталіся задаволеныя гэтым аглядам. Тады Том сказаў:
- Я бачу, ты часу марна не траціў.
Ружа Сарона апусціла вочы на свой жывот:
- Нічога ты не бачыш, рана яшчэ.
- Мне мама сказала. Калі ж гэта будзе?
- О, не хутка. Зімой, не раней.
Том засмяяўся:
- Значыць, народзіш яго на апельсінавым ранча, га? У беленькім доміку сярод апельсінавых дрэў?
Ружа Сарона памацала жывот абедзвюма рукамі.
- Нічога ты не бачыш, - сказала яна, усміхнуўшыся сваёй самазадаволенай усмешкай, і пайшла ў дом.
Вечар быў спякотны, з захаду ўсё яшчэ напорыста праменілася святло. І, не чакаючы клічу, уся сям'я сабралася каля грузавіка, і сямейны з'езд, сямейная рада пачала сваё паседжанне.
У вэлюме вячэрняга святла чырвоная зямля здавалася празрыстай, быццам яна раздалася ва ўсе бакі, і кожны камень, слуп і будынак набылі аб'ёмнасць і цэльнасць, не прыкметныя воку пры дзённым святле; і ўсе прадметы неяк больш, чым удзень, вылучаліся з астатніх. Слуп быццам стаяў сам па сабе, аддзяліўшыся ад зямлі і ад кукурузных палёў, што рассцілаліся за ім. А кожнае кукурузнае сцябло нібы расло паасобку, не зліваючыся з астатнімі; і касматая вярба стаяла сама па сабе, асобна ад другіх дрэў. Зямля нібы падсвечвала вячэрняе сутонне. Заходняя сцяна шэрага, нефарбаванага дома серабрылася, як месяц. У гэтым святле шэры, зацярушаны пылам грузавік, што стаяў на двары насупраць дзвярэй, прывідна выступаў з прыцемак, быццам у таямнічай далечы стэрэаскопа.
Вечарам з людзьмі таксама адбылася перамена. Яны зліліся з бессвядомым жыццём прыроды. Яны падпарадкоўваліся імпульсам, што пакідалі толькі лёгкі след у іх свядомасці. Вочы іх глядзелі засяроджана і спакойна, і вочы гэтыя таксама здаваліся празрыстымі і яснымі ў вячэрнім прыцемку - празрыстыя і ясныя вочы на запыленых тварах.
Сям'я сабралася на самым галоўным месцы - каля грузавіка. Дом быў мёртвы, палі былі мёртвыя, але грузавік уяўляўся ім нечым жывым, асновай іх далейшага існавання. Дапатопны «гудзон» з памятым, абабітым кажухом радыятара, са зношанымі хадавымі часткамі, скрозь аблепленымі масляністымі згусткамі пылу, з нашлёпкамі чырвонага пылу на месцы каўпакоў на ўтулках колаў - гэтая паўлегкавая, паўгрузавая машына, няўклюдная, з высокімі бартамі, цяпер была іх новым сямейным ачагом, асяродкам іхняга жыцця.
Бацька абышоў наўкол грузавіка, агледзеў яго з усіх бакоў, тады апусціўся на кукішкі і падняў з пыльнай зямлі пруток - прыладу пісьма. Адна нага яго ўсёй ступнёй стаяла на зямлі, другая, адстаўленая крыху назад, апіралася на пальцы, так што адно калена было вышэй за другое. Левая рука ляжала на левым калене - на тым, што было ніжэй, локаць правай рукі ўпіраўся ў правае калена, а далонь падпірала падбародак. Так седзячы, бацька пазіраў на грузавік. Дзядзька Джон падышоў да яго і прысеў на кукішкі побач з ім. Вочы ў іх былі задумлівыя. Дзед выйшаў з дома, убачыў іх, зашкандыбаў да грузавіка і сеў на падножку тварам да іх. Гэта было ядро сям'і. Том, Коні і Ной паволі падышлі і таксама апусціліся на кукішкі, і цяпер усе яны сядзелі паўколам насупраць дзеда. Потым з дома выйшлі маці і бабка, за імі, асцярожна ступаючы, паявілася Ружа Сарона. Жанчыны занялі месца ззаду мужчын - стаялі, упершы рукі ў бокі. А дзеці - Руці і Ўінфілд - скакалі з нагі на нагу за спінамі ў жанчын, таўкучы пальцамі босых ног чырвоны пыл, але голасу не падавалі. Не было толькі прапаведніка. З далікатнасці ён сядзеў на зямлі за домам. Ён быў добры прапаведнік і ведаў сваю паству.
Вячэрні прыцемак рабіўся ўсё мякчэйшым, і нейкі час члены сям'і - тыя, што сядзелі, і тыя, што стаялі, - маўчалі. Нарэшце бацька, звяртаючыся не да каго-небудзь аднаго, а да ўсіх разам, пачаў сваю справаздачу:
- Абадралі нас як ліпку. Шэльма той ведаў, што чакаць нам часу няма. Выручылі ўсяго васемнаццаць даляраў.
Маці неспакойна калыхнулася, але змоўчала.
Старэйшы сын, Ной, сказаў:
- Колькі ж усяго ў нас грошай?
Бацька пачаў выводзіць лічбы ў пыле, мармычучы сабе нешта пад нос. Потым сказаў:
- Сто пяцьдзесят чатыры. Але Эл вось кажа, што трэба пакрышкі змяніць. Гэтыя, кажа, доўга не паслужаць.
Эл першы раз у жыцці прымаў удзел у сямейнай радзе. Раней ён заўсёды стаяў за спінамі жанчын. Даклад яго гучаў салідна:
- Машына старая, барахляная. Я ўсю яе агледзеў, перш чым купіць. Гаспадар мне зубы загаворваў, усё хваліў яе, але я яго не слухаў. Запусціў палец у дыферэнцыял - пілавіння няма. Адкрыў каробку перадач - таксама няма. Праверыў счапленне, пракруціў колы - ці ёсць васьмёрка. Падлез пад кузаў - рама не скошаная. Відаць, ніколі не выгіналася. Заўважыў: адзін акумулятар з трэшчынай, сказаў замяніць. Пакрышкі ні к чорту не вартыя, затое размер распаўсюджаны - такія заўсёды дастанеш. Ход не вельмі рэзвы, затое масла не працякае. Чаму я сказаў купляць? Таму што мадэль самая хадавая. Гэтых «гудзонаў супершэсць» на аўтамабільных звалках хоць гаць гаці, і запасныя часткі танна прадаюцца. Можна было б выбраць за тыя грошы і большую машыну, і прыгажэйшую, але часткі да іх цяжэй знайсці, ды просяць за іх дорага. Вось як я тады разважаў. - Апошняя фраза азначала, што ён аддае сябе на суд сям'і. Ён змоўк, чакаючы, што скажуць.
Дзед усё яшчэ быў намінальным галавой сям'і, але ўлады ўжо не меў. Становішча, якое ён займаў, было ганаровым, асвячоным звычаем. Аднак права на першае слова, незалежна ад таго, якое глупства ён можа сказаць, у яго засталося. І мужчыны, што сядзелі на кукішках, і жанчыны, што стаялі ззаду, чакалі яго слова.
- Усё правільна, - сказаў ён. - Я быў такі ж шчанюк, як ты, бегаў, задраўшы хвост, але ад справы ніколі не адвільваў. Ты робішся дарослым. - Заключныя словы прагучалі як блаславенне, і Эл паружавеў ад задавальнення.
Бацька сказаў:
- Гучыць пераканаўча. Каб гэта быў конь, мы б не звальвалі віну на Эла. Але ж сярод нас толькі адзін ён аўтамабіліст.
Том сказаў:
- Я крыху разбіраюся. Вадзіў грузавік у Макалестары. Эл правільна зрабіў. Усё як трэба. - Цяпер ужо Эл зусім расчырванеўся ад пахвалы. Том гаварыў далей: - І вось што я хацеў яшчэ сказаць... ну, прапаведнік... ён просіцца з намі. - Том змоўк. Яго словы дайшлі да людзей, што сядзелі і стаялі, але яны сустрэлі іх маўчаннем. - Ён чалавек добры, - дадаў Том. - Мы даўно яго ведаем. Іншы раз загаворваецца, але словы яго разумныя. - І ён пакінуў гэтае пытанне на вырашэнне сям'і.
Святло паступова ўбывала. Маці адышла ад групы і зайшла ў дом, з якога неўзабаве пачулася, як бразнулі дзверцы пліты. Праз момант яна вярнулася да рады, паглыбленай у роздум.
- Тут усяляк можна вырашыць, - сказаў дзед. - Некаторыя думаюць, што прапаведнікі могуць наклікаць бяду.
Том сказаў:
- Ён кажа, што ўжо больш не прапаведуе.
Дзед памахаў рукой:
- Хто ўжо быў прапаведнікам, той прапаведнікам і застанецца. Ад гэтага нічым не адгародзішся. Некаторыя лічаць за гонар трымаць сабе прапаведніка. Калі хто памрэ, прапаведнік пахавае. Вяселле, своечасовае ці запозненае, - прапаведнік тут як тут. Дзіця народзіцца - хрысціцель у вас пад дахам. Я заўсёды казаў: прапаведнікі ёсць розныя. Да іх з разборам падыходзіць трэба. Гэты мне даспадобы. Ён без гонару.
Бацька ўваткнуў пруток у пыл і, пакручваючы яго між пальцаў, вырыў у пыле ямку.
- Тут не ў тым справа, добры ён ці дрэнны, а прынясе ўдачу ці няшчасце, - сказаў ён. - Трэба ўсё добра разлічыць. Радасці мала. Зараз паглядзім. Дзед з бабкай - двое. Я, Джон і маці - пяцёра. Ной, Том і Эл - восем. Разашарна з Коні - дзесяць. Руці з Уінфілдам - дванаццаць. А яшчэ сабак трэба ўзяць, як іх тут пакінеш? Сабакі добрыя, прыстрэліць рука не паднімецца, а аддаць няма каму. Усяго чатырнаццаць.
- Гэта не лічачы курэй, якія яшчэ засталіся, і дзвюх свіней, - уставіў Ной.
- Свіней засолім на дарогу, - сказаў бацька. - Без мяса не паедзеш. Павязём саланіну ў бачурках. Вось і не ведаю, куды ж мы ўсіх пасадзім, а тут яшчэ прапаведнік. І ці зможам мы пракарміць лішні рот. - Не павярнуўшы галавы, ён запытаўся: - Як ты думаеш, маці?
Тая адкашлялася і цвёрда сказала:
- Хіба справа ў тым - ці зможам? Вось ці захочам? Змагчы мы нічога не зможам - да Каліфорніі нават не даедзем ці куды. А калі добра захочам, дык так і зробім. І калі ўжо на тое пайшло, дык нашы сем'і даўно ўжо жывуць у гэтых краях, але я не чула яшчэ, каб хто-небудзь з Джоўдаў або Хэзлітаў адмаўляўся накарміць, прытуліць ці падвезці чалавека, калі ён просіць. Сярод Джоўдаў пападаліся жмінды, але такіх яшчэ ніколі не было.
Бацька перабіў:
- А калі месца няма? - Выкруціўшы шыю, ён глянуў на яе, і яму зрабілася сорамна. Яму стала сорамна ад яе слоў. - Ну праўда ж, а калі месца не хопіць у грузавіку, што тады?
- Месца і так не хапае, - адрэзала маці. - Месца ёсць толькі шасцярым, а нас дванаццаць. Адным больш ці менш - невялікая розніца. Моцны, здаровы мужчына ніколі не будзе абузай. І другі раз, калі так здарыцца, што ў нас будуць дзве свінні і больш за сто даляраў грошай і мы задумаемся, ці зможам пракарміць чалавека... - Яна не дагаварыла, і бацька адвярнуўся ад яе, пакрыўджаны такой праборкай.
Умяшалася бабка:
- З прапаведнікам нам будзе лепш. Сёння раніцай ён добрую малітву прачытаў.
Бацька пераводзіў позірк з аднаго твару на другі, шукаючы прыкмет расколу, і нарэшце сказаў:
- Можа, пойдзеш, Томі, паклічаш яго. Калі ўжо ён едзе з намі, яго месца тут.
Том падняўся з кукішак і пайшоў да дома, на хаду клічучы:
- Кейсі! Гэй, Кейсі!
З-за дома пачуўся прыглушаны голас. Том завярнуў за вугал і ўбачыў прапаведніка, які сядзеў на зямлі, прыхінуўшыся спінай да сцяны, і глядзеў на вячэрнюю зорку, што мігцела на бязважкім небе.
- Ты клікаў мяне? - запытаўся Кейсі.
- Цябе. Мы вырашылі: раз ты едзеш з намі, дык мусіш з намі і быць - паможаш усё абдумаць.
Кейсі падняўся на ногі. Ён ведаў, што такое сямейная рада, і зразумеў, што яго прынялі ў сям'ю. Становішча, якое ён цяпер заняў, было высокае, бо, калі ён падышоў, дзядзька Джон адсунуўся ўбок, аслабаніўшы яму месца паміж сабой і братам. Кейсі па прыкладу астатніх мужчын таксама сеў на кукішкі тварам да дзеда, які засядаў, як на троне, на падножцы грузавіка.
Маці зноў пайшла ў дом. Пачуўся ляск металічнай крышкі ліхтара, і ў цёмнай кухні ўспыхнула жаўтаватае святло. Калі яна падняла накрыўку вялікага рондаля, з дзвярэй патыхнула вараным мясам і бацвіннем. Усе чакалі, калі маці выйдзе на цёмны двор, бо сярод гэтай купкі людзей яе голас многа што значыў.
- Трэба абдумаць, калі нам ехаць, - сказаў бацька. - Чым хутчэй, тым лепш. Засталося забіць свіней, засаліць мяса і ўпакавацца. Чым хутчэй усё зробім, тым лепш.
- Калі энергічна ўзяцца за справу, дык заўтра ўсё будзе гатова і паслязаўтра, як развіднее, можна выпраўляцца, - падтрымаў бацьку Ной.
Дзядзька Джон запярэчыў:
- Днём, у гарачыню, мяса не астыне. Што з цёплай свежанінай рабіць будзем?
- Тады зоймемся гэтым сёння. За ноч астыне. Крышачку ж астыне. Павячэраем і зарэжам. Соль у нас ёсць?
Маці адказала:
- Ёсць. Солі многа. Дзве добрыя бочачкі.
- Тады так і зробім, - сказаў Том.
Дзед заёрзаў на падножцы, намагаючыся падняцца.
- Зусім сцямнела, - сказаў ён. - Есці хочацца. Вось прыеду ў Каліфорнію, увесь час буду хадзіць з вялізнай гронкай вінаграду ў руцэ і - у рот, і - у рот, далібог! - Нарэшце ён падняўся; паўставалі і ўсе астатнія мужчыны.
Руці і Ўінфілд, як апантаныя, скакалі ў пыле. Руці сіпла прашаптала брату:
- Заб'ём свіней і ў Каліфорнію! Заб'ём і паедзем - усе адразу.
А Ўінфілд зусім ашалеў - прыставіў палец да горла, страшна скрывіў твар і завіхляўся, ціха ўскрыкваючы:
- Я старая свіння. Глянь! Я свіння. Бачыш, колькі крыві, Руці! - Ён пахіснуўся, грымнуўся на зямлю і слаба задрыгаў рукамі і нагамі. Але Руці была крыху старэйшая за яго і адчувала незвычайнасць таго, што адбываецца.
- І ў Каліфорнію! - паўтарыла яна. Яна ведала: такіх вялікіх падзей у яе жыцці яшчэ не было.
Дарослыя пайшлі ў густым прыцемку да асветленай кухні, і маці падала ім на алавяных талерках мяса з бацвіннем. Але перш чым самой сесці за ежу, яна паставіла на пліту вялікі круглы чан і распаліла яркі агонь у топцы. Потым прынесла некалькі вёдраў вады, наліла чан даверху і паставіла вакол яго яшчэ некалькі поўных вёдраў. Усе спехам паелі і выйшлі з кухні, каб пасядзець на прыступцы каля дзвярэй, пакуль не закіпіць вада. Яны сядзелі, пазіраючы ў цемру і на светлы квадрат, што падаў ад ліхтара на зямлю праз праём дзвярэй; пасярэдзіне гэтага квадрата чарнеўся згорблены цень дзеда. Ной старанна калупаў саломінкай у зубах. Маці і Ружа Сарона мылі талеркі і ставілі іх горкай на стол.
І раптам усе як адзін узяліся за справу. Бацька падняўся і запаліў другі ліхтар. Ной дастаў са скрынкі на кухні крывы мясніковы нож і падвастрыў яго на крэмніевым бруску. Тады паклаў нож і скрэбла на калоду, што стаяла каля дзвярэй на двары. Бацька прынёс дзве тоўстыя палкі тры футы даўжынёй, завастрыў іх з абодвух канцоў сякерай і абвязаў пасярэдзіне моцнай вяроўкай косым крыжам.
Ён прабурчаў:
- Дарэмна прадалі ворчыкі, ніводнага не засталося.
Вада на пліце клекатала, над ёю клубілася пара.
Ной запытаўся:
- Ваду туды панясём ці свіней сюды пацягнем?
- Свіней сюды, - адказаў бацька. - Свіння не кіпецень, яе не расплюхаеш і не апарышся. Вада ўся закіпела?
- Амаль уся, - адказала маці.
- Добра. Ной, і вы, Том з Элам, пойдзем са мной у хлеў. Я ліхтар панясу. Там зарэжам і прыцягнем сюды.
Ной узяў з калоды нож, Эл - сякеру, і ўсе чацвёра пакіравалі да хлява; ногі іх то вынікалі з цемры ў святле ліхтара, то знікалі ў ёй. Руці і Ўінфілд панесліся подскакам за імі. Падышоўшы да свінушніка, бацька нахіліўся над загарадкай і падняў ліхтар. Сонныя маладыя свінні, насцярожана рохкаючы, падняліся на ногі. Дзядзька Джон і прапаведнік падышлі памагчы.
- Добра, - сказаў бацька. - Біце іх. Потым пацягнем да дома, там спусцім кроў і апарым.
Ной з Томам пераступілі цераз загарадку і зрабілі сваю справу спрытна і хутка. Том ударыў два разы абухом, а Ной нахіліўся над паваленымі свіннямі, намацаў артэрыю, успароў яе сваім крывым нажом і пусціў кроў. Потым свіней, якія яшчэ пранізліва вішчалі, перавалілі цераз загарадку. Адну свінню пацягнулі за заднія ногі прапаведнік і дзядзька Джон. Другую - Том з Ноем. Бацька ішоў за імі з ліхтаром, і ў пыле працягнуліся дзве дарожкі чорнай крыві.
Каля дома Ной аддзяліў нажом сухажылле на задніх нагах, ногі развялі ў бакі распоркамі і павесілі тушы на бэлькі, што выступалі з-пад навеса даху. Тады мужчыны прынеслі вар і апарылі чорныя свіныя тушы. Ной успароў іх удоўжкі і выпатрашыў вантробы на зямлю. Бацька завастрыў яшчэ дзве распоркі, каб лепш правялілася мяса, а Том скрэблам і маці тупым канцом нажа счысцілі шчацінне. Эл прынёс пустое вядро, укінуў туды рыдлёўкай вантробы і пайшоў выкінуць іх далей ад дома; за ім, гучна мяўкаючы, пабеглі дзве кошкі, сабакі таксама кінуліся за ім, ціха пагыркваючы на кошак.
Бацька сядзеў на прыступцы, паглядваючы на свіныя тушы, на якія падала святло ліхтара. Шчацінне ўсё саскрэблі, і цяпер толькі рэдкія кроплі крыві падалі ў чорную лужыну на зямлі. Бацька падняўся, падышоў да падвешаных туш і памацаў іх рукамі, тады зноў сеў каля дзвярэй. Дзед з бабкай пайшлі спаць у свіран, у руцэ ў дзеда быў ліхтар са свечкай. Астатнія моўчкі сядзелі каля дзвярэй. Коні, Эл і Том - проста на зямлі, прыхінуўшыся спінамі да сцяны, дзядзька Джон на скрыні, бацька на прыступцы. Толькі маці і Ружа Сарона яшчэ круціліся на кухні. Руці і Ўінфілд ледзь змагаліся са сном. Яны вяла спрачаліся ў цемры. Ной і прапаведнік прыселі побач на кукішкі тварам да дома. Бацька неспакойна пачухаўся, зняў капялюш і запусціў пальцы ў валасы.
- Заўтра ўранні засолім свініну, потым пагрузім усё на грузавік, акрамя ложкаў, і паслязаўтра раніцай пусцімся ў дарогу. Работы і на дзень не хопіць, - сказаў ён няцвёрда.
Том перабіў яго:
- Вось і будзем цэлы дзень сланяцца, шукаючы, што б такое зрабіць. - Астатнія мужчыны неспакойна заварушыліся. - Можна было б скончыць зборы да світання і ехаць, - выказаў думку Том. Бацька пацёр далонню калена. І раптам усіх ахапіла нецярплівасць.
Ной сказаў:
- Можа, мясу нічога не зробіцца, калі яго проста зараз і засаліць. Парэжам на кавалкі, гэтак яшчэ хутчэй астыне.
Дзядзька Джон першы загаварыў рашуча:
- Чаго тут сядзець, чаго чакаць? Хутчэй скончым з гэтым. Ехаць дык ехаць.
Перамена адбылася і ў настроі астатніх.
- Чаму не паехаць як хутчэй? Адаспімся ў дарозе. - Ім ужо не сядзелася на месцы.
Бацька сказаў:
- Кажуць, туды - дзве тысячы міль. Гэта ж чорт ведае як далёка! Трэба ехаць. Ной, давай мы з табой парэжам тушы, потым пагрузім рэчы на машыну.
Маці высунула галаву з дзвярэй:
- А раптам што-небудзь забудземся? У цемры не відаць.
- Заднее, праверым, - сказаў Ной. Усе крыху пасядзелі моўчкі - думалі. Раптам Ной падняўся і пачаў вастрыць свой крывы нож на сцёртым тачыльным бруску. - Ма, - сказаў ён, - ачысці стол, - і, падышоўшы да свіной тушы, правёў нажом уздоўж хрыбта і пачаў зразаць мяса з рэбраў.
Бацька рашуча падняўся з прыступкі.
- Трэба ўсё сабраць, - сказаў ён. - Хадзем, хлопцы, са мной.
Цяпер, калі ўжо цвёрда было вырашана ехаць раніцай, усе заспяшаліся. Ной занёс свініну на кухню і стаў наразаць яе невялікімі квадратамі, а маці націрала кожны буйной соллю і складала іх у бачуркі, стараючыся, каб з бакоў кавалкі мяса не датыкаліся адзін да аднаго без солі. Яна клала іх, як цагліны, і засыпала ў прамежкі соль. Пакуль Ной адсякаў бакавіну і ножкі, маці падтрымлівала агонь у пліце, і, калі Ной зняў мяса з рэбраў, з хрыбта і з ног, яна засунула косткі ў духоўку, каб потым іх можна было аб'есці.
Тым часам на двары і ў свірне перамяшчаліся кругі святла ад ліхтароў - мужчыны збіралі ўсё, што было вырашана ўзяць з сабой, і складалі каля грузавіка. Ружа Сарона вынесла з дома верхнюю вопратку і абутак - камбінезоны, чаравікі на тоўстых падэшвах, гумавыя боты, паношаныя святочныя касцюмы, швэдары і курткі, падбітыя аўчынай. Усім гэтым яна шчыльна напакавала вялікую драўляную скрыню, ды яшчэ стала зверху і ўтаптала нагамі. Пасля прынесла паркалёвыя сукенкі, хусткі і шалі, чорныя баваўняныя панчохі і дзіцячую адзежу - маленькія камбінезоны, танныя паркалёвыя сукеначкі, паклала іх у скрыню і таксама прытаптала нагамі.
Том пайшоў у павець і прынёс адтуль інструмент, які наважылі ўзяць з сабой, - ручную пілу, гаечныя ключы, малаток і скрынку з наборам цвікоў, абцугі, рашпіль і камплект тонкіх напілкаў.
А Ружа Сарона прыцягнула вялікае палотнішча брызенту і расклала на зямлі за грузавіком. Яна ледзь пралезла ў дзверы з матрацамі - трыма двухспальнымі і адным вузкім, зваліла іх на брызент, тады прынесла яшчэ абярэмак складзеных ірваных коўдраў і кінула на матрацы.
Маці з Ноем усё яшчэ ўвіхаліся на кухні, з духоўкі цягнула прыемным пахам смажаных свіных костак. Позняй ноччу дзяцей змарыў нарэшце сон. Уінфілд скруціўся абаранкам проста ў пыле каля парога, а Руці, якая пайшла на кухню паглядзець, як разбіраюць тушы, заснула, седзячы на скрынцы, прыткнуўшыся галавой да сцяны. Яна дыхала лёгка і роўна, крыху растуліўшы губы.
Сабраўшы ўсе прылады, Том з ліхтаром у руцэ ўвайшоў у кухню, следам зайшоў прапаведнік.
- Ой, як здорава! - усклікнуў Том. - Ты толькі панюхай, як пахне! А чуеш, костачкі патрэскваюць?
Маці ўсё складала кавалкі свініны ў бачуркі, пасыпала іх соллю - і зверху, і з бакоў - і прымінала кожны рад рукою. Яна глянула на Тома і слаба ўсміхнулася яму вуснамі, але вочы яе былі сур'ёзныя і стомленыя.
- На снеданне добра пагрызці свіных костачак, - сказала яна.
Прапаведнік падышоў да яе.
- Дайце, я буду саліць, - прапанаваў ён. - Я ўмею. У вас, акрамя гэтага, яшчэ спраў шмат.
Маці адарвалася ад работы і неяк дзіўна паглядзела на яго, быццам ён прапанаваў ёй нешта недарэчнае. Рукі ў яе пакрыліся скарынкаю солі, ружовай ад свежага мяснога соку.
- Гэта жаночая работа, - сказала яна нарэшце.
- Работа ёсць работа, - адказаў прапаведнік. - Яе шмат - хопіць і мужчынам, і жанчынам. У вас ёсць чым заняцца. Дайце, я буду саліць.
Яна пільна паглядзела на яго, потым наліла вады з вядра ў алавяны ўмывальны тазік і памыла рукі. Прапаведнік браў кавалкі свініны і націраў іх соллю, а маці назірала. Ён клаў мяса ў бачурку, акурат як рабіла гэта маці, старанна пасыпаў соллю і расціраў далонямі. Яна выцерла свае пабялелыя ад солі, апухлыя рукі.
Том запытаўся:
- Ма, а што адсюль ўзяць?
Маці абвяла хуткім позіркам кухню.
- Вядро, - сказала яна. - Увесь посуд - талеркі, кубкі і нажы, лыжкі, відэльцы. Складзі ўсё ў шуфляду і нясі да грузавіка. Яшчэ вялікую патэльню, кацёл, кафейнік. Калі астыне духоўка, вымеш адтуль рашотку - на ёй зручна смажыць на вогнішчы. Добра было б узяць з сабой ночвы, толькі наўрад ці месца хопіць. Давядзецца мыць бялізну ў вядры. Драбязу браць не варта. У вялікім катле можна і менш згатаваць, а калі трэба многа, у малой пасудзіне не згатуеш. Бляхі з духоўкі бяры ўсе. Яны ўлазяць адна ў адну. - Маці яшчэ раз азірнула кухню. - Усё, што я сказала, збяры, Том. Пра астатняе я сама паклапачуся. Каб не забыць вялікую бляшанку з перцам, соль, мускатны арэх і тарку на яго. Гэта я пад самы канец вазьму. - Яна ўзяла ліхтар і стомлена пайшла ў спальню, яе босыя ногі бясшумна ступалі па падлозе.
Прапаведнік сказаў Тому:
- Відаць, выбілася з сілы.
- Жанчыны заўсёды з сілы выбіваюцца, - адказаў Том. - Такая ўжо ў іх доля, толькі калі-нікалі на маленнях расслабляюцца.
- Так, але ж яна зусім з ног падае. Быццам занядужала.
Маці яшчэ не пераступіла парога спальні і чула яго словы. Мускулы на яе расслабленым твары напружыліся, маршчыны зніклі, позірк зрабіўся цвярдзейшы, плечы расправіліся. Яна абвяла вачамі голыя сцены. Пуста, нічога не засталося, адзін толькі хлам. Матрацы, што яшчэ днём ляжалі на падлозе, вынесены. Камода і столік прададзены. На падлозе валяюцца зламаны грабянец і пушачка з-пад тальку, некалькі мёртвых мышэй. Яна паставіла ліхтар на падлогу. Прасунула руку за адну са скрынак, што служылі крэсламі, і дастала адтуль кардонную каробку, залапаную, з падранымі куткамі. Яна села на скрынку, адкрыла вечка кардонкі. Там ляжалі пісьмы ў канвертах, газетныя выразкі, фотакарткі, пара завушніц, залаты пярсцёнак з пячаткай і сплецены з валасоў ланцужок для гадзінніка з залатымі зачэпкамі на канцах. Яна дакранулася пальцамі да пісьмаў, ледзь дакранулася да іх, разгладзіла газетную выразку са справаздачай аб судзе над Томам. Доўга трымала кардонку на каленях, і пальцы яе перабіралі пісьмы і зноў ставілі на месца. Потым яна сядзела, закусіўшы ніжнюю губу, аддаўшыся роздуму і ўспамінам. І нарэшце наважылася - выняла з кардонкі пярсцёнак, ланцужок, завушніцы, засунула руку на самае дно і знайшла там залатую запінку. Зняла канверт з аднаго пісьма, ссыпала туды ўсе гэтыя дрындушкі, склала канверт удвая і паклала ў кішэню сукенкі. Потым беражліва, з любасцю закрыла каробку і пяшчотна правяла па ёй пальцамі. Губы ў яе крыху растуліліся. Тады раптам устала са скрынкі, падняла з падлогі ліхтар і вярнулася на кухню. Зняла канфорку з пліты і асцярожна паклала кардонку на вуголле. Кардон адразу пацямнеў. Затрапятаўся язычок полымя і лізнуў каробку. Маці апусціла канфорку на месца, і ў тое ж імгненне агонь нібы выдыхнуў і абдаў каробку жарам.
На цёмным двары бацька і Эл пры святле ліхтара грузілі рэчы на машыну. Інструмент на самы ніз, але так, каб лёгка можна было дастаць у выпадку паломкі. На яго - скрыні з адзежай і джутавы мяшок з кухонным начыннем; нажы, відэльцы і талеркі асобна ў скрынцы. Вядро прывязалі ззаду. Ніжні рад пастараліся ўкласці як мага раўней і ў прамежкі паміж скрынямі засунулі скачаныя коўдры. Зверху паклалі матрацы, запоўніўшы машыну да бартоў, і ўсю паклажу зацягнулі брызентам. Эл прарэзаў па яго краях дзіркі за два футы адна ад адной, прасунуў у іх вяроўкі і прывязаў брызент да сярэдніх планак борта.
- У дождж, - сказаў ён, - падвяжам яго да верхніх планак, няхай лезуць пад ніз, там не прамокнуць. А нам у кабіне дождж не страшны.
Бацька пляснуў у далоні:
- Во галава!
- Гэта яшчэ не ўсё, - сказаў Эл. - Вось знайду доўгую жэрдку, падапру ёю брызент. Будзе як палатка, не пячыся ж на сонцы.
Бацька зноў ухваліў:
- Во галава! Чаму раней не прыдумаў?
- Не было калі, - адказаў Эл.
- Не было калі? А валачыцца па ўсім наваколлі было калі? Адзін бог ведае, дзе ты прападаў апошнія два тыдні.
- Трэба ж было перад ад'ездам усё закругліць - без гэтага не бывае, - прамовіў Эл ганарыста. Потым неяк звяў і запытаўся: - А ты рады, та, што мы едзем?
- Га? Ну... рады, канешне. Ва ўсякім разе... так. Тут нам цяжка даводзілася. А там усё будзе інакш - работы хоць заваліся, усё такое прыгожае, зялёнае, і домікі беленькія, навокал - апельсінавыя дрэвы.
- Там што, усюды апельсіны растуць?
- Ну, можа, і не ўсюды, але ж шмат дзе.
Неба пашарэла ў перадсвітальным святле. Зборы скончыліся - бачуркі з саланінай стаялі напагатове, клетку з курамі заставалася толькі паставіць на самы верх грузавіка. Маці адкрыла духоўку і выняла адтуль засмажаныя косткі, на якіх было яшчэ даволі мяса, падрумяненага, хрусткага. У паўсне Руці спаўзла са скрынкі і зноў моцна заснула. Але старэйшыя стаялі каля дзвярэй, зябка пакурчваліся і грызлі хрусткія косткі.
- Бадай, час ужо бабку з дзедам будзіць, - сказаў Том. - Бярэцца на дзень.
Маці сказала:
- Не хочацца іх падымаць, пабудзім перад самым ад'ездам. Няхай яшчэ паспяць. Руці з Уінфілдам таксама як след не выспаліся.
- Адаспяцца ў дарозе, - сказаў бацька. - Там, наверсе, добра і ўтульна.
Сабакі раптам ускочылі з пыльнай зямлі і навастрылі вушы. Потым шалёна забрахалі і кінуліся ў цемру.
- Каго чорт нясе? - здзівіўся бацька. Праз момант пачуўся нечы голас, які заспакойваў сабак, і тыя, хоць яшчэ і брахалі, але ўжо не так злосна. Нехта ішоў, падыходзіў. Гэта быў М'юлі Грэйуз з насунутым на самыя вочы капелюшом.
Ён нясмела падышоў бліжэй і павітаўся:
- Добрага ранку, людзі.
- А, М'юлі! - Памахаў бацька бядровай косткай. - Заходзь, М'юлі, частуйся свежанінкай.
- Не, - сказаў М'юлі, - я не галодны.
- Давай, М'юлі, частуйся. Пагрызі. - Бацька ўвайшоў у кухню, вярнуўся і падаў яму цэлую жменю свіных рабрынак.
- Я не есці вашы косткі сюды завітаў, - сказаў М'юлі. - Ішоў міма, прыгадаў, што вы едзеце, дай, думаю, зайду, развітаюся.
- Хутка рушым, - сказаў бацька. - Праз гадзіну ты ўжо нас тут не знайшоў бы. Усё ўпакавана - бачыш?
- Усё ўпакавана, - М'юлі паглядзеў на нагружаную машыну. - Часам і мне хочацца паехаць, сваіх пашукаць.
Маці сказала:
- А яны пісалі табе з Каліфорніі?
- Не, - адказаў М'юлі. - Нічога не пісалі. Праўда, на пошце я не пытаўся. Калі-небудзь схаджу.
Бацька сказаў:
- Эл, пайдзі пабудзі бабку з дзедам. Скажы, каб прыйшлі паелі. Неўзабаве едзем. - І калі Эл пакрочыў да свірна, сказаў: - А не хацеў бы ты, М'юлі, залезці з намі на грузавік і паехаць? Мы як-небудзь пацяснімся.
М'юлі адкусіў мяса ад краю рабрыны і пачаў жаваць.
- Часам і мне самому здаецца, паехаў бы, - сказаў ён. - Але знаю, не паеду. Я сябе ведаю: у апошнюю хвіліну ўцяку і затаюся, як здань на могілках.
Умяшаўся Ной:
- Калі-небудзь памрэш проста ў полі, М'юлі.
- Сам ведаю. Ужо думаў пра гэта. Бывае вельмі тужліва аднаму, ніштавата бывае, а бывае і зусім добра. Ды што гаварыць! Калі вам стрэнуцца мае - я гэта прыйшоў сказаць, - калі вам хто з іх стрэнецца ў Каліфорніі, скажыце, што мне добра. Скажыце, у мяне ўсё добра. Не выдавайце ім, як я жыву. Скажыце: вось заробіць грошай і прыедзе.
- І праўда прыедзеш? - запыталася маці.
- Не, - ціха адказаў М'юлі. - Не, не прыеду. Мушу тут заставацца. Раней, можа, і паехаў бы. А цяпер не. Я шмат што перадумаў, шмат што зразумеў. Цяпер ужо нікуды не паеду.
Пачало крыху віднець. Агонь ліхтароў пабляк. Вярнуўся Эл з дзедам, які ледзь цягнуўся, накульгваючы, за ім.
- Ён не спаў, - сказаў Эл. - Сядзеў адзін за свірнам. З ім нешта не ў парадку.
Вочы ў дзеда былі нейкія цьмяныя, зласліва задзірлівы агеньчык у іх патух.
- Са мной нічога, - сказаў ён. - Проста ехаць не хачу.
- Ты не паедзеш? - здзівіўся бацька. - Як гэта так, не паедзеш? У нас усё ўжо сабрана, усё гатова. Трэба ехаць. Тут нам нельга заставацца.
- Хто кажа, каб вы заставаліся? Садзіцеся і едзьце сабе. А я... я застаюся. Я ледзь не ўсю ноч прадумаў. Гэта мой край. Маё месца тут. І начхаць мне на вінаград і на апельсіны, хоць там імі заваліся. Я не еду. Гэта мой край, хоць шчасця тут мала. Вы давайце едзьце. А я дзе жыў, там і буду жыць.
Усе стоўпіліся вакол старога. Бацька сказаў:
- Так нельга, дзед. Усю гэтую зямлю хутка зааруць трактарамі. А хто гатаваць табе будзе? Як ты жыць будзеш? Не, заставацца табе тут ніяк нельга. Не будзе каму клапаціцца пра цябе, ты з голаду памрэш.
Дзед усклікнуў:
- Во, сказаў! Я хоць і стары, але змагу сам пра сябе паклапаціцца. А як тут М'юлі жыве? І я гэтаксама буду. Я сказаў - не паеду, і ўсё. Бярыце бабку з сабой, калі хочаце, а мяне пакіньце - і справе канец.
Бацька разгублена сказаў:
- Паслухай, дзед. Ну паслухай хвілінку!
- І слухаць не хачу. Я ўжо сказаў табе, як будзе.
Том крануў бацьку за плячо:
- Та, зойдзем у дом. Хачу табе нешта сказаць. - І калі яны пайшлі да дома, Том на хаду крыкнуў: - Ма, ідзі сюды на хвілінку!
На кухні гарэў адзін ліхтар, на стале стаяла талерка, яшчэ поўная свіных костак. Том сказаў:
- Паслухайце. Дзед, вядома, мае права вырашаць - ехаць ці не ехаць, але яму нельга тут заставацца. Гэта ж ясна.
- Ясна, - сказаў бацька.
- Дык вось што. Калі яго ўзяць сілай і звязаць, можна яго пакалечыць альбо ён так ашалее, што сам сябе знявечыць. Добра было б напаіць яго, тады ўсё ўладзіцца. У вас ёсць хоць крышачку віскі?
- Няма, - адказаў бацька. - Ні кроплі. У Джона таксама няма. Калі ён не ў запоі, спіртнога дома не трымае.
Маці сказала:
- У мяне, Том, засталася бутэлька снатворнага, яшчэ з тае пары, як Уінфілду вушы балелі. Думаеш, падзейнічае? Я давала яму глынуць, і ён адразу засынаў.
- Можа, і падзейнічае, - сказаў Том. - Нясі сюды, ма. Ва ўсякім разе, праверым.
- Я выкінула яе на сметнік, - сказала маці, узяла ліхтар, выйшла на двор і неўзабаве вярнулася з бутэлькай, напалову налітай чорнай вадкасцю.
Том узяў бутэльку і паспрабаваў вадкасць на смак.
- Не гідка, - сказаў ён. - Згатуй кубак чорнай кавы, чым гусцейшай. Колькі ж наліць яму? Ну, скажам, адну чайную лыжку. Не, лепш больш - дзве сталовыя.
Маці наліла ў кафейнік вады, усыпала кавы, тады адчыніла пліту і паставіла кафейнік блізка да вуголля.
Том з бацькам выйшлі на двор.
- Кожны мае права сам сабой распараджацца, - не сунімаўся дзед. - Хто тут еў свіныя рэбры?
- Мы, - адказаў Том. - Зараз ма налье табе кавы і дасць і свініны.
Дзед пайшоў на кухню, выпіў каву і з'еў мяса. Людзі стаялі на двары, на якім пачало ўжо святлець, і праз адчыненыя дзверы кухні пазіралі на дзеда. Яны ўбачылі, як ён раптам пазяхнуў і пахіснуўся на крэсле, потым паклаў рукі на стол, апусціў на іх галаву і заснуў.
- Ён і так быў вельмі змораны, - сказаў Том. - Раней часу не чапайце яго.
Нарэшце ўсё ўжо было зусім гатова да ад'езду. Заспаная, млявая бабка ўсё пыталася:
- Што тут у вас дзеецца? Чаго ўскочылі ў такую рань? - Але яна была апранутая і паводзіла сябе мірна.
Руці і Ўінфілд таксама прачнуліся, але былі вялыя і сонныя. Ранішняе святло імкліва разлівалася па зямлі. А людзі знерухомелі. Яны стаялі пасярод двара, і ніхто не адважваўся зрабіць рашучы крок. Цяпер, калі надышоў час пускацца ў дарогу, ім стала страшна, не менш страшна, чым дзеду. Яны бачылі, як паступова на фоне пасвятлелага неба выступаюць абрысы свірна, як блякнуць агеньчыкі ліхтароў і ўжо больш не адкідаюць на зямлю жоўтых кругоў святла. Адна за адной, з усходу на захад, тухлі зоркі ў небе. А людзі стаялі, здранцвелыя, як лунацікі, і вочы іх глядзелі ўдалячынь, не заўважаючы таго, што было блізка, і бачылі адразу ўвесь абсяг світальнага неба, усю шыр палёў, усю зямлю да самага гарызонту.
Адзін толькі М'юлі неспакойна снаваў па двары, зазіраў праз шчыліны між бартавых планак у грузавік, стукаў кулаком па запасных шынах, прывязаных ззаду. Нарэшце ён падышоў да Тома.
- Пяройдзеш мяжу штата? - запытаўся ён. - Парушыш падпіску?
І Том строс з сябе здранцвенне.
- Бог ты мой, хутка ўжо сонца ўзыдзе! - сказаў ён гучна. - Час ехаць. - І ўсе таксама выйшлі з анямення і пакіравалі да грузавіка.
- Пайшлі панясём дзеда на грузавік, - сказаў Том.
Бацька, дзядзька Джон, Том і Эл увайшлі ў кухню, дзе, уткнуўшыся лбом у рукі, складзеныя на стале побач з лужынкай разлітай кавы, спаў дзед. Яны ўзялі яго пад локці і паставілі на ногі, а ён бурчаў і лаяўся хрыплым голасам, як п'яны. За дзвярамі паднялі яго на рукі і панеслі. Том з Элам залезлі на грузавік, перагнуліся цераз борт, падхапілі старога пад пахі і асцярожна пацягнулі наверх. Эл адвязаў адзін канец брызенту, накрыў ім дзеда і падставіў побач скрынку, каб на яго не ціснуў цяжкі брызент.
- Абавязкова пастаўлю жардзіну, - сказаў Эл. - Сёння ж вечарам, на першым прыпынку.
Дзед усё яшчэ нешта бурчаў, чапляючыся за сон, і ледзь толькі яго паклалі, зноў моцна заснуў.
Бацька сказаў:
- Ма, вы з бабкай сядзеце з Элам. Потым будзем мяняцца - не так стомімся ў дарозе, але пачнём з вас.
Маці з бабкай залезлі ў кабіну, астатнія - Коні і Ружа Сарона, бацька і дзядзька Джон, Руці і Ўінфілд, Том і прапаведнік - усе забраліся наверх. Ной стаяў унізе, глядзеў, як яны ўладкоўваюцца там, на высокай паклажы.
Эл абышоў вакол грузавіка, зазіраючы пад ніз, на рысоры.
- Госпадзі, рысоры зусім праселі, - сказаў ён. - Шчасце, што калодкі падставіў.
Ной запытаўся:
- А з сабакамі як, та?
- Я і забыўся пра іх, - адказаў бацька і пранізліва свіснуў. Але на свіст прыбег толькі адзін сабака. Ной злавіў яго і падкінуў на грузавік, і там сабака быццам здранцвеў, баючыся вышыні. - Астатніх двух давядзецца кінуць тут, - сказаў бацька і крыкнуў: - Гэй, М'юлі, ты, можа, прыгледзіш за імі? А то з голаду паздыхаюць.
- Добра, - сказаў М'юлі. - Ад сабак адмаўляцца не буду. Няхай сабе, бяру іх.
- Бяры і курэй, - сказаў бацька.
Эл сеў на сваё месца ў кабіне. Завішчаў, загуў стартэр, на міг уключылася запальванне, зноў закруціўся стартэр. І раптам усімі сваімі шасцю цыліндрамі завыў матор на халастых абаротах, ззаду машыны заклубіўся сіні дымок выхлапу.
- Пакуль, М'юлі! - крыкнуў Эл.
Усе астатнія члены сям'і крыкнулі хорам:
- Бывай, М'юлі!
Эл адпусціў ручны тормаз і ўключыў счапленне. Грузавік здрыгануўся і цяжка папоўз па двары. Уключылася другая скорасць. Машына паволі пачала падымацца на невысокі ўзгорак, і ўсіх завалакло чырвоным пылам.
- Ого як нагрузіліся! - сказаў Эл. - Рэкорда хуткасці не паставіш.
Маці хацела паглядзець назад, але паклажа не давала ёй бачыць. Тады яна падняла галаву і стала глядзець проста перад сабой на пыльную грунтавую дарогу. У вачах у яе была вялікая стома.
А тыя, што сядзелі на паклажы, пазіралі назад. Яны бачылі свіран, дом і лёгкі дымок, які ўсё яшчэ выбіваўся з коміна. Яны бачылі, як запунсавелі вокны, азораныя першымі промнямі сонца. Бачылі М'юлі - ён самотна стаяў пасярод двара, праводзячы іх вачамі. А потым усё знікла за грэбенем узгорка. Абапал дарогі цягнуліся палі бавоўніку. Грузавік марудна прабраўся скрозь пыл да шашы і пайшоў на Захад.
Дамкі ў палях стаялі пустыя, а раз апусцелі хаціны, пуста было і на палях. Не пуставалі толькі трактарныя гаражы з рыфленага жалеза, якія адсвечвалі срэбрам; яны былі поўныя металу, пасудзін з бензінам і маслам, блішчастых плужных дыскаў. У трактароў бліскучыя фары, трактарам усё роўна - што дзень, што ноч, дыскі пераварочваюць зямлю ў цемры, круцяцца днём, пабліскваючы на сонцы. Калі конь пасля дзённай працы вяртаецца ў стайню, жыццёвыя сілы яго і патрэбы не гаснуць, стойла поўніцца дыханнем і цяплом, там шамаціць пад капытамі салома, хрумсціць на зубах сена, варушацца конскія вушы, зіркаюць вочы. Адтуль нясе жывым духам, цягне пахам жыцця. А калі спыняе работу матор, трактар робіцца мёртвым, як руда, з якой ён урэшце зроблены. Цеплыня пакідае яго, як жывое цяпло пакідае труп. Дзверы з рыфленага жалеза зачыняюцца, і трактарыст едзе дамоў, у горад, бывае, што і за дваццаць міль адтуль, і можа не вяртацца цэлымі тыднямі, а то і месяцамі, бо трактар не жывая істота. Гэта проста і практычна. Настолькі проста, што праца перастае здавацца цудам, настолькі практычна, што перастае здавацца цудам зямля і дзеянне яе сіл, а разам з цудам знікае і глыбокае разуменне зямлі, пачуццё роднасці з ёю. І ў трактарыста нараджаецца і мацнее пагарда да яе, уласцівая толькі чужаку, які мала што ў ёй разумее і якога нічога не радніць з ёю. Бо азотныя ўгнаенні - гэта яшчэ не зямля, фасфатныя - таксама; і даўжыня баваўнянага валакна - не зямля. Чалавек - не вуглярод, не солі, не вада і не кальцый. Усё гэта ў ім ёсць, але ён нешта большае, значна большае; і зямля нешта значна большае, чым элементы, з якіх яна складаецца. Чалавек, які з'яўляецца нечым невымерна большым, чым яго хімія, чалавек, што ступае па зямлі, адварочвае лямеш ад каменя, нахіляе ручкі плуга, каб лямеш прыўзняўся і слізнуў над голай пародай, апускаецца на калені, каб з'есці сняданак, - чалавек гэты большы, чым тое, з чаго ён складзены, ён ведае зямлю, якая ўяўляе сабой нешта большае, чым сукупнасць хімічных элементаў. А чалавек за штурвалам, які вядзе мёртвы трактар па чужой, нялюбай зямлі, пакланяецца толькі хіміі, ён не паважае ні гэтай зямлі, ні самога сябе. Калі зачыняюцца жалезныя рыфленыя дзверы, ён выпраўляецца дамоў, але дом яго не тут, не на гэтай зямлі.
Дзверы пустых дамоў былі парасчыняныя насцеж і рыпелі завесамі на ветры. Чароды хлапчукоў збягаліся з блізкіх гарадкоў, каб пакідаць камянямі ў шыбы, пакапацца ў смецці і ламаччы ў пошуках скарбаў. Вось нож з напалову адламаным лязом. Згадзіцца. А смурод! Напэўна недзе ляжыць здохлы пацук. Гэй, глянь, што Ўітні напісаў на сцяне! Ён і ў школьнай прыбіральні тое самае накрэмзаў, і настаўніца прымусіла яго змыць.
Таго дня, калі людзі паехалі, як толькі звечарэла, каты прыцягнуліся з ловаў у палях і з мяўканнем забраліся на ганак. Але ніхто з дому не выйшаў, і яны шмыгнулі праз адчыненыя дзверы і, мяўкаючы, пачалі снаваць па апусцелых пакоях. А потым вярнуліся ў палі і неўзабаве здзічэлі і карміліся суслікамі і палявымі мышамі, удзень спалі ў канавах. Калі апусцілася ноч, кажаны, якія раней не адважваліся сунуцца далей за дзверы, бо баяліся святла, цяпер уляцелі ў дамы і пачалі кружыцца па пустых пакоях, а праз некалькі дзён яны ўжо забіраліся на дзень у самыя цёмныя куты, складалі крылы і павісалі ўніз галавой на бэльках, і ў бязлюдных пакоях смярдзела іхнім памётам.
Мышы таксама панабіваліся ў дамы і нарабілі складаў зерня ў кутках, у скрынках, за шуфлядамі кухонных шафаў. За імі паявіліся ласкі - прыйшлі паляваць на мышэй, а совы то заляталі з вухканнем у вокны, то выляталі.
Прайшоў спорны дожджык. Перад ганкам, там, дзе раней яму расці не належала, зазелянела пустазелле, між дошак, скрозь шчыліны, прараслі былінкі. Хаціны былі пустыя, а пустыя жытлы развальваюцца хутка. Абшыўка пайшла трэшчынамі, пачынаючы з іржавых цвікоў. На падлозе густа ляжаў пыл, і на ім віднеліся толькі сляды мышэй, ласак і кошак.
Неяк ноччу вецер ададраў з даху гонту і шпурнуў яе на зямлю. Другі раз вецер прабраўся ў гэтую дзірку і сарваў яшчэ тры гонты, а потым адразу больш за дзесятак. Здзічэлыя каты падбіраліся да дома, але ўжо не мяўкалі каля ганка. Ледзь прыкметныя, як цені хмарак, што засцілі месяц, яны пракрадаліся ў пакоі, каб папаляваць на мышэй. Ветранымі начамі дзверы дамоў ляпалі і бразгалі, і ў вокнах з разбітымі шыбамі трапяталіся падраныя фіранкі.
Шаша № 66 - аўтастрада, па якой ехалі перасяленцы. Шаша № 66 - гэта доўгая бетанаваная магістраль, што бяжыць па краіне, мякка віючыся на карце ад Місісіпі да Бейкерсфілда; яна ідзе праз чырвоныя і шэрыя землі, ушрубоўваючыся ў горы, перасякае Вялікі водападзел, збягае ўніз, у страшную сляпучую пустыню, цягнецца па ёй, зноў падымаецца ў горы і нарэшце выходзіць у раскошныя даліны Каліфорніі. Шаша № 66 - гэта дарога ўцекачоў, бежанцаў - тых, хто ратуецца ад пылу і высахлай, згалелай зямлі, ад грымотнага грукату трактароў і ўласнага згалення, ад паступовага наступу пустыні на поўнач, ад віхравых вятроў, што з выццём налятаюць з Тэхаса, ад разводдзяў, якія не робяць глебу багацейшай, а толькі крадуць апошнія рэшткі яе скарбу. Ад усяго гэтага людзі ўцякаюць, і на аўтастраду іх выносяць бакавыя шашэйныя прытокі, палявыя дарогі, прарэзаныя ў грунце коламі павозак і грузавікоў. Шаша № 66 - гэта галоўны шлях уцекачоў.
Кларксвіл і Озарк, Вэн-Б'юран і Форт-Сміт - гэта на шашы № 64, і тут канчаецца Арканзас. Дарогі сходзяцца да Аклахома-Сіці, № 66 з Талсы, № 270 з Макалестара, № 81з Уічыта-Фолс - з поўдня, і Інід - з поўначы, і яшчэ з Эдманда, Маклаўда і Парсела. Шаша № 66 выходзіць з Аклахома-Сіці; Эл-Рына і Клінтан застаюцца на захадзе. Гайдра, Элк-Сіці і Тэксала, і тут канчаецца штат Аклахома, і аўтастрада № 66 пераразае Тэхаскі выступ, так званую Ручку рондаля. Шэмрак і Маклін, Конуэй і жоўты Амарыльё, Уілдарада, Вега і Бойс - і тут канчаецца Тэхас. Тукумкары, Санта-Роса, потым з Санта-Фэ ўніз, праз ньюмексіканскія горы да Альбукерка. А там удоўж цяснін ракі Рыо-Грандэ да Лос-Лунаса і зноў на захад па шашы № 66 да Гэлапа, што на мяжы штата Нью-Мексіка.
Тут пачынаюцца высокія горы. Холбрук, і Ўінслаў, і Флагстаф у высакагор'і Арызоны. Потым шырокае плато з хвалістымі лініямі ўзгоркаў. Эфарк і Кінгмэн, і зноў камяністыя горы, куды ваду завозяць з іншых мясцін і гандлююць ёю. Пасля вызубленых, выпаленых сонцам гор Арызоны - да ракі Каларада з зялёнымі зараснікамі трыснягу па берагах. Тут канчаецца штат Арызона. Адразу за ракой - Каліфорнія, і пачынаецца яна з вельмі прыгожага гарадка - Нідлс, які стаіць на самым беразе. Але рака здаецца чужаніцай у гэтых краях: ад Нідлса ўверх і за абпаленым сонцам хрыбтом пачынаецца пустыня. Там шаша № 66 бяжыць па страшэннай пустыннай мясцовасці, паветра трымціць ад спёкі, а высокія чорныя горы, што маячаць наперадзе, нясцерпна томяць душу. І вось ужо Барстаў, але за ім усё тая ж пустыня, пакуль наперадзе зноў не паўстаюць горы, прыгожыя горы, і аўтастрада пятляе сярод іх. І раптам вузкі праход, і ўнізе разлягаецца цудоўная даліна, унізе сады, вінаграднікі і маленькія катэджы, а ўдалечыні - горад. О госпадзі, нарэшце ўсё скончылася!
Людзей, што кінуліся ўцякаць, выносіла на аўтастраду № 66; машыны ішлі то па адной, то цэлымі караванамі. Удзень яны паволі каціліся па дарозе, а ноччу спыняліся каля вады. З лядашчых, дзіравых радыятараў валіла пара, шатуны бразгаталі і ляскалі. І людзі, што сядзелі за рулём грузавікоў і перагружаных легкавушак, апасліва ўслухоўваліся. Колькі яшчэ да горада? Пакуль едзеш ад аднаго да другога, нацерпішся страху. Калі што-небудзь паламаецца... што ж, калі паламаецца, зробім прывал, а Джым збегае ў горад, раздабудзе патрэбную дэталь і вернецца... А колькі яшчэ харчу засталося?
Услухоўвайся ў матор. Прыслухоўвайся да колаў. І вухам, і рукой прыслухоўвайся да абаранка руля, далонню да рычага пераключэння скорасцей, нагамі - да дошак насцілу. Усімі пяццю пачуццямі прыслухоўвайся да тарахцення гэтага старога драндулета, бо змена тону, перамены рытму могуць азначаць... тыдзень вымушанай стаянкі. Во стукае! Гэта клапаны. Клапаны - не страшна. Няхай стукаюць сабе хоць да другога прышэсця - не бяда. А вось гэты глухі шум на хаду... яго амаль не чуеш, хутчэй адчуваеш. Можа, масла куды-небудзь не даходзіць? Можа, падшыпнік які-небудзь пачынае рассыпацца? Госпадзі, калі падшыпнік, што ж тады рабіць? Грошы цякуць, як вада.
І чаго гэта радыятар, чорт на яго, так разагрэўся? Не на пад'ёме ж. Дай гляну. А божачкі, рэмень радыятара паляцеў! Што ж, замест рэменя вяроўку паставім, вось гэту. Давай прымер, во-во, якраз. Канцы я звяжу. Цяпер паволі, зусім павольненька, пакуль да гарадка якога не даедзем. Вяроўка доўга не пакруціцца.
Толькі каб дабрацца да Каліфорніі, дзе апельсіны растуць, перш чым рассыплецца гэтая старая калымага. Толькі каб дабрацца!
А пакрышкі - пратэктар зусім знасіўся, аж да драцяной аплёткі. Каб не наляцелі на той камень, мы, можа, яшчэ міль сто выціснулі б. Што лепш - лішняя сотня міль або спушчаная камера? Што лепш? Вядома, сотня міль. Ну, не ведаю, тут ёсць пра што падумаць. Латаць у нас ёсць чым. Можа, толькі крышачку спусціць? А што, калі манжэтку зрабіць? Міль пяцьсот яшчэ маглі б выціснуць. Паехалі. Калі лопне, тады і станем.
Трэба было б шыну купіць, ды вельмі ж дорага просяць, нават за старую. Позіркам наскрозь працінаюць. Разумеюць, што чалавеку пазарэз трэба. Ведаюць, што яму часу няма стаяць. І цану набіваюць.
Не хочаш - не трэба. Я не здароўе тут папраўляю, а шынамі гандлюю. Задарма не раздаю. Якая мне справа, што там у вас? Сваіх клопатаў хапае.
А далёка да бліжэйшага гарадка?
Учора я сорак дзве машыны налічыў з такімі самымі пасажырамі. Адкуль вы ўсе едзеце? Куды вас нясе?
О, Каліфорнія штат вялікі!
Не такі ўжо і вялікі. І ўсе Злучаныя Штаты разам - не такая ўжо вялікая краіна. Зусім не вялікая. Нам цесна ўсім разам - і табе, і мне, і такім, як ты, і такім, як я, багатым і бедным - усім месца не хапае, і жуллю, і сумленным людзям. Галодным і сытым. Можа, ты лепш назад павярнуў бы?
Мы жывём у свабоднай краіне. Чалавек вольны ехаць, куды захоча.
Гэта ты так думаеш. Калі-небудзь чуў пра патрулі на каліфарнійскай граніцы? Паліцэйскія з Лос-Анжэлеса спыняюць вось такіх, як ты, назад заварочваюць. Кажуць: хто не можа купіць нерухомасць, той нам не патрэбен. Пытаюцца: шафёрскія правы ёсць? Ты ім: парваліся. А яны: без шафёрскіх правоў уезд забаронены. Мы ў свабоднай краіне жывём. Што ж, пайдзі пашукай яе, свабоду. Мне адзін гаварыў: свабоды ў цябе столькі, колькі ты яе можаш купіць.
У Каліфорніі добра плацяць. Вось у мяне лісток, там пра гэта сказана.
Мана! Адтуль уцякаюць - я сам такіх бачыў. Вас абдурваюць: камусьці так трэба. Ну дык што, бярэш шыну ці не?
Давядзецца браць, але ж, далібог, містэр, гэта моцна б'е нас па кішэні! Грошай зусім мала засталося.
Дык я ж дабрачыннасцю не займаюся. Трэба, бяры.
Што зробіш, вазьму. Давай глянем. Раскрый яе. Глянь, якая камера! Ах ты шэльма, а казаў, камера добрая. Якая ж гэта камера, адны дзіркі.
Што вярзеш? Чорт... праўда! Як гэта я не ўбачыў?
Ты ўсё, сукін сын, бачыў. За рвань чатыры даляры захацеў. У зубы табе за гэта даць!
Ты не гарачыся, цішэй. Кажу, не бачыў. Ну добра, аддаю за тры пяцьдзесят.
Ага, падстаўляй кішэню! Як-небудзь да горада даедзем.
Думаеш, з такой камерай даедзем?
Трэба. На вобадзе паеду, а ні цэнта гэтай сволачы не дам.
А якім ты ўяўляеш сабе камерсанта? І праўда ж, не здароўе ён сюды прыйшоў папраўляць. Такая ўжо гэта справа - камерцыя. А ты думаў - што? Чалавек хоча... Бачыш - шчыт пры дарозе? «Клуб абслугоўвання. Па аўторках - урачыстае снеданне. Гатэль «Калмада». Шчыра вітаю, браток! Клуб абслугоўвання... Мне адзін неяк расказваў. Прыйшоў ён на сход розных там дзялкоў і паднёс ім такую гісторыю. Калі я, кажа, быў яшчэ хлапчуком, бацька аднойчы вывеў на вяроўцы цялушку і загадвае: завядзі яе да быка, яе трэба абслужыць. Я і завёў, кажа. І з таго дня, як пачую, што які-небудзь дзялок гаворыць пра абслугоўванне, не магу ўцяміць - хто ж тут каго?.. У гандляроў адзін клопат - ашукаць і абдурыць, але называецца гэта ў іх інакш. У тым вось і справа. Калі ўкрадзеш шыну, ты злодзей, а калі ён хоча ўкрасці ў цябе чатыры даляры - гэта нічога, гэта можна. У іх гэта называецца камерцыя.
Дэні там, ззаду, вады просіць.
Пацерпіць. Адкуль тут вада?
Чуеш - стукае?.. Ці не ў заднім мосце?
Цяжка сказаць.
Праз раму перадаюцца гукі, падобныя на марзянку.
Пракладка ляціць. Спыняцца нельга. Чуеш - свішча? Знойдзем добрае месца, зробім прывал, я падыму капот - праверу. Але харч канчаецца, грошы канчаюцца. А калі не будзе на што бензіну купіць, тады што?
Дэні там, ззаду, вады просіць. Малы піць хоча.
Во, чуеш, свішча? Пракладка.
Госпадзі! Лопнула! Камера, пакрышка - усё к чорту! Трэба рамантаваць. Гэтай не выкідай - зробім з яе манжэты: разрэжам і накладзем на слабыя месцы.
Машыны спыняюцца на абочыне дарогі - адкрываюцца капоты, рамантуюцца шыны. Аўтамабілі цягнуцца па аўтастрадзе № 66, як падраненыя жывёліны, выбіваючыся з сіл, і хрыпла дыхаюць. Маторы перагрэтыя, аслабленыя цягі, разбітыя падшыпнікі, усё ў машыне грукоча.
Дэні вады просіць.
Людзі ўцякалі па шашы № 66. А бетанаваная дарога блішчыць на сонцы, як люстра, паветра трымціць ад спёкі, і здаецца, што наперадзе шаша заліта вадой.
Дэні просіць вады.
Яшчэ крыху пацерпіць малы. Яму горача. Хутка ўжо заправачная - станцыя абслугоўвання. Там абслужаць, як той хлопец казаў.
На дарозе дзвесце пяцьдзесят тысяч чалавек. Пяцьдзесят тысяч старых машын - параненых, ахутаных парай. Разваліны, кінутыя гаспадарамі. А з імі што, з людзьмі? Што было потым з тымі, хто ехаў вось у гэтай, напрыклад, машыне? Пайшлі пеша? Дзе яны цяпер? Адкуль бярэцца гэтая страшная сваёй сілай вера?
А вось я вам раскажу адну гісторыю. Вы можаце не паверыць, але гэта праўда. Крыху дзіўная гісторыя, але цудоўная. Адну сям'ю - дванаццаць чалавек - сагналі з зямлі. Машыны ў іх не было. Яны змайстравалі прычэп з рознай непатрэбшчыны і пагрузілі на яго ўвесь свой скарб. Потым падкацілі прычэп да шашы № 66 і сталі чакаць. І неўзабаве іх узяў на буксір легкавы аўтамабіль. Пяцёра ехалі ў машыне, а сем чалавек з сабакам - на прычэпе. Азірнуцца не паспелі - ужо Каліфорнія. Гаспадар легкавой машыны і вёз іх, і карміў. І гэта ўсё праўда. Але адкуль бярэцца такая мужнасць і такая вера ў людзей? Не многае на свеце можа навучыць такой веры.
Людзі ўцякаюць ад жаху, што ў іх за спінай, і з імі здараюцца розныя рэчы - то да жудасці жорсткія, то проста дзівосныя, і ў сэрцах у іх зноў і зноў разгараецца вера і ніколі не гасне.
Дапатопны, перагружаны «гудзон» са скрыпам і крактаннем дабраўся каля Саліса да аўтастрады і пад сляпучым сонцам скіраваў на захад. Але на бетанаванай шашы Эл паддаў газу, бо аслабелым рысорам цяпер нішто не пагражала. Ад Саліса да Гора дваццаць адна міля, і «гудзон» ішоў з хуткасцю трыццаць пяць міль у гадзіну. Ад Гора да Ўорнера трынаццаць міль, ад Уорнера да Чакоты чатырнаццаць, потым доўгі прабег да Генрыэты - трыццаць чатыры мілі, затое ў канцы - сапраўдны горад. Ад яго да Касла дзевятнаццаць міль, а сонца стаяла ў зеніце, і над чырвонымі палямі дрыжэла распаленае сонцам паветра.
Эл засяроджана сядзеў за рулём і ўсёй сваёй істотай прыслухоўваўся да машыны, раз-пораз пераводзячы позірк з палатна дарогі на прыборны шчыток. Ён нібы зліўся з машынай, кожным сваім нервам ловячы яе хібы, глухія стукі ці віск, хмыканне і шчоўканне - любыя перамены ў яе ходзе пагражалі паломкай. Эл стаў душой машыны.
Бабка, якая сядзела побач з ім, жаласна хныкала ў паўсне, раптам расплюшчвала вочы, утароплівалася на дарогу і зноў упадала ў забыццё. А каля бабкі сядзела маці, высунуўшы ў акенца кабіны сагнутую ў локці руку, на якой пад гарачым сонцам пачырванела скура. Маці таксама ўставіла вочы наперад, але яны былі цьмяныя і не бачылі ні дарогі, ні палёў, ні заправачных станцый, ні павільёнчыкаў закусачных. Яна не глядзела на тое, міма чаго праязджаў іхні «гудзон».
Эл пакруціўся на праседжаным сядзенні і перамясціў рукі на абаранку руля. Уздыхнуў:
- Здорава тарахціць, але, думаю, нічога страшнага. А вось калі прыйдзецца браць пад'ёмы з такім грузам, адзін бог ведае, што яна выкіне. Ма, а на дарозе да Каліфорніі ёсць узгоркі?
Маці паволі павярнула да яго галаву, і вочы яе ажывіліся.
- Думаю, павінны быць, - адказала яна. - Напэўна не ведаю. Але помніцца, людзі казалі, узгоркі ёсць і нават горы. Высокія горы.
Бабка працяжна застагнала ў сне.
Эл сказаў:
- На першым пад'ёме расплавім падшыпнікі. Добра было б сёе-тое скінуць. Можа, не варта было браць гэтага прапаведніка.
- Ты яшчэ не раз парадуешся, што мы яго ўзялі, - сказала маці. - Гэты прапаведнік паможа нам. - Яна зноў перавяла вочы на бліскоткую стужку дарогі.
Эл кіраваў адной рукой, другая ляжала на дрыгатлівым рычагу пераключэння скорасцей. Ён усё хацеў нешта сказаць, але не рашаўся. Нарэшце, спачатку бязгучна паварушыўшы губамі, вымавіў:
- Ма... - Маці паволі скіравала на яго позірк, галава яе ледзь пагойдвалася ў такт пагойдванню машыны. - Ма, а табе не страшна? Не страшна ехаць на новае месца?
Вочы ў яе зрабіліся задуменныя, мяккія.
- Не, - рашуча адказала яна. - Пра гэта не думала. Так немагчыма. Мне нельга так думаць. Гэта вышэй чалавечых сіл - для гэтага трэба пражыць некалькі жыццяў, а жыццё толькі адно. А думаць наперад на некалькі жыццяў мне не пад сілу. Ты малады, ты глядзі наперад, а я... у мяне цяпер толькі дарога перад вачамі. І думаю я толькі пра тое, ці хутка ўсе прагаладаюцца і папросяць свіных костак. - Твар у яе звяў. - Гэта ўсё, пра што я магу думаць. Больш ні пра што. А забяруся ў думках далёка, вас устрывожу. Вы ўсе тым і трымаецеся, што я думаю толькі пра вас.
Бабка віскліва пазяхнула і расплюшчыла вочы. Здзіўлена азірнулася па баках.
- Мне злезці трэба, хвала богу, - сказала яна.
- Зараз да кустоў пад'едзем, - адказаў Эл. - Вунь наперадзе зараснік.
- Кусты-кусты, навошта мне ў кусты. Мне вылезці трэба, кажу, - заенчыла бабка. - Злезці мне трэба, злезці.
Эл газануў і каля нізкага кустоўя рэзка затармазіў. Маці шырока расчыніла дзверцы, выцягнула мітуслівую старую з кабіны і павяла ў зараснік.
На версе грузавіка таксама заварушыліся. Твары ва ўсіх ільсніліся і пачырванелі ад сонца, ад якога не было дзе схавацца. Том, Кейсі, Ной і дзядзька Джон стомлена саскочылі на зямлю. Руці і Ўінфілд пералезлі цераз барты і гайсанулі ў кусты. Коні асцярожна зняў з машыны Ружу Сарона. Дзед прачнуўся, высунуў галаву з-пад брызенту, але вочы ў яго былі п'яныя, слязлівыя і няўцямныя. Ён утаропіў іх на людзей, ды наўрад ці пазнаў каго.
Том крыкнуў яму:
- Хочаш, дзед, злезці?
Старэчыя вочы безуважна павярнуліся да Тома.
- Не, - адказаў дзед. На міг у вачах у яго ўспыхнула лютасць. - Казаў, не паеду. Застануся, як М'юлі. - І ён зноў страціў усякую цікавасць да навакольнага.
Маці памагла бабцы падняцца па насыпе на шашу.
- Том, - сказала яна, - вазьмі там, у самым задзе, пад брызентам, патэльню з косткамі. Трэба падсілкавацца.
Том дастаў патэльню і абнёс усіх па чарзе. І сям'я, стоячы на абочыне шашы, пачала згрызаць са свіных костак хрумсткае мяса.
- Шчасце, што хоць гэта з сабой узялі, - сказаў бацька. - У мяне ногі як драўляныя, ледзь ступаю. А вада дзе?
- Хіба не ў вас там? - устрывожылася маці. - Я цэлы галонавы збан наліла.
Бацька палез на борт грузавіка і зазірнуў пад брызент.
- Тут няма. Мусіць, забыліся.
Усіх імгненна апанавала прага. Уінфілд захныкаў:
- Піць хачу. Хачу піць.
Мужчыны аблізнулі губы - ім раптам страшэнна захацелася вады. Усчалася лёгкая паніка.
- Вады на першай заправачнай дастанем, - заспакойліва сказаў Эл. - Нам і гаручае трэба.
Тыя, што ехалі наверсе, зноў палезлі на свае месцы; маці пасадзіла бабку ў кабіну і сама села побач. Эл запусціў матор, і ўся грамада паехала далей.
Ад Касла да Падэна - дваццаць пяць міль, а сонца толькі-толькі прайшло зеніт і пачало хіліцца на захад. Каўпачок радыятара бразгацеў, пара з шыпеннем выбівалася з-пад яго. Непадалёк ад Падэна спыніліся каля заправачнай станцыі; перад хацінай дзве бензінавыя калонкі, ля агароджы - водаправодны кран з доўгім шлангам. Эл падвёў носам да яго свой «гудзон». З крэсла ззаду калонак падняўся таўстун з загарэлым да чырвані тварам і такімі ж рукамі і пайшоў насустрач. На ім былі карычневыя вельветавыя штаны на падцяжках і спартовая кашуля з кароткімі рукавамі, на галаве - серабрыстага колеру кардонны шлем ад сонца. Пот пацеркамі выступіў у яго на носе і пад вачамі і струменьчыкамі сцякаў па складках шыі. Ён перавальваючыся падышоў да грузавіка з непрыязным, суровым выразам на твары.
- Што-небудзь купляць будзеце? - запытаўся ён. - Бензін ці дэталі?
Эл ужо вылез на падножку і кончыкамі пальцаў пачаў адвінчваць каўпачок радыятара, раз-пораз адхопліваючы руку, каб не апячыся.
- Нам патрэбен бензін, містэр.
- Грошы ёсць?
- А то ж. Вы што думалі, мы пабіраемся?
Твар таўстуна адразу палагаднеў.
- Ну, тады парадак, хлопцы. Налівайце вады. - І таўстун паспяшаўся растлумачыць: - А то цяпер столькі рознага народу тут праязджае - нальюць вады, набрудзяць у прыбіральні, ды яшчэ сцягнуць што-небудзь, а купіць нічога не купляюць. Клянчаць, дай ім хоць галон бензіну, каб з месца зрушыць.
Том гнеўна саскочыў з машыны і падышоў да таўстуна.
- Мы на свае грошы едзем, - са злосцю сказаў ён. - Ты што гэта нас з галавы да ног азіраеш? Мы задарма ў цябе нічога не просім.
- Я ж нічога такога, - паспешліва адказаў таўстун. Праз кашулю ў яго праступіў пот. - Налівайце вады, а прыбіральня - вунь яна, каму трэба.
Уінфілд схапіў шланг, напіўся, потым падставіў пад струмень галаву і твар і адскочыў убок увесь мокры.
- Зусім не халодная, - сказаў ён.
- Што ў нас у краіне робіцца, проста розуму не дабяру, - загаварыў таўстун. Ён ужо знайшоў іншую тэму для скаргаў і пакінуў Джоўдаў у спакоі. - Кожны дзень па пяцьдзесят - шэсцьдзесят машын праязджае, народ падаўся на захад з малымі, з усім сваім скарбам. Куды ўсе яны едуць? Што там будуць рабіць?
- Туды ж, куды і мы, - адказаў Том. - Едуць на новыя месцы. Трэба ж неяк жыць. Толькі і ўсяго.
- Ну, не ведаю, што ў нас у краіне творыцца. Проста не магу зразумець. Вось і я таксама стараюся неяк жыць. Думаеш, новыя вялікія машыны тут спыняюцца? Не, сэр! Яны ідуць далей, у горад, да жоўценькіх заправачных станцый, што належаць кампаніі. Шыкоўныя машыны праязджаюць міма такіх халуп, як мая. Сюды большай часткай адна голь пад'язджае.
Эл адкруціў каўпачок радыятара, і струмень пары падкінуў каўпачок угору, а ў радыятары пачулася ціхае бульканне. На версе грузавіка змардаваны сабака падпоўз да самага краю паклажы і заскавытаў, пазіраючы ўніз на ваду. Дзядзька Джон палез на борт і зняў яго адтуль за загрывак. Спачатку сабака няўпэўнена пераступіў здранцвелымі нагамі, потым падышоў да лужыны пад водаправодным кранам і пачаў хлябтаць з яе. Па шашы, пабліскваючы на яркім сонцы, з шумам праносіліся аўтамашыны, і падняты імі гарачы вецер далятаў да двара заправачнай станцыі. Эл наліў са шланга вады ў радыятар.
- Не тое каб я стараўся зарабіць на багатых кліентах, - гаварыў сваё таўстун. - Я проста хачу, каб справа ішла. Але тыя, што заязджаюць, альбо клянчаць бензін, альбо выменьваюць яго на што-небудзь. Хочаце, гляньце там, у заднім пакоі, колькі ў мяне назбіралася непатрэбшчыны, якую мне ўпёрлі за бензін і масла, - ложкі, дзіцячыя каляскі, рондалі, патэльні... Адна сям'я дык ляльку дала за галон бензіну - у дачкі забралі. А што мне з усім гэтым хламам рабіць? Старызнікам стаць? Адзін чалавек за галон бензіну чаравікі з сябе гатовы быў зняць. І каб я быў, як некаторыя, дык мог бы... - Ён зірнуў на маці і не дагаварыў.
Джым Кейсі змачыў сабе валасы, і па яго высокім ілбе ўсё яшчэ беглі кропелькі вады, жылістая яго шыя была мокрая, кашуля мокрая. Ён падышоў і стаў каля Тома.
- Людзі не вінаватыя, - сказаў ён. - Табе самому было б прыемна абмяняць ложак, на якім ты спіш, на бензін?
- Ведаю, што не вінаватыя. З кім ні пагаворыш, без дай прычыны з месца ніхто не знімаецца. Але ж куды ідзе краіна? Вось што я хачу ведаць. Куды яна ідзе? Цяпер чалавек не можа сябе пракарміць. Зямля людзей таксама не корміць. І я ў вас пытаюся: куды мы ўсе ідзём? Нічога не разумею! І ў каго ні спытайся, ніхто нічога не разумее. Чалавек гатовы чаравікі з ног зняць, абы праехаць лішнюю сотню міль. Розуму не дабяру! - Ён зняў свой серабрысты трапічны шлем і выцер лоб далонню. Том таксама зняў з галавы кепку і выцер ёю лоб. Тады падышоў да шланга, намачыў кепку, адціснуў яе і зноў надзеў. Маці прасунула руку між планак борта, дастала алавяную конаўку, наліла ў яе вады і панесла да грузавіка. Напаіла бабку ў кабіне і пайшла да дзеда, які ляжаў на грузавіку. Стаўшы на ніжнюю планку, яна падала конаўку старому, той толькі змачыў губы і пакруціў галавой - не захацеў піць. Ён недаўменна паглядзеў на нявестку тужлівымі старэчымі вачамі і праз момант зноў упаў у забыццё.
Эл запусціў матор і заднім ходам пад'ехаў да бензакалонкі.
- Налівай, - сказаў ён. - Наогул у яе ідзе каля сямі галонаў, але больш як шэсць не трэба, а то выплюхвацца будзе.
Таўстун уставіў бензінавы шланг у адтуліну бака.
- Не, сэр, - сказаў ён. - Проста не ведаю, куды ідзе краіна. Дапамога па беспрацоўю і ўсё такое іншае.
Кейсі сказаў:
- Я шмат пахадзіў па краіне. Усе задаюць такое пытанне. Куды мы ідзём? Куды коцімся, спыніцца не можам? Чаму б людзям сур'ёзна не падумаць пра гэта? Усё ў руху. Людзі едуць і едуць. Мы ведаем, чаму яны едуць і як едуць. Едуць, бо інакш нельга. Даводзіцца ехаць. Так заўсёды бывае, калі людзі шукаюць лепшага. Седзячы на месцы, нічога не даб'ешся. Людзі цягнуцца да лепшага жыцця, шукаюць яго і знойдуць. Крыўда прымушае людзей змагацца за свае правы. Я многа пахадзіў па краіне, мне часта даводзілася чуць тое, што вы гаварылі.
Таўстун пампаваў бензін, стрэлка на лічыльніку круцілася.
- Дык усё ж такі, куды мы ідзём? Вось што я хачу ведаць.
Том сярдзіта перабіў яго:
- Ну і ніколі не даведаешся. Кейсі стараецца табе растлумачыць, а ты дзяўбеш адно і тое. Я такіх не першы раз сустракаю. Нічога цябе не цікавіць. Заладзіў адну і тую песеньку. «Куды мы ідзём?» А ты і ведаць не жадаеш. Уся краіна на колах, людзі едуць кудысьці. А колькі іх памірае навокал? Можа, і ты хутка канцы аддасі, а нічога толкам не дазнаешся. Шмат мне такіх траплялася. Нічога і ведаць не хочуць. Закалыхваеце сябе песенькай «Куды мы ідзём?». - Том паглядзеў на бензінавую помпу, старую, іржавую, і на халупу, збітую з ужываных дошак з дзіркамі ад старых цвікоў, што праступалі праз фарбу, - некалі бадзёрую жоўтую фарбу, якая храбра намагалася падрабіць сваю заправачную пад выгляд вялікіх фірменных заправачных станцый у горадзе. Але фарба не змагла схаваць ні старых дзірак ад цвікоў, ні трэшчын у дошках, а зноў фарбаваць халупу гаспадару ўжо не давядзецца. Падробка не ўдалася, і гаспадар гэта добра ведаў. Праз расчыненыя дзверы халупы Том убачыў бляшанкі са змазачным маслам - усяго дзве - і прылавак з заляжалымі цукеркамі, пацямнелымі ад часу лакрычнымі ледзянцамі і пачкамі цыгарэт. Убачыў зламанае крэсла і сетку ад мух з дзіркай пасярэдзіне, абведзенай іржой. Ён паглядзеў на гразкі дворык, які трэба было б пасыпаць жвірам, на кукурузнае поле ззаду яго, якое высыхала і памірала пад сонцам. Каля хаціны - горка езджаных і падноўленых шын. І толькі цяпер ён заўважыў на таўстуну старыя, замытыя штаны, танную спартовую кашулю і кардонны шлем. Том сказаў: - Я не хацеў вас пакрыўдзіць, містэр. Гэта ўсё ад спёкі. У вас таксама небагата. Хутка і вы апыняцеся на дарозе. Толькі выганяць вас не трактары. Вас выганяць жоўценькія станцыі ў горадзе. Людзі здымаюцца з месцаў, -ціха дадаў ён, - і вы таксама, містэр, падасцеся ўслед за імі.
Таўстун слухаў Тома, і рука яго ўсё марудней круціла ручку помпы, пакуль зусім не замерла. Ён з трывогай пазіраў на Тома.
- Адкуль ты ведаеш? - разгублена запытаўся ён. - Адкуль табе вядома, што мы пагаворваем ужо пра гэта - хочам сабраць усе пажыткі і падацца на Захад?
Яму адказаў Кейсі:
- Так усе робяць. Я зацята змагаўся з д'яблам, бо ў д'ябле мне ўяўляўся наш агульны вораг. Але цяпер нашай краінай завалодаў яшчэ горшы вораг, і ён не адступіцца, пакуль яго не пасякуць на кавалкі. Вы бачылі, як яшчарка-ядазуб трымае здабычу, містэр? Учэпіцца, ты рассячэш яе напалам, а яна зубоў не расціскае. Адсячэш галаву, яна ўсё трымае. Даводзіцца адвёрткай расшчапляць ёй сківіцы, толькі тады адпусціць. А пакуль трымае сваю здабычу, атрута прасочваецца праз рану кропля за кропляй. - Ён змоўк і скоса глянуў на Тома.
Таўстун збянтэжана ўтаропіў позірк некуды ўдалячынь. Рука яго пачала паволі круціць каленчаты рычаг помпы.
- Проста не ведаю, куды мы ідзём, - ціха прамовіў ён.
Коні і Ружа Сарона стаялі каля вадзянога шланга і па-змоўніцку перамаўляліся. Коні спаласнуў алавяную конаўку і, перш чым наліць у яе вады, паспрабаваў струмень пальцам. Ружа Сарона глядзела на машыны, што праносіліся па шашы. Коні паднёс ёй конаўку.
- Хоць і цеплаватая, ды ўсё ж вада, - сказаў ён.
Ружа Сарона глянула на яго і таямніча ўсміхнулася. З тае пары, як яна зацяжарала, таямнічасць ахінула ўсю яе істоту, тайны і недамоўкі, здавалася, мелі для іх абаіх нейкі асаблівы сэнс. Яна была вельмі задаволеная сабой і пераборлівая ў самых малаважных дробязях. Яна вымагала ад Коні безліч непатрэбных паслуг, і абое ведалі, што і без іх можна абысціся. Коні таксама быў задаволены Ружай Сарона і ніяк не мог нацешыцца з яе цяжарнасці. Яго радавала, што ён падзяляў з ёю ўсе яе таямніцы. Калі яна хітра ўсміхалася, ён адказваў ёй такою самаю хітрай усмешкаю, і яны перашэптваліся між сабой. Свет самкнуўся вакол іх у цеснае кола, і яны былі яго цэнтрам, праўдзівей - Ружа Сарона была яго цэнтрам, а Коні круціўся вакол яе на маленькай арбіце. Усё, пра што яны гаварылі, было ахутана таямніцай.
Ружа Сарона адвяла вочы ад шашы.
- Мне піць не дужа хочацца, - сказала яна манерна. - Але, магчыма, мне трэба піць.
Коні сцвярджальна кіўнуў галавой, бо зразумеў, што яна мела на ўвазе. Яна ўзяла ў яго з рук конаўку, прапаласкала рот, сплюнула і выпіла цеплаватую ваду да дна.
- Яшчэ адну? - запытаўся Коні.
- Палову. - І ён наліў паўконаўкі і падаў ёй. Па шашы прашугаў «лінкольн» мадэлі «зефір» - серабрысты, нізкай пасадкі. Ружа Сарона азірнулася, ці далёка астатнія члены сям'і, і, убачыўшы, што яны стаяць усе каля грузавіка, ціха сказала: - Ты хацеў бы раз'язджаць на такой машыне?
Коні ўздыхнуў:
- Чаму не... але гэта потым. - І яны абое зразумелі, што мелася на ўвазе. - Калі будзем добра зарабляць у Каліфорніі, займеем машыну. Але вось такія, - ён паказаў рукой на «зефір», які знікаў удалечыні, - такія каштуюць не менш за вялікі дом.
- А мне хацелася б мець і дом, і такую машыну, - сказала Ружа Сарона. - Толькі, вядома, спярша дом, бо... - І абое зразумелі, што яна хацела сказаць. Іх увесь час хвалявала яе цяжарнасць.
- Як ты сябе адчуваеш - добра? - запытаўся Коні.
- Стамілася. Цяжка ехаць пад такім сонцам.
- Нічога не зробіш. Іначай мы ніколі не дабяромся да Каліфорніі.
- Ведаю, - сказала Ружа Сарона.
Сабака, прынюхваючыся, абмінуў грузавік, падбег да лужыны пад вадзяным шлангам і пачаў хлябтаць мутную ваду. Потым адышоў убок, апусціў нос да зямлі і звесіў вушы. Абнюхваючы пыльную траву, ён дайшоў да самага краю дарогі, падняў галаву, паглядзеў на шашу і пайшоў упоперак яе. Раптам Ружа Сарона пранізліва закрычала. Міма, віскочучы шынамі, імкліва імчалася вялікая машына. Сабака бездапаможна шарахнуўся назад і, ледзь паспеўшы скавытнуць, апынуўся пад коламі. У акенцах з'явіліся твары, павярнуліся назад, машына на імгненне сцішыла ход, потым зноў набрала хуткасць і знікла з вачэй. А сабака з вываленымі вантробамі ляжаў акрываўленым камяком на зямлі, слаба падрыгваючы нагамі.
Ружа Сарона ўтаропілася на яго шырока расплюшчанымі вачамі.
- Мне гэта не пашкодзіць? - жаласна запыталася яна. - Як ты думаеш, не пашкодзіць?
Коні абняў яе.
- Ідзі пасядзі, -сказаў ён. -Гэта нічога.
- Але я адчула боль. Калі я закрычала, нешта ў мяне ўсярэдзіне нібы абарвалася.
- Ідзі пасядзі. Гэта нічога. З табой нічога не будзе. - Ён падвёў яе да грузавіка, далей ад сабакі, і пасадзіў на падножку.
Том і дзядзька Джон падышлі да акрываўленага камяка. Пакалечанае цела сабакі апошні раз сутаргава страпянулася і замерла. Том узяў яго за заднія лапы і адцягнуў на абочыну. Дзядзька Джон стаяў збянтэжаны, быццам на ім ляжала віна за тое, што здарылася.
- Няхай бы я прывязаў яго, - сказаў ён.
Бацька глянуў на сабаку і адвярнуўся.
- Паехалі далей, - сказаў ён. - Мы ўсё роўна не пракармілі б яго. Так, можа, і лепш.
З-за грузавіка вынырнуў гаспадар заправачнай.
- Вось шкада, людзі, - сказаў ён. - Каля вялікай шашы сабачае жыццё кароткае. За год у мяне тут трох раздушыла. Больш іх не трымаю. - І дадаў: - Вы не трывожцеся. Я ўсё зраблю. Адцягну ў кукурузу і там закапаю.
Маці падышла да Ружы Сарона, якая сядзела на падножцы, усё яшчэ калоцячыся з перапуду.
- Ну што з табой, Разашарна? - запыталася яна. - Табе нядобра?
- Усё было на маіх вачах. Я вельмі перапужалася.
- Я чула твой крык. Але цяпер пара ўжо супакоіцца.
- Думаеш, мне гэта не пашкодзіць?
- Не, - адказала маці. - Калі будзеш глядзець насупай, ад усяго нюні распускаць і цацкацца сама з сабой, вось тады добрага не чакай. А зараз падымайся, памажы бабку ўсадзіць. І хоць на хвіліну кінь думаць пра сваё дзіця. Яно само пра сябе паклапоціцца.
- А дзе яна, бабка?
- Не ведаю. Недзе тут. Можа, у прыбіральні.
Ружа Сарона пайшла да будкі і неўзабаве вярнулася, ведучы за руку бабку.
- Яна там заснула, - сказала Ружа Сарона.
Бабка шырока ўсміхнулася:
- А як там добра! Такое ўсё фірменнае, і вада яшчэ ліецца згары. - І радасна дадала: - Мне вельмі спадабалася. Я б там добра выспалася, ды вось жа пабудзілі...
- Не самае гожае месца для спання, - сказала Ружа Сарона і падсадзіла бабку ў кабіну. Тая задаволена апусцілася на сядзенне і сказала:
- Гожае ці нягожае, а што добра, дык добра.
- Ну, паехалі, - сказаў Том. - Яшчэ шмат міль наперадзе.
Бацька паклаў два пальцы ў рот і пранізліва свіснуў.
- Во, цяпер малыя недзе зашыліся, - сказаў ён і яшчэ раз свіснуў.
Праз момант дзеці выскачылі з кукурузы - Руці наперадзе, Уінфілд за ёю.
- Яйкі! - крыкнула Руці. - Я мяккія яйкі знайшла! - Яна падбегла да грузавіка, Уінфілд не адставаў. - Гляньце! - На мурзатай далоні ляжаў з дзесятак маленькіх светла-шэрых яек. І калі яна працягнула руку, каб паказаць знаходку, позірк яе ўпаў на здохлага сабаку, які ляжаў з краю дарогі. - Ой! - крыкнула яна і разам з Уінфілдам асцярожна падышла да сабакі. Абое пачалі разглядаць яго.
Бацька паклікаў малых:
- Ну, хутчэй, а то без вас паедзем.
Дзеці моўчкі павярнуліся і пайшлі да грузавіка. Яшчэ раз глянуўшы на маленькія яйкі нейкай рэптыліі, Руці скінула іх з далоні і разам з Уінфілдам ускараскалася па борце на машыну.
- У яго яшчэ вочы адплюшчаныя, - здушаным голасам прагаварыла яна.
Але Ўінфілд вырашыў трымацца малайцом і храбра сказаў:
- У яго кішкі ўсе так і вываліліся, так і вываліліся... - І, крыху памаўчаўшы, зноў: - Вываліліся... усе кішкі. - Раптам ён упаў на жывот над самым краем борта і званітаваў. Калі зноў сеў, вочы яго слязіліся, з носа цякло. - Калі свіней рэжуць, тады зусім іншае, - апраўдваўся ён.
Эл падняў капот «гудзона» і змераў узровень масла ў маторы. Потым дастаў з-пад сядзення ў кабіне бляшанку ёмістасцю адзін галон, падліў у картэр таннага чорнага масла і зноў праверыў яго ўзровень.
Падышоў Том.
- Хочаш, цяпер трохі я павяду? - запытаўся ён у Эла.
- Я не стаміўся, - адказаў той.
- Але ж ты ноччу зусім не спаў. Я хоць крышачку прыкархнуў раніцай. Залазь наверх. Я пакірую.
- Ну давай, - неахвотна згадзіўся Эл. - Толькі за маслам сачы. Не гані. Я ўсё баюся кароткага замыкання. Паглядай на стрэлку амперметра. Калі яна скокне на нуль, значыць, замыканне. І, Том, не гані. Машына вельмі перагружаная.
Том засмяяўся:
- Я буду сама ўвага. Можаш спаць спакойна.
Верхнія пасажыры занялі свае месцы. Маці зноў уселася каля бабкі, Том сеў за руль, націснуў стартэр.
- Ледзь ліпее, - прамармытаў ён, адпусціў счапленне і выехаў на шашу.
Матор гуў роўна, сонца свяціла ў ветравое шкло, хілячыся на захад. Бабка моцна спала, і нават маці задрамала, апусціўшы галаву. Том насунуў кепку на вочы, каб не сляпіла сонца.
Ад Падэна да Мікера - трынаццаць міль; ад Мікера да Хары - чатырнаццаць, а потым Аклахома-Сіці - вялікі горад. Том павёў машыну напрасткі праз горад. Маці прачнулася і стала глядзець на вуліцы, па якіх яны праязджалі. І тыя, што сядзелі наверсе, таксама глядзелі на ўсе вочы на крамы, на высокія жылыя дамы, на будынкі розных кантор і ўстаноў. А потым дамы і службовыя будынкі пачалі сустракацца радзей, рабілася ўсё менш крамаў. Пацягнуліся аўтамабільныя звалкі, сасісачныя, загарадныя дансінгі.
Руці і Ўінфілд пазіралі на ўсё гэта і дзівіліся, моцна ўражаныя, - які вялікі горад, як тут усё незвычайна, колькі на вуліцах прыгожа апранутых людзей! Стаіўшы дыханне, яны не перакінуліся ніводным словам. Потым нагаворацца, а цяпер маўчалі. Нафтавыя вышкі і ў горадзе, і на ўскраіне - чорныя нафтавыя вышкі, і пах нафты і бензіну. Дзеці нават ні разу не ўскрыкнулі ад здзіўлення: усё тут было такое вялізнае і такое незвычайнае, што іх узяў страх.
На адной вуліцы Ружа Сарона ўбачыла чалавека ў светлым касцюме. На ім былі белыя чаравікі і пляскаты саламяны капялюш. Яна тыкнула Коні ў бок і вачамі паказала на гэтага дзіўнага чалавека, і абое сталі перасмейвацца між сабой, спачатку ціха, а потым мацней. Яны заціскалі сабе рот далонню. Ім так было забаўна, што яны пачалі шукаць вачамі, з каго б яшчэ пасмяяцца. Руці з Уінфілдам убачылі, як яны душацца ад смеху, і таксама паспрабавалі пахіхікаць, але нічога не выйшла - проста не маглі. А Ружа Сарона і Коні сядзелі чырвоныя і ледзь пераводзілі дух, стараючыся стрымацца. Пад канец варта было ім толькі глянуць адно на аднаго, як яны зноў пырскалі ў кулак.
Прыгарад раскінуўся шырока. Том вёў грузавік паволі, асцярожна праз густы вулічны рух і нарэшце выехаў на вялікі заходні шлях - шашу № 66, да палатна якой апускалася сонца. Ветравое шкло зацерушылася пылам. Том насунуў кепку яшчэ ніжэй на вочы, і цяпер яму даводзілася задзіраць галаву назад, каб бачыць дарогу. Бабка так і не прачыналася, хоць сонца біла ёй проста ў заплюшчаныя павекі; жылы на скронях былі блакітныя, а тонкія прожылкі на шчоках чырвоныя, як віно, застарэлыя карычневыя плямы на твары яшчэ больш пацямнелі.
Том сказаў:
- Па гэтай дарозе так да канца і паедзем.
Маці доўга маўчала і нарэшце сказала:
- Можа, пашукаем зручнага месца для прыпынку, пакуль сонца яшчэ не зайшло. Трэба свініны зварыць і хлеба спячы. На гэта пойдзе час.
- Ата, - пагадзіўся Том. - Адным махам такую адлегласць не адолееш. Разварушыцца таксама не шкодзіць.
Ад Аклахома-Сіці да Бэтані - чатырнаццаць міль.
Том сказаў:
- І праўда, пакуль не зайшло сонца, трэба зрабіць прывал. Эл абяцаў паставіць тую штуку наверсе. А то яны там зусім спякуцца.
Маці зноў задрамала, але раптам ускінула галаву, сказала:
- Трэба вячэру прыгатаваць. - І дадала: - Том, бацька казаў, што табе нельга пераступаць мяжу штата.
Ён доўга не адказваў ёй.
- Праўда? Ну і што ж, ма? - нарэшце сказаў ён.
- Я баюся за цябе. Выходзіць, ты ўцякаеш. Цябе могуць злавіць.
Том засланіў далонню вочы ад сонца, якое апускалася ўсё ніжэй.
- Ты не хвалюйся, - сказаў ён. - Я ўсё абдумаў. Адпушчаных па падпісцы шмат, а ў турму садзяцца яшчэ больш. Калі там, на Захадзе, я за што-небудзь пападуся, тады запатрабуюць з Вашынгтона мой здымак і адбіткі пальцаў. Зноў запратораць у турму. А калі за мной ніякіх правінак не будзе, дык ім на мяне напляваць.
- І ўсё ж я баюся. Бывае, што-небудзь такое зробіш і нават не ведаеш, што гэта караецца законам. Можа, у Каліфорніі многае такое лічыцца злачынствам, а мы нават не ведаем. Ну вось ты хочаш што-небудзь зрабіць, думаеш, усё законна, а ў Каліфорніі за гэта караюць.
- Тады ўсё роўна, што з падпіскай, што без, - сказаў Том. - Праўда, такім, як я, больш перападае, чым каму. Але кінь непакоіцца. У нас і без таго клопату па вушы, навошта прыдумляць лішні.
- А як магу я быць спакойнай? Перайшоў мяжу - вось табе і злачынства.
- Усё ж лепш, чым бадзяцца вакол Саліса і з голаду здыхаць, - сказаў Том. - Давай пашукаем месца для прывалу.
Праехалі Бэтані з канца ў канец. За горадам, у тым месцы, дзе пад насыпам праходзіла маставая труба, стаяла старая легкавая машына, а каля яе была раскінута палатка, над якой з коміна, прасунутага праз брызент, віўся дымок. Том паказаў на палатку.
- Вунь нехта спыніўся. Бадай што, нядрэннае месца.
Ён збавіў газ і затармазіў на абочыне. Капот старэнькай легкавушкі быў падняты, чалавек сярэдняга веку разглядаў матор. На ім былі таннае саламянае самбрэра, сіняя кашуля, чорная, у крапінку, камізэлька і зашмальцаваныя, злубянелыя джынсы. Глыбокія і доўгія маршчыны на худых шчоках рабілі больш кідкімі яго вострыя скулы і падбародак. Ён падняў галаву і паглядзеў на грузавік Джоўдаў, і ў яго позірку адлюстраваліся заклапочанасць і раздражненне.
Том высунуўся з акенца:
- Тут спыняцца нанач не забаронена?
Дагэтуль чалавек бачыў толькі грузавік. Цяпер яго позірк перабег на Тома.
- Не ведаю, - адказаў ён. - Мы спыніліся тут толькі таму, што далей ехаць не можам.
- А вада тут паблізу ёсць?
Чалавек паказаў на хібарку заправачнай, што віднелася мо за чвэрць мілі наперадзе.
- Вада вунь дзе - вядро наліць дадуць.
Том быў у нерашучасці.
- А нічога, калі мы таксама тут спынімся?
Хударлявы чалавек крыху замяшаўся.
- Я тут не гаспадар, - адказаў ён. - Мы толькі таму тут сталі, што вось гэтая старая скрыня далей ехаць не захацела.
Том не здаваўся:
- Усё ж такі вы ўжо тут, а мы толькі прыехалі. Ваша права вырашаць - перашкодзяць вам суседзі ці не.
Заклік да гасціннасці падзейнічаў імгненна.
- Ну як жа, вядома, з'язджайце з дарогі. Вельмі будзем радыя. - І паклікаў: - Сэйры, тут людзі спыніцца каля нас хочуць. Выйдзі паздароўкайся. Сэйры ў мяне хварэе, - паведаміў ён Тому.
Полкі палаткі расхінуліся, і з яе выйшла худая, ссохлая жанчына. Твар у яе быў зморшчаны, як завялы ліст, і на ім гарэлі вочы - чорныя вочы, у глыбіні якіх затаіўся страх. Маленькую жанчыну калаціла. Яна трымалася за адкінутую полку палаткі, і рука яе нагадвала руку шкілета, абцягнутую сухой скурай.
Яна загаварыла нізкім, прыгожым, мяккім пявучым голасам, у якім прабіваліся звінючыя ноткі.
- Скажы ім: з добрым прыбыццём, - прамовіла яна. - Скажы: сардэчна запрашаем.
Том з'ехаў з шашы і паставіў машыну ў полі побач з легкавой. Пасажыры выплюхнуліся з грузавіка, як кіпень з гаршка. Руці і Ўінфілд так паспешліва саскочылі, што ў іх ледзь не падкасіліся замлелыя ногі, і ўзнялі віск, калі ў лытках пачало паколваць, як іголкамі. Маці адразу ўзялася за справу. Адвязала вялікае вядро, што было прывязана ззаду грузавіка, і падышла з ім да дзяцей, якія ўсё яшчэ вішчалі.
- Ідзіце па ваду - вунь туды. Папрасіце далікатна. Скажыце: «Будзьце ласкавыя, ці нельга нам наліць вядро вады?» І не забудзьцеся, скажыце: «Вялікі дзякуй». Назад панесяце ўдваіх, толькі не расплюхайце па дарозе. А трапіцца на вочы сухое голле, захапіце з сабой - касцёр распалім.
Дзеці патупалі да хаціны.
А каля палаткі адбылася маленькая замінка, гутарка завязалася не адразу. Першы пачаў бацька:
- Вы не з Аклахомы?
Эл, які стаяў каля легкавушкі, паглядзеў на нумарны знак.
- Канзас, - сказаў ён.
Хударлявы чалавек растлумачыў:
- Мы з Галены, з яе наваколля. Уілсан, Айві Ўілсан.
- А мы Джоўды. З-пад самага Саліса.
- Што ж, мы вельмі радыя пазнаёміцца, - сказаў Айві Ўілсан. - Сэйры, гэта Джоўды.
- Я адразу здагадаўся, што вы не аклахомцы. У вас гаворка нейкая дзіўная, я гэта не ў крыўду вам, разумееце.
- Гавораць усе па-рознаму, - сказаў Айві. - Арканзасцы па-свойму, аклахомцы па-свойму. А неяк раз нам стрэлася жанчына з Масачусетса, дык яна ўжо зусім дзіўна гаварыла. Ледзь разумелі яе.
Ной, дзядзька Джон і прапаведнік узяліся разгружаць машыну. Спачатку памаглі дзеду злезці і пасадзілі яго на траву. Стары сядзеў млявы, уставіўшы вочы проста перад сабой.
- Табе што, дзед, нядобра? - запытаўся Ной.
- Вельмі, - слабым голасам адказаў стары. - Страх як дрэнна.
Паволі і асцярожна ступаючы, да яго падышла Сэйры Ўілсан.
- Можа, вам лепш зайсці ў палатку? - запыталася яна. - Паляжыце там на матрацы, адпачніце.
Пачуўшы яе мяккі голас, дзед падняў галаву.
- Хадзем, - сказала Сэйры. - Вам трэба адпачыць. Мы вас давядзём.
Стары раптам расплакаўся. Падбародак у яго дрыжэў, губы шчыльна сцяліся, ён хрыпла ўсхліпваў. Маці кінулася да яго і абняла за плечы. Памагла яму падняцца, напружыўшы сваю шырокую спіну, і павяла, пацягнула яго ў палатку.
Дзядзька Джон сказаў:
- Відаць, сапраўды дзед наш расхварэўся. Раней з ім гэтага не бывала. У жыцці не бачыў, каб ён слязу пусціў. - Джон хуценька залез на грузавік і скінуў уніз матрац.
Маці выйшла з палаткі і падышла да Кейсі.
- Вам даводзілася даглядаць хворых, - сказала яна. - Дзед занядужаў. Можа, пойдзеце глянеце на яго?
Кейсі паспешліва пайшоў у палатку. На зямлі ляжаў двухспальны матрац, акуратна засланы коўдрамі, у маленькай жалезнай печцы на ножках няроўна гарэў агонь. Вядро вады, драўляная скрынка з харчам, яшчэ адна замест стала - і ўсё. Заходняе сонца прасвечвала ружовым скрозь сцены палаткі. Сэйры Ўілсан стаяла на каленях каля матраца, на якім расцягнуўся на спіне дзед. Яго шырока расплюшчаныя вочы глядзелі ўгору, на твары гарэў румянец. Ён цяжка дыхаў.
Кейсі ўзяў яго кашчавае запясце ў пальцы.
- Крышачку стаміўся, дзед? - сказаў ён.
Шырока расплюшчаныя вочы пакасіліся на голас і не знайшлі таго, хто гаварыў. Вусны заварушыліся, бязгучна вымаўляючы нейкія словы. Кейсі памацаў дзеду пульс, адпусціў яго руку і паклаў яму на лоб далонь. У целе старога ішло змаганне, ногі безупынна варушыліся, рукі не ведалі спакою. З вуснаў зрывалася неразборлівае мармытанне, шчокі пад белай шчэццю наліліся чырванню. Сэйры Ўілсан ціха запыталася ў Кейсі:
- Вы ведаеце, што з ім?
Кейсі глянуў на яе маршчыністы твар і агністыя вочы.
- А вы?
- Здаецца, ведаю.
- Што?
- Магчыма, я памыляюся. Не хочацца дарэмна гаварыць.
Кейсі азірнуўся на старога, у якога ўвесь час паторгваўся твар.
- Думаеце... можа... апаплексічны ўдар?
- Думаю, што так, - адказала Сэйры. - Мне тры ўжо разы даводзілася бачыць такое.
А звонку даносіліся гукі бівачнага жыцця - секлі сухое голле, бразгалі посудам. Маці ўсунула галаву між полкамі палаткі.
- Бабка хоча зайсці. Можа, ёй не варта?
Прапаведнік сказаў:
- Не пусціш, яна разнервуецца.
- Як ён - нічога?
Кейсі паволі пакруціў галавой. Маці кінула хуткі позірк на дзедаў наліты крывёю твар, які скажалі пакутлівыя грымасы. Яна адышла ад палаткі, і пачуўся яе голас:
- Яму лепш, бабка. Цяпер няхай крыху адпачне.
Але бабка зласліва сказала:
- А я ўсё роўна гляну. Ён хітры чорт. Ад яго праўды ніколі не дазнаешся, - і хуценька прашмыгнула ў палатку. Яна спынілася каля матраца і глянула ўніз на дзеда. - Што з табой? - Дзед зноў павёў вачамі на голас, і губы яго скурчыліся. - Гэта ён ад злосці, - сказала бабка. - Я ж гаварыла вам, ён хітры, як чорт. Раніцай надумаў уцячы, каб не ехаць. Але раптам бядро ў яго разбалелася, - з пагардай прамовіла бабка. - Гэта ён проста ад злосці. З ім і раней такое бывала, калі ён не захоча ні з кім размаўляць.
Кейсі далікатна сказаў:
- Гэта не ад злосці, бабка. Ён захварэў.
- А! - яна зноў глянула ўніз на старога. - Цяжка захварэў, ты думаеш?
- Вельмі цяжка, бабка.
На хвіліну яна завагалася.
- Ну дык чаго ты не молішся? - таропка загаварыла яна. - Ты прапаведнік ці не?
Моцныя пальцы Кейсі нерашуча пацягнуліся да дзедавага запясця і абхапілі яго.
- Я ўжо казаў табе, бабка. Не прапаведнік я.
- Усё роўна маліся, - загадала старая. -Ты справу гэту на памяць ведаеш.
- Не магу, - сказаў Кейсі. - Я не ведаю, за што маліцца і каму маліцца.
Бабка адвяла ад яго вочы і спыніла позірк на Сэйры.
- Ён не хоча маліцца, - сказала яна. - А я не гаварыла вам, як малілася Руці, калі была яшчэ зусім маленькая? «У пасцельцы спачываю, богу душу ўручаю. А туды як прыляціць, там буфет пусты стаіць, а бедны сабачка галодны сядзіць. Аман». Вось як яна малілася.
Па брызенце палаткі з сонечнага боку пасунуўся цень - нехта прайшоў міма.
А дзедава цела ўсё яшчэ змагалася, б'ючыся ў сутаргах. Раптам яно здрыганулася, быццам ад раптоўнага ўдару, і дзед заціх і перастаў дыхаць. Кейсі глянуў на твар старога і ўбачыў, што ён робіцца чарнавата-барвовы. Сэйры дакранулася да пляча прапаведніка:
- Язык, хутчэй язык!
Кейсі кіўнуў галавой.
- Засланіце яго ад бабкі, - сказаў ён ціха і разняў дзеду сцятыя сківіцы, прасунуў пальцы ў самае горла, каб дастаць язык. І калі ён адцягнуў яго, з горла вырваўся раскацісты хрып і дзед перарывіста ўздыхнуў, як усхліпнуў. Кейсі падабраў з зямлі тонкую палачку і прыціснуў ёю язык, услухоўваючыся ў вуркатлівае, няроўнае дыханне.
Бабка насілася па палатцы, як напалоханая курыца.
- Маліся! - патрабавала яна. - Маліся ж! Маліся, табе кажуць! - Сэйры дарэмна спрабавала яе суняць. - Маліся, каб цябе чорт! - закрычала бабка.
Кейсі глянуў на яе. Вуркатлівае дыханне рабілася ўсё гучнейшым і больш перарывістым.
- Ойча наш, які ёсць у небе, свяціся Імя Тваё...
- Слава! - выгукнула бабка.
- ...прыйдзі валадарства Тваё, будзь воля Твая... як у небе... так і на зямлі.
- Аман.
З адкрытага рота старога вырваўся сутаргавы ўсхліп і хрыплы працяглы выдых.
- Хлеба нашага штодзённага... дай нам сёння... і адпусці нам грахі нашы. - Дыхання не стала чуваць. Кейсі глядзеў на дзедавы вочы - яны былі ясныя, глыбокія, праніклівыя, у іх затаілася спакойная ўсёведнасць.
- Алілуя! - крыкнула бабка. - Гавары далей.
- Аман, - сказаў Кейсі.
Бабка маўчала. З таго боку палаткі панавала цішыня. Толькі па шашы прашумела коламі машына. Каля матраца Кейсі не падымаўся з кален. Звонку людзі ў напружаным маўчанні прыслухоўваліся да гукаў, што абвяшчалі смерць. Сэйры ўзяла бабку пад руку і вывела з палаткі. Старая ішла, поўная годнасці, з высока ўзнятай галавой. Яна ішла так напаказ усёй сям'і. Сэйры падвяла яе да матраца, што ляжаў на зямлі, і ўсадзіла яе. І бабка сядзела, пазіраючы проста перад сабой, сядзела горда, бо ведала, што ўсе позіркі скіраваны на яе. У палатцы было ціха. Нарэшце Кейсі рассунуў брызент і выйшаў.
Бацька ціха запытаўся:
- Што з ім было?
- Апаплексічны ўдар, - адказаў Кейсі. - Удар, і адразу канец.
А жыццё ішло па сваіх законах. Сонца дакранулася да лініі гарызонту і сплюшчылася. Доўгая калона вялікіх чырвоных грузавікоў паказалася на шашы. Машыны ішлі з грукатам, скаланаючы зямлю, а іх вертыкальныя выхлапныя трубы выплёўвалі сіні дым дызельнага паліва. У кабіне сядзеў толькі вадзіцель, яго зменны спаў на ложку, падвешаным пад самым верхам. Грузавікі грукаталі няспынна, пад іх цяжкім поступам увесь дзень і ўсю ноч дрыжэла зямля.
Сям'я з'ядналася ў адно цэлае. Бацька апусціўся на кукішкі, побач з ім прысеў дзядзька Джон. Галавой сям'і цяпер быў бацька. Ной, Том і Эл таксама селі на кукішкі, а прапаведнік апусціўся проста на зямлю і потым лёг, абапёршыся на локаць. Руці і Ўінфілд бадзёра прытупалі з вядром вады, але адразу адчулі нядобрае, запаволілі крок і, паставіўшы вядро на зямлю, ціха падышлі да маці.
Бабка сядзела горда, спакойна, пакуль уся сям'я не сабралася, пакуль на яе не перасталі глядзець, а тады лягла, закрыла твар сагнутай у локці рукой. Чырвонае сонца схавалася, і над зямлёй разлілося мігатлівае сутонне; твары людзей здаваліся зусім светлымі, а вочы паблісквалі, адлюстроўваючы вячэрняе неба. Вечар збіраў святло адусюль - дзе толькі мог.
Бацька сказаў:
- Гэта здарылася ў палатцы містэра Ўілсана.
Дзядзька Джон пацвярджальна кіўнуў галавой:
- Ён уступіў сваю палатку.
- Добрыя, сардэчныя людзі, - ціха прамовіў бацька.
Уілсан стаяў каля сваёй папсаванай машыны, а Сэйры сядзела каля бабкі на матрацы, стараючыся не дакранацца да яе.
Бацька паклікаў:
- Містэр Уілсан!
Уілсан няспешна падышоў да іх і апусціўся на кукішкі. Сэйры таксама падышла і стала каля яго.
Бацька сказаў:
- Мы вам вельмі ўдзячныя, людзі.
- Мы радыя, што хоць чым-небудзь змаглі памагчы вам, - адказаў Уілсан.
- Мы вельмі абавязаныя вам, - сказаў бацька.
- Перад тварам смерці не варта лічыцца, - прамовіў Уілсан, і Сэйры падхапіла:
- Не варта лічыцца.
Эл сказаў:
- Я адрамантую вам машыну... мы з Томам яе адрамантуем. - І Эл адчуў прыліў гордасці, што ён можа заплаціць доўг, які лёг на яго сям'ю.
- Ад дапамогі мы не адмовімся. - Уілсан прызнаў, што прымае такую плату.
- Трэба вырашыць, як нам быць далей, - сказаў бацька. - Ёсць закон: пра нябожчыкаў неабходна паведаміць уладам, а яны возьмуць сорак даляраў для гаспадара пахавальнага бюро або пахаваюць яго як жабрака.
- У нас у сям'і жабракоў ніколі не было, - умяшаўся дзядзька Джон.
Том сказаў:
- Можа, і не тое яшчэ будзе. З зямлі нас раней таксама ніколі не зганялі.
- Мы дрэннага нічога не рабілі, - сказаў бацька. - Нас няма чым папракнуць. Без грошай нічога не бралі, чужой ласкаю ніколі не карысталіся. Калі з Томам здарылася бяда, мы галаву трымалі высока. На яго месцы кожны так зрабіў бы.
- Дык што ж рабіць будзем? - запытаўся дзядзька Джон.
- Зробіш па закону, цела забяруць. У нас усяго паўтары сотні даляраў. Сорак пойдзе на пахаванне, і тады мы не даедзем да Каліфорніі. А не заплаціш, яго пахаваюць як жабрака.
Мужчыны заварушыліся і ўставілі вочы ў зямлю, што цямнела ў іх пад нагамі.
Бацька ціха сказаў:
- Дзед пахаваў свайго бацьку сам, сваімі рукамі, зрабіў усё, як належыць, і сам рыдлёўкаю зрабіў магільны насып. У тыя часы чалавек меў права легчы ў магілу, выкапаную яго сынам, а сын меў права пахаваць свайго бацьку.
- Цяпер законы ўжо не тыя, - сказаў дзядзька Джон.
- Часам цяжка прытрымлівацца закону, - сказаў бацька. - Асабліва калі хочаш, каб усё было па сумленні. Такіх выпадкаў хапае. Калі Флойд хаваўся, як дзікі звер, закон патрабаваў, каб мы выдалі яго, але ніхто не выдаў. Іншы раз даводзіцца абыходзіць закон. Вось я і кажу: я маю права пахаваць роднага бацьку. Хто-небудзь хоча што сказаць?
Прапаведнік прыўзняўся на локці.
- Законы мяняюцца, - сказаў ён, - а людскія патрэбы застаюцца. Ты маеш права рабіць тое, што табе трэба рабіць.
Бацька павярнуўся да дзядзькі Джона:
- Гэта і тваё права, Джон. Ты маеш што-небудзь супраць?
- Нічога, - адказаў дзядзька Джон. - Толькі атрымліваецца так, быццам мы хочам хаваць яго пад сховай начной цемры. Пры жыцці дзед рабіў усё адкрыта.
Крыху прысаромлены, бацька сказаў:
- Гэтак, як ён рабіў, нам цяпер нельга. Трэба даехаць да Каліфорніі, пакуль грошы яшчэ ёсць.
І Том уставіў сваё слова:
- Бываюць выпадкі, калі дзе-небудзь капаюць зямлю, знаходзяць нябожчыка і ўзнімаюць гвалт - забілі чалавека. Нашы ўлады цікавяцца мёртвымі больш, чым жывымі. Пачнуць дазнавацца, хто ён такі і як памёр. Я вось што прапаную: давайце пакладзём у бутэльку запіску і закапаем разам з ім. Там усё будзе сказана - хто ён, як памёр і чаго яго тут пахавалі.
Бацька ў знак згоды паківаў галавой.
- Правільна. Толькі трэба прыгажэй напісаць. І дзеду не так самотна будзе, калі з ім будзе яго імя, а то закапалі - і ляжы адзін, стары, пад зямлёй. У каго-небудзь ёсць яшчэ што сказаць?
Усе маўчалі.
Бацька павярнуўся да маці:
- Ты ўбярэш яго?
- Убяру, - адказала маці. - А хто вячэру згатуе?
- Я прыгатую вячэру, - сказала Сэйры Ўілсан. - Мы з вашай старэйшай дачкой усё зробім.
- Вялікі дзякуй. Ты, Ной, пайдзі дастань з якой бачуркі свініны. Яна як след яшчэ не прасалілася, але есці можна.
- А ў нас ёсць паўмяшка бульбы, - сказала Сэйры.
- Дай мне дзве манеты па паўдаляра, - папрасіла маці ў бацькі; той пакапаўся ў кішэні і падаў ёй срэбра.
Маці адшукала таз, наліла ў яго вады і панесла ў палатку. Там было амаль зусім цёмна. Сэйры ўвайшла следам, запаліла свечку, прыткнула яе на скрынку і пакінула маці адну. Маці паглядзела на нябожчыка, і ў яе сціснулася сэрца. Яна адарвала палоску ад свайго фартуха і падвязала дзеду ніжнюю сківіцу. Выпрастала яму ногі, склала рукі на грудзях. Потым апусціла яго павекі і паклала на іх па сярэбранай манеце, зашпіліла яму кашулю і абмыла твар.
Сэйры зазірнула ў палатку:
- Можа, чым дапамагчы?
Маці паволі падняла галаву.
- Зайдзіце, - сказала яна. - Хацела б з вамі пагаварыць.
- Старэйшая дачка ў вас упраўная, - сказала Сэйры. - Колькі ўжо бульбы абабрала! Дык кажыце, што трэба рабіць?
- Я хацела абмыць яго, ды вось няма ў што пераапрануць. А коўдра ваша цяпер сапсаваная. Мёртвы дух нічым з яе не вытравіш. Памятаю, у нас сабака панюхаў матрац, на якім памерла мая маці, і аж затросся і пачаў гыркаць, хоць два гады прайшло пасля яе смерці. Мы загорнем яго ў вашу коўдру, а вам аддадзім другую, у нас ёсць.
Сэйры сказала:
- Навошта вы так гаворыце. Мы памагаем вам ад шчырага сэрца. У мяне ўжо даўно не было... так спакойна на душы. У людзей ёсць такая патрэба - памагаць адзін аднаму.
Маці кіўнула галавой.
- Ёсць, - адказала яна і доўга глядзела на зарослы шчэццю стары твар з падвязанай сківіцай і сярэбранымі вачніцамі, якія паблісквалі пры святле свечкі. - Так ён сам на сябе не падобны, - сказала яна. - Трэба закруціць яго з галавой.
- Ваша старая добра трымалася.
- Яна зусім старэнькая. Магчыма, і не разумее толкам, што здарылася. І, можа, не хутка зразумее. Акрамя таго, гонар нам не дазваляе адчайвацца. Бывала, мой бацька казаў: «Зламацца кожны можа. А каб саўладаць з сабой, трэба быць чалавекам». У любых выпадках мы не паддаёмся адчаю. - Маці акуратна захутала ногі і плечы нябожчыка, закінула адзін ражок коўдры яму на галаву, як капюшон, і насунула на твар. Сэйры падала ёй некалькі вялікіх ангельскіх шпілек, і яна старанна і акуратна зашпіліла з усіх бакоў гэты доўгі пакунак. Нарэшце паднялася з кален. - Пахаванне будзе прыстойнае, - сказала яна. - З намі едзе прапаведнік, ён адпяе яго, і сям'я ўся ў зборы. - Яна пахіснулася. Сэйры падскочыла да яе, не дала ёй упасці. - На хаду засынаю... - сумелася маці. - Не, нічога, пройдзе. Перад ад'ездам нам шмат давялося пакруціцца.
- Выйдзем на паветра, - сказала Сэйры.
- Ага, я ўсё, што трэба, зрабіла.
Сэйры задзьмула свечку, і жанчыны выйшлі з палаткі.
На дне неглыбокага яра ярка гарэла вогнішча. Том убіў у зямлю калкі, падвесіў на дроце два кацялкі, і вада цяпер у іх бурна кіпела, з-пад накрывак выбівалася пара. Ружа Сарона стаяла на каленях крыху ўбаку ад гарачага полымя з доўгай лыжкай у руцэ. Убачыўшы, што маці выйшла з палаткі, яна паднялася і падышла да яе.
- Ма, - сказала яна, - хачу ў цябе пра нешта спытацца.
- Зноў спалохалася? - запыталася маці. - Дзевяць месяцаў без гора не пражывеш, даражэнькая.
- А дзіцяці не пашкодзіць?
Маці адказала:
- Ёсць такая прымаўка: «Дзіця, што ў смутку родзіцца, у жыцці са шчасцем водзіцца». Здаецца, так, місіс Уілсан?
- Чула такую, - адказала Сэйры. - А яшчэ я ведаю і другую: «У залішняй радасці радзіцца, увесь свой век смуціцца».
- У мяне ўсё ўсярэдзіне падскочыла ад страху, - сказала Ружа Сарона.
- Ад весялосці ў нас нічога не скача, - прамовіла маці. - Ты лепш глядзі кацялкі.
Мужчыны сабраліся на краі светлага круга ад вогнішча. З прылад у іх была рыдлёўка і матыка. Бацька адмераў месца для магілы - восем футаў у даўжыню і тры футы ў шырыню. Працавалі па чарзе. Бацька ўскопваў зямлю матыкай, а дзядзька Джон адкідаў яе ўбок рыдлёўкай. Потым крышыў зямлю Эл, а выграбаў Том. Тады крышыў Ной, выграбаў Коні. Работа ішла без перапынку, і магіла рабілася ўсё глыбейшай. Рыдлёўка за рыдлёўкай вылятала адтуль зямля. Стоячы па плечы ў прамавугольнай яме, Том запытаўся:
- На якую глыбіню капаць, та?
- Глыбей. Яшчэ футы на два. Ты вылазь, Том, пайдзі напішы тую запіску.
Том вылез, і яго месца заняў Ной. Том падышоў да маці, якая падтрымлівала агонь.
- У нас, ма, ёсць папера і пяро?
Маці пакруціла галавой:
- Н-не. Што іншае, а гэтага з сабой не ўзялі. - Яна глянула на Сэйры, і маленькая жанчына паспешліва пайшла ў палатку. Вярнулася яна з Бібліяй у руках і напалову спісаным алоўкам.
- Вось, - сказала яна. - Тут, у пачатку, ёсць чыстая старонка. Напішы на ёй і вырві. - Сэйры падала Біблію і аловак Тому.
Том сеў каля вогнішча. Ён засяроджана прыплюшчыў вочы і нарэшце няспешна вывеў буйнымі выразнымі літарамі на чыстай частцы старонкі: «Тут спачывае Ўільям Джэймс Джоўд, памёр ад удару зусім старым. Радня закапала яго тут, бо не было грошай на пахаванне. Яго ніхто не забіваў. З ім здарыўся ўдар, і ён памёр». - Том адняў аловак ад паперы. - Паслухай, ма, - сказаў Том і паволі прачытаў услых напісанае.
- Што ж, гучыць нядрэнна, - ухваліла маці. - А ты яшчэ што-небудзь і набожнае падабраў бы з Пісання. Пагартай Біблію, пашукай якое выслоўе.
- Трэба, каб карацей, - сказаў Том. - А то месца амаль не засталося.
Сэйры сказала:
- А што, калі напісаць: «Супакой, госпадзі, душу яго»?
- Не, - запярэчыў Том. - Атрымліваецца, быццам ён вісельнік. Я спішу што-небудзь адсюль. - Ён гартаў старонкі Бібліі і чытаў сам сабе, бязгучна варушачы губамі. - Ну вось, і добра, і коратка, - сказаў ён уголас. - «І Лот сказаў ім: не, Уладыка».
- Ніякага сэнсу, - сказала маці. - Калі ўжо пісаць, дык каб хоць сэнс які быў.
Сэйры параіла:
- Пагартай далей, там, дзе псалмы. З іх заўсёды ёсць што выбраць.
Том хутка перагортваў старонкі і прабягаў вачамі вершы.
- Ёсць! - нарэшце сказаў ён. - І прыгожа, і так і дыхае набожнасцю: «Шчаслівы той, каму адпушчаны беззаконні і чые грахі выкупленыя». Ну як?
- Сама раз, - сказала маці. - Спішы.
Том старанна перапісаў радок на паперу. Маці спаласнула і выцерла фруктовы слоік. Том шчыльна закруціў крышку.
- Можа, лепш было прапаведніку пісаць, - сказаў ён.
- Не, прапаведнік нам не сваяк, - сказала маці, узяла ў яго слоік і пайшла ў цёмную палатку. Там яна выцягнула некалькі шпілек з шарсцяной коўдры, усунула слоік пад халодныя тонкія рукі і зноў зашпіліла. Тады вярнулася да вогнішча.
Мужчыны адышлі ад ямы, твары ў іх блішчалі ад поту.
- Гатова, - сказаў бацька і разам з дзядзькам Джонам, Ноем і Элам зайшоў у палатку. Яны вынеслі адтуль доўгі, зашпілены з усіх бакоў скрутак і панеслі да магілы. Бацька скочыў уніз, пераняў цела і асцярожна апусціў на зямлю. Дзядзька Джон памог яму вылезці.
- А як быць з бабкай? - запытаўся бацька.
- Я зараз прывяду яе, - адказала маці, пайшла да матраца і нейкі час глядзела на старую. Потым вярнулася да магілы.
- Спіць, - сказала яна. - Можа, бабка і закрыўдуе на мяне, але я не буду яе будзіць. Ёй спакой патрэбен.
Бацька запытаўся:
- А прапаведнік дзе?
Том адказаў:
- Я бачыў, ён пайшоў па дарозе. Не хоча больш маліцца.
- Не хоча маліцца?
- Не. Ён больш не прапаведуе. Кажа, навошта ашукваць людзей і выдаваць сябе за прапаведніка, калі на самай справе я не прапаведнік. Б'юся аб заклад, што ён уцёк, каб мы не прасілі яго маліцца.
Кейсі, прыходу якога яны не заўважылі, чуў словы Тома.
- Нікуды я не ўцёк, - сказаў ён. - Я памагу вам, людзі, але ашукваць вас не буду.
Бацька сказаў:
- Можа, усё-ткі скажаш некалькі слоў? У нас у сям'і нікога яшчэ не хавалі без малітвы.
- Добра, скажу, - згадзіўся прапаведнік.
Коні вёў да дзедавай магілы Ружу Сарона, тая ішла неахвотна.
- Трэба, - угаворваў яе Коні. - Іначай непрыстойна. Гэта ж нядоўга.
Святло ад вогнішча падала на людзей, што акружылі магілу, азарала іх твары і вочы і меркла на цёмным адзенні. Мужчыны стаялі, зняўшы капелюшы. Языкі полымя ў вогнішчы скакалі, кідаючы трапятлівыя блікі на людзей.
Кейсі сказаў:
- Гаварыць буду коратка. - Ён схіліў галаву, і астатнія таксама схілілі галовы. Кейсі ўрачыста сказаў: - Стары, які тут ляжыць, пражыў жыццё і памёр. Я не ведаю, які ён быў чалавек, - добры ці дрэнны, але гэта няважна. Важна тое, што ён быў жывы. А цяпер памёр, і цяпер гэта таксама няважна. Я раз чуў, як адзін чытаў вершы, і там было сказана: «Усё жывое - святое». Я задумаўся і неўзабаве зразумеў, што ў словах у гэтых сэнсу больш, чым на першы погляд здаецца. І я не буду маліцца за гэтага старога, якога ўжо няма сярод жывых. З ім усё як мае быць. У яго ёсць адна мэта, і яна стаіць перад ім, да яе вядзе толькі адзін шлях. У нас таксама ёсць свая мэта, але ў нас сотні шляхоў да яе, і мы не ведаем, па якім пайсці. І калі б мне выпала памаліцца, я памаліўся б за тых, хто не ведае, на які шлях ступіць. У дзеда дарога прамая. А цяпер укрыйце яго зямлёй, і няхай ён робіць сваю справу. - Кейсі падняў галаву.
Бацька сказаў:
- Аман.
І астатнія прамармыталі хорам:
- Аман.
Бацька ўзяў рыдлёўку, набраў паўштыха зямлі і асцярожна скінуў у чорную яму. Тады перадаў рыдлёўку дзядзьку Джону, і той кінуў зямлі поўны штых. Рыдлёўка пераходзіла з рук у рукі, пакуль не абышла ўсіх мужчын. Калі ўсе яны выканалі свой абавязак і зрабілі тое, што ім належала зрабіць па праву, бацька накінуўся на кучу зямлі, што ляжала з краю, і пачаў таропка засыпаць магілу. Жанчыны адышлі да вогнішча гатаваць вячэру. Руці і Ўінфілд, як зачараваныя, стаялі каля магілы. Руці ўрачыста прамовіла:
- Цяпер дзед там, унізе, ляжыць.
Уінфілд спалохана вытрашчыў на яе вочы і пабег да вогнішча, там сеў на зямлю і заплакаў.
Бацька засыпаў магілу да паловы і спыніўся, цяжка пераводзячы дух, а рэшту зямлі скінуў дзядзька Джон. Калі Джон пачаў рабіць насып, Том затрымаў яго руку.
- Паслухай, - сказаў ён. - Калі магілка будзе з насыпам, яе як бачыш знойдуць. Трэба, каб не было прыкметна. Зраўняй з зямлёй, а зверху мы накідаем травы. Што зробіш, інакш нельга.
Бацька сказаў:
- Я пра гэта і не падумаў. Але без насыпу няможна.
- Нічога не зробіш, - сказаў Том. - Яго адразу адкапаюць, і нас абвінавацяць у парушэнні закону. Ты ведаеш, што мне будзе, калі я пераступлю закон.
- Правільна, - пагадзіўся бацька. - Я зусім забыўся. - Ён узяў у Джона рыдлёўку і зраўняў магілу. - Ледзь зіма, і праваліцца, - сказаў ён.
- Нічога не зробіш, - сказаў Том. - Да зімы мы будзем далёка. Утапчы добра, а зверху мы чаго-небудзь накідаем.
Калі свініна і бульба зварыліся, абедзве сям'і селі вячэраць вакол вогнішча. Усе елі моўчкі, пазіраючы на агонь. Уілсан запусціў зубы ў кавалак мяса і задаволена ўздыхнуў.
- Цудоўная свініна, - сказаў ён.
- У нас былі дзве свінкі, - паясніў бацька, - і мы вырашылі іх з'есці. За іх нічога не давалі. Вось крыху асвоімся з дарогай, маці спячэ хлеба, тады адно задавальненне - едзеш сабе, пазіраеш па баках, а ў грузавіку ў цябе яшчэ і дзве бачуркі свініны. Колькі часу вы ўжо ў дарозе?
Уілсан прачысціў языком зубы і глынуў.
- Нам не пашчасціла, - адказаў ён. - Трэці ўжо тыдзень, як мы паехалі з дому.
- Божа літасцівы! А мы мяркуем за дзесяць дзён дабрацца да Каліфорніі, а то і хутчэй.
У гутарку ўмяшаўся Эл:
- Не, та, наўрад ці. З такім грузам мы, можа, і ніколі не дабяромся. Асабліва калі давядзецца ехаць праз горы.
Вакол вогнішча запанавала цішыня. Галовы ва ўсіх апусціліся, і агонь асвятляў ім толькі валасы і лоб. Над невысокім купалам святла скупа паблісквалі летнія зоркі, дзённая спёка памалу спадала. На сваім матрацы, убаку ад вогнішча, ціха захныкала бабка, нібы шчанюк заскавытаў. Твары ўсіх павярнуліся ў той бок.
Маці сказала:
- Разашарна, будзь разумненькай, ідзі паляжы з бабкай. Яе цяпер нельга пакідаць адну. Яна ўжо ўсё зразумела.
Ружа Сарона паднялася на ногі, пайшла да матраца і лягла побач са старой, і да вогнішча данесліся няясныя гукі іх галасоў. Ружа Сарона і бабка перашэптваліся, лежачы на матрацы.
Ной сказаў:
- Дзіўна неяк - дзеда няма, а быццам нічога не здарылася. Смутку мне не прыбавілася.
- Гэта ўсё адно, - сказаў Кейсі. - Зямля ваша і дзед - адно непадзельнае.
Эл сказаў:
- Вельмі крыўдна за яго. Памятаеце, ён гаварыў, што там будзе рабіць, як ён вінаградныя гронкі аб галаву будзе расціскаць, каб усю бараду сокам заліло, і ўсякае такое.
Кейсі сказаў:
- Гэта ён так, дурыўся. Думаю, ён усё разумеў. Дзед ваш памёр не сёння. Ён памёр, як толькі вы яго з месца знялі.
- Ты гэта напэўна ведаеш? - усклікнуў бацька.
- Ну, не зусім так. Дыхаць ён дыхаў, але жыцця ў ім ужо не было. Дзед і зямля ваша - адно цэлае, і ён гэта разумеў.
Дзядзька Джон запытаўся:
- А ты ведаў, што ён памірае?
- Так, - адказаў Кейсі. - Ведаў.
Джон утаропіўся на прапаведніка, і ў вачах у яго рос жах.
- І нікому не сказаў?
- А якая карысць?
- Мы... мы зрабілі б што-небудзь.
- Што?
- Ну што-небудзь, але...
- Не, - сказаў Кейсі, - зрабіць вы не змаглі б нічога. Ваш шлях быў вызначаны, а дзеду з вамі было не па дарозе. Ён і не мучыўся. Хіба, можа, толькі раніцай, у першыя хвіліны. Ён астаўся з зямлёй. Не мог яе кінуць.
Дзядзька Джон глыбока ўздыхнуў.
Уілсан сказаў:
- А нам прыйшлося майго брата кінуць. - Усе павярнуліся да яго. - У нас з ім былі ўчасткі-саракоўкі побач. Ён старэйшы за мяне. Машыны ніхто з нас ніколі не вадзіў. І вось мы прадалі ўсё, што ў нас было. Уіл купіў сабе машыну, і да яго прыставілі нейкага падлетка - вучыць кіраваць. За дзень перад ад'ездам Уіл з цёткай Міні паехалі папрактыкавацца. Раптам перад Уілам калдобіна, ён як гаркне: «Тпру!» - і як дасць задні ход. Урэзаўся ў агароджу. Зноў крыкнуў: «Тпру, каб на цябе!» - тупнуў нагой па педалі газу і перакуліўся ў канаву. І застаўся ён ні з чым: ні на продаж нічога, ні машыны. Але ж, дзякуй богу, сам вінаваты. І так узлаваўся, з сябе аж выходзіць, з намі ехаць не захацеў - сядзіць, лаецца апошнімі словамі.
- Што ж ён будзе рабіць?
- Каб я ведаў. Чалавек зусім крануўся ад злосці. А нам чакаць няможна. У нас толькі восемдзесят даляраў на ўсю дарогу. Не сядзець жа нам і чакаць, пакуль і тыя разыдуцца. Але дарога ўжо амаль усе іх з'ела. Не праехалі і сотні міль, зуб у заднім мосце паляцеў, а рамонт абышоўся трыццаць даляраў. А там спатрэбілася пакрышка, і запальная свечка трэснула, а яшчэ Сэйры занядужала. Давялося прыпыніцца, вось ужо дзесяць дзён стаім. А цяпер машына, няхай яна спрахне, зноў паламалася, а грошай ужо - кот наплакаў. Проста не ведаю, калі мы дабяромся да гэтай Каліфорніі. Трэба рамантаваць, а я ў гэтым нічога не кемлю.
Эл дзелавіта запытаўся:
- Што з машынай?
- Ды проста ісці не хоча. Завядзецца, чхне разок - і заглухне. Праз момант зноў завядзецца, і перш чым паспееш тармазы адпусціць, зноў як мёртвая.
- Матор працуе хвіліну і глухне?
- Ага, так. Прыбаўлю газу, усё роўна не ідзе. Чым далей, тым усё горш, а вось цяпер зусім ужо не запускаецца.
Выгляд у Эла зрабіўся горды, па-даросламу салідны.
- Відаць, у яе бензаправод забіўся, - прамовіў ён. - Я прадзьму яго.
І бацька таксама заганарыўся:
- Эл у гэтых справах разбіраецца.
- Вось за дапамогу я скажу вам дзякуй. Вялікі дзякуй. Не ўмееш паправіць, проста дзіцём сябе адчуваеш. Калі дабяромся да Каліфорніі, куплю добрую машыну. Яна, можа, псавацца не будзе.
Бацька сказаў:
- Калі дабяромся... Не так і лёгка дабрацца туды.
- Затое Каліфорнія! - сказаў Уілсан. - Я бачыў лісткі - там патрэбны людзі на збор фруктаў, і заробкі добрыя. Толькі падумаць! Фрукты збіраеш у цяні дрэў, прыхваткамі ў рот пакладзеш што-небудзь. Ды там, чорт вазьмі, столькі гэтага дабра - хоць аб'ядайся, ніхто табе слова не скажа. А плаціць будуць добра, купім невялікі ўчастак і яшчэ падрабляць будзем на старане. Я ў заклад, чорт вазьмі, іду, што і двух гадоў не міне, як мы прыдбаем свой участак.
Бацька сказаў:
- Мы бачылі гэтыя лісткі. У мяне адзін нават з сабой ёсць. - Ён выняў кашалёк і дастаў з яго складзены папалам аранжавы рэкламны лісток. Чорныя літары гаварылі: «У Каліфорніі Патрабуюцца Зборшчыкі Гароху. Добрая Плата Круглы Год. Патрэбна 800 Чалавек».
Уілсан з цікавасцю паглядзеў на лісток.
- Ага, ага! Я бачыў такі самы. Акурат як той. А як вы думаеце... васемсот чалавек ужо, можа, набралася?
Бацька сказаў:
- Гэта ж толькі ў адной невялікай частцы Каліфорніі. А Каліфорнія ў нас другі па велічыні штат. Дапусцім, у адным месцы васемсот чалавек і набралася. А там шмат такіх месцаў. Мне ўсё роўна дзе фрукты збіраць. Вы ж самі сказалі, працаваць будзем у цяні дрэў. На такую работу і малыя з ахвотай пойдуць.
Раптам Эл падняўся і падышоў да легкавой машыны.
- Сёння ўжо не адрамантуеш, - сказаў Уілсан.
- Вядома. Заўтра з раніцы вазьмуся.
Том ва ўпор паглядзеў на свайго малодшага брата.
- Я таксама пра гэта падумаў, - сказаў ён.
- Пра што вы там, хлопцы? - запытаўся Ной.
Том з Элам маўчалі, чакаючы, што скажа другі.
- Кажы ты, - нарэшце прамовіў Эл.
- Ну, можа, з гэтага нічога не выйдзе, можа, Эл зусім пра іншае думае. А справа вось якая. У нас перагрузка, а містэр і місіс Уілсан едуць без цяжкага грузу. Калі хто-небудзь з нашых перасядзе да іх, а іхнія лягчэйшыя рэчы мы перакладзём на грузавік, тады ў нас і рысоры будуць цэлыя, і пад'ёмы нам не страшныя. Машынай мы з Элам абодва ўмеем кіраваць, значыць, хто-небудзь з нас павядзе легкавую. На дарозе будзем разам трымацца, і ад гэтага нам усім лепш будзе.
Уілсан ускочыў на ногі.
- Вядома, вядома! Мы будзем толькі радыя. Так і зробім. Ты чула, Сэйры?
- Проста цудоўна, - адказала Сэйры. - А мы не наробім вам лішніх турбот?
- Ну што вы, далібог! - сказаў бацька. - Якія турботы? Наадварот, вы нас выручыце.
Уілсан зноў сеў на зямлю, крыху сумеўшыся.
- Не ведаю, як быць.
- Што, раздумалі?
- Разумееце... У мяне ўсяго даляраў трыццаць засталося, і я не хацеў бы быць вам цяжарам.
Маці сказала:
- Вы і не будзеце нам цяжарам. Будзем дапамагаць адзін аднаму, і разам даедзем да Каліфорніі. Сэйры Ўілсан дапамагла мне прыбраць дзеда... - яна раптам змоўкла. Сувязь паміж тым і другім была ўсім зразумелая.
Загаварыў Эл:
- У легкавую свабодна сядзе шэсць чалавек. Скажам, так: я за рулём, місіс і містэр Уілсаны, Разашарна з Коні і бабка. Вялікія рэчы, лягчэйшыя, перакладзём на грузавік. У дарозе будзем мяняцца месцамі. - Ён гаварыў голасна, радуючыся, што з плячэй зваліўся такі клопат.
Астатнія бянтэжліва ўсміхаліся, апусціўшы вочы долу. Бацька правёў кончыкамі пальцаў па пыле. Сказаў:
- Маці наша марыць пра беленькі домік сярод апельсінавых дрэў. Яна бачыла вялікі такі малюнак у календары.
Сэйры сказала:
- Калі я зноў расхварэюся, вы нас не чакайце, едзьце адны. Мы не хочам быць вам цяжарам.
Маці пільна паглядзела на яе і быццам упершыню ўбачыла яе пакутніцкія вочы і змарнелы, змучаны болем твар. І сказала:
- Нічога, даедзеце, мы пра вас паклапоцімся. Вы ж самі сказалі: ад дапамогі нельга адмаўляцца.
Сэйры глянула на свае маршчыністыя рукі, асветленыя агнём вогнішча.
- Трэба класціся спаць. - Яна ўстала.
- А дзед... як быццам ужо год, як ён памёр, - прамовіла маці.
Абедзве сям'і няспешна разышліся класціся спаць, смачна пазяхаючы. Маці спаласнула талеркі і сцерла з іх тлушч мяшком з-пад мукі. Агонь у вогнішчы патух, зоркі нібы апусціліся ніжэй. Легкавыя аўтамашыны толькі зрэдку прабягалі цяпер па шашы, але грузавікі час ад часу з грукатам праносіліся міма, ажно дрыжэла зямля. Абедзве машыны, якія стаялі ў лагчынцы каля дарогі, ледзь віднеліся пры святле зорак. Каля заправачнай станцыі выў прывязаны нанач сабака. Людзі ўгаманіліся і ціха спалі, і асмялелыя палявыя мышы снавалі каля матрацаў. Адна Сэйры Ўілсан не спала. Яна глядзела ў неба і стойка змагалася з болем.
Заходнюю тэрыторыю апанаваў неспакой - набліжаюцца перамены. Заходнія штаты затрывожыліся, як коні перад навальніцай. Буйныя ўласнікі занепакоіліся, чуюць: будуць перамены, толькі не ведаюць - якія. Буйныя ўласнікі б'юць па непасрэднай пагрозе: па пашыраным складзе ўрада, па ўсё мацнейшым адзінстве рабочага руху; б'юць па новых падатках, па новых эканамічных планах - не разумеюць, што ўсё гэта вынікі, а не прычыны. Вынікі, а не прычыны. Не прычыны, а вынікі. А прычыны караняцца глыбока, хоць яны і зусім простыя. Прычыны - гэта фізічны голад, памножаны ў мільён разоў; гэта духоўны голад - імкненне да шчасця, да пачуцця ўпэўненасці ў заўтрашнім дні, памножанае ў мільён разоў; гэта імкненне мускулаў і мозгу да росту, да працы, да творчасці, памножанае ў мільён разоў. Канчатковая, ясная функцыя чалавека - працаваць сваімі мускуламі, ствараць сваім мозгам, і не толькі на карысць аднаму сабе - гэта і ёсць чалавек. Пабудаваць сцяну, пабудаваць дом, пабудаваць плаціну, укласці часцінку свайго чалавечага «я» ў гэту сцяну, у гэты дом, у гэту плаціну і ўзяць і сабе што-небудзь ад іх - ад гэтай сцяны, ад гэтага дома, ад гэтай плаціны; умацаваць мускулы цяжкай працай, прылучыцца да яснасці ліній і форм сваіх здзейсненых задум. Бо чалавек - адзінае стварэнне ва ўсім арганічным і неарганічным жыцці прыроды, адзіны аб'ект у сусвеце, які перасягае створанае ім, узнімаецца па прыступках сваіх задум, вырываецца наперад, пакідаючы ззаду ўжо дасягнутае. І вось што трэба сказаць пра чалавека: калі тэорыі мяняюцца ці рушацца, калі філасофскія школы і вучэнні, вузкія завулкі думкі - нацыянальныя, рэлігійныя, эканамічныя - узнікаюць, а потым рассыпаюцца прахам, чалавек, хоць і спатыкаючыся, атрымліваючы жорсткія ўдары, памыляючыся, ідзе наперад і нечага дасягае. Зрабіўшы крок наперад, ён можа адступіць, але толькі на паўкроку і ніколі не зробіць поўнага кроку назад. Вось што можна сказаць, і гэта трэба добра разумець. Гэта трэба разумець, калі з чорных самалётаў падаюць бомбы на людныя рынкі, калі палонных забіваюць, як свіней, калі скалечаныя целы сплываюць крывёю ў гразі і пыле. І вось яшчэ што: калі спыніцца, калі б памерла вострае да болю жаданне ісці наперад, што б там ні было, бомбы не падалі б, глоткі не рэзалі б. Пакуль будуць жывыя ўладальнікі бомбаў, гэты смертаносны груз будзе падаць на моцных духам, і бойся таго часу, калі дух гэты памрэ; пакуль жывуць буйныя ўласнікі, удары будуць сыпацца на тых, хто робіць крок наперад - бойся таго часу, калі памрэ імкненне ісці наперад. Бойся таго часу, калі чалавечае «я» не будзе гатова ісці на пакуты і смерць за ідэю, бо гатоўнасць гэтая - асновы чалавечага «я», адзінае, што робіць чалавека чалавекам.
Заходнія штаты апанаваў неспакой - блізяцца нейкія перамены. Тэхас і Аклахома, Канзас і Арканзас, Нью-Мексіка, Арызона, Каліфорнія... Вось адна сям'я пакідае свой участак. Некалі бацька ўзяў пазыку ў банку, і цяпер банк наважыў авалодаць яго зямлёй. Зямельная кампанія, гэта значыць банк, які валодае зямлёй, хоча, каб на гэтай зямлі працавалі трактары, а не людзі. А хіба трактар - дрэнна? Хіба ў сіле, якая праразае доўгія барозны ў зямлі, ёсць што-небудзь нядобрае? Калі б гэты трактар належаў нам, тады было б добра - не мне, а нам. Калі б нашы трактары праводзілі доўгія барозны па нашай зямлі, тады было б добра. Не па маёй зямлі, а па нашай. Мы любілі б гэты трактар, як любілі гэту зямлю, калі яна была наша. Але трактар робіць адразу дзве справы: узорвае зямлю і выворвае з яе нас. Паміж трактарам і танкам розніцы мала. І той, і другі гоняць перад сабой людзей, апанаваных страхам і роспаччу. Тут ёсць над чым задумацца.
З зямлі сагналі аднаго чалавека, адну сям'ю - вось яго ржавая машына паўзе па шашы на Захад. Я страціў зямлю, маёй зямлёй авалодаў трактар. Я адзін і не ведаю, што рабіць. Адна сям'я спыняецца на начлег каля прыдарожнай канавы, ставіць палатку; да яе пад'язджае яшчэ адна сям'я і таксама ставіць палатку. Двое мужчын прысаджваюцца на кукішкі, а жанчыны з дзецьмі стаяць каля іх і слухаюць. Гэта і ёсць завязка, разумееце, вы - тыя, хто ненавідзіць перамены і баіцца рэвалюцыі? Раз'яднайце гэтых двух мужчын, пасейце ў іх сэрцах нянавісць, боязь адзін аднаго, недавер адзін да аднаго. Бо гэта зачатак таго, што наганяе на вас страх. Зародак. Таму што ў выказванне: «Я страціў зямлю» ўносіцца папраўка: «Мы страцілі нашу зямлю». Вось дзе тоіцца небяспека для вас, бо два чалавекі ўжо не такія адзінокія і разгубленыя, як адзін. А з гэтага «мы» ўзнікае нешта яшчэ больш небяспечнае: «У мяне ёсць крыху ежы» плюс «У мяне зусім нічога няма». І калі ў суме атрымліваецца: «У нас ёсць крыху ежы», значыць, усё ўвайшло ў сваю каляіну і рух набыў накіраванасць. Цяпер засталося зрабіць нескладанае памнажэнне, і зямля гэтая, гэты трактар - нашы. Двое мужчын сядзяць на кукішках у дрэнажнай канаве, маленькае вогнішча, у кацялку варыцца мяса, маўклівыя жанчыны з застылым позіркам, ззаду - дзеці прагна ўслухоўваюцца ў незразумелую гутарку. Набліжаецца ноч. У малога прастуда. Вось, вазьміце коўдру. Яна шарсцяная - яшчэ ад маці засталася. Вазьміце, накрыйце дзіця. Вось што ім трэба бамбіць. Бо тут пачынаецца пераход ад «я» да «мы».
Калі б вам, тым, хто залодае ўсім, што патрэбна людзям, удалося зразумець гэта, вы змаглі б утрымацца на паверхні. Калі б вам удалося аддзяліць прычыны ад вынікаў, зразумець, што Пэйн, Маркс, Джэферсан, Ленін былі вынікам, а не прычынай, вы ўцалелі б. Але дзе вам зразумець: уласніцтва, як марозам, скоўвае ваша «я» і назаўсёды адгароджвае яго ад «мы».
Заходнія штаты ў трывозе - набліжаюцца перамены. Патрэба нараджае ідэю, ідэя - дзеянне. Паўмільёна людзей рухаюцца па дарогах; яшчэ адзін мільён, больш упартых, таксама гатовы ў любую хвіліну зняцца з месца; дзесяць мільёнаў яшчэ толькі пачынаюць нервавацца.
А трактары праводзяць баразну за баразной па абязлюдзелай зямлі.
Уздоўж шашы № 66 стаяць прыдарожныя бары: «Дом Эла і Сузі», «Снеданне ў Карла», «Джо і Міні», «Закусачная Ўіла». Халупкі з лямцавай пракладкай між дошак. Дзве бензінавыя калонкі каля ўвахода, дзверы з драцяной сеткай, доўгая стойка, высокія табурэты, рэйка для ног. Каля дзвярэй тры гульнёвыя аўтаматы, праз шкло відаць, якое багацце ў пяціцэнтавых манетах можна выйграць за тры жэтоны. А побач з імі патэфон, які іграе за пяціцэнтавік, і наваленыя горкай, як бліны, пласцінкі, гатовыя ў любы момант слізгануць на дыск, і тады загучыць танцавальная музыка - факстроты «Ці-пі-ці-пі-цін», «Дзякуй за памяць», шлягеры Бінга Кросбі, джаз Бені Гудмэна. На адным канцы стойкі пад шкляным каўпаком - дражэ ад кашлю, серна-кафеінавыя таблеткі пад назвай «Бяссонныя», «Не драмаць»; цукеркі, цыгарэты, лёзы для брытваў, аспірын, белыя шарыкі «Брома-Сельтэр» і «Алька-Сельтэр» для шыпучкі. На сценах плакаты: купальшчыцы - пышнагрудыя, вузкабёдрыя бландзінкі з васковымі тварамі, у белых купальніках, з бутэлькай кока-колы ў руках, усміхаюцца: вось што абяцае вам кока-кола. Стойка доўгая, на ёй сальніцы, перачніцы, гарчычніцы і папяровыя сурвэткі. За стойкай піўныя краны, а каля самай сцяны бліскучыя, ахутаныя парай кававаркі з зашклёнымі акенцамі, якія паказваюць узровень вады. Тарты пад драцянымі накрыўкамі, апельсіны пірамідамі па чатыры штукі. Невысокія слупкі кардонак з крэкерамі і кукурузнымі шматкамі - раскладзены ўзорам.
Надпісы на картках меню з вялікімі бліскучымі літарамі са слюды: «Такія пірагі пякла твая мама». «Крэдыт вядзе да сваркі, лепш застанемся сябрамі». «Дамам можна курыць, толькі акуркі глядзіце, куды кладзяце». «Абедайце ў нас, шкадуйце сваю жоначку».
На другім канцы стойкі - сталовы посуд, бляхі з запечаным мясам, бульбай, тушаным мясам, смажанай ялавічынай, шэрай бужанінай - засталося толькі скрылікамі нарэзаць.
Міні, ці Сузі, ці Мэй старыцца за стойкай - валасы завітыя, на спацелым твары пудра і румяны. Бярэ заказы, размаўляе з кліентам ціха, мякка, повару заказы паўтарае скрыпучым, як у паўліна, голасам. Выцірае стойку анучай кругамі, начышчае вялікія бліскучыя кававаркі. Повару - Джо, ці Карлу, ці Элу - горача ў белым кіцелі і фартуху: на белым ілбе пад белым каўпаком пацеркі поту; ён пахмурны, гаворыць мала, мяльком паглядае на новых наведнікаў. Націрае патэльню, шлёпае на яе катлету ў цесце. Ціха паўтарае за Мэй заказы, скрабе патэльню, працірае джутавай анучкай. Пануры, маўклівы.
Мэй ажыццяўляе сувязь з наведнікамі, усміхаецца ім, а сама ледзь стрымлівае раздражненне; усміхаецца, а вочы глядзяць міма, калі госць не вадзіцель грузавіка. Шафёры - касцяк усяго. Там, дзе спыняюцца шафёры, там кліенты. Іх не абдурыш, яны разбіраюцца, што да чаго. Шафёры - гэта заказы. Яшчэ ого як разбіраюцца! Паспрабуйце падаць ім спітую каву, і больш нагі іхняй у вас не будзе. А абслужыце як след, яны зноў наведаюцца. Вадзіцеляў грузавікоў Мэй сустракае шырокай усмешкай. Крыху выгнуўшы стан, папраўляе на патыліцы валасы, і ўслед за рукамі крыху падымаюцца пад сукенкай угору і грудзі; ветла вітае гасцей, быццам абяцаючы вясёлае баўленне часу, вясёлую гутарку, вясёлыя досціпы. Эл ніколі ні з кім з наведнікаў не загаворвае. Не кантактуе з імі. Бывае, адкажа ўсмешкай на анекдот, а смяяцца, не, не смяецца. Часам гляне на Мэй, пачуўшы гуллівыя ноткі ў яе голасе, і зноў скрабе патэльню лапаткай, перакладзе застылы тлушч у латочак каля пліты. Ён прыціскае лапаткай катлету, яна шыпіць. Кладзе на патэльню разрэзаную напалам булачку, падаграе, падсмажвае. Зграбае з патэльні колцы цыбулі, кладзе на фарш, прыціскае лапаткай, накрывае паловай булачкі, другую палову змазвае растопленым маслам і вострай прыправай. Прытрымліваючы пакладзеную на катлету паўбулачкі, падчэплівае лапаткай тонкую катлетку, пераварочвае яе, накрывае другой паловай і скідае на маленькую талерку. Туды ж кладзе чвэртку марынаванага агурка і дзве чорныя масліны. Пускае талерку па стойцы, як кідальнае кальцо. Тады зноў скрабе патэльню і панура пазірае на жароўню з тушаным мясам.
Легкавыя машыны імкліва праносяцца па шашы № 66. Нумарныя знакі з Масачусетса, з Тэнесі, Род-Айленда, з Нью-Ёрка, Верманта, Агаё. Кіруюць на захад. Шыкоўныя машыны, хуткасць - шэсцьдзесят пяць міль у гадзіну.
Вунь «корд» ідзе. Труна на колах.
Але ж, глянь, які ход! Бачыш «ласаль»? Мне б такую. Я не з ганарлівых. Узяў бы і «ласаль».
Калі ты ўжо так разышоўся, дык чаму б не «кадзілак»? Ён трохі большы і хутчэйшы.
А сабе я выбраў бы «зефір». Не такі ўжо і шык, затое клас, хуткасць! Мне дай «зефір».
І ўсё ж, сэр, можаце смяяцца, толькі я стаю за «б'юік-п'юік». Даволі добрая машына.
Дык яна ж, халера, цаной, як «зефір», а цягне слабавата.
Ну і няхай. Мне ад гэтага Генры Форда нічога не трэба. Не люблю я Форда. Ніколі не любіў. У мяне брат працаваў у яго на заводзе. Ты б толькі паслухаў, што ён расказваў.
І ўсё-такі «зефір» - сіла!
На шашы вялікія легкавыя аўтамашыны. Стомлена-пяшчотныя, разамлелыя ад гарачыні дамы, вакол іх, як вакол цэнтра прыцяжэння, круціцца безліч аб'ектаў: крэмы, ласьёны, бутэлечкі з фарбамі - чорнай, ружовай, чырвонай, белай, зялёнай, сярэбранай, з іх дапамогай мяняецца колер валасоў, вачэй, губ, пазногцяў, броваў, веек, павек. Рознае семя, алеі, пілюлі - каб добра працаваў страўнік. Сумка з бутэлечкамі, спрынцоўкамі, таблеткамі, прысыпкамі, растворамі, мазямі - каб унікнуць усякай рызыкі пры інтымных зносінах, зняць пахі, засцерагчыся ад нежаданых вынікаў. А яшчэ адзенне... Адна марока!
Маршчынкі стомы вакол вачэй, складкі раздражнення па кутках рота, грузныя грудзі ў цесных ячэйках бюстгальтараў, тугія жываты і клубы пад гумавымі гарсэтамі. Цяжка ловяць спякотнае паветра раты, у пахмурных вачах нялюбасць да сонца, ветру, да зямлі, агіда да ежы, злосць на знямогу, нянавісць да самога часу, які рэдка калі маладзіць, а старыць - заўсёды.
Побач з жанчынамі кароткія пузатыя мужчыны ў светлых касцюмах і панамах - чысценькія ружовыя мужчыны з неспакойнымі, разгубленымі вачамі, поўнымі трывогі. Ім неспакойна таму, што не працуюць прывычныя формулы: яны прагнуць бяспекі, але адчуваюць, што яна знікае з твару зямлі. На лацканах пінжакоў у іх значкі розных суполак і клубаў - тых месцаў, куды можна пайсці і ў натоўпе такіх жа занепакоеных чалавечкаў пераканаць сябе, што камерцыя - занятак высакародны, а не асвячонае рытуалам зладзейства; што яны шчодрыя і дабрачынныя, часта нават сабе ў шкоду, насуперак прынцыпам камерцыі; што жыццё ў іх паўнацэннае, а не ўбогая і стомная руціна; і што блізкі ўжо той час, калі нічога ім не будзе страшна.
Гэта сямейная пара таксама едзе ў Каліфорнію; там, у холе галівудскага гатэля «Беверлі Ўілтмар» яны з зайздрасцю будуць глядзець на людзей, будуць пазіраць на горы - вы разумееце, на горы! - і на высокія дрэвы, ён з ранейшым неспакоем у вачах, а яна - з апаскай, каб сонца не апаліла скуру. Будуць пазіраць на Ціхі акіян, і стаўлю сто тысяч супраць нічога, што ён скажа: «Я думаў, ён большы». А яна будзе кідаць зайздрослівыя позіркі на круглявыя маладыя дзявочыя целы на пляжы. Яны едуць у Каліфорнію толькі дзеля таго, каб потым, вярнуўшыся дамоў, сказаць: «Такая вось і такая сядзела ў Тракадэра побач з намі, за суседнім столікам. Ну і страшыдла! Але апранаецца з густам». А ён скажа: «Я там гутарыў з саліднымі дзелавымі людзьмі. Яны лічаць, што пакуль мы не збавімся ад гэтага тыпа ў Белым доме, дабра не чакай». І яшчэ: «Ад аднаго дасведчанага чалавека я чуў, што ў яе сіфіліс. Яна здымалася ў фільмах братоў Уорнераў. Кажуць, спала з кім папала, абы ролю атрымаць. Што ж, знайшла, чаго шукала». Але ўстрывожаныя вочы ўсё роўна не ведаюць спакою, надзьмутыя губы не ведаюць радасці. Вялікая легкавая машына імчыцца з хуткасцю шэсцьдзесят міль у гадзіну.
Я выпіла б чаго-небудзь халодненькага.
Вунь наперадзе нешта віднеецца. Спыніцца?
Думаеш, у іх чыста?
Не брудней, чым дзе ў іншым месцы ў гэтым богам забытым краі.
Ну, бутэльку содавай, я думаю, можна.
Вялікая машына скрыгоча тармазамі і спыняецца. Неспакойны таўстун дапамагае жонцы вылезці з кабіны.
Калі яны ўваходзяць, Мэй глядзіць спярша на іх, потым паўз іх. Эл на імгненне адрывае вочы ад пліты. Мэй ведае, што будзе далей. Яны вып'юць бутэльку содавай за пяць цэнтаў і бурчліва паскардзяцца, што вада цеплаватая. Жанчына скамечыць шэсць папяровых сурвэтак і кіне на падлогу. Мужчына папярхнецца і зваліць віну на Мэй. Жанчына пачне прынюхвацца, быццам пачула пах тухлага мяса, а пасля яны пойдуць і да канца сваіх дзён будуць усім гаварыць, што народ на Захадзе няветлы. А Мэй, зноў застаўшыся адна з Элам, падбярэ ім адпаведнае слоўца - абзаве іх задрыпамі.
Вадзіцелі грузавікоў - гэта людзі!
- Вось едзе вялікі грузавы фургон. Добра было б, каб яны тут спыніліся - адаб'юць пах гэтых смярдзючак. Калі я працавала ў вялікім гатэлі ў Альбукерку - як яны кралі, Эл! Бралі ўсё, што дрэнна ляжыць. І чым больш шыкоўныя ў іх машыны, тым яны болей крадуць - ручнікі, сталовае срэбра, мыльніцы. Проста розуму не дабяру - навошта.
А Эл змрочна:
- А як, па-твойму, адкуль у іх такія машыны і гэтулькі дабра? Што, можа, нарадзіліся з усім гэтым? А ў цябе ніколі нічога не будзе.
Вялікі грузавік, шафёр і зменны.
- Можа, спынімся тут, кавы вып'ем. Забягалаўку гэту я ведаю.
- А як у нас з графікам?
- Ідзём з апярэджаннем.
- Тады пад'язджай. Тут ёсць баявая кабылка з перчыкам. І кава добрая.
Машына спыняецца. Двое шафёраў у брыджах колеру хакі, у высокіх шнураваных чаравіках, кароткіх куртках і вайсковых фуражках з бліскучымі брылямі. Дзверы з сеткай - бразь!
- Здарова, Мэй!
- Няўжо гэта ты, Вялікі Біл Пацук? Даўно перавялі зноў на гэты маршрут?
- Тыдзень таму.
Яго напарнік кідае пяціцэнтавік у адтуліну прайгравальніка, глядзіць, як выслізгвае пласцінка і кладзецца на дыск. Голас Бінга Кросбі - чыстае золата. «Зноў залаціцца пляж, і хвалі плешчуць глуха... Ты - у скронях боль, але не скруха...» А Вялікі Біл напявае на вушка Мэй: «Ты ў скрынях соль, але не шлюха...»
Мэй смяецца.
- А хто гэта з табой, Біл? Ён першы раз на гэтым маршруце?
Напарнік Біла апускае пяць цэнтаў у аўтамат, выйграе чатыры жэтоны і зноў кідае іх у шчыліну. Падыходзіць да стойкі.
- Што ж вам падаць? - пытаецца Мэй.
- Ну, па кубку кавы. А тарты якія?
- З бананавым крэмам, з ананасным крэмам, шакаладны, ну і яблычны.
- Давай яблычны... Чакай... а вунь той, вялікі і пышны, з чым?
Мэй падымае торт, нюхае.
- Бананавы.
- Адрэж кавалак, ды не шкадуй.
Шафёр, што каля аўтамата, кажа:
- Рэж два.
- Наце вам два. Што-небудзь такое новенькае чуў, Біл?
- Ага, вось паслухай.
- Ты пры даме не вельмі...
- Ды тут нічога такога. Вучань спазніўся ў школу. Настаўніца пытаецца: «Чаму спазніўся?» Хлопчык адказвае: «Я вадзіў цялушку да быка». Настаўніца кажа: «Няўжо твой бацька сам не мог справіцца?» А малы ёй: «Вядома ж, мог, толькі дзе яму цягацца з быком».
Мэй вішчыць ад смеху, ледзь не хрыпне. Эл акуратна рэжа цыбулю, узнімае на іх позірк, усміхаецца і зноў апускае вочы. Вадзіцелі грузавікоў - гэта людзі! Кожны з іх пакіне Мэй па чвэрці даляра. Пятнаццаць цэнтаў за торт і каву і дзесяць - «чаявыя». І не чапляюцца да яе.
Сядзяць на высокіх табурэтах, п'юць каву, з кубкаў вытыркаюцца лыжачкі. Гутараць пра свае справы. Эл скрабе патэльню, слухае, але заўваг не робіць ніякіх. Бінг Кросбі раптам змаўкае. Дыск апускаецца, і пласцінка зноў займае сваё месца сярод іншых пласцінак. Ліловае святло гасне. Пяціцэнтавік, што прывёў увесь гэты механізм у дзеянне, прымусіў Кросбі спяваць, а аркестр яму акампанаваць, саслізгвае з кантактаў і падае ў манетнік. Манета гэтая, у адрозненне ад мноства іншых, сапраўды папрацавала, вымусіла аўтамат падпарадкавацца сабе.
З клапана кававаркі выбіваецца пара. Кампрэсар халадзільніка пачынае ціха гусці, потым сціхае. Электрычны вентылятар у куце паволі паварочваецца з боку ў бок, абвяваючы пакой цёплым ветрыкам. Па шашы № 66 з шумам праносяцца аўтамашыны.
- У нас незадоўга перад вамі машына з Масачусетса спынялася, - сказала Мэй.
Вялікі Біл абхапіў кубак зверху далонню так, што лыжачка тырчыць у яго паміж вялікім і ўказальным пальцамі. Ён шумна ўцягнуў у рот каву разам з паветрам, каб астудзіць яе.
- Паездзіла б ты цяпер па шэсцьдзесят шостай. Машыны з усёй краіны. Усе на Захад ідуць. Раней ніколі гэтулькі машын не бачыў. Сярод іх такія трапляюцца прыгажуні!
- Сёння раніцай мы бачылі аварыю, - сказаў яго зменны. - Вялікая машына - «кадзілак», зроблены, відаць, па спецыяльным заказе, прыгожы такі. Нізкая пасадка, крэмавы колер. На грузавік наляцеў. Радыятар умяла проста ў вадзіцеля. Гнаў пад дзевяноста міль. Рулявой калонкай наскрозь прапарола, курчыўся, як жаба на круку. Была шык, а не машына, адна любата. А цяпер што - хоць задарма бяры. Адзін ехаў, без нікога.
Эл падымае вочы ад пліты:
- А з грузавіком што?
- Божа мой, які там грузавік! Проста машына з адрэзаным верхам, набітая ўсялякім кухонным начыннем - пліта, рондалі, а яшчэ матрацы, дзеці, куры. Ну ведаеце ж - на Захад едуць. «Кадзілак» прамчаўся паўз нас з хуткасцю мо дзевяноста міль, - абагнуў на двух колах, а насустрач машына. Ён - убок, а тут грузавічок гэты. Урэзаўся ў яго на ўсім хаду. Вадзіцель п'яны быў, ці што. Коўдры, куры, дзеці - усё ўзляцела ў паветра. Аднаго малога забіла, проста раздушыла. Жудаснае відовішча. Мы пад'ехалі. Чалавек, што вёў грузавік, стаіць як укапаны, пазірае на сынка мёртвага. Ні слова з яго не выцягнулі. Маўчыць, як знямеў. Мноства людзей на шашы - цэлымі сем'ямі на Захад едуць. І з кожным днём іх усё больш і больш. Адкуль яны толькі бяруцца?
- Лепш спытайцеся - куды едуць? - сказала Мэй. - Бывае, заязджаюць да нас па бензін і, акрамя яго, нічога не купляюць. Кажуць, яны на руку не чыстыя. Але ў нас нідзе нічога лішняга не валяецца. Нас не абкрадалі.
Жуючы на поўны рот торт, Вялікі Біл глянуў праз зацягнутае сеткай акно на шашу.
- Ну вось, прывязвай сваё дабро мацней. Здаецца, едуць сюды.
З шашы стомлена збочыў «нэш» выпуску 1926 года. Задняе сядзенне ў яго было высока завалена мяхамі, рондалямі і патэльнямі, а на самым версе, амаль упіраючыся макаўкамі ў дах, сядзелі два хлопчыкі. На даху ляжалі прывязаныя да яго матрац і палатка, слупкі ад яе былі прымацаваны да падножкі. Машына пад'ехала да бензінавых помпаў і спынілася. З кабіны вылез цёмнавалосы чалавек з вострым скуластым і насатым тварам. Абодва малыя ссунуліся з паклажы на зямлю.
Мэй абагнула стойку і стала ў дзвярах. На чалавеку былі шэрыя шарсцяныя штаны і сіняя кашуля, пацямнелая ад поту на спіне і пад пахамі. На хлопчыках - камбінезоны на голае цела, патрапаныя, залатаныя. Валасы ў малых былі светлыя, стрыжаныя «пад вожык» і тырчалі, як шчаціна. Твары ў брудных плямах. Дзеці адразу пабеглі да лужыны пад водаправодным шлангам і засунулі пальцы босых ног у гразь.
Чалавек запытаўся:
- У вас можна вады ўзяць, мэм?
Цень нездавальнення мільгануў на твары Мэй.
- Пэўна ж, налівайце, - адказала яна і ціха кінула цераз плячо: - Я пасачу за шлангам. - Яна глядзела, як чалавек няспешна адкручваў каўпачок радыятара і ўсунуў у адтуліну наканечнік шланга.
Бялявая жанчына, што сядзела ў кабіне, сказала:
- Спытайся, можа, тут дадуць.
Чалавек выняў шланг з радыятара і прыкруціў каўпачок. Хлопчыкі ўзялі з рук бацькі шланг, павярнулі яго наканечнікам угору і пачалі прагна піць. Чалавек зняў з галавы цёмны запэцканы капялюш, падышоў да драцяных дзвярэй бара і стаў перад імі з нейкім дзіўным, прыніжаным выглядам.
- Ці не прадасце нам буханку хлеба, мэм?
Мэй адказала:
- Тут не бакалейная крама. Хлеб у нас ідзе на сандвічы.
- Ведаю, мэм. - У яго прыніжанасці адчувалася ўпартасць. - Нам трэба хлеб, а да крамаў, кажуць, ехаць яшчэ і ехаць.
- Прадасі, і сама без нічога застанешся. - У голасе Мэй прагучала нотка нерашучасці.
- Мы галодныя, - сказаў чалавек.
- Дык чаму ж не купіце сандвічаў з катлетамі?
- Мы б радыя купіць гамбургеры, мэм. Ды не можам. Нам трэба абысціся дзесяццю цэнтамі на ўсіх. - І, сумеўшыся, чалавек дадаў: - Грошы зусім канчаюцца.
Мэй сказала:
- За дзесяць цэнтаў буханкі хлеба не купіш. У нас толькі па пятнаццаць.
Ззаду буркнуў Эл:
- Госпадзі, Мэй, дай ім хлеба.
- Да прывозу самім можа не хапіць.
- І няхай не хопіць, чорт з ім, - сказаў Эл і пахмурна глянуў на бульбяную салату, якую ён перамешваў.
Мэй паціснула круглявымі плячамі і азірнулася на шафёраў, нібы кажучы: бачыце, як бывае.
Яна адчыніла дзверы, і чалавек увайшоў, уносячы з сабой пах поту. Следам за ім у бар шмыгнулі хлапчукі і адразу пайшлі да прылаўка з цукеркамі - утаропіліся на іх, але ў вачах у іх не загарэлася ні прага, ні надзея, ні нават жаданне іх пакаштаваць, а было толькі здзіўленне, што ёсць такія рэчы на свеце. Хлопчыкі былі аднаго росту і на адзін твар. Адзін з іх стаяў, паскрэбваючы пальцамі нагі брудную шчыкалатку. Другі раптам нешта шапнуў яму на вуха, і абое ўсунулі рукі ў кішэні, і тонкую сінюю тканіну іх камбінезонаў адтапырылі сціснутыя ў кулакі далоні.
Мэй высунула шуфляду і выняла адтуль буханку хлеба ў васкаванай паперы.
- Вось за пятнаццаць цэнтаў.
Чалавек зноў надзеў капялюш і сказаў усё гэтак жа прыніжана:
- А ці нельга... Можа, вы адрэжаце на дзесяць цэнтаў?
Эл сярдзіта рыкнуў:
- Госпадзі, Мэй! Аддай ім усю.
Чалавек павярнуўся да Эла:
- Не, нам трэба толькі на дзесяць цэнтаў. Даводзіцца ўсё дакладна разлічваць, містэр, інакш не дабяромся да Каліфорніі.
Мэй пакорліва прамовіла:
- Бярыце ўсю за дзесяць цэнтаў.
- Гэта ж як рабаваць вас, мэм.
- Бярыце. Раз Эл сказаў, бярыце. - Яна пусціла па стойцы загорнуты ў васкаваную паперу хлеб. Чалавек дастаў з задняй кішэні скураны капшук, развязаў шнуркі і раскрыў яго. Капшук быў туга набіты сярэбранымі манетамі і залапанымі грашовымі паперкамі.
- Вам, відаць, дзіўна, што я так скуплюся, - выбачлівым тонам сказаў ён. - Але наперадзе ў нас яшчэ тысяча міль дарогі, і невядома, ці дабяромся яшчэ. - Ён пакорпаўся ўказальным пальцам у капшуку, намацаў дзесяціцэнтавую манету і выцягнуў яе. Калі паклаў на стойку, убачыў, што выпадкова прыхапіў яшчэ адзін цэнт. Ён хацеў ужо схаваць яго назад у капшук, але раптам позірк яго ўпаў на хлопчыкаў, што застылі перад прылаўкам з цукеркамі. Ён паволі падышоў да іх, паказаў пальцам на доўгія палачкі ледзянцоў пад шклом у паласатых абгортках. - Гэтыя - цэнт за штуку, мэм?
Мэй нахілілася і глянула пад шкло.
- Якія?
- Вось гэтыя, паласатыя.
Малыя паднялі на яе вочы і перасталі дыхаць - замерлі, крыху раскрыўшы раты і напружыўшы паўголыя цельцы.
- Гэтыя? Не. Яны на цэнт пара.
- Дык дайце дзве штучкі, мэм. - Чалавек беражліва паклаў медную манетку на прылавак. Хлопчыкі ледзь чутна перавялі дух. Мэй дастала два мятныя ледзянцы.
- Бярыце, - сказаў бацька дзецям.
Хлопчыкі нясмела працягнулі рукі, узялі па адной ледзянцовай палачцы і апусцілі ўніз, не кінуўшы на іх позірку. Але зірнулі адзін на аднаго, куточкі іх губ ледзь варухнуліся ад бянтэжлівай усмешкі.
- Дзякуй вам, мэм. - Чалавек узяў бохан і выйшаў за дзверы; хлопчыкі неяк ненатуральна чынна пайшлі следам, і кожны прыціскаў да нагі доўгую цукерку ў абгортцы з чырвонымі палоскамі. А ў машыне яны, як бурундукі, скокнулі з пярэдняга сядзення на самы верх паклажы і зашыліся, як у норку, сярод клункаў.
Чалавек сеў у машыну, завёў матор, і лядашчы «нэш», равучы і выпусціўшы клуб масляністага дыму, уз'ехаў на шашу і пакіраваў на захад.
З бара глядзелі яму ўслед абодва шафёры, Мэй і Эл.
Вялікі Біл павярнуўся да Мэй.
- Такія ледзянцы каштуюць не цэнт за пару, - сказаў ён.
- А табе што? - агрызнулася Мэй.
- Ім цана кожнаму пяць цэнтаў.
- Ну паехалі, - сказаў другі вадзіцель. - А то час трацім.
Абодва палезлі ў кішэню. Біл кінуў на стойку манету, другі шафёр, глянуўшы на яе, зноў палез у кішэню і паклаў сваю манету побач. Потым яны павярнуліся і пайшлі да дзвярэй.
- Бывай, - сказаў Біл.
Мэй аклікнула іх:
- Гэй! Пачакайце! Рэшту вазьміце.
- Ідзі ты к чорту, - сказаў Біл, і сеткаватыя дзверы бразнулі за ім.
Мэй глядзела, як вадзіцелі садзіліся ў вялікую грузавую машыну, як яна з грукатам цяжка кранулася з месца, потым, заскрыгатаўшы перадачамі і набраўшы газ, пайшла сваёй звычайнай рэйсавай хуткасцю.
- Эл... - ціха паклікала Мэй.
Повар адвёў вочы ад катлеты, якую ён спляскваў лапаткай, збіраючыся абкласці яе васкаванымі паперкамі.
- Што там у цябе?
- Зірні сюды, - яна паказала на грошы, што ляжалі каля кубкаў, - дзве манеты па паўдаляра.
Эл падышоў да стойкі, глянуў на іх і вярнуўся да сваіх гамбургераў.
- Вадзіцелі грузавікоў, - паважліва прамовіла Мэй, - гэта вам не задрыпы.
Мухі раз-пораз натыкаліся на драцяныя сеткі і з гудзеннем адляталі прэч. Кампрэсар халадзільніка павуркатаў і сціх. Па шашы № 66 міма бара са зласлівым віскам праляталі машыны - і грузавыя, і зграбныя абцякальныя легкавыя, і нехлямяжыя драндулеты; і ўсе пранізліва вішчалі. Мэй сабрала талеркі і счысціла з іх у вядро крошкі ад торта. Потым узяла мокрую анучу і пачала кругамі выціраць стойку. А вочы яе былі прыкаваныя да шашы, па якой віхрам праносілася міма жыццё.
Эл выцер рукі аб фартух і паглядзеў на паперку, прышпіленую да сцяны над плітой. На ёй былі нейкія кропкі - радкамі ў тры слупкі. Эл падлічыў самы доўгі радок. Тады пайшоў уздоўж стойкі да касы, націснуў на кнопку «Выкл.» і ўзяў з высунутай шуфлядкі жменю манет па пяць цэнтаў.
- Што ты там робіш? - запыталася Мэй.
- Трэці павінен ужо хутка выплаціць, - сказаў Эл. Ён падышоў да трэцяга гульнёвага аўтамата і пачаў апускаць у яго проразь манеты; пасля таго як у машыне пяты раз закруціліся нейкія колцы, у акенцы паявіліся тры палоскі, і ў коўшык высыпаўся галоўны выйгрыш. Эл згроб манеты жменяй і вярнуўся да стойкі, кінуў грошы ў шуфлядку касы і замкнуў яе. Потым вярнуўся да пліты і закрэсліў на паперцы самы доўгі радок. - Да трэцяга часцей за ўсё падыходзяць, - сказаў ён. - Можа, іх месцамі памяняць? - Ён падняў накрыўку і пачаў памешваць у рондалі, дзе тушылася мяса.
- І што яны будуць рабіць у Каліфорніі? - сказала Мэй.
- Хто?
- Ды гэтыя, ну што толькі што да нас заязджалі.
- Аднаму богу вядома, - адказаў Эл.
- Думаеш, знойдуць там працу?
- Я адкуль ведаю?
Мэй паглядзела на шашу.
- Едзе грузавік з прычэпам. Ці спыніцца тут? Няхай бы спыніўся.
І калі грузавік цяжка з'ехаў з шашы і стаў каля бара, Мэй зноў схапілася за сваю анучку і працерла з канца ў канец усю стойку. Хуценька правяла ёю разы два па бліскучай кававарцы і крыху больш адкруціла вентыль газавага балона. Эл паклаў перад сабой некалькі невялікіх рэпак і пачаў іх абіраць. Мэй адразу павесялела, калі адчыніліся дзверы і ў бар увайшлі два шафёры ў аднолькавым форменным адзенні.
- Хэло, сястрычка!
- У мяне брацікаў няма, - адрэзала Мэй. Госці засмяяліся, засмяялася і Мэй. - Што вам падаць, хлопцы?
- Ну, па кубку кавы. А тарты якія?
- Ананасны, бананавы, шакаладны і яблычны.
- Давай яблычны. Не, чакай... а вунь той, вялікі і пышны, які?
Мэй падняла торт, панюхала:
- Ананасны.
- Адрэж кавалак.
А па шашы № 66 са зласлівым віскатам праносіліся машыны.
Джоўды і Ўілсаны як адна сям'я прабіраліся на Захад - Эль-Рэна і Брыджпарт, Клінтан, Элк-Сіці, Сэйр і Тэксала. Тут праходзіла мяжа штата, і Аклахома засталася ззаду. Цэлы дзень абедзве машыны паўзлі ўсё далей і далей па Тэхаскім выступе. Шэмрак і Эланрыд, Грум і Ярнал. Пад вечар мінулі Амарыльё, пасля доўга яшчэ ехалі і на змярканні зрабілі прывал. Усе страшэнна знемагліся, прапыліліся, перагрэліся. У дарозе ад гарачыні ў бабкі зрабіліся сутаргі, і, калі машына нарэшце спынілася, старая ледзь ліпела.
Позна вечарам Эл выламаў з нейкай агароджы перакладзіну, паклаў упоперак грузавіка пад брызент і замацаваў яго з абодвух бакоў. Вячэралі аднымі аладкамі, што засталіся ад снедання, - халоднымі і цвёрдымі. Усе, як былі ў адзенні, так і паваліліся на матрацы і заснулі. Уілсаны нават палаткі не раскінулі.
Ратуючыся ўцёкамі, Джоўды і Ўілсаны ехалі па Тэхаскім выступе - узгорыстай шэрай мясцовасці, удоўж і ўпоперак спаласаванай рубцамі былых паводак. Аклахома засталася ззаду, перад імі быў Тэхас. Па пыле паўзлі чарапахі, сонца паліла зямлю, вечарамі неба астывала, але ўжо сама зямля дыхала жарам.
Уцёкі доўжыліся ўжо два дні, і на трэці дзень прастора нарэшце адолела ўцекачоў і вымусіла іх падладзіцца пад нязвыклыя жыццёвыя абставіны - шаша стала іх домам, а рух - сродкам самавыяўлення. Спакваля яны прынаравіліся да новага ладу жыцця. Спачатку Руці з Уінфілдам, потым Эл, за імі Коні з Ружай Сарона і нарэшце - дарослыя. Зямля выгіналася ўзгоркамі, падобнымі на вялікія застылыя хвалі. Уілдарада, Вега, Боўзі, Гленрыё. Тэхас скончыўся. Цяпер - Нью-Мексіка і горы. Далёка наперадзе на фоне неба ўзвышаліся грабяні гор. Колы машын віскліва круціліся, маторы перагрэліся, з-пад каўпачкоў радыятараў выбівалася пара. Машыны дайшлі да рэчкі Пекас і перабраліся цераз яе каля Санта-Росы. А там праехалі яшчэ дваццаць міль.
Эл Джоўд вёў легкавую машыну, поруч з ім сядзела маці, а каля яе - Ружа Сарона. Наперадзе паволі сунуўся грузавік. Распаленае паветра ішло хвалямі над зямлёю, далёкія горы ад спёкі трымцелі. Сутула адкінуўшыся назад, Эл апатычна кіраваў машынай, слаба абхапіўшы пальцамі адной рукі спіцу рулявога кола; шэры капялюш яго неяк залішне зухавата ссунуўся на адно вока; раз-пораз ён паварочваў галаву да акенца кабіны і сплёўваў на дарогу.
Маці ўпарта змагалася са стомай. Склаўшы рукі на каленях, яна сядзела свабодна, цела і галава пагойдваліся ў такт рухам машыны. Прыжмурыўшы вочы, яна пазірала на далёкія горы. Ружа Сарона, наадварот, супраціўлялася штуршкам і гайданню - уперлася нагамі ў насціл кабіны, перакінула правы локаць за раму акенца. Ад гэтых намаганняў мускулы на яе пухлявым твары напружыліся, галава рэзка паторгвалася, бо мускулы шыі ў яе таксама былі напятыя. Яна старалася заняць такую позу, каб цела, як цвёрдае ёмішча, ахоўвала плод яе чэрава ад штуршкоў.
- Ма... - павярнулася яна да маці.
Матчын позірк ажыў, скіраваўся на дачку. Вочы, слізгануўшы па стомленым пухлявым твары, усміхнуліся.
- Ма, - паўтарыла Ружа Сарона, - калі мы прыедзем туды, усе вы пойдзеце на збор фруктаў і там жыць застаняцеся?
Лёгкая іронія пачулася ў голасе маці, калі яна з усмешкай адказала:
- Туды мы яшчэ не прыехалі. І не ведаем, як там усё. Прыедзем, пабачым.
- Мы з Коні не хочам больш жыць на ферме, - сказала Ружа Сарона. - Мы ўжо абдумалі, як жыць будзем.
Па твары маці прабег цень трывогі.
- Хіба вы не хочаце застацца з намі... з сям'ёй? - запыталася яна.
- Ну мы ўжо ўсё абгаварылі, мы з Коні. Ма, мы хочам жыць у горадзе, - адказала Ружа Сарона і ўсхвалявана загаварыла: - Коні работу сабе знойдзе ў якой-небудзь майстэрні ці на фабрыцы. А дома вечарамі вучыцца будзе, ну там па радыё, стане знаўцам сваёй справы, а потым, можа, і сам майстэрню завядзе. Мы ў кіно хадзіць будзем. І яшчэ Коні кажа, ён доктара пакліча, калі мне прыйдзе час радзіць; і кажа, гледзячы, як там выйдзе, што, можа, і ў бальніцу мяне пакладзе. І свая машына ў нас будзе, маленькая. А калі ён скончыць вучыцца... вось цудоўна было б! Ён ужо нават старонку з часопіса «Любоўныя апавяданні Захаду» выразаў з аб'явай і выпіша праграму курсаў - яе высылаюць бясплатна. Там так і напісана. Сама бачыла. А як пройдзеш поўны курс па радыё, дык табе нават працу даюць. Работа добрая, чыстая і надзеі дае на будучыню. І зажывём мы ў горадзе, у кінатэатры будзем часта хадзіць, а я... я куплю сабе электрычны прас, а дзіцяці зусім новае прыданае. Коні кажа, прыданае купім новенькае... беленькае і... Ну ты ж бачыла ў каталогах, якое ёсць дзіцячае прыданае. На першым часе, пакуль Коні яшчэ вечарамі дома вучыцца будзе, нам, можа, і нялёгка давядзецца, але... калі ў мяне народзіцца дзіця, тады ён, магчыма, ужо скончыць вучобу і ў нас свая кватэра будзе. Ніякай ужо такой асаблівай нам не трэба, абы дзіцяці добра было... - Твар у Ружы Сарона разгарэўся ад хвалявання. - І яшчэ я падумала, можа, нам усім у горад пераехаць, і, калі ў Коні будзе свая майстэрня... Эл будзе працаваць у яго.
Маці не зводзіла вачэй з разрумяненага твару дачкі, з цікавасцю сачыла, як расце гмах яе планаў.
- Нам не хацелася б вас адпускаць, - сказала яна. - Сям'ю разбіваць нядобра.
Эл фыркнуў:
- Гэта каб я пайшоў працаваць на Коні? Можа, Коні на мяне папрацуе? Думае, акрамя яго, такога малайца, ніхто вечарамі вучыцца не здольны.
Маці раптам зразумела, што ўсё гэта адны мары. Яна зноў перавяла позірк на дарогу, села вальней, але слабая ўсмешка ў вачах згасла не адразу.
- Каб хоць ведаць, як бабка сябе адчувае, - праз нейкі час сказала яна.
Эл мацней абхапіў абаранак руля - у маторы пачуўся слабы стук. Ён даў большую скорасць, і стук зрабіўся гучнейшы. Тады ён перавёў запальванне на больш позняе, прыслухаўся, зноў прыбавіў скорасць і зноў прыслухаўся.
Стук перайшоў у металічны ляскат. Эл націснуў на сігнал і з'ехаў на край шашы. Грузавік наперадзе спыніўся і паволі даў задні ход. Паўз іх на захад прамчаліся тры легкавыя машыны, і кожная пасігналіла, а вадзіцель апошняй крыкнуў, высунуўшыся з акенца:
- Дзе ты стаў, чорт!
Том падвёў грузавік зусім блізка, вылез і пайшоў да машыны Эла. Усе, хто сядзеў на паклажы ззаду грузавіка, павярнуўшы галовы, пазіралі ўніз. Эл зноў пераставіў запальванне і прыслухаўся да матора, які працаваў на халастых абаротах.
- Ну што там у цябе? - запытаўся Том.
Эл прыбавіў абароты.
- Вось паслухай.
Заляскатала яшчэ мацней. Том прыслухаўся.
- Дай ранняе запальванне і збаў абароты, - сказаў ён, падняў капот і ўсунуў пад яго галаву. - Цяпер дай газу. - Ён зноў прыслухаўся і апусціў капот. - Так, здаецца, твая праўда, Эл.
- Шатунны падшыпнік?
- Па гуку падобна на тое, - адказаў Том.
- Я масла не шкадаваў, - недаўменна прамовіў Эл.
- Значыць, яно не даходзіць. Перасохла ўсё к чорту! Нічога не зробіш, трэба мяняць. Я праеду крыху наперад, знайду роўнае месца для стаянкі. А ты цішэй едзь. Не гані, а то зусім кардан сапсуеш.
Уілсан запытаўся:
- Кепскія справы?
- Радасці мала, - адказаў Том, вярнуўся да грузавіка і паволі паехаў наперад.
Эл не мог супакоіцца:
- Розуму не дабяру, чаму такое здарылася. Масла я падаваў удосталь. - Але ён ведаў, што вінаваты. Сам адчуваў, што даў маху.
Маці сказала:
- Віна не твая. Ты ўсё рабіў як след. - І нясмела папыталася: - Што-небудзь сур'ёзнае?
- Туды цяжка дабрацца, і трэба дастаць недзе новы падшыпнік ці гэты заліць бабітам. - Ён глыбока ўздыхнуў. - Добра, што Том тут. Я падшыпнікаў яшчэ ніколі не рамантаваў. Адна надзея на Тома.
Наперадзе збоч дарогі стаяў вялізны чырвоны рэкламны шчыт, ад якога падаў на зямлю шырокі доўгі цень. Том звярнуў машыну з шашы, пераехаў неглыбокі кювет і спыніў грузавік у цяні. Потым вылез з кабіны і стаў чакаць Эла.
- Цішэй, цішэй! - крыкнуў яму Том. - Не гані, вядзі асцярожна, а то яшчэ і рысору зламаеш.
Эл пачырванеў ад злосці і заглушыў матор.
- Ідзі ты к чорту! - крыкнуў ён. - Я падшыпніка не расплаўляў. А ты яшчэ кажаш - «і рысору зламаеш»!
Том ашчэрыўся ўсмешкай:
- Во завёўся. Я нічога такога сказаць не хацеў. Проста каб ты цераз кювет цішэй ехаў.
Асцярожна ведучы машыну па схілах кювета, Эл бурчаў:
- Яшчэ каму-небудзь у галаву ўваб'еш, што па маёй віне падшыпнік паляцеў. - Стук у маторы перайшоў ужо ў грукат. Эл накіраваў машыну ў цень і выключыў запальванне.
Том падняў капот і замацаваў яго.
- Пакуль не астыне, пачынаць нельга, - сказаў ён.
Усе пасажыры павылазілі з машын і збіліся ў кучку каля легкавушкі.
Бацька запытаўся:
- Вельмі сур'ёзна? - і прысеў на кукішкі.
Том павярнуўся да Эла:
- Калі-небудзь шатунныя падшыпнікі мяняў?
- Не, - адказаў Эл. - Ніколі не даводзілася. Але паддон знімаў.
Том сказаў:
- Трэба зняць паддон, потым шатун, раздабыць новы падшыпнік, падкласці пракладкі і падагнаць. Працы на цэлы дзень. Па падшыпнік давядзецца з'ездзіць назад у Санта-Росу. Да Альбукерка міль семдзесят пяць, не меней... А чорт, заўтра ж нядзеля! Нідзе нічога заўтра не купіш. - Усе маўчалі. Руці праціснулася да самай машыны і пільна ўзіралася пад адкінуты капот, стараючыся ўбачыць зламаную дэталь. Том ціха гаварыў: - Заўтра нядзеля. У панядзелак купім, а рамонт скончым, відаць, не раней як у аўторак. Без патрэбнага інструменту цяжка давядзецца. Работка яшчэ тая.
Па зямлі праплыў цень сарыча, і ўсе задралі ўгору галовы, пазіраючы на чорную птушку, што лунала ў паветры.
Бацька сказаў:
- Чаго я больш за ўсё баюся, дык гэта застацца пасярод дарогі без грошай. І есці ўсім трэба, і бензін, і масла купляць. Калі грошы кончацца, проста не ведаю, што рабіць будзем.
Уілсан сказаў:
- Бадай, я тут вінаваты. Няшчасная гэта разваліна ўсю дарогу мне жыць не давала. Вы і так шмат добрага нам зрабілі. Перакладзіце свае рэчы на грузавік і едзьце далей. Мы з Сэйры тут застанемся, што-небудзь прыдумаем. Не хочам, каб вы праз нас пацярпелі, хоць адзін з вас.
Бацька няспешна прагаварыў:
- Не, гэтак рабіць не будзем. Мы амаль парадніліся з вамі. Дзед у вашай палатцы памёр.
Сэйры стомлена прамовіла:
- Вам з намі адны турботы, адны турботы...
Том павольна скруціў цыгарку, агледзеў яе з усіх бакоў і запаліў. Зняў з галавы памятую кепку і выцер ёю лоб.
- Вось што я надумаў, - сказаў ён. - Можа, вам і не спадабаецца, але справа такая: чым хутчэй усе вы даберацеся да Каліфорніі, тым хутчэй грошы да вас пойдуць. Ход у легкавой машыны разы ў два хутчэйшы, чым у грузавіка. І вось я што прапаную: здыміце частку рэчаў з грузавіка, тады вы ўсе ў ім размесціцеся без мяне і прапаведніка, і - наперад. А мы з Кейсі застанемся тут, адрамантуем машыну і таксама паедзем. Ехаць будзем дзень і ноч і дагонім вас, а калі не дагонім, што ж, затое вы ўжо пры рабоце будзеце. Калі ж якая паломка ў дарозе ў вас здарыцца, не страшна, стаўце каля шашы палаткі і нас чакайце. Як добра ўсё абыдзецца, вы даедзеце да месца, працу знойдзеце, і грошы пойдуць. Кейсі мне з рамонтам дапаможа, мы ўсё зробім і да вас прыкацім.
Члены аб'яднанай сям'і задумаліся. Дзядзька Джон апусціўся на кукішкі побач з братам.
Эл запытаўся:
- А мая дапамога пры рамонце не патрэбна?
- Ты ж сам казаў, што ніколі шатунных падшыпнікаў не мяняў.
- Правільна, - пагадзіўся Эл. - Тут трэба моцную спіну мець. А прапаведнік, можа, і не захоча застацца з табою.
- Ну дык хто-небудзь іншы, мне ўсё адно, - сказаў Том.
Бацька паскроб указальным пальцам сухую зямлю.
- На маё разуменне, Том правільна кажа, -сказаў ён. - Усім тут заставацца ніякай карысці. А дацямна можна яшчэ міль пяцьдзесят зрабіць, а то і сто.
Маці з трывогай запыталася:
- А як вы знойдзеце нас?
- Шаша ж тут адна, - адказаў Том. - Шэсцьдзесят шостая - да самага канца. А там Бейкерсфілд. Я па карце глядзеў. Проста туды і прыедзеце.
- А калі ўжо ў Каліфорніі мы з яе дзе-небудзь збочым?
- Не хвалюйся, - супакоіў Том маці. - Мы вас знойдзем. Каліфорнія ж не на ўвесь свет.
- На карце яна страшэнна вялікая.
Бацька вырашыў параіцца з братам:
- Ну як, Джон, ёсць сэнс гэтак рабіць, га?
- Ёсць, - адказаў Джон.
- Містэр Уілсан, машына ваша. Вы нічога не маеце супраць таго, каб мой сын адрамантаваў тут яе, а потым прыгнаў вам?
- Не маю нічога, - адказаў Уілсан. - Вы ўжо зрабілі нам шмат добрага. Я вашаму сыну цалкам давяраю.
- Калі мы вас і не так хутка дагонім, што ж, вы паспееце ўжо дзе-небудзь на працу прыстроіцца і грошай крыху ў кішэню пакласці, - сказаў Том. - А што будзе, калі ўсе мы тут засядзем? Вады паблізу няма, машыну гэту з месца не скранеш. А вось, дапусцім, усе вы даедзеце і на работу ўладкуецеся. Грошы ў вас завядуцца, дамок нават, можа, які сабе купіце. Кейсі, ты як? Застаешся са мной, паможаш?
- Як вам, людзі, лепш, так я і зраблю, - адказаў Кейсі. - Вы мяне пасадзілі ў машыну, везлі. Я што заўгодна зраблю.
- Глядзі, застанешся - будзеш валяцца на спіне пад машынай, твар увесь маслам перамажаш, - папярэдзіў Том.
- Не страшна.
Бацька сказаў:
- Ну, раз цяпер усё ясна, давайце ў дарогу. Да начлегу можна яшчэ сотню міль выціснуць.
Маці ступіла крок і стала перад ім:
- Я не еду.
- Як гэта - не едзеш? Што гэта значыць? Якраз табе і трэба ехаць. Уся сям'я на табе. - Бацька не чакаў такога бунту.
Маці падышла да легкавой машыны, прасунула руку ў дзверцы, памацала пад заднім сядзеннем, выцягнула адтуль рычаг ад дамкрата і лёгенька ўзважыла яго ў руцэ.
- Я не еду, - паўтарыла яна.
- Кажу ж табе, трэба ехаць. Так вырашана.
Губы ў маці моцна сцяліся, і яна спакойна сказала:
- Мяне толькі сілай адсюль павязеш. - Яна зноў крыху павяла жалезным стрыжнем. - Глядзі, бацька, сораму не абярэшся. Біць сябе я не дазволю, плакаць і літасці прасіць не буду. Я табе так засвячу! Ці ты справішся са мной? А калі наб'еш, дык, бог сведка, я свайго часу дачакаюся - павернешся да мяне спінай ці на кукішкі дзе прысядзеш, я цябе ззаду вядром! Госпадам богам прысягаю, так будзе.
Бацька бездапаможна абвёў вачамі прысутных.
- Во расхрабрылася! - сказаў ён. - Ніколі яе такой яшчэ не бачыў.
Жалезны стрыжань злавесна пагойдваўся ў руцэ ў маці.
- Давай падыходзь! - сказала маці. - Ты ж ужо вырашыў. Падыходзь, бі. Ну, паспрабуй, што атрымаецца. Толькі я не паеду, а калі сілай пацягнеш, дык ты ніколі ўжо ўначы вока не звядзеш, бо я буду цярпліва чакаць, доўга чакаць, і як толькі сон стуліць табе павекі, я паленам - трах!
- Гэта ж трэба, якая баявая, - прабурчаў бацька. - Здаецца, і не маладая ўжо.
Астатнія моўчкі сачылі за гэтым бунтам. Пазіралі на бацьку, чакаючы, што ён вось-вось увойдзе ў злосць. Яны сачылі за яго рукамі, якія раптоўна маглі сціснуцца ў кулакі. Але бацька не даў волі гневу, рукі яго спакойна віселі па баках. І неўзабаве ўсе зразумелі, што маці перамагла. І сама яна зразумела гэта.
Том сказаў:
- Якая цябе, ма, муха ўкусіла? Навошта ты ўсё гэта распачала? Што з табой такое? Табе боязна за нас стала?
Твар у маці крыху палагаднеў, але ў вачах у яе яшчэ быў суровы бляск. Яна сказала:
- Вы вырашылі, а як след не падумалі. Што ў нас на свеце засталося? Нічога, толькі мы самі. Толькі сям'я і засталася, больш нічога. Ледзь з месца зрушылі, і дзед лёг у зямлю. А цяпер вось вы самі сям'ю разбіваеце.
Том усклікнуў:
- Мы ж вас дагонім, ма! Мы тут нядоўга затрымаемся.
Маці павяла рычагом ад дамкрата.
- Дапусцім, мы зробім прывал, а вы міма праедзеце, што тады? Дапусцім, прыехаўшы туды, мы не знойдзем, дзе вам вестку пакінуць, дык адкуль вы будзеце ведаць, дзе нас шукаць? - Памаўчаўшы, маці дадала: - Горкая нас чакае дарога. Бабка зусім хворая. Ляжыць там наверсе, на грузавіку, чаго добрага, за дзедам пойдзе. Сілы яе пакідаюць. Доўгая, горкая нас чакае дарога.
Умяшаўся дзядзька Джон:
- Але ж там можна грошай зарабіць. Паспелі б крыху нават і сабраць, пакуль астатнія пад'едуць.
Позіркі ўсіх зноў скіраваліся на маці. Цяпер яна была галоўная. Стырно ўлады перайшло да яе.
- Адны тыя грошы, што мы заробім, нам мала шчасця прынясуць. Самае дарагое, што ў нас ёсць, гэта сям'я. Калі ваўкі нападаюць на статак, каровы трымаюцца кучкай, ціснуцца адна да адной. Мне нічога не страшна, пакуль мы ўсе разам, - усе, хто жывы яшчэ, і разбіваць сям'ю я не дазволю. З намі Ўілсан, з намі прапаведнік. Калі яны захочуць ехаць, што я ім скажу? Але калі дзеці мае пачнуць адбівацца ад сям'і, дык мяне не ўтрымаеш, пушчу ў ход вось гэту жалезіну. - У голасе яе гучалі жорсткасць і рашучасць.
Том супакойліва сказаў:
- Тут нам, ма, усім нельга заставацца. Вады няма. І нават ценю мала. А бабку ж трэба ў цяні пакласці.
- Ну што ж, добра, - сказала маці, - паедзем далей. Спынімся там, дзе будзе цень і вада. Грузавік вернецца і павязе цябе ў горад. Купіш там тое, што трэба, і на грузавіку прыедзеш назад. Не тупаць жа пеша ў такую спёку. І наогул аднаго цябе я не адпушчу - раптам арыштуюць, а заступіцца не будзе каму.
Том падціснуў губы і гучна цмокнуў. Бездапаможна развёў рукамі і ляпнуў сябе па бёдрах.
- Та, - сказаў ён, - калі б ты падхапіў яе з аднаго боку, а я з другога, а астатнія навалілся б на яе ўсёй кучай ды яшчэ бабка скочыла б на яе зверху, тады мы, можа, і справіліся б з ёю, перш чым яна ўлажыла б гэтай жалязякай, ну там двух ці трох з нас, не больш. Але ж табе, зразумела, не хочацца дзірку ў галаве атрымаць, а мама, глянь, як кіпіць. Ого, на што здольны адзін, але рашучы чалавек - цэлы натоўп раскідае. Перамога за табой, ма. Толькі штучку гэтую кінь, пакуль каго-небудзь не пакалечыла.
Маці са здзіўленнем глянула на жалезны рычаг у руцэ, пальцы яе ўздрыгнулі, і яна кінула сваю зброю на зямлю. Том з падкрэсленай асцярогай падняў рычаг ад дамкрата і паклаў на ранейшае месца.
- Ты, тата, выпусці пару, ты, Эл, саджай усіх на грузавік, знайдзі месца для прывалу, дапамажы і вяртайся сюды. А мы з прапаведнікам знімем паддон. Пабачым, як работа пойдзе, можа, яшчэ дацямна зганяем у Санта-Росу і дастанем там шатунны падшыпнік. Магчыма, і ўдасца - яшчэ ж субота. Толькі давай не марудзь, каб нам паспець. Прынясі з грузавіка развадны ключ і пласкагубцы. - Том прасунуў руку пад ніз машыны і памацаў замаслены паддон. - І яшчэ дай мне сюды бляшанку якую ці вядро - я масла спушчу. Яго трэба берагчы. - Эл прынёс вядро, Том падставіў яго пад машыну і пласкагубцамі аслабіў каўпачок. Пакуль ён адкручваў яго пальцамі, чорнае масла залівала яму руку, а потым бясшумным струменем хлынула ў вядро. Да таго часу, як налілася палова вядра, Эл паспеў ужо ўсіх пасадзіць на грузавік. Запэцканы маслам Томаў твар вызірнуў між двух колаў легкавой машыны. - Хутчэй вяртайся! - крыкнуў Том і пачаў адкручваць балты паддона. Грузавік тым часам асцярожна пераехаў неглыбокі кювет і пайшоў па шашы. Балты Том адкручваў па чарзе толькі на адзін абарот, каб не папсаваць пракладкі. Прапаведнік апусціўся каля колаў на калені.
- А мне што рабіць?
- Пакуль што нічога. Сцячэ масла, я выкручу балты, і ты паможаш мне апусціць паддон. - Том зусім запоўз пад машыну, аслабляючы балты развадным ключом і выкручваючы іх пальцамі. Бакавыя балты ён адкруціў не да канца, каб паддон не зваліўся. - Зямля тут, пад машынай, яшчэ гарачая, - зазначыў Том і запытаўся: - Што гэта ты, Кейсі, апошнія дні такі маўклівы стаў? Чаму? Калі мы з табой першы раз стрэліся, ты ледзь не кожныя паўгадзіны прамовы гаварыў. А за гэтыя два дні і дзесяці слоў не вымавіў. Што з табой - занудзіўся?
Кейсі ляжаў на жываце, зазіраючы пад машыну. Зарослы рэдкай шчэццю падбародак апіраўся на тыльны бок рукі. Капялюш ссунуўся на патыліцу, прыкрыўшы ззаду шыю.
- Я на ўсё жыццё нагаварыўся, як быў прапаведнікам, - сказаў ён.
- Ну так, але ж часам ты слушна гаварыў.
- Я ўвесь растрывожаны, - сказаў Кейсі. - Калі быў прапаведнікам, я надта не задумваўся, а цяпер вось дайшло: здорава распуснічаў я тады. А цяпер, раз я не буду больш прапаведаваць, мне трэба ажаніцца. Ведаеш, Томі, вельмі ўжо кроў зайграла.
- У мяне таксама, - сказаў Том. - У той дзень, як я выйшаў з Макалестара, я проста дыміўся. Падчапіў нейкую дзеўку, шлюху. Што потым было, табе не скажу. Гэтага я нікому сказаць не магу.
Кейсі засмяяўся:
- Што было потым, я ведаю. Неяк раз я адышоў у пустыню папасціцца, а калі выйшаў, са мной тое самае было.
- Чорт ведае што! - сказаў Том. - Грошай я не патраціў ні цэнта, але дзеўцы той здорава дасталося. Відаць, падумала, я чокнуты. Трэба было, безумоўна, заплаціць. Толькі ў мяне за душой нічога не было, акрамя пяці зялёненькіх. Яна сказала, што грошай ёй не трэба. Ну, залазь сюды, трымай. Зараз я яго выслабаню. Ты адкруці вось гэты болт, а я той, што з майго боку, тады пойдзе лёгка. Асцеражней з пракладкай. Цяпер увесь цалкам і выйдзе. Стары «додж» - усяго чатыры цыліндры. Ужо раз неяк такі разбіраў. Карэнныя падшыпнікі вялізныя, як мускатныя дыні. Ну апускай... мацней трымай. Прасунь руку, там пракладка задзёрлася... лягчэй. Ну вось! - Замаслены паддон ляжаў між імі на зямлі, і ў карытцах яго яшчэ заставалася крыху масла. Том выняў з аднаго карытца кавалак бабіту. - Вось, - сказаў ён і пакруціў абломак пальцамі. - Вал стаіць каленам угору. Там, ззаду, у машыне завадная ручка, вазьмі яе. Пакруці, пакуль я не крыкну.
Кейсі падняўся, знайшоў завадную ручку і прыладзіў да матора.
- Ну, можна?
- Давай крутні... цішэй... яшчэ трохі... яшчэ крышачку, ага, вось... Хопіць.
Кейсі апусціўся на калені і зазірнуў пад машыну. Том пабразгаў шатунным падшыпнікам па каленчатым вале.
- Так яно і ёсць.
- А чаму, па-твойму, гэта здарылася? - пацікавіўся Кейсі.
- Чорт яго ведае. Драндулет гэты гадоў ужо трынаццаць па дарогах бегае. На спідометры шэсцьдзесят тысяч міль накручана. Значыць, на самай справе тысяч сто шэсцьдзесят - колькі разоў лічбы назад пераводзілі, аднаму богу вядома. Моцны перагрэў - можа, хто з маслам недагледзеў ці яго проста не хапіла. - Том выцягнуў шплінты і захапіў ключом адзін з балтоў, што трымалі падшыпнік. Рэзка павярнуў ключ, і ён сарваўся з галоўкі балта. На тыльным баку рукі з'явіўся доўгі і глыбокі парэз. Том глянуў на ранку - з яе выступіла кроў і, змешваючыся з маслам, закапала ў паддон.
- Дрэнь справа, - сказаў Кейсі. - Дай я буду адкручваць балты, а ты чым-небудзь рану завяжы.
- А, дробязь! Яшчэ ніколі не бывала, каб я разок не параніўся, калі з машынай важдаюся. Цяпер ужо больш няма чаго баяцца. - Том зноў прыладзіў ключ. - Шкада, тарцовага няма, - сказаў ён і, пастукваючы асновай далоні па дзяржанні ключа, адзін за адным аслабіў усе балты на падшыпніку, выцягнуў іх і паклаў у паддон разам са шплінтамі і балтамі ад паддона. Зняў шатун з поршнем і таксама паклаў у паддон. - Ну, дзякуй богу! - Том вылез з-пад машыны, абцёр руку аб мешкавіну і агледзеў рану. - Свішча, сволач! - сказаў ён. - Зараз спынім. - Ён памачыўся, згроб з зямлі жменю мокрага пяску і прыклаў да раны. Неўзабаве кроў спынілася. - Лепшага сродку спыніць кроў няма, - сказаў Том.
- Павуцінне таксама памагае, - зазначыў Кейсі.
- Правільна, але павуціння не заўсёды дастанеш, а мачу - калі заўгодна. - Том сеў на падножку і пачаў разглядаць расплаўлены падшыпнік. - Цяпер каб знайсці дзе «додж» дваццаць пятага года. Знімем з яго шатун з пракладкамі і, можа, наладзім. А Эл, пэўна, заехаў чорт ведае куды.
Цень ад рэкламнага шчыта выцягнуўся цяпер футаў на шэсцьдзесят. Ужо было далёка за поўдзень. Кейсі таксама сеў на падножку і паглядзеў на захад.
- Хутка мы апынемся сярод высокіх гор, - прамовіў ён і змоўк. Потым паклікаў:
- Том!
- Што?
- Я, Том, увесь час прыглядаўся да машын - да тых, якія мы абміналі, і да тых, што ехалі паўз нас. Я лічыў.
- Што ты лічыў?
- Том, гэта ж такія самыя сем'і, як ваша, цэлымі сотнямі на захад едуць. Я пільна сачыў. На ўсход ніхто не едзе - усе, цэлымі сем'ямі, толькі на захад. Заўважыў?
- Ну заўважыў.
- Дык яны ж... быццам... быццам ад войска якога ўцякаюць. Як быццам уся краіна знялася з месца.
- Яно так і ёсць, - пагадзіўся Том. - Уся чыста знялася. Мы таксама кінулі свой дом.
- Ну, а што будзе, калі... калі людзі гэтыя... і яны, і ўсе іншыя працы там не знойдуць, што тады?
- Ідзі ты да д'ябла! - гаркнуў Том. - Адкуль мне ведаць, што будзе? Я адно толькі ведаю - ногі перастаўляць, спачатку адну наперад, потым другую. Гэтак і ў Макалестары рабіў чатыры гады запар - у камеру, з камеры, у сталоўку, са сталоўкі... Госпадзі, а як я спадзяваўся, што на волі ўсё будзе іначай! У турме стараўся ні пра што не думаць, каб мазгі не перакруціліся, і цяпер таксама ні пра што думаць не хачу. - Том павярнуўся да Кейсі. - Вось падшыпнік расплавіўся. Мы гэтага не ведалі, і нам было спакойна. Цяпер мы ўбачылі - паляцеў, што ж, адрамантуем. І, далібог, гэтак трэба заўсёды рабіць. Я дарэмна хвалявацца не буду. Не хачу. Во, бачыш, кавалак жалеза і бабіт? Бачыш? Вось і ўвесь мой клопат, больш мяне нічога на свеце не турбуе... Куды гэта, чорт, Эл праваліўся?
Кейсі сказаў:
- Не, Том, ты паслухай... Што за ліха! І словы нават патрэбныя на язык не ідуць...
Том зняў засохлую гразь з рукі, кінуў на зямлю. Па краях ранкі засталася брудная палоска. Том перавёў позірк на прапаведніка.
- Ты, я бачу, настройваешся на прамову, - сказаў ён. - Што ж, давай. Люблю слухаць прамовы. У нас там наглядчык безупынна красамоўнічаў. Нам шкоды ніякай, а яму ўцеха. Ну давай, выкладвай, што там у цябе.
Адной рукой Кейсі пашчыкваў вузлаватыя пальцы другой.
- Нешта творыцца ў краіне, народ заварушыўся. Людзі, як ты кажаш, перастаўляюць па чарзе ногі і не задумваюцца, куды ідуць, але дарога ў іх адна, ва ўсіх адна. Як прыслухаешся, чуеш нейкі рух, таемнае шастанне, шоргат і... і нейкі неспакой. Нешта творыцца ў краіне, і людзі, тыя, каго гэта тычыцца, нічога яшчэ не ведаюць... пакуль што не ведаюць. Народ зрушыў з месца, кіруе на Захад... пакідае за сабой пустыя фермы. Усё гэта немінуча прывядзе да нечага такога, што пераменіць усю краіну.
Том сказаў:
- Я адно ведаю: перастаўляю па чарзе свае хадулі.
- Так. Ну, а калі табе страчаецца загарадзь, ты і цераз яе палезеш?
- Чаму ж не? Калі трэба, палезу.
Кейсі ўздыхнуў:
- Бадай, гэтак лепей. Я згодзен з табою. Але ж загарадзі бываюць розныя. І людзі розныя. Ну накшталт мяне: загарадзі яшчэ не паставілі, а яны ўжо лезуць... іначай не могуць.
- Ці не Эл гэта едзе? - ажывіўся Том.
- Ага, відаць, Эл.
Том падняўся на ногі, загарнуў шатун і абедзве часткі падшыпніка ў кавалак мешкавіны.
- Вазьму з сабой за ўзор, каб не памыліцца, - сказаў ён.
Грузавік спыніўся на краі шашы. Эл высунуўся з акенца.
Том сказаў:
- Дзе цябе чэрці насілі? Далёка заехалі?
Эл уздыхнуў.
- Зняў шатун?
- Ага. - Том падаў яму скрутак. - Бабіт паляцеў.
- Я тут ні пры чым, - сказаў Эл.
- Ясна. Куды ты іх завёз?
- О, у нас там такое! Бабка раптам зараўла, і Разашарна таксама, на яе гледзячы. Уткнула галаву пад падушку і плача. Бабка рот разявіла і вые, як сабака на месяц. Быццам дае яму прачуханца. Ага, вось бацька загадаў не адказвае, нікога не пазнае. Толькі нешта балбоча і балбоча, быццам да дзеда звяртаецца.
- Дзе ты іх пакінуў?
- Мы да лагера пад'ехалі. Там і цень ёсць, і вада водаправодная. За дзень стаянкі паўдаляра бяруць. Але ўсе так стаміліся, проста з ног валіліся, і мы вырашылі застацца там. Ма кажа: што зробіш - бабка зусім нямоглая. Раскінулі палатку Ўілсана, наш брызент таксама нацягнулі. Бабка, думаю, зусім з розуму выжыла.
Том паглядзеў на сонца, якое ўжо прыкметна хілілася на захад.
- Кейсі, -сказаў ён, - каму-небудзь аднаму трэба застацца пры машыне, а то з яе ўсё здзяруць. Ты як?
- Добра, застануся.
Эл узяў з сядзення папяровы мяшочак.
- Во мама прыслала хлеба з мясам, і ў мяне яшчэ тут збан з вадой ёсць.
- Яна нікога не забудзе, - сказаў Кейсі.
Том залез у кабіну да Эла.
- Значыць, так, - сказаў ён. - Мы пастараемся як найхутчэй вярнуцца. Але загадзя не скажаш калі.
- Я буду тут, - сказаў Кейсі.
- Добра. Толькі не выступай тут сам перад сабой. Паехалі, Эл. - Грузавік рушыў па шашы. Вечарэла. - Добры ён хлопец, - сказаў Том. - Увесь час усё думае, усё думае...
- Што ж, каб ты быў прапаведнікам, і табе б давялося. А наш бацька ўвесь ажно кіпіць ад злосці - пяцьдзесят цэнтаў толькі за тое, каб машыну паставіць пад дрэва! Ніяк у толк узяць не можа. Сядзіць, лаецца. Хутка, кажа, паветрам у бочках пачнуць гандляваць. А мама яму: бабцы трэба паляжаць у цяні і каб вада была блізка.
Грузавік з грукатам ехаў па шашы: цяпер, калі з яго знялі паклажу, усё ў ім ляскатала і бразгала - барты, абрэзаны кузаў. Ён ішоў хутка і лёгка. Эл даў скорасць трыццаць восем міль у гадзіну, матор тарахцеў, праз шчыліны ў дне кабіны прабіваўся шызы дымок.
- Збаў трохі, - сказаў Том. - Перапаліш усё чыста. А што ж гэта з бабкай?
- Не ведаю. Памятаеш, апошнія два дні яна дулася на ўсіх, ні з кім слова не прамовіла? А цяпер крычыць, усё балбоча нешта, усё роўна як да дзеда звяртаецца. Гэта яна на яго крычыць. Хоць вушы затыкай. Быццам ён на самай справе сядзіць перад ёю і ўхмыляецца, як калісьці, - пачухваецца і ўхмыляецца. Яна нібы бачыць: вось ён сядзіць. Быццам дае яму прачуханца. Ага, вось бацька загадаў перадаць табе на ўсякі выпадак дваццаць даляраў. Не ведаю, колькі спатрэбіцца. Раней ты калі бачыў, каб ма так накінулася на яго, як сёння?
- Нешта не прыпомню. Што і казаць, добры я выбраў час выходзіць з турмы. Вярнуўся, думаў, дамоў, пашвэндаюся на волі, спаць позна буду, есці колькі ўлезе. Гуляць буду, на вечарынках скакаць, за спадніцамі бегаць. А выйшла так, што на гэта і хвілінкі вольнай няма.
Эл сказаў:
- Я і забыўся. Ма шмат чаго загадала табе перадаць: каб ты не піў, у спрэчкі не ўвязваўся, біцца ні з кім не лез. Баіцца, каб цябе ў турму зноў не запраторылі.
- Ёй і без мяне клопатаў хапае, я падбаўляць не буду, - сказаў Том.
- Ну, куфлі два ўсё-такі вып'ем? Жах, як піва захацелася.
- Не варта, - сказаў Том. - Калі бацька даведаецца, што мы патраціліся на піва, пер'е з нас паляціць.
- Але паслухай, Том. У мяне свае шэсць даляраў ёсць. Вып'ем і пойдзем да дзяўчат. Ніхто пра гэтыя грошы не ведае. Эх, і пагулялі б мы з табой!
- А ты сваю касу прыберажы, - сказаў Том. - Вось прыедзем на ўзбярэжжа, мы з табой такога жару зададзім! Можа, калі ўжо працаваць будзем... - Ён глянуў на Эла. - А я і не ведаў, што ты да дзяўчат ходзіш. Думаў, ты проста так, на словах.
- Тут я нікога не ведаю. І наогул, калі будзем вось так матацца па дарогах, не іначай, жаніцца прыйдзецца. Вось толькі каб у Каліфорнію прыехаць, я там пакажу!
- Добра было б, - сказаў Том.
- Ты ўжо, здаецца, веру страціў.
- Страціў я веру.
- Калі ты забіў таго чалавека... табе потым не снілася... ці што-небудзь такое? Ты мучыўся?
- Не.
- І ніколі пра гэта не думаў?
- Думаў. Мне шкада яго было.
- А ты не каяўся?
- Не. Я за гэта сядзеў. Сядзеў жа я, ніхто іншы.
- Вельмі там... кепска было?
Том занерваваўся:
- Паслухай, Эл. Я свой тэрмін адседзеў, і канец. Няма чаго ўвесь час вяртацца ў мінулае. Вунь там рэчка, а за ёю горад. Давай дастанем шатун, і к чорту ўсё астатняе.
- Маці душы ў табе не чуе, - сказаў Эл. - Так ужо гаравала, так гаравала, калі цябе пасадзілі. І ўсё ўпотайкі. Быццам слёзы ў яе ў горле захрасалі. Але мы ўсё роўна разумелі, што з ёю творыцца.
Том ссунуў кепку на самыя вочы.
- Паслухай, Эл, давай пра што іншае пагаворым.
- Я проста расказваю, што з маці было.
- Яно так... яно так... Але ж лепш пра гэта не думаць. Лепш... знай сабе - перастаўляй па чарзе ногі.
Эл пакрыўджана змоўк.
- Я проста хацеў расказаць табе, - прамовіў ён праз хвіліну.
Том зірнуў на яго, але Эл глядзеў на дарогу. Парожні грузавік з грукатам падскокваў на няроўнасцях шашы. Доўгія губы Тома саслізнулі з зубоў, і ён ціха засмяяўся.
- Я разумею, Эл. Відаць, у мяне ў галаве ўсё перамяшалася ад турмы. Калі-небудзь я раскажу табе, можа, усё. Табе проста, разумееш, хочацца ведаць. Цікавасць разбірае. Але ў мяне цяпер адно жаданне - забыцца на ўсё гэта хоць на хвілінку. Можа, потым будзе ўсё інакш. А цяпер, як прыгадаю, усе кішкі перакручваюцца і мне моташна робіцца. Я табе, Эл, адно толькі скажу: турма - гэта сродак паволі звесці чалавека з розуму. Ясна? Там усе ненармальныя. Ты іх бачыш, чуеш і неўзабаве пачынаеш ужо сумнявацца, нармальны ты сам ці не. Іншы раз узнімуць немы крык ноччу, а табе здаецца, гэта ты крычыш... і так і сапраўды бывае.
Эл сказаў:
- Не буду больш, Том.
- Трыццаць дзён - гэта нічога, - гаварыў далей Том. - І паўгода таксама нічога. А калі пераваліць за год, тады... не ведаю. Гэта ні з чым на свеце параўнаць нельга. Так нельга рабіць, наогул нельга садзіць людзей пад замок. Ды к чорту ўсё гэта! І гаварыць не хачу. Глянь, як сонца гарыць на вокнах.
Грузавік пад'ехаў да выстраеных у рад заправачных калонак; справа ад дарогі быў склад аўтамабільнага лому - участак плошчай у акр, абнесены высокай агароджай з калючага дроту; бліжэй да дарогі - павець з рыфленага жалеза і груда езджаных шын каля ўвахода, на якіх былі напісаны цэны. За павеццю віднелася халупа, збітая з рознага ламачча - абрэзкаў дошак і кавалкаў бляхі. Вокны - ветравое шкло ад машын, устаўленае ў сцены. На зарослай травой зямлі - аўтамабільны лом: машыны з пакарабачанымі, памятымі радыятарамі, зраненыя машыны ляжалі на баку без колаў. Паўсюль на траве і каля сцяны павеці валяліся ржавыя маторы, узвышаліся груды хламу - крылы, барты грузавікоў, колы, восі; і над усім гэтым лунаў дух тла, цвілі і ржы. Пакарабачанае жалеза, напаўвыпатрашаныя рухавікі, кучы рознай непатрэбшчыны, падабранай на дарогах.
Эл пад'ехаў па залітай маторным маслам дарожцы да павеці. Том вылез з кабіны і зазірнуў у цёмны праём дзвярэй.
- Нікога не відаць, - сказаў ён і гукнуў: - Ёсць тут хто-небудзь?
- Хоць бы знайшоўся ў іх «додж» дваццаць пятага года.
У глыбіні павеці бразнулі дзверы. Са змроку выйшаў чалавек, падобны на прывід. Кашчавы, брудны, з запэцканым маслам жылістым тварам, туга абцягнутым скурай. Аднаго вока ў яго не было, а калі ён паводзіў другім, здаровым, мускулы пустой вачніцы паторгваліся. Джынсы і кашуля на ім ільсніліся ад засохлага масла; рукі былі ўсе ў ранках і рубцах; тоўстая ніжняя губа злавесна выступала наперад.
Том запытаўся:
- Вы гаспадар?
Адзінае вока бліснула ў яго бок.
- Я працую на гаспадара, - буркнуў ён у адказ. - А што трэба?
- Які-небудзь разбіты «додж» дваццаць пятага ў вас ёсць? Нам патрэбен шатун.
- Не ведаю. Каб быў гаспадар, ён сказаў бы. Але яго цяпер няма. Дадому паехаў.
- А самім можна глянуць?
Чалавек смаркнуў у далонь і абцёр яе аб штаны.
- Вы з гэтых краёў?
- Не, з Усходу. На Захад едзем.
- Ну пашукайце. Хоць двор увесь спаліце, мне што.
- Ты, я бачу, не вельмі гаспадара свайго любіш.
Валочачы ногі, чалавек падышоў бліжэй і зноў бліснуў сваім адзіным вокам.
- Цярпець яго не магу, - вымавіў ён ціха. - Цярпець не магу гэту сволач! Цяпер во дамоў падаўся. Паехаў сабе дадому. - Словы вывальваліся з яго вуснаў, налятаючы адно на адно. - Такую прывычку сабе завёў... такую прывычку чапляцца і дражніцца. Ён... ён сволач! Дачка ў яго, дзевятнаццаць гадоў, прыгожанькая з твару. Дык ён пытаецца: «Як ты наконт таго, каб ажаніцца з ёю?» Гэта ён у мяне пытаецца! А сёння кажа: «Вечарам танцы будуць. Ну як, пойдзеш?» Гэта ён мне кажа - мне! - На вачах у яго выступілі слёзы, пакаціліся з пустой чырвонай вачніцы па шчацэ. - Далібог, калі-небудзь вазьму і схаваю трубны ключ у кішэні. Такое мне гаворыць і на маё выбітае вока зырыцца. Я... я гэтым ключом галаву яму адкручу... накіну і проста з шыі скручу, гэтак лёгенька буду паварочваць. - Ён задыхаўся ад шаленства. - Лёгенька паварочваць буду і з шыі скручу.
Сонца схавалася за горы. Эл паглядзеў на двор, завалены разбітымі машынамі.
- Вунь, Том, глянь! Здаецца, «додж» дваццаць пятага ці дваццаць шостага.
Том павярнуўся да аднавокага:
- Зірнуць можна?
- Чорт з вамі, бярыце што трэба.
Прабіраючыся між мёртвых аўтамабіляў, Том з Элам накіраваліся да закрытай іржавай машыны, што стаяла на спушчаных шынах.
- Так і ёсць, дваццаць пятага! - усклікнуў Эл. - Зняць паддон можна, містэр?
Том апусціўся на калені і зазірнуў пад машыну.
- Ужо зняты. Аднаго шатуна няма. Ага, ужо няма. - Ён запоўз пад машыну. - Эл, вазьмі ручку і пакруці. - Ён пахістаў шатун на валу. - Усё застылым маслам залеплена. - Эл паціху паварочваў завадную ручку. - Цішэй! - крыкнуў Том. Ён падабраў з зямлі трэску і саскроб з падшыпніка і балтоў засохлае масла.
- Моцна расхістаўся? - запытаўся Эл.
- Не, толькі крышачку, не страшна.
- Вельмі зношаны?
- Пракладкі ёсць, амаль усе. Ага, парадак. Яшчэ крышачку крутні. Зараз апусціцца, цішэй! Ага, вось, хопіць. Цяпер збегай да грузавіка, ключ прынясі.
Аднавокі сказаў:
- Я дам вам скрынку з інструментам. - Ён зашкандыбаў паміж іржавых машын да павеці і неўзабаве вярнуўся з бляшанай скрынкай. Том узяў з яе тарцовы ключ і перадаў Элу.
- Адкручвай. Толькі пракладак не згубі, не пазрывай балтоў, са шплінтамі асцеражней. Не марудзь, хутка зусім сцямнее.
Эл падлез пад машыну.
- Абавязкова трэба абзавесціся тарцовымі ключамі, - пачуўся голас знізу. - З развадным ні да чога не дабярэшся.
- Пакліч, калі адзін не справішся.
Аднавокі з бездапаможным выглядам стаяў каля машыны.
- Я падмагу, калі трэба, - сказаў ён. - А ведаеце, што гэты сукін сын яшчэ прыдумаў? Прыходзіць раз у белых штанах і кажа мне: «Хадзем пакатаемся на маёй яхце». Далібог, я трахну яго калі-небудзь. - Ён цяжка дыхаў. - З тае пары, як я вока страціў, у мяне не было ніводнай жанчыны. А ён мне такое гаворыць! - І буйныя слёзы пацяклі з яго вачэй, прамываючы баразёнкі на брудным твары каля носа.
Том з раздражненнем сказаў:
- Дык чаму ж ты тут тырчыш? Цябе ж пад вартай ніхто не трымае.
- Табе лёгка казаць. Не так проста работу знайсці, ды яшчэ калі ў цябе аднаго вока няма.
Том крута павярнуўся да яго:
- Слухай, дружа. Ты хоць гэтым сваім адным вокам на сябе паглядзі. Ты брудны ўвесь, ад цябе смярдзіць. Сам нарываешся на непрыемнасці. Табе так хочацца. А потым сам сябе шкадуеш. Дзе табе, сляпому, думаць пра жанчын. Хоць павязку начапі, твар памый. Выкінь з галавы - ніякім ты ключом нікога не заб'еш.
- Пажыў бы ты сам з адным вокам. І бачыш не так, як усе, і адлегласць правільна не вызначыш - не можаш. Усё плоскім здаецца.
Том сказаў:
- Галава ты яловая! Я вось шлюху ведаў адну без нагі. Дык, думаеш, яна па дзяшоўцы давала? Ого! Дзе там! Ёй яшчэ звыш паўдаляра прыплочвалі. Яна казала: «Ці шмат табе разоў даводзілася з аднаногай спаць? Ні разу! Ну вось, кажа, атрымаеш асаблівае задавальненне, а каштаваць табе гэта будзе ўсяго на паўдаляра больш». І плацілі, далібог, праўда, і нават лічылі яшчэ, што ім пашанцавала. Запэўнівалі, што гэта ўдачу прыносіць. А яшчэ гарбуна ведаў... у адным месцы. Зарабляў сабе на жыццё тым, што даваў пакратаць свой горб за грошы. Гэта таксама нібыта ўдачу прыносіла. А ў цябе ж, госпадзі, аднаго толькі вока няма.
Аднавокі, запінаючыся, сказаў:
- Дык жа ж усе цябе староняцца, нехаця такім станеш.
- А ты завяжы чым-небудзь вока. А то выстаўляеш усім напаказ, як карова задніцу. Вельмі любіш шкадаваць самога сябе. А з табой нічога ж такога. Штаны сабе белыя купі. Ты, відаць, найболей п'яны ў ложку валяешся і плачаш. Эл, табе памагчы?
- Не, - пачуўся адказ. - Падшыпнік я ўжо зняў. Хачу поршань ссадзіць.
- Галавой не стукніся.
Аднавокі ціха прамовіў:
- Думаеш... я магу яшчэ... каму-небудзь спадабацца?
- Абавязкова, - адказаў Том. - Кажы ўсім, што пасля таго, як ты страціў вока, у цябе нешта іншае добра адрасло.
- Куды вы, хлопцы, едзеце?
- У Каліфорнію. Усёй сям'ёй. Думаем на працу там прыстроіцца.
- А як па-твойму, такому, як я, работа там знойдзецца? У мяне ж будзе чорная павязка.
- Чаму не? Ты ж не калека.
- Дык... можа, вы падвезяце мяне?
- О не! Мы самі так напакаваліся, што ледзь валачомся. Знайдзі нейкі іншы спосаб. Прывядзі да ладу якую-небудзь з гэтых развалін і едзь.
- Што ж, магчыма, так і зраблю, далібог.
Пад машынай нешта бразнула.
- Гатова, - пачуўся голас Эла.
- Дык вылазь, паглядзім.
Эл падаў Тому поршань з ніжняй галоўкай падшыпніка. Том працёр бабітавую паверхню і ўважліва агледзеў падшыпнік.
- Здаецца, усё ў парадку, - сказаў ён. - Каб быў у нас ліхтар, мы сёння і паставілі б.
- Ведаеш, Том, пра што я падумаў? - сказаў Эл. - У нас няма заціскачкі. І паваждаемся ж мы з кольцамі, асабліва з ніжнімі, пакуль поршань уставім!
Том сказаў:
- Мне неяк раз параілі абкруціць кольцы тонкім латунным дротам, і ён зацісне.
- А як яго потым зняць?
- Знімаць не трэба. Сам расплавіцца.
- Тады лепш медны.
- Медзь слабейшая, - сказаў Том і павярнуўся да аднавокага: - У цябе знойдзецца тонкі латунны дрот?
- Хто яго ведае. Здаецца, адна шпуля недзе валяецца. А дзе, па-твойму, можна дастаць такую павязку на вока?
Шпулю яны знайшлі ў павеці, пакапаўшыся ў скрынях. Том уставіў шатун у ціскі і старанна абкруціў дротам поршневыя кольцы, заганяючы іх глыбей у пазы; там, дзе дрот быў сагнуты, падраўняў яго малатком, потым, паварочваючы поршань, лёгенька пастукваў па ўсёй паверхні, каб дрот нідзе не выпіраў. Нарэшце правёў па поршні пальцам, правяраючы, ці ўсё легла ўпоравень з паверхняй поршня. У павеці хутка цямнела. Аднавокі прынёс кішэнны ліхтарык і накіраваў прамень святла на ціскі.
- Ну вось, гатова! - сказаў Том. - Паслухай, колькі возьмеш за ліхтарык?
- Ён ужо добра выгараў. За новую батарэйку я заплаціў пятнаццаць цэнтаў. Ну бяры ўсё за... трыццаць пяць.
- Згодзен. А колькі з нас за шатун з поршнем?
- Проста не ведаю, што вам сказаць. Калі б гаспадар тут быў, ён праверыў бы па прэйскуранту, колькі каштуе новая запчастка, і, пакуль ты тут важдаешся, паспеў бы выведаць, ці сур'ёзна ты засеў і колькі ў цябе манеты, і за тое, што па прэйскуранту каштуе восем зялёненькіх, запрасіў бы пяць. Пачнеш таргавацца, да трох збавіць. Вось ты ва ўсім мяне вінаваціш, але ж, далібог, ён сволач. Бачыць, што табе да зарэзу трэба. Бывае, за дыск счаплення здзярэ больш, чым уся машына яму каштавала.
- Во як! Ну, а ўсё-такі, колькі з мяне?
- Каля даляра, думаю.
- Добра. І яшчэ за тарцовы ключ чвэрць даляра дам. З ім удвая лягчэй пойдзе. - Том перадаў аднавокаму грошы. - Дзякуй. А вока сваё чым-небудзь прыкрый.
Том з Элам селі ў машыну. Было ўжо зусім цёмна. Эл запусціў матор і ўключыў фары.
- Ну, бывай, - крыкнуў Том. - Можа, у Каліфорніі ўбачымся. - Грузавік развярнуўся на шашы і паехаў.
Аднавокі пастаяў, пазіраючы яму ўслед, потым пайшоў цераз павець у сваю халупку. Там было цёмна. Ён вобмацкам прабраўся да матраца на падлозе, лёг і заплакаў, а машыны, што з віскатам праносіліся па шашы, толькі шчыльнейшымі рабілі сцены яго адзіноты.
Том сказаў Элу:
- Калі б ты мне напачатку сказаў, што мы дастанем гэту штуковіну і сёння ж паставім, я цябе вар'ятам абазваў бы.
- Сёння абавязкова скончым, - сказаў Эл. - Толькі ты сам усё рабі. Я баюся, зацягну падшыпнік крыху тужэй, ён расплавіцца, недацягну - стукаць будзе.
- Пастаўлю, - сказаў Том. - Паляціць дык паляціць. Што зробіш.
Эл углядаўся ў густы змрок. Святла фар было недастаткова, каб разагнаць яго; спераду, на дарозе, трапіўшы на імгненне ў прамень рэфлектара, зялёным агнём бліснулі вочы кошкі, што выйшла на начное паляванне.
- А здорава ты яго прапясочыў, - сказаў Эл. - Управіў яму мазгі.
- Сам, дурань, напрасіўся. Усё пад'юджвае сябе, ные, усе свае беды звальвае на вока. Абібок, неахайнік. Можа, і возьмецца за розум, калі зразумее, што людзі наскрозь яго бачаць.
- Я, Том, не вінаваты, што падшыпнік згарэў.
Хвіліну памаўчаўшы, Том адказаў:
- У мяне проста рукі свярбяць на цябе, Эл. Заладзіў адно і тое, баішся, што цябе будуць лічыць вінаватым. Але не станавіся ў позу, калі цябе не чапаюць. І ўсё добра будзе.
Эл нічога не адказаў. Ён глядзеў проста перад сабой. Грузавік з грукатам і ляскам каціў па дарозе. Збоку на шашу выбегла кошка, Эл крута павярнуў на яе, але колы пранесліся міма, і кошка адскочыла назад у траву.
- Крыху прамахнуўся, - сказаў Эл. - Слухай, Том, ты чуў, як Коні гаварыў, што вечарамі будзе вучыцца? Я падумаў, можа, і мне ўзяцца. Ну радыё там, тэлебачанне альбо дызелі. З гэтым дарога можа адкрыцца.
- Можа, - сказаў Том. - Але перш даведайся, колькі з цябе за навучанне здзяруць. І падумай, ці зможаш ты вучыцца. У нас у Макалестары былі такія, што вучыліся па пошце. Толькі не прыпомню, каб хто з іх да канца ўсё адолеў. Надакучыць, і кідаюць.
- Эх, чорт, есці забыліся купіць.
- Нічога, ма нам многа прыслала. Усё прапаведнік не з'есць. Нам пакіне. Колькі яшчэ ехаць у гэту Каліфорнію?
Яны змоўклі, настала начная цемра, і зоркі на небе загарэліся яркім белым святлом.
Кейсі падняўся з задняга сядзення «доджа» і падышоў да краю дарогі, куды пад'ехаў грузавік.
- Я вас так хутка не чакаў, - сказаў ён.
Том узяў з кабіны загорнутыя ў мешкавіну часткі.
- Нам пашанцавала, - сказаў ён. - І ліхтар раздабылі. Адразу і адрамантуем.
- Вы ежу забыліся з сабой узяць, - сказаў Кейсі.
- Зробім усё, тады і падмацуемся. Давай, Эл, з'язджай з дарогі і ідзі пасвяці мне. - Том падышоў да «доджа», лёг на спіну і падлез пад машыну. Эл запоўз пад яе на жываце і пачаў свяціць ліхтарыкам. - Проста ў вочы свеціш, вышэй падымі. - Том уставіў поршань у цыліндр і, пакручваючы яго, пачаў засоўваць глыбей. Драцяная абмотка на кольцах зачапілася за сценкі цыліндра. Хуткім рухам рукі Том падштурхнуў поршань, і ўсе кольцы ўвайшлі ў цыліндр. - Добра, што зазор ёсць, а то кампрэсія выпіхвала б яго.
- Толькі каб дрот не заклініў кольцаў.
- Таму я малатком яго і расплюшчыў. Нічога, не з'едзе. А там латунь расплавіцца і, можа, яшчэ і сценкі пакрые.
- А драпін не застанецца?
Том засмяяўся:
- Сценкам гэтым нічога ўжо не страшна. Масла прапускае, як рэшата. Адной драпінай больш, адной менш, якая розніца. - Ён насадзіў шатун на вал і памацаў яго ніжнюю галоўку. - Трэба пракладак больш. Гэй, Кейсі!
- Га?
- Я зараз замацую падшыпнік. Вазьміся за завадную ручку і пакруціш, калі я табе крыкну. - Ён падцягнуў балты. - Ну, давай. Цішэй. цішэй! - Калі каленчаты вал паварочваўся, Том пахістваў падшыпнік. - Пракладак мнагавата, - сказаў ён. - Стой, Кейсі! - Том выкруціў балты, зняў некалькі пракладак і зноў паставіў балты. - Ну, Кейсі, крутні яшчэ разок. - Ён зноў пахістаў шатун. - Крышачку ходзіць. А калі яшчэ выняць пракладку, баюся, каб не заела. Зараз паспрабуем. - Том зноў адкруціў балты і зняў два слаі тонкай фольгі. - Цяпер, Кейсі, давай!
- Здаецца, парадак, - сказаў Эл.
Том крыкнуў:
- Цяжэй стала круціць, Кейсі?
- Не, па-мойму.
- Ну, здаецца, падагнаў. Дай бог, каб прыцерлася. Без інструменту бабіт не прышабрыш. А праўда, з тарцовым ключом куды лягчэй працаваць.
Эл сказаў:
- Гаспадар хопіцца - дзе ключ, а яго няма. Во разыдзецца!
- Не наша справа, - сказаў Том. - Мы ключа не кралі. - Ён лёгенька пастукаў па шплінтах і развёў іх канцы. - Цяпер, думаю, усё ў парадку. Гэй, Кейсі, ты пасвяці тут, а мы з Элам паддон пасадзім.
Кейсі апусціўся на калені, узяў ліхтарык і накіраваў пучок святла на рукі, якія асцярожна ставілі на месца пракладку і ўстаўлялі балты ў гнёзды паддона. Том з Элам паднялі цяжкі паддон, усадзілі канцы крайніх балтоў у адтуліны, потым астатнія, і тады Том патроху, адзін за адным, пачаў закручваць усе балты і, калі паддон роўна лёг на пракладку, туга зацягнуў іх ключом.
- Ну, як быццам гатова, - сказаў Том. Ён завінціў масляны каўпачок, уважліва агледзеў паддон, потым узяў з рук Кейсі ліхтарык і пасвяціў вакол сябе. - Вось і ўсё. Цяпер толькі зальём назад масла.
Том з Элам вылезлі з-пад машыны і ўлілі з вядра масла ў картэр. Том праверыў, ці няма ўцечкі.
- Ну вось, Эл, цяпер запускай, - сказаў ён.
Эл сеў у кабіну і націснуў на стартэр. Матор загрукатаў, з выхлапной трубы паваліў сіні дым.
- Збаў газ! - крыкнуў Том. - Масла будзе гарэць, пакуль дрот не расплавіцца. Во, ужо мякчэй ідзе. - Ён уважліва ўслухоўваўся ў абароты рухавіка. - Дай ранняе запальванне і збаў абароты. - Том зноў прыслухаўся. - Добра, Эл. Думаю, зроблена. Ну, дзе гэтае мяса?
- З цябе механік што трэба, - зазначыў Эл.
- Дзіва што. Я цэлы год у аўтамайстэрні працаваў. Першыя сотні дзве міль паедзем на малым газе. Няхай прытрэцца.
Пучкамі травы яны выцерлі запэцканыя маслам рукі і абцерлі аб штаны. Потым прагна накінуліся на вараную свініну, запіваючы яе вадой з бутэлькі.
- Я галодны, як воўк, - сказаў Эл. - Што цяпер рабіць будзем - паедзем у лагер?
- Сам не ведаю, - адказаў Том. - З нас там могуць здзерці яшчэ паўдаляра лішніх. Але пад'едзем, пагаворым з нашымі, скажам, што машыну адрамантавалі. А калі з нас запатрабуюць за стаянку, рушым далей. Нашы ж, вядома, хочуць ведаць, як там у нас. А добра, што ма настояла на сваім. Вазьмі, Эл, пасвяці навокал. Глянь, нічога не забыліся? Вунь тарцовы ключ падбяры. Яшчэ спатрэбіцца.
Святлом ліхтарыка Эл пашарыў па зямлі.
- Як быццам нічога.
- Добра. Я павяду легкавую. Ты, Эл, садзіся ў грузавік. - Том запусціў матор. Прапаведнік сеў да яго. Том вёў «додж» паволі, на самай малой скорасці. Эл ехаў следам. Легкавая асцярожна перабралася цераз неглыбокі кювет. Том сказаў: - Гэтыя «доджы» могуць цэлы дом на малым газе пацягнуць. Гаручае паступае скупа. Нам гэта на руку - памаленьку абкатаем падшыпнік.
«Додж» паволі ішоў па шашы. Дванаццацівольтавыя фары кідалі на палатно дарогі блікі жаўтаватага святла.
Кейсі павярнуўся да Тома:
- Проста дзіву даюся, як вы, хлопцы, умела паправілі машыну. Пасвяціў ліхтарыкам - і гатова. Я хоць і бачыў, як вы рамантавалі, але і цяпер нізашто б сам гэтага не зрабіў.
- Да машын трэба з маленства прывыкаць, - сказаў Том. - Справа не толькі ва ўмельстве. Тут патрэбна нешта большае. Цяпер хлапчукі жартам разбіраюць машыну да шрубкі.
У святло фар трапіў заяц. Ён імкліва і лёгка нёсся наперад, і яго доўгія вушы ўзляталі ўгору пры кожным скачку. Раз-пораз ён рабіў спробу збочыць з дарогі, але сцяна цемры нібы адштурхоўвала яго назад. Далёка наперадзе ярка засвяціліся аўтамабільныя фары, і неўзабаве сноп святла ўпаў на іх машыну. Заяц у нерашучасці спыніўся, потым павярнуўся і адскочыў да менш яркіх фар «доджа». Колы прайшлі па ім, мякка падкінуўшы машыну. Сустрэчны аўтамабіль са свістам пранёсся міма.
- Раздушыла, - зазначыў Кейсі.
Том сказаў:
- Некаторыя любяць іх душыць. А ў мяне кожны раз мароз па скуры. На слых матор працуе добра. Дрот на кольцах, відаць, расплавіўся. Не так дыміць.
- Вы здорава ўсё зрабілі, - сказаў Кейсі.
У цэнтры лагера стаяў невялікі драўляны дамок, на яго ганку з шыпеннем гарэў бензінавы ліхтар, які адкідваў шырокі круг белага святла. Непадалёк ад дамка былі разбіты з паўтузіна палатак, каля іх стаялі машыны. Вячэра ўжо была згатаваная, але на вогнішчах каля стаянак усё яшчэ тлела вуголле. Каля ганка, дзе гарэў ліхтар, сабралася невялікая купка мужчын; у яркім белым святле твары іх здаваліся грубымі і жылістымі, і ад таго, што лбы і вочы іх хаваліся ў густым цяні ад капелюшоў, падбародкі рэзка выдаваліся наперад. Хто сядзеў на прыступках, хто стаяў каля ганка, абапіраючыся локцямі на яго насціл. На ганку, адкінуўшыся да сцяны на нахіленым крэсле, сядзеў гаспадар, барабанячы пальцамі па калене. У пакоі гарэла газавая лямпа, але яе кволы агеньчык прападаў у яркім святле ліхтара, што шыпеў на ганку. Гаспадар быў цэнтрам усёй групы.
Том падвёў «додж» да краю дарогі і выключыў запальванне. Эл праехаў на грузавіку ў вароты.
- Заязджаць не буду, - сказаў Том, вылез з машыны і пайшоў праз вароты на яркае святло ліхтара.
Гаспадар апусціў пярэднія ножкі крэсла на дошкі ганка і нахіліўся наперад.
- Хочаце ў нас стаць на прывал?
- Не, - адказаў Том. - Мае тут спынілся. Гэй, та!
Бацька, які сядзеў на ніжняй прыступцы, сказаў:
- Я думаў, вы там на тыдзень засядзеце. Адрамантавалі?
- Нам моцна пашанцавала, - адказаў Том. - Яшчэ засветла дасталі што трэба. Як развіднее, адразу і рушым.
- Вось і добра, - сказаў бацька. - Маці непакоіцца - у бабкі ў нашай зусім розум памуціўся.
- Мне Эл ужо казаў. Ёй не лепш?
- Заснула, і то добра.
Гаспадар сказаў:
- Калі заедзеце і спыніцеся, плаціце пяць манет. Атрымаеце месца, ваду і галлё на вогнішча. І ніхто вас не патрывожыць.
- На чорта нам гэта, - сказаў Том. - Праспім ноч у кювеце бясплатна.
Гаспадар забарабаніў пальцамі па калене.
- Начамі тут шэрыфаў памагаты ходзіць. Можа прыдрацца. У нашым штаце начаваць пад адкрытым небам законам забаронена. І супраць бадзяжніцтва таксама ёсць закон.
- А калі я вам заплачу пяцьдзесят цэнтаў, дык я ўжо не бадзяга, так?
- Правільна.
Вочы ў Тома загарэліся злосцю:
- Шэрыфскі памагаты выпадкам вам не швагер?
Гаспадар падаўся наперад:
- Не, не швагер. І не настаў яшчэ той час, калі ўсякія бадзягі няшчасныя вучыць нас тут будуць.
- Браць па паўдаляра вы і самі ўмееце, гэтаму вучыць вас не трэба. Але з якой пары мы папалі ў бадзягі? Ніхто ў вас тут нічога не просіць. Значыць, усе мы бадзягі? Мы ж не клянчым у вас грошай і не просімся на начлег.
Людзі на ганку і каля яго замерлі ў напружаным маўчанні. На іх тварах не адбівалася нічога, але вочы, зацененыя палямі капелюшоў, крадком пазіралі ўгору, на гаспадара.
Бацька буркнуў:
- Перастань, Том.
- Добра, перастану.
Мужчыны, што сядзелі на прыступках і стаялі вакол высокага ганка, маўчалі. Вочы іх паблісквалі, адбіваючы святло бензінавага ліхтара. У яго яркіх промнях рысы іх твараў былі рэзка акрэсленыя. Людзі застылі ў нерухомасці, толькі позіркі іх пераходзілі то на гаспадара, то на Тома, але твары іх былі непранікальныя і абыякавыя. Начны матылёк наляцеў на ліхтар, разбіўся і ўпаў у цемру.
У адной палатцы жаласна заплакала дзіця, і мяккі жаночы голас пачаў супакойваць яго, потым ціха зацягнуў калыханку: «Цябе любіць наш гасподзь уначы. Спі, засні. Беражэ цябе гасподзь уначы, спі, засні».
Ліхтар на ганку шыпеў. Гаспадар запусціў руку ў выраз кашулі і пачухаў зарослыя сівымі валасамі грудзі. Ён увесь насцярожыўся ў прадчуванні сваркі. Прыглядаўся да людзей, што яго абкружалі, узіраўся ў іхнія твары. Але людзі застылі ў нерухомасці.
Том доўга маўчаў. Потым паволі падняў свае цёмныя вочы на гаспадара.
- Скандаліць я не збіраюся, - сказаў ён. - Калі цябе абзываюць бадзягам, цяжка сцярпець. Я не баюся, - дадаў ён ціха. - Кулакоў не пашкадую ні на вас, ні на шэрыфскага памагатага - пабачым яшчэ, хто каго. Толькі якая ад гэтага карысць?
Людзі заварушыліся, перамянілі позы, іх вочы, пабліскваючы, паволі ўзняліся, скіраваліся на гаспадара, сочачы за яго губамі. Гаспадар асмялеў. Ён адчуваў, што перамог, але не дастаткова для таго, каб перайсці ў наступленне.
- Няўжо ў цябе пяцідзесяці цэнтаў няма? - запытаўся ён.
- Ёсць. Але яны мне яшчэ спатрэбяцца. Я не буду траціць іх на начлег.
- На пражытак трэба ўсім зарабляць.
- Правільна. Толькі лепш так зарабляць, каб не забіраць яго ў другіх.
Людзі зноў перамянілі паставы. Бацька сказаў:
- Мы паедзем заўтра раным-рана. Паслухайце, містэр, мы ж вам заплацілі. Хлапец гэты з нашай сям'і. Дазвольце яму застацца. Мы ж заплацілі.
- Пяцьдзесят цэнтаў з машыны, - сказаў гаспадар. - Гэтак кожны зробіць - пакіне машыну за варотамі, а сам будзе карыстацца ўсім бясплатна.
Том сказаў:
- Мы далей паедзем. Раніцай стрэнемся. Будзем вас чакаць. Эл няхай застаецца, а мы возьмем з сабой дзядзьку Джона. - Ён глянуў на гаспадара: - Гэтак згодны?
Гаспадар імгненна прыняў рашэнне, пайшоў на ўступку:
- Калі застанецца столькі чалавек, за колькі заплачана, дык згодзен.
Том выняў з кішэні капшук, які паспеў ужо ператварыцца ў пакамечаны, зашмальцаваны мяшэчак з адсырэлым тытунёвым пылам на дне. Ён скруціў тонкую цыгарку і шпурнуў капшук убок.
- Мы хутка паедзем, - сказаў ён.
Бацька загаварыў, ні да кога з прысутных не звяртаючыся асабіста:
- Нялёгка вось так сарвацца з месца. У нас быў дом, гаспадарка. Мы не галота бяздомная. Мы жылі на сваёй ферме, пакуль нас трактарамі не прагналі.
Хударлявы малады чалавек з выгаралымі да жаўцізны брывамі паволі павярнуў да яго галаву:
- Баваўнаробы?
- Так, здольнікі. Раней самі былі гаспадарамі.
Малады чалавек адвярнуўся ад яго.
- Мы таксама, - прамовіў ён.
- Добра хоць, што нядоўга ўжо засталося цярпець, - сказаў бацька. - Прыедзем на Захад - будзем працаваць, займеем зямельку з вадой.
Каля самага ганка стаяў чалавек у падранай адзежы. Чорны пінжак звісаў лахманамі, штаны на каленях былі працёртыя да дзірак. На твары ў яго, там, дзе пыл змяшаўся з потам, былі брудныя палосы. Ён матнуў галавой у бок бацькі:
- У вас, відаць, прыхаваны невялічкі глечык з грашыма.
- Не, грошай у нас зусім мала, - сказаў бацька. - Але нас шмат, і ўсе мы працавітыя. Добра заробім, і ўсе грошы пойдуць у агульны кацёл. Зажывём.
Чалавек у лахманах выслухаў бацьку, шырока расплюшчыўшы вочы, і раптам засмяяўся, потым смех яго перайшоў у вісклівае хіхіканне. Усе павярнулі да яго галовы. Хіхікаючы, ён пачаў захліпацца і закашляўся. Калі ён нарэшце адолеў прыступ кашлю, вочы ў яго былі чырвоныя, на іх выступілі слёзы.
- Ты думаеш, там... а божухна! - ён зноў захіхікаў. - Ты думаеш, там табе... будуць добра плаціць... ой, смех! - І, перастаўшы смяяцца, іранічна сказаў: - На збор, можа, пойдзеце апельсінаў? Грушы, можа, будзеце збіраць?
Бацька з годнасцю адказаў:
- Будзем рабіць тое, што нам прапануюць. У іх там работы шмат.
Чалавек у лахманах ціхенька рагатнуў. Том з раздражненнем павярнуўся да яго.
- А што тут такога смешнага?
Абадранец сцяў губы і панура ўтаропіўся на масніцы ганка.
- Вы, няйначай, у Каліфорнію едзеце?
- Я табе сам гэта сказаў, - адказаў бацька. - Падумаеш, які здагадлівы знайшоўся!
Абадранец паволі прагаварыў:
- А я... я вяртаюся адтуль. Пабыў ужо там.
Твары людзей імгненна павярнуліся да яго. Усе напружана чакалі. Ліхтар на ганку перастаў шыпець і ціха пыхкнуў. Гаспадар апусціў пярэднія ножкі крэсла на падлогу, падняўся, падпампаваў ліхтар, і той зноў гучна і тонка зашыпеў. Гаспадар вярнуўся на месца, але ўжо не адкінуўся да сцяны. Чалавек у лахманах абвёў позіркам твары людзей.
- Еду назад паміраць галоднай смерцю. Лепш ужо адразу з голаду памерці.
Бацька сказаў:
- Што ты вярзеш? У мяне вось рэкламны лісток ёсць - там пра добрыя заробкі пішацца, а надоечы я і ў газеце чытаў: ім зборшчыкі фруктаў патрэбныя.
Абадранец павярнуўся да бацькі:
- А ў цябе ёсць куды вярнуцца?
- Няма. Нас сагналі з зямлі. Прайшліся трактарамі аж да самага дома.
- Назад, значыць, не павернеш?
- Вядома, не.
- Тады не буду цябе расстройваць.
- А ты мяне і не расстроіш. У мяне лісток ёсць, там сказана, што людзі патрэбны. Дарэмна ж не будуць пісаць такія лісткі. Яны вялікіх грошай каштуюць. Іх не друкавалі б, каб не было патрэбы ў людзях.
- Не буду цябе расстройваць.
Бацька сярдзіта сказаў:
- Дурасць нейкую ляпнуў, а адрачыся не хочаш. У лістку ж ясна напісана: людзі патрэбныя. А ты на смех мяне падымаеш, кажаш: не, не патрэбныя. Хто ж з нас ілжэ?
Абадранец паглядзеў у сярдзітыя вочы бацькі, і позірк яго пахмурнеў.
- У лістку ўсё правільна, - сказаў ён. - Людзі патрэбныя.
- Якога ж ты чорта бударажыш нас сваім смехам?
- Бо вы не ведаеце, якія ім людзі патрэбныя.
- Куды ты хіліш?
Сабраўшыся з духам, абадранец сказаў:
- Слухай, колькі ім там чалавек трэба?
- Восемсот напісана, а гэта ж толькі ў адным маленькім месцы.
- Аранжавы такі лісток?
- Аранжавы.
- Там і прозвішча стаіць... такі і такі агент па найме?
Бацька палез у кішэню і выцягнуў з яе складзены папалам лісток.
- Правільна. Адкуль ты ведаеш?
- Паслухай, - сказаў абадранец, - усё гэта лухта. Яму трэба восемсот рабочых. Ён бярэ і друкуе пяць тысяч лісткоў, і яны трапляюць на вочы, можа, дваццаці тысячам чалавек. Тысячы дзве-тры з іх зрываюцца з месца - тыя, у каго розум памутнеў ад гора.
- Дык гэта ж нейкая бязглуздзіца! - усклікнуў бацька.
- А ты спярша стрэнься з чалавекам, які выпускае такія лісткі. З ім самім альбо з тым, хто на яго працуе. Пажыві ў лагеры ля прыдарожнай канавы разам з паўсотняй такіх самых сем'яў, як твая. Чалавек гэты зазірне ў тваю палатку, гляне, ці засталося ў цябе што ў рот пакласці, і, калі ўбачыць, што пуста, запытае: «Хочаш работу атрымаць?» Ты ўзрадуешся: «Вядома, хачу, містэр. Вялікі вам дзякуй за такую прапанову». А ён скажа: «Я вазьму цябе». Ты запытаеш: «Калі выходзіць?» Ён табе ўсё расталкуе - і куды прыходзіць, і а якой гадзіне - і далей пойдзе. Яму, можа, усяго дзве сотні рабочых патрэбныя, а ён пагаворыць з пяццю сотнямі, а тыя яшчэ і іншым раскажуць, і, калі ты прыйдзеш, куды табе сказана, там іх ужо тысяча. Тады чалавек гэты абвесціць: «Я плачу дваццаць цэнтаў у гадзіну». Каля паловы з тых, што прыйшлі, назад пойдзе, але чалавек пяцьсот застанецца - яны так згаладаліся, што гатовыя і за сухі праснак працаваць. У агента гэтага кантракт на збор персікаў альбо на збор бавоўны. Цяпер дайшло? Чым больш набяжыць народу і чым людзі галаднейшыя, тым менш ён плаціць будзе. А калі яму трапляюцца шматсямейныя, з дзецьмі малымі... дык... Ах, чорт! Я ж казаў, што не буду расстройваць цябе.
Людзі пазіралі на чалавека ў лахманах халоднымі вачамі, ацэньваючы кожнае яго слова. Ён сумеўся.
- Сказаў, што не буду расстройваць, але ж вось не стрымаўся. Ты ўсё роўна паедзеш. Назад не павернеш.
На ганку запанавала цішыня. А ліхтар шыпеў, і вакол яго вяночкам кружыліся начныя матылі. Чалавек у лахманах усхвалявана загаварыў:
- Я параю табе, што рабіць; калі такі вось агент пачне на працу зазываць. Слухай! Ты спытайся ў яго, колькі ён плаціць будзе. Скажы яму, няхай на паперцы табе напіша. Папрасі, няхай напіша. Я ўсім вам кажу: вас абдураць, калі вы гэтага не зробіце.
Гаспадар, седзячы на крэсле, падаўся наперад, каб лепш разгледзець гэтага абадранага, бруднага чалавека. Ён пачухаў зарослыя сівымі валасамі грудзі і халодным тонам запытаўся:
- А ты часам не з бунтаўшчыкоў гэтых? Не з рабочых-падбухторшчыкаў?
Чалавек у лахманах выгукнуў:
- Не, бог сведка!
- Іх шмат развялося цяпер, - сказаў гаспадар. - Швэндаюцца тут, людзей баламуцяць. Народ з толку збіваюць. У злосць уводзяць. Іх шмат бадзяецца тут. Але хутка мы прыбяром іх да рук, усіх баламутаў гэтых. Прагонім з краіны. Хочаш працаваць - цудоўна. Не хочаш - чорт з табой. Падбухторваць мы не дазволім.
Чалавек у лахманах выпрастаўся.
- Я хацеў перасцерагчы вас, людзі, - сказаў ён. - Цэлы год прайшоў, пакуль я разабраўся ва ўсім гэтым. Спачатку двух дзяцей пахаваў і жонку, і толькі тады зразумеў. Але вам не ўтлумачыш, я ведаю. Мне таксама не ўтлумачылі ў свой час. Хіба ж раскажаш пра тое, як малыя ляжаць у палатцы з успушанымі жыватамі, а самі - скура ды косці, дрыжаць і скавычуць, як шчанюкі, а я бегаю, работы шукаю... не за плату, не за грошы! - выкрыкнуў ён. - Госпадзі, хоць за кубак мукі і лыжку здору! А потым прыходзіць следчы. Смерць дзяцей настала ад сардэчнай недастатковасці, кажа. Так і запісаў. Іх калаціла, а жываты надзьмутыя, як пузыры парасячыя.
Навокал яго ўсе маўчалі, трохі раскрыўшы раты. Амаль стаіўшы дыханне, пазіралі на чалавека ў лахманах.
Ён абвёў позіркам кола твараў, павярнуўся і шпарка пайшоў прэч, у цемру. Яна праглынула яго, але доўга яшчэ чулася шарканне крокаў, шоргат ног па дарозе. Па шашы прамчалася легкавая машына, і фары яе на міг вырвалі з цемры постаць чалавека: ён ішоў, валакучы ногі, нізка апусціўшы галаву, засунуўшы рукі ў кішэні чорнага пінжака.
Людзі каля ганка неспакойна заварушыліся. Нехта прамовіў:
- Ну што ж, час ужо позні. Трэба спаць класціся.
Гаспадар сказаў:
- Лайдак нейкі. Цяпер па дарогах шмат такіх бадзяецца. - І змоўк. Адкінуўся разам з крэслам да сцяны, пачухаў шыю пад падбародкам.
Том сказаў:
- Зайду на хвілінку да маці, а тады крыху далей ад'едзем.
Джоўды пайшлі ад ганка.Бацька сказаў:
- А што, калі ён праўду казаў?
Яму адказаў прапаведнік:
- Вядома, праўду. Сваю праўду. Ён нічога не выдумляў.
- А мы як? - запытаўся Том. - Для нас гэта таксама праўда?
- Не ведаю, - сказаў Кейсі.
- Не ведаю, - сказаў бацька.
Яны падышлі да палаткі - перакінутага цераз вяроўку брызенту. Усярэдзіне было цёмна і ціха. Калі яны падышлі блізка, нешта шэрае заварушылася на зямлі каля ўвахода і паднялося на ўзровень чалавечага росту. Гэта маці выйшла ім насустрач.
- Усе спяць, - сказала яна. - І бабка нарэшце задрамала. - Тут яна ўбачыла Тома і занепакоена запыталася: - Як ты тут апынуўся? Усё абышлося шчасліва?
- Наладзілі, - адказаў Том. - Можам ехаць далей разам з вамі.
- Дзякуй богу, - сказала маці. - Мне ўжо тут не сядзіцца. Хутчэй бы туды, дзе зеляніна вакол, прыволле. Хутчэй бы даехаць.
Бацька адкашляўся.
- А тут адзін расказваў...
Том таргануў яго за локаць.
- Ага, цікава было паслухаць, - сказаў ён. - Народу туды, кажа, едзе процьма.
Маці прыглядалася да іх у змроку. Пад брызентавым навесам кашлянула і засапла ў сне Руці.
- Я іх памыла. За ўсю дарогу першы раз вады на купанне хапіла. І вам яшчэ засталося, можаце памыцца. У дарозе хутка пэцкаешся.
- Усе на месцы? - запытаўся бацька.
- Усе, акрамя Коні з Разашарнай. Захацелі спаць на паветры. Сказалі, горача пад брызентам.
Бацька прабурчаў:
- Гэтая Разашарна дужа капрызная стала і пераборлівая.
- Першае дзіця, - сказала маці. - Яны абое проста трасуцца над ім. Ты сам такі быў.
- Ну, мы паехалі, - сказаў Том. - Збочым з дарогі дзе-небудзь непадалёк. Можа, мы вас прамаргаем, дык вы паглядайце. З правага боку будзем.
- А Эл застаецца?
- Ага. Замест яго дзядзька Джон паедзе з намі. Добрай ночы, ма.
Яны прайшлі праз сонны лагер. Каля адной палаткі няроўным агнём гарэла маленькае вогнішча, ля кацялка, у якім варылася ранняе снеданне, сядзела жанчына. У нос ударыла смачным пахам фасолі.
- Вось каб з'есці талерачку, - далікатна прамовіў Том, праходзячы міма.
Жанчына ўсміхнулася:
- Яшчэ не згатавалася, а то пачаставала б. Прыходзьце рана-раненька.
- Дзякуй, мэм, - адказаў Том.
Ён, Кейсі і дзядзька Джон прайшлі паўз ганак. Гаспадар усё яшчэ сядзеў на сваім крэсле, ліхтар шыпеў і час ад часу ярка ўспыхваў. Гаспадар павярнуўся да іх тварам.
- Бензін канчаецца, - зазначыў Том.
- Ага, час ужо закрываць.
- Манеткі па шашы, здаецца, ужо не коцяцца, - сказаў Том.
Ножкі крэсла грукнулі аб насціл ганка.
- Ты кінь задзірацца. Я цябе запомніў. Ты таксама з бунтаўшчыкоў.
- Трапіў у самую кропку. Я - бальшавік.
- Дужа многа вас развялося апошнім часам.
Том засмяяўся і, выйшаўшы разам з Кейсі і дзядзькам Джонам за вароты, палез у «додж». Сядаючы, ён прыхапіў камяк зямлі і кінуў яго ў святло. Яны пачулі, як стукнула па сцяне, убачылі, што гаспадар ускочыў з крэсла і пачаў узірацца ў цемру. Том уключыў запальванне і выехаў на шашу. Ён уважліва прыслухоўваўся да работы матора - ці не стукае. Шаша бегла перад ім, ледзь бачная ў слабым святле фар.
Машыны перасяленцаў выпаўзалі з бакавых дарог на аўтастраду, што ішла праз горы і долы, і кіравалі на Захад. Удзень яны, як кузуркі, паспешліва беглі ў заходнім напрамку, а калі ў дарозе іх заспяваў вячэрні змрок, збіваліся, як кузуркі, у кучкі, бліжэй да жытла і вады. Людзі ціснуліся адзін да аднаго, бо іх даймала адзінота і разгубленасць, бо ўсе яны ўцякалі з тых месцаў, дзе іх спасціглі смутак, нядоля і паражэнне, бо ўсе яны імкнуліся дабрацца да новага таямнічага краю; яны гутарылі адзін з адным, дзяліліся перажытым, і ежай, і спадзяваннямі на нешта добрае ў новых краях. І бывала так, што якая-небудзь сям'я рабіла прывал каля ручая, потым другая спынялася там дзеля вады і людской кампаніі, а тады і трэцяя далучалася да тых, хто выбраў гэту стаянку і быў, відаць, задаволены ёю. І да захаду сонца там маглі сабрацца да дваццаці сем'яў, дваццаці машын.
Дзіўныя рэчы здараліся вечарамі: дваццаць сем'яў рабіліся адной сям'ёй, дзеці - агульнымі дзецьмі. Страта роднага кута рабілася агульнай стратай, шчаслівае жыццё там, на Захадзе, - агульнай марай. І бывала так, што хвароба аднаго дзіцяці ўводзіла ў роспач дваццаць сем'яў, сто чалавек. І сто чалавек усю ноч захоўвалі поўную цішыню, ахопленыя набожным страхам, калі ў адной з палатак раджала жанчына, а раніцай сто чалавек радаваліся нараджэнню дзіцяці. Сям'я, якая, можа, яшчэ толькі папярэдняй ноччу пакутавала ў адзіноце і страху, цяпер капалася ў сваім скарбе, шукаючы, што падарыць нованароджанаму. Вечарам каля вогнішча дваццаць сем'яў зліваліся ў адну. І гэтая аб'яднаная сям'я была бівачнай адзінкай, якая існавала адзін вечар, адну ноч. Даставалася загорнутая ў коўдру гітара, яе настройвалі, і ўначы гучалі песні - песні аб народзе. Мужчыны спявалі іх словамі, а жанчыны з закрытымі ратамі цягнулі мелодыю.
Штоноч ствараліся маленькія сукупнасці людзей - мініяцюрныя грамадствы, і ў такім «грамадстве», у такім свеце было ўсё - і дружба, і варожасць; у ім былі выхвалякі і баязліўцы і былі ціхія, сціплыя, добрыя людзі. Кожную ноч між імі завязваліся адносіны, без якіх не існуе чалавечае грамадства, і кожную раніцу яны разам знімаліся з месца, як вандроўны цырк.
Напачатку ў гэтых грамадствах, што ўзнікалі і рушыліся, людзі паводзілі сябе нерашуча, нясмела, але паступова стварэнне іх рабілася прывычнай справай. Наперад выступалі важакі, узнікалі правілы, нараджаліся законы. І чым далей на захад забіраліся гэтыя грамадствы, тым больш дасканалымі і добраўпарадкаванымі яны рабіліся, бо стваральнікі іх усё больш набіраліся вопыту.
Сем'і даведваліся, якія правы павінны захоўвацца: права пабыць у адзіноце ў сваёй палатцы; права схаваць у сэрцы памяць аб горкім мінулым; права ўдзельнічаць у гутарцы ці толькі слухаць; права адхіліць альбо прыняць дапамогу; права прапанаваць дапамогу альбо адмовіць у ёй; права сына пазаляцацца да дзяўчыны і права дачкі прыняць заляцанне; права галоднага быць накормленым і пераважныя правы цяжарных і хворых перад усімі іншымі правамі.
Сем'і таксама даведваліся, хоць ніхто іх гэтаму не вучыў, якія правы тояць у сабе зло і падлягаюць вынішчэнню: права парушаць чыю-небудзь адзіноту, узнімаць шум, калі лагер спіць, права спакусіць дзяўчыну, гвалціць, права на пралюбадзейства, крадзеж і забойства. Гэтыя правы няшчадна душыліся, бо калі іх не выкараніць, гэтыя маленькія грамадствы і ночы адной не праіснавалі б.
І па меры таго як грамадствы гэтыя ўсё далей пасоўваліся на захад, правілы самі сабой атрымлівалі сілу законаў. Незаконна пэцкаць каля лагера; незаконна брудзіць пітную ваду; незаконна сытна і смачна есці на вачах у галоднага і не падзяліцца з ім ежай.
А з узнікненнем законаў узнікалі і кары - кары ўсяго двух відаў: кароткае, але жорсткае збіванне ці выгнанне; выгнанне было больш суровай карай. Бо калі хто пераступаў закон, імя яго і твар заўсёды былі з ім, і не было яму месца ні ў якім з гэтых грамадстваў, дзе б яно ні стваралася.
Маральныя асновы ў такіх грамадствах былі цвёрда акрэсленыя і строгія: мужчына абавязкова павінен быў паздароўкацца пры сустрэчы, мужчына мог жыць з жанчынай, калі начаваў разам з ёю ў палатцы, калі стаў бацькам і абаронцам яе дзяцей. Але ён не мог спаць сёння з адной, а заўтра з другой, бо гэта пагражала бядой грамадству.
Сем'і ўсё далей забіраліся на Захад, спосабы стварэння гэтых грамадстваў усё больш удасканальваліся, і людзі адчувалі сябе ў бяспецы, бо нормы супольнага жыцця былі цвёрдыя і непарушныя, і сям'я, якая выконвала ўсе правілы, магла нічога не баяцца.
Самі сабой паяўляліся органы ўлады, з важакамі, са старэйшынамі; дурны не мог прапанаваць сваю дурноту грамадству. Гэтае начное жыццё было нечым накшталт страхоўкі. Чалавек, у якога была ежа, карміў галоднага і тым страхаваў ад голаду самога сябе. А калі памірала малое, каля ўвахода ў палатку вырастала кучка сярэбраных манет, бо дзіця трэба было хоць пахаваць па-чалавечы, раз яно не ўзяло ад жыцця нічога іншага. На могілках для беднякоў і бадзяг можна пахаваць якога-небудзь старога, толькі не немаўля.
Для стварэння такіх грамадстваў патрэбны былі пэўныя матэрыяльныя ўмовы, асабліва вада - рэчка, ручай, крыніца ці хоць бы водаправодны кран, пакінуты без нагляду. І яшчэ каб участак быў роўны - для палатак, крыху сухога галля ці дроў на вогнішча. А калі паблізу яшчэ і звалка была, дык зусім добра: там можна знайсці вельмі патрэбныя да ўжытку рэчы - пячную трубу, пагнутае аўтамабільнае крыло, каб загарадзіць ім агонь ад ветру, бляшанкі з-пад кансерваў, каб у іх згатаваць ежу і есці з іх.
Грамадствы ўтвараліся вечарамі. Людзі збочвалі з шашы і аддавалі што ў каго было - палаткі, сэрцы, мозг.
Раніцай палаткі разбіралі, брызент згортвалі, жэрдкі прывязвалі да падножак, матрацы клалі ў машыну на сваё месца, посуд - на сваё. І, едучы ўсё далей на Захад, сем'і мала-памалу асвойвалі тэхніку пабудовы жытла ўвечары і яго разбурэння на золку. І з цягам часу кожны член сям'і звыкаўся са сваім месцам, са сваімі абавязкамі, і стары і малы ведаў, дзе яму сядзець у машыне, а стомнымі, душнымі вечарамі, калі пад'язджалі да стаянкі, кожны ведаў свае абавязкі і выконваў іх, не чакаючы нічыіх указанняў, - дзеці збіралі ламачча на вогнішча, прыносілі ваду; мужчыны ставілі палаткі, раскладалі матрацы; жанчыны гатавалі вячэру, кармілі сям'ю. І ўсё гэта рабілася без пануквання. У сем'яў, жыццё якіх раней было абмежавана ўначы сценамі дома, а ўдзень - сваёй фермай, цяпер паявіліся новыя межы. І доўгімі спякотнымі днямі яны моўчкі сядзелі ў машынах, што паволі пасоўваліся на Захад, а начамі зліваліся з групай людзей, з якімі ім выпала стаць на прывал.
Яны перамянілі сваё жыццё так, як яго можа перамяніць толькі чалавек. Яны ўжо былі не фермеры, а вандроўнікі. І думы, разлікі, засяроджанае маўчанне, якія раней прызначаліся палям, цяпер прызначаліся дарозе, адлегласці, Захаду. Чалавек, думкі якога раней былі скіраваны на акры, цяпер лічыў мілі вузкай стужкі бетону. І ў думках яго, у яго клопатах не было ўжо месца дажджу, ветру, пылу і палявым усходам. Вочы пільна сачылі за шынамі, вушы ўслухоўваліся ў стукат матора, галава пухла ад думак пра масла, бензін, пра станчэлы слой гумы паміж паветрам у камеры і бетонам шашы. Зламаная шасцярня была трагедыяй. Самае моцнае жаданне вечарамі- вада. І кацялок з вячэрай над вогнішчам. Здароўе - залог імкнення ехаць далей, здольнасці ехаць далей і волі ехаць да канца. Жаданні рваліся на Захад, абганяючы людзей, а былыя страхі перад засухай ці паводкай цяпер уступілі месца страху перад усім, што магло спыніць іх марудны рух на Захад.
Месцы прывалаў цяпер ужо былі пастаянныя - ад аднаго да другога адзін дзень шляху.
У дарозе некаторыя сем'і паддаваліся паніцы і ехалі дзень і ноч, спалі ў машынах - спяшаліся на Захад, імкнуліся хутчэй уцячы ад дарогі, ад самога руху. Ім карцела як мага хутчэй дзе-небудзь асесці, і яны, утаропіўшы вочы на захад, гналі і гналі туды свае бразгатлівыя машыны.
Але большасць сем'яў хутка прыстасавалася і ўвайшла ў рытм новага жыцця. І на захадзе сонца...
Пара ўжо месца для прывалу пашукаць.
Вунь, наперадзе, палаткі.
Машына з'язджала з шашы, спынялася, і з тае прычыны, што не яны сталі там першыя, трэба было не забываць пра далікацтва.
У вас тут можна стаць на начлег?
Калі ласка, нам гэта вялікі гонар.
З якога вы штата?
З самага Арканзаса.
Вунь, у чацвёртай палатцы, таксама арканзасцы.
Праўда? І самае галоўнае пытанне: як з вадой?
Яе тут колькі хочаш, толькі на смак не вельмі.
Дзякуй вам.
Няма за што.
Без далікацтва не абысціся. Машына з грукатам пад'язджала да крайняй палаткі і спынялася. Стомленыя пасажыры вылазілі з яе, распраўлялі замлелае цела. Вырастала яшчэ адна палатка; малыя беглі з вёдрамі па ваду, старэйшыя дзеці секлі голле, збіралі ламачча. Успыхвала вогнішча, гатавалася вячэра - варылася ці смажылася. Падыходзілі тыя, што прыехалі раней, усе дазнаваліся адзін у аднаго, хто з якога штата, знаходзіліся агульныя знаёмыя, а бывала, і сваякі.
Аклахома? Якая акруга?
Чэрокі.
Гэ! У мяне там радня. Эленаў ведаеце? Іх там, у Чэрокі, дзе толькі няма. А Ўілісаў?
А як жа, ведаю.
Стваралася новая бівачная адзінка. Пачынала змяркацца, але яшчэ дацямна новыя начлежнікі паспявалі ўвайсці ў жыццё лагера, перакінуцца словам з кожнай сям'ёй. Свае людзі, добрыя людзі.
Я Эленаў, колькі сябе помню, ведаю. Сайман Элен, стары Сайман, з першай жонкай не ладзіў. Паўкроўка з племені чэрокі. Прыгожая, як... вараная жаробка.
Малодшы Сайман, што ажаніўся з дачкой Рудольфаў, так? Ага, ён самы. Пераехалі ў Элід і добра зажылі там - як людзі.
З усіх Эленаў яму аднаму пашчасціла. Гараж займеў.
Калі прыносілі вады і галля, дзеці пачыналі нясмела пахаджваць між палатак. На якія толькі хітрыкі не ішлі, каб пазнаёміцца! Хлопчык спыняўся каля незнаёмага хлопчыка і пільна ўглядаўся ў каменьчык на зямлі, падбіраў яго, старанна разглядаў, пляваў на яго, праціраў і аглядаў з усіх бакоў, пакуль другі хлопчык нарэшце не пытаўся: што гэта ў цябе?
А ўладальнік каменьчыка абыякава, безуважна адказваў: а нічога, проста каменьчык.
Чаму ж ты так яго разглядаеш?
А мне здалося, у ім золата.
Як ты ўбачыў золата? У камянях золата не залатое, а чорнае.
Кожны гэта ведае.
Мусіць, залатая падманка, а ты - золата!
Яшчэ чаго. Тата столькі золата пазнаходзіў і навучыў мяне, як шукаць.
А табе вельмі хочацца знайсці цэлы самародак?
Пытаешся! Я купіў бы сабе, чорт вазьмі, такую цукерку, што табе і ў сне не снілася.
Мне не дазваляюць лаяцца, а я ўсё роўна.
І я лаюся. Гайда да ручая.
Дзяўчаты таксама знаходзілі сабе сябровак і бянтэжліва расказвалі пра свае поспехі і надзеі. Жанчыны ўвіхаліся каля вогнішчаў, спяшаліся накарміць сям'ю. Калі ў іх быў запас грошай - свінінай з бульбай і цыбуля; праснакамі з жароўні ці пшанічнымі пампушкамі са шчодрай падліўкай; смажанай грудзінкай ці адбіўной і чорным гаркаватым чаем у бляшанцы з-пад кансерваў. Калі з грашыма было туга - маісавымі блінамі, румянымі, хрумсткімі, залітымі салам, у якім яны смажыліся.
Сем'і, што мелі запас грошай ці проста пускалі грошы на вецер, елі кансерваваныя бабы і персікі, куплёны хлеб і кексы. Але яны ласаваліся гэтым у сваіх палатках, бо есці такія смачныя рэчы на людзях нягожа. Зрэшты, дзеці, жуючы свае маісавыя бліны, усё роўна чулі пах гарачых бабоў, і ім было крыўдна.
Толькі паспявалі павячэраць, памыць і выцерці посуд, наставала начная цемра, і мужчыны прысаджваліся на кукішкі пагутарыць. Гаварылі пра зямлю, якую яны пакінулі. Што будзе далей, невядома, казалі яны. Сапсавалася наша краіна.
З часам усё паправіцца, толькі нас там ужо не будзе.
Відаць, яны рашылі, што мы што-небудзь парушылі, самі таго не ведаючы.
Адзін чалавек мне казаў, блізкі да ўрада, і ён мне казаў: вас яры даканалі. Блізкі да ўрада чалавек. Калі б, кажа, вы ўпоперак контураў аралі, тады ў зямлі яроў не павымывала б. Але праверыць мне не давялося. А прышлыя гэтыя таксама ўпоперак не аруць. Як павядуць баразну, дык мілі на чатыры без спыну і нідзе ўбок не звернуць, хоць бы там сам бог стаяў.
Яны ціха расказвалі пра свой дом. У мяне склеп быў пад ветраком. Ставілі там малако на смятанку, кавуны трымалі. Залезеш туды, бывала, у поўдзень, у самую спёку, а там халадок на любы густ. Разрэжаш кавун - такі халодны, аж зубы заходзяцца. А з бака вада кап-кап...
Расказвалі пра свае трагедыі. Быў брат у мяне, Чарлі. Валасы жоўтыя, што тая кукуруза. Дарослы ўжо хлопец быў. На акардэоне цудоўна іграў. І вось баранаваў ён аднойчы ў полі, нахіліўся пастронак выслабаніць, а тут змяя грымучая як зашыпіць! Коні памчалі, і барана прайшла па Чарлі, прапарола зубамі жывот, вырвала кішкі, знявечыла твар... Ох, госпадзі!
Гаварылі і пра будучыню. Цікава, як там будзе, у Каліфорніі?
На малюнках усё так цудоўна - залюбавацца можна. Я бачыў адзін - гарачае сонца, прыгажосць наўкол, дрэвы арэхавыя, ягаднікі, а ззаду, зусім блізка, проста рукой падаць - высокія горы са снежнымі вяршынямі. Вачэй не адарваць.
Толькі каб работу знайсці, і ўсё будзе добра. Халадоў зімою там не бывае. Дзеці па дарозе ў школу не замерзнуць. Сам я ўмею чытаць, але мне з гэтага няма радасці, не прывык я чытаць, як іншыя.
А іншы раз хто-небудзь выходзіць з палаткі з гітарай. Садзіцца на скрыню каля ўвахода, і людзі з усяго лагера няспешна падыходзяць да яго, быццам іх нечым прыцягвае. Шмат хто брынкае на гітары, але гэты, здаецца, умелец. Ёсць што паслухаць - акорды густыя, мерныя, рытмічныя, а мелодыя бяжыць па струнах лёгкімі крокамі. Цяжкія, грубыя пальцы ходзяць па ладах. Чалавек іграў, а людзі паволі падыходзілі, пакуль не абступалі яго цесным колам, і тады ён зацягваў: «Бавоўна па дзесяць, а мяса па сорак». І людзі падхоплівалі словы. Ён спяваў: «Навошта, дзяўчаты, вы косы рэжаце?» І людзі падцягвалі. Ён з надрывам спяваў: «Пакідаю я родны Тэхас» - жудасную песню, якую спявалі яшчэ да прыходу гішпанцаў, толькі словы тады былі індзейскія.
Гэта згуртоўвала людзей, яднала, і ў цемры позіркі іх скіроўваліся ўсярэдзіну, думкі адбягалі назад, у мінулае, і сум, які апаноўваў іх, быў адпачынкам, выратавальным сном. Чалавек спяваў «Блюзы Макалестара», а потым, каб дагадзіць старым, - «Мяне гасподзь наш кліча да сябе». Музыка навявала на дзяцей дрымоту, яны ішлі ў палаткі спаць, але песні ўваходзілі ў іхнія сны.
Нарэшце гітарыст падымаўся і пазяхаў. Добрай ночы, людзі, казаў ён.
І чуўся шэпт у адказ: добрай табе ночы.
І кожнаму хацелася самому ўмець іграць на гітары - гэта ж так прыемна. Людзі разыходзіліся, клаліся спаць, лагер заціхаў. А над палаткамі насіліся совы, удалечыні гаўкалі каёты, у лагер пракрадваліся скунсы, шукаючы, чым пажывіцца, - расхаджвалі ўперавалку, нахабныя, дзёрзкія смярдзючкі.
Мінала ноч, і з першым пробліскам зары жанчыны выходзілі з палатак, распальвалі вогнішчы і варылі каву. Следам выходзілі мужчыны і ціха перамаўляліся між сабой у перадсвітальным сутонні.
Пераедзеш раку Каларада, а далей, кажуць, пустыня. Сцеражыся пустыні. Глядзі, не засядзь там. На ўсякі выпадак вазьмі як больш вады.
Цераз пустыню я паеду ноччу.
І я. Яна з каго хочаш дух выб'е.
Таропка снедалі, мылі і выціралі посуд. Разбіралі палаткі. Усе спяшаліся хутчэй рушыць у дарогу. І калі сонца выплывала над гарызонтам, на стаянцы ўжо было пуста, толькі дзе-нідзе валялася пакінутае людзьмі смецце. Але мясціна гатова была прыняць новых падарожнікаў наступнай ноччу.
А машыны перасяленцаў, як кузуркі, паўзлі па шашы, і перад імі вузкай стужкай распасціраліся мілі і мілі бетону.
Сям'я Джоўдаў паволі рухалася на захад, па гарах Нью-Мексіка, міма востраканечных скал і пірамідальных вяршынь. Яны ўзабраліся на Арызонскае нагор'е і цераз прасветліны між уцёсаў зазіралі ўніз, на Каляровую пустыню. Іх спыніў пагранічны інспектар.
- Куды едзеце?
- У Каліфорнію, - адказаў Том.
- Колькі часу прабудзеце ў Арызоне?
- Пакуль не праедзем.
- Расліны з сабой везяце?
- Раслін няма.
- Трэба праверыць.
- Кажу ж вам, раслін ніякіх няма.
Інспектар наляпіў на ветравое шкло ярлычок.
- Добра. Едзьце, толькі не спыняйцеся.
- А мы і не збіраемся.
Яны падымаліся па схілах, на якіх раслі крывыя карлікавыя дрэвы. Холбрук, Джозеф-Сіці, Уінслаў. Дрэвы тут былі ўжо высокія. Вывяргаючы дым, абедзве машыны адольвалі пад'ёмы. І вось ужо Флагстаф - самы высокі пункт. Ад Флагстафа дарога пабегла ўніз, з аднаго шырокага плато на другое, і нарэшце знікла ўдалечыні. Вады не хапала, яе даводзілася купляць па пяць, па дзесяць, па пятнаццаць цэнтаў за галон. Сонца высмактала ўсю вільгаць з бязводнага скалістага краю. Наперадзе завіднеліся няроўныя, вострыя выступы гор - заходні вал Арызоны. Цяпер ужо Джоўды ўцякалі ад сонца і сушы. Ехалі ўсю ноч і ноччу заехалі ў горы. У цемры машыны паўзлі між зубчастых скалістых бастыёнаў, і слабае святло фар цьмяна мігацела на шэрых каменных сценах абапал дарогі. Перавал адолелі ў цемры і глыбокай ноччу пачалі паволі спускацца сярод бязладнага россыпу каменных абломкаў каля Оўтмена. На золку ўбачылі ўнізе раку Каларада. Даехалі да Топака, пастаялі каля моста, пакуль інспектар змываў ярлык з ветравога шкла. Тады пераехалі мост і апынуліся ў няроўнай камяністай пустыні. І хоць усе страшэнна стаміліся і ўсё мацней прыпякала ранішняе сонца, падарожнікі спыніліся пасярод дарогі. Бацька выгукнуў:
- Прыехалі!.. Вось яна, Каліфорнія!
Усе тупа пазіралі на каменныя глыбы, што блішчалі на сонцы, і на страшныя цвярдыні Арызоны за ракой.
- Перад намі пустыня, - сказаў Том. - Трэба дабрацца да вады і трохі адпачыць.
Дарога цягнулася ўздоўж ракі, і познім ранкам машыны з перагрэтымі маторамі дабраліся да Нідлса, дзе рака імкліва несла свае воды між зараснікаў чароту.
Джоўды і Ўілсаны з'ехалі да берага і, седзячы ў машынах, скіравалі позіркі на празрыстую ваду, што праплывала міма, і на зялёны чарот, які паволі пагойдваўся ў плыні. Каля самай ракі на заліўным лужку, зарослым сакавітай травой, быў невялікі лагер - адзінаццаць палатак. Том высунуўся з кабіны.
- Нічога, калі мы тут станем?
Поўная жанчына, якая мыла ў вядры бялізну, падняла галаву.
- Мы тут не гаспадары, містэр. Станавіцеся, калі хочаце. Пазней да вас палісмен прыйдзе. - І яна зноў пачала церці бялізну на самым санцапёку.
Абедзве машыны заехалі на свабоднае месца на густой траве. Адразу ўзяліся за палаткі - паставілі палатку Ўілсанаў, навесілі на вяроўку брызент Джоўдаў.
Уінфілд і Руці няспешна пайшлі праз вербалоззе да зарасніку чароту. З ціхай радасцю Руці сказала:
- Каліфорнія. Вось мы і прыехалі ў самую Каліфорнію!
Уінфілд надламаў чарацінку, пакруціўшы, адарваў яе і, узяўшы ў рот, пачаў жаваць белую мякаць сцябла. Яны ўвайшлі ў ваду па лыткі.
- Далей паедзем па пустыні, - сказала Руці.
- А якая яна, пустыня?
- Сама не ведаю. Толькі на малюнку раз бачыла. Паўсюль косці валяюцца.
- Чалавечыя?
- Можа, і чалавечыя, але больш каровіныя.
- А мы іх убачым?
- Можа, і ўбачым, хто ведае. Мы паедзем па ёй ноччу. Так Том сказаў. Том кажа, згарыш к чорту, калі днём паедзеш.
- Тут так прыемна, такі халадок, - сказаў Уінфілд і грабянуў нагой пясок на дне.
Здалёку пачуўся голас маці:
- Руці! Уінфілд! Вяртайцеся!
Дзеці павярнуліся і, прабіраючыся праз чарот і вербалоз, паволі пайшлі назад.
У лагеры было ціха, нідзе нікога. Толькі калі машыны пад'ехалі, з некалькіх палатак на момант высунуліся галовы. Зрабіўшы сабе прыстанішча, мужчыны абедзвюх сем'яў сабраліся разам.
Том сказаў:
- Пайду пакупаюся. Асвяжуся - і спаць. Цяпер бабка пад навесам. Што з ёй?
- Не ведаю, - адказаў бацька. - Усё спіць, так і не прачнулася. - Ён павярнуў галаву ў бок брызенту. З-пад яго данеслася жаласнае мармытанне. Маці паспяшалася туды.
- Прачнулася нарэшце, - сказаў Ной. - На грузавіку ўсю ноч трызніла. Пэўна, з розуму кранулася.
Том сказаў:
- Дзіва што. Зусім замучылася. Калі не даць ёй паляжаць спакойна, яна нядоўга працягне. Здарожылася. Ну, хто са мной? Пакупаюся і залягу ў цяні... дзень цэлы спаць буду.
Ён пакіраваў да берага, астатнія мужчыны пайшлі следам. Усе раздзеліся ў кустах вербалозу, зайшлі ў рэчку і селі на дно. Яны доўга сядзелі так, упіраючыся пяткамі ў пясок, толькі галовы тырчалі над вадой.
- Вось гэта па мне! - сказаў Эл. Ён зачарпнуў жменю пяску з дна і стаў націраць цела.
Яны сядзелі ў рацэ і пазіралі на горныя пікі - «Іголкі», як іх называлі, - Нідлс, і на белыя скалістыя горы Арызоны.
- Мы прабраліся праз іх, - сказаў, сам яшчэ не верачы сабе, бацька.
Дзядзька Джон акунуў галаву ў ваду.
- Нарэшце мы тут. Вось яна, Каліфорнія. Але нешта раскошы я ніякай не бачу.
- Яшчэ пустыня наперадзе, - сказаў Том. - Паганая, кажуць, штука.
Ной пацікавіўся:
- Сёння ў ноч паедзем?
- Што скажаш, та? - запытаўся Том.
- Не ведаю. Няблага было б адпачыць, асабліва бабцы. А з другога боку, было б добра хутчэй перабрацца праз гэту пустыню і на працу ўладкавацца. Усяго сорак даляраў засталося грошай. Мне спакайней будзе, калі мы пачнём працаваць і зарабляць хоць трохі.
Яны сядзелі ў рацэ, адчуваючы напор плыні. Прапаведнік паклаў выцягнутыя рукі на паверхню імклівай вады. Целы ва ўсіх былі белыя да шыі і да запясцяў, твары, трохвугольнік грудзіны і кісці рук - карычневыя ад загару. Усе старанна націраліся пяском.
Ной ляніва прамовіў:
- Застацца б тут назусім. Ляжаць вось так вечна і не ведаць ні голаду, ні бяды ніякай. Увесь свой век так праляжаць і песціцца, як свіння ў гразі.
А Том, пазіраючы на зубчастыя вяршыні за ракой і на вострыя пікі ў тым баку, куды яна цякла, сказаў:
- Такіх стромых гор я зроду не бачыў. Гіблы край. Усё роўна як косці шкілета. Ці даедзем мы калі-небудзь туды, дзе можна жыць, не ваюючы з каменнем і скаламі? На малюнках мясцовасць роўная, зялёная, куды ні глянь домікі, як ма кажа, беленькія. Ма спіць і бачыць такі беленькі домік. А я ўжо і не веру, што ёсць такі край. Хіба толькі на малюнках.
Бацька сказаў:
- Пачакай, вось прыедзем у Каліфорнію, тады і ўбачыш прыгажосць.
- Ты што, та? Мы ж ужо ў Каліфорніі!
З вербняку выйшлі двое ў джынсах і сініх прапацелых кашулях і спыніліся, пазіраючы на голых людзей у вадзе.
Старэйшы запытаўся:
- Паплаваць тут можна?
- Хто яго ведае, - адказаў Том. - Мы яшчэ не спрабавалі. А пасядзець у вадзе прыемна.
- І нам дазволіце?
- Рэчка не наша. Але так і быць, мы ўступім вам кавалачак.
Прышлыя знялі штаны, сцягнулі з плячэй кашулі і ўвайшлі ў ваду. Ногі ў іх да калень былі ў пыле, ступні бледныя, размоклыя ад поту. Яны вяла апусціліся ў ваду, ленавата апалоскваючы сабе жменямі бакі. Гэта былі бацька і сын, моцна прасмаленыя сонцам. Яны фыркалі і стагналі, плёскаючыся ў вадзе.
Бацька Джоўд далікатна пацікавіўся:
- На Захад кіруеце?
- Не. Вяртаемся адтуль. Дадому едзем. Там немагчыма на хлеб зарабіць.
- А дом ваш дзе? - запытаўся Том.
- Пэнхендл у Тэхаскім выступе, непадалёк ад Пампы.
Запытаўся бацька:
- А дома што, пражыць можна?
- Дзе там! Толькі калі ўжо з голаду паміраць, дык хоць сярод сваіх. А галадаць і адчуваць нянавісць да сябе мы не хочам.
Бацька сказаў:
- Ад другога ўжо чалавека такое чую. За што яны нас там так ненавідзяць?
- Хто іх ведае, - адказаў чалавек, зачарпнуў далонямі ваду і пачаў мыць галаву і твар, крэхчучы і пырхаючы. З валасоў палілася на шыю брудная вада.
- А ўсё ж цікава было б паслухаць, - сказаў бацька.
- Нам таксама, - далучыўся Том. - Чаму яны там, на Захадзе, такую нянавісць адчуваюць да нас?
Мужчына пільна паглядзеў на Тома.
- Вы на Захад едзеце?
- Туды.
- Ніколі яшчэ ў Каліфорніі не былі?
- Не, не даводзілася.
- Дык што ж вам маё слова. Едзьце і самі ўбачыце.
- То так, - сказаў Том, - але ўсё ж такі хацелася б ведаць, на што едзем.
- Добра, раз вы абавязкова хочаце ведаць, я раскажу - я і сам распытваў людзей і нямала разважаў. Краіна цудоўная. Толькі яе даўно ўжо ўсю раскралі. Праедзеце пустыню, а там Бейкерсфілд, і вакол яго такая мясцовасць прыгожая - вачэй не адарвеш: фруктовыя сады, вінаграднікі. Прыгажэйшага краю на свеце няма. Далей - мясціны роўныя, прыгожыя, вада не глыбейшая, як трыццаць футаў - і ўся зямля ляжыць неўзараная. Але ты ні кавалачка яе не атрымаеш. Яна цалкам належыць Зямельна-жывёлагадоўчай кампаніі. Не захочуць яе апрацоўваць, так і застанецца ўся няўробленая. А паспрабуй засей які ўчастачак кукурузай - у турму запратораць!
- Зямля добрая, кажаш? І нічога на ёй не сеюць?
- Так, сэр! Добрая зямля, а не сеюць! Ну, цябе, вядома, злосць адразу бярэ, але зямля пустая стаіць. Людзі глядзяць там такімі вачамі - зірнуць на цябе, а ў саміх на тварах нібы напісана: «Бачыць цябе не магу, сукін ты сын!» А тут яшчэ шэрыфавы памагатыя - яны паганяюць цябе з месца на месца! Зробіш прывал пры дарозе, а яны гоняць далей. Там у кожнага па твары відаць, як ён цябе ненавідзіць. І вось што я вам скажу: нянавісць у іх ад страху. Бо ведаюць: калі ў галоднага няма чаго есці, ён і на зладзейства пайсці можа. Яны ведаюць, што грэх трымаць зямлю пустой - каму-небудзь захочацца яе сабе прыбраць. Чорт ведае што! Вас ніхто яшчэ не абзываў «Окі»?
Том запытаўся:
- Окі? А што гэта значыць?
- Раней азначала аклахомца. А цяпер - проста «сволач». Окі - гэта падонак. Само па сабе ў слове гэтым нічога такога няма, уся соль у тым, як там яго вымаўляюць. Ды хіба ўсё раскажаш? Трэба самому там пабыць. Кажуць, такіх, як мы, туды трыста тысяч наехала... жывуць, як быдла, бо ў Каліфорніі ўсё скрозь ужо каму-небудзь належыць. І нічога не засталося. А людзі, якія ўсім гэтым валодаюць, так учапіліся за сваё дабро, што забіць за яго каго хочаш на свеце гатовыя. Страх іх разбірае, таму і кіпяць злосцю. Гэта вам на свае вочы ўбачыць трэба. Самім усё пачуць. Надзіва прыгожы край, а людзі нядобрыя, зласлівыя. І так ужо ім страшна, што нават адзін аднаго гатовыя з'есці.
Том глядзеў у ваду і разграбаў пяткамі пясок.
- Ну, а калі знойдзеш працу і збярэш крыху грошай, можна ўсё-такі невялікі ўчастак купіць?
Мужчына засмяяўся і глянуў на сына, і твар маўклівага хлопчыка расплыўся ў амаль пераможнай усмешцы. Мужчына сказаў:
- Сталай работы вы не знойдзеце. Кожны дзень давядзецца думаць, як зарабіць сабе на абед. І працаваць будзеце з людзьмі, якія на вас коса глядзяць. А бавоўну збіраць будзеце, вам здасца, што вагі няправільныя. Вагі бываюць і правільныя і няправільныя. Вы ж будзеце думаць, што ўсе яны махлярскія, а як праверыш? І нічога з гэтым не зробіш.
Бацька нерашуча запытаўся:
- Там што... там зусім нічога добрага няма?
- Чаму ж, ёсць, паглядзіш - вочы разбягаюцца, толькі вам з таго нічога не перападзе. Вось, напрыклад, цэлы гай стаіць апельсінавых дрэў з жоўтымі пладамі, а там чалавек расхаджвае са стрэльбай, і, як толькі дакранешся да апельсіна, ён цябе прыстрэліць - такое яму дадзена права. А на ўзбярэжжы ёсць адзін гаспадар, газетчык нейкі, дык у яго зямлі гэтай мільён акраў...
Кейсі стрэльнуў у яго вачамі:
- Цэлы мільён? Што ж ён робіць з мільёнам акраў?
- Хто яго ведае. Валодае імі, і ўсё. Трымае трохі жывёлы. Паўсюль у яго вартаўнікі, нікога не пускаюць. Раз'язджае ў куленепрабівальнай машыне. Я бачыў яго партрэты. Тлусты такі, друзлы, вочкі маленькія, злосныя, а рот, як паддувала. Баіцца, каб не забілі. У самога мільён акраў зямлі, а ён смерці баіцца.
Кейсі зноў запытаўся:
- На чорта яму мільён акраў? Што ён з імі рабіць будзе?
Мужчына развёў рукамі з пабялелымі, зморшчанымі ад вады далонямі, прыкусіў ніжнюю губу і нахіліў набок галаву.
- А я ведаю? - адказаў ён. - Відаць, з розуму крануўся. Пэўна, вар'ят. І на партрэце такі. З выгляду вар'ят. Вар'ят і зласлівец.
- Смерці, кажаш, баіцца? - сказаў Кейсі.
- Так ад людзей чуў.
- Баіцца, што да яго бог дабярэцца?
- Хто ведае. Баіцца, і ўсё.
- Што ж ён сабе думае? - сказаў бацька. - Не можа ж ён усё жыццё так пражыць - без ніякіх радасцей.
- А вось дзед наш нікога не баяўся, - сказаў Том. - Яму самая радасць была, калі яго вось-вось маглі ўкакошыць. Раз уначы ўдваіх з прыяцелем яны пайшлі на індзейцаў навахаў. Цудам жывымі засталіся, затое пацешыліся ўволю.
Кейсі сказаў:
- Так, відаць, заўсёды бывае. Калі чалавеку радасць, пляваць яму на ўсё, а вось зласліўцы, адзінокія, старыя і расчараваныя баяцца смерці.
Бацька запытаўся:
- Чаго гэта ён раптам расчараваўся, калі зямлі ў яго мільён акраў?
Прапаведнік усміхнуўся, але ў вачах у яго мільганула нерашучасць. Ён пляснуў далонню па вадзе, адганяючы вадзянога жука.
- Калі чалавеку патрэбен мільён акраў, каб адчуць сваё багацце, значыць, душа яго ўбогая, а з такой душой ніякія мільёны не дапамогуць. Пэўна, таму ён і расчараваўся - адчувае, што няма ў яго багацця... таго багацця, што было ў місіс Уілсан, калі яна дала сваю палатку, як паміраў дзед. Я вам не пропаведзь чытаю, але калі чалавек цягне ўсякае дабро ў сваю нару, як лугавы сабачка, дык, урэшце, ён ва ўсім расчаруецца. - Кейсі шырока ўсміхнуўся: - Мімаволі, здаецца, як пропаведзь атрымалася.
Сонца паліла ўжо неміласэрна.
Бацька сказаў:
- Лепей зусім схавацца пад вадой. Так прыпякае - згарыш. - І ён адкінуўся назад, і лёгкая плынь абняла яго шыю. - А калі цяжкай працы не баішся, можна яе знайсці? - запытаўся ён.
Чалавек прыўзняўся ў вадзе і павярнуўся да яго тварам:
- Бачыце, містэр, я не ўсё ведаю. Магчыма, прыедзеце туды і адразу знойдзеце сталую работу, і тады я акажуся брахуном. А магчыма, ніякай не знойдзеце і скажаце: ён нас папярэдзіў. Адно толькі ведаю: народ там большай часткай жыве ў бядоце. - Ён зноў апусціўся ў ваду. - А ўсяго ведаць нельга.
Бацька павярнуў галаву і глянуў на дзядзьку Джона. Сказаў:
- Ты ў нас гаваркі ніколі не быў, а як паехалі з дому, я ад цябе і двух слоў не пачуў. Ну, што ты думаеш пра ўсё гэта?
Дзядзька Джон насупіўся:
- Анічога не думаю. Мы едзем туды, так? І ніякімі расказамі нас назад не павернеш. Прыедзем - пабачым. Знойдзем работу, будзем працаваць, а не, дык хвост падціснем. Ад размоў гэтых толку мала.
Том адкінуўся назад, набраў у рот вады, выпусціў яе фантанам і засмяяўся:
- Дзядзька Джон гаворыць рэдка ды метка. Далібог, разумна гаворыць. Ноччу далей паедзем, та?
- Што ж, можна. Хоць бы ўжо пустыню пераехаць.
- Тады я пайду ў кусты і трохі пасплю. - Том падняўся і пайшоў па вадзе да пясчанага берага. Там накінуў на мокрае цела кашулю, надзеў штаны, паморшчыўся ад дотыку прапаленай сонцам адзежы. Астатнія пабрылі за ім.
Бацька і сын, застаўшыся ў вадзе, пазіралі ўслед Джоўдам, пакуль усе яны і прапаведнік не зніклі ў вербалоззі. Хлопчык сказаў:
- Хацеў бы я паглядзець на іх праз якія шэсць месяцаў. Ох, госпадзі!
Яго бацька працёр куткі вачэй указальным пальцам.
- Дарэмна я ім усё гэта нагаварыў, - сказаў ён. - Вось жа хочацца чалавеку паказаць, які ён разумны, другіх вучыць.
- Ну што ты, та! Яны ж самі прасілі.
- Яно так. Але ж ён сказаў, што ўсё роўна паедуць. Ад маіх слоў нічога не перамянілася, а ім ад іх толькі лішняе засмучэнне паперад часу.
Том увайшоў у зараснік вербалозу і лёг у густы цень пад кустом. Ной палез за ім.
- Тут і пасплю, - сказаў Том.
- Том!
- Што табе?
- Я далей, Том, не паеду.
Том прыўзняўся і сеў.
- Што ты надумаў?
- Я каля гэтай рэчкі застануся, Том. Пайду па беразе ўніз па цячэнні.
- Ты звар'яцеў!
- Завяду сабе вуду. Лавіць буду рыбу. Каля такой рэчкі з голаду не памрэш.
Том сказаў:
- А сям'я? А мама?
- Што зробіш. Не магу я расстацца з такой цудоўнай ракой. - Шырока расстаўленыя вочы Ноя былі прыплюшчаныя. - Ты ж сам ведаеш, Том. Ты ведаеш, да мяне ўсе добра ставяцца, але ім усё роўна, што я ёсць, што мяне няма.
- Ты звар'яцеў.
- Не, Том. Я ўсё разумею. Я разумею, што ім будзе шкада мяне. Але... Не, не паеду з вамі. Ты маме скажы, Том.
- Ной, ну паслухай ты... - пачаў Том.
- Не. Ты мяне не адгаворыш. Я пабыў у гэтай рацэ і цяпер ужо яе не пакіну. Пайду берагам уніз па ёй, Том. Рыбай буду карміцца ці яшчэ чым, а раку гэту не пакіну. Не магу. - Ной паўзком выбраўся з-пад цяністых кустоў. - Ты маме скажы, Том. - Ён пакрочыў да рэчкі.
Том правёў яго да берага.
- Слухай, пудзіла ты гарохавае...
- Дарэмна ўсё, - сказаў Ной. - Мне самому горка, але нічога з сабой зрабіць не магу. Я мушу ісці.
Ной крута павярнуўся і пайшоў уздоўж берага ўніз па рацэ. Том пайшоў за ім, але раптам спыніўся. Ён бачыў, як Ной знік у кустоўі, потым зноў паказаўся, ідучы краем ракі. Том глядзеў яму ўслед, а Ной рабіўся ўсё меншы і меншы і нарэшце зусім знік з вачэй за вербалозамі. Том зняў з галавы кепку і пачухаў патыліцу. Тады вярнуўся ў сваё сховішча ў кустах і лёг спаць.
На матрацы пад перакінутым цераз вяроўку брызентам ляжала бабка, а побач з ёю сядзела маці. Там было душна, горача, назойліва гулі мухі, хаваючыся ў цяні навеса. Бабка ляжала голая, прыкрытая доўгай ружовай занавескай. Старая неспакойна паводзіла галавой, нешта мармытала і цяжка дыхала. Маці сядзела проста на зямлі, адганяючы ад бабкі мух кавалкам кардону, авявала гарачым паветрам старэчы маршчыністы твар. Ружа Сарона сядзела насупраць і пазірала на маці.
Раптам бабка ўладна закрычала:
- Уіл! Уіл! Хадзі сюды, Уіл. - Вочы яе расплюшчыліся і злосна зірнулі па баках. - Скажыце, хай сюды ідзе, - гаварыла яна. - Я да яго дабяруся. Усе валасы павыдзіраю. - Яна заплюшчыла вочы і, ківаючы галавой, хрыпла замармытала. Маці абмахвала яе кардонам.
Ружа Сарона разгублена глянула на старую і ціха сказала:
- Зусім расхварэлася.
Маці ўзняла на дачку вочы. Позірк у яе быў спакойны, але лоб збаразнілі маршчыны стомы. Яна махала і махала кардонам, змагаючыся з мухамі.
- У маладосці, Разашарна, усё, што з табой ні здарыцца, здаецца нечым адлучаным ад усяго. Быццам асобна стаіць. Я гэта ведаю, Разашарна, я добра памятаю. - Губы яе любоўна вымаўлялі даччыно імя. - Прыйдзе час табе радзіць, Разашарна, і здасца табе, што ты зусім адна, далёка ад дому, ад усяго свету. І ты адчуеш боль, і боль твой будзе толькі тваім, ты адчуеш сябе адзінокай, як вось гэтая палатка, што стаіць асобна ад усяго свету. - Маці энергічна памахвала кардонкай, каб прагнаць мясную муху, якая моцна гула, і вялікая бліскучая сіняя муха двойчы пакружыла пад брызентам і вылецела на сляпучае сонечнае святло. Маці зноў загаварыла: - Але з часам усё мяняецца, і тады смерць аднаго чалавека ўспрымаецца ў сувязі з усімі іншымі смерцямі і нараджэнне дзіцяці - з нараджэннем усіх іншых дзяцей. А нараджэнне і смерць - гэта як паловы адной рэчы. І тады табе ўжо не здаецца, што беды твае і радасці стаяць асобна адно ад аднаго. Тады, Разашарна, не так ужо і цяжка трываць боль, бо баліць не толькі табе. Мне так хацелася пра ўсё гэта табе расказаць, але ж вось не ўмею. - Апошнія словы прагучалі так мякка, і было ў яе голасе столькі любові, што да вачэй Ружы Сарона падкраліся слёзы, залілі іх і асляпілі яе. - Вазьмі памахай над бабкаю, - сказала маці і падала дачцэ кардон. - Ёй лягчэй ад гэтага. Шкада, што не магла табе ўсё растлумачыць.
Бабка ссунула бровы над заплюшчанымі вачамі і завішчала:
- Уіл! Зноў увесь выпацкаўся! Ніколі чысты не ходзіш. - Яе маленькая, скурчаная, маршчыністая рука паднялася і пацерла шчаку. Рыжая мурашка перабегла з занавескі на азызлую шыю, папаўзла па згібах скуры. Маці зрэагавала імгненна, зняла насякомае, раздушыла пальцамі і выцерла іх аб сукенку.
Ружа Сарона замахала кардонінай. Падняла вочы на маці:
- Яна?.. - Астатнія словы нібы спякліся ў горле.
- Ногі вытры, Уілі... брудная свіння! - закрычала бабка.
Маці сказала:
- Не ведаю. Можа, калі б давезлі яе туды, дзе не так горача... хто ведае. Ты не хвалюйся, Разашарна. Дыхай свабодна - удых, выдых, не стойвай дыхання.
Да іх пад брызентавы навес зазірнула мажная жанчына ў чорнай парванай сукенцы. Позірк у яе быў мутны, туманны, друзлыя шчокі абвіслі складкамі абапал падбародка. Губы былі рыхлыя, нястуленыя: верхняя, як занавескай, закрывала зубы, а з-пад адвіслай ніжняй віднеліся дзясны.
- Добрай вам раніцы, мэм, - сказала яна. - Добрай раніцы і хвала госпаду богу.
Маці азірнулася.
- Добрай раніцы, - адказала яна.
Жанчына, сутулячыся, пралезла пад брызент і нахіліла галаву над бабкай.
- Мы чулі, што ў вас ёсць душа, гатовая ўзнесціся да госпада. Хай славіцца імя яго!
Твар у маці стаў жорсткі, вочы - калючыя.
- Яна стамілася, толькі і ўсяго, - сказала яна. - Ад дарогі і спёкі. Яна проста змучылася. Крыху адпачне і ачуняе.
Жанчына нахілілася да самага твару бабкі - здалося, панюхала яго. Тады павярнулася да маці і хутка пакруціла галавой, шчокі яе затрэсліся і захісталіся губы.
- Добрая душа імкнецца да госпада, - сказала яна.
Маці закрычала:
- Няпраўда!
Жанчына зноў пакруціла галавой, цяпер ужо не так хутка, і паклала азызлую руку на лоб бабцы.
- Гэта праўда, сястра, - сказала яна. - У нас у палатцы шасцёра вернікаў. Зараз я іх паклічу сюды, і мы наладзім малітоўны сход - памолімся і звернемся да міласці боскай. Усе іегавісты. Са мной шэсць. Пайду прывяду іх.
Маці ўся напялася.
- Не, не! - сказала яна. - Не трэба. Бабка змучылася, малітвы не вытрывае.
Жанчына сказала:
- Не вытрывае малітвы? Не вытрывае салодкага дыхання госпада нашага? Што ты гаворыш, сястра?
Маці сказала:
- Не. Тут нельга. Яна змучылася.
Жанчына з дакорам паглядзела на маці.
- Вы няверуючая, мэм?
- Не, мы людзі набожныя, але бабка вельмі змучылася. Мы ўсю ноч былі ў дарозе. Нам не хочацца турбаваць вас.
- Якія ж гэта турботы? А калі нават і так, мы ўсё зробім для душы, што імкнецца далучыцца да бязгрэшнага ягняці.
Маці прыўзнялася з зямлі і стала на калені.
- Дзякуй вам, - сказала яна холадна. - Мы не хочам, каб у нашай палатцы быў малітоўны сход.
Жанчына доўга пазірала на яе.
- Што ж, але мы не адпусцім сястру нашу без малітвы. Маленне будзе ў нашай палатцы, мэм. І няхай даруецца вам такая душэўная жорсткасць.
Маці зноў апусцілася на зямлю і павярнулася да бабкі тварам, з якога не сыходзілі цвёрдасць і суровасць.
- Яна змучылася, - паўтарыла яна зноў. - Проста змучылася.
Бабка кідалася галавой па падушцы і нешта ледзь чутна мармытала.
Жанчына пагардліва выйшла з-пад брызенту. Маці не зводзіла вачэй са старэчага твару.
Ружа Сарона махала кавалкам кардону, гонячы гарачае паветра хвалямі. Сказала:
- Ма!
- Што?
- Чаму ты не дазволіла ім тут памаліцца?
- Сама не ведаю. Наогул іегавісты - людзі добрыя. Але, молячыся, завываюць і скачуць. Не ведаю. Нешта найшло на мяне. Я гэтага цяпер не стрывала б. Сіл маіх не хапіла б.
Аднекуль зблізку данесліся гукі малення - манатонныя распевы пропаведзі. Слоў было не разабраць, чуўся толькі матыў. Голас то сціхаў, то набіраў сілу, і кожны распеў пачынаўся на больш высокай ноце. Вось у паўзе прапаведніку адказалі іншыя галасы, і яго голас набыў урачыстасць і ўладнасць. Тон усё павышаўся, і ў паўзах гукі падхопу паступова перайшлі ў лямант. Мала-памалу фразы пропаведзі рабіліся ўсё карацейшымі, адрывістымі, як каманды, і ў галасах, што на іх адгукаліся, загучалі жалобныя ноткі. Рытм малення ўсё разганяўся. Мужчынскія і жаночыя галасы гучалі суладна, але раптам, пасярод падхопу, адзін жаночы голас вырваўся, узляцеў увысь і выліўся ў роспачны крык, дзікі і шалёны, як звярыны; яму пачалі ўторыць больш нізкі жаночы голас, перарывісты, як брэх, і мужчынскі, які паступова танчэў, як воўчае выццё. Словы малітвы абарваліся, і з палаткі чуліся толькі жалобнае завыванне і тупат ног па зямлі. Маці кінула ў дрыжыкі. Ружа Сарона дыхала цяжка і перарывіста, а дзікі лямант не змаўкаў, і здавалася, вось-вось у людзей разарвуцца лёгкія.
Маці сказала:
- Нервы не вытрымліваюць. Нешта са мною сталася.
Раптам высокі голас перайшоў у істэрычны віск, як завыванне гіены; тупат зрабіўся гучнейшы. Галасы ламаліся і зрываліся, і нарэшце ўвесь хор загучаў роўна, і чуліся толькі рыданні і хрыплыя стогны, гукі ўдараў па целе і прытупванне па зямлі; потым рыданне перайшло ў ціхае скуголенне, накшталт скавытання шчанюкоў каля міскі з ежай.
Знерваваная Ружа Сарона ціха плакала. Бабка раптам збіла занавеску з ног, падобных на дзве шэрыя вузлаватыя палкі, і таксама заскуголіла пад такія ж гукі, што даносіліся з палаткі іегавістаў. Маці зноў прыкрыла ёй ногі занавескай. І тут бабка глыбока ўздыхнула, дыханне яе стала роўнае і свабоднае, прыплюшчаныя павекі перасталі пацепвацца. Старая заснула моцным сном і, крыху адкрыўшы рот, пахрапвала. Жаласнае скуголенне ў палатцы іегавістаў рабілася ўсё цішэйшым і нарэшце зусім сціхла.
Ружа Сарона зірнула на маці поўнымі слёз вачамі.
- Дапамагло, - сказала яна. - Бабцы дапамагло. Яна заснула.
Маці сядзела прысаромленая, апусціўшы галаву.
- Я, можа, дарэмна пакрыўдзіла добрых людзей, - сказала яна. - Бабка спіць.
- Можа, табе схадзіць пакаяцца прапаведніку нашаму?
- Пайду... Толькі ён нейкі дзіўны. Магчыма, гэта я праз яго не дазволіла тым людзям памаліцца тут. Прапаведнік наш думае: што людзі ні зробяць, усё добра. - Маці паглядзела на свае рукі. - А цяпер спаць, Разашарна. Калі паедзем ноччу, дык трэба выспацца. - Яна выцягнулася на траве каля матраца.
Ружа Сарона запыталася:
- А бабку не трэба абмахваць?
- Яна спіць. Кладзіся, дачушка.
- Куды гэта Коні дзеўся? - незадаволена сказала Ружа Сарона. - Ужо колькі часу яго не бачыла.
Маці сказала:
- Ш-ш... Паспі.
- Ма, Коні будзе вучыцца вечарамі і ў людзі выйдзе.
- Ага, ты мне ўжо казала. Кладзіся спаць.
Ружа Сарона прымасцілася з краю бабчынага матраца.
- Коні ўжо новае задумаў. Ён увесь час думае. Вось вывучыць пра электрычнасць і майстэрню сваю завядзе, а тады ведаеш, што ў нас будзе?
- Што?
- Лёд... колькі душа пажадае. Купім ледзяную шафу. Напакуем яе даверху. Нічога псавацца не будзе.
- Коні ўвесь час думае, - усміхнулася маці. - Вось і добра, а цяпер спаць.
Ружа Сарона заплюшчыла вочы. Маці павярнулася на спіну і падклала рукі пад галаву. Яна прыслухоўвалася да дыхання бабкі і дачкі. Махнула рукой, каб прагнаць муху з ілба. Лагер заціх пад пякучым сонцам, і гукі, якія даносіліся з нагрэтай травы, - строкат конікаў, гудзенне мух - толькі падкрэслівалі цішыню. Маці глыбока перавяла дыханне, пазяхнула і заплюшчыла вочы. Праз дрымоту пачула чыесьці крокі, але прачнулася не ад іх, а ад моцнага мужчынскага голасу.
- Тут хто ёсць?
Маці хуценька адарвала спіну ад зямлі, села. Нейкі мужчына з моцна загарэлым тварам нахіліўся і зазірнуў пад брызент. На ім былі высокія шнураваныя чаравікі, штаны колеру хакі і такога ж колеру форменная кашуля. На шырокай скураной партупеі вісела рэвальверная кабура, а злева на грудзях да кашулі была прышпілена вялікая сярэбраная зорка. Фуражка з мяккім верхам была ссунута на патыліцу. Ён паляпаў далонню па туга нацягнутым брызенце, і той загуў, як барабан.
- Тут ёсць хто-небудзь? - настойліва паўтарыў ён.
Маці запыталася:
- Што вам трэба, містэр?
- А як вы думаеце, што мне трэба? Хачу ведаць, хто тут ёсць.
- Тут нас трое: я, бабка і дачка мая.
- А мужчыны дзе?
- Пайшлі пакупацца. Мы ўсю ноч ехалі.
- Адкуль вы?
- З-пад самага Саліса ў Аклахоме.
- Тут вам заставацца нельга.
- Мы сёння позна вечарам паедзем далей, містэр, праз пустыню.
- І добра зробіце. Калі заўтра ў гэты час будзеце тут, я пасаджу вас. Мы такім не дазваляем тут надоўга спыняцца.
Твар у маці пацямнеў ад гневу. Яна памалу паднялася на ногі, падышла да скрыні з кухонным начыннем і выцягнула за доўгую ручку чыгунную патэльню.
- Містэр, - сказала яна, - у вас бляшаная цэшка і рэвальвер. Там, адкуль я прыехала, такія, як вы, голасу не павышаюць. - Яна пачала наступаць на яго з патэльняй у руцэ. Ён расшпіліў кабуру. - Страляй, - сказала маці. - Жанчын запалохваеш? Добра, што мужчын нашых тут няма. Яны б цябе на шматкі разадралі. У нашых краях такія, як ты, не вельмі плешчуць языком.
Чалавек адступіў назад на два крокі.
- Краі вашы засталіся далёка. Цяпер вы ў Каліфорніі, і ўсякім Окі мы не дазволім тут затрымлівацца.
- Окі? - ціха перапытала маці. - Окі?
- Ага, Окі! І калі я заўтра вас тут застану, не мінуць вам турмы. - Чалавек крута павярнуўся, падышоў да суседняй палаткі і паляпаў далонню па брызенце:
- Ёсць тут хто-небудзь?
Маці не спяшаючыся вярнулася пад брызент. Паклала патэльню назад у скрыню. Потым паволі апусцілася на зямлю, села. Ружа Сарона ўпотайкі сачыла за ёю. Убачыўшы, што маці стараецца стрымаць слёзы, яна заплюшчыла вочы і прытварылася, што спіць.
Сонца ўжо добра схілілася на захад, а спёка не спадала. Том прачнуўся пад вярбой. У роце ў яго засмягла, цела змакрэла ад поту, галава была цяжкая пасля сну. Ён вяла падняўся на ногі і пайшоў да берага. Скінуў з сябе адзежу, палез у рэчку. Ледзь толькі вада абняла яго, смага знікла. Ён лёг на мелкім месцы, упёршыся локцямі ў пясчанае дно, і цела яго плавала ў вадзе. І так ён ляжаў, пазіраючы на пальцы ног, якія пагойдваліся над паверхняй.
Бледны хударлявы хлопчык выпаўз, як звярок, з чароту і хуценька раздзеўся. Ён шмыгнуў у ваду, як хахуля, і, як хахуля, паплыў, пакінуўшы толькі вочы на паверхні. Раптам ён убачыў над вадой галаву Тома, заўважыў, што за ім сочаць. Хлопчык кінуў сваю гульню і сеў на дно.
Том сказаў:
- Хэло!
- Хэло!
- У хахулю гуляеш?
- Ага. - Хлопчык пасоўваўся ўсё бліжэй да берага, быццам проста так, незнарок, і раптам выскачыў з вады, згроб у ахапак сваё адзенне і знік у вербалоззі.
Том ціха засмяяўся і раптам пачуў рэзкі крык:
- Том! Гэй, Том!
Ён сеў на дно і свіснуў праз зубы, пранізліва, з хвацкім прысвістам у канцы. Кусты варухнуліся, і з іх выйшла Руці. Спынілася, пазіраючы на яго.
- Цябе мама кліча, - сказала яна. - Ідзі хутчэй.
- Зараз. - Том падняўся і пайшоў па вадзе да берага, а Руці глядзела на яго голае цела са здзіўленнем і цікавасцю.
Заўважыўшы на сабе яе позірк, Том сказаў:
- Ну бяжы. Давай адсюль!
І Руці ўцякла. Том пачуў, як яна ўсхвалявана кліча Ўінфілда. Ён нацягнуў гарачае адзенне на сваё халаднаватае, мокрае цела і няспешнай хадою пайшоў праз лазняк да палаткі.
Маці расклала агонь з сухога вярбовага голля і кіпяціла на ім ваду ў рондалі. Убачыўшы Тома, адразу адчула палёгку.
- Што тут у вас, ма? - запытаўся Том.
- Я баялася за цябе, - адказала яна. - Тут палісмен прыходзіў. Нам, кажа, нельга тут заставацца. Я баялася, каб ён з табой не загаварыў. Баялася, ты наб'еш яго, як толькі ён рот расчыніць.
Том сказаў:
- Чаго гэта я раптам палісменаў біць буду?
Маці ўсміхнулася:
- Ну... ён тут такога нагаварыў... я сама ледзь не набіла яго.
Том схапіў яе за плячо і размашыста і грубавата трасянуў яе і засмяяўся. І яшчэ смеючыся, апусціўся на траву.
- Божа мой, ма. Я такой цябе не ведаў, раней ты была больш далікатная. Што з табою стала?
Маці спахмурнела.
- Не ведаю, Том.
- Спярша на нас дамкратнай ручкай замахвалася, цяпер палісмена ледзь не збіла. - Том ціха засмяяўся, выцягнуў руку і ласкава паляпаў маці па голай ступні. - Сапраўдная ведзьма.
- Том...
- Што?
Маці доўга вагалася, перш чым загаварыць.
- Том, палісмен гэты... ён абазваў нас... Окі. Кажа: «Мы не дазволім усякім Окі тут затрымлівацца».
Том пільна паглядзеў на маці, рука яго ўсё яшчэ ласкава ляжала на яе ступні.
- Адзін чалавек нам ужо гаварыў. Сказаў, як яны вымаўляюць гэтае слова. - Том задуменна памаўчаў. - Ма, як па-твойму, я ўжо зусім адпеты? Месца маё ў турме?
- Не, - адказала яна. - Цябе давялі да забойства. Не. А чаму ты пытаешся?
- Проста так. Я палісмену гэтаму ўляпіў бы як мае быць.
Маці лагодна ўсміхнулася:
- Магчыма, я цябе на гэта і падбіла б. Я сама яго ледзь патэльняй не агрэла.
- А што ён гаварыў, ма? Чаму нам нельга тут заставацца?
- Сказаў, не дазволім усякім Окі тут затрымлівацца. Калі, кажа, я вас тут заўтра застану, у турму пасаджу.
- Мы не прывыклі, каб палісмены нас у карак гналі.
- Я так і сказала яму. А ён кажа, вы тут не дома. Вы ў Каліфорніі, а тут мы гаспадары.
Том нерашуча прамовіў:
- Мне трэба табе нешта сказаць, ма. Ной... пайшоў уніз па рацэ. Далей ён з намі не паедзе.
Сэнс яго слоў дайшоў да маці не адразу.
- Чаму? - праз нейкі момант ціха запыталася яна.
- Не ведаю. Кажа, так трэба. Што яму лепш застацца каля гэтай ракі. Прасіў сказаць табе.
- А што ён есці будзе?
- Не ведаю. Рыбу, кажа, лавіць буду.
Маці доўга маўчала.
- Распадаецца наша сям'я, - нарэшце прамовіла яна. - Проста не ведаю, не прыдумаю, што рабіць. У галаве ўсё перамяшалася. Гэтага мне ўжо занадта.
Том няўпэўнена сказаў:
- А нічога з ім не зробіцца, ма. Наогул, ён у нас з дзівацтвамі.
Маці кінула неўразумелы позірк на раку.
- Проста ў галаве ўсё перамяшалася.
Том глянуў на рады палатак і каля адной з іх убачыў Руці з Уінфілдам - яны стаялі каля ўвахода і з кімсьці далікатна размаўлялі. Руці мяла пальцамі сукенку, а Ўінфілд босай нагой калупаў пясок. Том крыкнуў:
- Гэй, Руці! - Дзяўчынка падняла галаву, убачыла брата і падбегла да яго, за ёю - Уінфілд. Том сказаў: - Збегай, Руці, пакліч нашых. Яны спяць пад вербамі. Сюды вядзі. А ты, Уінфілд, скажы Ўілсанам, што мы хутка едзем, няхай збіраюцца.
Дзеці мігам разбегліся. Том запытаўся ў маці:
- А як бабка, ма?
- Заснула. Здаецца, ёй лепш. І цяпер яшчэ спіць.
- То добра. Колькі ў нас свініны засталося?
- Малавата. Адна маленькая бочачка.
- Тады ў другую вады набяром. Ваду трэба ўзяць у дарогу.
З вербняку пачуліся гучныя крыкі Руці, якая склікала мужчын.
Маці падкінула сухога вярбовага голля ў вогнішча, і агонь з трэскам абхапіў рондаль. Сказала:
- Дай нам, божа, хутчэй адпачыць. Дай нам, госпадзі, знайсці сабе добры прыстанак!
Сонца хілілася да ламанай рысы абпаленых ім узгоркаў. Вада ў рондалі шалёна бурліла. Маці пайшла пад брызентавы навес, выйшла адтуль з поўным фартухом бульбы і ўсыпала яе ў вар.
- Дай, божа, хутчэй памыць бялізну. Ніколі мы яшчэ такія брудныя не хадзілі. Бульбу і то нямытую вару. А чаму - не разумею. Быццам сэрца з мяне вырвалі.
Мужчыны купкай выйшлі з кустоў. Вочы ў іх былі сонныя, твары расчырванелыя, азызлыя ад сну сярод дня. Бацька папытаўся:
- Што тут у вас?
- Трэба ехаць, - адказаў Том. - Палісмен прыходзіў, гоніць далей. Лепш хутчэй пераехаць пустыню. Выедзем чым раней і, можа, адолеем яе адразу. Нейкіх трыста міль засталося.
Бацька сказаў:
- Эх, думаў, адпачнём тут добра.
- Нельга, трэба ехаць, та, - сказаў Том. - Ной з намі не едзе. Пакіраваў уніз па рацэ.
- Не едзе? Што яму, чорту, у галаву ўзбрыло? - сказаў бацька і запнуўся. Потым паныла прамовіў: - Мая віна. Ной - гэта мая віна.
- Ды кінь ты, та.
- Няма чаго і гаварыць. Віна мая.
- Трэба збірацца, - сказаў Том.
Уілсан, падыходзячы, пачуў апошнія словы Тома.
- Мы ехаць не можам, - сказаў ён. - Сэйры зусім знемаглася. Ёй патрэбен спакой. Жывая яна з гэтай пустыні не выберацца.
Яго выслухалі моўчкі; потым Том сказаў:
- Палісмен гразіўся ўсіх нас у турму загнаць, калі мы да заўтра застанемся.
Уілсан пакруціў галавой. Вочы яго заслаліся пялёнкай трывогі, праз загар на твары праступіла бледнасць.
- Тады едзьце адны. Сэйры не можа. У турму дык у турму. Сэйры трэба адпачыць, набрацца сілы.
Бацька сказаў:
- Можа, мы пачакаем вас? А тады ўсе і паедзем.
- Не, - адказаў Уілсан. - Вы і так шмат нам зрабілі. А тут заставацца вам нельга. Вам трэба ехаць, знайсці работу, працаваць. Мы вас не хочам затрымліваць.
Бацька ўсхвалявана сказаў:
- Але ж у вас нічога няма.
Уілсан усміхнуўся:
- Калі мы з вамі стрэліся, у вас таксама нічога не было. Вас гэта не датычыць. Будзеце спрачацца са мной, я ўзлавацца магу. Вы едзьце, а то я сапраўды зазлую і пасваруся з вамі.
Кіўком галавы маці паклікала бацьку пад брызент і нешта шапнула яму.
Уілсан павярнуўся да Кейсі:
- Сэйры прасіла вас зайсці да яе.
- Добра, - адказаў прапаведнік. Ён пайшоў да маленькай шэрай палаткі Ўілсанаў, адхінуў полкі і ўвайшоў. У палатцы было цёмна і душна. На зямлі ён убачыў матрац, астатнія рэчы, як былі скінуты з грузавіка, так і валяліся дзе папала. Сэйры ляжала на матрацы, шырока расплюшчыўшы бліскучыя вочы. Кейсі спыніўся, глянуў на яе, апусціўшы сваю вялікую галаву, і мускулы на яго жылістай шыі напяліся. Ён зняў з галавы капялюш і стаяў, трымаючы яго ў руцэ.
Сэйры спыталася:
- Муж сказаў, што мы не едзем?
- Сказаў.
Зноў пачуўся нізкі прыгожы голас Сэйры:
- Я хацела ехаць з вамі. Ведаю, мне з гэтай пустыні жывой не выбрацца, затое муж перабярэцца цераз яе. А ён не хоча. Ён не ведае. Думае, я папраўлюся. Ён не ведае.
- Ён сказаў: не паедзем.
- Ага. Ён упарты. А вас я паклікала, каб малітву прачыталі.
- Я не прапаведнік ужо, - ціха прамовіў Кейсі. - Малітвы мае не памогуць.
Сэйры правяла языком па сасмяглых губах.
- Калі памёр іх дзед, я была ў палатцы. Тады вы прачыталі малітву.
- Гэта была не малітва.
- Малітва, - сказала Сэйры.
- Не такая, якія чытаюць прапаведнікі.
- Малітва была добрая. Прачытайце і мне такую.
- Я не ведаю, што гаварыць.
Сэйры заплюшчыла вочы і праз хвіліну зноў паглядзела на Кейсі.
- Тады памаліцеся моўчкі. Без слоў. Мне большага не трэба.
- Ува мне няма бога, - сказаў Кейсі.
- У вас ёсць бог. Вы не ведаеце, які ён, але гэта няважна. - Прапаведнік схіліў галаву. Сэйры баязліва сачыла за ім. І калі ён падняў галаву, твар яе пасвятлеў. - Гэтага я і хацела. Адчуць, што ёсць нехта побач... і моліцца.
Кейсі матнуў галавой, быццам адганяючы сон.
- Я гэтага не разумею, - сказаў ён.
А Сэйры сказала:
- Але вы... вы ведаеце, праўда?
- Ведаю, - адказаў Кейсі, - ведаю, але не разумею. Можа, міне некалькі дзён, вы адпачняце і паедзеце далей.
Сэйры паволі пакруціла галавой:
- Ува мне ўжо нічога не засталося, акрамя болю. Я ведаю, што гэта, толькі яму гаварыць не хачу. Ён вельмі засмуціцца. А зрабіць усё роўна нічога не зможа. Магчыма, ноччу, калі ён засне... Прачнецца, усё ж лягчэй.
- Хочаце, я не паеду, застануся з вамі?
- Не, - сказала Сэйры. - Не. Ведаеце, дзяўчынай я добра спявала. У нашых краях усе гаварылі, што я спяваю не горш за саму Джэні Лінд. Бывала, прыйдуць паслухаць мяне. І вось... пяеш, а людзі стаяць побач, і здаецца, быццам ты з імі адно цэлае. Так мне рабілася добра тады. Не кожнаму дадзена такое адчуць - такую паўнату ў сэрцы і блізкасць да людзей, што стаяць і слухаюць. Тады я ўсё думала, што некалі буду спяваць у тэатрах, ды не збылося. То і добра. Калі я спявала, нікога паміж намі не было, нічога. Вось чаму я папрасіла вас памаліцца. Захацелася яшчэ раз адчуць такую блізкасць. Песня і малітва - адно і тое. Шкада, што вы не чулі, як я спявала.
Кейсі заглянуў ёй у самыя вочы.
- Бывайце, - сказаў ён.
Яна кіўнула яму галавой і моцна сцяла губы. І прапаведнік выйшаў з паўзмроку палаткі на сляпучае сонечнае святло.
Мужчыны рабілі пагрузку. Дзядзька Джон стаяў на кузаве, а астатнія падавалі яму рэчы. Ён акуратна расстаўляў іх, стараючыся, каб было як мага раўней. Маці выняла салёную свініну з бочачкі і паклала ў рондаль, а Том з Элам схадзілі да ракі і памылі абедзве бочачкі. Потым прывязалі іх да падножак грузавіка, налілі вадой, якую прынеслі ў вёдрах. Зверху завязалі бачуркі парусінай, каб вада не расплюхалася ў дарозе. Засталося яшчэ толькі ўкласці брызент і матрац, на якім спала бабка.
Том сказаў:
- З такім грузам калымага наша моцна перагрэецца. Вялікі запас вады трэба мець.
Маці раздала ўсім вараную бульбу, вынесла з-пад брызенту астатнія паўмяха бульбы і паставіла яго ля рондаля са свінінай. Усе елі стоячы, пераступаючы з нагі на нагу і перакідаючы з далоні на далонь гарачыя бульбіны, каб яны астылі.
Маці пайшла ў палатку Ўілсанаў, прабыла там хвілін дзесяць і ціхенька выйшла.
- Пара ехаць, - сказала яна, падышоўшы да мужчын.
Мужчыны зайшлі пад брызентавы навес. Бабка спала з шырока раскрытым ротам. Яны асцярожна паднялі матрац і паклалі яго на самы верх грузавіка. Бабка падабрала свае кашчавыя ногі, але не прачнулася.
Дзядзька Джон з бацькам перакінулі брызент цераз верхнюю перакладзіну так, што атрымалася нешта накшталт стрэшкі, і прывязалі яго да бакавых планак бартоў. Цяпер усё было гатова. Бацька дастаў з кішэні кашалёк і выняў з яго дзве пакамечаныя паперкі. Ён падышоў да Ўілсана і падаў яму грошы.
- Вось, прыміце ад нас і... - ён паказаў на рондаль са свінінай і мяшок з бульбай, - і гэта.
Уілсан панурыўся і рашуча пакруціў галавой.
- Не, я гэтага не зраблю, - сказаў ён. - У вас у саміх мала.
- На дарогу нам хопіць, - сказаў бацька. - Не апошняе аддаём. А прыедзем на месца, у нас работа будзе.
- Не, я гэтага не зраблю, - паўтарыў Уілсан. - Лепш не ўгаворвайце, зазлую.
Маці ўзяла з рук бацькі абедзве паперкі, акуратна перагнула іх напалам і паклала на зямлю, а зверху паставіла рондаль са свінінай.
- Вось дзе яно будзе, - сказала яна. - Не возьмеце вы, возьмуць іншыя.
Уілсан павярнуўся, не падымаючы галавы, і пайшоў да сваёй палаткі, і за ім захінуліся полкі.
Джоўды пачакалі яшчэ некалькі хвілін, і тады Том сказаў:
- Трэба ехаць. Цяпер ужо, пэўна, каля чатырох.
Усе забраліся на грузавік, маці наверх - бліжэй да бабкі. Том з Элам і бацькам селі ў кабіну, Уінфілд - на калені да бацькі. Коні і Ружа Сарона прымасціліся каля пярэдняй сценкі. Прапаведнік, дзядзька Джон і Руці паселі хто дзе сярод паклажы.
Бацька крыкнуў:
- Місіс Уілсан, містэр Уілсан, бывайце!
З палаткі не адказалі. Том завёў матор, і грузавік цяжка зрушыў з месца. І калі яны папаўзлі па разбітай дарозе, што вяла да Нідлса і да шашы, маці азірнулася. Уілсан стаяў з капелюшом у руцэ і пазіраў ім услед. Сонца біла яму проста ў твар. Маці памахала яму рукой, але ён не адказаў ёй.
Том вёў грузавік на другой скорасці, каб не папсаваць рысоры. На ўскраіне Нідлса ён спыніўся каля заправачнай станцыі, праверыў, ці не спускаюць камеры і ці моцна прывязаны запасныя шыны. Заправіў гаручым бак, купіў яшчэ дзве пяцігалонавыя каністры бензіну і адну двухгалонавую бляшанку масла. Ён заліў у радыятар вады, папрасіў даць яму карту і пачаў яе вывучаць.
Малады чалавек у белай форме прыкметна нерваваўся, абслугоўваючы Тома, і супакоіўся толькі тады, калі яму заплацілі па рахунку.
- Храбры вы народ, - сказаў ён.
Том адарваў вочы ад карты.
- Гэта чаму ж?
- Праз пустыню ў такім драндулеце?
- А ты сам праз яе пераязджаў?
- І не адзін раз, толькі не ў гэтакай скрыні.
Том сказаў:
- Калі будзе паломка, хто-небудзь нас, думаю, выручыць.
- Што ж, можа, і выручыць. Але сярод ночы людзі баяцца спыняцца. Я нізашто б не спыніўся. Храбрасці не хапіла б.
- Думаеш, мы храбрыя? Нам проста нічога больш не застаецца. Ну, дзякуй табе. Пацягнемся далей. - Том сеў у кабіну і паехаў ад станцыі.
Малады чалавек у белым увайшоў у домік з рыфленага жалеза, дзе яго памочнік праглядаў папку з рахункамі.
- О божа, ну й адчайны народ!
- Хто - Окі? Яны ўсе адчайныя.
- На такім драндулеце я пабаяўся б і з месца скрануцца.
- У нас з табой здаровы розум. А ў гэтых чортавых Окі ні разумення ніякага няма, ні чалавечых пачуццяў. Яны і не людзі. Сапраўдны чалавек не будзе так жыць, як яны. Сапраўдны чалавек не прымірыўся б з такім брудам і ўбоствам. Яны не нашмат лепшыя за гарыл.
- А ўсё ж добра, што мне не трэба ехаць праз пустыню на такім дапатопным «гудзоне». Тарахціць, як малатарня.
Памочнік паглядзеў на папку, што ляжала перад ім. Буйная кропля поту скацілася з яго пальца і ўпала на ружовыя лісткі.
- Ведаеш, іх нічым не напалохаеш. Яны такія бязмозгія, нават не ўяўляюць сабе, як гэта небяспечна. І, далібог, далей свайго носа нічога не бачаць. Ёсць за каго перажываць!
- Я не перажываю. Проста ўявіў сябе на іх месцы. Не, нізашто не хацеў бы!
- Бо ты разумееш, што да чаго. А яны нічога не разумеюць, - сказаў памочнік і выцер рукавом кроплю з ружовага рахунка.
Грузавік выехаў на шашу і пачаў узбірацца на пакаты ўзгорак між абламаных, выветраных скал. Вада ў радыятары неўзабаве закіпела, Том прыняў гэта як належнае і паехаў цішэй. Вышэй і вышэй па доўгім схіле, дарога выгіналася і пятляла па мёртвай мясцовасці, выпаленай сонцам да шэрасці, да белізны, без ніякіх прыкмет жыцця. Том зрабіў кароткі прыпынак, каб астыў матор, потым рушыў далей. Яны ўзняліся на перавал яшчэ да захаду сонца і зірнулі ўніз на пустыню - чорныя, як сажа, горы ўдалечыні і жоўтыя блікі сонца на шэрай пустэльнай зямлі. Маленькія чэзлыя пучкі травы, быльнёг і кусцікі жорсткага хмызу кідалі рэзкія цені на пясок і на абломкі скал. Сляпучае сонца свяціла ім проста ў вочы. Том прыкрыў іх рукой, каб відаць была дарога. Яны перавалілі цераз грэбень і пакаціліся ўніз з выключаным маторам, каб даць яму астыць. Так яны спускаліся па доўгім схіле да пустыні, а вентылятар круціўся, халодзячы ваду ў радыятары. Том, Эл і бацька з Уінфілдам на каленях глядзелі на яркае сонца над гарызонтам, і вочы ў іх былі як шкляныя, загарэлыя твары блішчалі ад поту. Выпаленая зямля і чорныя, як сажа, горы парушалі роўную далеч пустыні і рабіліся яшчэ страшнейшымі ў пачырванелых промнях заходняга сонца.
Эл сказаў:
- Ну і мясцовасць! А што, калі б давялося ісці пеша?
- Хадзілі і пеша, - адказаў Том. - Шмат народу хадзіла, а раз іншыя маглі, значыць, і мы змаглі б.
- Шмат, пэўна, загінула іх, - сказаў Эл.
- У нас ужо таксама не без страт.
Эл змоўчаў. Пустыня, якая ўсё больш чырванелася, пралятала міма.
- Як думаеш, мы калі-небудзь убачым зноў гэтых Уілсанаў? - папытаўся Эл.
Том пакасіўся на індыкатар узроўню масла і адказаў:
- У мяне такое адчуванне, што ні мы, ні хто іншы больш не ўбачыць місіс Уілсан. Проста адчуванне такое.
Уінфілд сказаў:
- Та, я хачу злезці.
Том глянуў на яго.
- Не шкодзіла б усіх спусціць да цемнаты. - Ён збавіў хуткасць і спыніў машыну. Уінфілд саскочыў на зямлю і памачыўся на краі шашы. Том высунуўся з кабіны. - Яшчэ каму трэба?
- Пацерпім, - адгукнуўся дзядзька Джон.
Бацька сказаў:
- Ты, Уінфілд, лезь наверх. У мяне ногі знямелі цябе трымаць. - Хлопчык зашпіліў штаны, паслухмяна ўскараскаўся на грузавік па заднім борце і пералез на карачках цераз бабчын матрац бліжэй да Руці.
Машына ішла насустрач нізкаму сонцу, якое ўжо дакранулася краем да няроўнай рысы гарызонту, заліўшы густой чырванню ўсю пустыню.
Руці сказала Ўінфілду:
- Што, прагналі?
- Я сам не захацеў. Тут лепш. Там легчы няма дзе.
- Толькі сядзі ціха, не балбачы, - сказала Руці, - бо я хачу заснуць - прачнуся, а мы ўжо на месцы! Так Том сказаў. Цікава будзе паглядзець - прыгожы, кажуць, край.
Сонца зайшло, пакінуўшы на небе вялікі зіхатлівы круг. Пад брызентам стала цёмна, як у тунелі з прасветлінамі ў абодвух канцах, трохвугольнымі прасветлінамі.
Коні і Ружа Сарона сядзелі, прыхінуўшыся да кабіны, і гарачы вецер, які ўрываўся пад навес, біў ім у патыліцу, а брызент ляпаў і гуў, як барабан, у іх над галавой. Яны ціха перамаўляліся пад ляпанне брызенту, каб ніхто іх не чуў. Коні паварочваў галаву і шаптаў жонцы на вуха, і Ружа Сарона, адказваючы, рабіла тое самае. Яна сказала:
- Мы адно толькі робім - едзем і едзем, і, здаецца, ніколі канца гэтаму не будзе. Мне надакучыла.
Коні павярнуўся да яе вуха:
- Можа, раніцай... Ты б хацела, каб мы пабылі адны? - У змроку ён пагладзіў рукою яе бядро.
Яна сказала:
- Не трэба. А то я завядуся, як шлюха. Кінь. - І павярнулася вухам да яго, каб пачуць, што ён адкажа.
- Можа... калі ўсе заснуць.
- Можа... - сказала Ружа Сарона, - Толькі пачакай, пакуль заснуць.
- Я больш не магу, - сказаў Коні.
- Ведаю. Я таксама. Давай пагаворым, як там усё будзе, а ты адсунься, пакуль галава ў мяне не закружылася.
Коні крыху адсунуўся.
- Значыць, адразу, як прыедзем, я пачну вучыцца вечарамі, - сказаў ён. Ружа Сарона глыбока ўздыхнула. - Я дастану кніжачку такую, дзе ўсё пра гэта гаворыцца, выражу з яе падпісны бланк і адразу пашлю.
- А чакаць доўга давядзецца?
- Чаго чакаць?
- Калі ты пачнеш зарабляць вялікія грошы і ў нас будзе лёд.
- Гэта цяжка сказаць, - важна прамовіў Коні. - Загадзя сказаць не магу. Да Каляд, а то і раней, думаю, вывучуся.
- Ты вывучышся, і мы купім сабе лёд і ўсё астатняе, так?
Коні хмыкнуў:
- Гэта ў цябе ад спёкі. Нашто табе лёд на Каляды?
Ружа Сарона ўсміхнулася:
- І праўда. Але так хочацца, каб ён у нас заўсёды быў. Ну, перастань. А то я завядуся!
Сутонне перайшло ў цемру, і лагоднае неба над пустыняй усыпалі зоркі - калючыя, вострыя, з рэдкімі кароткімі і доўгімі промнямі. І гарачыня стала іншая. Пакуль сонца стаяла ў небе, гарачыня хвастала, працінала наскрозь, а цяпер яна падымалася знізу, ад зямлі, і шчыльна ахінала людзей. Загарэліся фары, і цьмяна завіднеўся наперадзе кавалак шашы і паласа пустыні абапал яе. Час ад часу ўдалечыні паблісквалі вочы якой-небудзь жывёліны, але самой яе не было відаць. Пад брызентам цяпер зрабілася зусім цёмна. Дзядзька Джон і прапаведнік ляжалі, скурчыўшыся і апіраючыся на локці, пасярэдзіне грузавіка і глядзелі на дарогу праз задні трохкутны праём навеса. Бліжэй да задняга борта яны бачылі два няясныя выступы - гэта былі бабка і маці; маці раз-пораз варушылася, і ў праёме мільгалі абрысы яе рукі.
Дзядзька Джон загаварыў з прапаведнікам.
- Кейсі, - сказаў ён, - ты павінен ведаць, што з гэтым рабіць.
- З чым?
- Не ведаю, - адказаў дзядзька Джон.
Кейсі сказаў:
- Нялёгкую ты мне задачу задаў!
- Ты ж быў прапаведнікам.
- Паслухай, Джон, усе мне тыцкаюць - прапаведнік, прапаведнік... А прапаведнік такі самы чалавек, як і ўсе іншыя.
- То так, але... ён... чалавек асаблівы, інакш які ж ён прапаведнік. Я вось што хацеў спытацца... як па-твойму, можа так быць, што прыносіш людзям няшчасце?
- Не ведаю. Не ведаю.
- Ну, разумееш... была ў мяне жонка... прыгожая, добрая. Неяк ноччу забалеў у яе жывот. І папрасіла яна: «Прывядзі доктара». А я кажу: «Яшчэ чаго. Ты проста аб'елася». - Дзядзька Джон паклаў руку на калена прапаведніку і пачаў узірацца ў цемры ў яго твар. - Як яна на мяне паглядзела! Усю ноч стагнала і назаўтра днём памерла. - Прапаведнік нешта прамармытаў. - Разумееш? - гаварыў далей Джон. - Я забіў яе. І з таго дня ўсё стараўся выкупіць сваю віну, рабіць дабро... усё больш дзецям. І жыць захацеў дабром, а не магу. Напіваюся, распуснічаю.
- Усе распуснічаюць, - сказаў Кейсі. - Я таксама.
- То так, але ў цябе няма грэху на душы.
Кейсі мякка сказаў:
- Як няма - ёсць. Усе не без грэху. Грэх - гэта тое, у чым ты не адчуваеш упэўненасці. А тых, хто ва ўсім упэўнены і не ведае за сабой грахоў, тых сукіных сыноў я, на месцы бога, гнаў бы выспяткам у зад з царства нябеснага. Цярпець іх не магу!
Дзядзька Джон сказаў:
- У мяне такое адчуванне, быццам я сваім родным няшчасце прыношу. Думаю, ці не пайсці ад іх. Гэтак жыць больш не магу.
Кейсі адказаў адразу:
- Мне гэта вядома... Што чалавеку трэба рабіць, няхай тое і робіць. Параіць табе нічога не магу. Не ведаю, ці можа чалавек прыносіць другому шчасце або няшчасце. Адно толькі добра ведаю: ніхто не мае права лезці ў чужое жыццё. Няхай чалавек вырашае сам за сябе. Памагчы яму можна, а ўказваць - не.
Дзядзька Джон расчаравана сказаў:
- Дык ты не ведаеш, што мне рабіць?
- Не, не ведаю.
- Па-твойму, гэта грэх, што я даў жонцы вось гэтак памерці?
- Разумееш, - сказаў Кейсі, - у каго іншага гэта была б проста памылка, але раз ты лічыш, што гэта грэх... значыць, грэх. Чалавек сам стварае сабе грахі.
- Мне трэба добра падумаць, - сказаў дзядзька Джон, павярнуўся на спіну і лёг, падняўшы калені.
Грузавік ішоў па гарачай пустыні гадзіна за гадзінай. Руці і Ўінфілд спалі. Коні выцягнуў аднекуль з паклажы коўдру, накрыў сябе і Ружу Сарона, і, стрымліваючы дыханне, яны пачалі валтузіцца ў духаце. Потым Коні адкінуў коўдру, і гарачы скразняк абвеяў прахалодай іх змакрэлыя целы.
Каля задняга борта маці ляжала на матрацы побач з бабкай, і, хоць нічога ў цемры не бачыла, яна адчувала сутаргавае паторгванне цела, няроўнае сэрцабіццё і перарывістае дыханне бабкі. І ўсё паўтарала:
- Супакойся. Усё будзе добра. - І потым дадала зрывістым голасам: - Ты ж ведаеш, нам трэба пераехаць гэту пустыню. Ты ж гэта ведаеш.
Дзядзька Джон аклікнуў яе:
- Што там у вас?
Толькі праз якую хвіліну маці адказала:
- Ды гэта я так. Пэўна, у сне.
Потым бабка заціхла, і маці знерухомела побач з ёю.
Ноч цягнулася, міналі гадзіны, цемра ляцела насустрач грузавіку. Часам іх абганялі легкавыя аўтамашыны, што беглі на захад, у ноч; часам насустрач ім імчаліся вялізныя грузавікі і з грукатам праляталі міма, на ўсход. Зоркі марудным каскадам струменіліся ў бок заходняга гарызонту. Каля паўночы Джоўды пад'ехалі да інспектарскай станцыі на ўскраіне Дэгета. Шаша ў гэтым месцы была залітая электрычнасцю, а каля канторы стаяў ярка асветлены шчыт з надпісам: «Бяры ўправа. Стоп». Том спыніў машыну, і інспектары, што сланяліся без справы па канторы, зараз жа выйшлі і сталі пад доўгай драўлянай паветкай. Адзін з іх запісаў нумар машыны і падняў века капота.
Том запытаўся:
- Гэта навошта?
- Агранамічная інспекцыя. Зараз агледзім вашу машыну. Расліны, насенне ёсць?
- Няма, - адказаў Том.
- Усё роўна агледзім. Разгружайцеся.
Маці з цяжкасцю злезла з грузавіка. Твар у яе быў апухлы, вочы глядзелі сурова.
- Паслухайце, містэр, у нас старая хворая жанчына. Вязём яе да доктара. Нам марудзіць нельга. - Яна, відаць, ледзь стрымлівалася, каб не закаціць істэрыку. - Вы не маеце права нас затрымліваць.
- Не маю права? Без агляду нельга.
- Богам прысягаю, у нас нічога гэтага няма! - закрычала маці. - Прысягаю. Бабцы зусім дрэнна.
- У вас у самой выгляд нездаровы, - сказаў інспектар.
Маці ўзялася за край борта і з усяе сілы падцягнулася да бабкі.
- Вось, зірніце, - сказала яна.
Інспектар накіраваў прамень электрычнага ліхтарыка на стары зморшчаны твар.
- Далібог, праўда, - сказаў ён. - Дык вы прысягаеце, што нічога няма - ні насення, ні фруктаў, ні гародніны, ні кукурузы, ні апельсінаў?
- Няма, няма. Прысягаю.
- Што ж, едзьце. У Барстаў ёсць доктар. Усяго восем міль адсюль. Давайце наперад!
Том сеў у кабіну, і машына зрушыла з месца.
Інспектар павярнуўся да свайго таварыша:
- Не мог я іх затрымліваць.
- Можа, маняць, - сказаў той.
- Што ты, не! Ты бачыў бы твар гэтай старой! Не, не маняць.
Том павялічыў хуткасць, каб хутчэй дабрацца да Барстаў, і, калі яны пад'ехалі да гэтага маленькага гарадка, ён спыніў машыну, вылез з кабіны і падышоў да задняга борта. Маці вызірнула яму насустрач.
- Усё ў парадку, - сказала яна. - Я проста не хацела там часу траціць, баялася, не паспеем да раніцы пераехаць пустыню.
- Гэта добра. А з бабкай што?
- Нічога. Едзь далей. Трэба хутчэй пераехаць пустыню.
Том пакруціў галавой і вярнуўся ў кабіну.
- Эл, - сказаў ён, - зараз заправімся, а далей ты трохі павядзеш.
Грузавік пад'ехаў да заправачнай станцыі, якая працавала круглыя суткі, і Том наліў бак і радыятар і падліў масла ў картэр. Эл перасунуўся да руля, а Том сеў на крайняе месца справа, бацька сядзеў пасярэдзіне. Яны зноў акунуліся ў цемру, і невысокія ўзгоркі вакол гарадка засталіся ззаду.
Том сказаў:
- Не разумею, што гэта з мамай? Якая яе муха ўкусіла? Не так ужо і доўга агледзець паклажу. Сказала, што з бабкай зусім дрэнна, а цяпер кажа - нічога. Розуму не дабяру. Нешта нядобрае з ёю. Мазгі, ці што, перакруціліся за дарогу.
Бацька сказаў:
- Яна цяпер як у маладосці. Адчайная была дзяўчына. Нічога не баялася. Здаецца, ужо час ёй уціхамірыцца - гэтулькі ж дзяцей нараджала. А праца якая цяжкая. Ды дзе там! А калі той жалязякай размахвала, памятаеш! Паспрабуй забяры ў яе - я нізашто б не адважыўся.
- Зразумець не магу, што з ёю, - сказаў Том. - Пэўна, проста стамілася.
Эл сказаў:
- Вось ужо не буду гараваць, калі падарожжа наша скончыцца. Усе нервы выматала гэтая праклятая машына.
Том сказаў:
- Ты малайчына, Эл. Добрую выбраў. З ёю амаль ніякага клопату не было.
Усю ноч машына ўгрызалася ў душную цемру, і зайцы збягаліся на святло фар і ўцякалі доўгімі пругкімі скачкамі. І калі наперадзе бліснулі агеньчыкі форта Махаве, ззаду пачало ўжо світаць. У перадранішнім сутонні на захадзе паказаліся высокія горы. У Махаве, на граніцы між Арызонай і Каліфорніяй, залілі ў машыну вады і масла і паволі папаўзлі ў горы. Досвітак цяпер акружаў іх з усіх бакоў.
Том сказаў:
- Дзякуй богу, праехалі! Та, Эл, радуйцеся! Пустыню праехалі!
- Я так змарыўся, што мне ўсё роўна, - сказаў Эл.
- Можа, я павяду?
- Не, пачакай.
Тачапі праехалі, калі неба ўжо заірдзелася - ззаду падымалася сонца. І раптам перад іх вачамі разаслалася шырокая даліна. Эл націснуў на тормаз, і машына спынілася пасярод дарогі.
Бацька сказаў:
- А божачкі!
Гарадкі ўдалечыні, пасёлкі сярод фруктовых садоў і ў золата афарбаваная ранішнім сонцам даліна. Ззаду пачуўся сігнал аўтамабіля. Эл адвёў грузавік да краю шашы і там стаў.
- Хачу на ўсё гэта паглядзець, - сказаў ён.
Залацістыя ўранні збожжавыя палі, вербы радамі, цэлыя шарэнгі эўкаліптаў.
Бацька ўздыхнуў:
- І не снілася мне, што такое бывае на свеце.
Персікавыя дрэвы, арэхавыя гаі, цёмна-зялёныя плямы апельсінаў. І чырвоныя дахі сярод дрэў, і адрыны - прасторныя адрыны. Эл выйшаў з кабіны і крыху прайшоўся, каб размяць ногі. Потым крыкнуў:
- Ма, глянь! Прыехалі!
Руці з Уінфілдам скаціліся з машыны і моўчкі замерлі на месцы, зачаравана і палахліва пазіраючы на бязмежную даліну. Лёгкая смуга засцілала даль, і, здавалася, зямля, чым далей, рабілася ўсё мякчэйшай і мякчэйшай. Недзе далёка пабліскваў на сонцы крыламі вятрак - як маленькі геліёграф, што перадае светлавыя сігналы. Руці і Ўінфілд не адрывалі вачэй ад яго. Руці прашаптала:
- Вось яна - Каліфорнія.
Уінфілд бязгучна паварушыў губамі, паўтараючы гэтае слова па складах.
- Тут фрукты, - сказаў ён уголас.
Кейсі і дзядзька Джон, Коні і Ружа Сарона спусціліся ўніз. І таксама стаялі моўчкі. Ружа Сарона пачала прыгладжваць рукой валасы, раптам убачыла даліну, і рука яе паволі апусцілася.
Том сказаў:
- А дзе ма? Няхай і яна паглядзіць. Ма, глянь! Сюды ідзі.
Маці памалу, цяжка пералезла цераз задні борт. Том глянуў на яе.
- Госпадзі, ма, ты што, захварэла?
Твар у яе быў ацёклы, нейкі застылы, вочы глыбока запалі, вакол іх - чырвоныя кругі стомы. Ногі яе дакрануліся да зямлі, і яна ўхапілася за планку борта, каб не ўпасці.
Пачуўся яе хрыплы голас:
- Пустыню, кажаце, праехалі?
Том паказаў рукой на даліну:
- Глянь!
Яна павярнула галаву ў той бок, і рот яе крыху раскрыўся. Пальцы пацягнуліся да горла, ухапілі складку скуры і слаба сціснулі яе.
- Дзякуй богу, - сказала маці. - Прыехала наша сям'я. - Калені ў яе падагнуліся, і яна апусцілася на падножку.
- Ты захварэла, ма?
- Не, стамілася.
- Ты ноччу не спала?
- Не.
- Бабцы было дрэнна?
Маці паглядзела на свае рукі, якія ляжалі ў яе на каленях, як стомленыя палюбоўнікі.
- Я хацела пачакаць, не гаварыць адразу. Каб не сапсаваць вам... Хацела як лепш.
Бацька сказаў:
- Значыць, бабцы зусім дрэнна.
Маці ўзняла вочы і доўгім поглядам абвяла даліну.
- Бабка памерла.
Усе моўчкі пазіралі на яе, і бацька нарэшце запытаўся:
- Калі?
- Яшчэ да таго, як інспектары нас спынілі.
- Таму ты і не дала ім паклажу праверыць.
- Баялася, не паспеем пустыню пераехаць, - адказала маці. - Я сказала бабцы, што зрабіць нічога нельга. Сям'і трэба праехаць праз пустыню. Я сказала ёй, усё ёй сказала, калі яна была ўжо пры смерці. Нам нельга спыняцца сярод пустыні. У нас малыя дзеці... і Разашарна чакае дзіцяці. Я ёй усё сказала. - Яна падняла рукі і на момант закрыла імі твар. - Пахаваем яе ў прыгожым, зялёным месцы, - ціха прамовіла маці. - Навокал будуць дрэвы, і месца будзе прыгожае. Няхай хоць прах яе спачывае ў Каліфорніі.
Усе спалохана пазіралі на маці, дзівячыся сіле яе духу.
Том сказаў:
- Госпадзі божа! Ты ўсю ноч ляжала з ёю побач!
- Трэба было пераехаць пустыню, - прагаварыла маці жаласна.
Том ступіў да яе - хацеў пакласці ёй руку на плячо.
- Не чапай мяне, Том, - сказала яна. - Я саўладаю з сабой, толькі не чапай. А то не стрываю.
Бацька сказаў:
- Час ехаць. Будзем спускацца.
Маці глянула на яго:
- Мне можа... можна мне сесці ў кабіну? Я там, ззаду, больш не магу. Я знясілела. Страшэнна знясілела.
Яны зноў узабраліся на грузавік, адводзячы вочы ад нерухомай доўгай постаці, старанна захінутай з усіх бакоў, нават з галавой, у коўдру. Усе забраліся на свае месцы, стараючыся не глядзець у той бок - на грудком выпнутую коўдру - там яе нос, на востры клін пад коўдрай - там яе падбародак. Стараліся не глядзець туды - і не маглі. Руці і Ўінфілд прымасціліся ў пярэднім куце кузава - як мага далей ад нябожчыцы, але не адводзілі вачэй ад старанна загорнутага цела.
Руці прашаптала:
- Гэта бабка. Яна цяпер мёртвая.
Уінфілд сумна паківаў галавой:
- Яна больш не дыхае. Яна зусім мёртвая.
А Ружа Сарона ціха сказала Коні:
- Яна памерла, якраз як мы...
- Хто ж ведаў? - суцішыў ён яе.
Эл палез наверх, уступіўшы маці месца ў кабіне. Ён крыху казырыўся, каб прыглушыць сум. Бухнуўся на паклажу побач з Кейсі і дзядзькам Джонам.
- Ну што ж, - сказаў ён, - яна была старая. Свой век пражыла. Смерці нікому не мінуць. - Кейсі і дзядзька Джон глянулі на Эла пустымі вачамі, нібы Эл быў не чалавекам, а гаворачым дрэвам. - Што, няпраўда? - не здаваўся Эл. Але вочы адвярнуліся ад яго, і ён насупіўся і прыгнечана змоўк.
Кейсі са здзіўленнем сказаў:
- Усю ноч, адна... - І дадаў: - Такое вялікае сэрца ў гэтай жанчыны, Джон, столькі любові... што мяне страх бярэ. І страх, і пачуццё сваёй нікчэмнасці.
Дзядзька Джон запытаўся:
- А гэта не грэх? Няма ў гэтым крышачку граху, па-твойму?
Кейсі недаўменна глянуў на яго:
- Грэх? Не, ніякага грэху тут няма.
- А я што ні раблю, дык хоць крышачку саграшу, - сказаў Джон і глянуў на захутанае ў коўдру цела.
Том, маці і бацька селі ў кабіну. Том адпусціў тармазы і завёў матор. Цяжка нагружаная машына, пафыркваючы, пастрэльваючы выхлапамі і трасучыся ўсім кузавам, пайшла па схіле гары ўніз. Сонца было ў іх ззаду, а спераду - залацістая, зялёная даліна. Маці ківала з боку ў бок галавой:
- Якая прыгажосць. Шкада, што яны не ўбачылі!
- І мне шкада, - сказаў бацька.
Том мякка паляпаў па штурвале далонню.
- Яны былі ўжо вельмі старыя, - сказаў ён. - Нічога б тут не ўбачылі. Дзед пачаў бы прыгадваць сваю маладосць, індзейцаў і прэрыі. А бабка ўспомніла б свой першы дамок. Яны былі ўжо вельмі старыя. Вось хто сапраўды ўсё ўбачыць, дык гэта Руці з Уінфілдам.
Бацька сказаў:
- Бач, як наш Томі гаварыць пачаў - як зусім дарослы, быццам прапаведнік казань на карысць бедных кажа.
А маці сумна ўсміхнулася:
- Так. Наш Томі дарослы стаў, вырас... так вырас, што да яго і не дацягнешся.
Яны спускаліся па схіле, крута паварочваючы, пятляючы, і то гублялі з поля зроку даліну, то зноў знаходзілі яе вачамі. Да іх падымаўся гарачы подых даліны з густым пахам зеляніны, смалістым водарам шалфею і грындэлій. Уздоўж шашы стракаталі цвыркуны. Праз дарогу паўзла грымучая змяя. Том наехаў на яе, раздушыў пасярэдзіне коламі і пакінуў курчыцца на шашы.
Ён сказаў:
- Думаю, трэба знайсці следчага, ён недзе там ёсць. Пахаваць яе трэба прыстойна. Колькі ў нас грошай засталося, та?
- Даляраў сорак, - адказаў бацька.
Том зарагатаў:
- Госпадзі, давядзецца пачынаць з пустымі рукамі! Ні з чым прыехалі, - прагігікаў ён, і твар яго раптам зрабіўся суровы. Ён нацягнуў брыль кепкі на самыя вочы. А грузавік каціўся з гары да шырокай даліны.
Раней Каліфорнія належала Мексіцы, а землі яе - мексіканцам; потым у краіну хлынула арда абадраных, разгарачаных, нецярплівых амерыканцаў. І так моцна адольвала іх цяга да зямлі, што яны завалодалі ёю - прысвоілі зямлю Сатэра, зямлю Герэра, захапілі вялікія маёнткі, пашкуматалі іх, сварыліся паміж сабою, рыкалі адзін на аднаго і біліся за свой кавалак - гэтыя ашалелыя, згаладалыя людзі, і пільнавалі захопленыя ўчасткі са стрэльбай у руках. Яны пабудавалі там дамы, свірны і адрыны, узаралі зямлю і засеялі. І так у іх паявілася нерухомая маёмасць, а нерухомая маёмасць - гэта ўжо ўласнасць.
Мексіканцы былі народ слабы і сыты. Яны не аказалі супраціўлення, бо не было на свеце нічога такога, да чаго б у іх была такая неўтаймаваная прага, як у амерыканцаў да зямлі.
І з цягам часу скватэры перасталі ўжо лічыцца захопнікамі і сталі паўнаўладнымі гаспадарамі; дзеці іх выраслі і парадзілі сваіх дзяцей на гэтай зямлі. І яны прагналі свой голад, люты голад, які смактаў і грыз ім нутро, і наталіць яго маглі толькі гэты край, вада, зямля і жыватворнае сонца над ёю, зялёныя ўсходы і набрынялае сокам карэнне. Яны валодалі ўсім гэтым так непадзельна, што перасталі бачыць што-небудзь вакол сябе. Іх ужо не даймала туга па акры ўрадлівай зямлі і па бліскучым нарогу плуга, па насенні і па ветраку, што памахваў крыламі ў паветры. Яны ўжо не падымаліся да святла, каб паслухаць першае цырыканне яшчэ сонных птушак, адчуць ранішні ветрык каля дома, пакуль чакалі, як выблісне сонца і можна будзе ісці на дарагое іх сэрцу поле. Усё гэта адышло ў мінулае, і ўраджай падлічваўся цяпер на даляры, зямля ацэньвалася як асноўны капітал плюс працэнты, ураджаі купляліся і прадаваліся яшчэ да сяўбы. І цяпер неўрадлівы год, засуха ці паводка ўжо не прыводзілі да замірання плыні жыцця, а ўсяго толькі да грашовых страт. І праз грошы змізарнела іх любоў да зямлі, а неўтаймаваную энергію кропля за кропляй высмакталі працэнты, і фермеры гэтыя сталі ўжо не фермерамі, а дробнымі крамнікамі - гандлярамі сваім ураджаем, дробнымі прамыслоўцамі, што прадаюць, перш чым вырабляюць. А потым фермерам, якія аказаліся няўдачлівымі крамнікамі, прыйшлося развітацца са сваёй зямлёй і ўступіць яе ўмелым крамнікам. Якім бы разумным ні быў чалавек, якой бы любоўю ні любіў ён зямлю і тое, што на ёй расце, ён не мог выжыць, калі не быў яшчэ і добрым гандляром. І з цягам часу іх гаспадаркамі завалодалі дзялкі і плошча зямельных участкаў усё большала, а колькасць іх меншала.
Цяпер земляробства стала прамысловасцю, і ўласнікі пайшлі па шляху Старажытнага Рыма, хоць самі таго і не ведалі. Яны прывозілі рабоў, хоць і не называлі іх рабамі: кітайцаў, японцаў, мексіканцаў, філіпінцаў. Людзі гэтыя могуць працаваць на адным рысе, бабах, казалі такія дзялкі. Ім надта нічога не трэба. І плаціць ім добра не трэба - яны ведаць не будуць, на што грошы траціць. Вы гляньце, як яны жывуць. Гляньце, што яны ядуць. А пераборлівымі зробяцца - гнаць іх у шыю.
Зямельныя ўчасткі буйнелі, а шэрагі ўласнікаў радзелі. Дробных фермераў зрабілася да мізэрнага мала. Пабоі, страх і голад давялі прывезеных нявольнікаў да таго, што некаторыя пачалі ўцякаць на радзіму, іншыя пачалі агрызацца, і іх перастралялі або выгналі з краіны. А зямельныя ўладанні ўсё шырэлі, гаспадароў стала яшчэ менш.
І ўраджаі пачалі збіраць ужо іншыя. Гаі фруктовых дрэў занялі месца збожжавых палёў, і ў нізінах цяпер расла гародніна на патрэбу ўсяму свету - салата, каляровая капуста, артышокі і бульба - культуры, збіраць якія даводзіцца сагнуўшыся. З касой, за плугам, з віламі чалавек працуе стоячы, але яму даводзіцца поўзаць, як казюлька, між градак салаты, гнуць спіну і цягнуць з сабой доўгі мех між радоў бавоўны і, як грэшніку на пакаянні, кленчыць перад каляровай капустай.
І цяпер гаспадары ўжо не працавалі на сваіх землях. Яны вялі гаспадарку на паперы, яны забыліся, што такое зямля, які ў яе пах, якая яна навобмацак, памяталі толькі, што яна іх уласнасць, памяталі толькі пра прыбыткі і страты. І некаторыя фермы разрасліся да такіх памераў, што аднаму чалавеку было ўжо не пад сілу абняць іх сваім розумам, так разрасліся, што спатрэбілася ўжо цэлая армія рахункаводаў, якія падлічвалі працэнты, прыбыткі і страты, хімікаў, якія даследавалі глебу і абагачалі яе, наглядчыкаў, якія сачылі, каб сагнутыя ў тры пагібелі людзі рухаліся ўздоўж градак з такой хуткасцю, на якую былі здольныя. І такі фермер сапраўды рабіўся гандляром і адкрываў краму. Ён плаціў людзям грошы, прадаваў ім прадукты, і грошы зноў вярталіся да яго. Неўзабаве ён пераставаў ім плаціць і гэтым эканоміў на рахункаводстве. На такіх фермах прадукты адпускаліся ў крэдыт. Чалавек працаваў і карміўся, а калі працу сваю канчаў, высвятлялася, што ён завінаваціўся кампаніі. А ўласнікі не толькі кінулі гаспадарыць на сваіх фермах - шмат хто з іх нават і ў вочы ніколі не бачыў іх.
А потым на Захад пацягнуўся разораны люд - з Канзаса, Аклахомы, Тэхаса, Нью-Мексіка, з Невады і Арканзаса - цэлымі сем'ямі, радамі, сагнаныя з месцаў пыльнымі бурамі, выцесненыя трактарамі. У бітком набітых машынах, цэлымі караванамі, бяздомныя, галодныя - дваццаць тысяч, пяцьдзесят тысяч, сто тысяч, дзвесце тысяч. Яны патокам пераліваліся цераз горы, згаладалыя, растрывожаныя, як мурашкі: спяшаліся хутчэй знайсці работу - падымаць, штурхаць, цягаць, палоць, капаць, збіраць - любую працу, любое ярмо, абы атрымаць ежу. Дзеці галадаюць. Нам няма дзе жыць. Снавалі, як мурашкі, спяшаліся дарвацца да працы, да ежы, а галоўнае - да зямлі.
Мы не чужынцы. Мы ўжо ў сёмым калене амерыканцы, а па паходжанню - ірландцы, шатландцы, ангельцы, немцы. Адзін з нашых продкаў змагаўся ў вайне за незалежнасць, а колькі іх удзельнічала ў грамадзянскай вайне і на тым, і на другім баку! Мы амерыканцы.
Яны былі галодныя, злосныя. Яны спадзяваліся знайсці тут дом, а знайшлі адну толькі нянавісць. Окі... Гаспадары ненавідзелі іх, бо ведалі, што Окі народ моцны, а самі яны слабыя, што Окі згаладаліся, а самі яны раз'еліся; і, магчыма, гаспадары чулі яшчэ ад прадзедаў сваіх, як лёгка захапіць зямлю ў слабасільнага чалавека, калі ты ўзлаваны і галодны і ў руках у цябе зброя. Гаспадары гарэлі да іх нянавісцю. А ў гарадках іх ненавідзелі крамнікі, бо ведалі, што ў Окі няма грошай, каб расплаціцца. Гэта самы пэўны спосаб заслужыць пагарду крамніка, бо яго сімпатыю выклікае якраз процілеглае. Гараджане, дробныя банкіры ненавідзелі Окі таксама - на іх не разжывешся. У гэтых Окі нічога няма. А работнікі на фермах ненавідзелі Окі таму, што галодны чалавек павінен працаваць, а калі ён вымушаны працаваць, не можа не працаваць, значыць, наймальнік аўтаматычна зніжае плату, і тады на вышэйшую ты ўжо і не разлічвай.
А пазбаўленыя сваіх гаспадарак фермеры-перасяленцы наваднялі Каліфорнію - дзвесце пяцьдзесят тысяч, трыста тысяч. Там, ззаду, усё новыя і новыя трактары паўзлі па зямлі і зганялі з яе арандатараў. І новыя хвалі выплюхваліся на дарогі, новыя хвалі беззямельнага, бяздомнага люду, узлаванага, упартага і таму небяспечнага.
Каліфарнійцы шмат чаго патрабавалі ад жыцця - прымнажэння капіталу, поспеху ў грамадстве, уцех і забаў, раскошы, надзейнага змяшчэння грошай у банках, а новыя варвары патрабавалі толькі дзвюх рэчаў - зямлі і хлеба; на іх разуменне гэтыя дзве рэчы зліваліся ў адну. І ў той час як патрабаванні каліфарнійцаў былі туманныя, неакрэсленыя, тое, да чаго імкнуліся Окі, ляжала проста пры дарозе, цвяліла вока, распальвала зайздрасць: урадлівыя палі, дзе можна выкапаць калодзежы, - урадлівыя зялёныя палі; зямля, якую можна раскрышыць пальцамі на далоні; трава, пах якой можна ўдыхнуць у сябе; сцяблінкі аўса - пажуеш іх і адчуеш у горле даўкаватую слодыч. Чалавек пазіраў на абложную зямлю і ведаў, у думках бачыў, што гнуць спіну і натужвацца тут можна нямарна - тут вырасце капуста і залацістая цукровая кукуруза, рэпа і морква.
Бяздомны, галодны чалавек ехаў па дарогах, побач з ім яго жонка, на заднім сядзенні схуднелыя дзеці, і глядзеў на абложныя палі, якія маглі б даць яму не прыбыткі, не - ежу, і ён ведаў, што няўробленае поле - грэх, а незасеяная зямля - злачынства супраць яго згаладалых дзяцей. І калі такі чалавек праязджаў па дарогах, кожнае такое поле было яму спакусай, і яго разбірала жаданне ўзяць сабе гэтыя палі і вырасціць на іх тое, што дасць сілу яго дзецям і прынясе супакаенне жонцы. Спакуса ўвесь час была перад яго вачыма. Палі вабілі яго, арашальныя канавы з чыстай праточнай вадой дражнілі яго ўяўленне.
А на поўдні ён бачыў залатыя апельсіны на дрэвах, маленькія залатыя апельсіны на цёмнай зелені дрэў, і вартаўнікоў з драбавікамі ў прысадах - каб чалавек не мог сарваць плада свайму схуднеламу дзіцяці, хоць апельсіны пойдуць на звалку, калі цана іх упадзе.
Ён уязджаў на сваёй старой калымазе ў гарадок. Ён бегаў па фермах у пошуках працы. Дзе нам можна тут пераначаваць?
А вунь, у Гувервілі, ля самай рэчкі. Там ужо цэлая плойма гэтых Окі.
Ён пад'язджаў на сваёй старой машыне да Гувервіля. І потым ужо ніколі не пытаўся пра начлег, бо на ўскраіне кожнага горада быў свой Гувервіль.
Хламны пасёлак звычайна ўзнікаў каля вады; замест дамоў тут былі палаткі, буданы з бур'яну, загарадкі з кардону - кучы рознай непатрэбшчыны. Чалавек прывозіў сям'ю ў гэты пасёлак і лічыўся грамадзянінам Гувервіля - усе такія пасёлкі называліся Гувервілямі. Чалавек ставіў палатку як мага бліжэй да вады; а калі палаткі ў яго не было, ён ішоў на гарадскую звалку, прыносіў адтуль старыя кардонныя скрынкі і з гэтай гафрыраванай паперы будаваў сабе прыстанішча. А калі ліў дождж, яно размакала і зносілася вадой. Чалавек атабарваўся ў Гувервілі і снаваў на машыне па наваколлі, па фермах, шукаючы працы, і тыя мізэрныя грошы, што ў яго яшчэ заставаліся, ён траціў на бензін. Вечарамі мужчыны збіраліся разам і гутарылі. Седзячы на кукішках, яны гаварылі пра зямлю, якую бачылі ўсцяж дарог.
Вунь там, далей на захад, - трыццаць тысяч акраў. Ляжаць сабе проста так. Госпадзі, што я зрабіў бы з такой зямлёю - хоць з пяццю яе акрамі! Эх, чорт, на стале ў мяне было б усё!
А ты заўважыў? На фермах ні гародніны не садзяць, ні курэй не трымаюць, ні свіней. Разводзяць толькі адно - бавоўну або персікі ці салату. А на другой ферме адны куры. Усё астатняе купляюць, а маглі б хоць у агародчыках вырасціць.
Госпадзі, што б я зрабіў з парачкай свіней!
Ну, гэта ўсё не тваё і ніколі тваім не будзе.
Што ж рабіць? Гэтак дзяцей не выгадуеш.
У лагерах шэптам перадавалі адзін аднаму чуткі. У Шэфтары ёсць работа. І сярод ночы грузіліся машыны, на дарогах цесната - пагоня за работай, як залатая ліхаманка. У Шэфтары стоўпатварэнне, народу наехала ў пяць разоў больш, чым трэба. Пагоня за працай, як залатая ліхаманка. Яны выязджалі цішком ноччу, апанаваныя нястрымным імкненнем атрымаць работу. А ўздоўж дарог былі спакусы - палі, якія маглі даць хлеб.
На гэта ёсць гаспадар. Гэта не наша.
Што ж, можа, усё ж пашанцуе атрымаць тут невялічкі ўчастачак. Няхай самы маленькі. Вунь там - хоць лапік зямлі. Цяпер там адзін смярдзючы дурнап'ян. Госпадзі, з гэтага лапіка я столькі бульбы сабраў бы - на ўсю сям'ю хапіла б!
Яно не наша, Дурнап'ян дык дурнап'ян, няхай сабе расце. Час ад часу хто-небудзь набіраўся смеласці, пракрадаўся на лапіну зямлі і расчышчаў яе, спрабуючы па-зладзейску прысвоіць сабе крыху яе багацця. Патаемныя агароды, схаваныя сярод пустазелля. Пакецік маркоўнага насення і трохі рэпавага. Саджалі шалупінне ад бульбы, увечары крадком прабіраліся матычыць захопленую зямлю.
Пакінь пустазелле па краях - і ніхто не ўбачыць, што мы тут робім. І пасярэдзіне таксама пакінь буйны, высокі бур'ян.
Вечарамі ўпотай працавалі на агародах, насілі ваду з рэчкі ў іржавай бляшанцы.
І вось адным днём - шэрыфскі памагаты: ты што тут робіш?
Нічога дрэннага.
Я за табой даўно сачу. Зямля не твая. Ты парушаеш чужое права ўласнасці.
Тут зямля неўзараная, нікому ніякай шкоды я не раблю.
Во чортавы скватэры, самачынцы! Як бачыш гаспадарамі сябе адчуеце. Ды горка пашкадуеце. Падумаеш, гаспадар знайшоўся. Ану, давай адсюль!
І маленькія зялёныя макаўкі морквы пазбіваны нагой, націнне рэпы затаптана. І зноў забуяў дурнап'ян. Але прадстаўнік закону меў рацыю. Ураджай - гэта ўжо ўласнасць. Калі зямля ўскапана і морква з'едзена, чалавек, бадай, будзе біцца за зямлю, што дала яму харч. Хутчэй гнаць яго ў шыю! Яшчэ ўявіць сябе гаспадаром! Можа, нават насмерць будзе біцца за гэты лапік зямлі сярод смуроднага пустазелля.
Ты бачыў, якая ў яго была фізія, як мы рэпу тапталі? Чаго добрага і забіць мог. Такіх трэба трымаць у струне, а то ўсю зямлю тут у нас захопяць. Усю краіну.
Прышлыя, чужынцы.
Гавораць, праўда, па-нашаму, але ўсё роўна зусім іншы народ. Глядзі, як яны жывуць. Хіба хто з нашых стаў бы гэтак жыць? Чорта лысага!
Вечарамі сядзелі на кукішках, гутарылі. І чый-небудзь усхваляваны голас: а чаму б чалавекам дваццаці з нас не заняць які ўчастак? У нас ёсць стрэльбы. Зоймем і скажам: зганяйце, калі зможаце. Чаму б так не зрабіць?
Як пацукоў, усіх перастраляюць.
А што, па-твойму, лепш, памерці ці гэтак жыць? Накрыцца зямлёй або буданамі з джутавых мяхоў? Які лёс ты выбераш сваім дзецям - памерці цяпер або праз два гады - ад недастатковага харчавання, як пішуць. Ведаеш, што мы ямо ўвесь гэты тыдзень? Крапіўны адвар і скавароднікі. А мука адкуль у нас на скавароднікі, ведаеш? З падлогі таварнага вагона пазмяталі.
Гутаркі ў лагерах, а шэрыфскія памочнікі -таўстазадыя, з рэвальверамі на тоўстых сцёгнах - пахаджваюць па лагеры: народ гэты трэба ў страху трымаць. Яго трэба добра прыструніць, а то адзін бог ведае што тут натвораць! Людзі гэтыя небяспечныя, як чарнамазыя на поўдні. Калі даць ім аб'яднацца, нічым іх не спыніш.
Вытрымка з газеты: «Памочнік шэрыфа ў Лорэнсвілі паспрабаваў выселіць з горада скватэра. Той аказаў супраціўленне і вымусіў прадстаўніка закону ўжыць зброю. Адзінаццацігадовы сын перасяленца забіў палісмена з дваццацідвухкалібернай стрэльбы».
Змеі падкалодныя! З імі трымай вуха востра, а пачнуць спрачацца - страляй у іх першы. Калі хлапчанё забівае палісмена, чаго ж тады чакаць ад дарослых? У іх нораў круты, дык з імі трэба яшчэ больш крута. Няма чаго цырымоніцца. Прыстрашыць іх як след.
А што, калі яны не з палахлівых. Што, калі яны заўпарцяцца і пачнуць адстрэльвацца? Гэтыя людзі з малых год прывыклі да зброі. Стрэльба для іх - частка цела. Возьмуць і не спалохаюцца. І што будзе, калі яны аднаго дня пойдуць вайной на нашу краіну, як лангабарды на Італію, як германцы на Галію, як туркі на Візантыю? Гэта былі орды людзей, згаладалых па зямлі і, да таго ж, дрэнна ўзброеных, а ўсё ж спыніць іх не маглі легіёны. І не спынілі ні крывавыя бойні, ні расправы. Чым можна запалохаць чалавека, які не толькі сам курчыцца з голаду, але і бачыць успушаныя жываты сваіх дзяцей? Такога не запалохаеш - ён ведае такое, страшней за што няма нічога.
У Гувервілі гаманілі мужчыны: дзед мой адабраў зямлю ў індзейцаў.
Не, гэтак няможна, мы пра гэта ўжо гаварылі. Гэта зладзейства. А я не злодзей.
Няўжо? Пазаўчора ноччу ты ўкраў з ганка бутэльку малака. А яшчэ ты ўкраў медны дрот, прадаў яго і на гэтыя грошы купіў кавалак мяса.
То праўда, але ж дзеці былі галодныя.
Што ні кажы, гэта крадзеж.
А ведаеце, як Ферфілды займелі сваю ферму? Зараз раскажу. Зямля тады ўся была дзяржаўная, бяры хто хоча. Стары Ферфілд падаўся ў Сан-Францыска, пахадзіў па шынках і набраў тры сотні п'яных бадзяг. І зброд гэты нарэзаў сабе ўчасткі. Ферфілд карміў іх, паіў іх віскі, а калі прыйшлі паперы на зямлю, ён забраў іх сабе і перавёў на сваё імя. Пасля расказваў, што кожны акр абышоўся яму ў пінту сівухі. І як гэта назваць - таксама зладзействам?
Добрага тут, вядома, мала, але ў турму яго не запраторылі.
Не, у турму не пасадзілі. І таго чалавека, што паставіў лодку на фургон і потым даводзіў, што ўвесь участак быў пад вадой, - вось нават тая лодка, у якой я плыў, - яго таксама не пасадзілі. І тых, хто дае хабар вашынгтонскім кангрэсменам і заканадаўцам у штатах, таксама яшчэ нікога не пасадзілі.
Такую гамонку можна было пачуць у кожным Гувервілі, па ўсім штаце.
А тут яшчэ налёты - раптоўнае ўварванне ўзброеных шэрыфскіх памочнікаў у лагер перасяленцаў. Выбірайцеся адгэтуль. Загад аддзела аховы здароўя. Ваш лагер - рассаднік заразы.
А куды нам падзецца?
Не наша справа. У нас загад вас выселіць. Праз паўгадзіны мы лагер падпалім.
У нас пачаўся тыфус. Хочаце, каб зараза пайшла далей?
Нам загадана вас выселіць. Ну, хутчэй! Праз паўгадзіны мы спалім лагер.
Праз паўгадзіны ад кардонных халупак і зробленых з бур'яну буданоў у неба ўзняўся дым, і людзі зноў пагналі свае машыны па дарогах у пошуках новага Гувервіля.
А ў Канзасе і Арканзасе, у Аклахоме, Тэхасе і Нью-Мексіка трактары ўрываліся на фермы і выганялі арандатараў.
У Каліфорніі іх ужо трыста тысяч, а яны ўсё прыбываюць. Дарогі Каліфорніі забіты ашалелымі людзьмі, што, як мурашкі, бягуць усё далей і далей, гатовыя накінуцца на любую працу - цягаць, піхаць, падымаць, несці. Да кожнага цяжару, падняць які пад сілу аднаму чалавеку, цягнуцца пяць пар рук, на кожную порцыю ежы разяўляюцца пяць ратоў.
А буйныя ўласнікі - ім пагражае страта іх земляў пры сацыяльным перавароце; буйныя ўласнікі - ім даступныя ўрокі гісторыі, яны вывучалі яе і ведаюць бясспрэчную ісціну: калі ўласнасць сканцэнтроўваецца ў руках невялікай кучкі людзей, яе адбіраюць. І адпаведная ёй ісціна: калі большасць людзей жыве ў голадзе і холадзе, яны бяруць сілай тое, у чым яны маюць патрэбу. І яшчэ адна кідкая ісціна крычыць праз гісторыю: расправы толькі гуртуюць тых, з кім распраўляюцца, памнажаюць іх сілу. Буйныя ўласнікі ігнаравалі гэтыя тры гучныя поклічы гісторыі. Зямля канцэнтравалася ў руках усё меншай і меншай кучкі людзей, колькасць разораных расла, а буйныя ўласнікі ведалі толькі адно - задушэнне. Грошы траціліся на зброю, на газ для абароны буйных маёнткаў, паўсюль рассылаліся шпіёны, якія падслухоўвалі нараканні незадаволеных, каб у самым пачатку выкараніць бунтарскі дух. На перамены ў эканоміцы не звярталі ўвагі, планамі эканамічнага аднаўлення грэбавалі, разглядалі толькі меры для вынішчэння бунту, а самі прычыны, што яго параджалі, засталіся некранутымі.
Трактары, што пазбаўлялі людзей працы, стужачныя транспарцёры, што перамяшчалі груз, машыны, што самі выраблялі, выпускаліся ўсё ў большай і большай колькасці, і сем'і адна за адной гойсалі на машынах па дарогах, стараючыся падабраць хоць крошкі ад незлічонага багацця і прагна пазіраючы на зямлю ўсцяж дарог. Буйныя ўласнікі аб'ядналіся для самаабароны і на сходах сваіх асацыяцый абмяркоўвалі спосабы, з дапамогай якіх можна запалохваць, забіваць, атручваць газамі. І галоўнае, чаго яны баяліся, - гэта трыста тысяч... а калі яшчэ ў гэтых трох соцень тысяч знойдзецца завадатар... тады канец. Трыста тысяч галодных і няшчасных; калі б яны зразумелі саміх сябе, зямля перайшла б да іх, і ніякія газы, ніякія вінтоўкі не спынілі б іх. А буйныя ўласнікі - тыя, каго багацце зрабіла большымі і меншымі за простага чалавека, сталі на пагібельны шлях, хапаючыся за любыя сродкі, якія ўрэшце маглі знішчыць іх саміх. Кожны іх крок, кожны гвалтоўніцкі акт, кожны налёт на Гувервіль, кожны шэрыфскі памагаты, што важна пахаджваў па хламным лагеры, хоць крыху і аддаляў дзень помсты, але рабіў яшчэ больш непазбежным надыход гэтага дня.
Людзі прысаджваліся на кукішкі, мужчыны з завостранымі тварамі, схуднелыя ад голаду, азлобленыя ад змагання з ім, - пахмурныя вочы і сцятыя сківіцы. А навокал іх рассцілалася ўрадлівая зямля.
Чуў, што здарылася з дзіцем з той вунь палаткі, чацвёртай з краю?
Не, я толькі што прыехаў.
Малы кідаўся ў сне, плакаў; Бацькі падумалі - глісты. Прамылі яму страўнік, і ён памёр. А гэта быў так званы «чорны язык». Хвароба такая ад дрэннай ежы.
Бедненькі.
А ў бацькоў няма грошай на пахаванне. Давядзецца хаваць як жабрака.
Чорт ведае што!
І рукі запускаліся ў кішэні, даставалі дробную манету. Каля ўвахода ў палатку вырасла кучка серабра. І бацькі знайшлі яе там.
Народ наш - добры народ; народ наш - сардэчны народ. Госпадзі, няхай хутчэй прыйдзе той час, калі добрыя людзі не ўсе будуць беднякамі. Госпадзі, няхай хутчэй прыйдзе той дзень, калі малым дзецям будзе што есці.
А аб'яднаныя ў асацыяцыі ўласнікі ведалі, што прыйдзе той дзень, калі малітвы гэтыя змоўкнуць.
І на тым - канец.
Малыя Джоўды, Коні з Ружай Сарона і прапаведнік засталіся сядзець, самлелыя ад спёкі, здранцвелыя, на версе грузавіка, які спыніўся перад канторай следчага ў Бейкерсфілдзе, а бацька, маці і дзядзька Джон зайшлі ў будынак. Неўзабаве з канторы вынеслі кош і паклалі ў яго доўгі скрутак, зняты з грузавіка. Усе сядзелі на самым санцапёку, чакаючы, калі скончыцца следства, будзе вызначана прычына смерці і падпісана пасведчанне.
Эл і Том хадзілі па вуліцах, зазіралі ў вітрыны крамаў, з цікаўнасцю паглядалі на прахожых.
І нарэшце бацька, маці і дзядзька Джон выйшлі з канторы, прыгнечаныя і маўклівыя. Дзядзька Джон палез наверх. Бацька з маці занялі свае месцы ў кабіне. Том з Элам вярнуліся, і Том сеў за руль. Ён моўчкі чакаў, што яму скажуць. Бацька глядзеў проста перад сабой, насунуўшы цёмны капялюш нізка на лоб. Маці пацірала пальцамі куткі губ, і позірк у яе быў адсутны, разгублены, мёртвы ад знясілення.
Бацька глыбока ўздыхнуў.
- Нічога не зробіш, - прамовіў ён.
- Я ведаю, - сказала маці. - А ўсё-такі ёй хацелася, каб яе пахавалі прыстойна. Яна заўсёды пра гэта гаварыла.
Том пакасіўся на іх.
- Як жабрачку? - запытаўся ён.
- Так. - Бацька матнуў галавой, нібы намагаючыся вярнуцца ў рэчаіснасць. - Грошай не хапіла. Не здужалі. - Ён павярнуўся да маці: - Ты не бяры так блізка да сэрца. Як ні выкручвайся, што ні рабі, усё роўна нічога не выйдзе. Няма грошай. Духмянасці, дамавіна, пастар, месца на могілках... Мы і дзесятай долі не наскрабём. А што маглі, тое зрабілі.
- Я ўсё разумею, - сказала маці. - Проста з галавы не выходзіць, як яна спадзявалася, што яе прыстойна пахаваюць. Трэба не думаць пра гэта. - Яна цяжка ўздыхнула і пацерла куток рота. - А начальнік гэты - чалавек добры. Фанабэрысты, а ўсё ж добры.
- Яно так, - сказаў бацька. - Ён адкрыта з намі гаварыў.
Маці адкінула рукой назад валасы. Моцна сцяла вусны.
- Трэба ехаць, - сказала яна. - Трэба выбраць добрае месца. Знойдзем работу, уладкуемся. Не марыць жа дзяцей голадам. Гэта не па-бабчынаму. Яна і на хаўтурах заўсёды добра наядалася.
- Куды едзем? - запытаўся Том.
- У лагер, - адказаў бацька. - Пакуль не знойдзем работы, апошняе траціць нельга. Выязджай за горад.
Том запусціў матор, і грузавік праехаў некалькі вуліц і пакінуў горад ззаду. Каля моста яны ўбачылі шмат палатак і халупак.
Том сказаў:
- Давайце тут спынімся. Паслухаем людзей, даведаемся, ці ёсць дзе работа. - Грузавік з'ехаў па крутым земляным спуску з шашы і спыніўся на краі лагернай стаянкі.
У лагеры не было ніякага парадку - маленькія шэрыя палаткі, халупкі, машыны стаялі дзе папала. Як выглядала крайняя халупка, цяжка апісаць словамі. Паўднёвы бок - тры лісты ржавага рыфленага жалеза, усходні бок - стары дывановы палавік, прыбіты да дзвюх дошак, паўднёвы - паласа толю і абрывак дзіравай парусіны, а заходні - шэсць кавалкаў мешкавіны. Над квадратным каркасам - пераплёт з вярбовага вецця, на які накідана трава, не разасланая, а наваленая кучай. З таго боку, дзе сценка была з мешкавіны, каля ўвахода, быў раскіданы ўсякі скарб. Пяцігалонавы бітон з-пад газы, пакладзены набок, служыў печкай, і з яго тырчала ржавая дымавая труба. Бак, каб кіпяціць ваду, ляжаў каля дзяружнай сценкі, а навокал - цэлы набор скрынак: скрынкі замест крэслаў, скрынкі замест сталоў. Побач з халупкай стаяў стары крыты «форд» мадэлі «Т» з двухколым прычэпам. Усё сведчыла пра тое, што людзі ў гэтым жытле апусціліся, заняпалі духам.
За халупкай стаяла маленькая палатка, пашарэлая ад часу і непагадзі, але чысценькая, акуратная; і скрынкі тут былі роўна расстаўлены каля пярэдняй сценкі. Між полак палаткі вытыркалася пячная труба, зямля каля ўвахода была добра падмецена і спырскана вадой. На адной скрынцы стаяла вядро з замочанай бялізнай. Тут панавала ахайнасць і грунтоўнасць. Каля палаткі - легкавая машына мадэлі «А» з маленькім самаробным прычэпам-спальняй.
А далей відаць была вялізная палатка, ірваная, пашкуматаная, прарэхі былі дзе-нідзе сцягнуты дротам. Полкі былі расхінутыя, усярэдзіне ляжалі на зямлі чатыры шырокія матрацы. На бялізнавай вяроўцы, нацягнутай уздоўж паўднёвай сценкі, сушыліся ружовыя баваўняныя сукенкі і некалькі пар камбінезонаў. Усяго ў лагеры было сорак палатак і халупак, і каля кожнага жытла стаяў аўтамабіль якой-небудзь маркі. Некалькі дзяцей высыпала з палатак. Спачатку яны здалёку разглядалі грузавік, які толькі што пад'ехаў, потым рушылі да яго ўсёй кампаніяй - басаногія маленькія хлопчыкі ў камбінезонах, з шэрымі ад пылу валасамі.
Том заглушыў матор і зірнуў на бацьку.
- Непрыгляднае месцейка, - сказаў ён. - Можа, далей паедзем?
- Чаго ехаць, калі мы не разведалі, што і як, - адказаў бацька. - Спытаемся, як тут з работай.
Том адчыніў дзверцы і выйшаў з машыны. Верхнія пасажыры саскочылі з паклажы на зямлю і сталі з цікаўнасцю аглядаць лагер. Руці з Уінфілдам, ужо прывыклыя за дарогу, адчапілі ад борта вядро і пайшлі ў вярбняк, за якім, як яны разумелі, была вада, і ланцужок дзяцей рассунуўся, прапускаючы іх, і зноў самкнуўся.
Мешкавіна крайняй халупкі расхінулася, і адтуль вызірнула жанчына ў брудным старамодным квяцістым капоце. Сівыя валасы, заплеценыя ў коскі, тупы твар, худы і маршчыністы, пад пустымі вачамі - вялікія шэрыя мяшкі, губы бязвольна адвіслыя.
Бацька запытаўся ў яе:
- Можна тут дзе-небудзь стаць на прывал?
Галава знікла. Якую хвіліну за дзяругай было ціха, потым полкі рассунуліся і з халупкі выступіў барадаты чалавек у камізэльцы. Жанчына выглядала з-за яго пляча, але за ім не выйшла.
Барадач сказаў:
- Дабрыдзень, - і яго неспакойныя вочы агледзелі спачатку людзей, кожнага па чарзе, потым грузавік і паклажу.
Бацька сказаў:
- Я вось пытаюся ў вашай жонкі, ці нельга нам дзе-небудзь у вас размясціцца.
Барадач пільна паглядзеў на бацьку, быццам той сказаў нешта дужа мудрагелістае, што патрабуе роздуму.
- Дзе-небудзь размясціцца ў нас? - перапытаў ён.
- Ну так. Ці, можа, тут ёсць гаспадар і трэба спярша схадзіць да яго?
Барадач прыжмурыў у шчылінку адно вока, не зводзячы позірку з бацькі.
- Вы хочаце зрабіць прывал?
Бацька пачаў траціць цярпенне. Сівая жанчына ўсё выглядала з-за дзяругі.
- Пра што ж я кажу, як па-вашаму? - сказаў бацька.
- Што ж, раз захацелі тут стаць, што вас трымае? Я вам не забараняю.
Том зарагатаў:
- Дайшло нарэшце.
Бацька стрымліваў сябе як мог:
- Я толькі хачу ведаць, ці ёсць тут гаспадар. Трэба плаціць ці не?
Барадач выпнуў падбародак:
- Ці ёсць гаспадар?
Бацька адвярнуўся ад яго.
- А халера з ім, - сказаў ён. Галава жанчыны нырнула ў халупку.
Барадач пагрозліва ступіў наперад.
- Ці ёсць гаспадар? - паўтарыў ён. - Хто пасмее выгнаць нас? Не, ты мне скажы.
Том загарадзіў сабой бацьку.
- Ідзі праспіся лепш, - сказаў ён. У барадача адвісла сківіца, і ён памацаў ніжнюю дзясну брудным пальцам. Хвіліну ён прыглядаўся да Тома, па-ранейшаму глыбакадумна і дапытліва, і раптам крута павярнуўся на абцасах і шмыгнуў у халупку ўслед за сівой жанчынай.
Том глянуў на бацьку:
- Што за д'ябальшчына?
Бацька паціснуў плячамі. Ён разглядаў лагер. Перад адной палаткай стаяў стары «б'юік» са знятым капотам. Нейкі малады чалавек прыціраў клапаны і, круцячы корбу, раз-пораз кідаў позірк на грузавік Джоўдаў. Яны заўважылі, што ён цішком пасмейваецца. Калі барадач схаваўся за дзяругай, малады чалавек кінуў працу і падышоў да Джоўдаў.
- Здарова! - павітаўся ён, і яго блакітныя вочы весела бліснулі. - Ну, пазнаёміліся з нашым мэрам?
- Што з ім такое? - запытаўся Том.
Малады чалавек хмыкнуў:
- Ды нічога. Ён такі самы чокнуты, як мы з табой. Можа, трохі горшы, хто ведае.
Бацька сказаў:
- Я толькі спытаўся ў яго, ці можна тут стаць на прывал.
Малады чалавек выцер замасленыя рукі аб штаны.
- Ну, канешне, можна. Чаму ж не? Вы нядаўна сюды прыехалі?
- Ага, - адказаў Том. - Толькі сёння раніцай.
- Першы раз у Гувервілі?
- У якім Гувервілі?
- Ды вось у гэтым самым.
- А-а... - працягнуў Том. - Мы толькі што пад'ехалі.
Уінфілд і Руці вярнуліся, несучы ўдваіх вядро вады.
Маці сказала:
- Давайце раскладвацца. Я зусім знемаглася. Можа, тут адпачнём.
Бацька і дзядзька Джон залезлі на грузавік і пачалі знімаць з яго брызент і матрацы.
Том падышоў да маладога чалавека і пайшоў з ім да машыны, якую той рамантаваў. Шліфавальны станочак ляжаў на блоку, а на вакуумным бачку прымасцілася бляшанка з наждачным саставам. Том запытаўся:
- А што з ім за чорт, з гэтым барадачом?
Малады чалавек узяў сваю корбу і зноў пачаў прыціраць клапан да гнязда.
- З мэрам? А бог яго ведае. Напэўна, ачмурэў.
- Як гэта - ачмурэў?
- Яго, пэўна, палісмены так заганялі, што яшчэ і цяпер у яго ў мазгах кручэнне.
- А нашто ганяць такога?
Малады чалавек адклаў убок корбу і глянуў Тому проста ў вочы.
- А бог іх ведае, - сказаў ён. - Ты толькі што прыехаў. Можа, ты разважыш, у чым тут справа. Адны так гавораць, другія гэтак. Вось пажывеш крыху на адным месцы, а там заявіцца шэрыфскі памагаты і пагоніць цябе далей. - Ён прыпадняў клапан і змазаў гняздо наждачнай масай.
- А навошта?
- Кажу ж табе - не ведаю. Некаторыя тлумачаць гэта тым, што яны нібыта не хочуць, каб мы ў выбарах удзельнічалі, вось і ганяюць з месца на месца. А іншыя кажуць - каб не даваць нам дапамогі. А яшчэ я такое чуў: каб мы не маглі разам сабрацца і арганізавацца. Я ўвесь час на колах - адусюль гоняць. Пачакай, на сабе адчуеш.
- Мы не бадзягі якія, - упарціўся Том. - Мы працы шукаем. Мы гатовыя на любую работу.
Малады чалавек на момант кінуў прыладжваць корбу да шліца клапана і здзіўлена глянуў на Тома.
- Працы шукаеце? А-а... шукаеце працы... А ўсе астатнія чаго, па-твойму, шукаюць? Алмазаў? Я сабе ўжо ўвесь зад ушчэнт сцёр, а чаго я шукаю, як ты думаеш? - Ён крутнуў корбу ўзад і ўперад.
Том паглядзеў на панылыя палаткі, на розную старызну і хлам каля іх, на дапатопныя машыны, на праляжаныя, камлякаватыя матрацы, вынесеныя на сонца, на закураныя бляшанкі над чорнымі ад дыму ямамі, дзе гатавалі ежу, і ціха запытаўся:
- Дык работы няма?
- Пакуль што не. Можа, пазней. Цяпер тут ніякіх ураджаяў не збіраюць. Вінаграду рана, бавоўне таксама яшчэ рана. Мы далей едзем, вось толькі клапаны прытру. У мяне жонка і дзеці малыя. Мы чулі, далей на поўнач праца ёсць. На поўнач і паедзем, да Салінаса, што недалёка ад узбярэжжа.
Том бачыў, як дзядзька Джон, бацька і прапаведнік нацягваюць на жэрдкі брызент, а маці, апусціўшыся пад ім на калені, змятае пыл з матрацаў. Новых суседзяў кальцом абкружылі людзі, басаногія, мурзатыя, і моўчкі сачылі, як яны асталёўваюцца. Том сказаў:
- Там у нас раздавалі лісткі - такія аранжавыя. У іх пісалася, што тут патрэбна многа народу на збор ураджаю.
Малады чалавек засмяяўся:
- Тут кажуць, трыста тысяч такіх, як мы, і іду ў заклад, што сярод іх не знойдзецца і адной сям'і, якая не бачыла гэтых лісткоў.
- Так, але калі ім не патрэбныя людзі, навошта яны друкуюць такое?
- А ты паварушы, паварушы мазгамі.
- Добра, але ўсё ж скажы.
- Слухай, - сказаў малады чалавек. - Дапусцім, ты прапануеш работу, а ахвотнік на яе знайшоўся толькі адзін. Значыць, колькі ён запросіць, столькі ты яму і дасі. А дапусцім, ахвотнікаў сотня. - Ён адклаў інструмент убок. Пагляд яго пасуравеў, голас загучаў рэзка: - Дапусцім, сто чалавек хочуць атрымаць гэту работу. І дапусцім, у іх ёсць дзеці, і дзеці сядзяць галодныя. За паршывы дзесяціцэнтавік іх можна накарміць маісавай кашай. Дапусцім нават, што і за пяць купіш дзецям міску чаго-небудзь. І такіх, як ён, цэлая сотня. Прапануй ім пяць цэнтаў, і яны з-за гэтай нікелевай манеты горла адзін аднаму перагрызуць. Ведаеш, колькі мне плацілі на апошнім месцы? Пятнаццаць цэнтаў у гадзіну. За дзесяць гадзін паўтара даляра, а жыць там паблізу не дазвалялі. На адну дарогу колькі бензіну перапаліш. - Ён душыўся ад гневу, вочы гарэлі нянавісцю. - Вось таму лісткі гэтыя і друкуюць. А на тыя грошы, якія гаспадары зэканомяць, плацячы па пятнаццаць цэнтаў за цяжкую працу ў полі, можна чортаву процьму такіх лісткоў навыпускаць.
Том сказаў:
- Во дзярмо.
Малады чалавек з'едліва засмяяўся:
- А ты пажыві тут крыху і, калі ўчуеш дзе водар ружаў, пакліч мяне, я таксама панюхаю.
- Але ж павінна дзе-небудзь тут быць работа, - не здаваўся Том. - Божа мой, колькі тут усяго - фруктовыя сады, вінаграднікі, агароды! Я ж бачыў. На ўсё гэта людзі патрэбныя. Я ўсё сваімі вачамі бачыў.
З палаткі, каля якой стаяла машына, пачуўся плач дзіцяці. Малады чалавек пайшоў у палатку, і за брызентам пачуўся яго ціхі голас. Том узяў корбу, прыладзіў яе да шліца клапана і пачаў прыціраць яго, водзячы рукой то ў адзін, то ў другі бок. Дзіця перастала плакаць. Малады чалавек выйшаў з палаткі і стаў каля Тома, сочачы за яго работай.
- А ты ведаеш справу, - сказаў ён. - Гэта добра. Яшчэ прыдасца.
- Ну а ўсё ж такі як наконт таго, што я гаварыў? - напомніў Том. - Я бачыў, колькі тут усяго расце.
Малады чалавек прысеў каля яго на кукішкі.
- Вось што я табе скажу, - пачаў ён ціха. - Ёсць тут паблізу персікавы сад - вялізны, канца-краю няма. Я ў ім працаваў. Круглы год яго даглядаюць дзевяць чалавек. - Ён шматзначна памаўчаў. - А калі персікі паспяваюць, туды патрэбны на два тыдні тры тысячы рабочых. Столькі не знойдуць - усё пагніе. Дык што яны робяць? Рассылаюць гэтыя лісткі, куды толькі могуць. Ім патрэбны тры тысячы, а прыязджае цэлых шэсць. І гаспадар колькі захоча, столькі і плаціць. А не хочаш працаваць за такую плату, воля твая - месца тваё гатова заняць тысяча чалавек. І вось ты рвеш і рвеш гэтыя персікі з дрэў, і нарэшце канец - усе дрэвы голыя. А там паўсюль адны толькі персікі і растуць. І паспяваюць яны адной парой. Калі фрукты ўжо знятыя, дык усе да апошняга. Больш ва ўсёй акрузе рабіць няма чаго. Гаспадары не хочуць, каб ты там цяпер тырчаў. А такіх, як ты, тры тысячы. Усё, праца скончылася. Хто цябе ведае - можа, ты злодзей, можа, ты п'яніца ці дэбашыр. Да таго ж і выгляд у цябе не вельмі самавіты - тулішся ў пашарпанай палатцы; край цудоўны, а ад цябе смурод ідзе. Няма чаго тут швэндацца. Ну і гоняць цябе ў шыю - далей, далей. Вось яно як.
Том глянуў у бок сваёй палаткі і ўбачыў маці - ледзь рухаючыся ад стомы, яна распальвала невялікае вогнішча і ставіла на агонь кацялкі. Кола дзяцей падступіла бліжэй, і спакойныя, шырока расплюшчаныя дзіцячыя вочы сачылі за кожным рухам яе рук. Зусім састарэлы згорблены дзядок выпаўз, як барсук, з адной палаткі і пайшоў да іх, на хаду прынюхваючыся да пахаў. Закінуўшы рукі за спіну, ён стаў разам з дзецьмі назіраць, што робіць маці. Руці з Уінфілдам не адыходзілі ад маці, ваяўніча пазіраючы на чужакоў.
Том рашуча сказаў:
- Персікі трэба адразу абіраць, так? Як толькі паспеюць?
- Ну вядома.
- А што, калі ўсім згаварыцца і заявіць: «Няхай гніюць»? Тады яны, як міленькія, плату адразу павысяць!
Малады чалавек адарваў вочы ад клапанаў і з'едліва глянуў на Тома.
- Нічога не скажаш, прыдумаў! Сваім розумам дайшоў?
- Я зусім выматаўся, - адказаў Том. - Усю ноч за рулём сядзеў. Не хочацца ўцягвацца ў спрэчку. Так стаміўся, што ад любой дробязі магу ўскіпець. Ты лепш не задзірайся. Адказвай, калі ў цябе пытаюцца.
Малады чалавек шырока ўсміхнуўся:
- Ды я проста так. Ты толькі што прыехаў. А людзі тут ужо ўсё зразумелі. І тыя, у каго персікавыя сады, таксама ўсё разумеюць. Вось паслухай: каб з'яднацца, важак патрэбен, без яго ніяк нельга - нехта ж павінен гаварыць і тлумачыць. А варта яму толькі рот раскрыць, яго зараз жа хоп! - і за краты. А вынырне хто другі, яны і яго раз! - і за краты.
Том сказаў:
- Што ж, арыштанта, прынамсі, хоць кормяць.
- А дзяцей яго - не. Табе б так падабалася - ты сядзіш сабе ў турме, а дзеці твае з голаду паміраюць?
- Во-о як, - працягнуў Том. - Во-о як...
- І яшчэ адно. Пра чорныя спісы ты чуў?
- І што гэта такое?
- А вось палезь у пастку - заікніся толькі наконт таго, каб усім дзейнічаць заадно, адразу пазнаеш. З цябе зробяць здымак і разашлюць ва ўсе канцы. Тады ўжо работы нідзе не знойдзеш. А калі ў цябе яшчэ і дзеці ёсць...
Том зняў з галавы кепку і пачаў камечыць яе ў руках.
- Хм... значыць, што падвернецца, тое і бяры або здыхай з голаду. А пасмееш хоць пікнуць - здохнеш як піць даць.
Малады чалавек абвёў рукою шырокі круг, паказваючы на падраныя палаткі і пабітыя ржой аўтамашыны.
Том зноў глянуў на маці - цяпер яна абірала бульбу. Дзеці падступілі да яе яшчэ бліжэй. Ён сказаў:
- Не, я на такое не згодзен. Мы, каб на іх чэрці, не авечкі. Вось вазьму і дух выб'ю з каго-небудзь.
- Можа, з палісмена?
- Ды хоць з каго.
- Ты чокнуты, - сказаў малады чалавек. - З табой умомант расправяцца. Ні імя ў цябе няма, ні маёмасці ніякай. Знойдуць цябе ў канаве, калі ўжо кроў на твары запячэцца. А ў газеце надрукуюць толькі адзін маленькі радочак - ведаеш які? «Знойдзены труп бадзягі».
Том сказаў:
- Каля гэтага бадзягі яшчэ аднаго мерцвяка знойдуць.
- Ты чокнуты, - паўтарыў малады чалавек. - І што ты гэтым дакажаш?
- Ну, а ты што наважыў? - Том паглядзеў на вымазаны тавотам твар; вочы ў маладога чалавека быццам туманам завалакло.
- Нічога. Вы адкуль?
- Мы? З-пад Саліса, Аклахома.
- Нядаўна прыехалі?
- Толькі сёння.
- І доўга тут думаеце заставацца?
- Хто ведае. Дзе знойдзем працу, так і асядзем. А што?
- А нічога, - адказаў малады чалавек, і вочы ў яго зноў затуманіліся.
- Пайду пасплю, - сказаў Том. - Заўтра зрання паедзем работу шукаць.
- Што ж, паспрабуйце.
Том павярнуўся і пакрочыў да сваёй палаткі.
Малады чалавек узяў бляшанку з наждачнай маззю для прыціркі клапанаў і запусціў у яе палец.
- Гэй! - раптам крыкнуў ён услед Тому. Той азірнуўся.
- Што табе?
- Хачу нешта сказаць. - Малады чалавек паманіў Тома пальцам, вымазаным маззю. - Проста хачу табе нешта сказаць. Ты не лезь на ражон. Памятаеш таго ачмурэлага?
- З той вунь халупкі?
- Ага... прыдуркаваты такі... нічога не цяміць.
- Ну і што?
- Калі сюды заявяцца палісмены, а яны часцяком да нас наведваюцца, і ты такім прыкінься. Маўчы - нічога не ведаеш, нічога не разумееш. Палісмены толькі такіх нас і церпяць. І рукам волі не давай - гэта проста самагубства. Зрабі выгляд, што ты ачмурэў ад страху.
- Дык што - няхай палісмен што хоча, тое і робіць з табой, а ты маўчы?
- Ды не, што ты. Я зазірну да цябе вечарком. Можа, і не след мне гэтага рабіць. Паўсюль шпікі. Я іду на рызыку, у мяне ж малое дзіця. Але ўсё роўна зайду. А ты, калі ўбачыш палісмена, прыкінься дурнем, гэткім Окі, зразумеў?
- Што ж, гэта можна, калі справу рабіць, - адказаў Том.
- Ты не хвалюйся. Мы без справы не сядзім, толькі на вочы не лезем. Дзіцяці многа не трэба - два-тры дні пагаладае, і канец. - Ён зноў узяўся за працу, змазаў гняздо клапана, узяў корбу, і рука яго шпарка захадзіла ўзад і ўперад. Пагляд у яго зрабіўся нейкі тупы, бяздумны.
Том няспешна пабрыў да сваёй палаткі.
- Ачмурэлы... - ціха прамовіў ён.
Бацька і дзядзька Джон падышлі да палаткі, несучы бярэмі сухога голля, скінулі яго каля вогнішча і прыселі на кукішкі.
- Тут блізка ўсё падабралі, - сказаў бацька. - Давялося далёка ісці. - Ён зірнуў на дзяцей, што абкружылі вогнішча і лупілі на яго вочы. - Божа літасцівы! - усклікнуў ён. - Адкуль вас столькі набегла? - І дзеці збянтэжана апусцілі вочы долу.
- Пэўна, пачулі пах ежы, - сказала маці. - Уінфілд, не круціся пад нагамі. - Яна адштурхнула хлопчыка. - Думаю стушыць трохі мяса. Гарачага мы з самага ад'езду не елі. Бацька, схадзі ты ў краму, вазьмі каркавіны. Я патушу яе, пальчыкі абліжаце. - Бацька падняўся з кукішак і пайшоў.
Эл адкінуў капот грузавіка і пачаў разглядаць запэцканы змазкай рухавік. Пачуўшы за спінай крокі Тома, падняў галаву.
- У цябе такі бесклапотны выгляд, як у птушкі, - сказаў Эл.
- Я проста скачу ад радасці, як жаба ў вясновы дожджык, - адказаў Том.
- Глянь на матор, - Эл паказаў пальцам пад капот. - Здорава, га?
Том зазірнуў усярэдзіну.
- Ага, як быццам нічога.
- Нічога? А па-мойму, цудоўна. Масла зусім не прапускае. Усё добра прыцёрта. - Ён выкруціў свечку і засунуў у адтуліну палец. - Нагар крыху ёсць, але сухая.
Том сказаў:
- Што ж, малайчына, правільна выбраў. Ты гэта хочаш ад мяне пачуць?
- Я ўсю дарогу баяўся: вось зараз рассыплецца ўсё, а вінаваты буду я.
- Не, ты правільна выбраў. А зараз правер усё як след, бо заўтра зранку паедзем працу шукаць.
- Яна яшчэ як пакоціць, - сказаў Эл. - Можаш не баяцца. - Ён выняў з кішэні ножык і пачаў ачышчаць электроды на свечцы.
Том завярнуў за палатку і ўбачыў Кейсі. Ён сядзеў на зямлі, засяроджана разглядаючы правую ступню босай нагі. Том цяжка апусціўся на зямлю каля яго.
- Ну як, працуе?
- Што? - не зразумеў Кейсі.
- Нага твая.
- Ага... Гэта я проста так. Сяджу і думаю.
- Ты, пэўна, толькі ў такой зручнай позе і можаш думаць, - сказаў Том.
Кейсі паварушыў пальцамі нагі - вялікі палец угору, суседні ўніз - і спакойна ўсміхнуўся.
- Думаць заўсёды нялёгка, як ні выкручвайся - хоць крукам.
- Даўно ўжо не чуў я твайго голасу, - сказаў Том. - Усё думаеш, думаеш?
- Ага, думаю.
Том зняў з галавы сваю баваўняную кепку, цяпер ужо брудную, заношаную, са зламаным пасярэдзіне брылём, адагнуў адварот і выняў доўгую вузкую пракладку з газетнай паперы.
- Збеглася ад поту, цеснаватая стала, - сказаў ён і паглядзеў на голыя пальцы, якімі не пераставаў варушыць Кейсі. - Можа, ты адарвешся на хвілінку ад сваіх думак і паслухаеш, што я скажу?
Кейсі павярнуў да яго галаву на доўгай, як сцябло, шыі.
- Я ўвесь час слухаю. Таму і задумваюся. Паслухаю, што людзі кажуць, і пачынаю разумець, што яны адчуваюць. Я іх увесь час чую, я адчуваю іх; людзі б'юць крыламі, як птушка, што заляцела на гарышча. Скончыцца тым, што паламаюць яны крылы аб пыльныя шыбіны, а на волю так і не вырвуцца.
Том доўга пазіраў на яго шырока расплюшчанымі вачамі, тады адвярнуўся і глянуў на шэрую палатку за дваццаць футаў ад іх. На яе адцяжках сушыліся памытыя штаны, кашулі і сукенкі. Том ціха сказаў:
- Пра гэта я і хацеў з табой пагаварыць. А ты, аказваецца, сам усё бачыш.
- Бачу, - пацвердзіў Кейсі. - Такіх, як мы, цэлая армія, а аброці на ёй няма. - Ён апусціў галаву і паволі правёў па лбе і па валасах рукою. - Я ўсюды гэта бачыў. Усюды, дзе мы ні спыняліся. Людзі згаладаліся, мараць пра кавалак мяса, а як дарвуцца да яго, наесціся не могуць. А калі ўжо дарэшты згаладаюцца, так згаладаюцца, што ўжо сілы няма трываць, тады просяць мяне памаліцца. І, бывае, я малюся. - Ён сашчапіў рукі вакол паднятых каленяў і бліжэй падцягнуў ногі. - Раней я думаў, што малітва памагае. Прачытаеш малітву - і ўсе нягоды наліпнуць на яе, як мухі на паперу-ліпучку, а малітва адляціць і ўсё панясе з сабой. Але цяпер ужо не так.
Том сказаў:
- Малітва мяса ніколі не давала. На гэта свіння патрэбна.
- Правільна. І гасподзь усемагутны за працу таксама не плаціць. Усе гэтыя людзі хочуць жыць прыстойна, дзяцей хочуць выгадаваць добрымі людзьмі. А на старасці год ім хочацца пасядзець на ганку і паглядзець, як сонца заходзіць. А маладым - патанцаваць, паспяваць і злюбіцца адно з адным. Усім хочацца пад'есці, калі-нікалі выпіць і працаваць. Так, так - задаць такую работу мускулам, каб адчуць прыемную стому. Госпадзі! Нашто я ўсё гэта гавару?
- Хто цябе ведае, - сказаў Том. - Слухаць прыемна. Толькі калі ты ўжо кінеш свае думкі хоць на кароткі час? Трэба ж нам і за працу брацца. Грошы канчаюцца. Бацька пяць даляраў аддаў, каб на бабчынай магіле дошку з надпісам паставілі. Зусім мала засталося.
Худы буры дварняк выбег з-за палаткі, прынюхваючыся да зямлі. Ён трымаўся з асцярогай, гатовы ў любы момант даць цягу. Апусціўшы нос долу і сапучы, ён падбег амаль ушчыльную да Тома і Кейсі, раптам учуў іх, падняў галаву, убачыў людзей, адскочыў убок і кінуўся прэч, прыціснуўшы вушы і падтуліўшы хвост. Кейсі праводзіў яго вачыма, пакуль ён не знік за палаткай, і цяжка ўздыхнуў.
- Нікому я дабра не прыношу, - сказаў прапаведнік. - Ні сабе, ні другім. Усё думаю: можа, мне лепш пайсці ад вас. Я ем ваш хлеб, месца займаю. А ўзамен нічога не даю. Можа, знайду дзе сталую работу, тады выплачу вам хоць частку свайго доўгу.
Том адкрыў рот, выпнуў ніжнюю сківіцу і пастукаў па зубах сухой сцяблінкай палявой гарчыцы. Вочы яго глядзелі за лагер - за шэрыя палаткі і халупкі з бляхі і кардону.
- Някепска было б цяпер пачак «Дэрэма» раздабыць, - сказаў ён. - Я не курыў ужо чорт ведае колькі. У Макалестары мы без курыва не сядзелі. Мяне часам назад туды цягне. - Ён зноў пастукаў сцяблінкай па зубах і раптам павярнуўся да прапаведніка. - Ты ў турме ніколі не сядзеў?
- Не, ніколі, - адказаў Кейсі.
- Ты так адразу ад нас не ідзі. Пачакай крыху.
- Чым раней пачну шукаць працу, тым хутчэй знайду.
Том пільна паглядзеў на яго прыплюшчанымі вачамі і зноў надзеў на галаву кепку.
- Слухай, - сказаў ён. - Прапаведнікі любяць пра малочныя рэкі з кісельнымі берагамі расказваць, а тут гэтым і не пахне. Тут нядобрыя справы робяцца. Мясцовыя жыхары баяцца тых, хто прыязджае сюды, на Захад, і напускаюць на іх паліцыю, каб напалохаць нас і назад павярнуць.
- Так і ёсць, - сказаў Кейсі. - Я гэта ведаю. А чаму ты пра турму пытаўся?
Том раздумліва загаварыў:
- Калі ў турме сядзіш... усё загадзя... нейкім чуццём... угадваеш. Там гаварыць многа між сабой не дазваляюць... з адным, з двума можна, а набярэцца больш - разганяюць. Вось і робішся такім, што ўсё востра ўспрымаеш. Калі што-небудзь наспявае... ну, скажам, звіхнецца твой сусед па камеры, стукне наглядчыка ручкай швабры па галаве... а ты загадзя ведаў, што так будзе. Уцёкі, бунт... цябе пра гэта папярэджваць не трэба. Сам здагадваешся. Прадчуваеш.
- І што ж?
- Пабудзь тут, - сказаў Том. - Хоць да заўтра пабудзь. Тут нешта наспявае. Я тут з адным хлопцам пагаварыў. Хітруе, віляе, як каёт, толькі, здаецца, крыху перабраў. Каёт каётам. Асцярожлівы такі, ціхманы, быццам у бязвінную гульню гуляе... а мне ўсё думаецца, нездарма курыца квокча.
Кейсі дапытліва паглядзеў на яго, адкрыў ужо рот, каб нешта сказаць, але раптам моцна сціснуў губы. Ён паволі перабіраў пальцамі нагі, потым зняў рукі з калень, крыху выставіў наперад адну ступню і паглядзеў на яе.
- Добра, - сказаў ён, - я пачакаю, адразу не пайду.
Том сказаў:
- Калі цэлы гурт людзей, добрых, ціхамірных людзей, не ведае, не разумее, што робіцца наўкол... значыць, трэба нечага чакаць.
- Я застаюся, - сказаў Кейсі.
- А заўтра зранку паедзем шукаць работу.
- Добра, - сказаў Кейсі і паварушыў пальцамі нагі, панура пазіраючы на іх. Том адкінуўся назад, абапершыся на локаць, і заплюшчыў вочы. З-за брызенту да яго слыху данесліся няясныя галасы Ружы Сарона і Коні.
Пад брызентам быў густы цень, і светлыя трохкутнікі з абодвух бакоў выступалі рэзка і выразна. Ружа Сарона ляжала на матрацы, а Коні сядзеў побач на кукішках.
- Трэба было б маці памагчы, - сказала Ружа Сарона. - Некалькі ўжо разоў я збіралася, але толькі варухнуся, адразу рвота.
Позірк у Коні быў пахмурны.
- Каб ведаў, што так будзе, не паехаў бы. Вывучыўся б дома вечарамі на трактарыста і меў бы тры даляры ў дзень. На тры даляры можна жыць яшчэ як, і ў кіно кожны вечар хадзіць.
Ружа Сарона насцярожылася.
- Вечарамі ты будзеш радыё вывучаць, - сказала яна. Коні доўга не адказваў ёй. -Ты ж будзеш? - патрабавальна запыталася яна.
- Ну, вядома. Як толькі на ногі стану. Крыху зараблю.
Ружа Сарона прыўзнялася на локці.
- Ты раздумаў?
- Н-не... не... вядома, не. Толькі я... я не ведаў, што прыйдзецца жыць у такіх месцах, як гэтае.
Пагляд у Ружы Сарона зрабіўся суровы.
- Значыць, так трэба, - прамовіла яна спакойна.
- Вядома, вядома. Сам разумею. Толькі перш на ногі стану. Зараблю трохі. А ўсё ж, відаць, лепш было б дома застацца, я вывучыўся б на трактарыста. Ім плацяць па тры даляры ў дзень, ды яшчэ прырабіць можна. - Ружа Сарона скіравала на яго пільны позірк, і, калі вочы іх сустрэліся, Коні зразумеў, што яна ўзважвае, вызначае яго вартасць. - А вучыцца я буду. Толькі спачатку трэба на ногі стаць.
Ружа Сарона рашуча, з выклікам сказала:
- Мы павінны дамок набыць, перш чым дзіця народзіцца. У палатцы раджаць не хачу і не буду.
- Ну зразумела, - сказаў Коні. - Але мне спачатку трэба стаць на ногі. - Ён выйшаў з-пад навеса і паглядзеў на маці - яна нахілілася над агнём, у якім гарэла сухое ламачча. Ружа Сарона лягла на спіну і ўтаропіла позірк у брызент над галавой. Потым заткнула вялікім пальцам рот, як кляпам, і ціха заплакала.
Маці ўкленчыла перад вогнішчам і ламала голле, падтрымліваючы агонь пад кацялком, у якім тушылася мяса. Языкі полымя то ўзнімаліся ўгору, то ападалі, то ўзнімаліся, то ападалі. Дзеці, іх было пятнаццаць, моўчкі стаялі вакол вогнішча і не зводзілі з яго вачэй. І калі да іх дайшоў пах тушанага мяса, насы ў іх крышачку зморшчыліся. Сонца паблісквала на іх пабурэлых ад пылу жоўтых валасах. Дзеці адчувалі, што няёмка так стаяць і пазіраць, але прэч не ішлі. Маці ціха гаварыла з дзяўчынкай, што стаяла ў самым цэнтры гэтага гурту дзяцей, якія з прагнасцю глядзелі на кацялок. Дзяўчынка была крыху старэйшая за астатніх дзяцей. Яна стаяла на адной назе, гладзячы лытку пад'ёмам голай ступні. Рукі яна сашчапіла за спінай. Маленькія шэрыя вочы спакойна глядзелі на маці. Яна прапанавала:
- Дайце наламаю вам сучча, мэм.
Маці падняла галаву ад кацялка:
- Відаць, хочаш есці папрасіць?
- Так, мэм, - спакойна адказала дзяўчынка.
Маці падсунула сучча пад кацялок, і агонь ціха загудзеў.
- Ты сёння не снедала?
- Не, мэм. Тут ніякай работы няма. Та хоча прадаць што-небудзь з пажыткаў, купіць бензіну і паехаць далей.
Маці зноў зірнула на яе:
- Астатнія таксама не снедалі?
Дзеці бянтэжліва пераступілі з нагі на нагу і адвялі вочы ад кацялка, ад якога ішла пара. Адзін маленькі хлопчык пахваліўся:
- Я снедаў... і брацік мой таксама... і вось гэтыя двое, сам бачыў. Мы добра пад'елі. Вечарам паедзем далей на поўдзень.
Маці ўсміхнулася:
- Значыць, вы не галодныя. А то на ўсіх не хопіць.
Хлопчык выпнуў ніжнюю губу.
- Мы добра пад'елі, - паўтарыў ён і раптам крута павярнуўся, пабег і нырнуў у сваю палатку. Маці так доўга глядзела яму ўслед, што дзяўчынка вырашыла напомніць ёй:
- Агонь зусім патух, мэм. Я распалю яго, калі хочаце.
Руці з Уінфілдам стаялі сярод дзяцей, стараючыся захаваць спакой і годнасць. Яны трымаліся адчужана і, разам з тым, як гаспадары. Руці глянула на дзяўчынку халоднымі, злоснымі вачамі, потым прысела каля агню і стала ламаць галінкі.
Маці зняла накрыўку з кацялка, памяшала мяса палачкай.
- Вось і добра, што вы не ўсе галодныя. Той маленькі хлопчык напэўна ж не галодны.
Дзяўчынка насмешліва ўсміхнулася:
- Хто - ён? Проста выхваляецца. Падумаеш, нос задраў! Калі ў іх на вячэру нічога няма, ведаеце, што ён выдумляе? Учора вечарам выйшаў з палаткі і кажа: мы курыцу елі. А як жа! Я яшчэ раней зазірнула да іх у палатку і бачыла, што ў іх было на вячэру: адны аладкі, як і ва ўсіх у нас.
- А-а... - Маці кінула позірк на палатку, у якую шмыгнуў маленькі хлопчык, і запыталася ў дзяўчынкі: - А вы даўно ў Каліфорніі?
- Ну, месяцаў шэсць. Спачатку мы жылі ва ўрадавым лагеры, потым паехалі далей, на поўдзень, а калі вярнуліся, там было ўжо поўна. Во дзе жыць добра, я вам скажу.
- Дзе гэта? - запыталася маці і, узяўшы з рук Руці наламаныя галінкі, паклала іх у агонь. Руці з нянавісцю зірнула на дзяўчынку.
- А там, каля Ўідпэтча. Там і прыбіральні добрыя, і душавыя ёсць, бялізну можна памыць у начоўках, вада блізка - добрая, пітная, па вечарах музыка іграе, а ў суботу вечарам танцы. О, вы нідзе такога не бачылі. І дзецям ёсць пляцоўка, а ў прыбіральнях папера. Пацягнеш ручку ўніз, вада туды льецца, і палісмены ніякія не лезуць у палаткі, а той дзядзька, што начальнікам там ходзіць, далікатны такі - зойдзе ў госці, добра пагаворыць і зусім не ганарысты. Хацела б я яшчэ там пажыць.
Маці сказала:
- Першы раз чую пра такі лагер. Я з радасцю памыла б бялізну ў такой пральні, далібог, праўда.
Дзяўчынка з захапленнем гаварыла:
- У іх, а божачкі, гарачая вада ідзе проста па трубах, станеш пад душ, і так цёпленька робіцца і прыемна. Такога лагера нідзе больш няма.
Маці запыталася:
- Там цяпер поўна, кажаш?
- Ага. Калі мы апошні раз заехалі, усё было занята.
- Вялікія, пэўна, грошы бяруць, - прамовіла маці.
- Так. Але калі грошай няма, дазваляюць адпрацоўваць - па дзве гадзіны ў тыдзень: на ўборку пасылаюць, скрынкі для смецця чысціць. Ну, усякае такое. А вечарам музыка іграе, людзі пагутарыць збіраюцца, а гарачая вада дык проста па трубах бяжыць. Вы такога лагера ніколі не бачылі.
- Хацела б я паехаць туды, - сказала маці.
Тут Руці ўжо не стрымалася і са злосцю выпаліла:
- А ў нас бабка памерла проста на грузавіку. - Дзяўчынка здзіўлена паглядзела на яе. - Так, так, проста на грузавіку, і следчы яе забраў. - Руці моцна сцяла губы і наламала яшчэ невялікую кучку сухіх сучкоў.
Уінфілд заморгаў вачамі, уражаны смелым выпадам Руці.
- Проста на грузавіку, - паўтарыў ён за ёю. - А следчы запіхнуў яе ў вялікі кош.
- Сціхніце вы абое, - умяшалася маці, - а то шугану вас адсюль, - і падкінула ў агонь сучча.
На другім канцы лагера Эл падышоў паглядзець на прыцірку клапанаў.
- Бачу, канчаеш ужо, - сказаў ён.
- Яшчэ два засталіся.
- А дзяўчаты тут ёсць?
- У мяне жонка, - адказаў малады чалавек. - На дзяўчат у мяне часу не хапае.
- А ў мяне заўсёды хапае, - сказаў Эл. - На што іншае - няма, а на гэта ёсць.
- А ты пагаладай, тады другое запяеш.
Эл засмяяўся:
- Усё можа быць. А пакуль што ў мяне такі настрой.
- Я тут разгаварыўся з адным. Ён з вамі прыехаў?
- З намі.. Гэта мой брат, Том. Ты з ім глядзі, не надта. Ён чалавека забіў.
- Забіў чалавека? За што?
- Між імі бойка была. Той пырнуў яго нажом. А Том яму па галаве рыдлёўкай.
- Праўда? А суд быў?
- Быў. Адпусцілі, бо здарылася гэта ў бойцы.
- На задзіраку ён не падобны.
- Ды не, які ён задзірака. Але Том нікому не спусціць. - У голасе Эла прагучаў гонар. - Том чалавек спакойны. І ўсё-такі будзь з ім асцярожны.
- Што ж... Мы з ім пагаварылі. Мне здалося, ён не зласлівы.
- Не, не зласлівы. Ён ціхі, пакуль яго не давядуць, а тады ўжо - сцеражыся! - малады чалавек узяўся за апошні клапан. - Давай дапамагу паставіць клапаны, і галоўку надзенем.
- Ну памажы, калі табе больш рабіць няма чаго.
- Някепска было б паспаць, - сказаў Эл, - ды толькі варта мне ўбачыць разабраную машыну, і рукі самі цягнуцца да яе. Не магу ўтрымацца.
- За дапамогу буду табе вельмі ўдзячны, - сказаў малады чалавек. - Мяне завуць Флойд Ноўлс.
- А я Эл Джоўд.
- Вельмі рады пазнаёміцца.
- Я таксама. Пракладку пакінеш старую?
- Давядзецца, - адказаў Флойд.
Эл дастаў з кішэні складны ножык і паскроб ім блок рухавіка.
- Эх, - сказаў ён, - нічога на свеце так не люблю, як пакапацца ў машыне.
- А дзяўчат?
- О, і дзяўчат! Вось каб разабраць «ролс-ройс», а потым зноў сабраць! Адзін раз удалося зазірнуць пад капот шаснаццаціцыліндравага «кадылака», і, божа мой, такога цуду ты ў жыцці не бачыў! Іду я па вуліцы ў нас, у Саліса, і бачу - стаіць шаснаццатка каля рэстарана, і я падняў капот. І тут выходзіць з рэстарана нейкі дзядзька і кажа: «Ты што тут робіш?» А я яму: «Проста гляджу. Цудоўная машына, праўда?» А ён стаў побач са мной і стаіць. Пэўна, сам ніколі ў яе не заглядаў. Стаў і стаіць. Багаты такі, у саламяным капелюшы. Кашуля ў палоску, акуляры. Нічога адзін аднаму не гаворым. Проста глядзім. А потым ён раптам пытаецца: «Хацеў бы павадзіць?»
Флойд сказаў:
- Так я табе і паверыў!
- Далібог, праўда. «Хацеў бы павадзіць?» А я ў джынсах, у брудных. Кажу яму: «Запэцкаю сядзенне». А ён: «Садзіся. Аб'едзем квартал». І, павер, я сем ці восем разоў вакол квартала аб'ехаў. Божа, што за машына!
- Шык?
- Яшчэ які! Разабраць бы яе ўсю на частачкі... я за гэта... не ведаю, што аддаў бы.
Рука Флойда перастала тузацца ўзад і ўперад. Ён выняў апошні клапан з гнязда і агледзеў яго.
- Ты лепш прывыкай да драндулетаў, - сказаў ён. - Шаснаццатку табе наўрад ці калі прыйдзецца вадзіць. - Флойд паклаў корбу на падножку і пачаў счышчаць стамескай нагар на галоўцы блока.
Дзве прысадзістыя жанчыны, проставалосыя, босыя, прайшлі паўз іх, несучы ўдзвюх вядро мутна-белай вады. Яны ледзь валаклі ногі пад цяжарам сваёй ношы і не падымалі вачэй ад зямлі. Сонца хілілася на захад.
Эл сказаў:
- Цябе, відаць, нічога асабліва не вабіць.
- Я тут ужо шэсць месяцаў, - сказаў ён. - Сную па ўсім штаце, на працы не шкадую сябе, хуценька шукаю новае месца, каб было на што купіць мяса і бульбы жонцы, сабе і дзецям. Носішся, як заяц... а толку мала. Тут хоць са скуры вылузвайся, сыты ўсё роўна не будзеш. Я проста стаміўся, і ўсё. Так стаміўся, што за ноч сілы не набіраюся. Што далей рабіць, розуму не дабяру.
- Няўжо нельга сталую работу знайсці? - запытаўся Эл.
- Не, сталай работы тут не знойдзеш. - Флойд саскроб рэшткі нагару з галоўкі блока і працёр цьмяны метал прамасленай анучкай.
Да лагера пад'ехала лядашчая легкавая машына. У ёй сядзела чацвёра мужчын - ва ўсіх твары загарэлыя, суровыя. Машына паволі рухалася між палатак. Флойд крыкнуў ім:
- Ну як, пашанцавала?
Машына спынілася. Чалавек, што сядзеў за рулём, адказаў:
- Усё навокал аб'ездзілі. Нідзе ніякай работы. Трэба ехаць адсюль.
- Куды? - крыкнуў Эл.
- Адзін бог ведае. Куды мы толькі не патыкаліся! - Вадзіцель адпусціў тормаз, і машына паехала далей.
Эл пазіраў ёй услед.
- Можа, лепш было б ездзіць па адным? Адзін хутчэй работу знойдзеш.
Флойд паклаў стамеску і нявесела ўсміхнуўся:
- Ты яшчэ не вучаны. На раз'езды бензін патрэбен. А галон бензіну каштуе пятнаццаць цэнтаў. Гэтыя чацвёра не могуць дазволіць сабе ездзіць на чатырох машынах.
Яны складваюцца па дзесяць цэнтаў і купляюць бензін. Табе яшчэ трэба павучыцца.
- Эл! - Эл павярнуўся і ўбачыў Уінфілда, які з важным выглядам стаяў каля яго. - Эл, ма ўжо мяса па талерках раскладае. Ідзі, яна кліча цябе.
Эл абцёр рукі аб штаны.
- Мы сёння яшчэ не елі, - сказаў ён Флойду. - Я пад'ем і прыйду памагу табе.
- Неабавязкова, але як хочаш.
- Сказаў жа - прыйду. - Эл пайшоў за Ўінфілдам да палаткі Джоўдаў.
Каля яе было цесна. Суседскія дзеці такой шчыльнай сцяной абступілі кацялок з варывам, што маці, завіхаючыся каля вогнішча, закранала іх локцямі. Том і дзядзька Джон стаялі каля яе.
Маці разгублена гаварыла:
- Не ведаю, як быць. Трэба сям'ю накарміць. А што мне з гэтымі рабіць? - Дзеці стаялі як укапаныя і пазіралі на яе. Твары ў іх былі абыякавыя, нібы застылыя, толькі вочы перабягалі з кацялка на алавяную талерку, якую маці трымала ў руцэ. Вочы ўпарта сачылі за лыжкай, што хадзіла ад кацялка да талеркі, і, калі маці перадала талерку, ад якой ішла пара, дзядзьку Джону, вочы ўпіліся ў яе. Дзядзька Джон зачарпнуў поўную лыжку, і вочы дружна падняліся разам з ёю. Ён адправіў у рот кавалак бульбіны, і вочы ўсе разам утаропіліся на твар, сочачы за яго выразам - ці смачна, ці спадабалася.
І тут дзядзька Джон быццам упершыню ўбачыў дзяцей. Ён вяла пажаваў і сказаў Тому:
- Вазьмі. Мне есці не хочацца.
- Ты ж сёння нічога ў рот не браў, - сказаў яму Том.
- Ага, у мяне з жыватом нешта. Не хочацца.
Том спакойна сказаў:
- Ідзі з талеркай у палатку, там пад'ясі.
- Нешта не хочацца, - упарціўся Джон. - І ў палатцы яны будуць перад вачамі стаяць.
Том павярнуўся да дзяцей:
- Ідзіце. Ану прэч адгэтуль! - Вочы ўсе разам адарваліся ад кацялка і разгублена ўставіліся яму ў твар. - Ідзіце, ідзіце адсюль. Так рабіць нядобра. Усё роўна на ўсіх вас не хопіць.
Маці раскладала па талерках порцыі мяса, вельмі маленькія, і ставіла талеркі на зямлю.
- Не магу я іх прагнаць, - сказала яна. - Проста не ведаю, што рабіць. Бярыце свае талеркі і ідзіце пад навес. А тое, што засталося, няхай яны даядуць. А гэту вось занясіце Разашарне. - Яна ўсміхнулася дзецям: - Паслухайце, дзеткі, знайдзіце дзе-небудзь шырокія трэсачкі, і я дам вам, што засталося. Толькі не сварыцеся.
Дзеці вокамгненна разляцеліся ва ўсе бакі без адзінага гуку. Хто пабег шукаць трэсак, хто ў свае палаткі па лыжку. Не паспела маці раскласці ежу па талерках, як яны ўжо зноў абкружылі яе, маўклівыя, галодныя, як ваўкі. Маці пакруціла галавой:
- Проста не ведаю, што рабіць. Не магу ж я сям'ю абдзяліць. Яе трэба накарміць. Руці! Уінфілд! - патрабавальна крыкнула яна. - Бярыце ж свае талеркі. Хутчэй! Ідзіце з імі пад брызент. - Яна вінавата паглядзела на дзяцей, якія моўчкі чакалі. - Там зусім мала, - сказала яна сарамліва. - Кацялок я пастаўлю на зямлю, а вы падбярыце рэшткі, хоць чарвяка заморыце. - Яна гаварыла запінаючыся. - Нічога я зрабіць не магу. І не даць не магу. - І, зняўшы кацялок з агню, паставіла яго на зямлю. - Пачакайце трохі. Яшчэ гарачае, - сказала яна і паспешліва пайшла пад брызент, каб вочы яе не бачылі таго, што будзе.
Сям'я Джоўдаў сядзела на зямлі, кожны са сваёй талеркай, і пад брызентам было чуваць, як дзеці скрабуць трэсачкамі, лыжкамі і ржавымі палоскамі бляхі. Яны з усіх бакоў закрылі сабой кацялок. Не перагаворваліся, не штурхаліся, але ў кожным іх руху адчувалася ўпартая настойлівасць і затоеная жорсткасць. Маці павярнулася спінай, каб усяго гэтага не бачыць.
- Больш так нельга, - сказала яна. - Давядзецца хавацца ад чужых вачэй. - Чутно было, як скрабуць у кацялку, потым цесны гурток дзяцей рассыпаўся, і яны разышліся, пакінуўшы на зямлі абскрэбены кацялок. Маці паглядзела на талеркі. - Ніхто з вас добра не пад'еў.
Бацька падняўся і, нічога не адказаўшы, выйшаў з-пад брызенту. Прапаведнік усміхнуўся і лёг на зямлю, падклаўшы пад галаву рукі. Эл таксама падняўся.
- Пайду памагу тут аднаму з машынай, - сказаў ён.
Маці сабрала талеркі і пайшла мыць.
- Руці, - паклікала яна, - Уінфілд! Хуценька прынясіце вядзерца вады. - Яна дала ім вядро, і дзеці пайшлі з ім да рэчкі.
Да палаткі Джоўдаў падыходзіла мажная жанчына. Сукенка на ёй была ў пыле і ў плямах ад змазачнага масла. Яна ішла, высока задраўшы падбародак. Спынілася за некалькі крокаў ад палаткі і ваяўніча глянула на маці. Тады падышла бліжэй.
- Дабрыдзень, - сказала яна холадна.
- Дзень добры, - адказала маці, паднялася з каленяў і падсунула госці скрынку. - Сядайце, калі ласка.
Жанчына падышла зусім блізка.
- Не, не хачу.
Маці запытальна глянула на яе:
- Вам што-небудзь трэба?
Жанчына падперла рукі ў бокі.
- Мне трэба, каб вы клапаціліся пра сваіх уласных дзяцей, а маіх пакінулі ў спакоі.
Маці зрабіла вялікія вочы.
- Я нічога такога... - пачала яна.
- Ад майго хлапчука так і тхне тушонкай. Гэта вы яму далі, ён мне сказаў. Тушаным мясам надумалі хваліцца. Няма чаго гэтым хваліцца. Я і так ледзь не разрываюся, а тут яшчэ мой блазан прыбягае і пытаецца: «А чаму ў нас няма мяса?» - Голас жанчыны дрыжаў ад шаленства.
Маці падышла да яе.
- Вы сядайце, - сказала яна. - Прысаджвайцеся, пагаворым.
- І не думаю. Я стараюся хоць як-небудзь накарміць сям'ю, а вы тут са сваёй тушонкай лезеце.
- Сядайце, сядайце, - запрашала маці. - Больш у нас мяса не будзе, аж пакуль мы работы не знойдзем. Вось каб вы варылі мяса і малыя дзеці абступілі вас з усіх бакоў, што б вы рабілі? Нам і самім было мала, ды хіба адмовіш дзецям, калі яны пазіраюць на цябе такімі вачамі?
Рукі жанчыны ўпалі з клубоў. Яна дапытліва паглядзела ў твар маці, потым павярнулася, шпарка пакрочыла прэч і, увайшоўшы ў сваю палатку, захінула за сабой полкі. Маці правяла яе позіркам і зноў апусцілася на калені перад горкай алавяных талерак.
Да палаткі паспешліва падышоў Эл.
- Том! - гукнуў ён. - Ма, Том тут?
Том высунуў галаву з-пад брызенту.
- Чаго табе?
- Хадзем са мной, - усхвалявана сказаў Эл.
Яны пайшлі разам.
- Што здарылася? - запытаўся Том.
- Пацярпі, зараз даведаешся. - Эл падвёў яго да машыны з разабраным блокам. - Гэта Флойд Ноўлс, - сказаў ён.
- Мы з ім ужо гаварылі. Ну, як справы?
- Ды вось канчаю, - адказаў Флойд.
Том правёў пальцам па галоўцы блока.
- Ну кажы, Эл, што там у цябе за тайна.
- Толькі што Флойд мне сказаў... Раскажы яму сам, Флойд.
Флойд пачаў:
- Можа, лепш было б памаўчаць... але добра, скажу. Тут адзін прыехаў, кажа, работа ёсць - далей на поўнач.
- На поўнач?
- Ага. Ёсць месца такое - даліна Санта-Клара. Далёка, чорт ведае дзе.
- А работа якая?
- Збор сліў, груш, кансерваванне. Кажа, хутка ўсё паспее.
- А ўсё ж, як далёка? - дапытваўся Том.
- А чорт яго ведае. Міль дзвесце, пэўна.
- Сапраўды чорт ведае дзе, - сказаў Том. - А чаму ты думаеш, што да нашага прыезду там будзе работа?
- Напэўна сказаць ніхто не можа, - адказаў Флойд. - Але ж тут усё роўна нічога не знойдзеш, а чалавек гэты кажа, што атрымаў ліст ад брата, і той ужо ў дарозе. Нікому казаў нічога не гаварыць, а то ўсе кінуцца туды. Давядзецца выязджаць ноччу. Раней прыедзеш, можа, работу дадуць.
Том уважліва прыглядаўся да Флойда.
- Нашто ж так, крадучыся?
- А на тое, што, калі ўсе рушаць туды, работы не хопіць.
- Усё ж далекавата, каб на яго чорт, - сказаў Том.
Флойд закрыўдаваў:
- Я з табой па-сяброўску падзяліўся. Можаш не ехаць. Твой брат тут мне памог, таму я і сказаў вам.
- Ты ўпэўнены, што ў гэтым наваколлі работы няма?
- Слухай, я тры дні тут кручуся, дзе толькі ні быў, і каб хоць што трапілася - нідзе нічога. Калі хочаш сам пашукаць і спаліць чорт ведае колькі бензіну, што ж, давай! Я не прашу вас ехаць са мной. Чым больш народу туды наедзе, тым меней шанцаў у мяне.
Том сказаў:
- Я нічога такога не гавару. Толькі вельмі ж далёка. Мы спадзяваліся папрацаваць тут, дамок арандаваць.
Флойд цярпліва сказаў:
- Вы толькі што прыехалі, я разумею. Вам яшчэ шмат чаму трэба павучыцца. Калі паслухаеце мяне, вы толькі выйграеце. А не - вучэнне абыдзецца вам даражэй. Асесці тут вы не спадзявайцеся, бо ў гэтых месцах сталай работы нідзе няма. Страўнік пагоніць вас далей. Ну вось, цяпер сказаў вам усё начыстую.
- Трэба ўсё ж пашукаць, - заклапочана сказаў Том.
Да суседняй палаткі пад'ехала закрытая легкавая машына. З яе вылез чалавек у камбінезоне і сіняй кашулі. Флойд крыкнуў яму:
- Ну як, добра з'ездзілі?
- Ніякай работы нідзе ў гэтым чортавым краі няма і не будзе, пакуль не саспее бавоўна. - І чалавек пайшоў у падраную палатку.
- Вось бачыш? - сказаў Флойд Тому.
- Ага, бачу. А ўсё ж дзвесце міль!
- Вы пакуль што яшчэ нідзе не прыстроіліся. Думайце - вырашайце.
- Лепш паехаць, - сказаў Эл.
- А тут калі будзе работа? - запытаўся Том у Флойда.
- Недзе праз месяц пачнецца збор бавоўны. Калі ў вас ёсць запас грошай, чакайце.
- Маці ехаць не захоча, яна вельмі стамілася, - сказаў Том.
Флойд паціснуў плячамі:
- Я вас на поўнач не ганю. Рабіце, як вам лепей. Што чуў, тое і перадаў вам. - Ён падняў з падножкі прамасленую пракладку, акуратна прыладзіў яе да блока і прыціснуў. - Ну, - сказаў ён Элу, - давай памажы паставіць крышку.
Том назіраў, як яны асцярожна насунулі цяжкую крышку блока на шпількі і мякка апусцілі.
- Трэба параіцца са сваімі, - прагаварыў ён.
Флойд сказаў:
- Толькі каб ніхто, акрамя вашых, нічога пра гэта не ведаў. Я толькі вам. Калі б твой брат не памог мне з машынай, я і з вамі не падзяліўся б.
- Што ж, вялікі табе дзякуй. Трэба ўсё добра абдумаць. Магчыма, і паедзем.
Эл сказаў:
- Паедуць туды нашы ці не, я ўсё роўна паеду, далібог. На спадарожных машынах дабяруся.
- А сям'ю кінеш? - запытаўся Том.
- І што тут такога? Я вярнуся з поўнымі кішэнямі грошай. А чаму і не?
- Маці на гэта згоды не дасць, - сказаў Том. - І бацька таксама.
Флойд паставіў гайкі на балты і закруціў іх, колькі мог, пальцамі.
- Мы з жонкай выехалі разам з усімі нашымі, - сказаў ён. - Там, дома, нам і ў галаву не прыйшло б ад сваіх адбівацца. Проста пра такое мы і думаць не маглі. Але калі мы ўсёй сям'ёй заехалі крыху далей на поўнач, я вярнуўся сюды, а яны рушылі далей, і цяпер адзін бог ведае, куды іх занесла. З таго часу я іх усё шукаю, паўсюль пра іх пытаюся. - Флойд абхопліваў гайкі ключом і раўнамерна падкручваў адну за адной.
Том апусціўся на кукішкі каля машыны і кінуў беглы позірк на рады палатак, між якіх была пратаптана ў траве сцяжынка.
- Не, даражэнькі, - сказаў ён, - маці цябе не адпусціць.
- А, па-мойму, аднаму лягчэй працу знайсці.
- Можа, і лягчэй, толькі яна згоды не дасць.
Да лагера падкацілі дзве перапоўненыя машыны, у людзей, што сядзелі ў іх, выгляд быў панылы. Флойд падняў вочы, але не спытаўся, ці добра з'ездзілі. На іх запыленых тварах адбіваліся смутак і адначасова ўпартасць. Сонца хілілася на захад, і жоўтае яго святло залівала Гувервіль і вярбняк за ім. Дзеці пачалі выходзіць з палатак і разбрыдацца па лагеры. Жанчыны таксама выходзілі і браліся распальваць маленькія вогнішчы. Мужчыны збіраліся невялікімі групамі і, прысеўшы на кукішкі, заводзілі гаворку.
Новенькі двухмесны «шэўрале» з'ехаў з шашы і пакіраваў у самы цэнтр лагера. Ён спыніўся сярод палатак. Том запытаўся:
- Каго гэта яшчэ прынесла. З выгляду яны не тутэйшыя.
- Не ведаю, - адказаў Флойд. - Можа, паліцыя.
Дзверцы адчыніліся, з машыны выйшаў чалавек і стаў каля яе. Яго спадарожнік застаўся ў кабіне. Мужчыны, што сядзелі на кукішках, скіравалі позіркі на прыезджых, і гутарка спынілася. Жанчыны, якія разводзілі агонь, употай зіркалі на бліскучую легкавушку. Дзеці пачалі падбірацца да яе самымі мудрагелістымі абходнымі шляхамі, кружачы сярод палатак.
Флойд паклаў ключ. Том падняўся на ногі. Эл выцер рукі аб штаны. Усе трое падышлі да «шэўрале». На чалавеку, які выйшаў з машыны, былі штаны колеру хакі і фланелевая кашуля. На галаве мяккі шыракаполы капялюш. У нагруднай кішэні за загарадкай з вечных ручак і жоўтых алоўкаў тырчаў стосік паперак, з задняй кішэні штаноў вытыркаўся блакнот у металічных вокладках. Ён падышоў да адной групы мужчын, што сядзелі на кукішках, і тыя ўзнялі на яго вочы насцярожана і моўчкі. Яны сачылі за ім, не зварухнуўшыся з месца; бялкі вачэй у іх паблісквалі пад зрэнкамі, бо яны глядзелі ўгору, не падымаючы галавы. Том, Эл і Флойд няспешна, быццам шпацыруючы, падышлі бліжэй.
Чалавек запытаўся:
- Хочаце атрымаць работу? - Усе пазіралі на яго па-ранейшаму моўчкі і насцярожана. А з усяго лагера сюды цягнуліся ўжо і іншыя мужчыны.
Нарэшце адзін з тых, што сядзелі на кукішках, адказаў:
- Вядома ж, хочам. А дзе яна, работа?
- Акруга Туларэ. Там пачынаецца збор фруктаў. Патрэбна шмат людзей.
Загаварыў Флойд:
- Вы самі наймаеце?
- Сам. Я ўзяў падрад.
Людзі збіліся вакол яго цеснай кучкай. Нейкі чалавек у камбінезоне зняў з галавы свой чорны капялюш і пальцамі зачасаў назад доўгія чорныя валасы.
- Колькі плаціць будзеце? - запытаўся ён.
- Цяпер дакладна сказаць не магу. Цэнтаў трыццаць, думаю.
- Чаму не можаце сказаць дакладна? У вас жа падрад, ці не так?
- Правільна, - адказаў чалавек у штанах колеру хакі. - Але ўсё залежыць ад цаны на фрукты. Можа, трохі больш, можа, трохі і менш.
Флойд выступіў наперад і спакойна сказаў:
- Я паеду, містэр. Вы падрадчык, у вас павінен быць патэнт. Пакажыце яго, а потым выпішыце нам нарад і каб там было сказана, якая работа, дзе будзем працаваць, калі і колькі будуць нам плаціць, і падпішыце яго. Тады паедзем.
Падрадчык кінуў на яго злосны позірк:
- Ты мяне не вучы, як мне справы свае весці.
Флойд сказаў:
- Калі мы едзем да вас працаваць, гэта і нашы справы таксама.
- Ты мяне не вучы. Я паведамляю вам, што патрэбны людзі.
- А колькі людзей і якая плата, пра гэта вы маўчок.
- Што за чорт! Ды я сам яшчэ не ведаю.
- Раз не ведаеце, значыць, не маеце права людзей наймаць.
- У мяне ёсць поўнае права весці свае справы так, як я лічу неабходным. Калі вам больш даспадобы адседжваць тут задніцы - воля ваша. Я наймаю на работу ў акругу Туларэ. Мне шмат рабочых там патрэбна.
Флойд павярнуўся да натоўпу мужчын. Цяпер ужо яны ўсе стаялі і моўчкі пераводзілі позіркі з падрадчыка на Флойда і наадварот. Флойд сказаў:
- Я ўжо два разы так нарываўся. Яму, можа, трэба тысяча чалавек. А ён набярэ туды тысяч пяць і будзе плаціць па пятнаццаць цэнтаў за гадзіну. І вы, бедалагі, згодзіцеся, бо жываты ў вас пустыя. Калі ён хоча наняць людзей, няхай наймае і няхай напіша ўсё на паперы і паставіць там плату. Папрасіце, няхай дакумент пакажа. Без патэнта наймаць людзей ён права не мае.
Падрадчык павярнуўся да «шэўрале» і крыкнуў:
- Джо!
Яго спадарожнік выглянуў з кабіны, адчыніў дзверцы і выйшаў. На ім былі верхавыя брыджы і высокія чаравікі на шнуроўцы. Збоку на поясе-патранташы вісела цяжкая рэвальверная кабура. Да карычневай кашулі быў прышпілены знак шэрыфскага памагатага - металічная зорка. Ён ступаў няспешна, уразвалку. На твары яго іграла рэдзенькая ўсмешка.
- У чым справа? - Кабура хадзіла ўзад і ўперад па бядры.
- Зірні, Джо, гэты малойчык трапляўся табе калі-небудзь на вочы?
Палісмен запытаўся:
- Каторы?
- Вось гэты. - Падрадчык паказаў на Флойда.
- А што ён зрабіў? - палісмен усміхнуўся Флойду.
- Ён чырвоны, агітацыю тут разводзіць.
- Гм... - шэрыфскі памагаты не спяшаючыся зайшоў збоку, каб паглядзець на Флойда ў профіль, і твар у таго пачаў залівацца чырванню.
- Бачыце? - закрычаў Флойд. - Каб ён рабіў усё сумленна, хіба ж прывёз бы з сабою фараона?
- Трапляўся ён табе раней на вочы? - паўтарыў пытанне падрадчык.
- Гм-м... як быццам было. На мінулым тыдні, калі ўзламалі гараж са старымі машынамі. Па-мойму, ён там круціўся. Ага, так! Ён самы і ёсць, магу пабажыцца. - Усмешка імгненна знікла з яго твару. - Лезь у машыну, - загадаў палісмен Флойду і адшпіліў раменьчык на кабуры аўтаматычнага пісталета.
Том сказаў:
- Без віны чалавека бераце.
Шэрыфскі агент крута павярнуўся да яго:
- Калі табе за кампанію хочацца, паспрабуй толькі яшчэ раз зяпу разявіць. Каля таго гаража двое шасталі.
- На мінулым тыдні мяне і не было ў гэтым штаце, - сказаў Том.
- Ну і што? Цябе, можа, у другім штаце шукаюць. Лепш заткніся.
Падрадчык зноў павярнуўся да натоўпу мужчын:
- Вы гэтых чырвоных падлюг не слухайце. Падбухторшчыкі - яны бяду на вас наклічуць. Я вас усіх вазьму на работу ў Туларэ.
Людзі маўчалі.
Шэрыфскі агент павярнуўся да іх.
- Вам ёсць рацыя паехаць, - сказаў ён, і рэдзенькая ўсмешка зноў засвяцілася ў яго на твары. - Аддзел аховы здароўя распарадзіўся ачысціць гэты лагер. А калі тут у вас яшчэ і чырвоныя завяліся - глядзіце, каб бяды з кім-небудзь не здарылася. Добра зробіце, калі паедзеце ў Туларэ. Тут усё роўна работай не пахне. Я вам па-сяброўску раю. А калі не паедзеце, сюды неўзабаве ўваляцца малайцы, ды яшчэ, можа, з кайламі.
Падрадчык сказаў:
- Я ж кажу вам, мне людзі патрэбныя. Не хочаце працаваць, што ж, воля ваша.
Палісмен усміхнуўся:
- Калі не хочуць працаваць, ім у нашым штаце не месца. Мы іх хутка справадзім адсюль.
Флойд нерухома стаяў побач з палісменам, вялікія пальцы рук кручком зачапіліся за пояс. Том скоса глянуў на яго і ўтаропіў вочы сабе пад ногі.
- У мяне ўсё, - сказаў падрадчык. - У акрузе Туларэ людзі патрэбныя, работы шмат.
Том паволі падняў вочы і ўбачыў рукі Флойда з напятымі на кісцях жыламі. Рукі Тома таксама пацягнуліся ўгору і вялікімі пальцамі зачапіліся за рэмень.
- Так, гэта ўсё, - сказаў шэрыфскі памагаты. - Каб заўтра да раніцы тут ні жывой душы не было.
Падрадчык сеў у машыну.
- А ты, - сказаў шэрыфскі памагаты Флойду, - лезь у машыну. - Ён падняў вялікую пяцярню і схапіў Флойда за левы локаць. Флойд крутнуўся і вырваўся, а правым кулаком ударыў у шырокі твар і кінуўся наўцёкі, пятляючы між палатак. Агент захістаўся, і тут Том даў яму падножку. Палісмен грымнуўся на дол і пераваліўся на бок, хапаючыся за пісталет. Флойд бег, то хаваючыся за палаткамі, то зноў паказваючыся. Лежачы, палісмен стрэліў. Нейкая жанчына каля адной з палатак пранізліва ўскрыкнула і глянула на сваю руку - костачак як не было, а пальцы віселі, быццам на нітачках, на далоні, якая стала белая, бяскроўная. У далёкім канцы лагера мільганула постаць Флойда, які імчаўся да вербняку. Шэрыфскі агент прыўзняўся, сеў на зямлі, зноў падняў пісталет, і тут раптам з натоўпу выступіў прападобны Кейсі. Ён ударыў палісмена нагой па шыі і адступіў назад, пазіраючы на грузнага чалавека, які ў непрытомнасці ляжаў на зямлі.
Пачулася выццё матора, і «шэўрале» памчаўся прэч, узнімаючы клубы пылу. Машына ўз'ехала на шашу і, як куля, знікла з вачэй. Жанчына ўсё яшчэ пазірала на сваю пакалечаную руку. З раны паволі сачылася кроў. З горла жанчыны вырваўся перарывісты крык, і яна зайшлася істэрычным смехам, які з кожным пераводам дыхання рабіўся ўсё гучнейшы.
Шэрыфскі агент ляжаў на баку, уткнуўшыся ротам у пыл.
Том падняў з зямлі пісталет, выняў магазін і шпурнуў яго ў кусты. Потым выкінуў з патронніка зарад.
- Такім нельга даваць у рукі зброю, - сказаў ён і кінуў пісталет на зямлю.
Жанчыну з раздробленай кісцю рукі абкружыў натоўп. У прыпадку істэрыкі, якая ўсё мацней авалодвала ёю, яна цяпер віскліва смяялася.
Кейсі падышоў блізка да Тома.
- Ты зараз жа ідзі адсюль, - сказаў ён. - Схавайся ў вербняку і перачакай там. Ён не бачыў, хто яго ўдарыў, а тваю падножку бачыў.
- Нікуды я не пайду, - адказаў Том.
Кейсі прашаптаў яму на вуха:
- У цябе возьмуць адбіткі пальцаў. Ты парушыў абавязацельства. Пашлюць назад у турму.
Том ледзь чутна перавёў дух.
- А чорт! Я і забыўся.
- Не марудзь, - сказаў яму Кейсі. - А то ён ачуняе.
- Прыхапіць бы яго пісталет, - сказаў Том.
- І не думай. Ні ў якім разе. Калі ўсё абыдзецца, я табе свісну чатыры разы.
Том няспешна адышоў убок, потым прыбавіў кроку і неўзабаве знік у вербняку, якім зарос бераг ракі.
Эл падышоў да палісмена, які ляжаў на зямлі.
- А божухна мой! - усклікнуў Эл у захапленні. - Здорава ж ты яго!
Людзі ў натоўпе ўсё яшчэ пазіралі на непрытомнага чалавека на зямлі. І раптам аднекуль здалёку пачулася сірэна, завыла і сціхла, потым зноў завыла ўжо бліжэй. Людзі затрывожыліся. Патапталіся на месцы і пачалі разыходзіцца ў розныя бакі - кожны ў сваю палатку. Засталіся толькі Эл і прапаведнік.
Кейсі павярнуўся да Эла:
- Ідзі адсюль. Ідзі ў сваю палатку. Ты нічога не бачыў і не ведаеш.
- Я? А сам ты як?
Кейсі ўсміхнуўся яму шырокай усмешкай:
- Трэба ж каму-небудзь браць віну на сябе. Дзяцей у мяне няма. Ну пасяджу я ў турме. Ад мяне ўсё роўна карысці вам ніякай, кручуся толькі тут пад нагамі.
- Гэта яшчэ не прычына, каб...
- Ідзі, ідзі, - рэзка перабіў Эла Кейсі. - Не ўблытвайся ў гэту справу.
Эл заўпарціўся:
- Я нікому не дазволю сабой камандаваць.
Кейсі спакойна сказаў:
- Калі ты ўліпнеш у гэта, пацерпяць усе вашы, уся ваша сям'я. Пра цябе ў мяне клопаты малыя. А вось маці твая і бацька праз гэта могуць зведаць гора. Тома зноў могуць адправіць у Макалестар.
Эл на хвілінку задумаўся. Потым сказаў:
- Добра. А ўсё ж ты дурны, як баран.
- Ну і няхай, - адказаў Кейсі. - Дурны дык дурны.
Сірэна не пераставала завываць, і з кожным разам выццё яе набліжалася. Кейсі апусціўся на калена каля палісмена і перавярнуў яго на спіну. Той застагнаў і залыпаў вачыма, сілячыся што-небудзь убачыць. Кейсі сцёр пыл з яго губ. Людзі сядзелі па сваіх палатках, апусціўшы крыссе ўвахода. Вячэрняе сонца афарбавала паветра ў чырвань, а шэрыя брызентавыя палаткі ў бронзу.
На шашы віскнулі шыны, з яе з'ехала адкрытая машына і падкаціла да лагера. З машыны выскачылі чатыры чалавекі з вінтоўкамі ў руках. Кейсі падняўся і падышоў да іх.
- Што тут у вас робіцца? - запытаўся адзін.
- Я збіў вашага чалавека, - адказаў Кейсі.
Адзін з тых, што прыехалі, падышоў да распасцёртага на зямлі палісмена.
- А што здарылася?
- Ды вось, - сказаў Кейсі, - ён тут разбушаваўся, і я яго ўдарыў. Ён страляць пачаў - параніў жанчыну. І я зноў яго ўдарыў.
- А з чаго ўсё пачалося?
- Я не вельмі далікатна з ім гаварыў.
- Давай у машыну.
- Добра, - сказаў Кейсі і залез на задняе месца.
Двое з прыезджых памаглі палісмену падняцца з зямлі. Ён асцярожна пакратаў пальцамі шыю.
Кейсі сказаў:
- Там у палатцы жанчына крывёю сцякае ад яго меткай стральбы.
- Пазней зоймемся ёю. Джо, хто цябе ўдарыў - гэты?
Яшчэ не ачуняўшы як след, палісмен тупа ўтаропіўся на Кейсі.
- Нешта не пазнаю.
- Гэта быў я, што тут хавацца, - сказаў Кейсі. - Ты памыліўся - не на таго напаў.
Джо паволі пакруціў галавой:
- Не, па-мойму, гэта быў не ты. Ай, божа мой, як мне млосна!
Кейсі сказаў:
- Са мной усё ясна. Вы лепш ідзіце паглядзіце, што з той жанчынай.
- А дзе яна?
- У той вунь палатцы.
Старшы з памагатых шэрыфа з вінтоўкай у руцэ пакрочыў да палаткі. Падышоўшы, нешта сказаў праз брызент і ўвайшоў. Неўзабаве ён выйшаў, вярнуўся да машыны і з налётам гордасці сказаў:
- Во, чорт, што можа нарабіць сорак пяты калібр! Ёй жгут наклалі. Мы доктара прышлём.
Двое палісменаў селі па баках Кейсі. Старшы націснуў на ражок сірэны. Лагер нібы вымер. Полкі палатак былі шчыльна захінутыя, людзі не паказваліся. Загуў матор, машына развярнулася і паехала з лагера. Кейсі сядзеў між канваірамі, высока ўзняўшы галаву на сваёй жылістай шыі. На губах у яго застыла слабая ўсмешка, на твары быў нейкі дзіўны трыумфальны выраз.
Калі палісмены паехалі з лагера, людзі павыходзілі з палатак. Сонца зайшло, і на лагер апусцілася сіняватае вячэрняе сутонне. Горы на ўсходзе яшчэ жаўцелі ў сонечных промнях. Жанчыны вярнуліся да сваіх патухлых вогнішчаў. Мужчыны зноў сабраліся купкамі і, седзячы на кукішках, ціха загаварылі.
Эл вылез з-пад брызентавага навеса і пашыбаваў да вербняку - свіснуць Тому. Маці таксама выйшла і зноў узялася распальваць вогнішча з голля.
- Бацька, - сказала яна, - я вам многа не дам. Сёння мы позна снедалі.
Бацька і дзядзька Джон, не адыходзячы ад палаткі, назіралі, як маці абірае бульбу і наразае яе тонкімі скрылікамі над патэльняй, густа змазанай топленым салам. Бацька сказаў:
- Чаго гэта прапаведнік так зрабіў?
Руці і Ўінфілд падкраліся зусім блізка да іх і прыпалі да зямлі, каб паслухаць, пра што яны гавораць.
Дзядзька Джон праводзіў у зямлі глыбокія барозны доўгім іржавым цвіком.
- Ён разумее, што такое грэх. Я пытаўся ў яго пра гэта, і ён мне ўсё растлумачыў. Толькі не ведаю, ці мае ён рацыю. Кажа: чалавек грашыць, калі думае, што ён саграшыў. - Вочы ў дзядзькі Джона былі поўныя стомы і тугі. - Я заўсёды ад усіх таіўся. Я такое рабіў, пра што нікому не расказваў.
Маці падняла галаву ад вогнішча і павярнулася да яго:
- І не расказвай, Джон. Раскажы ўсё богу. Не ўзвальвай цяжар сваіх грахоў на чужыя плечы. Гэта несумленна.
- Яны мне душу вярэдзяць, - сказаў Джон.
- Усё роўна другім не расказвай. Пайдзі на рэчку, акуні галаву ў ваду і шэптам скажы ўсё плыні.
Бацька паволі ківаў галавой у такт словам маці.
- Яна правільна кажа, - прамовіў ён. - Табе, канешне, палягчэе, калі падзелішся з іншымі, але тады грэх твой пойдзе кругамі.
Дзядзька Джон паглядзеў на пазалочаныя сонцам горы, і золата іх адбілася ў яго ў вачах.
- Я стараюся адолець сябе, - сказаў ён, - і не магу. Усё нутро выядае.
Ззаду яго Ружа Сарона, млявая, выйшла з палаткі.
- Дзе ж гэта Коні? - з раздражненнем запыталася яна. - Нешта даўно яго не бачу. Дзе ён прапаў?
- Ён мне на вочы не пападаўся, - адказала маці. - Убачу, пашлю да цябе.
- Мне нездаровіцца, - сказала Ружа Сарона, - а ён пакінуў мяне адну.
Маці паглядзела на апухлы твар дачкі.
- Ты плакала, - сказала яна.
Слёзы зноў нагарнуліся на вочы Ружы Сарона.
Маці рашуча сказала:
- Вазьмі сябе ў рукі. Ты не адна - нас многа. Вазьмі сябе ў рукі. Ідзі сюды абяры бульбу. Няма чаго шкадаваць сябе.
Ружа Сарона адступіла назад пад брызент. Яна старалася ўнікнуць строгага погляду матчыных вачэй, але ён прымусіў яе пабрысці да вогнішча.
- А чаго ён пайшоў? - сказала яна, але слёз ужо не было.
- Вазьміся за справу. А то сядзіш адна ў палатцы і шкадуеш сама сябе. Мне не было калі ўзяцца за цябе. Цяпер ужо вазьмуся. Вось табе нож і бярыся за бульбу.
Ружа Сарона паслухмяна апусцілася на калені каля вогнішча. Са злосцю сказала:
- Няхай толькі прыйдзе. Я яму ўжо задам.
Губы ў маці расцягнуліся ва ўсмешцы:
- Ён і набіць цябе можа. Сама на гэта напрошваешся - ныеш, песцішся. Калі ён і ўваб'е ў цябе крыху розуму, я толькі дзякуй яму скажу.
Вочы ў Ружы Сарона ўспыхнулі абурэннем, але яна змоўчала.
Дзядзька Джон сваім шырокім вялікім пальцам загнаў іржавы цвік глыбока ў зямлю.
- Я мушу ўсё расказаць, - прагаварыў ён.
Бацька сказаў:
- Ну і расказвай, каб цябе чэрці! Каго ты забіў?
Дзядзька Джон запусціў палец у кішэньку для гадзінніка на сваіх сініх джынсах і вывудзіў адтуль перагнутую папалам зашмальцаваную грашовую паперку. Расправіў яе і паказаў бацьку:
- Пяць даляраў.
- Украў? - запытаўся бацька.
- Не, яны мае. Утаіў.
- Яны ж твае, дык што?
- А тое, што я не меў права іх утойваць.
- Я тут нешта ніякага грэху не бачу, - умяшалася маці. - Яны ж твае.
Дзядзька Джон паволі загаварыў:
- Не ў тым справа, што я іх утаіў. Я ўтаіў іх, каб напіцца. Я ведаў, што прыйдзе час, калі мяне пацягне выпіць, так засмыліць нутро, што адно выйсце - напіцца. Думаў, яшчэ не пара, а тут... прапаведнік узяў і аддаўся паліцыі, каб выратаваць Тома.
Бацька зноў паківаў галавой, потым нахіліў яе набок, каб лепш чуць. Руці падабралася на локцях яшчэ бліжэй, паўзком, як шчаня, Уінфілд - за ёю. Ружа Сарона кончыкам нажа выкалупнула глыбокае вочка з бульбіны. Вячэрняе сутонне згусцілася і стала яшчэ сінейшым.
Маці рэзка, суха сказала:
- Не разумею, чаму гэта табе абавязкова трэба напівацца праз тое, што прапаведнік выручыў Тома.
Джон сумна адказаў:
- Сам не ўцямлю. Вельмі ўжо цяжка на душы. Ён так проста на гэта пайшоў. Ступіў наперад і кажа: «Гэта я зрабіў». І яго забралі і павезлі. А я пайду нап'юся.
Бацька ўсё пакручваў галавой:
- Ну навошта ўсё гэта гаварыць. На тваім месцы я проста пайшоў бы і напіўся, калі так ужо табе закарцела.
- Я даўно ўжо мог бы зняць грэх з душы, - тужліва сказаў дзядзька Джон. - Але ўпусціў выпадак. Не ўхапіўся за яго... прамаргаў. Паслухай! У цябе ёсць грошы, дай мне два даляры.
Бацька без ахвоты палез у кішэню і выцягнуў скураны мяшэчак.
- Каб напіцца, сямі даляраў мнагавата. Ты што, шампанскую вадзіцу жлукціць будзеш?
Дзядзька Джон падаў яму сваю пяцідаляравую паперку.
- Вось вазьмі, а мне два даляры дай. Я і з двух сп'янею. Не хачу браць яшчэ адзін грэх на душу - марнатраўства. Што ёсць, тое і патрачу. Заўсёды так раблю.
Бацька ўзяў брудную паперку і даў яму два сярэбраныя даляры.
- На, бяры. Раз чалавеку трэба, значыць, трэба. Ні ў кога няма столькі розуму, каб вучыць другога.
Дзядзька Джон узяў абедзве манеты.
- Ты не зазлуеш? Ты разумееш, што мне гэта трэба?
- Ну што ты, далібог, - сказаў бацька. - Ты сам ведаеш, што табе трэба рабіць.
- Іначай я ніяк не перабуду ночы, - сказаў дзядзька Джон і павярнуўся да маці. - Ты не пакрыўдзішся на мяне?
Маці не падняла галавы.
- Не, - мякка адказала яна. - Не. Ідзі ж.
Дзядзька Джон падняўся на ногі і як сам не свой пайшоў ад палаткі і знік у прыцемку. Ён падняўся на шашу і перайшоў яе каля бакалейнай крамы. Перад сеткаватымі дзвярамі ён зняў з галавы капялюш, шпурнуў яго ў пыл і прытаптаў абцасам у знак самаасуджэння. Так і пакінуўшы скамечаны, брудны капялюш на зямлі, ён увайшоў у краму і адразу пакіраваў да паліц, на якіх за драцяной сеткай стаялі бутэлькі віскі.
Бацька, маці і дзеці глядзелі ўслед дзядзьку Джону, пакуль ён не знік з вачэй. Ружа Сарона ў знак абурэння не падымала вачэй ад бульбы.
- Небарака Джон, - сказала маці. - Можа, лепш было... ды не... думаю, што не. Ніколі не бачыла, каб чалавек так гараваў.
Руці перавалілася на бок, бліжэй да Ўінфілда, прыцягнула яго да сябе за вуха і прашаптала:
- Я зараз буду п'яная.
Уінфілд пырхнуў і заціснуў рот далонню. Стрымліваючы дыханне, каб не рагатнуць, дзеці хуценька адпаўзлі з пабарвавелымі ад натугі тварамі. Апынуўшыся за палаткай, яны ўскочылі і з віскам пусціліся да вербаў. Схаваўшыся там, яны зайшліся ад смеху. Руці скасіла вочы, расслабіла цела, высунула язык і пачала пахаджаць, пахістваючыся з боку на бок і аступаючыся.
- Я п'яная, - сказала яна.
- Глядзі! - закрычаў Уінфілд. - Глядзі на мяне, я дзядзька Джон! - Ён замахаў рукамі, надзьмуў шчокі і вярцеўся ваўчком, пакуль у яго не закружылася галава.
- Не, - сказала Руці. - Вось як трэба. Вось як. Я - дзядзька Джон. Я зусім сп'янела.
Эл з Томам ціха ішлі праз вербалоз у лагер і раптам убачылі дзяцей, якія, віхляючыся, насіліся сярод кустоў як апантаныя. У згусцелым змроку Том, спыніўшыся, пачаў узірацца.
- Ці не Руці гэта з Уінфілдам? Што з імі такое?
Браты падышлі бліжэй.
- Вы што, адурэлі? - здзіўлена запытаўся Том.
Дзеці спыніліся, захопленыя знянацку.
- Мы... гуляем, - адказала Руці.
- Нейкая дурная гульня, - прабурчаў Эл.
Руці дзёрзка выпаліла:
- Не дурнейшая за што іншае.
Калі браты пайшлі далей, Эл сказаў Тому:
- Руці заробіць у мяне на арэхі. Яна даўно ўжо дабіваецца. Самая пара ёй усыпаць.
У яго за спінай Руці зрабіла грымасу, расцягнула рот пальцамі, высунула ўслед Элу слінявы язык, здзекуючыся з яго ўсімі вядомымі ёй спосабамі, але Эл не азіраўся. Яна павярнулася да Ўінфілда, позіркам запрашаючы зноў распачаць гульню, толькі ўсё ўжо было сапсавана, і яны абое ведалі гэта.
- Давай пойдзем на рэчку і акунёмся з галавой, - прапанаваў Уінфілд, і дзеці пайшлі праз кустоўе да берага, моцна злуючы на Эла.
А браты не спяшаючыся ішлі далей у змроку. Том сказаў:
- Дарэмна Кейсі так зрабіў. Але ад яго можна было гэтага чакаць. Усё гаварыў, што ад яго нам ніякай карысці. Дзіўны ён нейкі, Эл. Адно толькі думае і думае.
- Гэта таму, што ён прапаведнік. У іх ва ўсіх гармідар у галаве.
- Як ты думаеш, куды Коні пайшоў?
- Відаць, да ветру.
- Нешта вельмі далёка падаўся.
Эл з Томам ішлі па лагеры, трымаючыся бліжэй да палатак. Каля Флойдавай палаткі іх спыніў нягучны воклік. Яны павярнулі да ўвахода ў яе і прыселі на кукішкі. Флойд крыху падняў брызентавую полку.
- Ну як, едзеце?
Том адказаў:
- Не ведаю. Думаеш, лепш паехаць?
Флойд кісла ўсміхнуўся:
- Ты ж чуў, што гэты фараон сказаў. Не паедзеш - выпаляць агнём. Калі думаеш, што гэты малойчык хутка не з'явіцца сюды пасля мардабою, дык галава ў цябе проста качан. Яго грамілы сёння ж ноччу наляцяць на лагер і ўсё пусцяць з агнём.
- І сапраўды, відаць, лепш выбірацца адсюль, - пагадзіўся Том. - Сам куды едзеш?
- Як і казаў - на поўнач.
- Паслухай, - сказаў Эл, - тут мне адзін расказваў пра нейкі ўрадавы лагер. Дзе гэта?
- Напэўна, перапоўнены.
- А ўсё ж дзе ён?
- Кіруйце па дзевяноста дзевятай на поўдзень. Міль дванаццаць - чатырнаццаць праедзеце, звернеце на ўсход да Ўідпэтча. А там ужо рукой падаць. Але, думаю, там паўным-поўна.
- Ён казаў, лагер добры.
- Вельмі добры, нічога не скажаш. Абыходзяцца з табой як з чалавекам, а не як з сабакам. І фараонаў там няма. Толькі перапоўнены.
- Я аднаго не зразумею, - сказаў Том, - чаго палісмен гэты так разышоўся? Ён быццам спецыяльна лез у сварку, знарок распаляў людзей.
Флойд сказаў:
- Не ведаю, як тут, а на поўначы я неяк раз пагаварыў з адным з гэтых шэрыфскіх памагатых, чалавекам прыстойным. І ён прызнаўся мне, што ім абавязкова трэба арыштоўваць людзей. На кожнага арыштанта шэрыф атрымлівае семдзесят пяць цэнтаў у дзень, а на іх пракорм у яго ідзе толькі дваццаць пяць. Няма арыштантаў - няма і прыбытку. І яшчэ ён казаў, што ўжо цэлы тыдзень нікога не браў, і шэрыф сказаў яму: або прыводзь арыштантаў, або значок здымай. А сённяшні так і стараўся каго-небудзь згрэбці.
- Трэба ехаць, - сказаў Том. - Будзь здароў, Флойд.
- Будзь здароў. Можа, яшчэ стрэнемся. Спадзяюся, што так.
- Бывай, - сказаў Эл, і браты пайшлі па цёмна-шэрым лагеры да Джоўдавай палаткі.
Бульба на патэльні шыпела і пырскала гарачым тукам. Маці пераварочвала тоўстыя скрылікі лыжкай. Бацька сядзеў каля вогнішча, абхапіўшы калені рукамі. Ружа Сарона была пад брызентам.
- Том ідзе! - усклікнула маці. - Дзякуй богу!
Падышоўшы, Том сказаў:
- Трэба адсюль выбірацца.
- А што здарылася?
- Флойд кажа, ноччу лагер спаляць.
- Гэта яшчэ чаму? - здзівіўся бацька. - Мы ж нічога такога не зрабілі.
- Нічога такога, толькі фараона збілі, - адказаў Том.
- Мы яго не білі.
- Ён сам гразіўся, што нас пагоняць адсюль.
- Вы Коні нідзе не сустрэлі? - запыталася Ружа Сарона, выйшаўшы з палаткі.
- Сустрэлі, - адказаў Эл. - Ён пашыбаваў берагам рэчкі, толькі яго і бачылі. На ўсход кіруе.
- Ён... ён зусім пайшоў?
- Мы ў яго не пыталіся.
Маці павярнулася да дачкі:
- Ты, Разашарна, раскажы ўсё толкам, а то цябе не зразумееш. Гаварыў табе Коні што-небудзь?
Ружа Сарона насупілася:
- Гаварыў, што лепей было б яму дома застацца і на трактарыста вучыцца.
Усе прыціхлі. Ружа Сарона пазірала на агонь, і вочы яе паблісквалі ў святле вогнішча. Бульба на патэльні гучна шыпела. Ружа Сарона шмыгнула носам і ўцерлася тыльным бокам далоні.
Бацька сказаў:
- Коні чалавек нікчэмны. Я ўжо даўно гэта зразумеў. Занадта высока бярэ, а кішка тонкая.
Ружа Сарона паднялася і вярнулася ў палатку. Лягла на матрац, перавярнулася на жывот і ўткнулася тварам у сплеценыя рукі.
- Яго і даганяць, бадай, не варта, - сказаў Эл.
Бацька сказаў:
- Не, калі ён такі нікчэмнік, нам яго не трэба.
Маці зазірнула ў палатку, дзе ляжала Ружа Сарона. Сказала бацьку:
- Ш-ш!.. Навошта так гаворыш.
- Але ж ён нікчэмнік, - не сунімаўся той. - Толькі і чулі ад яго - я тое зраблю, я гэтае. А сам лайдачыў. Пры ім не хацеў гаварыць. А цяпер, калі ён даў драла...
- Ш-ш!.. - прашаптала маці.
- Што ты мне ўсё «ш-ш» ды «ш-ш»? Чаму я павінен маўчаць? Ён уцёк, ці ж не так?
Маці памяшала бульбу лыжкай, тук зашыпеў і пырснуў ва ўсе бакі. Яна падкінула голля ў агонь, языкі полымя шуганулі ўгору і асвятлілі палатку. Маці сказала:
- У Разашарны народзіцца дзіця, і яно напалову яе, а напалову Коні. Нядобра з маленства і да сталасці абзываць пры ім яго бацьку нікчэмнікам.
- Лепш, чым ілгаць, - буркнуў бацька.
- Не, не лепш, - запярэчыла маці. - А калі б ён памёр? Ці стаў бы ты гаварыць пра яго дрэнна, пра мёртвага?
У спрэчку ўмяшаўся Том:
- Ды што гэта вы! Адкуль мы ведаем, зусім ён пайшоў ад нас ці не? У нас часу няма размовамі займацца. Трэба паесці і выпраўляцца ў дарогу.
- У дарогу? Мы ж толькі што прыехалі! - Маці стала ўзірацца ў Тома скрозь разрэджаную вогнішчам цемру.
Той пачаў яе пераконваць:
- Лагер сёння ноччу падпаляць, ма. Ты ж ведаеш, я спакойна стаяць і глядзець не буду, як пачнуць паліць наша дабро, і бацька таксама, і дзядзька Джон. Палезем з кулакамі, а мне нельга пападацца ім у рукі і даць ім завесці на мяне новую справу. Я і сёння б уліп, каб не прапаведнік.
Маці ўсё пераварочвала і пераварочвала бульбу ў гарачым туку. Нарэшце прыняла рашэнне.
- Усе ідзіце сюды! - паклікала яна. - Будзем вячэраць. Трэба спяшацца. - Яна расставіла на зямлі алавяныя талеркі.
Бацька сказаў:
- Як быць з Джонам?
- А дзе дзядзька Джон? - запытаўся Том.
- Пайшоў выпіць.
- Госпадзі! - усклікнуў Том. - Выбраў час. Дзе яго шукаць?
- Не ведаю, - адказаў бацька.
Том падняўся з зямлі.
- Добра, - сказаў ён, - вы тут паешце і пагрузіце ўсё на машыну, а я пайду шукаць дзядзьку Джона. Ён, напэўна, у бакалейнай краме, што цераз дарогу.
Том шпарка пакрочыў да шашы. Перад палаткамі і халупкамі гарэлі невялікія вогнішчы, і водбліскі іх падалі на твары мужчын і жанчын у падранай адзежы, на дзяцей, што прыпалі да агню. Праз сценкі некаторых палатак прасвечвала святло газавых лямпаў, і па брызенце варушыліся чалавечыя цені.
Том выйшаў па пыльнай грунтавой дарозе да бетоннай шашы і перайшоў яе каля бакалейнай крамкі. Ён спыніўся перад сеткаватымі дзвярамі і зазірнуў усярэдзіну. Бакалейшчык, маленькі сівы чалавек з вадзяністымі вачамі і калматымі вусамі, чытаў газету, абапершыся локцямі на прылавак. На ім была падкасаная на худых руках кашуля і доўгі белы фартух. За спінай у яго ўзвышаліся горкі, піраміды і сценкі з кансерваваных прадуктаў. Калі Том увайшоў у краму, гаспадар адарваў галаву ад газеты і прыплюшчыў вочы, быццам цэлячыся з ружжа.
- Добры вечар, - сказаў ён. - Што-небудзь у вас выйшла, скончылася?
- Выйшаў мой дзядзька, - адказаў Том. - Выйшаў і як скончыўся.
Сівы гаспадар паглядзеў на яго з неўразуменнем і трывогай, дакрануўся ўказальным пальцам да кончыка носа і лёгенька пацерабіў яго, каб прагнаць сверб.
- Вечна вы каго-небудзь губляеце, - сказаў ён. - Дзесяць разоў на дні, а то і больш, заходзяць, і толькі і чуеш: «Калі ўбачыце чалавека - зваць яго так вось і так, на выгляд такі і такі, скажыце яму, калі ласка, што мы на поўнач паехалі». І гэта з дня ў дзень.
Том засмяяўся:
- Ну дык вось, калі ўбачыце сапляка па імені Коні, з выгляду накшталт каёта, скажыце, каб ішоў к чорту. Скажыце, што мы падаліся на поўдзень. Толькі не яго я шукаю. А вось ці не заходзіў да вас сюды выпіць віскі чалавек гадоў пад шэсцьдзесят, штаны чорныя, валасы з сівізной?
Вочы бакалейшчыка пасвятлелі:
- Так, так, заходзіў. У жыцці я нічога падобнага не бачыў. Падышоў да дзвярэй, шпурнуў капялюш на зямлю і наступіў на яго. Вось ён, капялюш, - у мяне. - Бакалейшчык дастаў з-пад прылаўка запылены, памяты капялюш.
Том узяў яго ў рукі.
- Так і ёсць, ён самы.
- Ну вось, купіў ён дзве пінты віскі і, ні слова мне не кажучы, выцягнуў корак з адной бутэлькі і тут жа перакуліў яе ў горла. А я прадаю толькі на вынас. Кажу яму: «Слухай, чалавеча, тут піць нельга. Выйдзі за дзверы». Так, так, сэр! Ён ступіў за парог і, даю галаву на адсячэнне, за чатыры разы выжлукціў усю пінту. Потым адкінуў пустую пляшку і прысланіўся да дзвярэй. Вочы ў яго зрабіліся цьмяныя. Тады кажа: «Дзякуй вам, сэр» і пайшоў сваёй дарогай.
- Сваёй дарогай? А куды? Мне яго абавязкова трэба знайсці.
- Ну, так атрымалася, што я магу сказаць. Мне яшчэ ніколі не даводзілася бачыць, каб так пілі, і я за ім пасачыў. Ён пакіраваў вунь туды, на поўнач. Па шашы праехала машына і асвятліла яго фарамі. Я бачыў, як ён спусціўся па насыпе. Ідзе, ногі падгінаюцца. А другая пляшка ў яго ўжо адкаркаваная. Ён недзе тут, недалёка, куды яму такому ісці?
Том сказаў:
- Дзякуй. Пайду пашукаю.
- А капялюш возьмеш?
- Ага, ага! Ён яму яшчэ згадзіцца. Ну, дзякуй.
- А што з ім такое? Ён піў без смаку.
- Ды так... часам на яго находзіць. Ну, добрай ночы. А калі ўбачыце гэтага шчанюка Коні, скажыце яму: мы паехалі на поўдзень.
- Мне ўжо столькі ўсялякіх прыкмет нагаварылі і панадавалі даручэнняў, усяго не запомніш.
- А вы не дужа старайцеся, - сказаў Том і выйшаў з крамы, трымаючы ў руцэ запылены чорны капялюш дзядзькі Джона. Ён перасек шашу і пайшоў па абочыне. Унізе, у лагчыне, ляжаў Гувервіль; мігацелі агеньчыкі вогнішчаў, скрозь брызент палатак прабівалася святло ліхтароў. Недзе ў лагеры брынкала гітара, запаволеныя акорды бязладна змянялі адзін аднаго - відаць, гітарыст практыкаваўся. Том спыніўся, прыслухаўся, потым няспешна пайшоў далей па абочыне. Праз чвэрць мілі ён раптам пачуў тое, што яму было трэба. Унізе, пад дарожным насыпам, хрыплы голас напяваў нешта нудна, без выразнага матыву. Том схіліў галаву набок, каб лепш чуць.
- «Аддаў Ісусу сэрца, ён мне прытулак даў. Аддаў Ісусу душу, ён да сябе ўзяў». - А далей пачулася няяснае мармытанне, потым усё сціхла. Том збег па насыпе, кіруючыся на гэты голас. Праз некалькі крокаў спыніўся і зноў прыслухаўся. Цяпер голас быў зусім блізка, ён спяваў, як і раней, цягуча, манатонна: - «Той ноччу ўжо пры смерці Мэгі мне адкрыла сэрца і дала свае мне споднікі чырвоныя з фланелі. Пузыры яны ўжо на каленях мелі...»
Том асцярожна пайшоў наперад. На зямлі ён разгледзеў цёмную постаць, падкраўся да яе і сеў побач. Дзядзька Джон перакуліў бутэльку, і віскі з булькатам палілося з рыльца ў рот.
Том спакойна сказаў:
- Стой. А мне?
Дзядзька Джон павярнуўся да яго:
- Ты хто такі?
- Забыўся? Ты ўжо чатыры разы глынуў, а я толькі разок.
- Не, Том. Ты дурня з мяне не строй. Я тут адзін сядзеў. Цябе не было.
- Але ж цяпер я тут. Можа, усё ж дасі пацягнуць?
Джон зноў паднёс бутэльку да рота, віскі зноў забулькала. Потым ён патрос бутэльку. Яна была пустая.
- Усё, - сказаў ён. - Так хочацца памерці. Страшэнна хочацца памерці. Паціху памерці. Так трэба. Як бы заснуць. Паціху памерці. Я вельмі стаміўся. Я стаміўся. Заснуць і не прачнуцца. - Ён замурлыкаў: - «На мне карона будзе... карона залатая».
Том сказаў:
- Слухай, дзядзька Джон. Мы едзем далей. Пойдзем са мной, ляжаш на паклажу і паспіш.
Джон пакруціў галавой:
- Не. Ідзі. Я не паеду. Адпачну тут. Што толку вяртацца? Якая з мяне карысць? Валачу за сабой грахі, як брудныя споднікі сярод добрых людзей. Не, не паеду.
- Хадзем. Без цябе мы не паедзем.
- Едзьце самі. Які з мяне толк? Ніякага. Валачу толькі свае грахі з сабою, пэцкаю другіх.
- Ты не большы грэшнік, чым усе іншыя.
Джон схіліў да яго галаву і хітравата падміргнуў. Том ледзь распазнаваў яго твар пры святле зорак.
- Маіх грахоў ніхто не ведае, ніхто, акрамя госпада бога. Вось ён ведае.
Том апусціўся на калені, памацаў у дзядзькі Джона лоб - гарачы, сухі. Джон нехлямяжа адштурхнуў яго руку.
- Хадзем, - угаворваў Том. - Ну хадзем, дзядзька Джон.
- Я з вамі не паеду. Стаміўся, і ўсё. Я адпачну. Вось тут.
Том падсунуўся да яго шчыльна. Ён паднёс кулак да дзядзькавага падбародка, прымерыўся, двойчы замахнуўся для пэўнасці і нарэшце, адвёўшы плячо назад, нанёс удар - нямоцны, але дакладны. Падбародак у Джона задраўся ўгору, і дзядзька паваліўся на спіну. Ён хацеў быў прыўзняцца, але Том, стоячы на каленях, нахіліўся над ім і, калі Джон абапёрся на локаць, ударыў яшчэ раз. Дзядзька Джон заціх.
Том устаў, падняў абмяклае цела і ўзваліў, як мех, сабе на плечы. Ён ішоў, хістаючыся пад гэтым мяккім цяжарам. Рукі дзядзькі Джона матляліся з боку ў бок і ляпалі Тома па спіне, ён часта дыхаў, марудна падымаючыся па насыпе. Праехала машына і асвятліла фарамі яго і груз, які ён нёс на плячах, на міг збавіла скорасць і потым, равучы, памчалася прэч.
Том ледзь пераводзіў дух, калі ішоў да Гувервіля па грунтавой дарозе туды, дзе стаяў грузавік Джоўдаў. Джон пачаў ачуньваць і слаба вырывацца з рук Тома. Той асцярожна апусціў яго на зямлю каля машыны.
Да яго вяртання стаянка Джоўдаў была ўжо разабраная. Эл падаваў клункі на грузавік. Брызент ляжаў побач напагатове - потым ім накрыюць паклажу.
Эл сказаў:
- Хутка ж ён набраўся.
Том прабачлівым тонам сказаў:
- Давялося лёгенька стукнуць яго, небараку, а то не хацеў ісці.
- Не нарабіў яму шкоды? - захвалявалася маці.
- Думаю, не. Вось ужо ачуньвае.
Дзядзьку Джона пачало нудзіць. Яго некалькі разоў званітавала.
Маці сказала:
- Твая бульба там у талерцы, Том.
Том хмыкнуў:
- Нешта не хочацца.
Бацька крыкнуў:
- Ну ўсё! Эл, прывязвай брызент!
Грузавік стаяў, гатовы да ад'езду. Дзядзька Джон заснуў. Том з Элам паднялі яго і ўзвалілі на самы верх. Схаваўшыся за грузавік, Уінфілд прытварыўся, што яго ванітуе, а Руці, стоячы побач, заціснула рот далонню, каб не віскнуць ад смеху.
- Гатова, - сказаў бацька.
Том запытаўся:
- Дзе Разашарна?
- Вунь яна, - адказала маці. - Ідзі сюды, Разашарна. Зараз паедзем.
Але тая сядзела моўчкі, апусціўшы галаву на грудзі. Том падышоў да сястры.
- Пойдзем, - сказаў ён.
- Я не паеду. - Ружа Сарона падняла галаву.
- Але ж трэба.
- Я хачу разам з Коні.
На дарогу, што вяла з лагера да шашы, выехалі тры машыны - старыя машыны, набітыя людзьмі і ўсялякім скарбам. Яны з бразгатам пакіравалі да шашы, асвятляючы цьмянымі фарамі дарогу.
Том сказаў:
- Коні нас знойдзе. Я папрасіў у краме, каб яму сказалі, куды мы паехалі. Ён нас знойдзе.
Маці падышла і стала побач з ім.
- Хадзем, Разашарна. Хадзем, дачушка, - мякка сказала яна.
- Я пачакаю яго.
- Чакаць нам няма часу. - Маці нахілілася, узяла дачку пад локаць і памагла ёй падняцца.
- Ён нас знойдзе, - паўтарыў Том. - Ты не хвалюйся. Коні знойдзе нас. - Ён разам з маці павялі Ружу Сарона пад рукі.
- Магчыма, ён кніжкі пайшоў купляць, - выказала меркаванне Ружа Сарона. - Можа, захацеў сюрпрыз нам зрабіць.
- Можа, і так, - сказала маці.
Ружу Сарона падвялі да грузавіка, памаглі падняцца на самы верх, і, забраўшыся пад брызент, яна нырнула там у цёмны куток.
Барадаты чалавек з крытай травой халупкі нясмела падышоў да машыны. Ён моўчкі таптаўся каля яе, сашчапіўшы рукі за спінай.
- У вас нічога такога не засталося, што магло б нам згадзіцца? - нарэшце запытаўся ён.
- Нават не ведаю, што вам сказаць. Не, пакідаць нам няма чаго.
- А вы хіба не едзеце? - пацікавіўся Том.
Барадач доўга пазіраў на яго.
- Не, - нарэшце вымавіў ён.
- Дык жа яны тут усё спаляць.
Вочы, у якіх мігцела нерашучасць, апусціліся долу.
- Ведаю. Такое ўжо з намі было.
- Дык якога ж ліха вы не едзеце?
Разгубленыя вочы адарваліся ад зямлі, потым зноў апусціліся, і ў іх на міг адлюстравалася чырвонае святло прыгаслага вогнішча.
- Што мне сказаць? Вельмі ўжо доўга збірацца.
- Калі спаляць, вы застаняцеся ні з чым.
- Яно так. У вас нічога такога не будзе, што нам можа згадзіцца?
- Не, усё з сабой забіраем, дарэшты, - адказаў бацька. Барадач нерашуча пабрыў да сваёй халупкі. - Што з ім такое?
- Фараоны розум з яго выбілі, - адказаў Том. - Мне тут адзін казаў - ён звіхнуўся. Яго моцна білі па галаве.
Яшчэ некалькі машын караванам выехалі з лагера, падняліся на шашу і рушылі наперад.
- Ну, та, давай паехалі. І вось што - ты і мы з Элам сядзем у кабіну. Ма няхай наверх забіраецца. Не, ты, ма, лепш садзіся паміж намі. Эл! - Том засунуў руку пад сядзенне і выцягнуў адтуль цяжкі гаечны ключ. - Эл, ты сядай ззаду. На, бяры. На ўсякі выпадак. Калі хто палезе - пачастуй яго не шкадуючы.
Том даў яму развадны ключ, Эл пералез цераз борт і сеў, падкурчыўшы пад сябе ногі і не выпускаючы ключа з рук. Том дастаў з-пад сядзення завадную ручку і паклаў побач з тармазной педаляй.
- Ну цяпер усё, - сказаў ён. - Садзіся, ма, пасярэдзіне.
Бацька сказаў:
- А я з пустымі рукамі.
- Калі што якое, возьмеш завадную ручку, - сказаў Том. - Дасць бог, не спатрэбіцца. - Ён націснуў на стартэр, махавік ляснуў, зрабіў абарот, матор затарахцеў і замёр, потым зноў запрацаваў. Том уключыў фары і выехаў з лагера на першай скорасці. Слабае святло фар нясмела абмацвала дарогу. Грузавік выбраўся на шашу і павярнуў на поўдзень. Том сказаў:
- У жыцці чалавека бывае так, што ён раптам азлабляецца...
Маці перапыніла яго:
- Том... ты ж мне сам казаў... ты абяцаў, што не дасі волі злосці. Ты ж абяцаў.
- Я не забыўся, ма. Стараюся. Але гэтыя шэрыфавы памагатыя... Бачыў хто-небудзь каго з іх, каб ён быў не таўстазады? Віхляюць тоўстымі азадкамі, смаляць з пісталетаў куды папала. Каб яны ўсё рабілі па закону, ма, што ж, мы б не супраціўляліся. Але ж тое, што яны ўчыняюць, незаконна. Яны стараюцца наш дух зламаць. Хочуць прымусіць нас поўзаць перад імі, скурчыўшыся, як пабітая сучка. Раздушыць нас хочуць. Далібог, ма, да таго дайшло, што ёсць адзін толькі спосаб застацца прыстойным чалавекам - добра ўляпіць катораму з гэтых фараонаў. Яны дамагаюцца таго, каб мы забыліся на сваю чалавечую годнасць.
Маці сказала:
- Ты абяцаў, Том. З нашым Красунчыкам Флойдам такое ўжо было. Я ведала яго маці. Яго ледзь не пакалечылі.
- Я стараюся стрымацца, ма, бог сведка. Ты ж не хацела б, каб я поўзаў перад імі брухам па зямлі, як пабітая сучка, га?
- Я малю бога за цябе. Стараніся іх, Том. Сям'я наша і так распадаецца. Абыходзь іх бокам, так трэба.
- Пастараюся, ма. Толькі цяжка мне будзе стрымацца, калі прычэпіцца які-небудзь таўстазады. Каб усё па закону, справа іншая. А паліць лагер - такога закону няма.
Машына ішла па шашы, падрыгваючы кузавам. Наперадзе ланцужок чырвоных ліхтароў перагарадзіў дарогу.
«Пэўна, аб'езд», - падумаў Том. Ён збавіў хуткасць і спыніўся, і ў тое ж імгненне машыну абкружыў натоўп людзей. Яны былі ўзброены хто кіркамі, хто драбавікамі. На іх былі каскі, на некаторых - фуражкі Амерыканскага легіёна. Адзін зазірнуў у кабіну, дыхнуўшы на Тома спіртным перагарам.
- Куды накіраваліся? - Чырвоны твар падсунуўся амаль да самага твару Тома.
Том замёр. Далонь яго слізганула пад ногі і намацала завадную ручку. Маці моцна сціснула яму локаць. Том сказаў:
- А вось... - і раптам у голасе яго пачуліся ўгодлівыя ноткі: - Мы не тутэйшыя. Нам сказалі, што можна на працу ўладкавацца ў акрузе - як яе... Туларэ.
- Дык ты ж, чарцяка, не ў той бок едзеш. Гораду нашаму ўсякія Окі не патрэбны.
Рукі і плечы ў Тома быццам скамянелі, па целе прабеглі дрыжыкі. Маці ўчапілася ў яго локаць. Нос машыны абступілі ўзброеныя людзі. Некаторыя з іх, строячы з сябе ваенных, былі ў фрэнчах з афіцэрскай партупеяй.
Том жаласна запытаўся:
- А ў які ж бок нам ехаць, містэр?
- Разварочвайся кругом і трымай на поўнач. А сюды не паказвайся да збору бавоўны.
Тома ўсяго скаланула.
- Ёсць, сэр, - сказаў ён, даў задні ход, развярнуўся і паехаў назад. Маці адпусціла яго локаць і лёгенька паляпала па руцэ. А Том ледзь стрымліваў слёзы.
- Не бяры да сэрца, - сказала маці. - Не бяры да сэрца.
Том высмаркаўся праз акенца і выцер вочы рукавом.
- Сволачы...
- Ты зрабіў усё правільна, - ласкава сказала маці. - Усё правільна зрабіў.
Том збочыў на палявую дарогу, праехаў ярдаў сто і выключыў матор і фары. Потым выйшаў з машыны з завадной ручкай.
- Куды ты? - занепакоілася маці.
- Пайду пагляджу. Мы на поўнач усё роўна не паедзем.
Чырвоныя ліхтары пасунуліся па шашы. Том бачыў, як яны мінулі паварот на палявую дарогу і рушылі далей. Неўзабаве з таго боку, дзе быў Гувервіль, пачуліся крыкі і лямант і ў неба шуганула яркае польмя. Яно падымалася ўсё вышэй і вышэй, і да слыху Тома данёсся сухі трэск. Ён вярнуўся да грузавіка, сеў за руль, развярнуў машыну і без агнёў праехаў па палявой дарозе назад да шашы. Там скіраваў на поўдзень і запаліў фары. Маці нясмела запыталася:
- Куды мы едзем, Том?
- На поўдзень. Мы не дазволім рознай поскудзі камандаваць намі. Не дазволім. Паспрабую аб'ехаць горад ускраінай.
- Ну, а далей куды? - Бацька загаварыў першы раз пасля выезду з лагера. - Вось што я хачу ведаць.
- Пашукаем гэты ўрадавы лагер, - адказаў Том. - Кажуць, там шэрыфавым памагатым вароты зачыненыя. Ма... мне трэба ад іх далей трымацца. Баюся, яшчэ заб'ю каго з іх.
- Супакойся, Том, - мякка прамовіла маці. - Супакойся, Томі. Адзін раз ты ўжо добранька зрабіў. Не дай бог, яшчэ раз так зробіш.
- Але ж так можна перастаць паважаць сябе.
- Астынь. Набярыся цярпення. Мы ж, Том... народ будзе жыць, калі ад гэтых людзей і следу не застанецца. Мы народ, Том, ён жыве. Нас не знішчыш. Мы народ - мы жывём і жывём.
- Нас увесь час б'юць.
- Яно так, - ціха засмяялася маці. - Можа, таму мы такія крэпкія. Багацеі пажывуць трохі і паміраюць, і дзеці ў іх нікудышныя, нежывучыя. А нас, Том, усё прыбывае і прыбывае. Не бядуй. Надыдзе і іншая часіна.
- Адкуль табе гэта вядома?
- Сама не ведаю адкуль.
Яны ўехалі ў горад. Том павярнуў на бакавую вуліцу, каб аб'ехаць цэнтр. Пры святле вулічных ліхтароў ён зірнуў на маці. Твар у яе быў спакойны, вочы глядзелі неяк па-новаму - быццам вечныя, непаддатныя часу вочы статуі. Том працягнуў правую руку і дакрануўся ёю да матчынага пляча. Ён не мог іначай. І адразу зноў узяўся за руль.
- Ніколі раней я не чуў, каб ты столькі гаварыла, - сказаў ён.
- Раней не было такой патрэбы, - адказала маці.
Том праехаў некалькі завулкаў і, калі горад застаўся ззаду, павярнуў машыну ў процілеглы бок. На скрыжаванні стаяў слуп з лічбай «99». Па гэтай шашы Том павёў грузавік на поўдзень.
- А ўсё ж на поўнач яны нас не завярнулі, - сказаў ён. - Куды нам трэба, туды і едзем, няхай нават і давялося падкурчыць дзеля гэтага хвост.
Цьмянае святло фар абмацвала чорную шашу перад машынай.
Людзі, што зняліся з месца ў пошуках прыстойнага жыцця, сталі цяпер вандроўнікамі. Перад сем'ямі, якія раней мелі невялікія ўчасткі зямлі, жылі і паміралі на сваіх сарака акрах, карміліся ці галадалі, беручы з гэтых акраў усё, што яны давалі, - перад гэтымі сем'ямі цяпер рассцілаўся ўвесь Захад. І яны шнарылі ўсюды, шукаючы працы; патокі людзей хлынулі на шашэйныя дарогі, уздоўж прыдарожных канаў бясконцай чарадой цягнуліся людзі. Следам ішлі іншыя. Няспынная людская плынь захліснула вялікія бетонныя дарогі. Раней на Сярэднім Захадзе і на Паўднёвым Захадзе жыў просты люд - земляробы, і яны зусім не перамяніліся з прыходам індустрыі, яны абраблялі зямлю без машын і не ведалі, якой грознай сілай рабілася машына ў руках прыватніка. Яны жылі, не знаёмыя з парадоксамі індустрыі. Яны не страцілі здольнасці востра адчуваць недарэчнасці індустрыяльнага веку.
І раптам машыны сагналі гэтых людзей з месца, і людзі павалілі на дарогі. Вандроўнае жыццё перамяніла іх; шашэйныя дарогі, прыдарожныя лагеры, страх перад голадам і сам голад іх перамянілі. Дзеці, якіх не было чым карміць, перамянілі іх, няспынны рух перамяніў іх. Яны былі вандроўнікі. І людская варожасць перамяніла іх, спаяла, з'яднала - тая варожасць, што прымусіла жыхароў маленькіх гарадкоў збірацца ў групы, брацца за зброю і сустракаць іх як захопнікаў - атрады, узброеныя ручкамі ад кірак, канторшчыкі і крамнікі, узброеныя стрэльбамі, ахоўвалі свой свет ад свайго ж народа.
На Захадзе ўзнялася паніка, калі вандроўнікі запаланілі дарогі. Уласнікі спалохаліся за сваю ўласнасць. Людзі, якія ніколі не галадалі, убачылі вочы галодных. Людзі, якія ніколі не ведалі моцных жаданняў, убачылі прагны бляск у вачах вандроўнікаў. І жыхары гарадкоў, жыхары ціхіх навакольных мясцін аб'ядналіся для самаабароны; яны пераканалі сябе, што самі яны добрыя грамадзяне, а захопнікі гэтыя - дрэнныя. Яны гаварылі: гэтыя праклятыя Окі - брудныя, цёмныя людзі. Яны дэгенераты, сексуальныя маньякі. Гэтыя праклятыя Окі - зладзеі. Яны крадуць усё, што трапіцца пад руку. У іх няма павагі да ўласнасці.
І апошняе адпавядала праўдзе, бо адкуль чалавеку немаёмнаму адчуваць сверб уласніцтва? А абараняючыся, людзі гаварылі: яны разносяць заразу, яны неахайныя. Дзяцей іх нельга пускаць у школы. Яны чужынцы. Ці хацелі б вы, каб сястра ваша гуляла з кім-небудзь такім?
Мясцовыя жыхары ўсімі сіламі распальвалі ў сабе жорсткасць. Яны фарміравалі атрады, часці і ўзбройвалі іх - дубінамі, стрэльбамі, газавымі бомбамі. Краіна належыць нам. Мы не дазволім усякім Окі выйсці з-пад улады. Але тыя, каму далі зброю, зямлёй не валодалі, а думалі, што валодаюць. І канторшчыкі, што хадзілі вечарамі на ваенную муштру, таксама нічога не мелі, а ў дробных крамнікаў былі толькі поўныя шуфляды даўгавых распісак. Але нават доўг - гэта ўжо нешта такое, і пісарства таксама не дробязь. Канторшчык думаў: я атрымліваю пятнаццаць даляраў на тыдзень. А што, калі які-небудзь пракляты Окі пойдзе на тую ж работу за дванаццаць? І дробны крамнік думаў: хіба магу я раўняцца з чалавекам, у якога няма даўгоў?
А вандроўнікі сцякаліся з усіх бакоў на вялікія дарогі, і ў вачах у іх быў голад, у вачах у іх былі іхнія патрэбы. Яны не валодалі логікай доказаў, не мелі сістэмнага плана дзеянняў, за імі не было нічога, акрамя іхняга мноства і іхніх патрэб. Калі дзе-небудзь паяўлялася работа беднаму чалавеку, за яе ваявалі дзесяць чалавек - ваявалі ў тым сэнсе, што збівалі плату за працу. Калі гэты намерыўся працаваць за трыццаць цэнтаў, дык я згодзен за дваццаць пяць.
Калі ён згодзен за дваццаць пяць, я пайду за дваццаць.
Не, вазьміце мяне, я галадаю. Я буду працаваць за пятнаццаць. Буду працаваць за харч. У мяне малыя дзеці. Вы паглядзелі б на іх! Цела ў іх пачало пакрывацца болькамі, яны не могуць бегаць. А дасі ім якога ападу, у іх успушваюцца жываты. Мяне бярыце, мяне. Я буду працаваць хоць за кавалак мяса.
І шмат каму гэта было на руку, бо аплата працы падала, а цэны заставаліся ранейшыя. Буйныя ўласнікі радаваліся і рассылалі яшчэ больш лісткоў, завабліваючы яшчэ больш людзей. І плата падае, а цэны ранейшыя. І ўжо недалёка той час, калі да нас вернецца рабства.
Неўзабаве буйныя ўласнікі і кампаніі вынайшлі новы спосаб. Буйны ўласнік набываў кансервавы завод. Калі выспявалі персікі і грушы, ён збіваў цану на фрукты ніжэй сабекошту. І, будучы гаспадаром кансервавага завода, браў сам у сябе фрукты па нізкай цане, а цану на кансервы ўзнімаў і на гэтым нажываўся. А дробныя фермеры, у якіх не было кансервавых заводаў, трацілі свае грошы, і фермы іх пераходзілі да буйных уласнікаў і да банкаў і кампаній, што таксама мелі кансервавыя заводы. З цягам часу дробных фермаў рабілася ўсё менш і менш. Дробныя фермеры перабіраліся ў гарады і хутка вычэрпвалі свае крэдыты і цярпенне сяброў сваіх і сваякоў. І тады яны таксама выязджалі на шашу. І ўсе дарогі былі забітыя людзьмі, што прагнулі працы і гатовыя былі пайсці дзеля яе нават на забойства.
А кампаніі і банкі рыхтавалі сабе пагібель, толькі не ведалі гэтага. На палях абапал дарог вырас добры ўраджай, а па дарогах ехалі галодныя людзі. Клеці былі поўныя, а дзеці беднякоў раслі рахітыкамі, і на целе ў іх высыпалі пелагрычныя прышчы. Буйныя кампаніі не ведалі, што мяжа між голадам і гневам вельмі тонкая. І грошы, якія маглі б пайсці на аплату працы, ішлі на газы, зброю для іх агентаў і шпегаў, на чорныя спісы, на муштру. Людзі, як мурашкі, распаўзаліся па дарогах у пошуках працы, хлеба. І гнеў пачаў брадзіць у душах людзей.
Было ўжо зусім позна, калі Том Джоўд збочыў на грунтавую дарогу, шукаючы лагер Уідпэтч. Агні трапляліся рэдка. Толькі зарыва, што палыхала ззаду на небе, паказвала, дзе быў Бейкерсфілд. Грузавік ішоў павольна, дробна трасучыся кузавам, перад яго коламі з дарогі ўцякалі кошкі, якія выйшлі на начное паляванне. Каля скрыжавання дарог стаяла купка белых драўляных дамкоў.
Маці спала, седзячы паміж Томам і бацькам, а той маўчаў усю дарогу, аддаўшыся сваім думкам.
Том сказаў:
- Дзе яго шукаць, не ведаю. Можа, пачакаем тут світання і спытаемся ў каго-небудзь з тутэйшых жыхароў? - Ён спыніў грузавік каля дарожнага знака, і ў гэты момант яшчэ адна машына пад'ехала да скрыжавання. Том высунуў галаву з кабіны:
- Гэй, містэр, можа, ведаеце, дзе тут вялікі лагер?
- Трымай прама.
Том пераехаў скрыжаванне і праз некалькі соцень ярдаў спыніўся. Наперадзе відаць былі высокая драцяная агароджа і шырокія вароты, да якіх вяла пад'язная дарога. За варотамі стаяў маленькі дамок з адным асветленым акном. Том павёў машыну да варот. Раптам грузавік падскочыў і з грукатам асеў на зямлю.
- Бог ты мой! - сказаў Том. - Я і не заўважыў, што тут нейкі насып.
Вартаўнік падняўся з ганка, падышоў да машыны і прыхінуўся да борта.
- Паспяшаўся, вось і стукнуўся, - сказаў ён. - Другі раз паберажэшся.
- А што гэта такое, скажы, калі ласка?
Вартаўнік засмяяўся:
- Тут дзеці цэлы дзень носяцца. Просім людзей ехаць цішэй, а яны забываюць. А як стукнецца хто разок, дык ужо павек не забудзе, што тут насып.
- А-а... вунь яно што. Спадзяюся, што абышлося без паломкі. А як тут у вас... месца нам знойдзецца?
- На адну палатку. Колькі вас?
Том пачаў лічыць па пальцах:
- Я, бацька, маці, Эл, Разашарна, дзядзька Джон і Руці з Уінфілдам. Апошнія двое - дзеці.
- Ну што ж, думаю, уладкуем вас. Палатка і ўсё астатняе ёсць?
- Ёсць брызент і матрацы.
Вартаўнік стаў на падножку.
- Кіруй па гэтым радзе да канца, а там - направа. Прыпішам вас да санітарнага блока нумар чатыры.
- А што гэта такое?
- Там туалеты, душавыя і пральня.
Маці запыталася:
- У вас пральня ёсць... і водаправод?
- А як жа.
- Слава табе, госпадзі! - вырвалася ў маці.
Том вёў грузавік у цемры паўз доўгі шэраг палатак. У санітарным блоку гарэў няяркі агонь.
- Сюды вось кіруй, - сказаў вартаўнік. - Месца добрае. Адсюль толькі што выехалі.
Том спыніў машыну.
- Тут?
- Ага. Цяпер няхай твае разгружаюцца, а ты ідзі са мной, я запішу вас. І кладзіцеся спаць. Раніцай да вас прыйдзе лагерная камісія і ўсё вам растлумачыць.
Том апусціў вочы долу.
- Фараоны? - запытаўся ён.
Вартаўнік засмяяўся:
- Палісменаў тут няма. У нас свая ахова. Людзі самі выбіраюць. Хадзем.
Эл саскочыў з грузавіка і падышоў да іх.
- Тут застаёмся?
- Застаёмся, - адказаў Том. - Вы з бацькам разгружайцеся, а я пайду ў кантору.
- Толькі цішэй, - папярэдзіў вартаўнік. - Шмат хто ўжо спіць.
Том пакрочыў услед за вартаўніком па цёмным лагеры і падняўся па прыступках у маленечкі пакойчык, дзе стаялі стары пісьмовы стол і крэсла. Вартаўнік сеў да стала і дастаў з шуфляды чысты бланк.
- Зваць як?
- Том Джоўд.
- Стары - гэта твой бацька?
- Ага.
- Як яго зваць?
- Таксама Том Джоўд.
Пытанні сыпаліся адно за адным. Адкуль прыехалі, колькі ўжо часу ў гэтым штаце, дзе працавалі. Вартаўнік падняў галаву і глянуў на Тома:
- Я не з цікаўнасці. У нас так заведзена.
- Зразумела, - сказаў Том.
- Ну, а грошы ёсць?
- Трохі ёсць.
- Можа, вы зусім без сродкаў?
- Не, трохі ёсць. А што?
- А тое, што стаянка каштуе даляр на тыдзень, але можна адпрацоўваць - вываз смецця, прыбіранне лагера... ну рознае такое.
- Мы адпрацуем.
- Заўтра да вас прыйдзе камісія. Раскажуць вам, як тут усім карыстацца, і растлумачаць правілы, якія тут у нас заведзены.
Том сказаў:
- Слухай, а што гэта такое? Што за камісія такая?
Вартаўнік адкінуўся на спінку крэсла:
- Яна добра працуе. У лагеры пяць санітарных аддзяленняў. З кожнага выбіраюць сваіх прадстаўнікоў у цэнтральную камісію. Яна тут усім распараджаецца. Яе слова - закон.
- А калі хто з іх вельмі крута загне?
- Ну што ж, адклікаць яго можна таксама лёгка, як і абраць. Ды не, усе добра працуюць. Нядаўна ў нас вось што было. Ведаеш гэтых прапаведнікаў з секты трасуноў? Ледзь дзе збярэцца народ, яны тут як тут - пропаведзі чытаюць і бляшанку па крузе пускаюць. Ну, наважыліся яны і сюды пранікнуць. Шмат хто са старэйшых захацеў іх паслухаць. Слова за цэнтральнай камісіяй. Склікалі сход і вырашылі так: «Прапаведаваць у лагеры дазваляецца ўсім. Збіраць ахвяраванні не дазваляецца нікому». Старыя нашы зажурыліся, бо з таго дня ніводзін прапаведнік тут больш носа не паказвае.
Том засмяяўся і спытаў:
- Значыць, тыя, што запраўляюць лагерам, тут і жывуць?
- Ну так. І гэта толькі на карысць справе.
- А яшчэ ты гаварыў пра палісменаў...
- Цэнтральная камісія сочыць, каб быў парадак, і ўводзіць правілы. А яшчэ ёсць жаночая камісія. Заўтра яны зойдуць да тваёй маці. Яны за дзецьмі наглядаюць і сочаць за чысцінёй у санітарных блоках. Калі маці твая куды-небудзь на працу не пойдзе, ёй даручаць дзяцей, чые бацькі ходзяць на працу, а калі яна сама дзе ўладкуецца, што ж, на яе месца знойдуцца іншыя. Жанчыны і шыццём займаюцца, тут да нас медыцынская сястра прыходзіць, вучыць іх. Заняткі ёсць розныя.
- Дык што, у вас зусім фараонаў няма?
- Няма, сэр. Без ордэра на арышт палісмен сюды не паткнецца.
- Ну, а калі хто наскандаліць ці нап'ецца і кулакі ў ход пусціць, што тады?
Вартаўнік праткнуў алоўкам прамакатку:
- Пасля першага разу цэнтральная камісія папярэджвае яго. Пасля другога яму даюць строгае папярэджанне. А пасля трэцяга - выганяюць з лагера.
- Госпадзі, проста не верыцца! Сёння пад ноч шэрыфскія памагатыя і гэтыя малойчыкі ў форменных фуражках цэлы лагер каля рэчкі спалілі.
- Да нас яны не ходзяць, - сказаў вартаўнік. - Іншы раз вечарам нашы хлопцы выстаўляюць дазоры ўздоўж агароджы, асабліва калі ў нас тут танцы вечарам у суботу.
- Кожную суботу танцы? Божачка літасцівы!
- Ва ўсёй акрузе лепшых вечарынак не бывае.
- Вось яно як! Чаму нідзе больш такіх лагераў няма?
Вартаўнік насупіўся:
- Давядзецца табе самому дадумацца. Ідзі паспі трохі.
- Добрай ночы, - сказаў Том. - Маці маёй тут вельмі спадабаецца. З ёю даўно ўжо па-чалавечы не абыходзіліся.
- Добрай ночы, - адказаў вартаўнік. - Кладзіся спаць. У нас тут рана ўстаюць.
Том ішоў па праходзе між двума радамі палатак. Вочы яго ўжо прывыклі бачыць пры святле зорак. Ён заўважыў, што рады палатак усе прамыя і што смецця каля іх няма. Зямля між імі падмецена і апырскана вадой. З палатак чулася роўнае храпенне. Увесь лагер спаў. Том ішоў не спяшаючыся. Ён падышоў да санітарнага блока нумар чатыры і з цікавасцю агледзеў яго: непафарбаваны будынак, нізенькі і груба скіданы, пад паветкай - некалькі радоў балеяў мыць бялізну. Непадалёк ён убачыў свой грузавік і ціхенька падышоў да яго. Брызент быў ужо нацягнуты, пад ім не чулася ні гуку. Падышоўшы бліжэй, ён убачыў, як з ценю, што падаў ад грузавіка, аддзялілася нечая постаць і пасунулася ў яго бок. Гэта была маці. Яна ціха запыталася:
- Гэта ты, Том?
- Я.
- Ш-ш!.. - прашаптала яна. - Усе спяць. Вельмі знясілелі.
- Табе таксама не шкодзіла б паспаць.
- Я цябе чакала. Усё добра?
- Парадак, - адказаў Том. - Але нічога расказваць не буду. Раніцай сама пра ўсё даведаешся. Табе тут падабаецца?
Маці зноў прашаптала:
- Кажуць, у іх тут гарачая вада ёсць.
- Ага, ёсць. А цяпер спаць кладзіся. Я ўжо не прыпомню, калі ты апошні раз спала.
Але маці дапытвалася:
- А што ты такое не хочаш мне расказаць?
- Ды нічога. Ідзі спаць.
І тут яна сказала тонам капрызнай дзяўчынкі:
- А як я засну, калі ўвесь час толькі і думаць буду, чаму ён расказваць не хоча.
- А ты не думай, - сказаў Том. - Раніцай, як устанеш, надзень свежую сукенку і... тады сама пра ўсё даведаешся.
- Не, я з такімі думкамі заснуць не змагу.
- А трэба. - Том весела хмыкнуў. - Трэба паспаць.
- Добрай ночы, - ціха прамовіла маці, прыгнулася і юркнула ў цемру пад брызент.
Том залез цераз задні борт на машыну. Ён лёг дагары на драўляную платформу і, падклаўшы сплеценыя рукі пад галаву, прыціснуў локці да вушэй. Ноч рабілася халаднейшай. Том зашпіліў пінжак на грудзях і зноў закінуў рукі за галаву. Над ім ззялі яркія, колкія зоркі.
Том прачнуўся яшчэ зацемна. Яго пабудзіла нягучнае бразганне. Ён прыслухаўся і зноў пачуў ціхі ляск жалеза аб жалеза. Ён расправіў зацёклыя рукі і ногі і зябка пакурчыўся. Лагер яшчэ спаў. Том прыўзняўся і стаў глядзець цераз борт грузавіка. Горы на ўсходзе былі сінявата-чорныя, але за імі, на вачах у яго, занялося кволае святло, кранула абрысы гор бледнай чырванню і, расцякаючыся па небе, рабілася ўсё халаднейшым, шарэла і меркла, пакуль зусім не злілося з непрагляднай ноччу над заходнім гарызонтам. А ўнізе, у даліне, зямлю завалакло лілаватае перадсвітальнае сутонне. Зноў нешта бразнула. Том правёў позіркам уздоўж шэрагу палатак, крыху святлейшых за шэрань зямлі. Каля адной з іх бліснуў чырванавата-жоўты агеньчык, які прабіваўся праз шчыліны прапаленай бляшанай печкі. Над куртатай трубой віўся шэры дымок.
Том пералез цераз борт і саскочыў на зямлю. Не спяшаючыся, ён пайшоў да печкі. Каля яе ўбачыў маладзенькую жанчыну, убачыў, што на сагнутай у локці руцэ яна трымае грудное дзіця і што яно ссе, схаваўшы галаву пад кофтачку маці. Маладзіца хадзіла каля печкі, падпраўляла сушняк у топцы, перастаўляла канфоркі, каб была лепшай цяга, адчыняла засланку; а дзіця не пераставала смактаць, і маладая маці спрытна перакідвала яго з рукі на руку. Дзіця не замінала ёй завіхацца каля печкі, не парушала лёгкасці і зграбнасці яе рухаў. А чырванавата-жоўтыя язычкі полымя выбіваліся са шчылін у печцы і кідалі трапяткія блікі на палатку.
Том падышоў бліжэй. У нос ударыў прыемны пах смажанай свіной грудзінкі і гарачага хлеба. На ўсходзе хутка святлела. Том падышоў да самай печкі і выцягнуў над ёю рукі. Маладзіца паглядзела на яго, кіўнула яму галавой, і дзве яе касы тузануліся ў бакі.
- Добрай раніцы, - павіталася яна і перавярнула скрылік грудзінкі на патэльні.
Полка ў палаткі задралася, і з яе выйшаў малады мужчына, а за ім старэйшы за яго гадамі чалавек. Абодва былі ў сініх, новых з выгляду рабочых баваўняных штанах і ў такіх самых куртках са шчыльнай набіўкай, на якіх блішчалі медныя гузікі. Абодва мужчыны былі вельмі падобныя адзін да аднаго - рысы твару рэзкія, вострыя. У малодшага падбародак зарос цёмнай шчэццю, а ў старэйшага - сівой. Галовы ў іх былі мокрыя, з валасоў сцякала вада, збіраючыся кроплямі на шорсткіх бародах. Шчокі вільготна паблісквалі. Яны сталі поплеч і моўчкі пазіралі, як святлее неба на ўсходзе. Потым адначасова пазяхнулі і перавялі позірк на светлыя краі ўзгоркаў. І тут яны заўважылі Тома.
- Добрага ранку, - прамовіў старэйшы, і на яго твары не адбівалася ні прыязнасці, ні варожасці.
- Добрай раніцы, - адказаў Том.
Малодшы таксама павітаўся:
- Добрага ранку.
Кроплі вады на іх тварах высыхалі. Абодва падышлі бліжэй і сталі грэць над плітою рукі.
Маладая жанчына не пераставала ўвіхацца каля печкі. Толькі на хвілінку яна пасадзіла дзіця і завязала косы шнурком на патыліцы, і цяпер яны матляліся ў яе за спінай. Яна паставіла на вялікую скрыню алавяныя кубкі і талеркі і каля іх паклала нажы і відэльцы, вылавіла з густога сала скрылікі свініны і паклала на алавянае блюда, дзе яны, крыху яшчэ пасквірчэўшы і пашыпеўшы, ператварыліся ў хрумсткія скваркі. Потым яна адчыніла дзверцы духоўкі і выняла з яе бляху з вялікімі пышнымі праснакамі.
Калі ад бляхі пацягнула пахам гарачых праснакоў, мужчыны глыбока ўдыхнулі носам паветра. Малодшы ціха ўсклікнуў:
- А божачкі!
Старэйшы мужчына павярнуўся да Тома:
- Ты снедаў?
- Яшчэ не. Мае вунь там. Не падняліся яшчэ. Адсыпаюцца.
- Дык садзіся з намі. У нас, дзякуй богу, яды хапае.
- Ну дзякуй, - адказаў Том. - Такі смачны дух, што цяжка адмовіцца.
- А што, хіба няпраўда? - сказаў малодшы мужчына. - Ты калі-небудзь чуў пах прыямнейшы? - Абодва падышлі да скрыні і прыселі адзін супраць аднаго на кукішкі.
- Працуеш тут? - пацікавіўся малодшы.
- Толькі збіраюся, - адказаў Том. - Мы сёння пад ноч толькі прыехалі. Я яшчэ не паспеў агледзецца.
- А мы дванаццаты ўжо дзень працуем.
Ад печкі пачуўся голас жанчыны:
- Нават новую адзежу ўжо купілі. - Мужчыны глянулі на свае каляныя курткі і крыху збянтэжана ўсміхнуліся. Жанчына паставіла на скрыню талерку са смажанінай, пышныя, румяныя праснакі, міску з растопленым салам, кацялок з кавай і таксама прысела на кукішкі каля скрыні.
Абодва мужчыны напоўнілі свае талеркі, палілі праснакі гарачым салам і пасаладзілі каву.
Старэйшы напхаў поўны рот праснака, жаваў, жаваў, сёрбаў каву і глытаў.
- Божа мой, якая смаката! - сказаў ён і зноў напхаў рот.
Малодшы сказаў:
- Мы дванаццаты ўжо дзень добра ядзім. Ні разу не было так, каб не пад'елі - і снеданне, і абед, і вячэра. Працуем, атрымліваем грошы і добра харчуемся. - Ён зноў, ледзь не як ашалелы, накінуўся на ежу, наклаўшы сабе поўную талерку. Потым абодва мужчыны выпілі пякучай кавы, выплюхнулі гушчу на зямлю і зноў налілі ў кубкі.
- Ну, час ісці, - сказаў старэйшы.
Малады павярнуўся да Тома:
- Слухай, мы тут трубы пракладаем недалёка. Хочаш, пойдзем з намі, можа, і цябе гаспадар возьме.
Том сказаў:
- О, вельмі вам удзячны. І за снеданне дзякуй вялікі.
- Калі ласка, - сказаў старэйшы. - Мы паспрабуем табе памагчы ўладзіцца на працу, калі хочаш.
- Вы проста наскрозь мяне бачыце - вядома, хачу, - адказаў Том. - Толькі пачакайце хвілінку. Я сваіх папярэджу. - Ён паспешліва пайшоў да сваёй палаткі, нагнуўся і зазірнуў пад брызент. У прыцемку ўбачыў няясныя постаці на матрацах. Пад адной коўдрай нехта раптам заварушыўся. З-пад яе, выкручваючыся, як змяя, выбралася Руці, валасы падалі ёй на вочы, сукенка была памятая, уся скручаная. Дзяўчынка асцярожна выпаўзла на жываце з палаткі і стала на ногі. Шэрыя вочы яе са сну глядзелі спакойна і ясна, без гарэзлівасці. Том адышоў ад палаткі, кіўком галавы паманіў яе за сабой, вочы іх стрэліся.
- Госпадзі, як ты расцеш! - сказаў Том.
Руці сумелася і адвяла позірк.
- Вось слухай, - сказаў Том. - Нікога цяпер не будзі, а як падымуцца, скажы, што я пайшоў - можа, на працу ўладкуюся. Маме скажы, я ў суседзяў снедаў. Зразумела?
Руці кіўнула галавой, што зразумела, і зноў адвярнулася, пагляд вачэй яе быў зусім дзіцячы.
- Не будзі іх, - яшчэ раз папярэдзіў Том і паспешліва пакрочыў да сваіх новых знаёмых. А Руці апасліва падышла да санітарнага блока і крадком зазірнула ў адчыненыя дзверы.
Абодва мужчыны чакалі Тома. Ён вярнуўся. Маладая жанчына выцягнула з палаткі матрац і пасадзіла на яго дзіця, а сама ўзялася мыць бялізну.
Том сказаў:
- Мне трэба было сказаць бацькам, куды я пайшоў. Яны яшчэ спяць. - Усе трое пакрочылі па праходзе між палатак.
Лагер пачынаў ажываць. Каля толькі што разведзеных вогнішчаў завіхаліся жанчыны, рыхтавалі снеданне - рэзалі мяса, мясілі цеста на праснакі. А мужчыны пахаджвалі каля палатак і каля машын. Неба было ўжо ружовае. Перад канторай высокі худы стары клапатліва разраўноўваў граблямі дарожку. Ён так вадзіў граблямі, што вузкія баразёнкі выходзілі простыя і глыбокія.
- Нешта ты сёння рана падняўся, бацька, -сказаў яму малады чалавек, калі яны ўсе трое праходзілі міма.
- Ага, так. За пастой адпрацоўваю.
- За пастой! - усміхнуўся малады. - Ён напіўся ў суботу вечарам і дапазна гарланіў песні ў сваёй палатцы. Камісія ў пакаранне прымусіла яго папрацаваць. - Яны ішлі цяпер па краі чорнай ад мазуту дарогі, абсаджанай з аднаго боку арэхавымі дрэвамі. З-за гор вызірнуў абадок сонца. Том сказаў:
- Дзіўна неяк. Я паснедаў у вас, а як зваць мяне, не сказаў, і вы таксама не назваліся. Я - Том Джоўд.
Старэйшы глянуў на яго і слаба ўсміхнуўся:
- Ты, відаць, у гэтых краях нядаўна?
- Усяго некалькі дзён.
- Так я і думаў. Проста дзіўна - і хутка ж тут адвыкаеш імя сваё называць... так шмат народу. Адзін аднаго тут клічуць проста «прыяцель». Дык вось, сэр, зваць мяне Цімаці Ўолес, а гэта сын мой - Уілкі.
- Вельмі прыемна, - сказаў Том. - А вы самі тут даўно?
- Дзесяць месяцаў, - адказаў Уілкі. - Мы прыбылі сюды ў самым хвасце леташняга патоку бежанцаў. А госпадзі! Ну і часіна была, ну і часіна! Ледзь з голаду не памерлі. - Іх чаравікі пастуквалі па грунтавой дарозе. Міма прайшоў грузавік, поўны людзей, паглыбленых у свае думкі. Яны трымаліся за барты і панура пазіралі на дарогу.
- Гэтыя працуюць на газавую кампанію, - сказаў Цімаці. - Добра зарабляюць.
- Я мог бы ўзяць наш грузавік, - прапанаваў Том.
- Не, не варта. - Цімаці нахіліўся і падабраў з зямлі зялёны грэцкі арэх. Калупнуў яго пазногцем і шпурнуў у чорнага дразда, які сядзеў на драцяной агароджы. Дрозд успырхнуў і, калі арэх праляцеў пад ім, зноў апусціўся на дрот і пачысціў дзюбкай бліскучае чорнае пер'е.
Том запытаўся:
- А ў вас машыны няма?
Абодва Ўолесы змоўчалі, і, глянуўшы на іх, Том убачыў збянтэжанасць на іх тварах.
Уілкі сказаў:
- Туды, дзе мы працуем, недалёка - усяго адна міля, вось па гэтай дарозе.
Цімаці сярдзіта загаварыў:
- Не, няма ў нас машыны. Прадалі. Вымушаны былі. Есці не было чаго, хоць зубы на паліцу кладзі. Працу таксама не маглі знайсці. А тут кожны тыдзень прыходзяць скупшчыкі. Прыйдзе такі, убачыць, што ты галодны, і бярэцца купіць тваю машыну. І калі ты досыць ужо згаладаўся, ён у цябе яе за бясцэнак купляе. А мы... мы былі ох якія галодныя. За дзесяць даляраў прадалі. - Цімаці плюнуў на дарогу.
Уілкі спакойна сказаў:
- На тым тыдні я ў Бейкерсфілдзе быў. Бачыў яе... выстаўлена на продаж... стаіць сабе наша машына, а на бірцы цана - семдзесят даляраў.
- У нас выйсця не было, - зноў загаварыў Цімаці. - Вырашылі: лепей няхай нас абрабуюць, чым мы іх. Да крадзяжу мы яшчэ не дайшлі, але ох як былі мы блізка да яго!
Том сказаў:
- А мы, ведаеце, перад ад'ездам чулі, што работы тут да чорта. І яшчэ лісткі такія чыталі, у якіх людзей сюды заклікалі.
- Так, - сказаў Цімаці, - мы іх таксама чыталі. А работы тут мала. І плата ўвесь час падае. Галава баліць ад думак, як пракарміцца.
- Цяпер жа ў вас праца ёсць, - нагадаў яму Том.
- Ёсць, толькі гэта ненадоўга. Гаспадар у нас добры. Участак у яго невялікі. Разам з намі працуе. Але ненадоўга ўсё гэта.
Том сказаў:
- Нашто ж вам мяне ўладкоўваць? Утраіх з работай яшчэ хутчэй справімся. Вы ж самі сабе да горла нож падносіце, чаму так робіце?
Цімаці пакруціў галавой:
- Не ведаю. Відаць, па дурноце. Мы думалі купіць сабе капелюшы. Толькі наўрад ці ўдасца. Вунь яго ўчастак, направа. Праца выгадная. Трыццаць цэнтаў у гадзіну. І гаспадар добры, з намі па-прыяцельску.
Яны збочылі з дарогі і прайшлі па пасыпанай жвірам дарожцы цераз невялікі агародчык; за прысадамі стаялі белы дамок сярод купкі цяністых дрэў і адрына; за адрынай віднеўся вінаграднік і баваўнянае поле. Калі яны параўняліся з дамком, сеткаватыя дзверы на ганку грукнулі, і па прыступках спусціўся загарэлы каржакаваты чалавек у кардонным шлеме. Ён ішоў па двары, падкасваючы на хаду рукавы кашулі. Яго густыя, абсмаленыя сонцам бровы пахмурна ссунуліся. Шчокі былі чырвоныя ад загару.
- Добрага вам ранку, містэр Томас, - павітаўся Цімаці.
- Добрага, - раздражнёна буркнуў той.
Цімаці сказаў:
- Гэта Том Джоўд. Можа, вы знойдзеце магчымасць узяць яго на працу?
Гаспадар сярдзіта глянуў на Тома і раптам рагатнуў, але бровы ў яго так і засталіся насупленымі.
- О, вядома, вядома. Я яго вазьму. Я ўсіх, каго хочаце, вазьму. Можа, і цэлую сотню вазьму.
- Мы проста думалі... - прабачлівым тонам пачаў быў Цімаці.
Томас перабіў яго:
- Ага, і я таксама думаў. - Ён крута павярнуўся тварам да іх. - Мне трэба з вамі пагаварыць. Я плачу вам трыццаць у гадзіну, так?
- Так, містэр Томас... але мы...
- І за трыццаць цэнтаў вы робіце, што мне трэба. - Томас пераплёў пальцы сваіх вялікіх агрубелых рук.
- Мы стараемся добра працаваць.
- Ну дык вось, хопіць. З сённяшняга дня я плачу вам дваццаць пяць у гадзіну, хочаце - заставайцеся, не хочаце - ідзіце. - Чырвань на яго твары пацямнела ад гневу.
Цімаці сказаў:
- Мы добра працавалі. Вы самі казалі.
- Казаў. Але цяпер усё так павярнулася, што, здаецца, я не магу наймаць людзей. - Томас глынуў сліну. - Вось слухайце. У мяне шэсцьдзесят пяць акраў зямлі. Пра Асацыяцыю фермераў вы калі-небудзь чулі?
- Ну, вядома, чулі.
- Дык вось, я ў яе ўваходжу. Учора вечарам у нас быў сход. А хто верхаводзіць у Асацыяцыі, ведаеце? Зараз скажу. Заходні банк. Банку гэтаму належыць ледзь не ўся наша даліна, а што не яго, на тое ён мае вэксалі па пазыках. І ўчора адзін банкаўскі прадстаўнік сказаў мне: «Вы плаціце трыццаць цэнтаў у гадзіну. Давядзецца вам збавіць да дваццаці пяці». Я кажу яму: «У мяне добрыя работнікі. Такім не шкада і трыццаць даць». А ён мне: «Не ў гэтым справа. Цяпер устаноўлена плата дваццаць пяць цэнтаў. Калі будзеце плаціць трыццаць, узнікне незадавальненне. І дарэчы, кажа, вам, напэўна ж, зноў спатрэбіцца пазыка ў наступным годзе пад новы ўраджай, ці ж не так?» - Томас замаўчаў. Ён цяжка і хрыпла дыхаў. - Цяпер ясна? Стаўка - дваццаць пяць цэнтаў - і за гэта дзякуй скажыце.
- Мы старанна працавалі, - разгублена прамовіў Цімаці.
- Да вас яшчэ не дайшло? Пан Банк наймае дзве тысячы чалавек, а я ўсяго толькі вас траіх. У мяне даўгавыя абавязацельствы. Вось і паварушыце мазгамі. Калі знойдзеце выйсце, я, бог сведка, пярэчыць не буду. Яны мяне ў кут загналі.
Цімаці пакруціў галавой:
- Не ведаю, што і казаць.
- Хвілінку пачакайце. - Томас шпарка падняўся на ганак. За ім з грукатам зачыніліся дзверы. Праз момант ён вярнуўся з газетай у руцэ. - Вось, бачылі? Я вам прачытаю. «Грамадзяне, абураныя дзейнасцю чырвоных агітатараў, спалілі перасяленчы лагер. Мінулай ноччу група грамадзян, выведзеная з цярпення агітацыяй, якая праводзілася ў мясцовым лагеры перасяленцаў, спаліла датла палаткі і запатрабавала ад агітатараў пакінуць нашу акругу».
Том пачаў быў:
- Ага, я... - і раптам асекся і сціснуў губы.
Томас акуратна склаў газету і засунуў яе ў кішэню. Ён ужо авалодаў сабой. Спакойна сказаў:
- Людзей гэтых паслала туды Асацыяцыя. Вось я іх і выдаў. І калі там даведаюцца, што я вам сказаў, дык у наступным годзе фермы ў мяне ўжо не будзе.
- Проста розуму не дабяру, што сказаць, - паўтарыў Цімаці. - Калі там на самай справе былі агітатары, тады зразумела, чаму ў Асацыяцыі так раз'юшыліся.
Томас сказаў:
- Я даўно да ўсяго гэтага прыглядаюся. Перад кожным зніжэннем платы абавязкова паяўляюцца чырвоныя агітатары. Абавязкова. Каб на іх чорт, яны завабілі мяне ў пастку. Дык як, што вы вырашылі? Дваццаць пяць цэнтаў?
Цімаці апусціў вочы долу.
- Я згодзен, - вымавіў ён.
- І я, - сказаў Уілкі.
Том сказаў:
- Ну, здаецца, мне пашанцавала як на першы раз. Канешне, я таксама буду працаваць у вас. Мне адмаўляцца нельга.
Томас выцягнуў з задняй кішэні штаноў стракатую шаўковую насоўку і выцер ёю губы і падбародак.
- Проста не ведаю, колькі яшчэ так будзе далей. І як вы толькі ўхітраецеся сям'ю пракарміць на такія грошы, не магу зразумець.
- Пакуль працуем - кормімся, - сказаў Уілкі. - А вось як работы няма...
Томас глянуў на свой наручны гадзіннік.
- Ну хадзем, выкапаем канаву. А бог з ім, - раптам сказаў ён рашуча, - так і быць, скажу. Вы жывяце ва ўрадавым лагеры, так?
Цімаці насцярожыўся.
- Так, сэр.
- І кожны суботні вечар у вас там танцы?
Уілкі ўсміхнуўся:
- А як жа.
- Дык вось што. У наступную суботу будзьце асцярожныя.
Цімаці раптам ускінуў галаву і падступіў бліжэй да Томаса.
- Што вы маеце на ўвазе? Я член цэнтральнай камісіі. Я павінен ведаць.
Томас паглядзеў на яго з асцярогай.
- Нікому не кажыце, што ад мяне даведаліся.
- А што такое?
- У Асацыяцыі цярпець не могуць гэтых урадавых лагераў. Шэрыфавых падручных туды не пашлеш. Там, я чуў, людзі самі сабе законы пішуць, і без ордэра нікога нельга арыштаваць. Дык вось, калі ў вас распачнецца бойка ці там страляніна, тады да вас заявяцца шэрыфавы падручныя і ачысцяць лагер ад усіх вас.
Цімаці раптам неяк перамяніўся. Ён расправіў плечы, вочы ў яго сталі халодныя.
- Вы хочаце сказаць, што...
- Толькі нікому не расказвайце, што ад мяне чулі, - прамовіў Томас з трывогай у голасе. - У суботу вечарам у вашым лагеры выбухне бойка. А шэрыфавы агенты будуць напагатове.
Том недаўменна запытаўся:
- Навошта ўсё гэта? Людзі ж нікому не перашкаджаюць.
- Я скажу табе навошта, - адказаў Томас. - Людзі ў гэтым лагеры прывыкаюць да чалавечнага абыходжання. А потым трапіць з іх хто ў лагер перасяленцаў, і з ім будзе цяжка справіцца. - Ён зноў сцёр насоўкай пот з твару. - Ну ідзіце, працуйце. Далібог, дагаварыліся мы з вамі да таго, што я без фермы застануся. Але вы мне як людзі падабаецеся.
Цімаці павярнуўся да яго і падаў яму сваю худую мазолістую руку, і Томас паціснуў яе.
- Ніхто не даведаецца, хто нам сказаў. Дзякуй вам ад нас. Бойкі не будзе.
- Бярыцеся за справу, - сказаў Томас. - І памятайце: дваццаць пяць цэнтаў у гадзіну.
- Папрацуем і за столькі... - сказаў Уілкі, - на вас.
Томас пакрочыў да дамка.
- Я праз хвілінку таксама прыйду, - сказаў ён. - А вы бярыцеся за справу. - Сеткаватыя дзверы зачыніліся за ім.
Том і Ўолесы мінулі выбеленую вапнай адрыну і па ўскрайку поля падышлі да доўгай вузкай канавы, уздоўж якой ляжалі секцыі бетоннай трубы.
- Вось тут мы і працуем, - сказаў Уілкі Тому.
Яго бацька адчыніў адрыну і вынес адтуль дзве кіркі і тры рыдлёўкі. Ён сказаў Тому:
- На, бяры сваю красуню.
Том узважыў кірку ў руцэ.
- Ого! Якраз мне да пары.
- Пабачым, што ты ў адзінаццаць гадзін запяеш, - усміхнуўся Ўілкі. - Паглядзім, якая яна табе пара.
Яны падышлі да канца няскончанай канавы. Том зняў пінжак і кінуў яго на груду выкапанай зямлі. Ён адсунуў кепку з ілба і ступіў у канаву. Папляваў на далоні. Кірка ўзляцела ў паветра і апусцілася, бліснуўшы на сонцы. Том ціха кракнуў. Кірка ўзвівалася ўгору і падала, і краканне чулася якраз у той момант, калі лязо ўгрызалася ў зямлю, рассякаючы грунт.
Уілкі ўсклікнуў:
- Вось гэта я разумею! Ну і землякоп нам, та, трапіўся! Ён з кіркай, як з роднай.
Том адказаў:
- Я намахаўся ёю, дзе трэба - ух! Так, так, сэр, - ух! Не адзін год - ух! Прыемна лашчыць далонь - ух! - Пад яго ўдарамі адколвалася глыба за глыбай. Сонца паднялося ўжо над фруктовымі дрэвамі, і вінаграднае лісце адлівала золатам на лозах. Разрыхліўшы шэсць футаў канавы, Том ступіў убок і выцер з ілба пот. Яго месца заняў Уілкі. Рыдлёўка падымалася і апускалася, і груда выкінутай зямлі абапал канавы расла ў даўжыню.
- Я ўжо нешта чуў пра гэту цэнтральную камісію, - сказаў Том. - Значыць, вы ўваходзіце ў яе?
- Так точна, сэр! - адказаў Цімаці. - На нас ляжыць вялікая адказнасць. На ўсіх нас. Мы стараемся, як можам, і людзі ў лагеры, як могуць, памагаюць нам. Каб толькі буйныя фермеры не так нам дапякалі. А то спакою не даюць.
Том скочыў у канаву, і Ўілкі стаў з краю. Том загаварыў:
- А што з гэтай бойкай на танцах - ух! пра якую ён казаў? - ух! Што яны задумалі?
Цімаці ішоў следам за Ўілкі, і яго рыдлёўка скрэбла і падчышчала дно канавы, рыхтуючы яе пад трубу.
- Відаць, хочуць выжыць нас з лагера, - гаварыў ён. - Баяцца, што мы арганізуемся, думаю. Магчыма, яны маюць рацыю. Лагер наш - гэта і ёсць арганізацыя. Людзі клапоцяцца самі пра сябе. Струнны аркестр у нас найлепшы ў акрузе. Тым, хто галадае, адкрылі ў краме невялікі крэдыт. Пяць даляраў - на такую суму можаш узяць харчу, і лагер за цябе ў адказе перад крамнікам. З уладамі ў нас непрыемнасцей ніякіх не было. Відаць, гэта і палохае багатых фермераў. Не могуць засадзіць нас за краты - вось і страшна ім. Яны, пэўна, думаюць: тыя, што могуць самі сабой кіраваць, здольныя і на іншыя справы.
Том адышоўся ад канавы і выцер пот, які заліваў яму вочы.
- Вы чулі, што напісана ў газеце пра агітатараў у лагеры на поўнач ад Бейкерсфілда?
- Чулі, не глухія, - адказаў Уілкі. - Такое ўжо не першы раз.
- Дык вось, я адтуль. Ніякіх агітатараў там не было. Людзей, якіх яны называюць чырвонымі. І наогул, што гэта за людзі такія - чырвоныя?
Цімаці зрэзаў рыдлёўкай невялікі грудок на дне канавы. Белае шчацінне ў ягонай барадзе паблісквала на сонцы.
- Шмат хто цікавіцца чырвонымі, - усміхнуўся Цімаці. - І вось адзін тут у нас дазнаўся. - Ён прыпляскаў рыдлёўкай насыпаную на край канавы зямлю. - Ёсць тут у нас такі Гайнс. У яго ледзь не трыццаць тысяч акраў зямлі: персікі і вінаград - кансервавы завод і вінаробня. Дык ад яго толькі і чуеш пра чырвоных: «Гэтыя праклятыя чырвоныя давядуць краіну да пагібелі» і «Трэба гнаць адсюль гэтых чырвоных вырадкаў». А тут адзін хлапец, навічок у нас, аднаго дня слухаў, слухаў, пачухаў патыліцу ды кажа: «Містэр Гайнс, я ў гэтых краях нядаўна. Хто яны, тыя праклятыя чырвоныя?» А Гайнс адказвае: «Чырвоны - гэта той сукін сын, які патрабуе трыццаць цэнтаў у гадзіну, калі мы плацім дваццаць пяць». Хлопец падумаў, падумаў, зноў паскроб патыліцу і кажа: «Але ж, містэр Гайнс, я не сукін сын, а калі чырвоныя вось такія... дык я таксама хачу атрымліваць трыццаць цэнтаў у гадзіну. Кожны хацеў бы. Мы, містэр Гайнс, усе чырвоныя, каб на яго ліха». - Цімаці падраўнаваў рыдлёўкай дно канавы, і цвёрдая зямля заблішчала на зрэзе.
Том засмяяўся:
- І я б не ад таго. - Яго кірка высока ўзляцела і апусцілася, і грунт даў трэшчыну. Пот заліваў яму лоб, сцякаў каля носа і пабліскваў кроплямі на шыі. - А, чорт, - сказаў ён, - кірка - добрая рэч - ух! калі ты з ёю ў ладах - ух! А прыладзішся - ух! - і разам з ёю праца спорыцца - ух!
Яны ішлі адзін за адным, і канава паступова расла ў даўжыню, а сонца, усё вышэй падымаючыся ў ранішнім небе, абдавала іх спёкай.
Калі Том пайшоў, Руці яшчэ крыху паглядзела праз адчыненыя дзверы ў санітарны блок. Без Уінфілда, перад якім можна было павыхваляцца, храбрасць яе звяла. Яна ступіла босай нагой на цэментавую падлогу, але праз момант адхапіла нагу назад. З палаткі ў далёкім канцы праходу выйшла жанчына і пачала распальваць паходную жалезную печку. Руці зрабіла некалькі крокаў да яе, але свая палатка пацягнула яе назад. Яна ціхенька падкралася да яе і зазірнула пад брызент. Збоку, проста на зямлі, ляжаў дзядзька Джон, рот у яго быў адкрыты, з горла вырываўся булькатлівы, захлёбісты храп. Маці і бацька спалі, укрытыя коўдрай з галавой, - ад святла. Эл ляжаў у процілеглым ад дзядзькі Джона баку палаткі, прыкрыўшы вочы сагнутай у локці рукой. Каля пярэдняй сценкі палаткі ляжалі Ружа Сарона і Ўінфілд, а месца побач з Уінфілдам было пустое - месца Руці. Яна прысела на кукішкі і пачала ўзірацца. Позірк яе спыніўся на кудзелістай галоўцы Ўінфілда, і, адчуўшы яго, хлопчык расплюшчыў павекі і глянуў на сястру сур'ёзнымі вачамі. Руці прыклала палец да вуснаў і паманіла яго рукой. Уінфілд пакасіўся на Ружу Сарона. Яе расчырванелы твар быў зусім побач, яна дыхала, крыху растуліўшы губы. Уінфілд асцярожна прыўзняў коўдру і вышмыгнуў з-пад яе. Потым ціхенька вылез з палаткі да Руці.
- Ты даўно ўстала? - шэптам запытаўся ён.
Руці бясшумна, з асцярогай азіраючыся, павяла яго ад палаткі і, калі адышліся на бяспечную адлегласць, сказала:
- Я і не клалася. Усю ноч на нагах.
- Няпраўда, - сказаў Уінфілд. - Ты манюка.
- Няхай так, - адказала Руці. - Толькі калі я манюка, дык нічога табе не раскажу. Аднаго дзядзьку нажом зарэзалі, а потым прытупаў мядзведзь і звалок дзіцяня. А я табе пра гэта не раскажу.
- Ніякага мядзведзя не было, - няўпэўнена запярэчыў Уінфілд. Ён прыгладзіў валасы пальцамі і адцягнуў штаны ў кроку.
- Добра, няхай не было, - з'едліва сказала Руці. - І тых белых гаршчочкаў з таго самага, з чаго пасуду робяць, - памятаеш, у каталогах бачылі?
Уінфілд вылупіў на сястру вочы. Ён паказаў рукой на санітарны блок і запытаўся:
- Там?
- Я ж манюка. Ты ўсё роўна не паверыш, дык я і расказваць не буду.
- Пойдзем паглядзім.
- Я там ужо была. Пасядзела на іх. Нават папікала туды.
- А вось і не, - сказаў Уінфілд.
Дзеці пайшлі да будыніны, у якой быў санітарны вузел, і Руці цяпер ужо нічога не баялася. Яна смела ўвайшла туды першая. Уздоўж адной сцяны прасторнага памяшкання былі туалеты - адсекі з дзвярамі спераду. Белы фаянс у іх ззяў чысцінёй. Уздоўж процілеглай сцяны выстраіліся ўмывальныя ракавіны з кранамі, а насупраць увахода былі чатыры душавыя кабінкі.
- Вось, глядзі, - сказала Руці. - Гэта ўнітазы - як у каталогу. - Дзеці падышлі да аднаго туалета. Руці з паказной храбрасцю задрала спаднічку і села на ўнітаз. - Казала ж табе, я тут была, - сказала Руці, і ва ўнітазе пачулася цурчанне.
Уінфілд адчуў няёмкасць. Рука яго націснула на спускны рычажок, і раптам равучы палілася вада. Руці спалохана падскочыла і шарахнулася ўбок. Яны стаялі пасярод памяшкання і пазіралі на ўнітаз. Вада ў ім усё яшчэ булькатала.
- Гэта ты ўсё, - сказала Руці. - Падышоў і зламаў. Я бачыла.
- Не, я не ламаў. Далібог, гэта не я.
- Я ж сама бачыла. Да добрых рэчаў цябе і блізка падпускаць нельга.
Уінфілд паныла апусціў галаву. Потым глянуў на Руці, і вочы ў яго наліліся слязьмі, падбародак задрыжаў. І Руці пашкадавала яго.
- Ну нічога, - сказала яна. - Я не паскарджуся на цябе. Мы скажам - так і было. Скажам, мы сюды і не заходзілі нават. - Дзеці пайшлі з памяшкання.
Сонца ўжо ледзь дакраналася да краю гор і свяціла на жалезныя рыфленыя дахі пяці санітарных блокаў, на шэрыя палаткі і на чыста падмеценыя дарожкі між імі. Лагер прачнуўся. У паходных печках гарэў агонь, у печках, зробленых з газавых бітонаў і ліставога жалеза. У паветры цягнула дымком. Полкі палатак былі адкінутыя, і людзі расхаджвалі па лагеры. Перад Джоўдавай палаткай, паглядаючы па баках, стаяла маці. Убачыўшы дзяцей, пайшла ім насустрач.
- Я ўжо не ведала, што і падумаць, - сказала яна. - Не ведала, дзе вас шукаць.
- А мы проста так хадзілі, глядзелі, - адказала Руці.
- А Том дзе? Вы яго не бачылі?
Руці напусціла на сябе важны выгляд.
- Так, мэм, бачылі. Ён пабудзіў мяне і сказаў, што перадаць. - Дзяўчынка замаўчала, каб падкрэсліць сваю значнасць.
- Ну, што? - нецярпліва запыталася маці.
- Ён прасіў перадаць табе... - Руці зноў замаўчала і глянула на Ўінфілда, ці бачыць ён, якая ў яе важная роля.
Маці падняла руку, нібы замахваючыся:
- Ну што?
- Ён работу атрымаў, - выпаліла Руці. - Пайшоў працаваць. - Яна з апаскай паглядзела на паднятую руку маці. Рука апусцілася, потым пацягнулася да дзяўчынкі. Маці абняла Руці за плечы, парывіста прыціснула да сябе і адпусціла.
Руці ў замяшанні ўставілася ў зямлю і загаварыла пра іншае:
- У іх там унітазы. Беленькія.
- А ты ўжо збегала туды, - занепакоілася маці.
- Мы з Уінфілдам пабылі там, - адказала Руці і адразу ж учыніла вераломства: - Уінфілд сапсаваў прыбіральню.
Хлопчык пачырванеў. Ён бліснуў вачамі на Руці.
- А яна туды папікала, - сказаў ён помсліва.
Маці захвалявалася:
- Што вы там нарабілі? Пакажыце. - Яна сілай павяла малых да дзвярэй санітарнага вузла і ўштурхнула ўсярэдзіну. - Дык што вы тут натварылі?
Руці паказала на ўнітаз:
- Тут як засвішча, зашыпіць, потым як забулькоча! Цяпер сціхла.
- Пакажыце, што вы зрабілі, - патрабавала маці.
Уінфілд нехаця падышоў да ўнітаза.
- Я толькі слабенька так націснуў на вось гэта, - сказаў ён. - Проста ўзяўся рукой вось так, і... - Зноў зашумела вада, і хлопчык адскочыў.
Маці закінула галаву назад і засмяялася; Руці і Ўінфілд пакрыўджана пазіралі на яе.
- Так яно і павінна быць, - сказала маці. - Я некалі бачыла такія. Калі скончыш, трэба націснуць.
Дзеці адчулі вялікі сорам за сваю недасведчанасць. Яны выйшлі за парог і пайшлі праходам паміж палатак - падзівіцца на шматлікую сям'ю, што сядзела за снеданнем.
Маці праводзіла дзяцей позіркам. Потым агледзела памяшканне. Падышла да душавой кабінкі і зазірнула ў яе. Падышла да ўмывальных ракавін і правяла далонню па белым фаянсе. Крыху адкруціла кран, падставіла пад струмень палец і паспешліва адхапіла руку, калі пайшла гарачая вада. З хвілінку разглядала ракавіну, потым уторкнула затычку і напусціла ў ракавіну вады, крыху з гарачага крана і крыху з халоднага. Тады яна памыла рукі ў цёплай вадзе, умыла твар і ўжо прыгладжвала мокрымі рукамі валасы, як за яе спінай раптам пачуліся нечыя крокі па цэментавай падлозе. Маці крута павярнулася. Перад ёю стаяў пажылы чалавек і глядзеў на яе з зусім зразумелым абурэннем. Ён строга запытаўся:
- Як вы сюды папалі?
Маці сутаргава глынула сліну, адчуваючы, як вада сцякае з падбародка і праз сукенку дабіраецца да цела.
- Я не ведала, - прамовіла яна прабачлівым тонам. - Думала, тут для ўсіх.
Пажылы чалавек насупіўся.
- Тут для мужчын, - сказаў ён сурова. Тады падышоў да дзвярэй і паказаў на дошчачку: ДЛЯ МУЖЧЫН. - Ну вось, больш доказаў не трэба. Вы што, не бачылі?
- Не, - пачырванеўшы ад сораму, адказала маці. - Не заўважыла. А ёсць, дзе мне можна?
Абурэнне пажылога чалавека астыла.
- Вы толькі што прыехалі? - запытаўся ён больш прыязным тонам.
- Уночы.
- Значыць, камісія яшчэ з вамі не гаварыла?
- Якая камісія?
- Ну як жа - жаночая камісія.
- Не, са мной не.
Пажылы чалавек важна сказаў:
- Хутка яна да вас зойдзе і ўсё растлумачыць. Мы клапоцімся аб навічках. А калі вам патрэбна жаночая прыбіральня, абыдзіце будынак. Той бок - ваш.
Маці няўпэўнена запыталася:
- Вы кажаце, што жаночая камісія... прыйдзе да нас у палатку?
Чалавек кіўнуў галавой:
- Так, павінна хутка прыйсці.
- Дзякуй вам, - сказала маці, паспешліва выйшла за дзверы і ледзь не бягом кінулася да сваёй палаткі.
- Бацька! - крыкнула яна. - Джон, падымайцеся! І ты, Эл. Уставайце ўсе, памыйцеся. - Яе сустрэлі няўцямнымі, соннымі позіркамі. - Уставайце, ідзіце твары памыйце. І валасы прычашыце.
Дзядзька Джон быў бледны і з выгляду нездаровы. На падбародку ў яго чарнеў кровападцёк.
Бацька запытаўся:
- Што здарылася?
- Камісія! - выгукнула маці. - У іх тут камісія... жаночая камісія... хутка прыйдзе да нас. Уставайце ж, ідзіце мыцца. Пакуль мы тут спалі і храплі, Том на працу ўладкаваўся. Падымайцеся, ну!
Усе выйшлі з-пад брызенту яшчэ сонныя. Дзядзька Джон пахіснуўся на хаду, і па твары яго прабегла хваравітая грымаса.
- Ідзіце ў той дамок і памыйцеся, - загадала маці. - Хуценька паснедаем, бо прыйдзе камісія. - Маці прынесла трэсак, што ляжалі кучкай за палаткамі, развяла агонь і дастала кухонны посуд. - Кукурузныя аладкі, - сказала яна сама сабе. - Аладкі з падліўкай. Так хутчэй. Трэба спяшацца. - Яна гаварыла сама з сабой, а Руці з Уінфілдам стаялі побач і здзіўлена пазіралі на яе.
Над лагерам пацягнуўся дымок ранішніх вогнішчаў, адусюль чулася гамонка.
Ружа Сарона, раскудлачаная, заспаная, вылезла з-пад брызенту. Маці, мераючы прыгаршчамі кукурузную муку простага памолу, павярнулася да дачкі. Паглядзела на пакамечаную, нясвежую сукенку, на зблытаныя, нечасаныя валасы.
- Прывядзі сябе ў парадак, - вымавіла яна скорагаворкай. - Зараз жа пайдзі і памыйся. Надзень чыстую сукенку, я яе памыла. Прычашыся, пратры вочы. - Маці вельмі хвалявалася.
Ружа Сарона панура буркнула:
- Я сябе дрэнна адчуваю. Хачу, каб Коні прыйшоў. Без яго я рабіць нічога не буду.
Маці крута павярнулася да дачкі. Далоні яе і запясці былі ў жоўтай кукурузнай муцэ.
- Разашарна, - строга сказала яна, - вазьмі сябе ў рукі. Досыць табе хныкаць. Сюды хутка з'явіцца жаночая камісія, што ж, мы на іх спадылба глядзець будзем?
- Дык жа ж мне нездаровіцца.
Маці ступіла да яе, выставіўшы наперад зацярушаныя мукой рукі.
- Ідзі памыйся, - загадала яна. - Бывае так, што свае хворасці трэба трымаць пры сабе.
- Мяне нудзіць, - жаласліва паскардзілася Ружа Сарона.
- Дык адыдзіся ўбок, і няхай вырве. Канешне, цябе будзе нудзіць. Усіх нудзіць. Адыдзіся ўбачок, потым прывядзі сябе ў парадак, ногі памый і туфлі надзень. - Маці зноў вярнулася да вогнішча. - І косы запляці, - дадала яна.
На гарачай патэльні сквірчэла сала, і тук зашыпеў і пырснуў у бакі, калі маці апусціла ў яго цеста з лыжкі. Падліўку яна згатавала ў кацялку - развяла муку ў растопленым сале, дадала вады, пасаліла і разбоўтала. Кава пачала падымацца ў вялікай, на галон, бляшанцы, і ад яе пацягнула кававым водарам.
Бацька не спяшаючыся вяртаўся да палаткі, і маці агледзела яго крытычным вокам. Ён запытаўся:
- Ты кажаш, Том атрымаў працу?
- Так, сэр. Пайшоў, яшчэ як мы спалі. Ану, адчыні гэту скрынку, вазьмі чысты камбінезон і кашулю. І вось яшчэ што, самой мне зусім няма часу, дык ты памый вушы Ўінфілду і Руці. Там ёсць гарачая вада. Зробіш? Добра патры ім вушы і шыю. Каб дзеткі ў нас былі свежанькія і аж блішчалі.
- Во расшчабяталася, такой цябе я яшчэ ніколі не бачыў, - сказаў бацька.
- Трэба, каб у сям'і быў прыстойны выгляд! У дарозе не было як. А цяпер можна. Свой брудны камбінезон пакінь у палатцы, я яго потым памыю.
Бацька пайшоў пад навес і неўзабаве паявіўся ў злінялым ад мыцця сінім камбінезоне і кашулі. Ён павёў пасумнелых і ўстрывожаных дзяцей да санітарнага блока.
Маці крыкнула ім наўздагон:
- Добра патры ім вушы!
Дзядзька Джон паказаўся ў дзвярах мужчынскага аддзялення, вызірнуў, потым вярнуўся, сеў на ўнітаз і доўга сядзеў там, падпёршы балючую галаву рукамі.
Маці зняла з патэльні румяныя аладкі і толькі паспела апусціць у гарачае сала некалькі лыжак рэдкага цеста, як на зямлю каля вогнішча ўпаў нечы цень. Яна азірнулася цераз плячо. Ззаду стаяў маленькага росту чалавек з худым, загарэлым, зрэзаным маршчынамі тварам і вясёлымі вачамі. Ён быў тонкі, як жэрдка. Яго беленькі чысты пінжак дзе-нідзе распоўзся ў швах. Чалавек усміхнуўся ёй і сказаў:
- Добрай раніцы.
Маці глянула на яго белы касцюм, і твар яе падазрона нахмурыўся.
- Добрай, - адказала яна.
- Вы місіс Джоўд?
- Я.
- Мяне зваць Джым Роўлі. Я адміністратар лагера. Зайшоў паглядзець, як тут у вас, ці ўсё ў парадку. Вам, можа, што-небудзь трэба?
Маці недаверліва разглядала яго.
- Не, - адказала яна.
Роўлі сказаў:
- Калі вы прыехалі, я ўжо спаў. На шчасце, у нас аказалася вольнае месца. - Голас яго гучаў ветліва.
Маці прастадушна адказала:
- Тут усё вельмі добра. Асабліва там, дзе мыюць бялізну.
- Пачакайце, хутка жанчыны збяруцца на мыццё. Вось будзе весела! Як на малітоўным сходзе. Ведаеце, місіс Джоўд, што яны ўчора зрабілі? Хорам заспявалі. Пяюць гімны і труць бялізну ў такт. Было што паслухаць, паверце.
З твару маці паступова сходзіў недавер да гэтага чалавека.
- Відаць, сапраўды прыемна было слухаць. Вы тут за начальніка?
- Не, - адказаў Роўлі. - Народ тут у нас такі, што пазбавіў мяне неабходнасці начальстваваць. Падтрымліваюць чысціню ў лагеры, глядзяць, каб быў парадак - самі з усім спраўляюцца. Такіх людзей я зроду не бачыў. У зале, дзе ў нас бываюць сходы, адзежу шыюць, цацкі робяць. Зроду такіх людзей не бачыў.
Маці паглядзела на сваю нячыстую ўжо сукенку.
- А мы яшчэ ў брудным ходзім, - сказала яна. - Цяжка сачыць за сабой у дарозе.
- Хіба я не ведаю? - сказаў адміністратар лагера і пацягнуў носам. - Скажыце... гэта ў вас кава так смачна пахне?
Маці ўсміхнулася:
- Праўда, смачна? На паветры заўсёды ўсё лепш пахне. - І з пачуццём уласнай годнасці прамовіла: - Мы палічым за гонар, калі вы паснедаеце з намі.
Ён падышоў да вогнішча, апусціўся на кукішкі і гэтым канчаткова абяззброіў маці.
- Нам такі госць вялікая пачэснасць, - сказала яна. - Снеданне ў нас, праўда, не надта каб, але сардэчна запрашаем.
Карантыш усміхнуўся:
- Я паснедаў ужо, дзякуй. Але ад кубачка кавы не адмоўлюся. Цудоўны пах.
- Ага, ага, калі ласка.
- Вы толькі не ўвіхайцеся так праз мяне.
Маці наліла ў алавянны кубак кавы з вялікай кансервавай бляшанкі і сказала:
- Цукру мы яшчэ не дасталі. Сёння, можа, купім. Калі вы п'яце з цукрам, вам будзе нясмачна.
- З цукрам я не п'ю, - сказаў Джым Роўлі. - Ён толькі смак добрай кавы перабівае.
- А я люблю крыху з цукрам, - сказала маці. Яна раптам пільна паглядзела на яго, каб зразумець, чым ён так лёгка і хутка заваяваў яе прыхільнасць. Яна шукала разгадкі ў яго на твары і не знаходзіла ў ім нічога такога, акрамя прыязнасці. Потым зірнула на яго белы пінжак з пасечанымі швамі і зусім супакоілася.
Ён папіваў каву з кубка дробнымі глыткамі.
- Жанчыны, напэўна, зойдуць да вас гэтым ранкам.
- Мы яшчэ не прыбраліся, - сказала маці. - Добра было б, каб яны прыйшлі, калі мы ўжо крышачку спарадкуемся.
- Ну, яны ведаюць, як бывае, - адказаў адміністратар. - Самі так прыехалі. Не, што вы, камісіі ў нас тут добрыя - усё разумеюць. - Ён дапіў каву і падняўся на ногі. - Мне трэба ісці далей. Калі што вам спатрэбіцца, заходзьце ў кантору. Мяне там заўсёды знойдзеце. Цудоўная кава, дзякуй. - Ён паставіў свой кубак побач з іншымі на скрыню, памахаў рукой і пайшоў уздоўж палатак. Маці чула, як ён загаворваў з людзьмі, што сустракаліся яму па дарозе. Яна апусціла галаву, ледзь стрымліваючы слёзы.
Бацька падышоў да палаткі, ведучы за сабой дзяцей. У вачах у іх яшчэ стаялі слёзыад перанесеных пакут - бацька няшчадна пацёр ім вушы. Яны ішлі прыціхлыя і чысценькія. Скура на асмаленым сонцам носе Ўінфілда аблупілася.
- Вось, - сказаў бацька. - Разам з брудам саскроб яшчэ і два пласты скуры. Давялося крышачку патузаць іх - ніяк стаяць спакойна не хацелі.
Маці акінула дзяцей крытычным позіркам.
- Цяпер на іх і паглядзець прыемна, - прамовіла яна. - Ешце аладкі з падліўкай. Трэба паспець яшчэ прыбраць і тут, і ў палатцы.
Бацька паставіў на скрыню талеркі, сабе і дзецям.
- Дзе гэта Том уладкаваўся на працу, хацеў бы я ведаць.
- Не магу сказаць.
- Ну раз ён знайшоў месца, дык і мы знойдзем.
Да палаткі вярнуўся радасна ўзбуджаны Эл.
- Вось гэта лагер! - усклікнуў ён, узяў аладку і наліў сабе кавы. - Ведаеце, чым тут адзін чалавек займаецца? Прычэп сабе майструе пад жыллё. Вунь там, за тымі палаткамі. У прычэпе ў яго ложкі і печка - усё, што трэба. Жыві сабе ў ім. Вось гэта жыццё! Дзе спыніўся, там і жыві.
Маці сказала:
- Я хацела б лепш жыць у доміку. Як толькі ў нас будзе на што, адразу купім домік.
Бацька сказаў Элу:
- Скончым снедаць, возьмем грузавік і паедзем шукаць працы - ты, я і дзядзька Джон.
- Ага, - сказаў Эл. - Вось каб устроіцца дзе-небудзь у гаражы, калі б знайшлося свабоднае месца. Нічога мне больш не трэба. І каб дастаць яшчэ стары ўцэнены «фордзік». Афарбую ў жоўты колер і буду сабе раз'язджаць прыпяваючы. Бачыў тут прыгожанькую дзяўчынку. Перамаргнуўся з ёю. Прыгожанькая, як чорт ведае што.
Бацька строга сказаў:
- Спярша ты на працу ўладкуйся, а потым ужо катом хадзі.
Дзядзька Джон выйшаў з туалета і паволі падыбаў да палаткі. Маці зірнула на яго і нахмурылася.
- Ты ж не памыўся... - пачала яна і раптам убачыла, што ён зусім хворы, слабы, сумны. - Ідзі пад брызент, паляжы там, - сказала яна. - Ты нездаровы.
Дзядзька Джон пакруціў галавой:
- Не. Я саграшыў, і гэта мне кара. - Ён паныла прысеў каля скрыні, наліў сабе кавы ў кубак.
Маці зняла з патэльні апошнія аладкі і, нібы мімаходзь, сказала:
- Прыходзіў адміністратар лагера, пасядзеў трохі, выпіў кавы кубак.
Бацька паволі падняў на яе вочы:
- Прыходзіў? А што было яму трэба?
- Проста так, час прабавіць, - манерна адказала маці. - Прысеў, выпіў кавы. Сказаў, добрую каву нячаста даводзіцца яму піць, а ў нашай вельмі смачны пах.
- Што ён хацеў? - дапытваўся бацька.
- А нічога не хацеў. Прыйшоў глянуць, як мы тут.
- Нешта не верыцца, - буркнуў бацька. - Напэўна, выведвае, вынюхвае ўсё навокал.
- Ды не! - засердавала маці. - Я адразу разбяру, хто чаго прыходзіць, мяне вучыць не трэба.
Бацька выплюхнуў на зямлю кававую гушчу з кубка.
- Ты пакінь гэту прывычку, - выгаварыла яму маці. - Глянь, якая тут чысціня.
- Тут яшчэ такую чысціню навядуць, што і жыцця не будзе, - прабурчаў бацька, зачэплены за жывое. - Ну канчай, Эл. Паедзем шукаць працу.
Эл выцер рот далонню.
- Я гатовы, - сказаў ён.
Бацька павярнуўся да дзядзькі Джона:
- Ты з намі едзеш?
- Еду.
- Табе ж нездаровіцца.
- Нездаровіцца, але я паеду.
Эл залез у кабіну.
- Трэба недзе гаручага дастаць, - сказаў ён і завёў матор. Бацька і дзядзька Джон селі побач з ім, і грузавік пакаціўся па шырокім праходзе між палатак.
Маці правяла іх позіркам, потым узяла вядро і пайшла з ім да балеяў пад паветкай санітарнага блока. Там яна наліла ў вядро гарачай вады і панесла да палаткі. І калі Ружа Сарона вярнулася з туалета, маці ўжо мыла посуд у вядры.
- Вунь тваё снеданне, на талерцы, - сказала маці і пільна паглядзела на дачку. Валасы ў Ружы Сарона былі мокрыя і гладка прычасаныя, твар чысты, ружовы. На ёй была сіняя сукенка ў маленькія белыя кветкі. На нагах - лодачкі, купленыя яшчэ да вяселля. Ад матчынага позірку яна пачырванела.
- Ты, я бачу, прыняла душ, - сказала маці.
Ружа Сарона хрыплавата загаварыла:
- Я стаю там, раптам прыходзіць жанчына і пачынае мыцца. Ведаеш, як гэта робіцца? Заходзіш у такую загарадку, ну як стойла ў хляве, паварочваеш ручкі, і на цябе вада льецца - гарачая і халодная, якая хочаш. І я памылася!
- Я таксама зараз пайду, - ажывілася маці. - Толькі вось прыбяру тут. Ты мне пакажаш як.
- Я кожны дзень буду мыцца, - не змаўкала Ружа Сарона. - А жанчына гэтая... яна паглядзела на мяне, убачыла мой жывот... і ведаеш, што сказала? Сказала, што сюды кожны тыдзень медыцынская сястра прыходзіць. І што мне абавязкова трэба да яе схадзіць, і яна раскажа мне, што рабіць, каб дзіця было здаровае. Усе жанчыны, кажа, ходзяць да яе. І я таксама пайду. - Яна проста захліпалася ад узрушэння. - І ведаеш яшчэ што? На мінулым тыдні тут адна нарадзіла, і ўвесь лагер урачыста адзначаў гэта, нанеслі дзіцяці бялізны і розных падарункаў... нават калыску... такую плеценую. Не зусім новую, але яе пафарбавалі ў ружовы колер, і яна стала як новенькая. І далі маленькаму імя, торт спяклі. О госпадзі! - Уздыхнуўшы на поўныя лёгкія, яна змоўкла.
Маці сказала:
- Хвала богу, нарэшце мы зажылі сярод сваіх людзей. Зараз пайду прыму душ.
- О, там цудоўна, - сказала Ружа Сарона.
Маці выцірала алавяныя талеркі, ставіла іх адна на адну і гаварыла:
- Мы Джоўды. Нікому ў вочы не зазіраем. Дзед нашага дзеда змагаўся ў рэвалюцыю. Мы былі фермеры, пакуль не запазычыліся банку. І тыя... тыя людзі... яны нядобрае рабілі з намі. Кожны раз, як хто з іх прыходзіў, мне здавалася, быццам плёткай мяне б'юць... і нас усіх. А ў Нідлсе той палісмен?.. Ён нібы што зрабіў са мною, я азлобілася. Мяне самую сорам узяў. А цяпер мне няма чаго саромецца. Народ гэты - наш народ... наш. А адміністратар... прыйшоў, пасядзеў, выпіў кавы... і ўвесь час кажа: «Місіс Джоўд тое, місіс Джоўд гэтае» і «Як вашы справы, місіс Джоўд?» - Маці змоўкла і ўздыхнула. - Я сябе зноў чалавекам адчула. - Яна паставіла на горку талерак апошнюю, пайшла пад брызент і там, пакапаўшыся ў скрыні, дастала з яе свае туфлі і чыстую сукенку. Потым знайшла ў той жа скрыні папяровы пакецік з завушніцамі. Выйшаўшы з-пад брызенту, яна сказала Ружы Сарона: - Як прыйдуць жанчыны, скажы, я хутка вярнуся, - і знікла за вуглом санітарнага блока.
Ружа Сарона цяжка апусцілася на скрыню і глянула на свае вясельныя туфлі - лакіраваныя лодачкі з чорнымі банцікамі з матэрыі. Яна працерла наскі лодачак пальцам і выцерла яго аб спод падола. Нагінаючыся, яна адчула свой жывот, а калі выпрасталася, памацала яго і слаба ўсміхнулася.
Па дарозе да пральні ішла высокая поўная жанчына са скрынкай з-пад яблыкаў - у ёй ляжала нямытая бялізна. Твар у жанчыны быў цёмны ад моцнага загару, вочы чорныя, пільныя, дапытлівыя. Паверх паласатай баваўнянай сукенкі на ёй быў прасторны фартух з мешкавіны, на нагах мужчынскія паўчаравікі са скуры двух колераў. Яна прыкмеціла, як Ружа Сарона пагладзіла сабе жывот, убачыла слабую ўсмешку на яе вуснах.
- Ну! - крыкнула жанчына і весела засмяялася. - Хто, ты думаеш, будзе?
Ружа Сарона зачырванелася і апусціла вочы долу, потым глянула на жанчыну спадылба і злавіла на сабе позірк яе бліскучых чорных вочак.
- Не ведаю, - прамармытала Ружа Сарона.
Жанчына шлёпнула скрынку на зямлю.
- Жывая пухліна, - засмяялася яна, заквактала, як квактуха. - Каго б ты лепш хацела? - дапытвалася яна.
- Сама не ведаю... можа, хлопчыка... Ага, хлопчыка.
- Вы нядаўна прыехалі, га?
- Ноччу... позна ноччу.
- Застаяцеся тут?
- Не ведаю. Калі знойдзем працу, напэўна, застанемся.
Па твары жанчыны прабег цень, і яе маленькія чорныя вочкі наліліся злосцю.
- Калі знойдзецца праца... Так мы ўсе кажам.
- Брат мой сёння раненька ўжо ўладкаваўся.
- Ужо, га? Ну, магчыма, вам і пашчасціла. Толькі будзь асцеражней са шчасцем. Яму нельга давяраць. - Жанчына падышла да Ружы Сарона амаль ушчыльную. - Шчасця толькі ў адным шукай. Другога табе не трэба. Паводзь сябе прыстойна, - з нейкім шаленствам сказала яна. - І бездакорна. Учыніш грэх, глядзі, каб з дзіцем чаго не здарылася. - Жанчына прысела на кукішкі перад Ружай Сарона. - Ганебныя справы творацца ў нашым лагеры, - прамовіла яна злавесна. - Кожную суботу вечарамі ў нас тут танцы бываюць, і не толькі кадрылю тут скачуць. Некаторыя ў абнімку, у прыціск. Сама бачыла.
Ружа Сарона асцярожна сказала:
- Я люблю танцы... кадрылю. - І цнатліва дадала: - А іначай ніколі не танцую.
Жанчына роспачна пакруціла галавой:
- А вось некаторыя танцуюць. Але гасподзь гэтага не даруе, не. І не думай, не даруе.
- Ага, мэм, - ціха падтакнула Ружа Сарона.
Жанчына паклала загарэлую маршчыністую руку ёй на калена, і Ружа Сарона здрыганулася ад яе дотыку.
- А цяпер я хачу цябе папярэдзіць. Хто ў Хрысце жыве, такіх цяпер мала засталося. Кожны вечар у суботу ў нас пачынае гэты іхні струнны аркестр іграць, і, замест таго каб псалмы спяваць, усе пад яго скачуць, віхляюцца... так, так, любачка, віхляюцца. На свае вочы бачыла. Блізка я туды не падыходжу, ні сама, ні сваім не дазваляю. Танцуюць у абнімку, упрытык, так, упрытык. - Жанчына адкінулася назад і нахіліла галаву набок, каб паглядзець, як Ружа Сарона прарэагуе на такі абуральны факт.
- Акторы? - пацікавілася тая трапятліва.
- Не, любачка! Не акторы - тыя даўно ўжо богам праклятыя. Свае ж людзі, з лагера. І дзетак малых, яшчэ неразумных, уцягнулі ў гэта, прымусілі іх прыкідвацца, строіць з сябе немаведама каго. Я туды і блізка не падыходзіла. Але чула ўсё, што яны там гавораць. Сам д'ябал тады гуляе па лагеры.
Ружа Сарона слухала, раскрыўшы рот, шырока расплюшчыўшы вочы.
- У нас у школе аднойчы паказвалі спектакль пра Хрыста-дзіцятка... на Каляды.
- Ну, я не кажу, добра гэта ці дрэнна. Многія прыстойныя людзі лічаць, што пра Хрыста-дзіцятка можна. Толькі... толькі я так прама сказаць не бяруся. Але ў нас тут Хрыста-дзіцяткі не было. Тут грэх быў, падман і д'ябальскае насланнё. Так фанабэрыста расхаджваюць, манернічаюць, гавораць чужымі галасамі. І танцуюць у абнімку, упрытык.
Ружа Сарона ўздыхнула.
- І такіх не адна-дзве парачкі, а шмат, - не змаўкала жанчына. - А чыстых, як ягня, добрапрыстойных можна на пальцах пералічыць. Толькі не думай, што гэтым грэшнікам так усё бог і даруе, ні ў якім разе. Не, любачка! Ён іхнія грахі запісвае на дошку - грэх за грахом, потым падводзіць рысу і складае грэх за грахом. Гасподзь бог наш за ўсімі сочыць, і я таксама сачу. Дзвюх ён ужо з іх пакараў.
Ружа Сарона, ледзь не задыхнуўшыся, вымавіла:
- Пакараў?
Жанчына загаварыла з яшчэ большым жарам:
- Сама бачыла. Была тут адна маладзенькая такая, дзіця насіла, ну якраз, як ты. У п'есе іграла. І яшчэ скакала ў абнімку. І раптам... - голас жанчыны загучаў сурова і злавесна, - яна пачала худнець, сохнуць - скура ды косці... і выкінула дзіця, мёртвае.
- Ой, што вы! - Ружа Сарона збялела.
- Мёртвае і ў крыві. З ёю пасля гэтага ніхто гаварыць не хацеў. Давялося ёй з'ехаць адсюль. Бо даткнешся да граху і сама яго набярэшся, вось так, любачка. І яшчэ адна была, гэтаксама сябе паводзіла. Высахла - скура ды косці, а пасля, ведаеш, што было? Вечарам раптам прапала і няма. Праз два дні паяўляецца. У госці, кажа, ездзіла. А жывата як не было. І ведаеш, што я думаю? Яе, напэўна, адміністратар наш завёз куды-небудзь, там яна і збавілася ад дзіцяці. Ён грахоў не прызнае. Сама ад яго чула. Грэх, кажа, - гэта калі людзі ў голадзе жывуць. Грэх, кажа, - гэта калі людзі ў холадзе жывуць. І яшчэ кажа, - паверыш, сам мне сказаў, - у гэтым ён не бачыць боскай рукі. Гэтыя дзве дзяўчыны, кажа, таму так высахлі, што есці ім не было чаго. Ну і прабрала ж я яго! - Жанчына паднялася і адступіла на крок назад. Вочы ў яе гарэлі. Яна тыцнула напятым указальным пальцам ледзь не ў самы твар Ружы Сарона. - Я кажу яму: «Адыдзі!» Кажу: «Я ведала, што ў нас тут у лагеры д'ябал лютуе. А цяпер ведаю, хто ён, гэты д'ябал. Адыдзі, сатана!» - кажу. І Хрыстом-богам прысягаю, ён адступіў! Закалаціўся ўвесь, пачаў выдыгацца. Кажа: «Калі ласка!» Кажа: «Прашу вас, не прычыняйце людзям няшчасця». А я яму: «Няшчасця? А як наконт душы іхняй? А што вы скажаце пра мёртвых дзіцянятак, пра тых дзвюх няшчасных грэшніц, што пагубілі сябе праз вашыя тэатры?» Ён толькі паглядзеў на мяне, выскаліў зубы, нібы яго занудзіла, і пайшоў прэч. Зразумеў, што перад ім сведка богава. Кажу яму: «Я госпаду нашаму памагаю сачыць за тым, што тут творыцца. Кары яго ніхто не міне - ні ты, ні ўсе іншыя грэшнікі». - Жанчына падняла скрынку з бруднай бялізнай. - Беражыся. Я папярэдзіла цябе. І дзіцятка беднае беражы, што ў цябе ў чэраве, унікай граху. - Яна велічна пакрочыла прэч, і вочы яе ззялі дабрачыннасцю.
Ружа Сарона правяла яе позіркам, уткнулася тварам у далоні і ціхенька заплакала. Раптам пачула побач мяккі голас. Яна засаромлена падняла галаву. Перад ёю стаяў маленькі чалавечак у белым - адміністратар лагера.
- Не хвалюйся, - сказаў ён. - Ты не хвалюйся.
Слёзы заслалі ёй вочы.
- І я так рабіла, - сказала яна. - Я танцавала ў абнімку. Толькі ёй не прызналася. Я ў Саліса так танцавала. З Коні.
- Не хвалюйся, - зноў сказаў адміністратар.
- Яна кажа, я выкіну.
- Ведаю, што яна кажа. Я з яе вока не спускаю. Наогул жанчына яна нядрэнная, толькі людзям ад яе жыцця няма.
Ружа Сарона шмарганула носам:
- Тут, у лагеры, пры ёй дзве жанчыны, кажа, выкінулі.
Адміністратар прысеў перад ёю на кукішкі.
- Вось што, - сказаў ён. - Паслухай, што я табе скажу. Гэтых маладых жанчын я ведаю. Яны вельмі галадалі і вельмі стамляліся. Праца ў іх была цяжкая. І яшчэ яны трэсліся на грузавіках па ўхабістай дарозе. Здароўе ў іх было няважнае. Віны за імі ніякай няма.
- А яна казала...
- Супакойся. Жанчына гэтая любіць людзей трывожыць.
- Але яна кажа, вы - д'ябал.
- Ведаю. Гэта таму, што я не дазваляю ёй атручваць людзям жыццё. - Ён падняўся на ногі і лёгенька паляпаў Ружу Сарона па плячы. - Ты не хвалюйся. У яе словах праўды няма, - сказаў ён і шпарка пайшоў прэч.
Ружа Сарона доўга глядзела яму ў спіну; хударлявыя плечы яго паторгваліся ў такт крокам. Яна ўсё яшчэ праводзіла вачамі яго тонкую постаць, калі вярнулася маці - чыстая, ружовая, з вільготнымі яшчэ валасамі, закручанымі на патыліцы вузлом. На ёй была ўзорыстая сукенка, на нагах старыя, патрэсканыя туфлі, у вушах маленькія завушніцы.
- Памылася, - сказала яна. - Стаю пад душам, цёплая вада так і льецца, так і залівае мяне ўсю. Адна жанчына там была і кажа, калі хочаш, хоць кожны дзень хадзі мыцца. А жанчыны з камісіі... яшчэ не прыходзілі?
- Не, - адказала Ружа Сарона.
- А ты так і сядзіш без справы, зусім нічога не прыбрала! - Маці падхапіла талеркі са скрыні. - Трэба парадак навесці. Жвавей паварочвайся! На, мяшок бяры, падмяці тут хоць трохі. - Яна сабрала ўсё кухоннае начынне, паклала патэльню і кацялок у скрыню, а скрыню засунула пад брызент. - Пасцелі прыбяры, - загадала яна. - Ну і вадзіца, скажу я табе, ніколі я большай асалоды не адчувала.
Ружа Сарона вяла выконвала яе загады.
- Як ты думаеш, ма, Коні сёння вернецца?
- Можа, вернецца... а можа, і не. Сказаць не магу.
- А ён ведае, дзе нас шукаць?
- Пэўна ж, ведае.
- Ма... а не можа так быць... што яго забілі там, калі лагер палілі?
- Каго-каго, толькі не яго, - упэўнена адказала маці. - Ён, калі толькі захоча, адкуль заўгодна выберацца - спрытны, як заяц, і хітры, як ліс.
- Хутчэй бы ўжо прыйшоў.
- Калі прыйдзе, тады і прыйдзе.
- Ма...
- Ты б лепш справай занялася.
- Як ты думаеш, танцаваць і ў п'есах іграць - грэх? Праз гэта я не выкіну?
Маці спыніла ўбіранне і падперла рукі ў бокі.
- Гэта яшчэ што за размовы? Ты ні ў якіх п'есах не іграла.
- А некаторыя тут іграюць, і адна маладая выкінула... мёртвае... і ў крыві, і нібыта гэта быў суд божы.
Маці ўтаропілася на дачку.
- Хто табе такое нагаварыў?
- Адна жанчына, што міма праходзіла. А гэты маленькі, у белым, падышоў і сказаў, што ўсё зусім не ад таго.
Маці нахмурылася.
- Разашарна, - сказала яна, - кінь сама сябе грызці. Табе, відаць, захацелася да слёз сябе давесці. Што з табой такое стала, проста не магу зразумець. У нас у сям'і такіх ніколі не было. Няйначай, гэта Коні цябе так настроіў. Яму заўсёды былі цесныя яго штонікі. - І сурова дадала: - Ты, Разашарна, не адна тут. Акрамя цябе яшчэ людзі ёсць. Знайдзі сваё месца сярод іх. Я сустракала некаторых - яны так паверылі ў свае грахі, што інакш як нікчэмнасцямі сябе перад богам не ўяўлялі.
- Але ж, ма...
- Ну хопіць. Закрый рот і бярыся за што-небудзь. Не такая ты ўжо важная персона, не такая ты распусная, каб гасподзь бог за цябе вельмі хваляваўся. А калі не перастанеш без дай прычыны мучыць сябе, дык я табе так заляплю! - Маці змяла попел у ямку пад ачагом і абмахнула камяні, пакладзеныя па краях. Тут яна ўбачыла, што па дарожцы да іх ідзе камісія. - Рабі што-небудзь, - сказала яна дачцэ. - Вунь жанчыны ўжо да нас ідуць. Што-небудзь рабі, каб я магла паганарыцца сваёй дачкой. - Яна больш не глядзела на дарожку, але адчувала, што камісія набліжаецца да іх.
А што гэта камісія, сумненняў быць не магло. Тры дамы - чысценькія, у прыгожых сукенках: адна сухарлявая, з прамымі валасамі, у акулярах у металічнай аправе; другая нізенькая, сівая, кучаравая, з маленькім далікатным роцікам; а трэцяя - вялізная, як слон, грудастая, шыраказадая, з тоўстымі сцёгнамі, на выгляд уладная і ўпэўненая ў сабе. Камісія ступала між палатак з пачуццём уласнай годнасці.
Маці падгадала так, што, калі яны падышлі, яна стаяла да іх спінай. Жанчыны спыніліся, развярнуліся і выстраіліся ў рад. І вялізная дама прагула:
- Добрай раніцы! Місіс Джоўд, гэта вы?
Маці крутнулася да іх, быццам захопленая знянацку.
- Ага, так, так. Адкуль вам вядома маё прозвішча?
- Мы - камісія, - абвясціла веліканка. - Жаночая камісія санітарнага аддзялення нумар чатыры. Нам паведамілі ваша прозвішча ў канцылярыі.
Маці замітусілася:
- Мы яшчэ не паспелі як след прыбрацца. Вы пасядзіце, калі ласка, пакуль я згатую каву. Я пачастую вас - мне гэта вялікі гонар.
Таўстушка сказала:
- Джэсі, адрэкамендуйце нас. Скажыце гаспадыні, як нас зваць. Джэсі - наша старшыня, - паясніла яна.
Джэсі прамовіла афіцыйным тонам:
- Місіс Джоўд, гэта Эні Літлфілд, гэта - Эла Самерс, а я - Джэсі Буліт.
- Вельмі радая пазнаёміцца, - сказала маці. - Вы, можа, прысядзеце? Хоць, праўда, сесці няма на што, - спахапілася яна. - Усё ж каву я прыгатую.
- Не, не, - цырымонна сказала Эні. - Не турбуйцеся. Мы зайшлі паглядзець, як вы тут уладкаваліся. Хацелася б, каб вы адчувалі сябе як дома.
Джэсі Суліт строга спыніла яе:
- Эні, не забывайцеся, калі ласка, хто тут старшыня.
- Добра, добра. Але наступны тыдзень старшынёй буду я.
- Вось і чакайце наступнага тыдня. Мы кожны тыдзень мяняемся, - растлумачыла Джэсі маці.
- Можа, вы ўсё ж вып'еце кавы? - збянтэжана запыталася маці.
- Не, дзякуй. - Джэсі цвёрда ўзяла ўладу ў свае рукі. - Спярша мы пакажам вам санітарны блок, а потым, калі пажадаеце, запішам вас у жаночы клуб, даручым якую-небудзь работу. Запісвацца, канешне, неабавязкова.
- А за гэта... трэба шмат заплаціць?
- Нічога плаціць не трэба, толькі працаваць. А калі з вамі тут пазнаёмяцца бліжэй, тады, магчыма, і ў камісію выберуць, - умяшалася Эні. - Вось, напрыклад, Джэсі - яна ўваходзіць у лагерную камісію. Яна - уплывовы член гэтай камісіі.
Джэсі горда ўсміхнулася.
- Абралі аднагалосна, - паведаміла яна. - Ну дык, місіс Джоўд, зараз мы раскажам вам, якія ў нас тут у лагеры парадкі.
Маці сказала:
- А гэта дачка мая - Разашарна.
- Добрага здароўя, - прагаварылі ўсе тры жанчыны разам. - Хадзем і вы з намі.
Па дарозе веліканка Джэсі пачала тлумачыць, і ў голасе яе гучала годнасць і лагода. Яна загадзя адрэпеціравала сваю прамову.
- Не падумайце толькі, місіс Джоўд, што мы ўмешваемся ў вашы справы. У нас у лагеры шмат месцаў агульнага карыстання. І мы ўвялі некаторыя правілы. Вось зараз мы зойдзем у санітарны блок. У ім усе бываюць, і ўсе абавязаны захоўваць там чысціню. - Яны падышлі да паветкі, дзе знаходзіліся балеі - іх было дваццаць. Восем былі занятыя - схіліўшыся над імі, жанчыны мылі бялізну, і на чыстай цэментавай падлозе кучкамі ляжалі выкручаныя рэчы. - Сюды можаце прыходзіць у любы час, - тлумачыла Джэсі. - Адно толькі - прыбірайце за сабой.
Жанчыны каля балеяў з цікаўнасцю паглядалі на іх. Джэсі голасна сказала:
- Гэта місіс Джоўд і Разашарна. Прыехалі да нас жыць.
Жанчыны хорам прывіталіся з маці, і яна крыху прысела ў паклоне і прамовіла:
- Вельмі радая пазнаёміцца.
Джэсі павяла камісію ў прыбіральню і душавую.
- Я ўжо тут была, - сказала маці. - І памылася нават пад душам.
- Душы на тое і зробленыя, каб пад імі мыцца, - прагаварыла Джэсі. - Тут такія ж правілы - трэба прыбіраць за сабой. Кожны тыдзень прызначаюцца новыя дзяжурныя, і яны наводзяць тут поўную чысціню. Магчыма, і вам давядзецца падзяжурыць. Толькі трэба з сабой мыла браць.
- Прыйдзецца купіць, - сказала маці. - У нас усё скончылася.
Голас Джэсі прагучаў амаль са свяшчэнным захапленнем:
- А гэтым вы калі-небудзь карысталіся? - Джэсі паказала на ватэрклазеты.
- Ага, мэм. Сёння раніцай.
Джэсі ўздыхнула:
- Што ж, добра...
Загаварыла Эла Самерс:
- Тут у нас на мінулым тыдні...
- Місіс Самерс, пра гэта раскажу я, - строга абарвала яе Джэсі.
Эла ўступіла:
- Добра, добра.
Джэсі сказала:
- На мінулым тыдні, калі вы старшынствавалі, усё расказвалі вы. А цяпер я была б вам вельмі ўдзячная, каб вы памаўчалі.
- Добра, самі раскажыце пра тую жанчыну, - згадзілася Эла.
- Уласна кажучы, - пачала Джэсі, - нашай камісіі не пасуе пляткарыць, але імёнаў я называць не буду. На мінулым тыдні сюды зайшла адна новенькая - камісія не паспела яшчэ з ёю пагаварыць. Прыходзіць, упіхвае мужавы штаны ва ўнітаз і кажа: «Нешта вельмі занізка і зацесна. У тры пагібелі гнешся. Няўжо не маглі прыладзіць вышэй?» - Члены камісіі ўсміхнуліся з пачуццём уласнай перавагі.
Эла ўставіла:
- Кажа: «Сюды зараз шмат не ўлезе». - Эла стойка вытрымала суровы позірк Джэсі.
Джэсі расказвала далей:
- У нас вечныя непрыемнасці з туалетнай паперай. Па нашых правілах, выносіць яе адсюль не дазваляецца. - Яна гучна прыцмокнула языком. - На туалетную паперу скідаецца ўвесь лагер. - Памаўчаўшы момант, яна паведаміла: - Блок нумар чатыры пераводзіць паперы больш за ўсіх. Яе, пэўна, нехта крадзе. Пра гэта на агульным сходзе жанчын гаварылі: «У жаночым аддзяленні блока нумар чатыры пераводзяць занадта шмат паперы». І гэта пры ўсіх!
Маці слухала стаіўшы дыханне.
- Крадуць паперу?.. Нашто?
- Ну, такія непрыемнасці здараліся і раней, - сказала Джэсі. - Апошні раз яе ўзялі тры дзяўчынкі, каб выразаць з яе папяровыя лялькі. Што ж, мы іх злавілі. Але куды прападае папера цяпер, невядома. Не паспееш павесіць рулон, а ўжо нічога няма. Пра гэта на сходзе гаварылі. Адна жанчына прапанавала правесці званок, каб ён званіў кожны раз, як крутнецца рулон. Тады можна было б прасачыць, хто колькі бярэ. - Джэсі пакруціла галавой: - Проста не ведаю, як быць. Увесь тыдзень мне гэта спакою не дае. У блоку нумар чатыры нехта ўвесь час крадзе паперу.
З парога пачуўся жаласны голас:
- Місіс Буліт!.. - Члены камісіі павярнулі ў той бок галовы. - Місіс Буліт, я ўсё чула, што вы тут гаварылі. - У дзвярах стаяла жанчына, уся чырвоная і спатнелая. - На сходзе я не адважылася прызнацца, місіс Буліт. Ну не магла. Абсмяялі б ці яшчэ што.
- Пра што гэта вы? - Джэсі пайшла да яе.
- Ну, можа... мы... усё гэта мы... Але ж мы не крадзём, місіс Буліт. - Джэсі падступала да яе ўсё бліжэй, і твар усхваляванай жанчыны, якая прызналася ў сваёй віне, цяпер усыпалі буйныя кроплі поту. - А што нам было рабіць, місіс Буліт?
- Скажыце толкам, у чым справа, - патрабавала Джэсі. - Наш блок абняславіўся праз гэту туалетную паперу.
- Цэлы тыдзень, місіс Буліт. Цэлы тыдзень мы не ведаем, што з гэтым рабіць. А ў мяне, вы ж ведаеце, пяць дачок.
- Дык што ж яны з паперай робяць? - грозна запыталася Джэсі.
- Толькі карыстаюцца ёю. Слова гонару, толькі карыстаюцца.
- Як жа яны могуць! Чатырох-пяці кавалкаў зусім дастаткова за дзень. Што з імі такое?
Жанчына прамямліла:
- Панос. Ва ўсіх пяці. Мы амаль зусім без грошай. Яны наеліся няспелага вінаграду. У іх страшэнны панос. Кожныя дзесяць хвілін бегаюць. - І заступілася за сваіх дачок:- Але паперу яны не крадуць.
Джэсі перавяла дух.
- Дык трэба было адразу нам сказаць. Проста вы абавязаны былі сказаць. Праз ваша маўчанне ганьба лягла на блок нумар чатыры. А панос можа быць у кожнага.
Жанчына жаласна заныла:
- Не слухаюцца - ядуць яшчэ зялёны вінаград. А панос з дня на дзень робіцца ўсё мацнейшы.
Эла Самерс выпаліла:
- Медпункт. Ёй трэба звярнуцца ў медпункт.
- Эла Самерс, - прамовіла Джэсі, - я вам апошні раз нагадваю - вы не старшыня. - Яна зноў павярнулася да маленькай разгубленай жанчыны: - У вас грошай няма, місіс Джойс?
Жанчына засаромлена апусціла вочы:
- Няма. Але мы, магчыма, хутка знойдзем працу.
- Чаго вы галаву апусцілі? Нічога процізаконнага тут няма, - супакойвала яе Джэсі. - Збегайце ў Уідпэтчскую краму і вазьміце сабе прадуктаў. Лагер мае там крэдыт на дваццаць даляраў. Можаце ўзяць на пяць. А калі атрымаеце працу, вернеце доўг у цэнтральную камісію. Вам гэта было вядома, - строга прамовіла яна. - Як жа вы давялі да таго, што дочкі вашы галадаюць?
- Дабрачыннасцю мы ніколі не карысталіся, - адказала місіс Джойс.
- Гэта не дабрачыннасць, вы добра ведаеце, - угневалася Джэсі. - Ужо не раз было гаворана. У нашым лагеры дабрачыннасці няма. Мы яе не пацерпім. Дык збегайце ў краму і вазьміце сабе прадуктаў, а рахунак прынясіце мне.
Місіс Джойс нясмела запыталася:
- А калі так здарыцца, што мы не зможам выплаціць? У нас даўно няма працы.
- Як будзе магчымасць, выплаціце. А не будзе - гэта ні вас, ні нас не датычыцца. Адзін чалавек паехаў з лагера, а праз два месяцы грошы прыслаў. Вы не маеце права дапускаць, каб вашы дзяўчаткі галадалі ў нас у лагеры.
Місіс Джойс спалохана пазірала на Джэсі.
- Слухаю, мэм, - вымавіла яна.
- Абавязкова вазьміце ім сыру ў краме, - загадала Джэсі. - Гэта добра ад паносу.
- Слухаю, мэм. - І місіс Джойс шмыгнула за дзверы.
Джэсі разгневана павярнулася да членаў камісіі:
- Яна не мае права так фанабэрыцца. І перад кім? Перад сваімі людзьмі.
Эні Літлфілд сказала:
- Яна тут нядаўна. Можа, проста не ведала. Можа, раней ёй даводзілася карыстацца дабрачыннасцю раз ці два. І не затыкайце мне, калі ласка, рот, Джэсі. Я маю права гаварыць. - Эні зрабіла паўпавароту да маці. - Калі чалавек адчуў на сабе, што такое дабрачыннасць, гэта як кляймо застанецца на ім на ўсё жыццё. Наша дапамога не дабрачыннасць, а ўсё-такі яе ніколі не забудзеш. Ручаюся, Джэсі не паспытала гэтага на сабе.
- Не, - пацвердзіла Джэсі.
- А мне давялося, - гаварыла Эні. - Мінулай зімой. Мы пакутавалі ад голаду - я, муж мой і малыя. А тады заладзілі дажджы. Нехта нам параіў звярнуцца да Арміі выратавання. - Вочы ў Эні загарэліся лютасцю. - Мы галадалі... а яны прымусілі нас поўзаць перад імі дзеля абеду. Яны прынізілі нас. Яны... Ненавіджу іх! Можа, і місіс Джойс карысталася дабрачыннасцю. Можа, яна не ведала, што ў нас тут зусім не тое. У нашым лагеры, місіс Джоўд, мы нікому не дазволім займацца дабрачыннасцю. Не дазволім, каб хто-небудзь дапамагаў другому. Можна аддаваць адміністрацыі лагера, а яна ўжо раздасць каму трэба. А дабрачыннасці мы не дапусцім! - Голас у Эні зрываўся ад шаленства. - Ненавіджу іх! - паўтарыла яна. - Я ніколі не бачыла свайго мужа прыбітым, а гэтыя... гэтыя з Арміі выратавання дамагліся свайго.
Джэсі кіўнула галавой.
- Я чула пра такое, - ціха прамовіла яна. - Людзі расказвалі... Ну, павядзём місіс Джоўд далей.
Маці сказала:
- Як тут усё добра.
- Пойдзем у швейную, - прапанавала Эні. - У іх там дзве машыны. Яны і коўдры прашываюць, і сукенкі шыюць. Вам, напэўна, самой захочацца там папрацаваць.
Як толькі да маці прыйшла камісія, Руці і Ўінфілд непрыкметна рэціраваліся далей ад вачэй дарослых.
- Можа, лепш пайсці з імі, паслухаць? - сказаў Уінфілд.
Руці схапіла яго за локаць:
- Ну не! Нас праз гэтых сволачаў вымылі. З імі я не пайду.
Уінфілд сказаў:
- Ты на мяне нагаварыла пра прыбіральню. А я нагавару, як ты абазвала гэтых цётак.
Па твары Руці прабег цень страху:
- Не трэба. Я ведала, што ты не зламаў, таму і нагаварыла.
- Нічога ты не ведала, - адрэзаў Уінфілд.
Руці сказала:
- Давай паглядзім усё, што ёсць тут. - Яны пайшлі ўздоўж палатак і, бянтэжліва азіраючыся, заглядалі ў кожную. У канцы праходу на роўным месцы была расчышчана пляцоўка для кракета. З паўтузіна дзяцей былі сур'ёзна занятыя гульнёй. На ўслончыку каля крайняй палаткі сядзела пажылая жанчына і сачыла за імі. Руці з Уінфілдам прыпусцілі трушком.
- Прыміце нас у гульню! - крыкнула Руці. - Мы таксама будзем гуляць.
Дзеці ўзнялі на яе вочы. Дзяўчынка з коскамі, як парасячыя хвосцікі, сказала:
- Калі новую пачнём.
Руці пагрозліва ступіла на пляцоўку.
- А я хачу цяпер. - Парасячыя хвосцікі моцна ўчапіліся за малаток. Руці падскочыла да яе, ударыла далонню, штурхнула і вырвала малаток з рук дзяўчынкі. - Сказала, што буду гуляць, значыць, буду, - пераможна абвясціла яна.
Пажылая жанчына паднялася з услончыка і падышла да пляцоўкі. Руці люта насупілася і мацней абхапіла рукамі малаток. Жанчына сказала:
- Няхай гуляе. Зрабіце, як на мінулым тыдні з Ральфам.
Дзеці пакідалі малаткі і моўчкі пайшлі з пляцоўкі. Непадалёку спыніліся і сталі глядзець на Руці абыякавымі вачамі. Правёўшы іх позіркам, Руці ўдарыла малатком па шары і пабегла за ім.
- Уінфілд, давай сюды! Бяры малаток! - крыкнула яна і са здзіўленнем уставілася на брата. Уінфілд стаяў разам з дзецьмі збоку ад пляцоўкі і глядзеў на яе такімі ж, як у іх, абыякавымі вачамі.
З дзёрзкім выклікам Руці зноў ударыла па шары. Над пляцоўкай узняўся пыл. Дзяўчынка прыкінулася, што ёй вельмі весела. А дзеці ўсё стаялі і пазіралі на яе. Руці паставіла побач два шары і ўдарыла адразу па абодвух, стала спінай да гледачоў, потым зноў павярнулася тварам да іх. І раптам пайшла на дзяцей з малатком у руцэ.
- Ідзіце гуляць! - скамандавала яна.
Дзеці моўчкі адступілі перад ёю. Яна крыху пастаяла, утаропіўшыся на іх, тады кінула малаток і з плачам пабегла да сваёй палаткі. Дзеці вярнуліся на пляцоўку.
Парасячыя хвосцікі крыкнулі Ўінфілду:
- Калі пачнём новую, можаш з намі гуляць.
Пажылая жанчына сказала:
- Калі яна вернецца і будзе добра сябе паводзіць, няхай і яна гуляе з вамі. Ты, Эла, сама была такая.
Гульня ўзнавілася, а Руці ляжала ў палатцы і горка плакала.
Грузавік ехаў па прыгожых мясцінах, міма фруктовых садоў, дзе пачалі ўжо ружавець персікі, міма вінаграднікаў, дзе на лозах ледзь зазелянеліся гронкі, пад арэхавымі дрэвамі, што працягнулі сваё вецце да сярэдзіны дарогі. Каля кожных варот у сад ці вінаграднік Эл прытарможваў, і на кожных варотах вісела аб'ява: «Рабочыя не патрабуюцца. Уваход забаронены».
Эл загаварыў:
- Калі фрукты паспеюць, та, праца тут будзе. Але як у іх дзіўна тут - ты і спытацца яшчэ не паспеў, а яны ўжо адказваюць, што працы няма. - Ён вёў грузавік на малой скорасці.
Бацька сказаў:
- Можа б, нам усё ж зайсці спытацца? Можа, яны ведаюць, дзе праца ёсць? Давай паспрабуем.
Па краі дарогі ішоў чалавек у сінім камбінезоне і сіняй кашулі. Эл параўняўся з ім і затармазіў.
- Гэй, містэр! Можа, ведаеце, дзе тут праца ёсць? - крыкнуў ён.
Чалавек спыніўся і шырока ўсміхнуўся; у роце ў яго не было пярэдніх зубоў.
- Не, - адказаў ён. - Можа, вы ведаеце, дзе яна ёсць? Я цэлы ўжо тыдзень тут кружу і яшчэ ні на што не натрапіў.
- Вы з урадавага лагера? - запытаўся Эл.
- Ага, з яго.
- Дык залазьце ў кузаў. Пашукаем разам.
Чалавек пералез цераз борт і саскочыў на насціл.
Бацька сказаў:
- Нешта мне падказвае, што нічога мы не знойдзем. Але пашукаць усё ж трэба. Толькі вось дзе, невядома.
- Шкада, не распыталі ў лагеры, - уздыхнуў Эл. - Ну, як адчуваеш сябе, дзядзька Джон?
- Баліць, - адказаў Джон. - Кругом усё баліць, а будзе яшчэ горш. Трэба мне ісці ад вас, а то толькі няшчасце вам, усёй сям'і, прыношу ў пакаранне за свае грахі.
Бацька паклаў руку яму на калена.
- Слухай, - сказаў ён, - не рабі глупстваў. У нас і так вялікія страты - дзед з бабкай памерлі, Ной і Коні ўцяклі, а прапаведніка засадзілі ў турму.
- У мяне такое адчуванне, што прапаведніка гэтага мы яшчэ ўбачым, - сказаў дзядзька Джон.
Эл пакратаў булавешку на рычагу пераключэння перадач.
- Табе нездаровіцца, вось ты і адчуваеш рознае такое, - сказаў ён. - Ну хопіць, к чорту! Паехалі назад, з людзьмі пагаворым, даведаемся, дзе, можа, праца ёсць. А то ўсё роўна, што баброў пад вадой лавіць. - Ён спыніў машыну, высунуўся з кабіны і крыкнуў, павярнуўшы галаву назад: - Гэй! Паслухай! Мы вяртаемся ў лагер, там спытаемся, дзе яны працуюць. А так толькі бензін дарэмна палім.
Пасажыр перагнуўся цераз борт.
- Гэта мне якраз, - сказаў ён. - Я свае капыты па самыя шчыкалаткі змуляў. І сёння нават макавай расінкі ў роце не было.
Эл развярнуў машыну пасярод дарогі і паехаў назад.
Бацька сказаў:
- Маці наша вельмі расстроіцца - вунь Том уладкаваўся ж адразу.
- Можа, ён нідзе нічога не знайшоў, - сказаў Эл. - Можа, таксама, як і мы, шукае. Мне каб куды-небудзь у гараж. Я хутка навучуся, такая работа па мне.
Бацька нешта прабурчаў, і да самага лагера ніхто больш ні слова не прамовіў.
Калі камісія пайшла, маці села на скрыню каля палаткі і разгублена глянула на Ружу Сарона.
- Вось яно як... - прагаварыла яна. - Вось яно як... даўно ўжо я сябе так добра не адчувала. Бачыла, якія яны далікатныя ў абыходжанні?
- Я буду працаваць у дзіцячым пакоі, - сказала Ружа Сарона. - Яны мне прапанавалі. Пагляджу, як даглядаць маленькіх, і сама буду.
Маці здзіўлена паглядзела на яе і паківала галавой. Потым сказала:
- Вось было б добра, каб мужчыны нашы працу знайшлі, га? Працавалі б і хоць трохі грошай у дом прыносілі... - Вочы яе ўставіліся кудысьці ўдалячынь. - Яны недзе працавалі б, а мы тут, і людзі кругом добрыя. А як крыху збяром грошай, куплю сабе пліту кухонную - невялічкую, але добрую. Яны недарагія. Потым купім сабе палатку - вялікую, ну такую, каб цесна не было, і, можа, ужываныя спружынныя матрацы. А пад гэтым брызентам будзем толькі есці. Па суботах на танцы хадзіць будзем. Кажуць, і знаёмых можна ў госці запрашаць. Шкада, у нас тут нікога няма. У мужчын, магчыма, прыяцелі завядуцца.
Ружа Сарона акінула позіркам дарогу між палатак.
- Гэта жанчына, якая сказала, што я не данашу дзіця... - пачала яна.
- Перастань, - перарвала яе маці.
Ружа Сарона ціха сказала:
- Вунь яна ідзе. Сюды, здаецца. Ага! Ма, не дазваляй ёй...
Маці абярнулася і ўбачыла жанчыну, якая падыходзіла да іх.
- Добрага вам, - павіталася жанчына. - Я - місіс Сандры. Лізбет Сандры. Раніцай з вашай дачкой я ўжо бачылася.
- Дзень добры, - павіталася і маці.
- Ці шчаслівыя вы ў бозе?
- Нічога, шчаслівыя, - адказала маці.
- Ці сыходзіла на вас ласка боская?
- Сыходзіла. - Твар у маці быў зацяты, насцярожаны.
- Вось і добра, - сказала Лізбет. - Грэшнікі ўвабраліся тут у вялікую сілу. Вы трапілі ў жудаснае месца. Кругом тут адно паганства. Паганыя людзі, паганыя ўчынкі. Шчырым хрысціянам няма ўжо як цярпець. Навокал адны грэшнікі.
Маці крыху пачырванела, сцяла вусны.
- А як я пагляджу, людзі тут прыстойныя, - суха прамовіла яна.
Місіс Сандры вылупіла на яе вочы.
- Прыстойныя? - закрычала яна. - Хіба ж прыстойныя людзі будуць танцаваць у абнімку? Кажу вам: у гэтым лагеры душу не выратуеш. Учора я была на малітоўным сходзе ва Ўідпэтчы. Ведаеце, што прапаведнік нам гаварыў? Ён сказаў: «Лагер гэты - гнездзішча бязбожнікаў. Беднякі захацелі жыць, як багатыя! Ім, кажа, трэба лямантаваць і енчыць, замольваючы грахі, а яны танцуюць у абнімку!» Вось што ён гаворыць. «Хто цяпер не з намі тут, той закаранелы грэшнік», кажа. Як прыемна было яго слухаць. Мы ведалі, што нам не пагражае кара, мы ж не танцуем.
Маці была ўся чырвоная. Яна памалу паднялася са скрыні і стала тварам у твар з місіс Сандры.
- Ідзі! - загадала яна. - Ідзі прэч зараз жа, пакуль я грэху на душу не ўзяла, не паслала цябе, куды трэба. Ідзі - лямантуй і енчы.
Місіс Сандры разявіла рот, потым падалася назад і раптам злосна прагаварыла:
- Я думала, вы добрыя хрысціяне.
- А мы і ёсць такія.
- Не, вы грэшнікі, вам толькі ў пекле гарэць, усім вам! Я ўсё раскажу на малітоўным сходзе. Я ўжо бачу, як вашы чорныя душы гараць у пякельным полымі. І нявіннае дзіця ў яе чэраве таксама гарыць.
З вуснаў Ружы Сарона сарваўся працяглы немы крык. Маці нахілілася і падняла з зямлі палку.
- Ідзі прэч! - сурова сказала яна. - І каб духу твайго тут не было. Такіх, як ты, я ведаю. Вы ўсё стараецеся апошнюю радасць у чалавека забраць. - Яна ішла проста на місіс Сандры.
Тая адступала перад ёю і раптам закінула галаву і завыла. Вочы ў яе закаціліся, плечы ходырам захадзілі, рукі заматляліся па баках, з кутка рота выступіла густая, цягучая сліна. Яна абазвалася яшчэ і яшчэ раз дзікім, нечалавечым крыкам. З палатак выйшлі людзі, падышлі і абступілі яе, перапалоханыя, прыціхлыя. Жанчына паволі асела на калені, і яе крыкі перайшлі ў перарывістыя булькатлівыя стогны. Яна павалілася на бок, рукі і ногі ў яе сутаргава закалаціліся. Між расплюшчаных павек віднеліся бялкі вачэй.
Адзін мужчына ціха сказаў:
- Святы дух. На яе сышоў святы дух.
Маці стаяла, пазіраючы на цела, што білася на зямлі ў сутаргах.
Да палаткі няспешна падышоў маленькі адміністратар.
- Што здарылася? - запытаўся ён. Натоўп расступіўся, прапускаючы яго наперад. - Вось бяда! - сказаў ён. - Хто-небудзь памажыце аднесці яе ў палатку.
Людзі моўчкі пераступалі з нагі на нагу. Нарэшце двое мужчын паднялі жанчыну з зямлі - адзін падхапіў яе пад пахі, другі ўзяў за ногі - і панеслі. Натоўп паволі пасунуўся за імі. Ружа Сарона пайшла пад брызент, лягла на матрац і закрыла твар коўдрай.
Адміністратар глянуў на маці, убачыў палку, якую яна трымала ў руцэ, і слаба ўсміхнуўся:
- Вы набілі яе?
Маці ўсё яшчэ пазірала ўслед натоўпу. Яна паволі пакруціла галавой:
- Не... толькі збіралася. Сёння яна ўжо другі раз дачку маю пужае.
Адміністратар сказаў:
- Не трэба, не біце яе. Яна хворая, - і ціха дадаў: - Хутчэй бы ўжо паехала адсюль, і ўся яе сям'я. Ад яе адной больш непрыемнасцей, чым ад усіх астатніх разам.
Маці ўжо авалодала сабой.
- Хай толькі зноў заявіцца сюды, я наб'ю яе. За сябе не ручаюся. Я не дам ёй страшыць дачку.
- Не хвалюйцеся, місіс Джоўд. Больш вы яе тут не ўбачыце. Яна толькі навічкоў апрацоўвае. Да вас ужо больш не прыйдзе. Яна лічыць вас грэшніцай.
- Я і ёсць грэшніца, - спакойна сказала маці.
- Правільна. Усе мы грэшнікі, толькі не ў тым сэнсе, як яна думае. Яна хворая, місіс Джоўд.
Маці з удзячнасцю глянула на адміністратара і крыкнула дачцэ:
- Ты чуеш, Разашарна? Яна хворая. Вар'ятка. - Але Ружа Сарона не падняла галавы. Маці сказала: - Я папярэджваю вас, містэр: калі яна яшчэ раз прыйдзе, мне давяраць нельга. Я наб'ю яе.
Адміністратар крыва ўсміхнуўся:
- Я разумею вас. І ўсё ж пастарайцеся стрымаць сябе. Большага ад вас я нічога не прашу - толькі пастарайцеся стрымацца. - Ён няспешна пайшоў да палаткі, у якую занеслі місіс Сандры.
Маці зайшла пад навес і села каля Ружы Сарона.
- Ну, глянь на маці, - сказала яна, але Ружа Сарона не варухнулася. Маці асцярожна адкінула коўдру з галавы дачкі. - Жанчына гэтая амаль вар'ятка. Ты ёй не вер.
Ружа Сарона прашаптала ў жаху:
- Яна як сказала пра пекла... я адчула, быццам у мяне ўсярэдзіне ўсё гарыць.
- Гэтага быць не можа, - сказала маці.
- У мяне зусім сілы няма, - прашаптала Ружа Сарона. - Колькі ўжо ўсяго здарылася, я так стамілася... Спаць хачу. Хачу спаць.
- Ну дык спі. Месца тут добрае. Можаш паспаць.
- А раптам яна зноў прыйдзе?
- Не прыйдзе. Я сяду каля палаткі і блізка яе не падпушчу, калі яна сюды паткнецца. Ты паспі, табе трэба адпачыць, бо неўзабаве пойдзеш працаваць у дзіцячы пакой.
Маці цяжка паднялася на ногі, выйшла з-пад брызенту, села на скрыню, абаперлася локцямі аб калені і паклала падбародак на далоні. Яна бачыла людзей, што хадзілі па лагеры, чула галасы дзяцей, стук малатка па жалезным вобадзе, але вочы яе глядзелі кудысьці далёка.
Падышоўшы да палаткі, бацька так і застаў яе ў гэтай позе. Ён апусціўся каля яе на кукішкі. Маці паволі перавяла на яго позірк.
- Ну, знайшлі што? - запыталася яна.
- Не, - збянтэжана адказаў бацька. - Дзе мы толькі не шукалі.
- А Эл дзе і Джон? Дзе грузавік?
- Эл нешта рамантуе ў машыне. Давялося ў людзей папрасіць інструменту. Сказалі, каб Эл рабіў усё там, на месцы.
Маці сумна сказала:
- Добра тут. Можна было б тут пажыць хоць крыху.
- Калі знойдзем працу.
- Ага. Калі знойдзем працу.
Бацька адчуў яе смутак і пільна паглядзеў на яе твар.
- Чаго ты так засмуцілася? Сама ж кажаш, добра тут. Чаго ж засмучацца.
Маці глянула на яго і паволі заплюшчыла вочы.
- Дзіўна ўсё неяк, праўда? Колькі ўжо дзён мы ў дарозе, перабіраемся з месца на месца, і ні разу я не задумвалася. Людзі тут добра мяне прынялі, проста вельмі добра. А я што раблю? Прыгадваю ўсё самае сумнае: тую ноч, калі памёр дзед і мы яго пахавалі. У мяне тады адна толькі дарога была ў галаве - цэлымі днямі трэсліся ў машыне, усё едзеш і едзеш, і я нічога ўжо такога дрэннага не адчувала. А цяпер, калі сюды прыехалі, цяпер у мяне горш на душы стала. Бабка... і яшчэ Ной пайшоў ад нас. Узяў і пайшоў уніз па рацэ. Усё было неяк паасобку, а цяпер разам на мяне навалілася. Бабка памерла, як жабрачка, і яе, як жабрачку, пахавалі. Цяпер ад гэтага балюча мне. Ной пайшоў уніз па рацэ. Не ведаў, што яго там можа чакаць. Адкуль яму ведаць? І мы таксама не ведаем. І так і не будзем ведаць, ці жывы ён, ці мёртвы. І ніколі не даведаемся. А тут яшчэ Коні ўпотайкі пакінуў нас. Раней не было ў мяне часу пра ўсё гэта думаць, а цяпер думкі роем налятаюць на мяне. А мне ж бы толькі радавацца, што мы трапілі ў такое добрае месца. - Бацька глядзеў, як варушацца яе губы. Яна гаварыла, заплюшчыўшы вочы. - Я памятаю, якія былі горы каля той рэчкі, дзе Ной нас пакінуў, - вышчарбленыя, вострыя, як зубы старога. Памятаю, якая калючая была трава там, дзе пахавалі дзеда. І калоду на ферме - пяро да яе прыстала, уся пасечаная, чорная ад курынай крыві.
Бацька падхапіў ёй у тон:
- А я сёння бачыў дзікіх гусей. На поўдзень цягнуліся... высока ў небе. Так прыгожа было глядзець. І чорных драздоў бачыў - сядзяць сабе на дроце. І галубы на агароджах. - Маці расплюшчыла вочы і глянула на яго. А ён гаварыў: - Яшчэ віхор бачыў - усё роўна як чалавек, круціцца, носіцца па полі. А гусі ляцелі клінам, спяшаліся на поўдзень.
Маці ўсміхнулася:
- А ты памятаеш, як мы дома гаварылі: «Гусі ляцяць, значыць, зіма будзе ранняя». Заўсёды так гаварылі, а зіма надыходзіла, калі ёй была пара. А мы ўсё: «Зіма будзе ранняя». Сама не ведаю, чаму мы так гаварылі.
- Я бачыў чорных драздоў на дроце, - гаварыў бацька. - Сядзяць сабе адзін каля аднаго. І галубоў. Так спакойна, як голуб, не сядзіць ніводная птушка... на драцяной агароджы... Сядзяць па двое, зусім блізка. А віхор - у рост чалавека, скача, круціцца па полі. Як дзіця, толькі ростам з дарослага мужчыну.
- Лепш не ўспамінаць пра дом, - сказала маці. - Цяпер у нас свайго дома няма. Лепш зусім забыцца пра яго. І пра Ноя забыцца.
- Ён няправільна зрабіў... ну, а я хачу сказаць... гэта мая віна.
- Колькі разоў я ўжо казала табе - кінь пра гэта. Можа, ён і не выжыў бы.
- Але павінен быў прадугледзець.
- Кінь зараз жа. Ной быў не такі, як усе. Магчыма, так яму лепш будзе. Нам нельга бясконца гараваць. Месца тут добрае, і праца, можа, знойдзецца.
Бацька паказаў на неба:
- Глянь... зноў гусі. Вялікі клін. Вось, ма: «Зіма будзе ранняя».
Маці ціха засмяялася:
- Бывае, зробіш што-небудзь, скажаш, а чаму, не ведаеш.
- Вось і Джон ідзе, - сказаў бацька. - Хадзі сюды, Джон, пасядзі з намі.
Дзядзька Джон падышоў да іх і прысеў на кукішкі перад маці.
- Нідзе нічога не знайшлі, - сказаў ён. - Ні з чым назад прыехалі. А цябе Эл кліча. Сказаў, пакрышку трэба мяняць. На старой усяго адзін слой застаўся, кажа.
Бацька ўстаў.
- Хоць бы ўдалося яму купіць як дзешавей. Грошы ўжо амаль зусім выйшлі. А дзе ён, Эл?
- Вунь там, за вуглом направа. Кажа, пакрышку трэба памяняць, а то камера пратрэцца і лопне.
Бацька ішоў між палатак, а вочы яго сачылі за вялікім клінам гусей, якія, аддаляючыся, усё ніжэй апускаліся па небасхіле.
Дзядзька Джон падабраў з зямлі каменьчык, скаціў яго з далоні і зноў падняў. На маці ён не глядзеў.
- Працы няма, - сказаў ён.
- Вы не ўсё яшчэ аб'ездзілі.
- Не аб'ездзілі, але аб'явы ўсюды аднолькавыя.
- А Том, пэўна, дагэтуль працуе. Яшчэ не вярнуўся.
Дзядзька Джон выказаў здагадку:
- Можа, ён таксама пайшоў ад нас... як Коні з Ноем.
Маці строга паглядзела яму ў твар, потым позірк яе памякчэў.
- Ёсць такое, у чым ты цвёрда ўпэўнены, - сказала яна. - Ёсць такія рэчы, у якіх ты ніколі не сумняваешся. Том атрымаў працу. І гэта чыстая праўда. - Яна ўсміхнулася шчаслівай усмешкай: - У мяне цудоўны сын. А што, хіба не так?
У лагер пачыналі з'язджацца легкавыя машыны і грузавікі, і мужчыны павалілі ў санітарны блок. І кожны нёс у руках чысты камбінезон і свежую кашулю.
Маці раптам схамянулася:
- Ідзі, Джон, знайдзі бацьку. Схадзіце з ім у краму, купіце бабоў і цукру... мяса на смажанку і морквы. І скажы яму, няхай возьме там што-небудзь такое... ну што-небудзь смачнае... усё роўна што... абы на смак прыемнае... на вячэру. Сёння... у нас будзе слаўная вячэра.
Вандроўны люд, які гойсаў па краіне, імкнучыся знайсці працу, імкнучыся выжыць, не забываў і пра ўцехі, упарта здабываў іх сам, прагна цягнуўся да забаў і хоць якіх радасцей. Іншы раз пазабаўляцца ўдавалася і ў гутарцы, а жарт палягчаў жыццё. І ўжо так павялося, што ў прыдарожных лагерах, уздоўж шашэйных дарог, каля арашальных канаў, пад яварамі, заўсёды знаходзіліся апавядальнікі, і людзі збіраліся вакол ужо прытухлых вогнішчаў паслухаць самага таленавітага. Яны слухалі, і іх маўклівая прысутнасць надавала гэтым расказам урачыстасць.
Я рэкрутам ваяваў супраць правадыра апачаў Джэраніма...
І людзі слухалі, і ў іх спакойных вачах адбівалася святло счахлага вогнішча.
Індзейцы - народ хітры, яны юркія, як змеі, падкрадлівыя. Паўзуць па сухім лісці - і шолаху не пачуеш. Паспрабуйце хто з вас - нічога ў вас не выйдзе.
Людзі слухалі і прыгадвалі, як шамаціць пад нагамі сухое лісце.
Лета змянілася восенню, неба завалаклі хмары. Не самы лепшы час для вайны. Вы калі-небудзь чулі, каб армія рабіла што-небудзь правільна? Дайце ёй дзесяць шанцаў, яна ўсё роўна на нечым спатыкнецца. З якой-небудзь сотняй храбрацоў расправіцца - і то пашле тры палкі, і так заўсёды.
Людзі слухалі, і твары ў іх былі спакойныя, задумлівыя. Апавядальнікі прымушалі слухаць сябе - рытм іх мовы быў урачысты, словы ўрачыстыя, бо сам расказ быў урачысты, і слухачы прасякаліся гэтай урачыстасцю.
Адзін смяльчак стаў ва ўвесь рост на скале, супраць сонца. Ведаў, што адусюль ён відаць. Раскінуў рукі і стаіць сабе. Зусім голы, як ранічка, на самым сонцы. Можа, у галаве ў яго памутнела. Не ведаю. Стаіць так, рукі ў бакі раскінуў, ну быццам распяцце. Ад нас ярдаў за чытырыста. А салдаты... што ж, накіравалі на яго ружжы, насліняць палец - прабуюць, ці ёсць вецер, ляжаць, страляць не могуць. Індзеец, пэўна, ведаў, што робіць. Ведаў, што мы страляць не будзем. Ляжым, куркі на ўзводзе, а прыкладаў да пляча не прыціскаем. Пазіраем на яго. Галаўная павязка, пяро ў ёй тырчыць. Нам усё як на далоні. А сам голы, як сонейка. Доўга мы так ляжалі і на яго глядзелі, а ён не зварухнецца. Нарэшце капітан асатанеў. «Страляйце, нягоднікі, страляйце!» - крычыць. Ну што ж... мы не спяшаючыся паднялі вінтоўкі - кожны чакае, што хто-небудзь іншы стрэліць першы. Ніколі ў жыцці мне не было так горка. Я прыцэліўся яму ў жывот - індзейца толькі так улажыць можна... і... тады... Ён паваліўся, як сноп, і пакаціўся з гары. Мы падышлі. Бачым, не такі ён ужо і рослы... а здаваўся веліканам... там, на скале. Увесь пашкуматаны і такі маленькі. Калі-небудзь бачылі фазана? Горды, прыгожы, пёрка да пёрка, як размаляваныя, і нават вочы быццам намаляваныя. І бац! Падымаеш яго... увесь у крыві, скурчаны... І адчуваеш, ты загубіў нешта лепшае за сябе; ясі яго, а радасці мала, бо ты загубіў нешта ў сабе, і ўжо нічым гэта не выправіш.
Людзі згодна ківалі галовамі, а калі ў вогнішчы ўспалыхваў язычок полымя, яго святло азарала вочы, задумлівыя, засяроджаныя.
Проста супраць сонца з раскінутымі рукамі. І здаваўся такі вялікі, высокі... як бог.
А бывала і так, што хто-небудзь урываў ад яды дваццаць цэнтаў і ішоў у кіно ў Мэрысвілі ці ў Туларэ, у Сірызы ці ў Маўнтын-В'ю. І вяртаўся ў лагер пры дарожным насыпе, поўны яркіх уражанняў. І расказваў, што бачыў.
Адзін малойчык быў багаты, а прыкінуўся, што бедны, і дзяўчына адна - таксама багатая, а выдавала сябе за бедную, і стрэліся яны ў закусачнай.
Чаму?
Адкуль я ведаю? Стрэліся, і ўсё тут.
Не, чаму яны прыкінуліся, што бедныя?
Ну, надакучыла ім багацце.
Лухта!
Ты хочаш паслухаць ці не?
Ну, добра, гавары. Канешне, хачу паслухаць, але каб я быў багацеем, каб меў такія грошы, я б столькі свіных адбіўных накупляў... Штабелямі наваліў бы вакол сябе, як дровы, а потым праеў бы праход. Ну, давай расказвай, што далей было.
Дык вось, кожны з іх думае, што другі бедны. А потым іх арыштавалі і ў турму пасадзілі, а на волю выходзіць яны не хочуць, бо тады другі даведаецца, што ён багацей. А турэмшчык іх за бедных лічыць і здзекуецца з іх. Ты паглядзеў бы на яго фізіяномію, калі праўда выходзіць наверх! Ледзь не абамлеў, во як.
А пасадзілі іх за што?
Ну, схапілі іх на нейкім палітычным сходзе, але ніякія яны не радыкалы - выпадкова там апынуліся. А толькі дзеля грошай каб з табой жаніліся ці за цябе замуж выходзілі, ніхто з іх не хацеў.
Во сукіны дзеці, з самага пачатку адно аднаму мазгі круцілі.
Не, у карціне было так, быццам яны з самых добрых намераў усё рабілі. І з людзьмі, разумееш, абыходзіліся добра.
А я вось раз бачыў карціну - ну быццам проста пра мяне, і не толькі пра мяне, а і пра жыццё маё, і не толькі пра маё - там неяк усё было паўней і шырэй.
Мне і майго гора хопіць. Хочацца хоць крышачку забыцца.
І забываешся... калі паверыш таму, што паказваюць у кіно.
І вось яны пажаніліся, і тады ўсё выйшла наверх, і тыя, хто з іх здзекаваўся, таксама пра ўсё даведаліся. Адзін пыхлівы малойчык раней і слова да іх сказаць не хацеў, а тут багацей гэты раптам заяўляецца да яго ў цыліндры, дык той ледзь не ўпаў непрытомны. Ну ледзь не абамлеў. А яшчэ кінахроніку паказвалі, як нямецкія салдаты ногі на маршы высока задзіраюць - смехата адна.
А калі ў каго было хоць трохі грошай, заўсёды можна было выпіць. Раздражненне мінала, па целе цяпло разлівалася. Знікала пачуццё адзіноты, бо цяпер было лёгка засяліць сваё ўяўленне сябрамі, лёгка ворагаў адшукаць і расправіцца з імі. Сядзіць каля канавы, і яму здаецца, што зямля стала мяккая, як пух. Няўдачы ўжо не так крояць душу, і будучыня не навісае так грозна над ім. І голад не падкрадаецца да яго, і ўвесь свет мяккі і ласкавы, і чалавек лёгка дасягае мэты свайго падарожжа. Зоркі надзіва блізкія, неба пяшчотнае. Смерць - прыяцелька, а сон родны брат смерці. Вяртаецца мінулае - дзяўчына са стройнымі нагамі, яна некалі танцавала там, дома... Конь... даўным-даўно... Конь і сядло. Скура на сядле ціснёная. Калі гэта было! Вось пашукаць бы якую-небудзь дзяўчыну, пагаварыць з ёю. Як было б цудоўна! Можа, нават і ноч разам правесці. А як цёпла тут... І зоркі зусім блізка, і смутак і радасць таксама блізка адно ад аднаго, зусім зліліся разам. Вось каб так і застацца п'яным на ўсё астатняе жыццё. Хто кажа, што гэта дрэнна? Хто смее такое сказаць? Прапаведнікі?.. Дык у іх жа ж сваё ап'яненне. Худыя, бясплодныя жанчыны?.. дык адкуль ім, няшчасным, ведаць. Староннікі рэформ?.. але ж яны не ўмеюць угрызацца ў жыццё і нічога пра яго не ведаюць. Не... зоркі цяпер такія блізкія, слаўныя, я парадніўся з усім светам. І ўсё на свеце святое - усё, нават я.
Губны гармонік заўсёды можна насіць з сабой. Выняў з задняй кішэні штаноў, пастукаў аб далонь, каб вытрасці смецце, кішэнную труху, тытунёвую пацяруху, - вось і гатова. На гармоніку ўсё можна - і тоненькі, як у трысняговай дудачцы голас, а вось акорды, а вось мелодыя з акампанементам. Сагнутымі пальцамі мяняеш гучанне, і гукі то стогнуць, то рыдаюць, як у валынкі, то робяцца густымі, глыбокімі, як у аргана, ці пранізлівымі і журботнымі, як у трысняговых дудачак горцаў. Пайграў і зноў схаваў гармонік у кішэню. Ён заўсёды з табой, заўсёды ў цябе ў кішэні. А калі іграеш, вучышся новым прыёмам, новым спосабам змяняць тон далонямі, сціскаеш яго губамі - і ніхто цябе гэтаму не вучыць. Практыкуешся ўсюды, дзе прыйдзецца, - часам дзе-небудзь на адзіноце з сабою ў цяні гарачым поўднем, часам каля сваёй палаткі пасля вячэры, калі жанчыны мыюць посуд. Нага лёгка адбівае такт. Бровы то лезуць угору, то зноў апускаюцца ўніз у лад рытму. А калі і згубіш свой гармонік ці паламаеш яго - бяда невялікая. За чвэрць даляра купіш сабе новы.
Гітара даражэйшая. На ёй трэба доўга вучыцца. На кончыках пальцаў левай рукі павінны быць мазольныя наросты. На вялікім пальцы правай - арагавелы мазоль. Расцягвай пальцы левай рукі, расцягвай іх, як павук ногі, каб дацягнуцца да цвёрдых накладак на ладах.
Скрыня гэтая ў мяне ад бацькі. Я быў яшчэ клапом, як ён паказваў мне «до». А калі я навучыўся і зайграў на гітары не горш за яго, ён ужо амаль ніколі за яе не браўся. Бывала, сядзе на парозе, слухае і такт нагамі адбівае. Прабуеш трэмала, а ён хмурыць бровы, пакуль у мяне не атрымаецца, а тады адкінецца на вушак і галавой ківае. «Іграй, кажа, старайся». Добрая гітара. Бачыш, як выскраблася дэка? А колькі на ёй было сыграна песень - мільён, вось і выдзеўблася ўся. Калі-небудзь трэсне і ўваліцца, як яечная шкарлупіна. А паправіць яе, нават крануць нельга - тон страціць. Вечарам пайграю на ёй, а вунь у суседняй палатцы ў аднаго ёсць губны гармонік. Разам добра выходзіць.
Скрыпка рэдка ў каго ёсць, на ёй цяжка навучыцца. Ні ладоў на ёй, ні павучыць няма каму.
Паслухаю вось таго старога, а потым сам падбіраю. Не паказвае, як браць двайныя ноты. Сакрэт, кажа. А я падгледзеў. Вось як ён гэта робіць.
Вішчыць, як вецер, жвавая, нервовая, пранізлівая.
Яна ў мяне не надта каб. Аддаў за яе два даляры. А тут адзін расказваў: ёсць скрыпкі, якім па чатырыста год, гук сакавіты, як віскі. Кажа, цана такім пяцьдзесят-шэсцьдзесят даляраў. Ну што я скажу? Мусіць, маніць. Вісклівая яна ў мяне, старая шэльма. Што вам сыграць? Хочаце танец? Толькі смычок натру каніфоллю. Вось запілікае, ого! За мілю чутно будзе.
Вечарам іграюць усе тры разам - гармонік, скрыпка і гітара. Іграюць кадрылю, б'юць абцасамі людзі падлогу, і тоўстыя гулкія струны гітары пульсуюць, як сэрца, хрыпла гучаць акорды гармоніка, высока забірае і вішчыць скрыпка. Вось зайгралі кадрылю «Куранё», ногі тупаюць па дошках, і цыбаты юнак робіць тры хуткія па, рукі свабодна вісяць уздоўж цела. Яго абступаюць з усіх бакоў, і пачынаецца танец - глухія ўдары падэшваў, давай прыстуквай абцасамі. Круцяцца парамі, абняўшы адно аднаго за талію. Валасы ўпалі на лоб, дыханне перарывістае. А цяпер паварот у другі бок.
Глянь на гэтага тэхасца - даўганогі, ухітраецца на кожным кроку танца чатыры разы чачотку адбіць. У жыцці не бачыў, каб такое вытваралі. Глянь, як ён круціць тую індыянку з племені чэрокі, шчокі ў яе аж гараць, пяткі разам, а наскі паасобку. А дыхае як, грудзі так і ходзяць. Думаеш, ад стомы? Думаеш, запыхалася? Дык я скажу табе, не. У тэхасца валасы звесіліся на вочы, рот разявіўся - прагна хапае ім паветра, а сам чачотку адбівае і ад сваёй індыяначкі ні на крок не адыходзіць.
Скрыпка павісквае, гітара бумкае. Чалавек з губным арганам увесь чырвоны ад натугі. Тэхасец і індыянка дыхаюць цяжка, як замучаныя сабакі, але прытупваюць, скачуць. Старыя стаяць, пляскаюць у далоні. Ледзь прыкметна ўсміхаюцца, адбіваюць такт нагамі.
Памятаю, дома... у школе... даўно ўжо гэта было. Па небе плыве поўня на захад. А мы з ім пайшлі пашпацыраваць... недалёка. Ідзём і маўчым, бо ў абаіх дыханне перахапіла. Ні слова не сказалі. А тут наперадзе сена стажок. Падышлі да яго і ляглі. Бачыла? Гэты тэхасец шмыгнуў са сваёй дзяўчынай у цемру - ніхто, думаюць, не прыкмеціў. О божа! З гэтым тэхасцам і я пайшла б. Хутка ўзыдзе месяц. Я бачыла - яе бацька памкнуўся быў за імі, але вярнуўся. Ён ведае. Восень не спыніш, усё роўна прыйдзе ў свой час, і сок на дрэвах не спыніш. Так і гэта. А месяц ужо хутка ўзыдзе.
Сыграйце яшчэ, сыграйце якую-небудзь старадаўнюю баладу... ну хоць «Як па вуліцах хадзіў я ў Ларэла».
Вогнішча патухла. Ну і хай, не трэба яго зноў распальваць. Неўзабаве месяц узыдзе.
Каля арашальнай канавы на ўсю моц стараўся прапаведнік, і людзі крычалі і лямантавалі. Прапаведнік пахаджваў сярод іх, як тыгр, падсцёбваў сваю паству голасам, і людзі качаліся па зямлі з рыкам і стогнам. Ён прыглядаўся да іх, ацэньваў позіркам, рабіў з імі што хацеў, і калі ўсе яны ў сутаргах валіліся на зямлю, ён падыходзіў да кожнага, нахіляўся, адным махам падымаў з зямлі і з крыкам «Прымі, госпадзі!» кідаў яго ў ваду. І калі ўсе яны стаялі па пояс у вадзе, спалохана пазіраючы на свайго настаўніка, ён падаў на калені на краі канавы і маліўся за іхнія душы, прасіў у бога, каб усе мужчыны і ўсе жанчыны маглі качацца па зямлі з рыканнем і енкам у славу боскую. А людзі ў наскрозь прамоклай адзежы выбіраліся на бераг і вярталіся ў лагер, да сваіх палатак, перамаўляючыся між сабой ціхімі, здушанымі галасамі, а чаравікі ў іх на нагах чмякалі і хлюпалі.
Цяпер мы выратаваныя, казалі яны. Цяпер мы чыстыя, як першы снег. Больш мы ніколі ўжо не будзем грашыць.
А дзеці - напалоханыя, мокрыя - перашэптваліся між сабой:
Цяпер мы выратаваныя. Больш ужо не будзем грашыць.
Добра было б даведацца, якія на свеце бываюць грахі. Я ўсе пераспрабаваў бы.
Вандроўнікі сціпла задавальняліся любой забавай у дарозе.
У суботу вечарам у пральні было поўна жанчын. Яны мылі сукенкі - ружовыя з сарпінкі, квяцістыя з паркалю і вешалі іх на сонцы, расцягваючы тканіну рукамі па вяроўцы, каб не моршчыліся. Да полудня жыццё ў лагеры пачало віраваць, людзі заклапочана мітусіліся. Узбуджэнне перадалося і дзецям, і яны шумелі больш чым звычайна. У сярэдзіне дня іх сталі купаць, і па меры таго як іх аднаго за другім вылоўлівалі, утаймоўвалі і вялі мыцца, шум на пляцоўцы для гульняў паступова сціхаў. Да пяці гадзін з дзяцей адскрэблі бруд і наказалі не пэцкацца, і дзеці сноўдаліся па лагеры як адзеравянелыя ў сваім чысценькім адзенні, няшчасныя ад неабходнасці ўсяго асцерагацца.
На вялікай танцавальнай пляцоўцы пад адкрытым небам завіхалася спецыяльная камісія. Кожны абрывак электрычнага проваду ішоў у ход. У пошуках яго абследавалі гарадскую звалку, ізаляцыйную стужку ахвяравалі з кожнай інструментальнай скрынкі. І вось залатаны, зрошчаны з некалькіх кавалкаў провад правялі да танцпляцоўкі, падвесіўшы яго на бутэлечных рыльцах замест фарфоравых ізалятараў. Гэтым вечарам над танцпляцоўкай упершыню загарэлася святло. Да шасці гадзін мужчыны вярнуліся ўжо з працы ці з пошукаў яе, і душавыя запрацавалі з новай сілай. Да сямі паспелі паабедаць, і мужчыны ўбраліся па-святочнаму: свежапамытыя камбінезоны, чыстыя сінія кашулі, а сёй-той нават у добрым чорным гарнітуры. Дзяўчаты прыбраліся ва ўзорыстыя паркалёвыя сукенкі, чысценькія, без ніводнай маршчынкі, заплялі валасы ў косы, перавязалі стужкамі. Жанчыны заклапочана паглядалі на сваіх сямейнікаў і мылі посуд пасля абеду. На танцпляцоўцы струнны аркестр, абкружаны двайной сценкай дзяцей, рэпеціраваў сваю праграму. Усе былі засяроджаныя, усхваляваныя.
У палатцы Эзры Хастана, старшыні цэнтральнай камісіі, якая складалася з пяці чалавек, ішло пасяджэнне. Хастан - высокі, хударлявы чалавек з цёмным абветраным тварам і вачамі, як вастрыё клінка, гаварыў з членамі камісіі, прадстаўнікамі ад усіх пяці санітарных аддзяленняў.
- Нам страшэнна пашанцавала, - сказаў ён, - што нас папярэдзілі аб намеры ўчыніць скандал на танцах.
Загаварыў тоўсты карантыш, прадстаўнік ад блока нумар тры:
- Трэба з іх дух выбіць вон, правучыць як след.
- Не, - сказаў Хастан. - Яны таго толькі і чакаюць. Не, сэр. Калі ім удасца распачаць бойку, яны паклічуць палісменаў і заявяць, што ў нас тут буяняць. У іншых лагерах так ужо было. - Ён павярнуўся да смуглявага юнака з сумным тварам - прадстаўніка санблока нумар два: - Ну, ты сабраў хлопцаў, выставіў ахову ўздоўж агароджы, каб ніхто ў лагер не пралез?
Юнак з сумным тварам кіўнуў галавой:
- Зрабіў. Дваццаць чалавек. Загадаў нікога не біць. Выпхнуць - і ўсё.
Хастан сказаў:
- Схадзі, калі ласка, знайдзі Ўілі Ітана. Ён сёння, здаецца, распарадчык на вечарынцы?
- Ага.
- Скажы яму, нам трэба з ім пагаварыць.
Юнак выйшаў з палаткі і неўзабаве вярнуўся ў суправаджэнні жылістага тэхасца. Падбародак у Ўілі Ітана быў вузкі, тонкі, валасы попельна-шэрыя, рукі і ногі доўгія і быццам расхлябаныя, а вочы светла-шэрыя, апаленыя сонцам, як у тыповага жыхара Тэхаскага выступу. Ён увайшоў з усмешачкай у палатку і стаў, нецярпліва пакручваючы кісцямі рук.
Хастан запытаўся ў яго:
- Ты чуў, што вечарам рыхтуецца?
Уілі шырока ўсміхнуўся:
- Ага!
- Зрабіў што-небудзь?
- Ага!
- Раскажы нам што.
Уілі Ітан усміхнуўся на ўвесь рот:
- Значыць, так, сэр: звычайна ў суботнюю камісію ў нас уваходзяць пяць чалавек, а я набраў яшчэ дваццаць - надзейныя ўсе хлопцы. Яны будуць танцаваць, але вочы іх і вушы будуць усё бачыць і чуць. Ледзь толькі дзе гучней загавораць ці заспрачаюцца, яны раз! - і кружком. Чыста будзе зроблена. Ніхто нічога не заўважыць. Будзе так, быццам усе яны з пляцоўкі ідуць, і скандаліст хочаш не хочаш з імі пойдзе.
- Скажы ім, каб рукам волі не давалі.
Уілі весела засмяяўся:
- Казаў.
- Не, ты так скажы, каб да іх дайшло.
- Дайшло. Пяцёх пастаўлю каля варот, няхай прыглядаюцца да тых, што ўваходзяць. Паспрабуем адразу іх высачыць, яшчэ да таго, як пачнуць.
Хастан падняўся з месца. Вочы яго сталёвага колеру глядзелі сурова.
- Паслухай, Уілі. Біць іх нельга. Каля пярэдніх варот будуць шэрыфавы агенты. Калі вы пусціце каму-небудзь кроў, вас забяруць.
- Мы і гэта абмазгавалі, - сказаў Уілі. - Выведзем іх задамі проста ў поле. А там хлопцы прасочаць, каб яны пайшлі туды, адкуль прыйшлі.
- Што ж, на словах выходзіць усё добра, - не супакойваўся Хастан. - Але глядзі, Уілі, каб нічога такога не было. Ты адказваеш за ўсё. Біць іх нельга. Ні кіёў, ні кулакоў ці яшчэ там чаго ў ход не пускаць.
- Ёсць, сэр! Мы слядоў не пакінем.
Хастан насцярожыўся:
- Нешта не давяраю я табе, Уілі. Калі ўжо вам так і карціць іх збіць, біце так, каб крыві не было.
- Ёсць, сэр!
- У хлопцах сваіх ты ўпэўнены?
- Так, сэр!
- Ну добра. На той выпадак, калі самі вы не справіцеся, я буду сядзець там на танцпляцоўцы, з правага боку.
Уілі аддаў яму жартам чэсць і выйшаў з палаткі.
Хастан сказаў:
- Проста не ведаю. Каб хоць яго хлопцы нікога не забілі. Якога чорта шэрыфавым памагатым абавязкова хочацца нашкодзіць нашаму лагеру? Чаму яны не пакінуць нас у спакоі?
Сумны юнак ад блока нумар два сказаў:
- Я жыў у лагеры Зямельна-жывёлагадоўчай кампаніі каля Сандлэнда. Дык, бог сведка, там на кожныя дзесяць чалавек па фараону. А водаправодны кран адзін чалавек на дзвесце.
Каратканогі таўстун усклікнуў:
- Госпадзі, ён мне расказвае! Я сам адтуль. Там палаткі стаяць блокам - трыццаць пяць у даўжыню і пятнаццаць у шырыню. А сарціраў усяго дзесяць на ўсю араву. Смярдзіць - за мілю пачуеш, далібог, праўда. Адзін шэрыфскі памагаты неяк раскрыў нам усю паднаготную. Мы гэтак кружком сядзім, і ён кажа: «Каб яны праваліліся, гэтыя ўрадавыя лагеры! Дай людзям хоць раз гарачай вады, і яны потым патрабаваць яе будуць. Дай ім прамыўныя прыбіральні, дык яны ўжо без іх ніяк. Праклятым Окі што ні пакажы, яны ўжо без таго абысціся не могуць. У іх, кажа, у лагерах чырвоныя мітынгі. Усё прыдумляюць, як дапамогу атрымаць».
Хастан запытаўся:
- І ніхто яго не ўзгрэў за гэта?
- Не. Адзін, такі маленькі ростам, пытаецца ў яго: «Якая такая дапамога?» Палісмен адказвае: «Ну грашовая - тая самая, у якую мы, падаткаплацельшчыкі, свае кроўныя ўсаджваем, а дастаюцца яны вам - усялякім там Окі. А той, маленькі, кажа: «Мы таксама плацім падаткі і на прадукты, і на бензін, і на тытунь. Урад плаціць фермерам чатыры цэнты за фунт бавоўны - ці ж гэта не дапамога? Чыгуначныя і параходныя кампаніі атрымліваюць ад урада пазыку - гэта не дапамога?» А шэрыфскі агент адказвае: «Яны патрэбную справу робяць». А маленькі кажа: «А калі б не мы, хто б вам ураджаі збіраў?» - Таўстун абвёў позіркам прысутных.
- Ну, а што фараон? - запытаўся Хастан.
- Ён проста раз'юшыўся. Кажа: «Гэтыя чырвоныя ўвесь час народ падбухторваюць. А ты пойдзеш са мной, давай, не марудзь». Забраў малойчыка, і далі яму два месяцы за бадзяжніцтва.
- А калі б у яго была праца? - запытаўся Цімаці Ўолес.
Таўстун засмяяўся:
- На гэты конт мы вучоныя. Цяпер мы ведаем: каго палісмен неўзлюбіў, той і бадзяга. Таму яны і не церпяць наш лагер, што паліцыі тут уваходу няма. Тут Злучаныя Штаты, а не Каліфорнія.
Хастан уздыхнуў:
- Добра было б пажыць тут даўжэй. Але хутка прыйдзецца ехаць. Мне тут даспадобы. Жывуць усе дружна. Госпадзі, пакінулі б нас у спакоі, дык не - рознае паскудства робяць, у турму саджаюць. Далібог, калі будзе так далей, нас да таго давядуць, што мы адпор дадзім. - Тут голас яго крыху паспакайнеў, і Хастан сам сабе нагадаў: - Не, трэба паводзіць сябе мірна. Камісія не мае права зрывацца з прывязі.
Таўстун з трэцяга блока сказаў:
- Тыя, хто думае, што працаваць у камісіі адно задавальненне, няхай самі паспрабуюць. У мяне сёння была калатня - жанчыны расхадзіліся. Пачалі лаяцца і давай кідацца рознай дрэнню. Жаночая камісія не справілася, прыбеглі да мяне, просяць, каб мы разабраліся. А я ім кажу: «Жаночыя сваркі ўладжвайце самі. Яны будуць кухоннымі адкідамі шпурляцца, а наша камісія іх разнімай!»
Хастан кіўнуў галавой:
- І вы правільна зрабілі.
Пачало змяркацца, і, па меры таго як згушчалася вячэрняе сутонне, гукі струннага аркестра, які рэпеціраваў танцы, рабіліся ўсё гучнейшымі. Над танцпляцоўкай успыхнулі лямпачкі, двое мужчын уважліва агледзелі зроблены з абрыўкаў дроту провад. Дзеці шчыльна абступілі музыкантаў. Падлетак з гітарай нягучна напяваў і найграваў блюз «Родныя палеткі», і на прыпеве другога куплета мелодыю падхапілі тры губныя гармонікі і скрыпка. Да пляцоўкі з усіх бакоў падыходзілі людзі - мужчыны ў чыстых сініх камбінезонах, жанчыны ў сарпінкавых сукенках. Яны абкружылі пляцоўку і спакойна чакалі пачатку танцаў, электрычныя лямпачкі асвятлялі іх уважлівыя, поўныя радасных прадчуванняў твары.
Уся зона лагера была абнесена высокай драцяной агароджай, і ўздоўж яе, праз кожныя пяцьдзесят футаў, сядзелі на траве вартавыя.
Пачалі на машынах з'язджацца госці - дробныя фермеры з сем'ямі, перасяленцы з іншых лагераў. У варотах кожны называў прозвішча знаёмага, ад якога было атрымана запрашэнне.
Аркестр зайграў карагодны танец - цяпер ужо зусім гучна, бо рэпетыцыя скончылася. Праведнікі сядзелі каля сваіх палатак і хмурна, пагардліва пазіралі на танцпляцоўку. Яны не перагаворваліся між сабой, яны пільна высочвалі грэх і самім выглядам сваім выказвалі асуджэнне ўсёй гэтай блюзнерскай забавы.
Каля палаткі Джоўдаў Руці і Ўінфілд наспех праглынулі, што там было на абед, і кінуліся да пляцоўкі. На воклік маці дзеці вярнуліся, і яна задрала ім угору падбародкі, праверыла, ці не брудныя ў іх насы, пацягнула за вушы, зазірнула ў іх і загадала ісці ў санітарны блок і яшчэ раз памыць рукі. Малыя схаваліся за будынкам, пакруціліся там, потым сіганулі да танцавальнай пляцоўкі і змяшаліся з гуртам дзяцей, што абкружылі аркестр.
Эл паабедаў і паўгадзіны галіўся Томавай брытвай. Потым памыўся, надзеў шарсцяныя штаны, якія шчыльна аблягалі яго сцёгны, змачыў вадой свае прамыя валасы і зачасаў іх назад. Выбраўшы момант, калі ва ўмывальнай нікога не было, ён абаяльна ўсміхнуўся сам сабе ў люстра, потым павярнуўся бокам, стараючыся ўбачыць, як гэта ўсмешка выглядае ў профіль. Пасля надзеў на кашулю чырвоныя нарукаўныя гумкі і апрануў свой шчыльна падагнаны пінжак, працёр жоўтыя чаравікі кавалкам туалетнай паперы. Раптам ва ўмывальную нехта зайшоў. Эл выскачыў з яе і зухавата пакрочыў да танцпляцоўкі, зіркаючы вачамі па баках у пошуках дзяўчат. Каля адной палаткі блізка ад пляцоўкі сядзела прыгожанькая бландзіначка. Эл нібы незнарок падышоў да яе і расшпіліў пінжак, каб відаць была яго сіняя кашуля.
- Пойдзеш на танцы? - запытаўся ён.
Дзяўчына адвярнулася і нічога не адказала.
- Што, з табой і словам перакінуцца нельга? Можа, пойдзем патанцуем? - І нібы між іншым дадаў: - Я вальс умею.
Дзяўчына нясмела падняла на яго вочы і сказала:
- Падумаеш. Вальс усе танцуюць.
- Толькі не як я, - сказаў Эл. На пляцоўцы зноў зайгралі, і ён пачаў прытупваць у такт нагой. - Пойдзем, - сказаў ён.
З палаткі высунула галаву таўшчэзная жанчына і глянула на яго грозным вокам.
- Ідзі сваёй дарогай, праходзь, - зласліва сказала яна. - Дачка мая даўно заручаная. Яна замуж выходзіць - хутка жаніх прыедзе.
Эл гарэзліва падміргнуў дзяўчыне і пайшоў далей, прытупваючы на хаду пад музыку, паводзячы плячамі і памахваючы рукамі. Дзяўчына пазірала яму ўслед.
Бацька паставіў талерку на скрыню і ўстаў.
- Ну, хадзем, Джон, - сказаў ён і растлумачыў маці: - Хочам пагаварыць тут з аднымі людзьмі, даведаемся, можа, дзе работа ёсць. - Разам з Джонам ён пайшоў да доміка адміністратара.
Том падабраў кавалкам куплёнага хлеба рэшткі мяснога соўсу на талерцы і адправіў яго ў рот. Тады падаў талерку маці, і тая апусціла яе ў вядро з гарачай вадой, памыла і дала выцерці Ружы Сарона.
- А ты хіба на танцы не пойдзеш? - запыталася ў Тома маці.
- А як жа, пайду, - адказаў Том. - Мяне выбралі ў камісію дзяжурыць. Трэба пазабаўляць сяго-таго з гасцей.
- У камісію ўжо выбралі? - здзівілася маці. - Гэта, відаць, таму, што ты работу маеш?
Ружа Сарона нахілілася, каб пакласці талерку ў скрыню. Том, паказваючы на яе, сказаў:
- А божа, як яна таўсцее!
Ружа Сарона залілася чырванню і ўзяла ў маці яшчэ адну талерку.
- Чаму ж ёй не таўсцець, - сказала маці.
- І прыгажэе, - дадаў Том.
Ружа Сарона яшчэ гусцей пачырванела і апусціла галаву.
- Сціхні ты, - прашаптала яна.
- Чаму ж ёй не прыгажэць, - сказала маці. - Маладзенькія, што носяць дзіця пад сэрцам, заўсёды прыгажэюць.
Том засмяяўся:
- Калі яна і далей будзе так пухнуць, ёй давядзецца жывот на тачцы вазіць.
- Ды сціхні ты, - сказала Ружа Сарона і схавалася пад брызентам.
Маці ўсміхнулася:
- Не дражні яе.
- Ёй гэта даспадобы, - сказаў Том.
- Я ведаю, што ёй даспадобы, і ўсё-такі гэта яе трывожыць. Яна і так па Коні тужыць.
- Ну, на Коні даўно пара рукой махнуць. Ён не іначай як на прэзідэнта Злучаных Штатаў вучыцца.
- Пакінь яе, не чапай. Яе доля і так незайздросная.
Да палаткі, шырока ўсміхаючыся, падышоў Уілі Ітан.
- Ты Том Джоўд? - запытаўся ён.
- Я.
- Я старшыня святочнай камісіі. Ты нам будзеш патрэбны. Мне пра цябе гаварылі.
- Што ж, мы з табой разам пацешымся, - сказаў Том. - Пазнаёмся, гэта мая ма.
- Добры вечар, - сказаў Уілі.
- Вельмі прыемна, - адказала маці.
Уілі сказаў:
- Мы паставім цябе спачатку каля варот, а потым пяройдзеш на танцпляцоўку. Прыглядайся да тых, хто ўваходзіць, і, можа, адразу і высачыш іх. З табой будзе яшчэ адзін хлопец. А крыху пазней пойдзеш танцаваць і будзеш пільна прыглядацца.
- Добра, гэта я магу, - пагадзіўся Том.
- А хіба можа што здарыцца? - устрывожылася маці.
- Не, мэм, - адказаў Уілі. - Нічога такога.
- Зусім нічога, - сказаў Том. - Ну пайшлі. Убачымся з табой, ма, на танцах. - Том і Ўілі шпарка пакрочылі да галоўных варот.
Маці паставіла памыты посуд на скрыню.
- Выходзь! - крыкнула яна і, не пачуўшы адказу, паўтарыла: - Выходзь, Разашарна.
Ружа Сарона выйшла з-пад брызенту і зноў узялася выціраць талеркі.
- Том проста жартаваў, - сказала маці.
- Ведаю. Няхай сабе. Толькі мне непрыемна, калі на мяне глядзяць.
- Ну, тут ужо нічога не зробіш. Глядзець будуць. Людзям прыемна ж палюбавацца на маладзенькую, калі яна дзіця чакае - прыемна і весела. А ты на танцы не збіраешся?
- Збіралася... А цяпер не ведаю. Хачу, каб Коні вярнуўся. - Ружа Сарона гучна паўтарыла: - Я хачу, ма, каб Коні вярнуўся. Больш так я не магу.
Маці пільна паглядзела на яе.
- Я разумею. Толькі глядзі, Разашарна, не асарамаці сям'ю.
- Ну што ты, ма.
- Не асарамаці нас. Нам і так цяжка, не хапае яшчэ сораму.
У Ружы Сарона задрыжалі губы.
- Я... я на танцы не пайду. Не хачу... Ма, памажы мне! - Яна апусцілася на скрыню і закрыла твар сагнутымі ў локцях рукамі.
Маці выцерла рукі аб кухонны ручнік, прысела перад дачкой на кукішкі і паклала абедзве рукі ёй на валасы.
- Ты, дачушка, у мяне добрая, - сказала яна. - Заўсёды была добрай дзяўчынкай. Я пра цябе паклапачуся. Ты не бядуй. - Маці ажыўлена загаварыла: - Ведаеш, што мы з табой зробім? Пойдзем разам на танцы, сядзем убаку і падзівімся. Калі хто запросіць цябе на танец, я скажу, табе нельга, у цябе здароўе слабае. А ты музыку паслухаеш, на людзей паглядзіш.
Ружа Сарона падняла галаву:
- А танцаваць не пусціш?
- Не пушчу.
- І не дазваляй нікому да мяне дакранацца.
- Не дазволю.
Ружа Сарона ўздыхнула і роспачна прамовіла:
- Не ведаю, ма, як далей будзе. Проста не ведаю.
Маці лёгенька паляпала яе па калене:
- Ну глянь на мяне. Паслухай, што я скажу. Ты пацярпі яшчэ крышачку, а там палягчэе. Яшчэ толькі крышачку. Я праўду кажу. А цяпер падымайся. Мы з табой зараз памыемся, надзенем усё самае прыгожае і пасядзім на танцах. - Яна павяла Ружу Сарона да санітарнага блока.
Бацька, дзядзька Джон і яшчэ некалькі чалавек сядзелі на кукішках каля ганка канторы.
- Мы сёння ледзь на працу не ўладзіліся, - сказаў бацька. - На некалькі хвілін спазніліся. Перад намі дваіх ужо нанялі. І вось што дзіўна, скажу я вам, - вярбоўшчык кажа: «Па дваццаць пяць цэнтаў мы нанялі дваіх. А па дваццаць цэнтаў яшчэ можам узяць. Па дваццаць мы многа рабочых можам узяць. Вы паедзьце ў лагер, скажыце там, што па дваццаць набор будзе вялікі».
Мужчыны неспакойна заварушыліся. Адзін - шыракаплечы мужчына, твар якога хаваўся ў цяні ад чорнага капелюша, пляснуў далонню па калене.
- Я гэтыя іхнія штучкі ведаю! - крыкнуў ён. - І набяруць, колькі ім трэба. Галодных людзей набяруць. За дваццаць цэнтаў у гадзіну сям'ю не пракорміш, але ты пойдзеш на што заўгодна. Як ні круціся, ты ў іхніх руках. Яны прадаюць працу, як з таргоў. Далібог, хутка яшчэ і прыплачваць ім прымусяць, каб работу ў іх атрымаць.
- Мы б згадзіліся, - сказаў бацька. - У нас ні ў кога няма ніякай работы. Абавязкова згадзіліся б, але на нас людзі такімі вачамі пазіралі, што мы пабаяліся.
Чалавек у чорным капелюшы сказаў:
- Крануцца з розуму можна, як падумаеш. Я ў аднаго працаваў, дык ён свайго ўраджаю сабраць не можа. На збор больш грошай пойдзе, чым ён ад продажу атрымае. Проста не ведаю, што рабіць.
- Вось калі б... - Бацька замяўся. Усе моўчкі чакалі. - Ну, я проста падумаў, калі б у мяне хоць акр зямлі быў... жонка гародніну б развяла, парачку свіней гадавалі б, курэй трохі. А мы, мужчыны, працавалі б недзе і дамоў вярталіся. Дзеці, можа, у школу хадзілі б. Я такіх школ, як тут, нідзе не бачыў.
- Дзецям нашым у тутэйшых школах нясоладка даводзіцца, - сказаў чалавек у чорным капелюшы.
- А чаму? Яны даволі добрыя, гэтыя школы.
- Ну сам падумай... Прыйдзе вось такі абадранец босы, а іншыя дзеці, у шкарпэтках, у добрых штанах, дражняць яго - «Окі, Окі». Мой хлопчык хадзіў у такую школу. Кожны дзень з кім-небудзь біўся. Малайчына, не ўступаў. Наравісты, шальмец. Што ні дзень, то бойка. Дамоў прыйдзе - адзенне пашкуматанае, нос у крыві. А маці яго лупцуе. Пад канец я заступіўся. Што ж, усе будуць яго, беднага, таўчы? А далібог, ён здорава іх лупіў, гэтых сукіных сыноў у добрых штоніках. Ну, не ведаю, не ведаю...
- Што ж нам усё-такі рабіць? - задаў пытанне бацька. - Грошай у нас няма. Адзін сын атрымаў кароткачасовую работу, але гэтым не пракормішся. Пайду і на дваццаць цэнтаў. А што рабіць?
Чалавек у чорным капелюшы падняў галаву, і на святло выступіў яго шчаціністы падбародак і гладка, як поўсцю, зарослая па баках жылістая шыя.
- Ага, ты гэтак зробіш, - з горыччу сказаў ён. - А мне плацяць дваццаць пяць. Ты забярэш у мяне маю працу за дваццаць. Я пахаджу галодны і забяру яе ў цябе за пятнаццаць. Ну дык ідзі, наймайся.
- Што ж тады рабіць мне? - дапытваўся бацька. - Не паміраць жа мне з голаду, каб табе плацілі дваццаць пяць?
Чалавек у чорным капелюшы апусціў галаву, і яго падбародак зноў схаваўся ў цяні.
- Не ведаю, - адказаў чалавек. - Ну не ведаю. Працуеш па дванаццаць гадзін у дзень і ўсё роўна дасыта не ясі, а тут яшчэ галаву ламай, як быць далей. Хлопчык мой жыве надгаладзь. Не магу я ўвесь час аб адным толькі думаць, хай яно праваліцца. Звар'яцець можна.
Людзі, што кружком сядзелі на кукішках, неспакойна заварушыліся.
Том стаяў каля варот і ўглядаўся ў гасцей, якія з'язджаліся на танцавальны вечар. Яркае святло пражэктара падала на іх твары.
Уілі Ітан сказаў Тому:
- Глядзі пільна. Зараз прышлю сюды Джула Вітэлу. Ён чэракез-паўкровак. Хлапец добры. Ва ўсе вочы глядзі. Магчыма, прыкмеціш каго.
- Добра, - адказаў Том.
Ён глядзеў на фермерскія сем'і, што пад'язджалі да варот, на дзяўчат, якія заплялі валасы ў косы, на падлеткаў, якія навялі на сябе глянец дзеля танцаў. Падышоў Джул і спыніўся каля яго.
- Я буду з табой, - сказаў ён.
Том узняў на яго вочы - арліны нос, скуласты смуглы твар, кароткі, нібы зрэзаны, падбародак.
- Кажуць, ты напалову індзеец. А па-мойму, ты поўны індзеец.
- Не, - адказаў Джул. - Я паўкровак. Лепш быў бы чыстакроўны. Мог бы ўчастак мець у рэзервацыі. Там жыць можна, некаторым.
- Зірні, колькі народу, - сказаў Том.
Госці праходзілі праз вароты: сем'і фермераў, перасяленцы з прыдарожных лагераў. Дзеці стараліся хутчэй вырвацца з-пад апекі дарослых, але паважныя бацькі стрымлівалі іх.
Джул сказаў:
- Неяк забаўна ў нас выходзіць з гэтымі танцамі. Людзі ў лагеры бедныя, нічога за душой у іх няма, а ходзяць гордыя, бо могуць запрашаць сюды на танцы знаёмых. І тыя іх за гэта паважаюць. Я тут у аднаго гаспадара на маленькай ферме працаваў. Правёў яго сюды неяк раз на танцы. Запрасіў яго, і ён прыехаў. Потым кажа: нідзе ва ўсёй акрузе не бывае такіх прыстойных танцавальных вечароў - сюды можна і дочак, і жонку з сабой браць. Гэй, глянь!
Праз вароты праходзілі трое маладых людзей - трое рабочых у джынсах. Яны трымаліся разам. Вартаўнік каля варот спыніў іх, яны адказалі на яго пытанні і прайшлі ў лагер.
- Пасачы за імі, - сказаў Тому Джул і падышоў да вартаўніка. - Хто іх запрасіў?
- Нейкі Джэксан, сектар нумар чатыры.
Джул вярнуўся да Тома.
- Відаць, яны самыя і ёсць, - сказаў ён.
- Адкуль ты ведаеш?
- Ды так - здаецца. У іх нейкі выгляд насцярожаны. Ідзі за імі, пакажы іх Уілі Ітану, і няхай ён знойдзе Джэксана з чацвёртага аддзялення. Трэба праверыць іх. А я тут пабуду.
Том пайшоў следам за трыма маладымі людзьмі. Яны падышлі да танцавальнай пляцоўкі і спакойна сталі з краю натоўпу. Каля аркестра Том убачыў Уілі і паманіў яго рукою да сябе.
- Ну, што ў цябе? - запытаўся Ўілі.
- Вунь тыя трое - бачыш?
- Ага.
- Сказалі, што іх запрасіў нейкі Джэксан з чацвёртага.
Уілі выцягнуў шыю, адшукаў вачамі Хастана і падазваў яго.
- Вунь тыя трое, - сказаў ён. - Трэба знайсці Джэксана з чацвёртага аддзялення і даведацца, ці запрашаў ён іх.
Хастан павярнуўся на абцасах і пайшоў; праз некалькі хвілін ён падвёў да Ўілі і Тома сухарлявага, з шырокай косцю, тэхасца.
- Вось ён, Джэксан, - сказаў Хастан. - Паслухайце, Джэксан, бачыце тых трох хлопцаў?
- Ну.
- Вы іх запрашалі сюды?
- Не.
- Раней калі бачылі іх?
Джэксан прыгледзеўся больш уважліва.
- Ну бачыў. Разам у Грэгорыё працавалі.
- Значыць, прозвішча ваша ім вядомае?
- Ну так. Мы працавалі побач.
- Добра, - сказаў Хастан. - Вы, хлопцы, да іх не падыходзьце. Калі нічога дрэннага не зробяць, мы не будзем іх выправоджваць. Дзякуй вам, містэр Джэксан. - Тому ён сказаў: - Добра зроблена. Думаю, яны самыя і ёсць.
- Гэта Джул іх запрыкмеціў, - сказаў Том.
- Дзіва што! - усклікнуў Уілі. - Індзейская кроў, чуццём бярэ. Ну, пайду пакажу іх сваім хлопцам.
З натоўпу выскачыў падлетак гадоў шаснаццаці і спыніўся перад Хастанам, ледзь пераводзячы дух.
- Містэр Хастан, - загаварыў ён, - я зрабіў усё, як вы загадалі. Адна машына стала каля эўкаліптаў - у ёй шасцёра, а яшчэ адна з чатырма пасажырамі спынілася на дарозе з паўночнага боку. Я падышоў да іх, папрасіў даць прыпаліць. У іх рэвальверы. Сам бачыў.
Позірк у Хастана зрабіўся суровы, жорсткі.
- Уілі, - сказаў ён, - у цябе ўсё гатова, ты праверыў?
Уілі ашчэрыўся вясёлай усмешкай:
- Будзьце спакойныя, містэр Хастан. Усё будзе зроблена як належыць.
- Толькі нікога не біць. Запомні. Калі зможаце - толькі па-добраму, спакойна, прывядзіце іх да мяне. Я буду ў сваёй палатцы.
- Пастараемся, - сказаў Уілі.
Танцы яшчэ фармальна не пачаліся, і Ўілі падняўся на пляцоўку.
- Разбірайцеся па чацвёра! - крыкнуў ён.
Аркестр замаўчаў. Юнакі і дзяўчаты, маладыя мужчыны і жанчыны забегалі па вялікай танцавальнай пляцоўцы і нарэшце выстраіліся ў восем чацвёрак - выстраіліся і чакалі пачатку. Дамы стаялі, падняўшы рукі перад сабой і сашчапіўшы далоні. Кавалеры нецярпліва пераступалі з нагі на нагу. Старыя і пажылыя сядзелі вакол пляцоўкі, ледзь прыкметна ўсміхаючыся, не адпускалі ад сябе дзяцей, якія рваліся на сярэдзіну пляцоўкі. А там, каля палатак, сядзелі праведныя хрысціяне і з асуджэннем на суровых тварах высочвалі грэх.
Маці і Ружа Сарона селі на лаўку. І калі кавалеры запрашалі Ружу Сарона на танец, маці гаварыла: - Не, яна нешта дрэнна сябе сёння адчувае. - А Ружа Сарона кожны раз залівалася чырванню, і вочы ў яе загараліся.
Распарадчык танцаў Уілі Ітан выйшаў на сярэдзіну і падняў рукі:
- Усе гатовыя? Пачалі!
Грымнуў аркестр, гулка і пранізліва зайграў вірджынскую кадрылю «Куранё» - завішчала скрыпка, хрыпла загугнілі гармонікі, заракаталі на басах гітары. Распарадчык выкрыкваў фігуры, чацвёркі паварочваліся, сходзіліся, адступалі.
- Бярыцеся за рукі, кружыце дам. - Разгарачыўшыся, Уілі сам адбіваў такт нагамі, важна хадзіў узад і ўперад, снаваў сярод танцораў, паказваючы новую фігуру. - Кружыце дам, і далікатней. Цяпер кола, шырэй! - Музыка то грымела на ўсю моц, то заціхала, а падэшвы адбівалі такт, як барабанны дробат. - Паварот направа, паварот налева, рукі адпусціць, паварот кругом! - высокім голасам энергічна выкрыкваў Уілі. І ўжо прычоскі ў дзяўчат сталі не такія гладзенькія, у кавалераў на лбе выступілі кроплі поту. І вось ужо хвацкія танцоры пачалі выкідваць адмысловыя каленцы. А старыя і пажылыя, што сядзелі па краях пляцоўкі, захопленыя рытмам танца, нягучна пляскалі ў далоні, прытупвалі нагамі, мякка ўсміхаліся адзін аднаму, ківалі галовамі.
Маці прашаптала на вуха Ружы Сарона:
- Хочаш вер, хочаш не, але тата твой быў хвацкі танцор у маладыя гады, лепшага я не бачыла. - Маці ўсміхнулася: - Не хочучы, старыя часы прыгадаеш. - Усмешкі на тварах астатніх гледачоў таксама былі народжаныя ўспамінамі пра даўнейшае.
- У нас там, у Аклахоме, каля Маскагі, гадоў дваццаць назад быў сляпы скрыпач...
- Я некалі бачыў аднаго хвата - падскочыць і чатыры разы абцасамі прыстукнуць паспее.
- А шведы ў Дакоце, ведаеце, што робяць? Насыплюць перцу на падлогу, жанчынам пад спадніцу трапіць, і яны такія жвавыя, такія рэзвыя робяцца, што тая кабылка ўвесну. Шведы часам так робяць.
А верныя паслядоўнікі Хрыста здаля сачылі за танцамі і трымалі пры сабе дзяцей, якім не сядзелася на месцы.
- Гляньце, вунь які грэх учыняюць, - гаварылі яны. - Гэтыя людзі так і ўедуць у пекла на качарзе. Проста сорам набожным бачыць такое. - Дзеці іх слухалі і трывожна маўчалі.
- Яшчэ адно кола, і перадышка, - нараспеў прагаварыў распарадчык Уілі Ітан. - Задайце жару напаследак. - Распараныя, расчырванелыя дзяўчаты танцавалі, растуліўшы вусны, з урачыстым, пачцівым выразам на твары, а хлопцы адкідалі з ілба доўгія валасы і выраблялі курбеты, разводзячы ногі ў бакі, прыстуквалі абцасамі. Чацвёркі выходзілі наперад, перасякалі пляцоўку наўскасяк, адступалі назад, кружыліся пад гучную, вісклівую музыку.
І раптам аркестр змоўк. Танцоры застылі на месцы, прагна хапаючы ротам паветра. Дзеці, быццам сарваўшыся з ланцуга, кінуліся на пляцоўку і сталі бегаць, ганяцца адзін за адным, коўзацца па падлозе, зрываць адзін у аднаго кепкі, цягаць за валасы. Танцоры селі, абмахваючыся рукамі. Музыканты падняліся, расправілі плечы і зноў селі. Ціха забрынкалі гітарысты, падцягваючы струны.
Нарэшце Ўілі крыкнуў:
- Разбірайцеся зноў па чацвёрках, хто яшчэ можа.
Танцоры цяжка адарваліся ад лавак, і кавалеры зноў кінуліся запрашаць дам. Том стаяў блізка ад траіх маладых людзей, за якімі сачыў. Ён бачыў, як яны праціснуліся на танцпляцоўку і накіраваліся да адной з чацвёрак. Скрыпач ірвануў смычком па струнах. Дваццаць чалавек лянівай паходкай выйшлі на сярэдзіну пляцоўкі. Тыя трое ўжо падышлі да чацвёркі. Адзін з іх сказаў:
- Я буду танцаваць з гэтай дзяўчынай.
Бялявы хлапец здзіўлена падняў на яго вочы:
- Гэта мая дама.
- Ты мне яшчэ пагавары, сапляк.
Аднекуль з цемры пачуўся рэзкі свіст. Траіх гасцей імгненна ўзялі ў кола. І кожны з іх адчуў на сабе моцныя рукі. Цеснае кола людзей пасунулася з пляцоўкі.
Уілі крыкнуў танцорам:
- Пачалі! - Зайграла музыка, Уілі нараспеў называў фігуры танца, ногі танцораў гулка тупалі па дашчанай падлозе.
Да варот лагера падкаціла легкавая машына. Вадзіцель крыкнуў:
- Адчыняйце! Нам паведамілі, што ў вас тут бясчынства.
Вартаўнік не зрушыў з месца.
- Ніякага бясчынства ў нас няма, - сказаў ён. - Чуеце, музыка іграе? А вы хто такія?
- Шэрыфавы памочнікі.
- Паўнамоцтва ёсць?
- Якое тут паўнамоцтва, калі ў вас бясчынства?
- Няма ў нас бясчынства, - паўтарыў вартаўнік.
Людзі ў машыне прыслухаліся да музыкі, да выкрыкаў распарадчыка, і машына паволі ад'ехала ад варот і спынілася на скрыжаванні.
Трох паломнікаў, якія ішлі ў сярэдзіне цеснага кола людзей, моцна трымалі за рукі, раты ім заціснулі далонямі. Калі ўсе апынуліся ў цемры, кола разамкнулася. Том сказаў:
- Чыстая работа. - Ён трымаў сваю ахвяру ззаду за рукі.
Іх дагнаў Уілі.
- Здорава! - сказаў ён. - Цяпер вас і шасцярых хопіць. Хастан хоча глянуць на гэтых малойчыкаў.
З цемры выступіў Хастан.
- Вось гэтыя?
- Яны, - адказаў Джул. - Адразу палезлі з кулакамі. Толькі замахнуцца ім так і не давялося.
- Ану глянем, што за людзі, - сказаў Хастан.
Затрыманых павярнулі да яго тварам. Яны стаялі, унурыўшыся. Хастан накіраваў святло кішэннага ліхтарыка на іх хмурныя твары - на кожнага па чарзе.
- Навошта вам гэта спатрэбілася? - На яго пытанне адказу не было. - Хто вас падаслаў сюды?
- Што вы прычапіліся? Нічога мы дрэннага не зрабілі. Проста патанцаваць захацелася.
- Не мані, - сказаў Джул. - Ты хацеў ударыць таго хлопца.
Том сказаў:
- Містэр Хастан, як толькі яны падняліся на пляцоўку, нехта свіснуў.
- Ага, ведаю. Фараоны пад'ехалі да самых варот. - Хастан зноў павярнуўся да затрыманых. - Біць вас мы не будзем. Ну, кажыце - хто вас паслаў? - Адказу так і не было. - Вы такія самыя людзі, як і мы, - з горыччу сказаў Хастан. - Ваша месца з намі. Як жа ж так атрымалася? Мы ўсё ведалі, - дадаў ён.
- Есці ж нешта чалавеку трэба?
- Дык хто ж вас падаслаў? Хто заплаціў вам?
Адзін з затрыманых сказаў:
- Што хочаце рабіце. Мы нічога не скажам.
Хастан апусціў галаву і ціха прамовіў:
- Ну добра. Не трэба. Толькі вось што. Не лезьце з нажом на сваіх людзей. Мы стараемся ўсё як найлепш тут зрабіць, і пазабаўляцца хочам, парадак падтрымліваем. Не губіце ўсё гэта. Добра падумайце. Толькі самі сабе шкодзіце. Ну вось што, хлопцы, выправадзіце іх задамі. Біць не трэба. Яны самі не разумеюць, што робяць.
Маленькі атрад паволі пасунуўся ў глыб лагера. Хастан праводзіў яго позіркам.
Джул сказаў:
- Давайце ўсыплем ім трохі.
- Не, не трэба, - сказаў Уілі. - Я слова даў.
- Ну дык хоць выспятка дадзім, - маліў Джул. - Хоць цераз агароджу перакінем.
- Не, сэр! - стаяў на сваім Уілі. - А вы слухайце, - звярнуўся ён да палоннікаў: - На першы раз мы адпусцім вас цэлымі. А вы перадайце там каму належыць: калі яшчэ хто сюды паткнецца, мы так надаём пад бакі, касцей сваіх не збярэ. Так і перадайце. Хастан кажа, вы такія самыя людзі, як і мы. Магчыма, і такія самыя, толькі мне думаць пра гэта агідна.
Яны падышлі да агароджы. Двое з аховы падняліся з зямлі і накіраваліся да іх.
- Праводзім гасцей - рана дадому сабраліся, - сказаў ім Уілі.
Усе трое пералезлі цераз агароджу і зніклі ў цемры.
Маленькі атрад шпарка пакрочыў назад, да танцавальнай пляцоўкі. А насустрач яму неслася жаласнае падвыванне і віск аркестра, які іграў: «Стары Дэн Тэкер».
А каля канторы мужчыны ўсё яшчэ гутарылі, седзячы на кукішках, гукі аркестра даносіліся і да іх.
Бацька сказаў:
- Перамены мусяць быць. Не ведаю толькі якія. Нам, можа, і не дажыць да таго часу. Але яны будуць. Навокал нейкі неспакой. Толкам ні да чога не дадумаешся, і ўжо вельмі трывожна на душы.
Чалавек у чорным капелюшы зноў падняў галаву, і яго шчаціністая барада трапіла ў паласу святла. Ён падабраў з зямлі некалькі каменьчыкаў і раскідаў іх вялікім пальцам, як у гульні ў шарыкі.
- Што я магу сказаць? - загаварыў ён. - Перамены павінны быць, гэта правільна. Мне адзін расказваў, што было ў Акране, у штаце Агаё. На каўчукавых заводах. Рабочых там набралі з горцаў, бо яны ішлі за любую плату. А горцы гэтыя ўзялі ды ў саюз уступілі. Ну, панове, што тут усчалося! Крамнікі, легіянеры і да іх падобныя ваенную муштру праходзяць, гарлапаняць: «Чырвоныя!» Патрабуюць выгнаць саюз з Акрана. Прапаведнікі супраць яго пропаведзі чытаюць, газеты лямант паднялі, каўчукавыя заводчыкі дубінкі вырабляюць, бомбамі са слёзатачывым газам запасаюцца. Можна было падумаць, што горцы гэтыя не людзі, а д'яблы нейкія. - Ён памаўчаў і падняў з зямлі яшчэ некалькі каменьчыкаў, каб потым імі пастраляць з пальца. - Вось так, шаноўныя панове... гэта ўсё было ў сакавіку... І вось неяк у нядзелю пяць тысяч горцаў выправіліся за горад - папрактыкавацца ў стральбе па мішэнях. Так усе пяць тысяч і прайшлі праз горад, і ва ўсіх у руках стрэльбы. Пастралялі - і назад. Толькі і ўсяго. З тае пары ціха стала. Гарадскія апалчэнцы здалі дубінкі назад, крамнікі сядзяць па сваіх крамах, нікога не збілі, нікога ў смале і пер'і не выкачалі, усе засталіся цэлыя і здаровыя. - Запанавала доўгае маўчанне. Нарэшце чалавек у чорным капелюшы сказаў: - Тут яны ўжо нешта дужа разышліся. Лагер спалілі, людзей нашых б'юць. Я ўсё думаю... Стрэльбы ёсць ва ўсіх. Можа, і нам завесці клуб аматараў стральбы па мішэнях і збірацца ўсім кожную нядзелю?
Людзі паглядзелі на яго, зноў апусцілі вочы долу і неспакойна заварушыліся на кукішках, пераносячы цяжар цела з адной нагі на другую.
Вясна ў Каліфорніі прыгожая. У далінах на фруктовых дрэвах духмяная, бела-ружовая квецень - як хвалі на марскім мелкаводдзі. Першыя вінаградныя вусікі на старых вузлаватых лозах каскадам спадаюць па ствалах. Шырокія зялёныя ўзгоркі робяцца акруглымі і пяшчотнымі, як жаночыя грудзі, а ў нізінах на агародных участках міля за міляй цягнуцца градкі бледна-зялёнай салаты, верацёнападобнай цвятной капусты і нейкіх вычварных, быццам незямных, шэра-зялёных артышокаў.
А потым на фруктовых дрэвах распускаецца лісце, пялёсткі ападаюць з кветак на зямлю і ўсцілаюць яе бела-ружовым дываном. Кветаножка набракае, расце, набывае колер: вішні і яблыкі, персікі і грушы, інжыр, які замыкае кветку ў сваім плодзе. Уся Каліфорнія наліваецца сокам, фрукты цяжэюць, галіны пакрысе згінаюцца пад іх грузам, і тады пад кожную падстаўляюць падпорку.
Пра ўрадлівасць клапоцяцца людзі ўдумлівыя, дасведчаныя і ўмелыя, яны праводзяць доследы з насеннем, безупынна ўдасканальваюць тэхніку атрымання высокіх ураджаяў раслін, карэнне якіх павінна адолець мільённую арду ворагаў зямлі: кратоў, насякомых, іржу і цвіль. Людзі гэтыя працуюць старанна і няспынна, паляпшаюць насенне і карані. А ёсць яшчэ хімікі - яны апырскваюць дрэвы, аберагаючы іх ад шкоднікаў, абкурваюць серай вінаградныя лозы, змагаюцца з грыбком, гніллю, з мучністай расой і з іншымі хваробамі раслін. Ёсць яшчэ і медыкі-прафілактыкі, пагранічныя інспектары, якія высочваюць пладовую муху і японскага жучка; каранцінныя наглядчыкі, якія вырываюць хворыя дрэвы з карэннем і паляць іх; усе яны спецыялісты ў сваёй справе. А тыя, хто прышчэплівае маладыя дрэўцы і тонкія вінаградныя лозы, - самыя ўмелыя, бо іх работа - гэта работа хірурга, такая ж далікатная і беражлівая: трэба мець рукі хірурга і сэрца хірурга, каб зрабіць надрэз на кары, укласці прышчэпак, перавязаць рану, ахаваць яе ад доступу паветра. Гэта выдатныя людзі.
Уздоўж радоў ідуць культыватары - падымаюць вясновы дзёран, пераварочваюць яго, каб зямля стала ўрадлівай, праразаюць арашальныя канаўкі, знішчаюць карэнне пустазелля, каб яно не высмактала вады, прызначанай дрэвам.
А плады набракаюць сокамі, і на вінаградных лозах паяўляюцца доўгія гронкі кветак. І па меры таго як вясна пераходзіць у лета, спёка мацнее, лісце робіцца цёмна-зялёным. Слівы становяцца падобныя на маленькія птушыныя яйкі зялёнага колеру, і галіны ўсім цяжарам асядаюць на падпоркі. Пачынаюць акругляцца маленькія цвёрдыя грушы, паяўляецца першы пушок на персіках. Вінаградны цвет губляе свае малюсенькія пялёсткі, і цвёрдыя пацеркі ператвараюцца ў маленькія зялёныя мячыкі, і мячыкі гэтыя цяжэюць. Людзі, што працуюць на палях, гаспадары невялікіх фруктовых садоў, прыглядаюцца да ўсяго гэтага і робяць разлікі. Год выдаўся ўраджайны. І людзі ганарацца сабой, бо іхнія веды дапамаглі ім дамагчыся добрага плёну. Веды іхнія ператварылі свет. Нізенькая, кволая пшаніца вырасла і налілася зернем. Маленькія кіслыя яблыкі сталі вялікімі і салодкімі, а вунь той дзікі вінаград, што віўся сярод дрэў, сваімі маленечкімі ягадкамі кормячы птушак, цяпер нарадзіў тысячу гатункаў - чырвоны і чорны, зялёны і бледна-ружовы, ліловы і жоўты, і ў кожнага гатунку свой смак. Людзі, што працуюць на доследных фермах, вывелі новыя фрукты - нектарыны, сорак сартоў сліў і грэцкія арэхі з тонкай, як папера, шкарлупінай. І людзі безупынна працуюць - селекцыяніруюць, робяць прышчэпкі, перайначваюць, не шкадуючы сябе, не шкадуючы зямлі.
Першай выспявае вішня. Паўтара цэнта фунт. А ці варта нам абіраць яе дзеля такіх грошай? Чорныя вішні, чырвоныя вішні - наліўныя, салодкія, і птушкі напалову здзёўбваюць іх, а ў ямкі, зробленыя імі, з гудзеннем упіваюцца жоўтыя восы. І костачкі падаюць на зямлю і засыхаюць разам з чорнай мякаццю.
Слівы робяцца мяккімі і салодкімі. Госпадзі, мы ж не можам іх абіраць, сушыць, абкурваць серай! Няма чым плаціць зборшчыкам нават па самай нізкай цане. І шаравата-ліловыя слівы густым дываном усцілаюць зямлю. Спачатку скурка збіраецца маршчынкамі, і раі мух злятаюцца на баль, і па даліне разносіцца саладжавы водар тлення. Мякаць цямнее, і ўвесь ураджай псуецца на зямлі.
А ўжо жаўцеюць і наліваюцца сокам грушы. Пяць даляраў тона. Пяць даляраў за сорак скрынь, пяцьдзесят фунтаў кожная. А дрэвы ж трэба было падразаць, апырскваць, сад старанна даглядаць, а цяпер - абірай грушы, пакуй іх у скрыні, грузі на машыны, адвозь на кансервавы завод. За сорак скрынь - пяць даляраў. Не, мы гэтак не можам. І мяккія плады цяжка падаюць на зямлю і сплюшчваюцца ў блін. Восы ўпіваюцца ў салодкую масу, і ў паветры стаіць пах браджэння і гнілі.
На чарзе вінаград. Мы не можам вырабляць добрае віно. Добрае віно пакупніку не па кішэні. Рвіце вінаград з лоз - і цэлы, і гнілы, і аб'едзены восамі. Пад прэс пойдзе ўсё - і галінкі, і гразь, і гніль.
Але ў чанах утвараецца мучністая раса і мурашыная кіслата.
Дадайце серы і таніну.
Браджэнне вылучае даўкі водар віна, ад якога патыхае гніеннем і хімікаліямі.
Ну і што? Ва ўсякім разе, у ім ёсць алкаголь. Напіцца можна.
Дробныя фермеры бачаць, што даўгі падпаўзаюць да іх, няўхільна, як марскі прыліў. Яны апырсквалі сад, а ўраджаю не прадалі, яны падразалі і прышчэплівалі дрэвы, а сабраць ураджай не змаглі. Вучоныя людзі працавалі, стараліся, думалі, а плён іхняй працы гніе на зямлі, і смуроднае месіва ў вінных чанах атручвае паветра. Паспытайце гэтага віна - вінаградам і не пахне, адна серная і танінавая кіслата і алкаголь.
У наступным годзе гэты маленькі фруктовы сад увойдзе ў склад вялікага ўладання, бо гаспадара яго задушаць даўгі.
А гэты вінаграднік пяройдзе ва ўласнасць банка. Выжыць могуць толькі буйныя ўласнікі, бо ў іх ёсць кансервавыя заводы. А чатыры грушы, абабраныя і парэзаныя на паловы, звараныя і закансерваваныя, па-ранейшаму каштуюць пятнаццаць цэнтаў. Кансерваваныя грушы не псуюцца. Гадамі могуць стаяць.
Тленнем патыхае ўвесь штат, і ў гэтым саладжавым паху - вялікае гора зямлі. Людзі, што ўмеюць прышчэпліваць дрэвы, выводзіць усходжае буйное насенне, не ведаюць, што трэба зрабіць, каб галодныя маглі есці тое, што яны вырасцілі. Людзі, што стварылі новыя плады, не могуць стварыць грамадскага ладу, пры якім плады гэтыя былі б спажытыя людзьмі. І атмасфера паражэння навісае над штатам, як цяжкае гора.
Плён каранёў вінаграднай лазы і дрэў трэба вынішчаць, каб не падалі цэны, - і гэта самае сумнае, самае горкае, што можа быць на свеце. Апельсіны цэлымі вагонамі ссыпаюць на зямлю. Людзі едуць за некалькі міль, каб падабраць выкінутыя фрукты, але ж гэтага нельга дапусціць. Хто ж будзе плаціць за апельсіны па дваццаць цэнтаў тузін, калі можна з'ездзіць за горад і ўзяць іх дарма. І тут прыязджаюць іншыя людзі і абліваюць апельсінавыя россыпы газай са шлангаў і кіпяць гневам самі на сябе за такое злачынства, кіпяць гневам на тых, хто прыязджае падбіраць фрукты. Мільёны галодных маглі б пад'есці імі, а залацістыя горы абліваюць газай.
І над краем стаіць пах гніення.
Паліце каву ў параходных топках. Паліце кукурузу замест дроў - яна гарыць гарачым полымем. Скідайце бульбу ў рэчкі і стаўце ахову на берагах, каб яе не вылавілі галодныя. Каліце свіней і закопвайце іхнія тушы ў зямлю, і няхай зямля насыціцца тленнем.
Гэта злачынства, якому няма апраўдання. Гэта гора, якога нельга вымераць ніякімі слязьмі. Гэта паражэнне, якое зрынае ў прах усе нашы дасягненні. Урадлівая глеба, роўныя рады дрэў, моцныя ствалы і спелыя фрукты. А дзеці паміраюць ад пелагры, яны павінны памерці, бо апельсіны не прыносяць прыбытку. І следчыя выдаюць даведкі - смерць у выніку недаядання; таму што ежа павінна гніць, таму што ежу гнояць наўмысна.
Людзі прыходзяць з сеткамі вылоўліваць бульбу з рэчкі, але ахоўнікі гоняць іх прэч; людзі прыязджаюць на бразгатлівых аўтамабілях па выкінутыя апельсіны, але яны ўжо апырсканыя газаю. І людзі анямела стаяць, пазіраюць на бульбу, што праплывае міма, чуюць віск свіней, якіх колюць і засыпаюць вапнай у ямах, глядзяць на апельсінавыя горы, што апаўзаюць, ператвараючыся ў гнілую жыжу; і ў вачах у людзей - паражэнне; у вачах галодных дзяцей нарастае гнеў. У душах людзей наліваюцца і спеюць гронкі гневу - цяжкія гронкі, і яны ўсё наліваюцца і цяжэюць.
Неяк вечарам ва Ўідпэтчскім лагеры, калі доўгія перыстыя аблокі навіслі над тым месцам, дзе за гарызонт апусцілася сонца, палымнеючы па краях ад яго водсветаў, сям'я Джоўдаў доўга не разыходзілася пасля вячэры, маці не адразу ўзялася за посуд.
- Нешта трэба рабіць, - сказала яна і вачамі паказала на Ўінфілда. - Зірніце на яго. - Усе павярнулі галовы да хлопчыка. - Ён тузаецца і круціцца ў сне. Бачыце, які бледны? - Усе сарамліва апусцілі галовы. - На адных праснаках сядзіць. Мы тут ужо месяц. Том папрацаваў усяго пяць дзён. А астатнія? Скрабяцеся недзе цэлымі днямі, а работы ніяк не знойдзеце. І шчыра пагаварыць баіцеся. Грошы канчаюцца. А вы баіцеся пагаварыць. Павячэраеце - і хто куды. Духу не хапае пагаварыць начыстату. А трэба. Разашарна ўжо хутка разродзіцца, а зірніце, якая яна бледная. Прыйшоў час пагаварыць. І няхай ніхто з вас не падымаецца з месца, пакуль мы не абмяркуем, як далей жыць. Сала засталося на адзін дзень, мукі - на два, і яшчэ ёсць з дзесятак бульбін. Вось і пасядзіце, паварушыце мазгамі!
Усе маўчалі, пазіраючы сабе пад ногі. Бацька счышчаў складаным ножыкам гразь з-пад сваіх тоўстых пазногцяў. Дзядзька Джон паторгаў адшчэпленую трэску на скрыні, на якой сядзеў. Том ушчыкнуў пальцамі ніжнюю губу і адцягнуў яе ад зубоў.
Ён адпусціў губу і ціха прамовіў:
- Мы шукаем, ма. Ходзім паўсюль пеша, бо бензіну не набярэшся. Заходзім у кожныя вароты, у кожны дом, хоць і ведаем - без толку. Цяжка на душы. Шукаць работу і ведаць - усё роўна нічога не знойдзеш.
Маці гнеўна сказала:
- Якое вы маеце права падаць духам? Сям'я гіне. Няма ў вас такога права.
Бацька ўважліва агледзеў выскрабены пазногаць.
- Давядзецца ехаць адсюль, - сказаў ён. - Вельмі не хочацца, а давядзецца. Лагер добры, і людзі тут добрыя. Усё баімся, што трапім у які-небудзь новы гувервіль.
- Раз трэба, дык трэба. Галоўнае - каб есці было што.
Умяшаўся Эл:
- Бензін у мяне ёсць - цэлы бак. Не хацеў толькі вам казаць.
Том усміхнуўся:
- Эл у нас хоць і шалапут, а, бывае, цяміць.
- Ну, думайце, - сказала маці. - Больш я не магу глядзець, як сям'я галадае. Сала ў мяне на адзін дзень. І ўсё. Разашарна абрадзіцца, яе трэба добра карміць. Думайце!
- Тут вада гарачая, туалеты... - пачаў бацька.
- Туалетамі сыты не будзеш.
Том сказаў:
- Сёння прыязджаў адзін, клікаў нас у Мэрысвіль. Фрукты збіраць.
- Чаму ж нам туды не паехаць? - рашуча запыталася маці.
- Сам не ведаю, - адказаў Том. - Нешта не спадабаўся мне гэты чалавек. Вельмі ўжо ўгаворваў. А плата якая, не сказаў.
Маці прамовіла:
- Едзем. Едзем у Мэрысвіль. Няважна, колькі заплацяць. Едзем.
- Вельмі ўжо далёка, - сказаў Том. - На бензін не хопіць. Не дабяромся. Вось ты, ма, кажаш - думайце. А я толькі і раблю, што думаю. Увесь час думаю.
Дзядзька Джон сказаў:
- Тут адзін гаварыў, быццам хутка пачнуць бавоўну збіраць у Туларэ. Ад лагера, кажа, недалёка.
- Трэба ехаць адсюль, і як мага хутчэй. Хоць лагер добры, а я тут усё роўна больш не застануся. - Маці падхапіла вядро і пайшла ў санітарны блок па гарачую ваду.
- Маці ў нас зусім нейкая незгаворлівая стала, - сказаў Том. - Даўно ўжо яе такой злоснай не бачыў. Аж кіпіць.
Бацька з палёгкай уздыхнуў:
- Што ж, яна хоць начыстую загаварыла. Я ўжо колькі начэй не сплю, галава разрываецца. А цяпер можна ўсё адкрыта абмеркаваць.
Маці вярнулася з поўным вядром вады, ад якой ішла пара.
- Ну што, падумалі? - патрабавальна запыталася яна.
- Усё яшчэ вырашаем, - адказаў Том. - А што, калі і праўда на поўнач рушыць - туды, дзе бавоўна? Тут мы ўжо ўсё абшнарылі. Нічога тут не знойдзеш, гэта ясна. Давайце, можа, адразу і пагрузімся, паедзем на поўнач. Якраз паспеем да самага збору. Мне так і карціць ужо адчуць пад рукой бавоўну. Бак у цябе поўны, Эл?
- Амаль поўны - дзвюх цаляў не хапае да верху.
- Думаю, даедзем.
Маці занесла талерку над вядром.
- Ну дык як? - запыталася яна.
Том сказаў:
- Тваё ўзяло, ма. Здаецца, едзем. Так, тата?
- Трэба, думаю, ехаць, - адказаў бацька.
Маці перавяла на яго позірк.
- Калі?
- Марудзіць нельга. Можна і заўтра рана.
- Раніцай і паедзем. Я ж сказала вам, колькі ў нас засталося.
- Ты, ма, не думай, што я не хачу. Я ўжо два тыдні дасыта не еў. Жывот набіваць - набіваў, ды толку ад такой яды мала.
Маці акунула талерку ў вядро.
- Раніцай едзем, - сказала яна.
Бацька хмыкнуў.
- Вось якія часы насталі, - з'едліва сказаў ён. - Раней мужчына ўсім распараджаўся. А цяпер жанчыны камандуюць. Відаць, самая пара прызапасіць дручок.
Маці паставіла на скрыню талерку, з якой яшчэ сцякала вада, і, не падымаючы галавы, усміхнулася:
- Што ж, бацька, прызапась. Вось будзем сытыя, займеем дах над галавой, тады, можа, палка табе і згадзіцца, будзеш пеўнем хадзіць. А цяпер ты сваёй справай не займаешся, не думаеш, не працуеш. Было б так, што ж, мог бы ўзяцца і за дручок, а жанчыны толькі насамі шморгалі б і хаваліся па кутках, як мышы. Думаеш, вось зараз возьмеш палку і наб'еш жанчыну? Не, даражэнькі! Табе давядзецца ўступіць з ёю ў бойку, бо ў мяне таксама палка прыхаваная.
Бацька атарапела ўхмыльнуўся.
- Ты хоць пры дзецях такога не гаварыла б, ім такія словы карысці не прынясуць.
- А ты спярша накармі іх, а пасля разважай, што ім на карысць, а што не, - адрэзала маці.
Бацька абурана падняўся і пайшоў ад палаткі, дзядзька Джон паплёўся за ім.
Рукі маці ўсё яшчэ плюхаліся ў вадзе, але позірк яе скіраваўся ў спіны мужчын, і яна з гордасцю сказала Тому:
- Ён малайчына. Трымаецца яшчэ. У яго рукі свярбяць даць мне лупцоўкі.
Том засмяяўся:
- Ты што ж гэта - наўмысна яго раз'ятрываеш?
- А што ж ты думаў? Мужчына іншы раз мучыцца, мучыцца, усе пячонкі сабе выгрызае, потым кладзецца і памірае з тугі. А калі яго як след раззлаваць, тады ўсё добра. Бацька слова грубага не вымавіў, але аж ашалеў ад злосці. Цяпер ён мне пакажа.
Эл падняўся са скрыні:
- Пайду крыху прайдуся па лагеры.
- Лепш машыну праверыў бы перад дарогай, - напомніў яму Том.
- Ужо ўсё праверана.
- Калі не так, маму на цябе напушчу.
- Ну праверыў я яе. - Эл пакрочыў між палатак.
Том уздыхнуў:
- А я нешта стаміўся, ма. Можа, і мяне ты раззлуеш?
- Ты разумнейшы, Том. Злаваць цябе без толку. Ты мая апора. Астатнія... што тыя госці... усе, акрамя цябе. А ты не здасі, Том.
Увесь цяжар клаўся на яго плечы.
- Не па нутры мне гэта, - сказаў ён. - Я пагуляць хачу, як Эл. І ўзлавацца хачу, як тата, альбо напіцца, як дзядзька Джон.
Маці пакруціла галавой:
- Нічога ў цябе не выйдзе, Том. Я ведаю. З тае пары ведаю, як ты яшчэ маленькі быў. У цябе не атрымаецца. Ёсць людзі, якія заўсёды застаюцца самі сабой, больш нічым. Вось Эл - малец, на ўме ў яго адны дзяўчаты. Ты ніколі такім не быў, Том.
- Быў, быў. І цяпер такі.
- Не. Што б ні рабіў, ты застаешся самім сабой. Я гэта заўсёды ведала. Ты толькі языком іншы раз любіш памалоць.
- Не, ма, ты гэта кінь. Усё не так. Табе толькі здаецца.
Маці паклала нажы і відэльцы на груду талерак.
- Магчыма. Можа, і здаецца. Разашарна, вытры посуд і прымі яго.
Ружа Сарона цяжка паднялася з месца, выпнуўшы свой вялікі жывот. Яна ляніва падышла да скрыні і ўзяла ў рукі памытую талерку.
Том сказаў:
- Так разадзьмулася, што нават вочы ў бакі палезлі.
- Не трэба пакепліваць з яе, - сказала маці. - Яна ў нас малайчына. А ты пайшоў бы развітаўся з кім трэба.
- Ага. І пайду даведаюся, ці далёка туды ехаць.
Маці сказала Ружы Сарона:
- Ён усё гэта кажа не з жадання пакрыўдзіць цябе. А дзе Руці з Уінфілдам?
- Я бачыла, яны пабеглі за татам.
- Ну і няхай.
Ружа Сарона ўпраўлялася з посудам. Маці непрыкметна прыгледзелася да яе.
- Як ты сябе адчуваеш? Шчокі ў цябе нешта запалі.
- Мне сказалі, малако трэба піць, а я не п'ю.
- Ведаю, што трэба. Ды яго няма.
Ружа Сарона паныла сказала:
- Каб Коні не пайшоў ад нас, мы б цяпер з ім жылі ў сваім доміку, ён вучыўся б і ўсё такое. І малако б мы куплялі. І дзіця здаровым нарадзілася б. А цяпер здаровым не будзе. Малако мне піць трэба. - Яна засунула руку ў кішэню фартуха і нешта паклала ў рот.
- Што ты там грызеш? Пакажы, - сказала маці.
- Нічога.
- Але ж ты нешта грызеш, паказвай.
- Проста драбочак вапны. Я знайшла вялікі кавалак.
- Гэта ж усё роўна, што зямлю есці!
- Мяне цягне на яе.
Маці доўга маўчала. Яна напяла каленямі спадніцу. Нарэшце сказала:
- Я гэта разумею. Неяк раз я з'ела кавалак вугалю, калі хадзіла цяжарная. Вялікі кавалак. Бабка сказала, гэтага нельга рабіць. А пра дзіця сваё ты такіх слоў не гавары. Нават думаць пра гэта ты права не маеш.
- Ні мужа. Ні малака.
- Калі б ты была здаровая, я ўсыпала б табе як след. Аплявуху заляпіла б. - Маці паднялася і пайшла пад брызент. Неўзабаве вярнулася, падышла да дачкі і працягнула руку. - Глянь! - У руцэ ў яе былі маленькія зялёныя завушніцы. - Гэта табе.
Вочы ў Ружы Сарона на момант пасвятлелі, але яна адразу адвяла іх убок.
- У мяне вушы не праколатыя.
- А мы іх зараз праколем. - Маці зноў паспешліва пайшла ў палатку і вярнулася з кардоннай скрыначкай у руках. Яна хуценька ўцягнула нітку ў іголку, здвоіла яе і завязала на ёй некалькі вузельчыкаў. Пасля прасунула нітку ў другую іголку, таксама завязала на ёй вузельчыкі і выняла са скрыначкі кавалак корка.
- Ой, забаліць, забаліць! - спужалася Ружа Сарона.
Маці падышла да дачкі, паклала корак ёй пад мочку вуха і пракалола яе, канец іголкі ўпёрся ў корак.
Ружа Сарона скурчылася:
- Ой, коле! Мне будзе балець.
- Мацней балець не будзе.
- Будзе, будзе!
- Ну добра. Давай спярша глянем з другога боку. - Маці падклала корак пад другое вуха і пракалола іголкай мочку.
- Балець будзе!
- Ціха! - сказала маці. - Гэта ўсё.
Ружа Сарона здзіўлена паглядзела на яе. Маці перарэзала ніткі, зняла іголкі і ўцягнула ў абедзве мочкі па вузельчыку.
- Ну вось, - сказала яна. - Цяпер будзем кожны дзень працягваць па вузельчыку, праз два тыдні загаіцца, і ты зможаш надзець завушніцы. Вазьмі, цяпер яны твае. Схавай пакуль дзе.
Ружа Сарона асцярожна памацала вушы і паглядзела на кропелькі крыві, што засталіся на пальцах.
- Зусім не баліць. Толькі крышачку ўкалола.
- Даўно трэба было гэта зрабіць. - Маці глянула дачцэ ў твар і пераможна ўсміхнулася. - Ну канчай з талеркамі. Дзіця будзе ў цябе добрае. Ледзь не забылася, што табе ўжо хутка, а вушы не праколатыя. Ну, цяпер не страшна.
- А хіба гэта мае якое-небудзь значэнне?
- А як жа. Вядома, мае значэнне.
Эл шпацырнай хадою ішоў між палатак у бок танцавальнай пляцоўкі. Каля адной палаткі ён ціхенька свіснуў і пакрочыў далей. За рысай лагера ён сеў на траву.
Чырвоная акаймоўка воблакаў, што сабраліся на захадзе, цяпер ужо пагасла, і асяродак у іх пачарнеў. Эл пачухваў ногі і пазіраў у вячэрняе неба.
Праз некалькі хвілін да яго падышла бялявая дзяўчына, мілавідная, з выразнымі рысамі твару. Яна моўчкі апусцілася на траву побач з Элам. Ён абняў яе за талію, і пальцы яго пачалі забірацца крыху вышэй.
- Кінь, - сказала дзяўчына. - Козытна.
- Заўтра мы едзем, - сказаў Эл.
- Заўтра? Куды? - Дзяўчына спалохана паглядзела на яго.
- Далей, на поўнач, - безуважна прамовіў Эл.
- Але ж мы збіраліся пажаніцца, ці ж не так?
- Ну і пажэнімся, калі-небудзь.
- Ты ж казаў, што зусім хутка! - занервавалася дзяўчына.
- Хутка бывае па-рознаму.
- Ты ж абяцаў! - Пальцы яго забраліся яшчэ вышэй. - Адчапіся, - крыкнула дзяўчына. - Ты казаў, што пажэнімся.
- Ну і пажэнімся.
- Але ж ты едзеш.
- Што ты захвалявалася так? Цябе на кісленькае пацягнула?
- Не.
Эл засмяяўся:
- Выходзіць, я марна час патраціў, га?
Дзяўчына задрала падбародак, ускочыла на ногі.
- Ідзі прэч, Эл Джоўд! І бачыць цябе больш не хачу.
- Ды кінь ты. Што з табой?
- Уявіў сябе ўдальцом залётным!
- Ды пачакай хвілінку.
- Думаеш, я пайду з табой? А як жа! Быццам у мяне іншых няма.
- Ну пачакай!
- Не, сэр! Ідзі прэч!
Раптам Эл ірвануўся наперад, злавіў яе за шчыкалатку і пацягнуў да сябе. Дзяўчына ўпала, ён схапіў яе, моцна абняў і заціснуў рукою яе скажоны злосцю рот. Яна спрабавала ўкусіць руку, але ён выгнуў далонь, а другой рукой прыціснуў яе да зямлі. І праз момант дзяўчына заціхла, а яшчэ праз момант яны ўжо хіхікалі, лежачы ў сухой траве.
- Мы хутка вернемся, - гаварыў Эл. - У мяне будуць поўныя кішэні грошай. Паедзем з табой у Галівуд, у кіно будзем хадзіць.
Яна ляжала на спіне. Эл нахіліўся над ёю. І ўбачыў у вачах у яе адбітак яркай вячэрняй зоркі, і ўбачыў у вачах у яе адбітак чорных воблакаў.
- Мы паедзем на цягніку, - сказаў ён.
- А калі, ты думаеш, гэта будзе? - запыталася яна.
- Ну, можа, праз месяц, - адказаў ён.
Апусціўся вячэрні змрок. Бацька і дзядзька Джон сядзелі на кукішках каля канторы разам з іншымі галовамі сем'яў. Перад вачамі ў іх была ноч і невядомая будучыня. Маленькі адміністратар у пацёртым бездакорна белым касцюме стаяў, абапёршыся локцямі на парэнчы ганка. Твар у яго быў зямлісты, асунуты.
Хастан глянуў на яго і сказаў:
- Вы пайшлі б трохі паспалі, містэр.
- Ага, не шкодзіла б. Мінулай ноччу ў трэцім аддзяленні былі роды. Яшчэ трохі, і я сапраўднай павітухай стану.
- Гэта таксама трэба ўмець, - зазначыў Хастан. - Жанатаму чалавеку ўсё трэба ўмець.
Бацька сказаў:
- Заўтра рана мы едзем.
- Ужо? Куды?
- Думаем падацца крыху далей на поўнач. Магчыма, якраз паспеем на збор бавоўны. Тут без працы сядзім. Есці няма чаго.
- Вы дакладна ведаеце, што там ёсць праца? - запытаўся Хастан.
- Не. Але ж тут яе ўжо напэўна няма.
- Будзе. Крыху пазней будзе, - сказаў Хастан. - Мы вырашылі чакаць.
- Не хочацца ехаць адсюль, - сказаў бацька. - Народ тут добры... і туалеты, і ўсё такое. Але ж ехаць трэба. У нас цэлы бак бензіну. Куды-небудзь дабяромся. Тут мы кожны дзень мыліся пад душам. Я ў жыцці ніколі такі чысты не хадзіў. Дзіўная рэч - раней мыўся раз на тыдзень, і ад мяне нічым не пахла. А цяпер - дзень прапусціш, і ад цябе смярдзіць. Што, гэта ад частага мыцця так?
- Раней вы, можа, не заўважалі, - сказаў адміністратар.
- Магчыма, і так. Вельмі хочацца тут астацца.
Маленькі адміністратар сціснуў скроні далонямі.
- Па-мойму, сёння ноччу ў нас тут будзе яшчэ адзін нованароджаны, - сказаў ён.
- У нас у сям'і таксама неўзабаве чакаецца, - сказаў бацька. - Лепш бы тут раджала. Тут было б лепш.
Том, Уілі і метыс Джул сядзелі на краі танцавальнай пляцоўкі, пакалыхваючы нагамі.
- У мяне цэлы пачак добрага тытуню, - сказаў Джул. - Пасмалім?
- Я б з ахвотай, - сказаў Том. - Чорт ведае калі я апошні раз паліў. - Ён акуратна скруціў цыгарку, стараючыся не рассыпаць карычневых табачынак.
- Так, сэр, шкада, што вы ўжо едзеце, - сказаў Уілі. - Вы людзі добрыя.
Том запаліў папяроску.
- Я многа думаў - ехаць, не ехаць. Госпадзі, хутчэй бы ўжо асесці дзе-небудзь.
Джул узяў у яго свой пачак.
- Нядобра нам жывецца, - сказаў ён. - У мяне дачка маленькая. Думаў, прыеду ў Каліфорнію, у школу яе пашлю. Ды дзе там! На адным месцы мы доўга не затрымліваемся. Пажывеш дзе-небудзь трохі, і трэба цягнуцца далей.
- Хоць бы нам у гэтыя гувервілі зноў трапляць не давялося, - сказаў Том. - Я ў адным нацярпеўся страху.
- А што, шэрыфавы памагатыя ганялі?
- Баяўся, каб не забіць каго з іх, - адказаў Том. - Мы і пабылі ў тым лагеры зусім нядоўга, але я проста кіпеў увесь. Прыехаў палісмен і забраў прыяцеля майго так, нізашто - ён фараону гэтаму слова ўпоперак сказаў. Я ўвесь кіпеў, ледзь стрымаўся.
- А ты баставаў калі-небудзь? - пацікавіўся Ўілі.
- Не, ніколі.
- Я ўсё думаю: чаму шэрыфскія агенты не пранікаюць у наш лагер, не арудуюць тут? Думаеш, гэты маленькі з канторы ім перашкода? Не, сэр!
- Тады што ж? - запытаўся Джул.
- Вось я табе і скажу: тое, што мы ўсе заадно. Калі палісмен захоча каго-небудзь загрэбці, ён павінен перабраць увесь лагер. А на гэта ў яго духу не хопіць. Бо варта нам толькі раз крыкнуць, і ўмомант чалавек дзвесце прыбяжыць. Нядаўна адзін арганізатар выступаў у нас тут, каля дарогі. Гэтак паўсюль можна рабіць, кажа. Трымайцеся толькі гуртам. З дзвюма сотнямі людзей жарты дрэнныя. Шэрыфавы людзі толькі адзіночак вылоўліваюць.
- Ну, а што, калі і будзе саюз? - сказаў Джул. - Трэба ж, каб у яго важакі былі. А схопяць важака, і куды дзеўся твой саюз?
- Што ж, - адказаў Уілі, - калі-небудзь давядзецца над гэтым падумаць. Я тут цэлы ўжо год, а заработная плата ўсё падае і падае. Цяпер сям'ю ніяк не пракорміш сваёй працай, і з дня на дзень усё горш робіцца. Што ж нам, сядзець склаўшы рукі і з голаду паміраць? Проста не ведаю, што рабіць. Гаспадар коней корміць, нават калі яны без работы стаяць, - як міленькі. А вось калі на яго людзі працуюць, пляваць ён на іх хацеў. Выходзіць, коні яму куды даражэйшыя за людзей. Не разумею я гэтага.
- Мне ўжо і думаць абрыдла, - сказаў Джул. - А думаць трэба. У мяне вось дачка маленькая. Самі ведаеце - прыгажуня. Ёй нават тут прыз за прыгажосць далі. А што з ёю далей будзе? На вачах худзее. Вынесці гэтага не магу. Такая прыгожая... Я не вытрымаю, учыню што-небудзь.
- Што? - запытаўся Ўілі. - Што ты ўчыніш? Пойдзеш красці? У турму сядзеш. Заб'еш каго? На шыбеніцу пойдзеш.
- Не ведаю, - сказаў Джул. - У галаве ўсё блытаецца, як падумаю. Проста ў галаве ўсё блытаецца.
- А мне запомняцца гэтыя танцы, - сказаў Том. - Нідзе яшчэ я такіх прыстойных не бачыў. Што ж, спаць ужо час класціся. Ну, будзьце здаровы. Дзе-небудзь яшчэ, можа, стрэнемся.
- Абавязкова, - сказаў Джул.
- Ну, усяго добрага. - Том пайшоў ад іх, і яго паглынула цемра.
У палатцы Джоўдаў Руці і Ўінфілд ляжалі ў цемры на адным матрацы, побач з маці. Руці прашаптала:
- Ма!
- Што табе? Ты не спіш?
- Ма... а там... ну куды мы едзем, кракет будзе?
- Адкуль я ведаю. Спі. Заўтра рана ад'язджаем.
- Лепш застанемся, тут ёсць кракет, а там?
- Ш-шш!..
- Ма, Уінфілд вечарам набіў аднаго хлопчыка.
- Дрэнна зрабіў.
- Ага, дрэнна. Я яму так і сказала. Ён яго па носе ляснуў. Кроў так і хлынула, а божа мой!
- Не трэба так гаварыць. Так гаварыць нядобра.
Уінфілд павярнуўся тварам да іх.
- Ён абазваў нас Окі! - з абурэннем сказаў ён. - А пра сябе кажа: я не Окі, я з Арэгона, а вы паганыя Окі. Ну я яму і даў.
- Ш-шш... Дрэнна зрабіў. Ад яго мянушак табе шкоды ніякай.
- А я не хачу, каб ён абзываў нас, - са злосцю сказаў Уінфілд.
- Ш-ш... Спіце.
Руці сказала:
- Ты бачыла б - кроў як хлыне, усю кашулю яму заліла.
Маці высунула руку з-пад коўдры і лёгенька ўдарыла Руці пальцам па шчацэ. Дзяўчынка замерла на міг, потым зашмыгала носам і ціха заплакала.
У санітарным блоку, у дзвюх суседніх кабінках, сядзелі бацька і дзядзька Джон.
- Хоць напаследак добра пасядзім, - сказаў бацька. - Добрая прыбіральня. Памятаеш, як малыя напалохаліся, калі першы раз ваду спусцілі?
- Я і сам адчуваў сябе ніякавата, - сказаў дзядзька Джон. Ён акуратна падцягнуў штаны да каленяў. - Кепска мне. Адчуваю, што хутка зноў саграшу.
- Не саграшыш. Ты ж зусім без грошай. Мацуйся. Грэх абыдзецца даляры ў два, не менш, а ў нас такіх грошай няма.
- Няма. Але ў мяне думкі грэшныя.
- Ну што ж. Думаць можна і бясплатна.
- Усё роўна грэх.
- Затое куды танней.
- Ты з грэхам не жартуй.
- Я не жартую. Давай грашы. Ты заўсёды носішся са сваімі грахамі, якраз калі чорт ведае што робіцца.
- Гэта праўда, - сказаў дзядзька Джон. - Са мной заўсёды так. Але вы і паловы маіх грахоў не ведаеце.
- Ну і трымай іх пры сабе.
- Вось і з гэтымі ўнітазамі так - сяджу, а сам адчуваю - грэх.
- Тады ідзі ў кусты. Ну, падцягвай штаны, і пойдзем хоць трохі паспім. - Бацька надзеў на плечы шлейкі камбінезона і зашпіліў спражку. Потым спусціў ваду і доўга стаяў, задуменна пазіраючы, як яна бурліць у ракавіне.
Было яшчэ цёмна, калі маці разбудзіла сваю сям'ю. Праз расчыненыя дзверы санітарных блокаў сачылася кволае святло дзяжурных начных лямпачак. З суседніх палатак даносіліся разнастайныя гукі пахрапвання.
- Падымайцеся, вылазьце з палаткі, - сказала маці. - Час ужо ехаць. Хутка развіднее. - Яна падняла скрыпучы шчыток ліхтара і запаліла кнот. - Уставайце ўсе, уставайце!
На зямлі пад брызентавым навесам ляніва заварушыліся, скінулі з сябе байкавыя і ватовыя коўдры, сонныя вочы жмурыліся на святло. Маці нацягнула сукенку на кашулю, у якой спала.
- Кавы няма, - гаварыла яна. - Ёсць некалькі бліноў. Іх можна з'есці ў дарозе. Ну, падымайцеся, будзем грузіцца на машыну. Давайце, давайце! Толькі цішэй, а то суседзяў пабудзім.
Прайшло яшчэ некалькі хвілін, перш чым Джоўды канчаткова стрэслі з сябе сон.
- Нікуды не бегаць! - папярэдзіла маці Ўінфілда і Руці. Усе апрануліся. Мужчыны знялі брызент з распоркі і пачалі грузіць рэчы на машыну. - Раўней кладзіце, каб было зручна, - сказала маці. Яны паклалі зверху матрацы і перакінулі брызент цераз папярочную жэрдку.
- Ну вось, ма, - сказаў Том. - Можна ехаць.
У маці ў руцэ была талерка з халоднымі блінамі.
- Добра. Бярыце па адным. Больш у нас нічога няма.
Руці і Ўінфілд схапілі па бліну і залезлі на паклажу. Там яны ўкрыліся коўдрай і заснулі, не выпускаючы з рук халодных зачарсцвелых бліноў. Том сеў за руль, націснуў на стартэр. Ён хрыпла загуў і праз момант сціх.
- Каб цябе чорт, Эл! - вылаяўся Том. - У цябе ж акумулятар сеў.
Эл прыйшоў у лютасць:
- А як яго, халеру, перазарадзіш, калі бензіну ў абрэз?
Том крыва ўсміхнуўся:
- Ну не ведаю, але гэта твая віна. Цяпер давядзецца заводзіць уручную.
- Кажу ж табе, не мая.
Том вылез з кабіны і дастаў з-пад сядзення завадную ручку.
- Выходзіць, мая, - сказаў ён.
- Давай сюды. - Эл схапіў завадную ручку. - Пастаў на позняе, а то руку мне адарве.
- Добра. Ну, задай жару.
Эл круціў з усяе сілы - адзін абарот, другі, яшчэ і яшчэ. Нарэшце матор завёўся, зафыркаў, потым зароў. Том асцярожна прыглушыў яго - пераставіў запальванне на больш ранняе і паменшыў падачу газу.
Маці села побач з ім.
- Гэтак увесь лагер перабудзім, - сказала яна.
- Нічога, зноў заснуць.
Эл улез у кабіну з другога боку.
- Тата з дзядзькам Джонам селі наверх, - сказаў ён. - Хочуць даспаць.
Грузавік пад'ехаў да галоўных варот лагера. Вартаўнік выйшаў з канторы і правёў промнем ліхтара па машыне.
- Хвілінку пачакайце, - сказаў ён.
- А што такое?
- Вы зусім адсюль едзеце?
- Зусім.
- Тады трэба вас выкрэсліць.
- Выкрэслівайце.
- Куды кіруеце?
- Хочам падацца крыху далей на поўнач.
- Ну, жадаю шчасця.
- І мы вам таксама. Бывайце.
Грузавік асцярожна абагнуў насып. Том вёў машыну па той самай дарозе, па якой яны прыехалі ў лагер, - міма гарадка Ўідпэтч і далей на захад, да шашы № 99, а там - на поўнач па шырокай шашэйнай дарозе, якая вяла да Бейкерсфілда. Ужо развіднела, калі яны пад'ехалі да гарадской ускраіны.
Том сказаў:
- Куды ні кінь вокам, усюды рэстараны. І ў кожным каву падаюць. А вунь, гляньце, начны рэстаран яшчэ працуе. Ручаюся, у іх хоць заліся гарачанькай!
- Заткніся ты! - сказаў Эл.
Том ашчэрыўся ўсмешкай:
- А ты, як я пагляджу, паспеў ужо падчапіць дзяўчыну ў лагеры.
- Ну і што?
- Сёння ён у нас нешта вельмі зласлівы. Дрэнная мне кампанія.
Эл раздражнёна буркнуў:
- Хутка я адаб'юся ад вас. Аднаму, без сям'і, нашмат лягчэй.
- Праз дзевяць месяцаў у цябе ў самога сям'я будзе, - сказаў Том. - Думаеш, не бачыў, як ты стараўся?
- Не дуры, - сказаў Эл. - Я ў гараж наймуся, буду ў рэстаранах есці.
- А праз дзевяць месяцаў абзавядзешся жонкай з дзіцем.
- Не, гэтага не будзе.
- Надта разумны ты стаў, Эл. Глядзі, каб па галаве табе добра не далі.
- Хто гэта?
- Заўсёды знойдзецца хто.
- Думаеш, калі ты сам...
- Ну хопіць, спыніся, - не дала Элу дагаварыць маці.
- Я першы пачаў, - сказаў Том. - Захацелася падражніць яго. Я гэта без злосці, Эл. Не ведаў, што ты так прывязаўся да гэтай дзяўчыны.
- Няма такой дзяўчыны, да якой я вельмі ўжо прывязаўся б.
- Ну не, дык не. Пасварыцца са мной табе не ўдасца.
Грузавік выязджаў з горада.
- Вунь колькі тут забягалавак з гарачымі сасіскамі - цэлая процьма, - сказаў Том.
Маці сказала:
- Я адзін даляр прыхавала, Том. Табе вельмі хочацца кавы? На, бяры.
- Не, ма. Я проста так, жартам.
- Бяры, калі табе ўжо так захацелася.
- Не, не вазьму.
Эл сказаў:
- Тады сціхні - кава, кава!
Том памаўчаў. Потым сказаў:
- Быццам толькі ўчора тут быў. Вось і дарога, па якой мы той ноччу ехалі.
- Спадзяюся, з намі нічога такога ўжо ніколі не здарыцца, - сказала маці. - Жахлівая была ноч.
- Ага, нядобрая.
Справа ад іх узыходзіла сонца, і вялікі цень ад грузавіка бег збоку па дарозе, скачучы па штыкетніку. Яны ехалі паўз адбудаваны нанава Гувервіль.
- Гляньце, - сказаў Том. - Тут зноў жывуць. Быццам нічога і не здарылася.
Кепскі настрой памалу пакінуў Эла.
- Мне адзін расказваў, што ў некаторых лагерах пятнаццаць ужо ці дваццаць разоў усё дашчэнту спальвалі. Людзі адседзяцца ў лазняку і зноў робяць сабе якую-небудзь буду з пустазелля. Як суслікі. Так ужо прывыклі да гэтага, быццам і гора ім мала. Ім гэта як непагадзь.
- Ага, мне тая ноч таксама як непагодлівая была, - сказаў Том. Яны ехалі ўсё далей і далей па шырокай шашы. Ад цеплаватых сонечных промняў па крыху астылым целе прабягалі дрыжыкі. - А раніцамі пачынае ўжо пашчыпваць. Хутка ўжо зіма. Хоць бы трохі грошай зарабіць да халадоў. Зімой у палатцы не пасядзіш.
Маці ўздыхнула, падняла галаву.
- Том, - сказала яна, - зімой трэба жыць у доме. Разумееш? Руці яшчэ нічога, а Ўінфілд зусім стаў слабенькі. Да прыходу дажджоў у нас павінен быць дом. У гэтых краях, кажуць, як з вядра лье.
- Знойдзем домік, ма. Ты не хвалюйся. Будзе табе дом.
- Абы дах над галавой быў і падлога пад нагамі, каб дзеткі не на голай зямлі спалі.
- Пастараемся, ма.
- Больш я даймаць цябе не буду.
- Зробім, ма.
- Мне проста іншы раз страшна робіцца. Усю храбрасць сваю губляю.
- Нешта не бачыў я, каб ты яе калі-небудзь згубіла.
- Начамі бывае.
Недзе наперадзе пачулася рэзкае шыпенне. Том моцна абхапіў рукамі абаранак руля і да канца націснуў на тормаз. Грузавік здрыгануўся і стаў.
- Ну вось і ўсё, - уздыхнуў Том і адкінуўся на спінку сядзення.
Эл выскачыў з кабіны і падбег да пярэдняга правага кола.
- Цвік! І які вялікі!
- Чым залатаць ёсць?
- Няма, - адказаў Эл. - Усё чыста ў ход пусцілі. Гума дык ёсць, а клею няма.
Том глянуў на маці і сумна ўсміхнуўся:
- Не трэба было табе пра свой даляр гаварыць. Мы як-небудзь і без яго адрамантавалі б. - Ён вылез з машыны і падышоў да спушчанага кола.
Эл паказаў на доўгі тоўсты цвік, што тырчаў у сплюшчанай пакрышцы.
- Вунь які!
- Калі ва ўсім наваколлі ёсць хоць адзін-адзінюткі цвік, мы абавязкова напорамся на яго, - сказаў Том.
- Што-небудзь сур'ёзнае? - крыкнула ім маці.
- Не, не вельмі, а ўсё ж рамонт.
Усе саскочылі з паклажы на дарогу.
- Пракол? - запытаўся бацька, убачыў спушчаную шыну і замаўчаў.
Том папрасіў маці падняцца і дастаў з-пад сядзення бляшанку з гумай для латання камер. Ён разгарнуў палоску гумы, узяў цюбік з клеем і лёгенька сціснуў яго пальцамі.
- Амаль зусім пусты, - сказаў ён. - Можа, і хопіць. Ну добра, Эл, падкладзі што-небудзь пад заднія колы. Будзем падымаць дамкратам.
Том і Эл працавалі дружна. Падклалі камяні пад заднія колы, падставілі дамкрат пад пярэднюю вось, паднялі правае кола і знялі з яго праколатую шыну. Потым знайшлі дзірку на камеры, намачылі ў бензабаку анучку і працёрлі камеру на месцы праколу. Эл туга расцягнуў камеру на каленях, Том разарваў цюбік напалам, сцізорыкам наклаў на гуму тонкі слой клею і старанна размазаў яго вакол дзіркі.
- Цяпер няхай падсохне, а я пакуль што латку выражу. - Том падраўняў краі і скасіў кант сіняй латкі. Эл зноў расцягнуў камеру, і Том асцярожна паставіў латку. - Вось так. Цяпер пакладзі яе на падножку, а я прыпляскаю. - Ён нямоцна ўдарыў некалькі разоў малатком, потым расправіў камеру і ўважліва агледзеў краі латкі. - Ну вось! Па-мойму, вытрымае. Надзявай на вобад, мы яе напампуем. Твой даляр, ма, здаецца, уцалее.
Эл сказаў:
- Вось каб была ў нас запаска! Трэба мець запасную камеру, Том, і каб яна была ўжо на вобадзе і надзьмутая. Тады ніякі пракол і ноччу не страшны.
- Калі ў нас будзе столькі грошай, што хопіць на запасны скат, мы купім на іх кавы і мяса, - сказаў Том.
Рэдкія ў гэты ранні час машыны шпарка праносіліся па шашы, сонца ярчэла і пачынала мацней прыграваць. З паўднёвага захаду лёгкімі, як дыханне, павевамі дзьмуў пяшчотны ветрык, і горы абапал шырокай даліны ледзь праступалі праз перламутравы туман.
Том пампаваў камеру, калі на другім баку дарогі раптам спынілася легкавая машына, што ішла з поўначы. З яе вылез чалавек у светла-шэрым касцюме і пайшоў цераз шашу да грузавіка. Капелюша на ім не было. Загарэлы твар яго расплыўся ў белазубай усмешцы. На безыменным пальцы левай рукі блішчаў масіўны залаты пярсцёнак. На тонкім ланцужку, прычэпленым да камізэлькі, матляўся маленькі залаты шарык у выглядзе футбольнага мяча.
- Добрай раніцы, - ветліва павітаўся чалавек.
Том адарваў вочы ад ручной помпы, падняў галаву.
- Добрай раніцы, - адказаў ён.
Чалавек правёў пальцамі па падстрыжаных «пад вожык» крыху ўжо пасівелых валасах.
- Вы, можа, работу шукаеце?
- Канешне, шукаем, містэр. Пад усе масніцы зазіраем.
- Персікі збіраць умееце?
- Ніколі яшчэ не збіралі, - адказаў бацька.
- Мы ўсё ўмеем, - паспешліва прагаварыў Том. - Усё, што толькі ёсць, умеем збіраць.
Чалавек пакратаў пальцам залаты мячык на ланцужку.
- Дык вось, міль за сорак адсюль на поўнач колькі хочаце работы.
- Мы б з ахвотай папрацавалі, - сказаў Том. - Растлумачце, як туды дабрацца, і мы наўскач панясёмся.
- Кіруйце да Пікслі - гэта трыццаць пяць ці трыццаць шэсць міль адсюль, там павернеце на ўсход. Праедзеце міль шэсць і спытаеце ферму Гупера. Працы там хоць адбаўляй.
- Так і зробім.
- Можа, вы ведаеце, дзе яшчэ ёсць людзі, што шукаюць працу?
- Канешне, ведаем, - адказаў Том. - У лагеры каля Ўідпэтча такіх шмат знойдзецца.
- Пад'еду туды. Набраць многа можам. Дык не забудзьцеся - ад Пікслі на ўсход і так трымаць да самай фермы Гупера.
- Так і зробім, - паўтарыў Том. - Вялікі вам дзякуй, містэр. Нам праца да зарэзу патрэбна.
- Добра. Едзьце і не марудзьце. -Чалавек перайшоў дарогу, сеў у сваю машыну і пакіраваў на поўдзень. Том налёг на ручку помпы.
- Па дваццаць разоў будзем, - сказаў ён. - Раз, два, тры, чатыры... - Пасля дваццаці за помпу ўзяўся Эл, за ім бацька, потым дзядзька Джон. Пакрышка разадзьмулася, стала пухлай і гладкай. Кожны браўся за помпу па тры разы. - Цяпер давайце апусцім, глянем.
Эл аслабіў дамкрат, пярэдняя вось апусцілася.
- Добра надзьмулі, - сказаў ён. - Можа, нават і залішне.
Яны пакідалі інструмент у кабіну.
- Ну, усе па месцах, паехалі, - крыкнуў Том. - Нарэшце работа ў нас будзе.
Маці зноў села пасярэдзіне. За руль цяпер узяўся Эл.
- Лягчэй, Эл. Не перагрэй матора.
Яны ехалі ўсцяж залітых ранішнім сонцам палёў. Туман падняўся ўжо над вяршынямі ўзгоркаў, і яны віднеліся цяпер выразна - бурыя, з цёмна-ліловымі складкамі. Дзікія галубы ўзляталі з агароджаў пры набліжэнні грузавіка. Эл мімаволі павялічыў скорасць.
- Не гані, - перасцярог яго Том. - Будзеш націскаць на газ, латка не вытрымае. Нам абы даехаць. Магчыма, ужо сёння пойдзем працаваць.
Маці ўсхвалявана загаварыла:
- Калі вы ўсе чацвёра сёння ўладкуецеся, магчыма, крама адразу дасць мне ў доўг. Перш-наперш вазьму кавы, бо вы ўжо згаладаліся па ёй, тады мукі, соды і мяса. Без костак браць не буду. Гэта як-небудзь потым. Можа, у суботу. І мыла. Мыла абавязкова. Не ведаю яшчэ, дзе паселімся. - Яна гаварыла, не сціхаючы. - І малака. Абавязкова вазьму малака Разашарне, ёй яно вельмі неабходна. Медыцынская сястра ў лагеры казала.
Перад машынай па нагрэтым сонцам бетоне шашы паўзла змяя. Эл крута павярнуў, пераехаў яе і зноў вярнуўся на сваю паласу.
- Земляная, - сказаў Том. - Дарэмна ты яе раздушыў.
- Цярпець іх не магу, - сказаў Эл. - Усялякіх. Ад аднаго іх выгляду мяне нудзіць.
Да поўдня рух на шашы зрабіўся больш інтэнсіўны - бліскучыя лімузіны коміваяжораў з маркамі кампаній на дзверцах; чырвона-белыя бензавозы з бразгатлівымі ланцугамі, якія цягнуліся ззаду: вялізныя, з квадратнымі дзверцамі, фургоны аптовых бакалейшчыкаў, што развозілі тавар. Мясцовасць абапал дарогі здзіўляла сваім багаццем. Фруктовыя сады ў густой лістоце, вінаграднікі, у міжраддзі якіх доўгія атожылкі лоз густым зялёным дываном усцілалі зямлю. Градкі з дынямі, збожжавыя палі. Сярод зелені бялелі дамкі, аплеценыя ружамі. І залатое, цёплае сонца над усім гэтым.
Маці, Том і Эл, седзячы ў кабіне, не памяталі сябе ад шчасця.
- Даўно ўжо я так не радавалася, - сказала маці. - Калі збяром многа персікаў, мы, можа, і дом сабе займеем, ну хоць ноймем месяцы на два. Без дома нам ніяк нельга.
Эл сказаў:
- Я буду грошы адкладваць. Збяру трохі, перабяруся ў горад і ўладкуюся ў якім-небудзь гаражы. Буду жыць на кватэры, есці ў рэстаранах. У кіно кожны вечар хадзіць. Білеты недарагія. На каўбойскія фільмы. - Рукі яго мацней абхапілі абаранак руля.
Вада ў радыятары забурліла, з яго з шыпеннем пачала вырывацца пара.
- Ты заліў радыятар вадой? - запытаўся Том.
- Заліў. Вецер у спіну, таму і кіпіць.
- Цудоўны сёння дзянёк, - сказаў Том. - У Макалестары, бывала, працуеш, а ў думках толькі адно: як я зажыву там, на волі. Ад жыцця ўсё вазьму, хай хоць зямля гарыць пад нагамі, ні перад чым не спынюся. Як даўно, здаецца, гэта было! Быццам шмат гадоў з тае пары мінула. Там адзін наглядчык усё прыдзіраўся. У мяне рукі на яго свярбелі. Таму я, пэўна, такую злосць вялікую на гэтых фараонаў маю. Усе яны быццам на адзін твар. А ў таго морда была чырвоная. Парсюк парсюком. У яго, казалі, брат жыве недзе тут, на Захадзе. Каго выпусцяць з падпіскай, ён накіроўвае яго да брата, і яны там занішто на яго працуюць. А заўпарціцца хто, яго хоп! - і назад у турму за парушэнне падпіскі. Так расказвалі.
- А ты не думай пра гэта, - мякка сказала маці. - Вось накупляю я ўсякай яды - мукі, топленага сала...
- Само думаецца. Адганяеш такія думкі, а яны ўсё роўна лезуць у галаву. Там быў адзін прыдурак. Я вам пра яго яшчэ не расказваў. Крыху хуліганісты такі. Але бяскрыўдны. Усё задумляў уцёкі. Яму мянушку далі - Хуліган, - Том ціха засмяяўся.
- Выкінь з галавы, - зноў папрасіла маці.
- Давай далей, - сказаў Эл. - Раскажы пра яго.
- А тут нічога такога няма, мама, - сказаў Том. - Ён увесь час рыхтаваўся да ўцёкаў. Бывала, план складзе, а маўчаць пра яго не можа, і неўзабаве ўсім ужо ўсё вядома, нават начальніку турмы. Толькі ён пачне ажыццяўляць свой план, а яго за ручкі і назад у камеру. І вось неяк раз ён намаляваў на паперы месца, дзе пералезці збіраўся. Вядома ж, паказаў нам усім, а мы - маўчок. Пасля прагулкі ён не вярнуўся, а мы маўчым. Аказваецца, ён дастаў недзе вяроўку і пералез цераз сцяну. А ўнізе шэсць ахоўнікаў - стаяць з вялізным мехам напагатове. Хуліган спакойненька сабе спускаецца і трапляе проста ў раскрыты мех. Завязалі яго з галавой і так, у мяху, прывалаклі ў камеру. Усе ледзь з рогату не памерлі. А ён пасля гэтага захандрыў. Плача ўсё і плача, зусім духам упаў і страшэнна затужыў. Вялікая яго крыўда ўзяла. Неўзабаве шпількай успароў сабе вены і крывёю сцёк. Не перанёс крыўды. А сам нікому зла не зрабіў. Якіх толькі вар'ятаў там не стрэнеш.
- Не кажы так пра людзей, - сказала маці. - Вось я памятаю Прыгажунчыка Флойда, я маці яго ведала. Нічога ў ім благога не было. Проста жыццё загнала яго ў кут.
Сонца набліжалася да зеніту, і цень ад грузавіка змізарнеў і бег пад коламі.
- Вунь ужо, відаць, і Пікслі, - сказаў Эл. - Толькі што праехалі ўказальнік з надпісам.
Яны праехалі гарадок і павярнулі на ўсход па вузейшай дарозе. Фруктовыя сады абапал шашы ператварылі яе ў калідор.
- Думаю, ферму знойдзем лёгка, - сказаў Том.
Маці сказала:
- Ён гаварыў, што ферма належыць Гуперу і што кожны пакажа дарогу. Відаць, там і крама паблізу ёсць. Магчыма, у доўг дадуць - усё ж чацвёра працуюць. Я згатавала б добрую вячэру, толькі каб у доўг далі. Можа, нават і мяса ўволю стушу...
- І кавы вазьмі, - сказаў Том. - І, можа, нават пачак «Дэрэма». Свайго тытуню я ўжо век, здаецца, не паліў.
Далёка наперадзе дарога была блакіравана скопішчам машын, а ўздоўж абочын ланцугом стаялі белыя матацыклы.
- Няйначай, аварыя, - вырашыў Том.
Калі яны набліжаліся да хваставой машыны, з-за яе выйшаў палісмен у высокіх шнураваных чаравіках і з афіцэрскай партупеяй. Ён падняў руку, і Эл спыніў грузавік. Палісмен спакойна прынік да акенца кабіны:
- Куды едзеце?
- Нам казалі, што недзе тут блізка збіраюць персікі, - адказаў Эл.
- На працу хочаце ўладкавацца?
- Ага, хочам, - адказаў Том.
- Добра. Пачакайце хвілінку. - Палісмен падышоў да краю дарогі і крыкнуў камусьці наперадзе:- Яшчэ адна машына! Цяпер усяго шэсць. Прапусцім усю калону.
Том крыкнуў яму:
- Гэй! Што тут такое?
Патрульны, не спяшаючыся, вярнуўся.
- Там нейкая затрымка. Вы не хвалюйцеся - праедзеце. Толькі без абгону.
Застракаталі матацыклетныя маторы. Машыны рушылі наперад, грузавік Джоўдаў ішоў апошні. Двое матацыклістаў ехалі наперадзе, двое ззаду.
Том затрывожыўся:
- Не разумею, у чым справа.
- Можа, аб'езд, - выказаў здагадку Эл.
- Дык навошта тады гэтыя матацыклісты? Не падабаецца нешта мне гэта.
Пярэднія матацыклы прыбавілі скорасць. Калона старых машын таксама пайшла шпарчэй. Эл стараўся не адстаць.
- У гэтых машынах такія ж людзі, як мы, - сказаў Том. - Не па нутры мне гэта.
Раптам матацыклы ў галаве калоны збочылі з шашы на пасыпаную жвірам пад'язную дарогу. Машыны павярнулі за імі. Матацыклы імчаліся з аглушальным трэскам. Уздоўж дарогі, у кювеце, Том убачыў людзей - усе мужчыны, убачыў іх раскрытыя раты - відаць, яны нешта крычалі, убачыў іх сціснутыя кулакі і гнеўныя твары. Нейкая тоўстая жанчына кінулася да машын, але адзін з матацыклістаў перарэзаў ёй дарогу. Высокія сеткаватыя вароты расчыніліся, усе шэсць машын заехалі ў іх, і вароты зачыніліся. Матацыклы развярнуліся і на вялікай хуткасці панесліся назад. Цяпер, калі грукат матацыклетных матораў сціх, сталі чутны крыкі людзей, што тоўпіліся ў прыдарожнай канаве. За варотамі, на ўсыпанай жвірам дарозе, былі двое з драбавікамі. Адзін з іх закрычаў:
- Далей, далей, давайце далей! Чаго сталі?
Машыны паехалі наперад, потым усе шэсць павярнулі налева і апынуліся ў лагеры для зборшчыкаў фруктаў. У ім было пяцьдзесят маленькіх домікаў, падобных да скрынь - пляскаты дах, адно акенца і дзверы. Гэтыя домікі-скрыні стаялі правільным прамавугольнікам. У канцы лагера ўзвышалася цыстэрна з вадой. З другога боку была маленькая бакалейная крамка. Уздоўж кожнага рада домікаў па двое расхаджвалі людзі з драбавікамі; на кашулях у іх былі вялікія сярэбраныя зоркі.
Машыны спыніліся. Двое канторшчыкаў абышлі ўсе шэсць па чарзе.
- На працу хочаце наняцца?
- Вядома, хочам. Але што тут такое робіцца?
- Вас гэта не датычыцца. Праца вам патрэбна?
- Ну я ж сказаў.
- Прозвішча?
- Джоўд.
- Мужчын колькі?
- Чацвёра.
- Жанчын?
- Дзве.
- Дзяцей?
- Двое.
- Працаваць усе могуць?
- Думаю, усе.
- Добра. Знайдзіце домік нумар шэсцьдзесят тры. Плата - пяць цэнтаў за скрыню. Пабітыя фрукты не прымаем. Ну едзьце. Адразу ж выходзьце на працу.
Машыны паехалі далей. На дзвярах кожнага доміка, афарбаванага ў чырвоны колер, быў намаляваны нумар.
- Шэсцьдзесят. Тут шасцідзесяты, - сказаў Том. - Значыць, крыху далей. Шэсцьдзесят адзін, шэсцьдзесят два... Вось і наш.
Эл падвёў грузавік да самых дзвярэй доміка. Верхнія пасажыры саскочылі з машыны і пачалі разгублена азірацца па баках. Да доміка падышлі двое шэрыфавых памагатых. Яны пільна ўглядаліся кожнаму мужчыну ў твар.
- Прозвішча?
- Джоўд, - нецярпліва адказаў Том. - Скажыце, што тут у вас адбываецца?
Адзін палісмен выняў з кішэні доўгі спіс.
- У мяне такое не значыцца. Табе яно ніколі на вочы не траплялася? Правер па нумары машыны.
- Не, такога ў мяне няма. Як быццам усё ў парадку.
- Цяпер слухайце. Не рабіце нам ніякіх непрыемнасцей. Займайцеся сваёй справай, не лезьце, куды вас не просяць, і ўсё будзе добра. - Абодва палісмены крута павярнуліся і пайшлі. У канцы пясчанай вулачкі яны селі на скрыні, адкуль маглі назіраць за ўсім радам домікаў.
Том доўга глядзеў на іх.
- Гэта каб мы адчувалі сябе як дома.
Маці адчыніла дзверы і ўвайшла ў домік. Падлога заплюхана салам. У адзіным пакоіку стаяла ржавая жалезная печка - і больш нічога. Ножкамі ёй служылі дзве цагліны, іржавы бляшаны комін быў прасунуты праз дзірку ў столі-даху. У пакоі моцна пахла падгарэлым салам і потам. Ружа Сарона стала каля маці.
- І тут мы будзем жыць?
Памаўчаўшы трохі, маці адказала:
- Ну а дзе ж? Памыем, і не так ужо і кепска будзе. Трэба тут добра паскрэбці.
- У палатцы лепш, - сказала Ружа Сарона.
- Тут падлога ёсць, - нагадала ёй маці. - А ў дождж працякаць не будзе. - Яна павярнулася да дзвярэй. - Разгружацца трэба.
Мужчыны моўчкі знімалі паклажу з грузавіка. Нейкае трывожнае пачуццё авалодала імі. Вялікі прамавугольнік домікаў-скрынь маўчаў. Па вулачцы прайшла жанчына, але нават не зірнула на прыезджых. Галава ў яе была апушчаная, падол бруднай сарпінкавай сукенкі абтрапаўся і вісеў шматкамі.
Агульная паныласць перадалася Руці і Ўінфілду. Яны не кінуліся разведваць новае месца - стаялі каля самага грузавіка, каля дарослых, і тужліва паглядалі на пыльную вулачку - то ў адзін бок глянуць, то ў другі. Уінфілд падабраў з зямлі кавалак пакавальнага дроту, перагнуў яго некалькі разоў і зламаў. Тады загнуў кароткі абломак каленцам і пачаў круціць яго ў руцэ.
Калі Том з бацькам пачалі пераносіць матрацы ў дом, да грузавіка падышоў канторшчык у зелянковых штанах і ў сіняй кашулі з чорным гальштукам. Праз тоўстыя шкельцы акуляраў у сярэбранай аправе вызіралі блізарукія, пачырванелыя вочы, зрэнкі іх глядзелі пільна, ва ўпор, як агеньчыкі начных ліхтароў. Канторшчык выцягнуў шыю, разглядаючы Тома.
- Трэба ўнесці вас у спіс, - сказаў ён. - Колькі чалавек пойдзе працаваць?
- Нас чацвёра мужчын, - адказаў Том. - А праца цяжкая?
- Збор персікаў. Аплата здзельная. Пяць цэнтаў за скрыню.
- Можна і дзецям збіраць?
- Чаму ж не. Толькі каб акуратна.
У дзвярах паказалася маці.
- Вось прыбяру і таксама пайду памагу. Нам няма чаго есці, містэр. Нам заплацяць адразу?
- Не, грошай адразу не дадуць. Але можна браць у крэдыт у краме на тое, што вам налічаць.
- Дык хадзем, чаго марудзіць, - сказаў Том. - Я сёння да ночы хачу мяса з хлебам паесці. Куды нам ісці, містэр?
- Я сам іду туды. Ідзіце са мной.
Том, бацька, Эл і дзядзька Джон пакрочылі следам за канторшчыкам па пясчанай вулачцы, увайшлі ў сад і апынуліся сярод персікавых дрэў. Вузкае лісце ўжо зажаўцелася. Персікі абсыпалі галіны маленькімі залаціста-чырвонымі шарыкамі. Сярод дрэў узвышаліся піраміды пустых скрынь. Людзі снавалі па садзе - рвалі персікі ў вёдры, з вёдраў перакладалі ў скрыні, адносілі поўныя скрыні на прыёмачны пункт, а там, каля грузавікоў, іх чакалі прыёмшчыкі, якія ставілі адзнакі супраць прозвішча зборшчыка.
- Яшчэ чацвярых прывёў, - сказаў канторшчык у акулярах.
- Добра. Раней калі-небудзь збіралі?
- Не, ніколі, - адказаў Том.
- Рабіце ўсё акуратна. Каб не было ні пабітых, ні ападу. А самі паб'яце - не прымем. Вунь вёдры, бярыце.
Том падняў трохгалонавае вядро і агледзеў яго.
- Усё дно дзіравае.
- Правільна, - сказаў блізарукі канторшчык. - Гэта каб не кралі. Ну, вунь ваш рад, пачынайце.
Чацвёра Джоўдаў узялі па вядру і пайшлі да персікавых дрэў.
- Яны тут марна час не трацяць, - сказаў Том.
- Прасвяты божа! - прастагнаў Эл. - Я лепш у гаражы працаваў бы.
Бацька пакорліва ішоў за Томам, але тут ён раптам рэзка павярнуўся да Эла.
- Кінь ты гэтыя штучкі! - сказаў ён. - І енчыш, і жалішся, і стогнеш. Працаваць трэба. Глядзі, не такі ты ўжо вялікі, магу і адлупцаваць.
Кроў кінулася ў твар Элу. Ён увесь кіпеў ад злосці.
Том падышоў да яго:
- Перастань, Эл. Хлеб і мяса. Трэба на іх зарабіць.
Яны абіралі з дрэў персікі і кідалі ў вёдры. Том вельмі спяшаўся - не хадзіў, а бегаў. Адно вядро да верху, яшчэ адно. З вядра ён высыпаў персікі ў скрыню. Трэцяе вядро. Скрыня напоўнілася да краёў.
- Пяціцэнтавік зарабіў, - сказаў Том весела, падняў на плечы скрыню і панёс на прыёмачны пункт. - Тут на пяць цэнтаў, - абвясціў ён прыёмшчыку.
Той зазірнуў у скрыню, перавярнуў некалькі персікаў.
- Стаў вунь туды. Не пойдуць, - сказаў ён. - Казаў табе - не пабі. Ты проста з вядра ў скрыню вывальваў? Амаль усе да аднаго пабітыя. Прыняць не магу. Іх трэба класці асцярожненька, а так толькі марна час траціш - ні цэнта не атрымаеш.
- Як гэта так?.. Во халера...
- Лягчэй, лягчэй. Цябе з самага пачатку папярэдзілі.
Том панурыўся.
- Добра, - сказаў ён. - Добра. - І паспешліва вярнуўся да сваіх. - Можаце ўсё выкідаць, што сабралі. У вас не лепшыя, чым у мяне. Такіх не прымаюць.
- Якога чорта... - пачаў быў Эл.
- З імі трэба асцеражней. Не кідаць у вядро, акуратна класці.
Джоўды пачалі ўсё спачатку і цяпер абыходзіліся з персікамі далікатна. Скрыні напаўняліся ўжо не так хутка.
- Зараз мы нешта прыдумаем, - сказаў Том. - Зробім так: Руці з Уінфілдам і, можа, яшчэ Разашарна будуць перакладаць іх з вёдраў у скрыні, і ў нас пойдзе як па заведзеным. - Ён панёс скрыню да прыёмшчыка. - Ну а гэтыя варты пяціцэнтавіка?
Прыёмшчык агледзеў персікі зверху, потым капнуў на глыбіню другога-трэцяга рада.
- Вось цяпер лепш, - сказаў ён і паставіў адзнаку ў спісе. - Галоўнае - не спяшайцеся.
Том шпарка пайшоў назад.
- Пяць цэнтаў ужо ёсць! - крыкнуў ён. - Ужо пяць цэнтаў! Дваццаць такіх скрынь - і даляр!
Дзеці прыселі каля скрынь і пачалі вымаць персікі з вядра і класці іх у скрыню. Неўзабаве каля іх выстраіліся некалькі вёдраў. Том насіў поўныя скрыні на прыёмачны пункт.
- Сёмая, - гаварыў ён. - А гэта восьмая. Сорак цэнтаў зарабілі. За сорак цэнтаў добры кавалак мяса можна купіць.
Было ўжо далёка за поўдзень. Руці паспрабавала ўвільнуць ад працы.
- Я змарылася, - захныкала яна. - Пайду адпачну.
- Нікуды ты не пойдзеш, застанешся тут, - строга сказаў бацька.
Дзядзька Джон працаваў марудна. Пакуль ён набіраў адно вядро, Том паспяваў напоўніць два. Шпарчэй у дзядзькі Джона не атрымлівалася.
У сярэдзіне дня цяжка прытупала маці.
- Я раней паспела б, - сказала яна, - але Разашарна самлела. Страціла прытомнасць. Вы, пэўна, наеліся гэтых персікаў, дзеткі, глядзіце, панос будзе.
Прысадзістае цела маці рухалася жвава. Яна амаль адразу адмовілася ад вядра і збірала фрукты ў фартух. Да захаду сонца Джоўды сабралі дваццаць скрынь.
Том апусціў дваццатую скрыню на зямлю.
- Даляр, - сказаў ён прыёмшчыку. - Да якой гадзіны працуем?
- Дацямна - пакуль відно.
- А цяпер у краме дадуць у доўг? Маці хоча якога-небудзь харчу купіць.
- Безумоўна. Я выдам вам квіток на даляр. - Прыёмшчык напісаў нешта на паперцы і даў яе Тому. Том панёс паперку да маці.
- Вось квіток. Можаш набраць у краме на даляр.
Маці апусціла вядро і расправіла плечы.
- З непрывычкі цяжка, праўда? - сказала яна.
- Дзіва што. Нічога, хутка прывыкнем. Ну давай, ідзі, купі чаго-небудзь паесці.
- А чаго б ты хацеў?
- Мяса. Мяса, хлеба і кавы, кавы з цукрам. Мяса вялікі кавалак.
Руці заныла:
- Мы змарыліся, ма.
- Дык ідзіце са мной.
- Яны, як толькі за працу ўзяліся, ужо стаміліся, - сказаў бацька. - Рады з імі няма. Трэба прыструніць іх як след, а то зусім распусцяцца.
- Вось паселімся дзе-небудзь стала, яны ў школу пойдуць, - сказала маці і пайшла стомленай хадой, Руці і Ўінфілд нясмела пацягнуліся за ёю.
- Мы кожны дзень будзем працаваць у садзе? - запытаўся Ўінфілд.
Маці спынілася, чакаючы, пакуль ён падыдзе, потым узяла хлопчыка за руку і павяла з сабой.
- Праца няцяжкая, - сказала яна. - Вам карысна. І нам падмога. Калі ўсе будзем працаваць, хутка ў сваім доме жыць будзем. Усе павінны, чым могуць, памагаць.
- Але я зусім стаміўся.
- Ведаю. Я таксама стамілася. Усім нялёгка. Трэба пра іншае думаць. Думай пра школу, пра тое, як ты хадзіць у яе будзеш.
- А я ў школу не хачу, ма. І Руці не хоча. Мы бачылі, якія тут дзеці вучацца. Смаркачы нахабныя! Дражняць нас - Окі, Окі! Мы іх бачылі. Я ў школу не пайду.
Маці з жалем глянула на яго белабрысую галаву.
- Не рабі нам непрыемнасцей, хоць пакуль што, - угаворвала яна. - Вось станем на ногі, тады, што ж, капрызь. Толькі не цяпер. Нам цяпер і без таго хапае.
- Я шэсць персікаў з'ела, - паведаміла Руці.
- Ну і панос будзе. А прыбіральні тут паблізу няма.
Крама, якая належала кампаніі, размяшчалася ў павеці з рыфленага жалеза. Вітрыны яна не мела. Маці адчыніла сеткаватыя дзверы і ўвайшла. За прылаўкам яна ўбачыла чалавека вельмі маленькага росту. Ён быў зусім лысы, і голая галава яго сям-там адлівала сінню. Густыя цёмныя бровы высокай дугой узнімаліся над вачамі, і ад гэтага твар яго здаваўся нейкім здзіўленым, крыху нават спалоханым. Доўгі, тонкі, кручкаваты, як птушыная дзюба, нос, ноздры, зарослыя рыжаватымі валаскамі. На рукавах сіняй кашулі чорныя сацінавыя нарукаўнікі. Калі маці ўвайшла, ён стаяў, аблакаціўшыся на прылавак.
- Добры вечар, - павіталася маці.
Прадавец з цікавасцю паглядзеў на яе. Дуга над яго вачамі паднялася яшчэ вышэй.
- Добры вечар, - адказаў ён.
- У мяне квіток на даляр.
- Можаце на даляр узяць, - сказаў прадавец і віскліва хіхікнуў. - Вось так. На адзін даляр. На цэлы даляр. - Ён павёў рукой, паказваючы на свой тавар. - Што хочаце бярыце. - Ён акуратна паправіў нарукаўнікі.
- Думаю мяса ўзяць.
- У нас мяса ёсць усякае. Вось, напрыклад, фарш. Возьмеце фаршу? Дваццаць цэнтаў фунт.
- Ці не завельмі дорага? Па-мойму, апошні раз я брала за пятнаццаць.
- Правільна, - зноў ціха хіхікнуў прадавец. - Але ў той жа час не так ужо і дорага. А паедзеце па фарш у горад, амаль галон бензіну спаліце. Выходзіць, не так у нас і дорага. І бензіну ў вас, відаць, няма.
Маці строга сказала:
- У вас жа не пайшоў галон бензіну, каб прывезці гэтае мяса сюды.
Прадавец весела засмяяўся:
- Вы ўсё дагары нагамі перавярнулі. Мы мяса не купляем, а прадаем. А каб куплялі, ну што ж, тады справа іншая.
Маці прыклала два пальцы да губ і засяроджана насупіла бровы.
- Тут адзін тлушч і храсткі.
- За гэтае мяса я не ручаюся, можа, яно і не зварыцца. І за тое, што сам еў бы яго, таксама не ручаюся. Ды мала чаго я не рабіў бы.
Маці гнеўна глянула на яго, але спакойным тонам запыталася:
- А таннейшае мяса ёсць?
- Булённыя косткі, - адказаў прадавец. - Дзесяць цэнтаў фунт.
- Тут жа адны косткі.
- Адны косткі, - пацвердзіў прадавец. - Смачны суп будзе. Наварысты.
- А супавае мяса ёсць?
- Безумоўна. Дваццаць пяць цэнтаў.
- Давядзецца, відаць, без мяса абысціся. Але і мяса хочацца. Прасілі мяса ўзяць.
- Мяса ўсім хочацца, яно ўсім патрэбна. Вось добры фарш. Сала вытапіце, пойдзе на падліўку. Добры фарш. Нічога ў глум не пойдзе. Костак выкідаць не давядзецца.
- А пачым... пачым бакавіна?
- Вунь куды махнулі! Гэта ядуць толькі на Каляды і ў Дзень дзякавання. Трыццаць пяць цэнтаў фунт. Каб у мяне была індзейка, я б вам яе танней прадаў.
Маці ўздыхнула:
- Дайце два фунты фаршу.
- Слухаю, мэм. - Прадавец лапаткай паклаў бледнага фаршу на навошчаную паперу. - Што вам яшчэ?
- Хлеба.
- Калі ласка. Вялікі бохан пятнаццаць цэнтаў.
- Цана яму дванаццаць.
- Зусім правільна. Едзьце проста ў горад і купляйце за дванаццаць. Галон бензіну. Што яшчэ возьмеце? Бульбу?
- Ага, бульбу.
- Чвэрць даляра пяць фунтаў. Маці пагрозліва пасунулася да яго:
- Наслухалася я ад вас тут - хопіць! Я ведаю, якія цэны ў горадзе.
Маленькі прадавец падціснуў губы:
- Тады едзьце ў горад.
Маці паглядзела на сваю сціснутую ў кулак руку.
- Што ж гэта такое? - ціха сказала яна. - Вы гаспадар крамы?
- Не. Я толькі прадавец.
Навошта ж вы падсмейваецеся? Вам лягчэй ад гэтага? - Маці глянула на свае сцёртыя да бляску маршчыністыя рукі. - Хто ж тут гаспадар?
- Акцыянернае таварыства «Ферма Гупера», мэм.
- Яна і цэны вызначае?
- Так, мэм.
Маці падняла на яго вочы і слаба ўсміхнулася.
- Усе, хто сюды прыходзіць, вось так злуюць на вас?
Прадавец памаўчаў крыху, перш чым адказаць.
- Так, мэм.
- І таму вы жарты строіце?
- Што вы маеце на ўвазе?
- Такім паганствам займаецеся. Вам і самому сорамна, га? Мусіце аджартоўвацца? - Голас у маці гучаў мякка. Прадавец, як зачараваны, пазіраў на яе і маўчаў. - Значыць, так, - сказала яна. - Сорак цэнтаў - мяса, пятнаццаць - хлеб, дваццаць пяць - бульба. Усяго восемдзесят цэнтаў. А кава колькі?
- Самая танная - дваццаць цэнтаў, мэм.
- Выходзіць даляр. Працавалі сямёра і вось на якую вячэру зарабілі. - Маці зноў глянула на свае рукі. - Запакуйце, - паспешліва прагаварыла яна.
- Слухаю, мэм. Дзякую вам. - Прадавец паклаў бульбу ў пакет і акуратна загнуў яго зверху. Потым пакасіўся на пакупніцу і хуценька перавёў вочы на прылавак. Маці сачыла, як ён пакуе, ледзь прыкметна ўсміхаючыся.
- Як жа вы пайшлі на такую работу? - запыталася яна.
- Чалавеку есці трэба, - адказаў прадавец і рашуча паўтарыў: - Чалавеку трэба есці.
- Якому чалавеку?
Прадавец паклаў на прылавак чатыры пакеты.
- Фарш, бульба, хлеб, кава. Роўна на даляр.
Маці падала яму квіток і пачакала, пакуль ён запіша прозвішча і суму ў журнал.
- Ну вось, - сказаў ён. - Цяпер мы ў разліку.
Маці ўзяла з прылаўка пакеты.
- Яшчэ вось што, - сказала яна. - У нас цукру няма да кавы. Сын мой Том хоча з цукрам. Слухайце, нашы цяпер працуюць у садзе. Адпусціце мне цукру, а квіток я потым прынясу.
Прадавец адвёў вочы ад маці, адвёў іх далёка ўбок.
- Не магу, - ціха прамовіў ён. - Такое ў нас правіла. Не магу. Мне ўляціць. Мяне звольняць.
- Нашы ж працуюць у садзе. Яны, пэўна ж, больш за дзесяць цэнтаў зарабілі. Дайце мне толькі на дзесяць цэнтаў. Тому хочацца салодкай кавы. Прасіў цукру купіць.
- Не магу, мэм. Такое правіла. Без квітка тавар не адпускаем. Аканом увесь час мне пра гэта дзяўбе. Не, не магу. Ніяк не магу. Мяне зловяць. Нас заўсёды на чым-небудзь ловяць. Заўсёды. Не магу.
- Нават на дзесяць цэнтаў?
- Ні на колькі не магу, мэм. - Прадавец умольна глянуў на яе. І раптам з твару яго знік страх. Ён выняў з кішэні дзесяціцэнтавую манету і са звонам апусціў у касу. - Вось, - з палёгкай сказаў ён, дастаў з-пад прылаўка маленькі папяровы мяшэчак, усыпаў у яго шуфлікам трохі цукру, узважыў і падсыпаў яшчэ крыху. - Калі ласка, - сказаў ён. - Усё ў парадку. Прынясеце квіток, і я вылічу свае дзесяць цэнтаў.
Маці не зводзіла з яго вачэй. Рука яе пацягнулася да мяшэчка з цукрам і паклала яго зверху на пакупкі.
- Дзякуй вам, - ціха сказала яна і пайшла да дзвярэй. На парозе абярнулася. - Адно я цвёрда завучыла. Увесь час вучуся гэтаму, з дня ў дзень. Калі ў цябе бяда, ці крыўда якая, або нястача - ідзі да беднякоў. Толькі яны памогуць, больш ніхто. - Сеткаватыя дзверы зачыніліся за ёю.
Маленькі чалавечак аблакаціўся на прылавак, пазіраючы ўслед пакупніцы сваімі здзіўленымі вачамі. Стракаты сыты кот ускочыў на прылавак, ляніва падышоў да прадаўца і пацёрся аб яго плячо. Ён выцягнуў руку і прыціснуў ката да шчакі. Кот гучна замурлыкаў, павільваючы кончыкам хваста.
Том, Эл, бацька і дзядзька Джон вярталіся з саду ўжо ў цемры. Яны ледзь валаклі ногі ад стомы.
- Хто б мог падумаць - усяго толькі руку працягваеш, персік зрываеш, а спіна проста разломваецца, - паскардзіўся бацька.
- Дні праз два пройдзе, - сказаў Том. - Паслухай, та, пасля вячэры я думаю пайсці разведаць, што там такое было перад варотамі. Спакою мне гэта не дае. Пойдзеш са мной?
- Не пайду, - адказаў бацька. - Хачу хоць трохі папрацаваць і ні пра што іншае не думаць. Апошні час толькі і рабіў, што мазгі сабе круціў, замучыў іх зусім. Не, пасяджу крыху і спаць залягу.
- А ты, Эл?
Эл адвёў вочы ўбок.
- Я, бадай што, пахаджу тут па лагеры, пагляджу, - сказаў ён.
- Дзядзька Джон, ясна, не пойдзе. Што ж, пайду адзін. Вельмі цікавасць разбірае.
Бацька сказаў:
- А ў мяне тады цікавасць разгарыцца, калі фараонаў тут паменшае.
- Ноччу, магчыма, іх там не будзе, - выказаў думку Том.
- Праверку ім рабіць я не збіраюся. Ідзі, толькі маці не кажы куды. А то яна месца сабе не знойдзе, так занепакоіцца.
Том павярнуўся да Эла:
- Табе што, зусім не цікава?
- Я лепш па лагеры пахаджу.
- Дзяўчат шукаць?
- Гэта мая справа, - агрызнуўся Эл.
- А я ўсё ж пайду, - сказаў Том.
Джоўды выйшлі з саду на пясчаную вулачку між двух радоў чырвоных халуп. Сям-там з дзвярэй сачылася цьмянае жоўтае святло газавых ліхтароў, а ўсярэдзіне, у паўзмроку кухань-пакояў рухаліся чорныя цені людзей. У канцы вулачкі ўсё яшчэ сядзеў каравульны, прыставіўшы драбавік да каленяў.
Параўняўшыся з ім, Том спыніўся.
- Тут ёсць дзе памыцца, містэр?
Каравульны прыгледзеўся да яго ў цемры, потым сказаў:
- Бачыш цыстэрну?
- Бачу.
- Там шланг ёсць.
- А вада гарачая?
- А ты хто такі? Джон Пірпант Морган?
- На жаль, не. Добрай ночы, містэр.
Каравульны пагардліва прабурчаў:
- Гарачая вада! Яшчэ чаго захацеў. Хутка, чаго добрага, ванну прыняць захочуць. - Ён змрочна паглядзеў услед чацвярым Джоўдам.
З-за вугла выйшаў другі каравульны.
- Ты што, Мак?
- Ды ўсё гэтыя Окі паганыя. Адзін тут пытаецца: «Гарачая вада ёсць?»
Другі каравульны апусціў прыклад на зямлю.
- Усё праз гэтыя ўрадавыя лагеры, - сказаў ён. - Той, хто пытаўся, ручаюся, таксама там пабыў. Не, пакуль з гэтымі лагерамі мы не пакончым, дабра не чакай. Не паспееш азірнуцца, у цябе чыстых прасцін запатрабуюць!
Мак запытаўся:
- Ну а за варотамі там як? Што новенькае?
- Цэлы дзень сёння гарлапанілі. Цяпер паліцыя штата за іх узялася. Пакажа гэтым малойчыкам, дзе ракі зімуюць. Кажуць, там нейкі цыбаты такі сукін сын усіх падбухторвае. Сёння ноччу, я чуў, яго схопяць, і тады ўсёй гэтай заварусе канец будзе.
- Калі ўсё так хутка ўладзіцца, мы без справы застанемся, - сказаў Мак.
- Не бойся, не застанемся. У нас жа гэтыя чортавы Окі. За імі трэба сачыць і сачыць. А калі ўжо завельмі ціхія стануць, можна і разварушыць іх трохі.
- Будзе нам што рабіць, калі плату ім зрэжуць.
- Будзе, вядома, будзе. Не, ты не бойся - без работы не застанемся, пакуль Гупер пад корань рэжа.
У доміку Джоўдаў гучна гуў агонь у печцы. На патэльні пырскалі салам і шыпелі катлеты, у кацялку з бульбай булькатала вада. У пакоі было поўна дыму, і жоўтае святло ліхтара кідала на сцены густыя чорныя цені. Маці завіхалася каля печкі, а Ружа Сарона сядзела на пустой скрынцы, падпіраючы каленямі свой цяжкі жывот.
- Ну як, цяпер табе трошкі лепш? - запыталася ў яе маці.
- Ад гэтага паху з пліты мяне муціць. І есці хочацца.
- Пайдзі ў дзвярах пасядзі. Мне ўсё роўна скрыню трэба разламаць.
Гурмой уваліліся мужчыны.
- Далібог, мяса! - усклікнуў Том. - І кава! Як смачна пахне! Ну і згаладаўся я! Колькі персікаў з'еў, а наедку ніякага. Памыцца дзе, ма?
- Схадзіце да цыстэрны. Там памыецеся. Толькі што я Руці з Уінфілдам туды паслала.
Мужчыны выйшлі.
- Ну ўставай, Разашарна, - загадала маці. - У дзвярах пасядзі або на матрацы. Мне скрыню трэба разламаць на шчэпкі.
Ружа Сарона паднялася, абапіраючыся на скрыню рукамі, цяжка пайшла да матраца і села на яго. У пакой ціхенька ўвайшлі Руці і Ўінфілд і моўчкі прытуліліся да сцяны, стараючыся быць як мага больш непрыкметнымі.
Маці паглядзела на іх.
- Чуе маё сэрца, вы радыя, што ў нас тут цемнавата, - сказала яна і раптам ступіла да Ўінфілда і памацала яго валасы. - Ну ясна - мокрыя, а гразь як была, так і засталася.
- Мы ж без мыла, -паскардзіўся Ўінфілд.
- Ага, без мыла. Не змагла яго купіць. Сёння не магла. Заўтра, можа, купім. - Маці зноў падышла да печкі, паставіла талеркі на скрыню і пачала раскладаць на іх вячэру. Дзве катлеты і адна вялікая бульбіна на кожную талерку і яшчэ тры скібкі хлеба. Потым разліла па талерках гарачае сала з-пад катлет. Мужчыны вярнуліся з мокрымі тварамі, валасы ў іх блішчалі ад вады.
- А падаць мне вячэру! - выгукнуў Том.
Усе ўзялі свае порцыі. Елі моўчкі, прагна і дачыста выціралі хлебам падліўку з талерак. Дзеці панеслі свае талеркі ў кут пакоя, паставілі іх на падлогу і, апусціўшыся на калені, як звяркі, прыпалі да ежы. Том праглынуў апошні кавалак хлеба.
- Яшчэ ёсць, ма?
- Няма, - адказала маці. - Гэта ўсё. Вы зарабілі даляр, на даляр і было.
- Толькі ўсяго?
- У іх тут гандлююць з надбаўкай. Трэба будзе ў горад з'ездзіць, як надарыцца магчымасць.
- Я не пад'еў, - сказаў Том.
- Заўтра цэлы дзень будзеце працаваць. Я вас добра накармлю... вячэрай.
Эл выцер губы рукавом.
- Пайду пахаджу тут трохі, - сказаў ён.
- Пачакай, і я з табой. - Том пайшоў за Элам. У цемры ён блізка падышоў да брата. - Дык пойдзеш са мной?
- Не. Я ж сказаў - тут пахаджу.
- Як хочаш. - Том павярнуўся і не спяшаючыся пакрочыў па вулачцы. Дым ад комінаў над дамкамі слаўся нізка, ліхтары вымалёўвалі на зямлі светлыя плямы вокнаў і дзвярных праёмаў. На прыступках ганкаў сядзелі людзі і пазіралі ў цемру. Том бачыў, як яны паварочвалі галовы, праводзячы яго позіркам. Ад апошняга доміка дарога пайшла па скошанай сенажаці, на якой у зорным святле чарнелі копы сена. Тонкі сярпок месяца нізка вісеў на заходнім небасхіле, а над галавой доўгім светлым воблакам цягнуўся Млечны Шлях. Ногі Тома мякка ступалі па пыльнай дарозе - цёмнай стужцы на жоўтай пакошы. Том засунуў рукі ў кішэні і пайшоў да ўязных варот. Уздоўж дарогі цягнуўся насып. Чутно было, як шапоча вада сярод травы ў арашальнай канаве. Том падняўся на насып, глянуў на цёмную ваду і ўбачыў у ёй расцягнутыя адлюстраванні зорак. А там, наперадзе, пралягала галоўная шаша штата. Яе выдавала мільгаценне аўтамабільных агнёў. Том пайшоў далей. Пры святле зорак відны былі высокія драцяныя вароты.
Збоку ад дарогі варухнулася нечая цёмная постаць. Пачуўся воклік:
- Стой! Хто ідзе?
Том замёр на месцы.
- А ты хто?
З зямлі падняўся чалавек і падышоў да Тома. У яго ў руцэ Том убачыў рэвальвер. Святло кішэннага, ліхтарыка ўдарыла яму ў твар.
- Куды гэта ты выправіўся?
- А так, пагуляць выйшаў. А што, забаронена?
- Гуляй дзе-небудзь далей адсюль.
Том запытаўся:
- Што, з лагера выходзіць нельга?
- Гэтай ноччу нельга. Ну, пойдзеш назад сам ці мне свістком падмогу паклікаць? Цябе сілай назад адвядуць.
- Чорт з ім, мне ўсё роўна. Нельга дык нельга, мне што. Ну, назад пайду.
Цёмная постаць адступіла. Ліхтарык пагас.
- Пра вас жа клапоцімся, разумееш? А то схопяць гэтыя вар'яты пікетчыкі.
- Якія пікетчыкі?
- Ну, гэтыя, халера на іх... чырвоныя.
- А-а... Я нічога пра іх не чуў.
- Ты ж бачыў іх, як сюды ехаў.
- Ну, бачыў нейкіх людзей, але там столькі было палісменаў, што не разабраў, хто дзе. Я падумаў - аварыя.
- Ну, давай, тупай назад.
-Што ж, назад дык назад. -Том павярнуўся і пайшоў. Ён няспешна прайшоў па дарозе ярдаў сто, потым спыніўся і прыслухаўся. Каля арашальнай канавы дзяўкаў янот, недзе далёка зласліва гыркаў на прывязі сабака. Том сеў на абочыне. Ён чуў ціхі клёкат начной птушкі-драпежніка і шолах сцяблінак ад падкрадлівых рухаў звяркоў у атаве. Ён абвёў позіркам няроўную лінію бачнага гарызонту перад сабой і ззаду - і там і тут цёмныя гарбы стажкоў, на іх фоне яго не ўбачаць. Ён падняўся з зямлі і асцярожна збочыў з дарогі направа, на скошаны луг, нахіліўшыся амаль упоравень са стажкамі. Том ішоў паволі, час ад часу спыняўся і прыслухоўваўся. Нарэшце дайшоў да агароджы - пяць радоў туга нацягнутага калючага дроту. Лёгшы на спіну, ён прасунуў галаву пад ніжні рад, крыху падняў дрот рукой і, адпіхваючыся нагамі, пралез на другі бок.
Том хацеў ужо ўстаць, але на краі шашы паказаліся людзі. Ён пачакаў, пакуль яны пройдуць далёка наперад, падняўся і пайшоў у тым самым кірунку. Ён уважліва прыглядаўся, ці няма дзе палатак. Па шашы зрэдку прабягалі машыны. Дайшоўшы да бетоннага мастка над рачулкай, што праразала луг, Том зазірнуў цераз парапет уніз. На дне глыбокага яра віднелася палатка, у якой гарэў ліхтар. З хвіліну ён узіраўся ў яе, убачыў чалавечыя цені на брызенце. Тады пералез цераз нейкую агароджу і пачаў спускацца ў яр, прадзіраючыся праз хмызняк і нізкае вербалоззе. Унізе, каля рэчкі, выйшаў на сцяжынку. Перад палаткай на скрыні сядзеў чалавек.
- Добры вечар, - павітаўся Том.
- А ты хто такі?
- Я... ну... так проста... міма ішоў.
- Каго-небудзь тут ведаеш?
- Не. Кажу ж, міма ішоў.
З палаткі высунулася нечая галава.
- Што там у цябе? - пачуўся голас.
- Кейсі! - усклікнуў Том. - Кейсі! Як ты тут апынуўся?
- А госпадзі! Ды гэта ж Том Джоўд! Ідзі сюды, Томі. Уваходзь.
- Ты яго ведаеш? - здзівіўся чалавек, што сядзеў на скрыні.
- Ці ведаю я яго? Пытанне! Колькі гадоў ужо знаемся. Мы з ім сюды, на Захад, разам прыехалі. Заходзь жа, Том. - Кейсі схапіў Тома за локаць і ўцягнуў у палатку.
У ёй вакол ліхтара сядзелі на зямлі чатыры чалавекі. Яны недаверліва паглядзелі на Тома. Адзін з іх, смуглы, суровы з выгляду мужчына, падаў яму руку.
- Вельмі рады, - сказаў ён. - Я чуў, як цёпла цябе Кейсі сустрэў. Дык гэта той хлопец, пра якога ты нам, Кейсі, гаварыў?
- Ён самы. Ах ты, госпадзі! Дзе ж усе твае? Што ты тут робіш?
- Ды вось, пачулі мы, што тут ёсць праца, - адказаў Том. - Пад'язджаем, а на шашы цэлая плойма палісменаў, ну і загналі нас на гэту ферму. Дацямна персікі збіралі. Перад варотамі нейкія людзі нам нешта крычалі ўслед. А ў чым справа, так мне ніхто і не сказаў. Вось я і пайшоў сюды, каб даведацца, што тут такое робіцца. Якім ветрам цябе занесла сюды, Кейсі?
Кейсі нахіліўся наперад, і жоўтае святло ліхтара асвятліла яго высокі бледны лоб.
- Дзіўнае месца - турма, - сказаў прапаведнік. - Вось адыходзіў я ў пустыню, як Хрыстос, каб там усё добра абдумаць і зразумець. І бывала, сёе-тое праяснялася. А па-сапраўднаму стала ўсё ясна толькі ў турме. - Вочы ў яго былі жывыя і вясёлыя. - Вялікая камера, увесь час поўная. Адны пакідаюць яе, другія прыходзяць. Я, канешне, з усімі гаварыў.
- Дзіва што! - сказаў Том. - Табе абы пагаварыць. Калі б цябе на шыбеніцы вешалі, і то ты паспеў бы з катам слоўцам перакінуцца. Такіх гаваркіх я ў жыцці не бачыў.
Усе пырхнулі ад смеху. Адзін - сухенькі стары з маршчыністым тварам - ляпнуў сябе па калене.
- Усё гаворыць і гаворыць, - сказаў ён. - А людзям гэта даспадобы - слухаюць.
- Ён жа ж прапаведнікам быў, - сказаў Том. - Ці гаварыў ён вам?
- А як жа - гаварыў.
Кейсі шырока ўсміхнуўся.
- Дык вось, - зноў загаварыў ён, - пачаў я ў сім-тым разбірацца. Розныя людзі ў турму трапляюць - хто за п'янства, хто за крадзеж, апошніх пераважная большасць. І крадуць галоўным чынам тое, без чаго нельга абысціся, а дастаць іншым спосабам яны не могуць. Разумееш?
- Не, - адказаў Том.
- Усе яны, па сутнасці, добрыя людзі. А што іх падбіла на злачынства? Нястача. І я пачаў разумець - усё зло ў нястачы. Але да канца яснасці ў мяне не было. І вось аднаго дня даюць нам перакіслыя бабы. Адзін падняў крык, а што толку? Крычыць-надрываецца. Дзяжурны зазірнуў у камеру і пайшоў. Тады другі пачынае крычаць. І тут мы ўжо ўсе падхапілі хорам, цягнем адну ноту, і, паверыш, сцены камеры, здавалася, раздаліся і вось-вось абваляцца ад нашага крыку. Бог ты мой, што тут усчалося! Наглядчыкі забегалі, замітусіліся і, як міленькія, прынеслі другую яду. Цяпер разумееш?
- Не, - адказаў Том.
Кейсі падпёр падбародак далонямі.
- Можа, я не магу табе ўтлумачыць, - сказаў ён. - Можа, табе самому трэба да гэтага дайсці. А дзе кепка твая?
- Пайшоў без яе.
- Сястра твая як?
- А! Растаўсцела, як карова. Ручаюся, двайнят народзіць. Жывот сама раз на колы ставіць. Усё яго рукамі падтрымлівае. А ты мне так і не растлумачыў, што тут такое адбываецца.
Сухенькі стары сказаў:
- Мы бастуем. У нас тут забастоўка.
- Канешне, пяць цэнтаў за скрыню малавата, але пракарміцца ўсё ж неяк можна.
- Пяць цэнтаў? - здзівіўся стары. - Пяць цэнтаў! Вам пяць цэнтаў плацяць?
- Пяць. Сёння мы паўтара даляра зарабілі.
У палатцы запанавала напружаная цішыня. Кейсі доўга моўчкі глядзеў праз уваходны праём палаткі.
- Слухай, Том, - нарэшце сказаў ён. - Мы прыехалі сюды працаваць. Нам паабяцалі пяць цэнтаў. Народу сабралася процьма. Прыходзім у сад, а нам кажуць: два з паловай цэнты. На гэта і адзін не пракормішся, а калі ў цябе дзеці... Мы адмовіліся. Нас выгналі. І тут наляцела цэлая зграя палісменаў. А цяпер вам плацяць па пяць. Калі разгоняць забастоўшчыкаў, думаеш, вам так і будуць па пяць цэнтаў плаціць?
- Адкуль я ведаю, - адказаў Том. - Пакуль што плацяць.
- Слухай. Мы хацелі спыніцца ўсе ў адным месцы, а нас разагналі, як свіней, у розныя бакі. Шмат каго добра пабілі. Як свіней, нас гналі. А вас, як свіней, загналі ў вароты. Мы доўга не пратрымаемся. Некаторыя два ўжо дні нічога ў роце не мелі. Ты сёння назад пойдзеш?
- Хачу сёння.
- Дык вось што... раскажы там людзям пра ўсё, Том. Растлумач ім, што яны мораць нас голадам, а сабе нож у спіну ўсаджваюць. Ясней яснага - як толькі з намі расправяцца, вам тут жа да двух з паловай збавяць.
- Паспрабую, раскажу, - сказаў Том. - Толькі як гэта зрабіць, не ведаю. Ніколі такой аховы не бачыў, усе ўзброеныя. Пэўна, і гаварыць між сабою не дазваляюць. Усе моўчкі міма праходзяць. Вочы долу і хоць бы «дзень добры» сказалі.
- А ты, Том, паспрабуй. Ледзь толькі мы пойдзем адсюль, плату адразу зрэжуць напалову. Ты ж сам ведаеш, што гэта такое - абабраць і перацягаць цэлую тону персікаў усяго за адзін даляр. - Кейсі панурыўся. - Не... так нельга. Так сыты не будзеш. Не пракормішся.
- Ну, паспрабую як-небудзь ім усё растлумачыць.
- А маці як твая?
- А так, нічога. Вельмі ўжо ёй спадабаўся ўрадавы лагер. Душавыя, вада гарачая...
- Ага, я чуў пра гэта.
- Добра было там. Толькі вось працы мы не знайшлі. Мусілі паехаць.
- Хацеў бы я пабыць у такім лагеры, - сказаў Кейсі. - Глянуць, як там і што. Палісмены туды, я чуў, носа не паказваюць.
- Людзі там самі сабе палісмены.
Кейсі здзіўлена падняў на Тома вочы.
- А непарадкі былі? Ну там бойкі, крадзеж, п'янства?
- Не, не было.
- Ну, а калі хто паводзіць сябе блага? Што ў такіх выпадках робяць?
- З лагера выганяюць.
- А часта такое здаралася?
- Не. Мы там месяц пражылі, а ўсяго адзін выпадак быў.
Вочы ў Кейсі заблішчалі. Ён павярнуўся да астатніх мужчын, што сядзелі ў палатцы.
- Во, бачыце? - усклікнуў ён. - Што я вам казаў? Палісмены не столькі непарадкі спыняюць, колькі самі іх разводзяць. Дык слухай, Том, паспрабуй з людзьмі пагаварыць, няхай яны таксама забастуюць. Гэта можна было б зрабіць дні праз два. Персікі ўсе паспелі. Растлумач ім.
- Не забастуюць, - сказаў Том. - Пяць манет атрымліваюць, а ўсё астатняе іх не хвалюе.
- Але ж як толькі гаспадару не патрэбны будуць штрэйкбрэхеры, плаціць ім па пяць цэнтаў не будуць.
- Я не ўпэўнены, што да іх гэта дойдзе. Пяць цэнтаў ім даюць, і больш яны ведаць нічога не хочуць.
- А ты ўсё ж паспрабуй.
- Бацька на гэта не пойдзе, - сказаў Том. - Я яго ведаю. Скажа, не яго справа.
- Яно так, - паныла пагадзіўся Кейсі. - Гэтак, бадай што, і зробіць. Спярша яму трэба, відаць, на сваёй шкуры ўсё зведаць.
- Мы галадалі. А сёння елі мяса на вячэру - трохі, але паелі. Бацька, думаеш, дзеля другіх ад мяса адмовіцца? Маці, думаеш, заморыць даччыно дзіця толькі таму, што за варотамі нехта там горла дзярэ?
Кейсі тужліва сказаў:
- Так хочацца, каб людзі зразумелі. Каб яны зразумелі, што забяспечыць сябе мясам можна толькі так... А, чорт! Падчас такая бярэ мяне стома... Страшэнная стома. Быў з намі ў камеры чалавек адзін. Пры мне яго пасадзілі. Усё хацеў саюз стварыць. У адным месцы ўдалося. Ды неўзабаве наляцелі малойчыкі з «Камітэта пільнасці». І ведаеш, што было? Тыя самыя людзі, якім ён хацеў памагчы, адштурхнулі яго. Не пажадалі знацца з ім. Баяліся паказацца разам з ім. «Ідзі ад нас, - сказалі. - З табой бяды не абярэшся». У турме ён моцна перажываў. А неяк раз кажа: «Не так ужо і кепска, калі гісторыю ведаць. Вазьмі французскую рэвалюцыю - усім, хто яе задумаў, галовы паадсякалі. І так заўсёды было, - кажа. - Зусім натуральна - як дождж з хмарнага неба. Але ж не дзеля забавы ўсё гэта робіш - іначай не можаш. Такая ўжо ў цябе натура. Вось Джордж Вашынгтон. Арганізаваў рэвалюцыю, а пасля ўся сволач на яго апалчылася. І з Лінкальнам тое самае - смерцю яму пагражалі. Натуральна, як дождж».
- Ніякавай забавы тут і блізка няма, - пагадзіўся Том.
- Ясна, няма. А яшчэ ён нам у турме гаварыў: «Ва ўсякім разе, ты стараешся як можаш. Галоўнае, кажа, каб кожны раз рабіць хоць адзін маленькі крок наперад; можа, калі крыху і адступіш, але ніколі не будзе поўнага вяртання назад. Гэта лёгка даказаць, кажа, і гэтым усё апраўдваецца. А значыць, дарэмна нічога не робіцца, хоць часам так можа здацца».
- Усё гаворыш, - сказаў Том. - Гаворыш, гаворыш... Вось вазьмі брата майго - Эла. Ён толькі і ведае, што за дзеўкамі ганяцца. Да астатняга яму справы няма. Дні праз два і тут падчэпіць якую. Цэлымі днямі ў яго толькі адно наўме, начамі можа гэтым займацца. Пляваць ён хацеў на нейкія там крокі - што наперад, што назад, што ўбок.
- Натуральна, - сказаў Кейсі. - Правільна. Ён робіць тое, што яму належыць. І ўсе мы так.
Чалавек, што сядзеў перад палаткай, адкінуў брызентавую полку.
- Нешта не падабаецца мне, каб на яго ліха, - сказаў ён.
Кейсі вызірнуў з палаткі.
- Што там у цябе?
- Ды сам не ведаю. Не па сабе мне. Раз-пораз насцярожваюся, як кошка.
- Дык што ж там такое?
- Сказаць не магу. Раптам здасца, быццам пачую нешта, а прыслухаюся - нічога.
- Проста пужлівы стаў, - сказаў сухенькі стары, падняўся на ногі і выйшаў. Праз момант ён усунуў галаву ў палатку: - Вялікая чорная хмара праплывае. Навальнічная. Вось ад чаго яму не па сабе - ад электрычнасці. - Ён знік у цемры. Астатнія двое ўсталі і выйшлі з палаткі.
Кейсі сказаў Тому:
- Усім ім не па сабе. Палісмены не перастаюць гразіцца дух з нас выбіць і выгнаць з іхняй акругі. А мяне важаком лічаць, бо я шмат гавару.
У палатку зноў зазірнуў маршчыністы твар:
- Патушы ліхтар, Кейсі. І выйдзі. Тут нешта нядобра.
Кейсі прыкруціў кнот. Агеньчык нырнуў у шчыліну, успыхнуў і патух. Прапаведнік навобмацак выйшаў з палаткі. Том - за ім.
- Што такое? - ціха запытаўся Кейсі.
- Не магу сказаць. Вось паслухай.
Безупыннае кваканне жаб злівалася з цішынёй. Сухі, рэзкі строкат цвыркуноў. Але на гэтым фоне чуліся і іншыя гукі - быццам крокі па дарозе, шэлест кустоў уздоўж рачулкі і пахрустванне пясчаных камякоў на яе беразе.
- Нешта нічога не разбяру. Падманліва. Гэта проста ад нерваў, - супакойваў людзей Кейсі. - У нас ва ўсіх нервы напружаныя. Не, нічога такога не чую. А ты, Том?
- А я чую, - адказаў Том. - Ага, чую... Па-мойму, нас акружаюць. Давайце лепш пойдзем адсюль.
Маршчыністы стары шапнуў:
- Пад мост... вунь туды. Шкада толькі палатку пакідаць.
- Пайшлі, - сказаў Кейсі.
Яны ціха пасунуліся па беразе рачулкі да моста. Перад імі паўстаў чорны пралёт - як пячора. Кейсі прыгнуўся і пайшоў пад арку, Том - следам. Ногі іх бязгучна ступілі ў ваду. Яны прайшлі футаў трыццаць, дыханне іх ціхім рэхам аддавалася пад скляпеннем. Яны выйшлі на другі бок і выпрасталіся.
Раптам крык:
- Вунь яны! - Два пучкі святла ад электрычных ліхтароў упалі на іх, уткнуліся ім у твары, асляпілі іх. - Стой, ні з месца! - Галасы ішлі з цемры. - Гэта ён! Лабасты вырадак. Ён самы.
Кейсі, як сляпы, глядзеў на святло. Ён цяжка дыхаў.
- Паслухайце, - сказаў ён. - Вы не ведаеце, што творыце. Вы дзяцей хочаце замарыць голадам.
- Маўчаць, чырвоная сволач!
На святло выйшаў грузны, прысадзісты чалавек. У руцэ ён трымаў новенькае белае дзяржальна ад кіркі.
Кейсі паўтарыў:
- Вы не ведаеце, што творыце.
Чалавек замахнуўся дзяржальнам. Кейсі нырнуў уніз. Цяжкая палка з глухім трэскам ударыла яго па скроні. Кейсі адваліўся ўбок, у цемру.
- Госпадзі, Джордж! Ты, няйначай, забіў яго!
- Пасвяці, - сказаў Джордж. - Таму як і трэба, сволачы. - Пучок святла ўпаў уніз, пашнарыў па зямлі і асвятліў размажджэраную галаву прапаведніка.
Том паглядзеў на Кейсі. Вузкі пучок святла выхапіў з цемры масіўныя ногі Джорджа і новую белую ручку ад кіркі. Том скокнуў моўчкі. Ён выхапіў палку ў Джорджа з рук. Першы ўдар - ён зразумеў адразу - не трапіў у цэль, прыйшоўся па плячы, але другі раз цяжкая палка з усяе сілы апусцілася на галаву, і, калі чалавек паваліўся, на яе абрынуліся яшчэ тры ўдары. Пучкі святла загойсалі з боку ў бок. Пачуліся крыкі, тупат ног, трэск кустоўя. Том стаяў над распластаным на зямлі целам. І раптам - слізгатлівы ўдар па галаве. Тома нібы працяло токам. Ён пабег уздоўж ручая, нізка прыгнуўшыся. Ззаду заплёхалі па вадзе ногі. Том крута збочыў і, прадзіраючыся між кустоў, забраўся ў самы гушчар яданоснага сумаху. Там, прыпаўшы да зямлі, замёр. Крокі набліжаліся, святло электрычных ліхтароў прасвечвала ручай да самага дна. Том паўзком падняўся па адхоне і апынуўся ў фруктовым садзе. Крыкі даносіліся і сюды. Яго шукалі ўнізе, каля ручая. Том нізка прыгнуўся і пабег напрасткі па садовых градах, і камякі зямлі расціскаліся пад яго нагамі, ляцелі ў бакі. Наперадзе ён разгледзеў кустоўе, якое акаймоўвала арашальную канаву. Ён пралез праз жываплот, прадраўся праз вінаграднік і кусты ажыны. Там, хрыпла дыхаючы, лёг на зямлю. Твар і нос у яго анямелі. Нос быў разбіты, па падбародку тонкім струменьчыкам сцякала кроў. Ён ляжаў ніцма, пакуль не праяснілася ў галаве. І тады паволі папоўз да краю канавы. Абмыў твар халоднай вадой, адарваў шматок ад падола сваёй сіняй кашулі і прыклаў да параненай шчакі і да носа. Востры боль апёк яго твар.
Навальнічная хмара адплыла ўжо на край небасхілу - чорная пляма на зорным небе. Зноў запанавала начная цішыня.
Том ступіў у ваду і адразу страціў апору пад нагамі. Разы два ўзмахнуўшы рукамі, ён пераплыў канаву і з цяжкасцю вылез на другі бераг. Мокрая адзежа прыліпла да цела. Ён з плёскатам зрабіў некалькі крокаў, у чаравіках хлюпала вада. Том сеў, зняў чаравікі, выліў з іх ваду. Потым выціснуў ваду ўнізе з калашын, зняў пінжак і выкруціў яго.
Наперадзе, каля шашы, па зямлі скакалі агні электрычных ліхтарыкаў - яго шукалі ў прыдарожных канавах. Асцярожна ступаючы, Том пайшоў па скошаным лузе. У чаравіках ужо не хлюпала. Ён наўздагад пакіраваў на другі край пакошы і нарэшце выбраўся на грунтавую дарогу. Крадучыся, ён падышоў да прамавугольніка лагера.
Вартавы, пачуўшы шоргат, крыкнуў:
- Хто ідзе?
Том упаў на жывот і замёр, промень святла слізгануў над ім. Том бясшумна падпоўз да свайго доміка. Рыпнулі завесы дзвярэй. Пачуўся голас маці - спакойны, цвёрды, не заспаны:
- Хто тут?
- Я, Том.
- Ты б ужо спаць клаўся. Эла яшчэ няма.
- Пэўна, дзеўку знайшоў.
- Ідзі кладзіся, - ціха сказала маці. - Вунь там, каля акна.
Том знайшоў свой матрац і раздзеўся дагала. Ён ляжаў пад коўдрай і калаціўся ўсім целам. Анямеласць у разбітым твары праходзіла, і боль цяпер разліваўся па ўсёй галаве.
Толькі праз гадзіну вярнуўся Эл. Ён асцярожна падышоў да Тома і наступіў на яго мокрую адзежу.
- Тсс... - прашаптаў Том.
Эл шэптам запытаўся:
- Не спіш? Дзе ты так прамок?
- Тсс... Раніцай скажу.
Бацька перавярнуўся на спіну, гучна запыхкаў і захроп.
- Які ты халодны, - сказаў Эл.
- Тсс... Спі. - Маленькае акенца шэрым квадратам выступала з цемры.
Тома сон не браў. Нервы на твары ажылі і занылі, балела скула, разбіты нос распух, у ім затахкаў такі моцны боль, ад якога, здавалася, усё цела скаланаецца і падскоквае. Том глядзеў на маленькі квадрат акна, бачыў, як паволі праслізгваюць і знікаюць за аконнай рамай зоркі. Час ад часу да яго слыху даносіліся крокі вартавых.
Нарэшце недзе далёка заспявалі пеўні, акно крыху пасвятлела. Том дакрануўся кончыкамі пальцаў да апухлага твару, і Эл, патрывожаны гэтым рухам, застагнаў і замармытаў у сне.
І вось стала віднець. У прыціснутых адзін да аднаго доміках абудзілася жыццё - пачуўся трэск сушняку, бразганне патэльняў. Маці раптам прыўзнялася і села на матрацы, і ў пашарэлым змроку пакоя Том разгледзеў яе твар, ацёклы ад сну. Яна скіравала позірк на акно і доўга глядзела. Потым адкінула коўдру і знайшла рукой сукенку. Седзячы, яна накінула яе на галаву, падняла рукі, і сукенка ўпала да пояса. Маці паднялася, апусціла сукенку да шчыкалатак і, асцярожна ступаючы босымі нагамі, падышла да акна. Так, гледзячы, як паступова святлее за акном, яна спрытнымі пальцамі распляла валасы, разраўняла пасмы і зноў запляла іх. Склаўшы рукі на грудзях, яна яшчэ крыху пастаяла нерухома. Святло з акна падала на яе твар. Яна павярнулася, бязгучна прайшла між матрацаў і ўзяла ліхтар. Скрыгатнуўшы, падняўся шчыток, і яна паднесла запалку да кнота.
Бацька павярнуўся на бок і, жмурачыся, глянуў на маці.
- Ты яшчэ што-небудзь атрымаў, та? - запыталася яна.
- Квіток на шэсцьдзесят цэнтаў.
- Тады падымайся, схадзі купі мукі і топленага сала. Не марудзь.
Бацька пазяхнуў.
- Крама, можа, яшчэ не адчынена.
- Дык няхай адчыняць. Трэба вас снеданнем накарміць. Ужо хутка на працу ісці.
Бацька нацягнуў камбінезон, надзеў парыжэлы пінжак і, пазяхаючы і пацягваючыся, ляніва выйшаў з доміка.
Малыя дзеці прачнуліся і, як мышаняты, вызіралі з-пад коўдры. Ад шэрага перадсвітальнага святла ў пакоі крыху парадзеў змрок. Маці паглядзела на матрацы. Дзядзька Джон ужо прачнуўся, а Эл яшчэ моцна спаў. Яе позірк спыніўся на Томе. З хвіліну яна прыглядалася да яго, потым паспешліва падышла. Твар у Тома быў апухлы, сіні, на губах і на падбародку чарнела запечаная кроў. Рваная рана на шчацэ туга сцягнулася па краях.
- Том, - прашаптала маці, - што з табой такое?
- Тсс... -сказаў Том. - Гавары цішэй. Я ўвязаўся ў бойку.
- Том!
- Так атрымалася, ма.
Яна апусцілася каля яго на калені.
- Ты трапіў у бяду?
Том доўга не адказваў ёй.
- Ага, - нарэшце вымавіў ён, - у бяду. На працу сёння мне нельга ісці. Трэба хавацца.
Дзеці падпаўзлі да іх на карачках, з прагнай цікаўнасцю пазіраючы на Тома.
- Што з ім, ма?
- Ціха! - загадала маці. - Ідзіце памыйцеся.
- У нас мыла няма.
- Ну проста вадой.
- А што з Томам?
- Зараз жа замаўчыце. І нікому ні слова.
Дзеці задам адпаўзлі да процілеглай сцяны і там прыселі на кукішках, упэўненыя, што на іх ніхто больш увагі не зверне.
Маці запыталася ў Тома:
- Што-небудзь сур'ёзнае?
- Нос разбіты.
- Я пра іншае пытаюся.
- Ага, вельмі.
Эл расплюшчыў вочы і глянуў на Тома.
- Госпадзі! Дзе гэта цябе так?
- А што такое? - пачуўся голас дзядзькі Джона.
Прытупаў бацька з крамы.
- Было адчынена. - Ён паклаў на падлогу каля печкі маленькі мяшэчак мукі і пакецік з топленым салам. - Што здарылася? - запытаўся ён у Тома.
Том прыўзняўся на локці і амаль адразу лёг.
- Эх і аслабеў я. Зараз раскажу. Так, каб усім адразу. А дзеці?
Маці глянула на малых, якія прыціснуліся да сцяны.
- Ідзіце хоць твары памыйце, - сказала яна ім.
- Не, - сказаў Том. - Няхай паслухаюць. Няхай таксама ведаюць. А то прагаварыцца могуць.
- Што ж усё-такі здарылася? - дапытваўся бацька.
- Зараз раскажу. Учора вечарам я пайшоў разведаць, чаго яны там за варотамі так крычалі. І сустрэўся з Кейсі.
- З прапаведнікам?
- З ім, та. З прапаведнікам. Ён забастоўкай кіраваў, і па яго прыйшлі.
- Хто прыйшоў?
- Не ведаю. Нейкія людзі - накшталт тых, што завярнулі нас назад, калі мы ехалі па шашы той ноччу. З ручкамі ад кірак. - Том памаўчаў. - Яго забілі. Размазджэрылі галаву. Я там блізка стаяў. Я быццам розум страціў. Я вырваў палку. - Перад вачамі ў Тома зноў паўстала ноч - цемра, агні ліхтароў. - Я... я біў яго палкай.
У маці перахапіла дыханне. Бацька быццам скамянеў.
- Ты забіў чалавека? - нарэшце прашаптаў ён.
- Я... не ведаю. У мяне ў галаве ўсё перакруцілася. Хацеў забіць.
Маці запыталася:
- Цябе бачылі?
- Не ведаю. Не ведаю. Напэўна, бачылі. Яны нас ліхтарамі асвятлялі.
Маці з хвіліну пільна глядзела яму ў вочы.
- Разламай скрынкі, та, - сказала яна. - Трэба снеданне прыгатаваць. Вам на працу хутка ісці. Руці, Уінфілд! Калі хто спытаецца - Том захварэў, чуеце? А балбатаць будзеце... яго... у турму пасадзяць. Зразумелі?
- Так, мэм.
- Ты, Джон, вачэй з іх не спускай. Пасачы, каб яны ні з кім не гаварылі. - Калі бацька пачаў ламаць пустыя скрынкі, у якіх раней ляжаў іхні скарб, маці распаліла агонь у печцы, развяла рэдкае цеста, паставіла на пліту кафейнік. Тонкія дошкі добра гарэлі, агонь з гулам рваўся ў трубу.
Бацька разламаў апошнюю скрынку і падышоў да Тома.
Том хмурна сказаў:
- Яны ехалі сюды працаваць за пяць цэнтаў са скрыні.
- Нам столькі і плацяць.
- Плацяць... Ведаеш, мы хто? Мы штрэйкбрэхеры. Ім плацілі два з паловай.
- На ежу не хопіць.
- Пэўна ж, - стомлена прамовіў Том. - Таму яны і забаставалі. Але з забастоўкай, здаецца, учора скончылі. І сёння нам, відаць, таксама заплацяць два з паловай цэнты за скрыню.
- Дык як жа яны, сволачы...
- Вось, вось, та. Цяпер дайшло? Кейсі як быў, так і застаўся добрым чалавекам. А чорт! Усё стаіць перад вачамі гэтая карціна. Ляжыць на зямлі... галава амаль расплюшчаная, і кроў з яе сочыцца... Госпадзі божа мой! - Том закрыў вочы далонню.
- Што ж нам цяпер рабіць? - запытаўся дзядзька Джон.
Эл пачаў падымацца з матраца.
- Ну, я, дзякуй богу, ведаю, што мне рабіць. Пайду адсюль, ад усяго гэтага.
- Не, Эл, не пойдзеш, - запярэчыў Том. - Без цябе нам цяпер ніяк нельга. Ісці давядзецца мне. Са мной вам небяспечна. Як толькі падымуся, пайду.
Маці завіхалася каля печкі, павярнуўшы крыху да іх галаву, каб лепш чуць. Яна паклала на патэльню сала і, калі яно зашыпела, стала апускаць у яго цеста з лыжкі.
Том гаварыў далей:
- Табе ісці нельга, Эл. На тваёй адказнасці грузавік.
- Але мне ўжо ўсё надакучыла.
- Што зробіш, Эл. Гэта ж твая сям'я. Ты адзін цяпер можаш ёй памагчы. Са мной вам цяпер небяспечна.
Эл сярдзіта забурчаў:
- Не разумею, чаму мне не даюць устроіцца ў гаражы?
- Можа, калі пазней. - Том глянуў міма Эла і ўбачыў Ружу Сарона. Яна ляжала на матрацы і пазірала на яго вялікімі, шырока расплюшчанымі вачамі. - Ты не хвалюйся, - сказаў ён. - Не хвалюйся. Сёння табе малака купяць. - Яна заморгала вачамі і нічога не адказала.
Бацька сказаў:
- Том, нам трэба ведаць праўду. Думаеш, ты забіў яго?
- Не магу сказаць. Цёмна было. І тут мяне нехта ўдарыў. Не ведаю. Хоць бы забіў. Хоць бы забіў я гэту сволач.
- Том! - павысіла голас маці. - Не гавары так.
З вуліцы пачуўся шум матораў - па ёй праязджалі машыны, іх было шмат. Бацька ступіў да акна, глянуў на вуліцу.
- Цэлая процьма новых прыбыла, - паведаміў ён.
- Забастоўку, відаць, задушылі, - сказаў Том. - Цяпер плаціць вам будуць па два цэнты з паловай.
- Гэта ж хоць бягом бегай, на ежу не заробіш.
- Зразумела, - сказаў Том. - Ападкі ешце. Усё ж трохі падтрымае.
Маці перавярнула блін на патэльні і памяшала каву.
- Слухайце, што я скажу, - прамовіла яна. - Сёння я куплю ў краме кукурузнай мукі, будзем мамалыгу есці. А як толькі заробім на бензін, адразу паедзем адсюль. Тут месца нядобрае. А Тома я аднаго не адпушчу. Вось так, панове.
- Не, ма, так нельга. Я ж кажу табе - са мной вам цяпер небяспечна.
Маці рашуча ўзняла падбародак:
- Вось так і зробім. А цяпер ідзіце ешце і - на працу. Я толькі посуд памыю і таксама прыйду. Трэба ж нешта зарабіць.
Бліны былі такія гарачыя, што апякалі рот. Яны хуценька праглынулі каву і налілі яшчэ па кубку.
Дзядзька Джон пакруціў галавою над самай талеркай.
- Відаць, нам так проста не выбрацца адгэтуль. Няйначай, праз мае грахі.
- Сціхні! - крыкнуў бацька. - Няма часу важдацца з тваімі грахамі. Пайшлі. Пара ўжо за працу брацца. Вы, малыя, нам падможаце. Маці правільна кажа. Трэба хутчэй выбірацца адсюль.
Калі яны пайшлі, маці паднесла Тому талерку і кубак.
- Ты пад'еў бы.
- Не магу, ма. Так усё баліць, што не змагу жаваць.
- А ты паспрабуй.
- Не, не магу, ма.
Яна прысела да яго на край матраца.
- Ты павінен мне ўсё расказаць. Я хачу зразумець, як усё было. Хачу ва ўсім разабрацца. Што Кейсі такога зрабіў? За што яго забілі?
- Ён проста стаяў у святле ліхтароў.
- Што ён гаварыў? Ты можаш прыпомніць?
- Вядома, магу. Кейсі сказаў: «Вы не маеце права марыць людзей голадам». Тады той таўстун абазваў яго чырвонай сволаччу. А Кейсі сказаў: «Вы не ведаеце, што творыце». І тут гэты малойчык з усяе сілы ўдарыў яго.
Маці апусціла вочы. Яна сціснула рукі.
- Так і сказаў: «Вы не ведаеце, што творыце»?
- Ну так!
Маці сказала:
- Вось каб наша бабка гэта пачула.
- Ма... усё зрабілася неяк само сабой, ну нібыта як дыхаеш. Я і падумаць не паспеў.
- Ну што цяпер зробіш. Шкада, што гэта здарылася. Шкада, што ты там апынуўся. Але ж іначай ты не мог. Я не бачу за табой віны. - Яна падышла да печкі і памачыла анучку ў вадзе, што грэлася ў кацялку. - На, вазьмі. Прыкладзі да твару.
Том прыклаў гарачую анучку да шчакі і носа і паморшчыўся ад болю.
- Я ноччу пайду, ма. Я не хачу, каб вы праз мяне пацярпелі.
Маці зазлавала:
- Том! Шмат чаго я, можа, і не разумею, але ад таго, што ты нас пакінеш, лягчэй нам не стане. Гэта нас зусім даканае. - І крыху спакайней працягвала: - Быў час - жылі мы на сваёй зямлі, і ўсё ішло сваім парадкам. Старыя паміралі, нараджаліся дзеці, і ўсе мы жылі разам, адной сям'ёй. Усё было зразумела і проста. А цяпер нічога не зразумела, нічога не проста. Цяпер усё перакруцілася. Эл затужыў, кудысьці імкнецца - хоча адбіцца ад нас. Дзядзька Джон нехаця цягнецца з намі. Бацька страціў сваё месца. Цяпер ён ужо не галоўны ў сям'і. Сям'я наша бурыцца, Том. Яе больш няма. А Разашарна... - Маці абвяла позіркам пакой і ўбачыла шырока расплюшчаныя вочы дачкі. - У яе народзіцца дзіця, а сям'і не будзе. Ну, не ведаю... Я стараюся хоць як-небудзь дух яе падняць. Уінфілд... што з яго выйдзе? Хутка зусім здзічэе, і Руці таксама... растуць, як звераняты. У каго мне апірышча шукаць? Не пакідай нас, Том. Застанься, памажы.
- Добра, - стомлена прамовіў Том. - Добра. Хоць і нельга мне, я ведаю.
Маці вярнулася да печкі, памыла ў тазе алавяныя талеркі і выцерла іх.
- Ты ноччу не спаў.
- Не.
- Дык паспі. Адзежа твая, я бачу, мокрая. Зараз павешу падсушыць каля печкі. - Маці ўсё зрабіла, прыбрала. - Ну цяпер я пайду. Абіраць буду. Разашарна, калі хто прыйдзе - Том захварэў, чуеш? Нікога не пускай. Чуеш? - Ружа Сарона кіўнула галавой. - Мы апоўдні вернемся. Ты паспі, Том. Магчыма, вечарам мы адсюль паедзем. - Маці паспешліва падышла да яго. - Том, ты не ўцячэш?
- Не, ма.
- Далібог? Не пойдзеш ад нас?
- Не, ма, я тут буду.
- Ну добра. Дык не забудзься, Разашарна. - Маці выйшла і шчыльна зачыніла за сабою дзверы.
Том ляжаў, не варушыўся, і раптам сон, нібы хваляй, падняў яго да той мяжы, за якой гасне свядомасць, паволі апусціў і зноў падняў.
- Том! Том!
- Га? Што? - Том прачнуўся, як ад штуршка. Ён скіраваў позірк на Ружу Сарона. Вочы яе гарэлі абурэннем.
- Ты забіў чалавека?
- Забіў. Не крычы! Хочаш, каб пачулі?
- Няхай чуюць! - крыкнула яна. - Тая жанчына мне ўсё сказала. Яна расказала, што бывае за грахі. Хіба ж дзіця здаровае народзіцца? Коні пайшоў ад мяне, ежы мне патрэбнай не даюць. Малака няма. - Яна істэрычна залямантавала: - А цяпер ты яшчэ чалавека забіў! Ці ж цяпер народзіцца здаровае дзіця? Я ведаю... яно будзе вырадкам... вырадкам! Я на танцулькі не хадзіла!
Том падняўся з матраца.
- Ціха! - сказаў ён. - Людзі пачуюць, збягуцца.
- Ну і няхай! Дзіця будзе вырадкам. У абнімку я ніколі не танцавала.
Том падышоў да Ружы Сарона.
- Сціхні.
- Не падыходзь да мяне. Ты ўжо не першага чалавека забіў. - Твар у Ружы Сарона пабарвавеў, словы яна вымаўляла невыразна. - Бачыць цябе не магу. - Яна ўкрыла галаву коўдрай.
Том пачуў задышлівыя, сутаргавыя рыданні. Ён закусіў ніжнюю губу і ўтаропіўся ў падлогу. Потым падышоў да бацькавага матраца. Пад матрацам з краю ляжала вінтоўка - доўгі цяжкі вінчэстэр трыццаць восьмага калібру з рычаговым затворам. Том узяў яго, адцягнуў затвор, каб праверыць, ці ёсць патрон у патронніку, паглядзеў, ці стаіць курок на засцерагальніку, і вярнуўся на сваё месца. Вінтоўку ён паклаў на падлогу каля свайго матраца прыкладам да ўзгалоўя. Ружа Сарона цяпер ціха ўсхліпвала. Том лёг, накрыўся коўдрай, закрыў ёю свой разбіты твар, пакінуўшы маленькую шчылінку, каб дыхаць. Ён уздыхнуў:
- Госпадзі, а госпадзі!
На вуліцы праездам спынілася некалькі машын, пачуліся галасы:
- Колькі мужчын?
- Ды вось мы, трое. А плата якая?
- Едзьце да дома дваццаць пяць. Нумар на дзвярах.
- Добра, містэр. А якая плата?
- Два з паловай цэнты.
- Ды так, чорт вазьмі, і на абед сабе не заробіш!
- Такая плата ў нас. З поўдня сюды дзвесце чалавек едуць - яны і такому заробку радыя будуць.
- Але ж, божа мой, містэр!
- Давайце, давайце. Згаджайцеся альбо едзьце, куды ехалі. Мне няма калі з вамі спрачацца.
- Дык жа ж...
- Слухайце. Я плату не прызначаю. Мая справа запісаць вас. Хочаце працаваць, згаджайцеся. Не хочаце - паварочвайце і гладкай дарогі.
- Дваццаць пяты, кажаце?
- Ага, нумар дваццаць пяць.
Том драмаў, лежачы на матрацы. Яго пабудзіў нейкі падкрадлівы шолах. Рука пацягнулася да вінчэстэра і моцна сціснула шыйку прыклада. Ён адкінуў з твару коўдру. Каля яго стаяла Ружа Сарона.
- Чаго табе? - запытаўся Том.
- Ты спі, - сказала яна. - Высыпайся. Я папільную дзверы. Ніхто не ўвойдзе.
З хвіліну Том моўчкі глядзеў ёй у твар.
- Добра, - сказаў ён і зноў нацягнуў коўдру на галаву.
Маці вярнулася дамоў, калі пачало змяркацца. Яна спынілася на ганку, пастукала ў дзверы і сказала:
- Гэта я, - каб не ўстрывожыць Тома. Тады адчыніла дзверы і ўвайшла. У руках яна трымала мяшэчак. Том прачнуўся і сеў на матрацы. Рана яго падсохла і так сцягнулася па краях, што скура на шчацэ блішчала. Левае вока ўсё заплыло і амаль не расплюшчвалася.
- Без мяне ніхто не прыходзіў? - запыталася маці.
- Не, ніхто, - адказаў Том. - Плату ўсё ж такі зрэзалі.
- Адкуль ты ведаеш?
- Чуў, як на вуліцы гаварылі.
Ружа Сарона паныла паглядзела на маці.
Том паказаў на яе вялікім пальцам:
- Яна тут такі гвалт падняла, ма. Думае, усе няшчасці на яе адну зваляцца. Калі яна так праз мяне расстройваецца, давядзецца мне ад вас ісці.
Маці павярнулася да дачкі:
- Што такое з табой робіцца?
Ружа Сарона з абурэннем сказала:
- Хіба ж народзіш здаровае дзіця, калі такое навокал?
Маці сказала:
- Сціхні! Замаўчы. Я разумею, што ў цябе на душы, я ведаю, гэта мацней за цябе, а ўсё ж трымай язык за зубамі. - Яна павярнулася да Тома: - Ты на яе не глядзі, Том. Ёй цяпер вельмі цяжка, я гэта па сабе памятаю. Калі чакаеш дзіцяці, усё, што б ні здарылася, здаецца, адну цябе закранае, у кожным слове табе чуецца абраза, і здаецца, усё накіравана супраць цябе. Яна не вінаватая, Том, гэта мацней за яе. Такі ўжо ў яе душэўны стан.
- Я не хачу, каб праз мяне яна расстройвалася.
- Замаўчы! Проста нічога не гавары. - Маці паклала мяшэчак на халодную пліту. - Сёння мы амаль нічога не зарабілі. Я ж сказала, трэба ехаць адсюль. Насячы, Том, мне трэсак. Не, табе ж нельга выходзіць. Вось, у нас яшчэ апошняя скрынка засталася. Разламай яе. Я сказала, каб яны хоць сушняку назбіралі па дарозе дамоў. На вячэру ў нас будзе мамалыга, і я яе трохі цукрам пасыплю.
Том падняўся з матраца і растаптаў нагамі апошнюю скрынку. Маці распаліла агонь збоку ў топцы, стараючыся, каб ён гарэў толькі пад адной канфоркай. Потым наліла вады ў кацялок і паставіла на пліту. Неўзабаве кацялок, які стаяў над самым полымем, забразгатаў, вада ў ім заклекатала і запыхкала.
- Як сёння працавалі? - пацікавіўся Том.
Маці зачарпнула кубкам кукурузнай мукі з мяшэчка.
- І гаварыць не хочацца. Прыгадалася мне сёння, як мы раней жартавалі. Усё цяпер не так, Том. Цяпер мы не жартуем. А калі хто і адпусціць жарт, дык ён нейкі зласлівы, горкі і зусім не смешны. Адзін сёння сказаў: «Дэпрэсія скончылася. Я бачыў зайца, але ніхто за ім не гнаўся». А другі кажа: «Правільна. Цяпер зайцоў не б'юць. Іх цяпер ловяць - падояць і адпусцяць. А твой, відаць, быў нядойны». Ну бачыш? Зусім не смешна, не так, як было тады, калі дзядзька Джон перавярнуў індзейца ў нашу веру і прывёў да сябе ў дом, а той з'еў у яго цэлы засек бабоў і, выпіўшы дзядзькава віскі, зноў вярнуўся ў язычніцтва. А ты, Том, вазьмі намачы анучку і прыкладзі да твару.
Вячэрняе сутонне гусцела. Маці запаліла ліхтар і павесіла яго на цвік. Яна падкінула трэсак у агонь і пачала патроху сыпаць у кіпень кукурузную муку.
- Разашарна, - сказала яна, - ты памяшаеш кашу?
На вуліцы пачуўся хуткі тупат ног. Дзверы раптам расчыніліся і з грукатам ударыліся аб сцяну. У пакой уляцела Руці.
- Ма! - крыкнула яна. - Ма, Уінфілда курчыць.
- Дзе ён? Кажы!
Руці ледзь пераводзіла дух.
- Увесь белы стаў і паваліўся. Ён сёння столькі персікаў з'еў, і ў яго зрабіўся панос. Так і паваліўся. Сам белы!
- Вядзі да яго! - загадала маці. - Разашарна, кашу глядзі.
Разам з Руці яна выбегла з доміка. Яна цяжка бегла па вуліцы, не паспяваючы за дзяўчынкай. У змроку насустрач ім ішлі трое мужчын, і той, што ішоў пасярэдзіне, нёс на руках Уінфілда. Маці кінулася да іх.
- Гэта мой, - крыкнула яна. - Дайце яго мне.
- Я данясу вам, мэм.
- Не, дайце мне. - Яна ўзяла хлопчыка на рукі і павярнула назад, але раптам спахапілася: - Дзякуй вам, канешне, - сказала яна мужчыну.
- Няма за што, мэм. Хлопчык зусім аслабеў. Мабыць, у яго глісты.
Маці шпарка пакрочыла назад з Уінфілдам на руках. Занёсшы яго ў дом, яна апусцілася на калені і паклала хлопчыка на матрац.
- Ну што, што з табой? Гавары.
Хлопчык млява расплюшчыў павекі, матнуў галавой і зноў заплюшчыў вочы.
Руці сказала:
- Я ж гаварыла табе, ма, у яго цэлы дзень быў панос. Ён персікаў аб'еўся.
Маці паклала яму пальцы на лоб.
- Не гарачы. Але твар бледны, і шчокі запалі.
Том падышоў бліжэй і пасвяціў уніз ліхтаром.
- Усё ясна, - сказаў ён. - Згаладаўся, аслабеў. Купі яму бляшанку малака, прымусь выпіць. Няхай кашы з малаком з'есць.
- Уінфілд, ну як сябе адчуваеш? - запыталася маці.
- Галава кружыцца, - адказаў хлопчык, - так і кружыцца.
- Такога паносу ты яшчэ ніколі не бачыла, - з важнасцю сказала Руці.
У пакой увайшлі бацька, дзядзька Джон і Эл, несучы ахапак ламачча і сушняку. Свае ношы яны скінулі каля печкі.
- Што тут у вас яшчэ? - запытаўся бацька.
- Уінфілд. Яму малака трэба.
- Божа літасцівы! Кожнаму з нас што-небудзь трэба.
- Ну, колькі зарабілі сёння?
- Даляр сорак два.
- Дык схадзі ў краму, купі малака Ўінфілду.
- Чаго гэта ён раптам захварэў?
- Чаго, я не ведаю, але захварэў. Ну ідзі! - Нешта прабурчаўшы сабе пад нос, бацька выйшаў за дзверы. - Ты там кашу мяшаеш?
- А як жа. - У доказ сваіх слоў Ружа Сарона пачала хутчэй працаваць лыжкай.
Эл пакрыўдзіўся:
- Госпадзі, ма! Няўжо адна каша пасля таго, як мы аж да самага цямна працавалі?
- Ты ж ведаеш, Эл, нам трэба ехаць. Усё, што ў нас ёсць, пойдзе на бензін. Ты і сам гэта ведаеш.
- Але ж, далібог, ма, каб працаваць, чалавеку трэба есці.
- Лепш пасядзі, памаўчы, - сказала маці. - Пра самае галоўнае трэба думаць. Ты ведаеш, пра што.
- Гэта пра мяне? - ажывіўся Том.
- Вось павячэраем і пагаворым, - адказала маці. - На дарогу, Эл, бензіну хопіць?
- Яго ў нас каля чвэрці бака, - адказаў Эл.
- Лепш скажы мне ўсё цяпер, - настойваў Том.
- Не, потым. Пацярпі трохі. А ты кашу памешвай, памешвай. Зараз я каву пастаўлю. Цукар пакладзяце ці ў кашу, ці ў каву. На тое і на другое не хопіць.
З высокай кансервавай бляшанкай вярнуўся бацька.
- Адзінаццаць цэнтаў, - паведаміў ён з абурэннем.
- Давай сюды. - Маці ўзяла бляшанку і пракалола яе нажом, тады наліла малака ў кубак і перадала Тому. - Дай Уінфілду.
Том апусціўся каля хлопчыка на калені:
- На, выпі.
- Не магу. Мяне вырве. Не прыставайце.
Том устаў.
- Ён цяпер не можа, ма. Крыху пазней.
Маці ўзяла кубак з малаком і паставіла на падаконнік.
- Каб ніхто не чапаў, - папярэдзіла яна. - Гэта Ўінфілду.
- Я малака зусім не п'ю, - панура прамовіла Ружа Сарона. - А яно мне вельмі патрэбнае.
- Ведаю. Але ж ты яшчэ на нагах, а брацік твой зваліўся. Каша ўжо загусцела?
- Ага. Цяжка ўжо лыжку паварочваць.
- Тады давайце есці. Вось цукар. Кожнаму амаль па лыжачцы. Хто як хоча - у кашу або ў каву.
Том сказаў:
- У кашу я б лепш солі і перцу ўсыпаў.
- Соль - вось, калі хочаш, - сказала маці. - А перац увесь выйшаў.
Скрынак ужо не было. Усе са сваімі талеркамі селі на матрацы і падкладалі сабе з кацялка, пакуль у ім не паказалася дно.
- Крыху Ўінфілду пакіньце, - сказала маці.
Уінфілд прысеў і выпіў малако, і адразу на яго напаў голад. Ён паставіў кацялок між каленяў, даеў рэшткі і саскроб лыжкай тое, што прыпяклося да сценак. Маці выліла астатняе малако з бляшанкі ў кубак і цішком усунула Ружы Сарона, каб тая выпіла дзе ў кутку.
- Ну дык раскажаце вы нарэшце? - запытаўся Том. - Я хачу паслухаць.
Бацька нерашуча сказаў:
- Руці і Ўінфілду лепш гэтага не ведаць. Можа б, яны выйшлі?
Маці сказала:
- Не. Яны хоць і малыя, але павінны цяпер ва ўсім быць як дарослыя. Нічога не зробіш. Руці і ты, Уінфілд, глядзіце не разбалбачыце тое, што пачуеце, а то ўсіх нас загубіце.
- Не разбалбочам, - запэўніла Руці. - Мы ўжо дарослыя.
- Добра, толькі маўчыце.
Кубкі з кавай стаялі на падлозе. Куртаты шырокі агеньчык ліхтара, падобны да каляровага крыльца матылька, кідаў цьмяны жоўты водсвет на сцены.
- Гаварыце ж, - сказаў Том.
Маці сказала:
- Бацька, ты гавары.
Дзядзька Джон сербануў з кубка кавы. Бацька загаварыў:
- Ну, плату знізілі, як ты і прадбачыў. І цэлая плойма новых зборшчыкаў прыехала, такія ўсе галодныя, што гатовыя за акраец хлеба працаваць. Толькі пацягнешся да персіка, а яго ўжо ў цябе з-пад рук выхопліваюць. Цяпер увесь ураджай мігам знімуць. Убачаць дрэва, яшчэ не абабранае, і бягом да яго бягуць. Нават бойкі бываюць - адзін кажа, гэта яго дрэва, а другі таксама лезе яго абіраць. Людзі здалёку прыехалі - з самага Эль Сентра. Як ваўкі, галодныя. За кавалак хлеба працуюць з рання да ночы. Я кажу прыёмшчыку: «Мы не можам працаваць за два цэнты з паловай за скрыню». А ён адказвае: «Дык звальняйцеся. Іншыя могуць». Я кажу: «Яны трохі падкормяцца і таксама кінуць». А ён мне: «Ха! Пакуль яны падкормяцца, мы ўсе персікі знімем». - Бацька змоўк.
- Чорт ведае што за людзі, - сказаў дзядзька Джон. - А кажуць, яшчэ дзве сотні іх сюды да ночы прыедзе.
Том сказаў:
- Так і будзе. Ну, а пра тое, што чуваць?
Бацька маўчаў.
- Том, - нарэшце сказаў ён, - здаецца, ты такі гэта зрабіў.
- Я так і думаў. Нічога не відаць было. Але я адчуваў, што так яно і ёсць.
- Усе амаль толькі пра гэта і гавораць, - сказаў дзядзька Джон. - Пасты ўсюды паставілі, некаторыя патрабуюць лінчавання... калі, вядома, схопяць таго чалавека.
Том глянуў на дзяцей. Яны пазіралі на яго вялікімі вачамі, амаль не маргаючы, быццам баяліся, што ў тое імгненне, калі вочы заплюшчацца, нешта здарыцца, а яны яе ўбачаць. Том сказаў:
- Але ж... чалавек той зрабіў гэта пасля таго, як забілі Кейсі.
Бацька перабіў яго:
- Цяпер расказваюць не так. Цяпер кажуць, ён першы зрабіў гэта.
- А-а!.. - глуха выдыхнуў Том.
- Яны ўсіх напускаюць на нас. Так людзі кажуць. Усіх лінчавальнікаў з камітэта пільнасці і валанцёраў. Шукаюць таго чалавека.
- А ў твар яны яго ведаюць? - запытаўся Том.
- У твар... наўрад ці... Але як я чуў, думаюць, што ён паранены. Думаюць, у яго...
Том паволі падняў руку і дакрануўся пальцамі да шчакі.
Маці ўсклікнула:
- Гэта ж усё было не так!
- Цішэй, ма, - сказаў Том. - Яны ўсе будуць гаварыць адно. Усё, што камітэтчыкі ні нагавораць на нас, будзе правільна.
Маці глядзела скрозь паўзмрок, прыглядаючыся да твару Тома, асабліва да яго губ.
- Ты абяцаў, - сказала яна.
- Ма, можа, мне... гэтаму чалавеку лепш пайсці? Калі б... гэты чалавек і праўда зрабіў што-небудзь кепскае, ён сказаў бы сабе: «Што ж, няхай вешаюць. Я зрабіў кепска і заслужыў кару». Але ж ён нічога кепскага не зрабіў. На душы ў яго не цяжэй, чым калі б ён смярдзючку прыкончыў.
Руці перабіла яго:
- Мы з Уінфілдам усё ведаем, ма. Яму няма патрэбы пры нас гаварыць «гэты чалавек, гэты чалавек».
Том рагатнуў.
- Ну дык вось, гэты чалавек не хоча вісець на шыбеніцы; бо калі што падобнае зноў здарыцца, ён тое самае зробіць. Але ж ён таксама не хоча, каб праз яго пацярпелі яго родныя. Мне, ма, трэба ісці ад вас.
Маці прыкрыла рот пальцамі і адкашлялася.
- Не, - сказала яна. - Дзе ты схаваешся? У чужых быць упэўненым нельга, а ў сваіх можна. Мы цябе схаваем, паклапоцімся, каб ты сыты быў, пакуль твар не зажыве.
- Але ж, ма...
Маці паднялася з матраца.
- Нікуды ты не пойдзеш. Мы павязём цябе адсюль. Эл, падгані грузавік задам да самых дзвярэй. Я ўжо ўсё абдумала. Адзін матрац мы пакладзём на дно, Том хуценька забярэцца туды, а другі паставім такім дашкам і збоку закрыем чым-небудзь. А дыхаць ён будзе праз адтуліны. Не пярэчце. Так і зробім.
Бацька незадаволена прабурчаў:
- Цяпер, аказваецца, мужчыну і слова вымавіць нельга. Самаўпраўная стала. Нічога, прыйдзе час, асядзем дзе-небудзь, я табе ўсыплю.
- Як прыйдзе такі час, тады і ўсыплеш, - адрэзала маці. - Падымайся, Эл. Ужо добра сцямнела.
Эл выйшаў да грузавіка. Ён падумаў, як лепш зрабіць, і заднім ходам падвёў машыну да самага ганка.
Маці сказала:
- Ну, жывей! Вось той матрац кладзіце сюды.
Бацька з дзядзькам Джонам перакінулі матрац цераз задні борт.
- А цяпер гэты.
Яны скінулі другі матрац на першы.
- Ну, Том, лезь. Хутчэй.
Том хуценька палез цераз борт і скокнуў на дно грузавіка. Ён расправіў ніжні матрац, лёг, а верхні накінуў на сябе. Бацька сагнуў матрац пасярэдзіне, паставіў яго дашкам, і Том апынуўся як у будцы. Праз шчыліны між бакавымі планкамі борта можна было глядзець. Бацька, Эл і дзядзька Джон паспешліва грузілі на машыну - пакідалі на Томаву схованку коўдры, збоку паставілі вёдры, ззаду паклалі апошні матрац. Рондалі, патэльні, адзежу склалі кучай, бо скрынак ужо не было - усе спалілі. Калі ўжо амаль усё пагрузілі, да машыны падышоў вартавы з драбавіком на сагнутай руцэ.
- Што вы тут робіце? - запытаўся ён.
- Ад'язджаем, - адказаў бацька.
- Чаму раптам?
- Нам... прапануюць работу... добрую работу.
- Работу? Дзе ж гэта?
- Ну там... каля Ўідпэтча.
- Пачакайце, я на вас гляну. - Вартавы пасвяціў ліхтаром спачатку ў твар бацьку, потым дзядзьку Джону, тады Элу. - З вамі ж, здаецца, яшчэ адзін быў?
Эл сказаў:
- Гэта вы пра таго хлопца, якога мы падвезлі? Невысокі такі, бледны тварам?
- Ага, здаецца, так.
- Мы яго па дарозе падсадзілі. Ён яшчэ раніцай пайшоў, калі плату зрэзалі.
- Паўтары, які ён з сябе.
- Невысокі, бледны.
- А твар у яго сёння не быў разбіты?
- Я нічога такога не заўважыў, - адказаў Эл. - А бензазаправачная яшчэ адчыненая?
- Адчыненая. Да васьмі працуе.
- Усе садзіцеся ў машыну! - крыкнуў Эл. - Калі хочаце да раніцы паспець у Ўідпэтч, трэба спяшацца. Ты ў кабіну, ма?
- Не, я ззаду сяду, - адказала маці. - Бацька, ты таксама лезь сюды. А ў кабіне з Элам і дзядзькам Джонам паедзе Разашарна.
- Та, дай мне квіток, - сказаў Эл. - Вазьму на яго бензіну, калі размяняюць.
Вартавы глядзеў ім услед, пакуль машына не збочыла налева да бензакалонак.
- Два галоны, - сказаў Эл.
- Недалёка, відаць, едзеце.
- Ага, недалёка. Вы размяняеце мне гэты квіток?
- Ды не... не дазваляецца гэта.
- Паслухайце, містэр. Нам прапануюць добрую работу, трэба толькі паспець туды да ночы. А не паспеем, іншыя перахопяць. Будзьце ласкавы.
- Ну добра. Толькі перапішы яго на маё імя.
Эл выйшаў з кабіны і спераду абышоў свой «гудзон».
- Канешне, перапішу, - сказаў ён, адкруціў каўпачок і заліў у радыятар вады.
- Два, кажаш?
- Ага, два.
- Куды ж вы едзеце?
- На поўдзень. Там нам работу даюць.
- Сапраўды? Цяпер работы... сталай работы мала.
- У нас там прыяцель працуе, - сказаў Эл. - Там у нас пэўная работа. Ну, бывайце. - Грузавік развярнуўся і, падскокваючы на ўхабістай вулачцы, выехаў на гравійку. Жоўтае святло фар пагойдвалася над дарогай, правая фара паміргвала - недзе быў дрэнны кантакт. Пры кожным штуршку ў кузаве бразгаў і грукатаў нічым не замацаваны кухонны посуд.
Ружа Сарона ціха застагнала.
- Дрэнна сябе адчуваеш? - запытаўся дзядзька Джон.
- Ага. Увесь час сябе дрэнна адчуваю. Адпачыць бы дзе-небудзь у ціхім месцы. І чаго гэта мы паехалі, лепш дома засталіся б. Былі б дома, Коні з намі быў бы. Вывучыўся б на каго-небудзь і месца добрае атрымаў бы.
Эл і дзядзька Джон маўчалі. А што ёй скажаш пра Коні?
Каля пафарбаваных у белы колер варот фруктовай плантацыі да грузавіка падышоў вартаўнік.
- Зусім едзеце?
- Ага, - адказаў Эл. - Едзем на поўнач. Работу там атрымалі.
Вартаўнік накіраваў прамень ліхтара на машыну, падняў ліхтар вышэй і асвятліў брызентавы навес. Маці і бацька з халоднай абыякавасцю глядзелі проста на яркае святло.
- Добра. - Вартаўнік расчыніў вароты. Грузавік павярнуў налева і паехаў да шашы № 101, вялікай аўтастрады, што цягнулася з поўдня на поўнач.
- Ты ведаеш, куды ехаць? - запытаўся дзядзька Джон.
- Не, - адказаў Эл. - Еду абы-куды. Абрыдла мне ўсё гэта.
- У мяне ўжо хутка, - з пагрозай у голасе сказала Ружа Сарона. - Хоць бы добрае месца знайшлі.
У халодным начным паветры чулася ўжо дыханне першых замаразкаў. З фруктовых дрэў абапал дарогі пачынала ўжо ападаць лісце. Маці сядзела на паклажы, прыхіліўшыся спінай да бакавога борта, бацька сядзеў насупраць, тварам да яе.
Маці гукнула:
- Ну як там табе, Том?
Пачуўся прыглушаны голас:
- Цеснавата. Плантацыю ўжо праехалі?
- Ты там асцеражней. Нас могуць спыніць.
Том крыху падняў край матраца. У цемры грузавіка брынкнуў металічны посуд.
- Закрыцца паспею, - сказаў Том. - Толькі не хачу, каб мяне схапілі ў гэтай пастцы. - Ён прылёг, абапёршыся на локаць. - Чорт, і халаднавата ж стала, га?
- Хмары збіраюцца, - сказаў бацька. - Зіма, кажуць, ранняя будзе.
- А што, вавёркі высока на дрэвы забраліся ці насенне з травы асыпаецца? - хмыкнуў Том. - Якіх толькі прыкмет не навыдумляюць! Знойдзецца і спецыяліст - па сподніках надвор'е прадкажа.
- Ну, не ведаю, - сказаў бацька. - Я, здаецца, зіму ўжо чую. А каб цвёрда сказаць, трэба тут доўга пажыць.
- Куды мы едзем? - запытаўся Том.
- Хто яго ведае. Эл налева павярнуў. Здаецца, едзем той самай дарогай, па якой прыехалі.
Том сказаў:
- Ніяк не вырашу, што лепей. Калі ехаць па галоўнай шашы, больш палісменаў нам стрэнецца. Як убачаць мяне з такім тварам, адразу сцапаюць. Можа, па прасёлках ехаць?
Маці сказала:
- Стукні там Элу ў сценку. Няхай спыніцца.
Том пастукаў кулаком па кабіне, грузавік стаў на краі шашы. Эл вылез з кабіны і падышоў да задняга борта.
Руці і Ўінфілд вызірнулі з-пад коўдры.
- Ну, што там у вас? - запытаўся Эл.
Маці сказала:
- Трэба параіцца, як далей быць. Можа, лепш прасёлкамі ехаць. Так Том кажа.
- Гэта праз мой твар, - паясніў Том. - Могуць пазнаць. Першы ж фараон затрымае.
- Дык куды ж тады? Я думаў, на поўнач. Мы былі на поўдні.
- Так і трымай, - сказаў Том. - Толькі прасёлкамі.
Эл запытаўся:
- Можа, спынімся дзе-небудзь тут, пераначуем, а ранкам паедзем?
Маці паспешліва прагаварыла:
- Не, рана яшчэ. Трэба далей ад'ехаць.
- Добра. - Эл сеў за руль, і машына паехала далей.
Руці і Ўінфілд зноў накрыліся з галавой коўдрай. Маці крыкнула:
- Як там Уінфілд, нічога?
- Ага, нічога, - адказала Руці. - Ён спіць.
Маці зноў прытулілася да борта.
- Нейкае дзіўнае пачуццё - быццам на цябе палююць. Я злая стала.
- Усе азлобіліся, - сказаў бацька. - Усе. Ты бачыла, якая бойка сёння была ў садзе? Мяняюцца людзі. Ва ўрадавым лагеры злых не было.
Эл збочыў на гравійную дарогу, і жоўтыя агні фар загайдаліся над яе палатном. Фруктовыя дрэвы нарэшце скончыліся, пайшлі баваўняныя палі. Яшчэ дваццаць міль праехалі між бавоўніку, круцячы і пятляючы палявымі дарогамі. Далей дарога пацягнулася ўздоўж зарослай хмызам рэчкі, потым павярнула на бетонны мосцік і на другім баку зноў пайшла берагам. Нарэшце фары асвятлілі доўгі рад чырвоных таварных вагонаў без колаў і каля дарогі - вялікі шчыт з надпісам: «ПАТРАБУЮЦЦА ЗБОРШЧЫКІ БАВОЎНЫ». Эл запаволіў ход. Том глядзеў праз шчыліну між бакавымі планкамі. Праз чвэрць мілі пасля апошняга вагона Том пастукаў у сценку кабіны. Эл затармазіў машыну на абочыне і выйшаў.
- Ну, што яшчэ?
- Выключы матор і лезь сюды, - сказаў Том.
Эл сеў за руль, з'ехаў у кювет, выключыў фары і заглушыў матор. Потым залез на грузавік цераз задні борт.
- Так спакайней, - сказаў ён.
Том перабраўся цераз кацялкі і патэльні да маці і стаў на калені.
- Слухайце, - сказаў ён. - Ім патрэбны зборшчыкі бавоўны. Я плакат бачыў. Я ўсё думаў, як так зрабіць, каб і з вамі мне застацца, і бяды на вас не наклікаць. Калі твар зажыве, тады, можа, усё добра будзе, а цяпер небяспечна. Бачылі вагоны? У іх зборшчыкі жывуць. Магчыма, і вам праца знойдзецца. Можа б, вы наняліся тут, а жылі б у вагонах?
- А з табой як? - строга запыталася маці.
- Ты бачыла каля рэчкі густое кустоўе? Там можна схавацца, ніхто мяне не ўбачыць. А пад ноч будзеце прыносіць мне есці. Непадалёк ёсць маставая труба. Я мог бы там спаць.
Бацька сказаў:
- Госпадзі, як мне ўжо хочацца хутчэй узяцца за гэту бавоўну! Праца знаёмая.
- У вагонах, напэўна, добра, - сказала маці. - Чыста, суха. А ты думаеш, Том, у кустах у тых можна схавацца?
- Канешне. Па дарозе сюды я да іх прыглядаўся. Выберу добрае месца і адседжуся там. А як толькі зажыве твар, выйду.
- Шрам застанецца, - сказала маці.
- Чорт з ім, у каго іх няма?
- Аднаго разу я сабраў чатырыста фунтаў, - сказаў бацька. - Тады, праўда, ураджай быў добры. Калі мы ўсе пойдзем на збор, можна крыху грошай зарабіць.
- І тады мяса купім, - сказаў Эл. - А цяпер што рабіць будзем?
- Вернемся крыху назад і пераспім ноч у грузавіку, - сказаў бацька. - А раніцай пойдзем на працу. Я каробачкі нават у цемры бачу.
- А з Томам як? - запыталася маці.
- Ты пра мяне не думай, ма. Я вазьму з сабой коўдру. Калі паедзеце назад, уважліва глядзіце. Там ёсць маставая труба. Будзеце мне туды прыносіць хлеба ці бульбы або кашы - прынесяце і пакінеце, а я буду прыходзіць і браць.
- Ай!
- Па-мойму, ён разумна гаворыць, - сказаў бацька.
- Вядома, разумна, - настойваў Том. - А калі твар крыху зажыве, я выйду і таксама збіраць бавоўну буду.
- Што ж, добра, - згадзілася маці. - Толькі будзь асцярожны. Не пападзіся каму-небудзь на вочы.
Том прабраўся ў задні канец грузавіка.
- Я вазьму вось гэтую коўдру. Як назад паедзеце, ма, шукайце тую трубу.
- Толькі глядзі, не рызыкуй, - сказала маці ўмольна. - Будзь асцярожны.
- Буду, - сказаў Том. - Абавязкова. - Ён пералез цераз задні борт і пайшоў берагам. - Добрай ночы! - гукнуў ён.
Маці бачыла, як яго постаць злілася з цемрай і знікла ў хмызняку каля рэчкі.
- Дай бог каб усё добра скончылася, - прамовіла маці.
Эл запытаўся:
- Цяпер назад паедзем?
- Давай, - сказаў бацька.
- Ты толькі едзь паволі, - папрасіла маці. - Хачу ўбачыць тую трубу, пра якую ён гаварыў. Абавязкова трэба ўбачыць.
Дарога была вузкая, і Элу давялося добра паманеўраваць, перш чым ён развярнуў машыну. Ён паволі павёў яе назад да таварных вагонаў. Святло фар выхапіла з цемры сходкі каля шырокіх дзвярэй. У вагонах было цёмна. Навокал нідзе ні душы. Эл выключыў фары.
- Вы з дзядзькам Джонам лезьце наверх, - сказаў ён Ружы Сарона. - А я буду спаць у кабіне.
Дзядзька Джон памог Ружы Сарона пералезці цераз борт. Маці ссунула ў кучу посуд. Усе ўлегліся ў задняй частцы машыны, цесна прыціснуўшыся адзін да аднаго.
У адным з вагонаў, захліпаючыся, зайшлося плачам дзіця. Аднекуль выбег сабака і, прынюхваючыся да слядоў і сапучы, памалу абышоў вакол грузавіка Джоўдаў. З рэчкі даносілася ціхае цурчанне вады.
Патрабуюцца зборшчыкі бавоўны - плакаты ўздоўж дарогі, лісткі, аранжавыя лісткі: Патрабуюцца зборшчыкі бавоўны.
Сюды, па гэтай дарозе, напісана на іх.
Цёмна-зялёныя сцяблы ўжо задравянелі, ацяжэлыя каробачкі ўчэпіста трымаюць свой груз. Белае валакно выпірае з іх, як зерне з кукурузнага катаха.
Нам каб толькі рукамі дакрануцца да гэтых каробачак. Далікатна, кончыкамі пальцаў.
Я ўмелы зборшчык.
Вунь з кім трэба гаварыць, вунь з ім.
Хачу наняцца на збор бавоўны.
Мяшок ёсць?
Ды не, няма.
За мяшок - даляр. Вылічым з палучкі за першыя паўтараста фунтаў. Першы збор з поля - восемдзесят цэнтаў за сто фунтаў. Другі збор - дзевяноста. Вось табе мяшок. Адзін даляр. Калі цяпер грошай няма, вылічым з палучкі за першыя паўтараста фунтаў сабранай бавоўны. Цана правільная, сам разумееш.
Зусім правільная цана. Добры баваўняны мяшок, яго хопіць на ўвесь сезон. Калі ніз пратрэцца ад цягання, перавернеш другім канцом і зашыеш. Падраны канец разрэж. А калі парвуцца абодва канцы, палатно ж застанецца - добрае палатно! На трусікі пойдзе. Ці на начную кашулю. Ды што тут казаць, баваўняны мяшок - добрая рэч.
Прывяжы яго да пояса. Асядлай яго і цягні за сабой між ног. Спярша цягаць яго лёгка. Пальцы зрываюць пушыстыя галоўкі, рукі прабіраюцца ў мяшок, што ў цябе між ног. Малыя дзеці ідуць ззаду, ім баваўняных мяшкоў не даюць, няхай бяруць джутавы альбо кладуць у бацькоўскі. Пакрысе мяшок цяжэе, дык нахіліся, цягні наперад. Я майстар збіраць бавоўну. Пальцы самі ўсё робяць. А ты ходзіш па міжраддзі, перамаўляешся з суседзямі, часам спяваеш, пакуль мяшок яшчэ не вельмі цяжкі. Пальцы не памыляюцца. Пальцы - яны ведаюць. Вочы бачаць усё, але ты працуеш, нібы не гледзячы.
Перамаўляюцца цераз грады...
- У нашых краях была адна жанчына, імя яе называць не буду, і аднойчы яна раптам нарадзіла мурынчыка. Ніхто такога не чакаў. Мурына таго так і не знайшлі. А яна з тае пары так галавы і не падняла. А ўспомніў я пра яе таму... што яна была добрая зборшчыца.
Цяпер мяшок ацяжэў, цягай яго поцягам за сабой. Напніся і цягні яго, як ламавы конь. А дзеці збіраюць у бацькаў мяшок. Ураджай добры выдаўся тут. У нізінах, праўда, ствалы танчэйшыя - тонкія і дравяністыя. Нідзе такой бавоўны не бачыў, як тут, у Каліфорніі. Валакно доўгае - лепшай бавоўны ніколі не бачыў. Зямля пад ёй хутка гіне. Вось чалавек, напрыклад, наважыўся купіць сабе ўчастак... Не трэба купляць, арандуй яго. Калі зямля пад бавоўнай спустошыцца, пераедзеш на другое месца.
Людзі ланцугом ідуць па полі. Пальцы самі ўсё робяць. Дапытлівыя пальцы снуюць сярод лісця, знаходзяць каробачкі, табе і глядзець не трэба.
Я і сляпы мог бы збіраць, далібог. Чуццём каробачку знаходжу. Абіраю чыста, як мяцёлкай падмятаю.
Ну вось, мяшок поўны. Цяпер нясі яго на вагу. Спрачайся. Вагаўшчык кажа, ты камянёў наклаў. А сам ён што? Вага ў яго паказвае няправільна. Іншы раз ён праўду кажа - камяні ў мяшку ёсць. Іншы раз твая праўда - вага фальшывая. А бывае, што вы абодва маеце рацыю: і камяні ёсць, і вага фальшывая. Але заўсёды спрачайся, пярэч. Пасля гэтага чалавекам сябе адчуваеш. І ён сябе чалавекам адчувае. Што, там камяні? Можа, адзін які і трапіў туды. На чвэрць фунта цягне? Заўсёды спрачайся.
Назад з пустым мяшком. У нас свая кніжка. Запісваю вагу. Інакш нельга. Убачаць, што ты запісваеш, і не будуць махляваць. А калі сам адзначаць не будзеш, дык няхай бог табе паможа.
Работа добрая. Дзеці бегаюць на волі. А ты чуў пра бавоўнаўборачныя машыны?
Ага, чуў.
Думаеш, іх хутка ўвядуць?
Калі ўвядуць, тады, кажуць, ручному збору канец.
Вечарэе. Усе стаміліся. А папрацавалі добра. Мы тры даляры зарабілі - я, мая старая і дзеці.
Да баваўнянага поля пад'язджаюць машыны. Вырастаюць палаткі. Грузавікі з прычэпамі, зацягнутымі зверху сеткамі, набітыя белым пухам. Бавоўна чапляецца за драцяныя агароджы, ледзь падзьме ветрык, яна шарыкамі коціцца па дарозе. Чыстая белая бавоўна пойдзе ў бавоўнаачышчальныя машыны. Вялікія няроўныя цюкі стаяць, чакаючы, калі пойдуць пад прэс. Бавоўна прыстае да адзежы, засядае ў барадзе і вусах. Пачысці нос - у яго налезла бавоўны.
Хадзі згорбіўшыся, набівай мяшок, пакуль зусім не сцямнела. Мудрыя пальцы адшукваюць каробачкі. Сагнутыя ногі пераступаюць, валочачы мяшок. Дзеці змарыліся, ужо ж позні вечар. Спатыкаюцца аб грады. А сонца заходзіць.
Каб хоць яшчэ тут колькі часу папрацаваць. Грошы не бог ведае якія, а ўсё ж каб папрацаваць тут даўжэй.
Па шашы ўсё прыбываюць і прыбываюць старыя машыны - іх завабілі сюды лісткі на шчытах.
Баваўняны мяшок ёсць?
Няма.
Значыць, даляр з цябе.
Калі б нас было толькі пяцьдзесят чалавек, мы б тут папрацавалі даўжэй, але нас тут пяцьсот. Лічы, усё хутка скончыцца. Я ведаў аднаго - ён так і не выплаціў за мяшок. На кожнай плантацыі - новы мяшок, але пакуль ён набярэ патрэбную для першага разліку вагу, бавоўна ўжо ўся сабрана.
Збяры грошай хоць трохі, абавязкова! Зімой у Каліфорніі работы няма. Набівай мяшок, пакуль яшчэ відно. А вунь той, я заўважыў, падкінуў у мяшок два камякі зямлі.
Ну і што? Я толькі выпраўляю яго фальшывую вагу.
У мяне тут вось запісана - трыста дванаццаць фунтаў.
Усё правільна.
Глянь, ён мне і слова не сказаў! Няйначай, вага ў яго фальшывая. Што ж, дзянёк выдаўся ўдачны.
Кажуць, сюды едзе яшчэ тысяча чалавек. Заўтра за кожны рад будуць біцца. Выхопліваць каробачкі адзін у аднаго з-пад рук.
Патрабуюцца зборшчыкі. Чым больш зборшчыкаў, тым хутчэй у бавоўнаачышчальную машыну.
А зараз дамоў, у палявы лагер.
Божа мой, на вячэру ў нас сёння будзе бакавіна! Мы зарабілі на бакавіну! Вазьмі малога за руку, бачыш, як ён знясіліўся? Бяжы ў краму, вазьмі чатыры фунты бакавіны. Старая нам сёння напячэ смачных праснакоў, калі яшчэ на нагах трымаецца.
Таварныя вагоны, іх было дванаццаць, стаялі без колаў на невялікай паляне каля рэчкі, выстраіўшыся ў два рады, па шэсць у кожным, тарцамі адзін да аднаго. Ад вялікіх рассоўных дзвярэй ішлі ўніз сходкі - шчыты, збітыя з дошак. Нядрэннае жыллё - дахі не працякаюць, скразнякоў няма, і размясціліся тут дваццаць чатыры сям'і - па адной у кожнай палове вагона. Вокнаў не было, але шырокія дзверы стаялі расчыненыя. У некаторых вагонах паловы аддзяляліся адна ад адной брызентавым полагам, у астатніх мяжу адзначала лінія дзвярэй.
Джоўдаў пасялілі ў палове аднаго з крайніх вагонаў. Нехта з ранейшых жыхароў прыладзіў тут да газавага бітона пячную трубу і вывеў яе вонкі праз дзірку ў сценцы. У канцах вагона было цёмна нават пры адчыненых дзвярах, хоць яны і былі шырокія. Маці павесіла брызент пасярэдзіне вагона.
- Тут добра, - сказала яна. - Лепш нідзе не было, калі не лічыць урадавага лагера.
Кожны вечар яна раскладала на падлозе матрацы і кожную раніцу згортвала іх зноў. Кожны дзень яны ішлі на поле збіраць бавоўну, і кожны вечар у іх было мяса на вячэру. Аднае суботы яны з'ездзілі ў Туларэ і купілі там жалезную печку, новыя кабінезоны Элу, бацьку, Уінфілду і дзядзьку Джону і сукенку мацеры, а яе святочную сукенку аддалі Ружы Сарона.
- Яна так распаўнела, - сказала маці. - Купіць ёй новае - дарэмна грошы траціць.
Джоўдам пашчасціла. Яны прыехалі сюды ў час і паспелі заняць месца ў вагоне. Уся паляна была цяпер застаўлена палаткамі тых, хто прыехаў пазней, а тыя, хто жыў у вагонах, лічыліся старажыламі і ў нейкай ступені мясцовай арыстакратыяй.
Міма паляны цякла вузкая рэчка, то вынікаючы з вербняку, то зноў хаваючыся ў ім. Ад кожнага вагона да яе збягала добра ўтаптаная дарожка. Між вагонаў былі працягнуты вяроўкі, і кожны дзень на іх сушылася бялізна.
Аднойчы вечарам Джоўды вярталіся з поля, несучы пад пахай складзеныя баваўняныя мяшкі. Па дарозе зайшлі ў краму каля скрыжавання дарог. У краме было шмат пакупнікоў.
- Ну, колькі сёння?
- Зарабілі някепска. Тры даляры з паловай. Даўжэй бы тут затрымацца. З малых добрыя зборшчыкі выйдуць. Маці сшыла ім кожнаму па мяшэчку. Вялікія ім цягаць не пад сілу. Набяруць у свае і высыпаюць у нашы. Са старых кашуль сшыла. Добра працуюць - стараюцца.
Маці падышла да мяснога прылаўка, паднесла палец да губ, падзьмула на яго, засяроджана разважаючы.
- Я ўзяла б свіных адбіўных, - сказала яна. - Па чым яны?
- Трыццаць цэнтаў фунт, мэм.
- Дайце тры фунты. І яшчэ супавага мяса які-небудзь добры кавалак. Заўтра дачка мая зварыць. І бутэльку малака ёй. Яна страшэнна яго любіць. Чакае дзіцяці. Медсястра сказала ёй больш малака піць. Так, што яшчэ?.. Не, бульба ў нас ёсць.
З бляшанкай сіропу ў руцэ да яе падышоў бацька.
- Возьмем гэта, - сказаў ён. - Да аладак.
Маці нахмурылася:
- Ага, так, што ж... бяры. Вось яшчэ гэта палічыце. Так... лярду ў нас хопіць.
Падышла Руці з двума вялікімі пачкамі сухога таннага печыва - у запытальным позірку туга, і ад таго, ці кіўне маці галавой, ці адмоўна пакруціць ёю, туга гэтая магла перарасці ў роспач ці змяніцца радасным узрушэннем.
- Ма? - Руці падняла абодва пачкі, паказваючы іх і зверху і знізу, каб яны і маці спадабаліся.
- Пакладзі на месца...
У вачах у Руці затрымцела роспач. Бацька сказаў:
- Яны ўсяго па пяць цэнтаў. Малыя сёння добра папрацавалі.
- Што ж, - сказала маці, і ў вачах у Руці засвяцілася радасць, - добра.
Руці павярнулася і кінулася да выхаду. Па дарозе яна схапіла Ўінфілда і пацягнула яго на двор, у вячэрняе сутонне.
Дзядзька Джон памацаў пальцамі парусінавыя пальчаткі з нашыўкамі з жоўтай скуры на далонях, прымерыў іх, зняў і паклаў на месца. Потым спакваля наблізіўся да паліц са спіртным і паглыбіўся ў вывучэнне этыкетак на бутэльках. Маці заўважыла гэта.
- Бацька, - сказала яна і крутнула галавой у бок дзядзькі Джона.
Бацька няспешна падышоў да яго.
- Што, Джон, у горле перасохла?
- Ды не.
- Пацярпі да канца збору. Тады хоць бочкамі пі.
- А мне не к спеху, - сказаў дзядзька Джон. - Працую старанна, сплю добра. Сны мяне не мучаюць.
- Я бачу, ты вачэй не можаш адвесці ад бутэлек.
- Я іх амаль не заўважаю. Дзіўная рэч - хочацца ўсё ўсялякае купіць. Нават такое, што мне і не трэба. Вось, напрыклад, бяспечную брытву. Ці вунь тыя пальчаткі. Усё вельмі таннае.
- Бавоўну ж у пальчатках не збіраюць.
- Ведаю. Бяспечная брытва мне таксама без патрэбы. Але тут усё так выстаўлена, што, трэба табе ці не трэба, а так і падмывае купіць.
Маці крыкнула ім:
- Пайшлі. Цяпер у нас усё ёсць. - У руках у яе была сумка. Дзядзька Джон і бацька ўзялі кожны па пакунку. За дзвярамі іх чакалі Руці і Ўінфілд - вочы выпучаныя, твары ўспухлі ад набітага за абедзве шчакі печыва.
- Ну вось, цяпер вячэраць не будуць, - сказала маці.
Да лагера сыходзіўся народ. У палатках загарэліся ліхтары. З пячных труб валіў дым. Джоўды падняліся па сходках у вагон і прайшлі ў сваю палову. Каля печкі, у якой ужо гарэў агонь, сядзела на скрынцы Ружа Сарона. Жалезныя сценкі печкі распаліліся дачырвана.
- Малака купілі? - патрабавальна запыталася Ружа Сарона.
- Купілі. Вось.
- Дай мне. З самага поўдня не піла.
- Яна думае, што гэта як лекі.
- Мне нянечка так гаварыла.
- Бульбы нарыхтавала?
- Ага, аблупіла.
- Дык падсмаж яе, - сказала маці. - Я свіных адбіўных купіла. Нарэж скрылікамі на новую патэльню. І цыбулі туды. А вы, мужчыны, ідзіце памыйцеся і вядро вады прынясіце. Дзе Руці з Уінфілдам? Няхай і яны памыюцца. Мы ім купілі печыва, - сказала маці Ружы Сарона. - Кожнаму цэлы пачак.
Мужчыны пайшлі да рэчкі мыцца. Ружа Сарона нарэзала на новую патэльню бульбы і перамяшала яе канцом нажа.
Раптам канец брызентавай занавескі задраўся, і ў палову Джоўдаў зазірнуў тоўсты спацелы твар.
- Ну, як сёння ў вас, місіс Джоўд?
Маці абярнулася.
- А, гэта вы! Добры вечар, місіс Уэйнрайт. Зарабілі добра. Тры даляры з паловай. Дакладней - тры пяцьдзесят сем.
- А мы - чатыры даляры.
- Правільна. У вас народу больш.
- Ага. Джанас на вачах падрастае. У вас, я бачу, сёння свіныя адбіўныя.
Уінфілд прашмыгнуў у дзверы.
- Ма!
- Памаўчы хвілінку. Так, мае мужчыны любяць адбіўныя.
- А я бекон падсмажваю, - сказала місіс Уэйнрайт. - Чуеце пах?
- Не. У мяне цыбуля ў бульбе - усё перабівае.
- Ой, падгарэла! - крыкнула місіс Уэйнрайт, і галава яе знікла.
- Ма, - зноў сказаў Уінфілд.
- Ну, што табе? Аб'еўся печыва?
- Ма, Руці расказала.
- Што расказала?
- Пра Тома.
Вочы ў маці зрабіліся вялікія.
- Расказала? - Маці апусцілася перад Уінфілдам на калені. - Уінфілд, каму?
Хлопчык сумеўся і адступіў назад.
- Яна толькі крышачку расказала.
- Уінфілд! Скажы, што яна гаварыла?
- Яна... Яна печыва сваё не адразу ўсё з'ела. У пачку яшчэ трохі засталося. Адкусвае кавалачак за кавалачкам і паволі жуе і кажа мне: «А ты ўжо шкадуеш, што з'еў усё дарэшты».
- Уінфілд! - павысіла голас маці. - Гавары адразу. - Яна трывожна азірнулася на занавеску. - Разашарна, ідзі, дачушка, пагавары пра што-небудзь з місіс Уэйнрайт, каб яна не падслухала.
- А бульба?
- Я сама пагляджу. Ідзі ж! А то яна падслухоўваць будзе.
Цяжка валочачы ногі, Ружа Сарона пайшла за брызент. Маці сказала:
- Ну, Уінфілд, гавары.
- Я ж гавару. Адкусвае кавалачак за кавалачкам, потым кожнае печыва стала напапалам ламаць, каб даўжэй хапіла.
- Не цягні, гавары!
- А тут дзеці падбеглі, ім таксама захацелася печыва, але Руці грызе яго і грызе і нікога не частуе. Тады яны ўзлаваліся, і адзін хлопчык выхапіў у яе з рук увесь пачак, і ўсе дзеці разбегліся.
- Ты не пра гэта, Уінфілд, ты пра іншае расказвай!
- Я і расказваю. Руці таксама ўзлавалася і пабегла за імі, аднаго ўдарыла, другога, і тады яе адна вялікая дзяўчынка набіла. Руці заплакала і кажа: «Я свайго старэйшага брата паклічу, і ён заб'е цябе». А дзяўчынка тая: «Заб'е? У мяне таксама ёсць старэйшы брат». - Уінфілд ледзь паспяваў пераводзіць дыханне. - Яны пачалі біцца, і бальшуха тая добра ёй усыпала, і Руці сказала, што наш брат заб'е яе брата. А дзяўчынка кажа: «А што, калі мой брат заб'е твайго?» І тады... тады Руці сказала, што наш брат дваіх ужо забіў. А... а тая бальшуха кажа: «Ого! Манюка ты, больш ніхто». А Руці сказала: «Ого? Наш брат цяпер хаваецца, бо забіў чалавека, і твайго брата таксама заб'е». І тады яны пачалі абзываць адна адну рознымі словамі, Руці кінула ў бальшуху камень, і тая пагналася за Руці, а я сюды пабег.
- А мой ты божанька!. Дзіцятка святое ў калысцы! - разгублена ўсклікала маці. - Што ж нам цяпер рабіць? - Яна прыціснула далонь да лба і пацерла пальцамі вочы. - Што ж рабіць цяпер? - Ад печкі, у якой шумна гарэў агонь, пацягнула пахам падгарэлай бульбы. Маці машынальна паднялася і памяшала ў патэльні. - Разашарна! - крыкнула яна. - Ружа Сарона выйшла з-за брызенту. - Глядзі вячэру. А ты, Уінфілд, збегай знайдзі Руці і вядзі яе сюды.
- Ты яе адлупцуеш, ма? - з надзеяй у голасе запытаўся Ўінфілд.
- Не. Лупцоўкай справы не паправіш. І трэба ж было ёй прабалбатацца. Цяпер лупцуй не лупцуй - усё адно. Дык бяжы ж, знайдзі яе і сюды прывядзі.
Уінфілд кінуўся да дзвярэй, наткнуўся на мужчын, якія падымаліся па сходках, і адступіў убок, прапускаючы іх.
Маці ціха сказала:
- Бацька, трэба параіцца. Руці расказала дзецям пра Тома.
- Што?
- Пабілася з імі і ўсё расказала.
- Во паскудніца!
- Яна не наўмысна. Слухай, бацька, ты пабудзь тут, а я паспрабую знайсці Тома, скажу яму. Трэба яго папярэдзіць, няхай сцеражэцца. Ты адсюль нікуды не ідзі, паглядзі, што тут будзе. Я і есці яму занясу.
- Добра, - згадзіўся бацька.
- Ты нічога Руці не кажы. Я сама ёй растлумачу.
У гэты момант у вагон увайшла Руці, за ёю - Уінфілд. Дзяўчынка была ўся перапэцканая. Куточкі перасохлых губ зліпаліся, з пабітага носа яшчэ сачылася кроў. Выгляд у яе быў спалоханы і засаромлены. Твар Уінфілда пераможна ззяў. З-пад ілба азіраючыся, Руці пайшла ў самы кут вагона і села там спінай да сцяны. Сорам і злосць адначасова валодалі ёю.
- Я сказаў ёй, што яна нарабіла, - абвясціў Уінфілд.
Кладучы на алавяную талерку дзве адбіўныя і смажаную бульбу, маці сказала:
- Маўчы, Уінфілд. Не трэба яе больш чапаць, ёй і так дасталося.
Маленькая постаць кінулася да маці. Дзяўчынка абхапіла яе за талію, уткнулася тварам у жывот і ўся затрэслася ад рыданняў. Маці спрабавала вызваліцца, але мурзатыя пальцы ўчэпіста трымалі яе. Маці пяшчотна правяла рукой па валасах дзяўчынкі і паляпала яе лёгенька па плячы:
- Кінь плакаць. Ты ж не наўмысна.
Руці падняла да маці брудны твар са слядамі слёз і крыві.
- Яны забралі маё печыва! - усклікнула яна. - А гэтая бальшуха, сукіна дочка, набіла мяне... - І зноў зарыдала.
- Маўчы! - сказала маці. - Не гавары такіх слоў. Ну, пусці. Мне ісці трэба.
- Што ж ты яе не адлупцуеш, ма? Калі б яна не хвалілася сваім печывам, нічога б не было. Ну, дай ёй лупцоўкі.
- А вы, містэр, не суньце носа ў чужое проса, - узлавалася на Ўінфілда маці. - Глядзі, каб цябе самога не адлупцавалі. Ну, пусці, дачушка.
Уінфілд рэціраваўся да скручанага матраца і адтуль скіраваў на сваіх сямейнікаў халодны, скептычны позірк. Ён заняў зручную для абароны пазіцыю, бо быў упэўнены, што пры першай магчымасці Руці накінецца на яго. Але Руці, прыбітая горам, ціха адышла ў далёкі кут вагона.
Маці закрыла алавяную талерку газетай.
- Ну, я пайду, - сказала яна.
- А сама не павячэраеш? - запытаўся дзядзька Джон.
- Потым. Як вярнуся. Цяпер не хочацца. - Маці пайшла да расчыненых дзвярэй і асцярожна спусцілася па крутых сходках.
На паляне, паміж вагонамі і рэчкай, палаткі стаялі шчыльна адна да адной, адцяжкі іх перапляталіся, калкі былі ўвагнаныя ў зямлю ўсутыч. Праз брызент прасвечвала святло, з усіх труб ішоў густы дым. Мужчыны і жанчыны, стоячы каля ўваходных праёмаў, перамаўляліся між сабой. Дзеці як апантаныя насіліся навокал. Маці велічна ішла ўздоўж лініі палатак. Час ад часу хто-небудзь яе пазнаваў.
- Добры вечар, місіс Джоўд.
- Добры вечар.
- Несяце выкідаць, місіс Джоўд?
- Пазычыла хлеба ў знаёмых. Трэба аддаць.
Нарэшце палаткі засталіся ззаду. Маці спынілася і азірнулася. Лагер выдаваў сябе цьмяным водсветам ліхтароў, чуўся глухі гул галасоў, час ад часу яго пераразаў чый-небудзь гучны вокліч. Паветра патыхала дымам. Нехта ціха іграў на губным гармоніку, стараючыся развучыць мелодыю, і паўтараў адну і тую музычную фразу.
Маці ўвайшла ў вярбняк на беразе рэчкі. Потым збочыла са сцежкі, села на зямлю і затаілася, прыслухоўваючыся, ці не ідзе хто следам. Наперадзе на сцежцы паказаўся мужчына, які ішоў да лагера, на хаду накідваючы на плечы падцяжкі і зашпільваючы штаны. Маці сядзела нерухома, і, праходзячы міма, мужчына яе не заўважыў. Пачакаўшы яшчэ хвілін пяць, яна паднялася з зямлі і асцярожна выйшла на сцежку, што цягнулася берагам. Маці ступала ціха, так ціха, што шолах апалага лісця ў яе пад нагамі не заглушаў цурчання вады. Сцежка і рэчка павярнулі налева, потым зноў направа і нарэшце вывелі яе да шашы. Пры шэрым святле зорак маці ўбачыла дарожны насып і круглую чорную адтуліну маставой трубы, каля якой яна заўсёды пакідала ежу Тому. Яна асцярожна падышла да трубы, усунула сваю ношу ў адтуліну і ўзяла пустую алавяную талерку, што там стаяла. Потым ціхенька вярнулася ў вярбняк, прабралася ў самы гушчар і, сеўшы, стала чакаць. Скрозь блытаніну вецця ёй відаць была чорная пашча трубы. Маці абняла калені рукамі і застыла ў чаканні. Неўзабаве жыццё ў зарасніку зноў ажыло. Палявыя мышы крадком прабіраліся сярод лісця. Па сцяжынцы бязбоязна пратупаў скунс, ад якога слаба патыхнула смуродам. А потым вецер лёгенька, быццам прымерваючыся, варухнуў вербы, і на зямлю залатым дажджом пасыпалася лісце. І раптам у зарасніку нібы закіпела, моцны парыў ветру страсянуў дрэвы, і лісце хлынула ліўнем на дол. Маці адчувала, як яно апускаецца ён на валасы і на плечы. Па небе плыла пухлая чорная хмара, адну за адной сціраючы зоркі. Буйныя кроплі дажджу бязладна пасыпаліся ўніз, застукалі па апалай лістоце, а хмара пасунулася далей, і зноў загарэліся зоркі. Маці зябка пакурчылася. Вецер памчаўся далей, і ў гушчары стала ціха, але ніжэй па рэчцы яшчэ чуўся шолах лісця. З лагера данесліся высокія, пранізлівыя гукі скрыпкі, на якой нехта падбіраў мелодыю.
Маці пачула асцярожлівыя крокі недзе злева ад сябе і ўся напялася. Яна расшчапіла рукі на каленях і падняла галаву, прыслухоўваючыся. Шоргат сціх і толькі праз доўгі час пачуўся зноў. Па сухім лісці рэзка скрабянула ніцая лаза, і маці ўбачыла, як цёмная чалавечая постаць выбралася з гушчару і падышла да маставой трубы. Круглая чорная адтуліна на момант знікла, потым чалавек павярнуў назад. Маці ціха клікнула яго:
- Том!
Чалавек застыў на месцы, ён так знерухомеў і так нізка прыгнуўся да зямлі, што яго можна было прыняць за пень. Яна зноў паклікала:
- Том! Том! - І толькі тады постаць варухнулася.
- Гэта ты, ма?
- Я. Я тут. - Маці паднялася з зямлі і пайшла насустрач сыну.
- Не трэба было чакаць мяне, - сказаў Том.
- Я мусіла, Том. Трэба пагаварыць.
- Сцежка зусім блізка. Хто-небудзь можа тут прайсці.
- А хіба ў цябе няма якога-небудзь месца, Том?
- Ёсць... але... раптам хто-небудзь убачыць цябе са мной... тады ўся сям'я трапіць у бяду.
- Я мусіла дачакацца цябе, Том.
- Ну дык ідзі за мной. Толькі цішэй. - Ён асцярожна перайшоў уброд нешырокую рэчку, маці ішла за ім. Ён павёў яе праз густы лазняк, і абое выйшлі да баваўнянага поля і пайшлі ўскрай яго. На градах выразна абазначаліся пачарнелыя сцяблы бавоўніку, да якіх дзе-нідзе прычапіліся пушыстыя касмылі бавоўны. Яны прайшлі краем поля яшчэ чвэрць мілі, а потым Том зноў павярнуў у зараснік. Там ён падышоў да вялікай купы ажынніку, нахіліўся і адвёў убок густа пераплеценае вецце.
- Давядзецца паўзком, - сказаў ён.
Маці стала на карачкі. Яна адчула пад рукамі пясок, папаўзла, кусты расступіліся і ўжо не дакраналіся да яе, потым рукі яе намацалі коўдру. Том зноў прыкрыў веццем уваход, і ў схованцы стала зусім цёмна.
- Ты дзе, ма?
- Я тут. Цішэй, Том.
- Нічога, не хвалюйся. Я ўжо прывык - жыву тут, як трус.
Яна пачула, як ён знімае паперу з алавянай талеркі.
- Свіныя адбіўныя, - сказала маці. - І смажаная бульба.
- А божачкі, яшчэ і цёпленькія!
Яна не магла разгледзець сына ў цемры, але чула, як ён адкусвае мяса, жуе і глытае.
- Тут у мяне добрая схованка, - сказаў Том.
Маці нерашуча пачала:
- Том... Руці ўсё выбалбатала. - Яна пачула, як Том папярхнуўся.
- Руці? А чаму?
- Яна невінаватая. Пабілася з нейкай дзяўчынкай і прыгразіла ёй: мой брат наб'е твайго брата. Ты ж ведаеш - дзеці. І яшчэ сказала, што яе брат забіў чалавека і цяпер хаваецца.
Том слухаў і пахіхікваў.
- А я калі быў хлапчуком, дык заўсёды страшыў усіх дзядзькам Джонам, толькі ён не хацеў заступацца. Тут нічога такога.
- Не, Том, - запярэчыла маці. - Дзеці раскажуць адно аднаму, дойдзе да дарослых, тыя таксама пачнуць усім расказваць, а там, глядзіш, людзі пойдуць шукаць. Том, табе нельга тут заставацца.
- Я з самага пачатку так думаў. Я ўвесь час баюся - убачаць, што ты ежу сюды носіш, і высачаць.
- Ведаю. Але мне хацелася, каб ты быў недзе паблізу. Баялася за цябе. Я там так і не разгледзела твой твар, не бачу яго і тут. Як у цябе з ім?
- Нічога, зажывае.
- Пасунься бліжэй, Том. Дай я памацаю. Давай бліжэй. - Том падпоўз да маці. Рука яе знайшла ў цемры яго галаву, пальцы апусціліся ніжэй, памацалі нос, потым левую шчаку. - Шрам вялікі, Том, на носе ўпадзіна.
- Можа, гэта і на лепшае. Ніхто мяне, магчыма, не пазнае. Каб там у іх не было адбіткаў маіх пальцаў, зусім было б добра. - Том зноў узяўся за сваю вячэру.
- Ш-ш... - сказала маці. - Слухай!
- Гэта вецер. Усяго толькі вецер.
Парыў ветру пранёсся ўніз па рэчцы, і дрэвы на беразе зашумелі веццем.
Маці падсунулася яшчэ бліжэй на голас Тома.
- Дай мне, Том, яшчэ раз дакрануцца. Я як сляпая, так тут цёмна. Хачу запомніць, няхай хоць пальцы памятаюць. Выбірайся адсюль, Том.
- Я хацеў гэта зрабіць з самага пачатку.
- Мы добра зарабілі, -сказала маці. - Я крыху адклала. Бяры. Тут сем даляраў, Том.
- Я не вазьму. Не трэба, абыдуся і так.
- Падай руку, Том. Я начамі спаць не буду, калі ты не возьмеш. Раптам трэба будзе на аўтобусе праехаць ці што-небудзь такое. Я хачу, каб ты апынуўся далёка адсюль - за трыста, за чатырыста міль.
- Не вазьму.
- Том, - строга прамовіла маці. - Ты возьмеш грошы. Чуеш? Ты не маеш права прычыняць мне боль.
- Навошта ты так, ма?
- Я ўсё думала: можа, ты трапіш у вялікі горад. У Лос-Анжэлес, напрыклад. Там шукаць цябе не будуць.
- Гм... - хмыкнуў Том. - Паслухай, ма. Вось я хаваюся тут, сяджу дзень і ноч адзін. Ведаеш, пра каго я ўвесь час думаю? Пра Кейсі! Ён многа разглагольстваваў. І часта дакучаў мне гэтым. Але цяпер я думаю пра тое, што ён казаў, і прыгадваю кожнае яго слова. Ён расказваў, што аднойчы пайшоў ад людзей у пустыню, каб пазнаць сваю душу, а аказалася, што сваёй асобнай душы ў яго няма. Яму адкрылася, што ёсць адна вялікая душа, і толькі часцінка яе належыць яму. Пустыня, кажа, благое месца, бо часцінка гэтая павінна зліцца з усім астатнім у адно цэлае. Дзіўна, я ўсё памятаю. А тады, здаецца, нават і не слухаў яго. Але цяпер сам зразумеў: чалавеку аднаму жыць нядобра.
- Ён быў добры, - сказала маці.
Том гаварыў далей:
- Неяк раз ён пачаў шпарыць па Пісанні, але там зусім не было нічога пра пякельны агонь і ўсякія жахі. Ён двойчы паўтарыў, і я запомніў. З Эклезіяста, сказаў ён.
- А пра што там, Том?
- А вось: «Дваім лепш, чым аднаму, таму што ў іх ёсць добрая ўзнагарода за працу іхнюю. Бо калі ўпадзе адзін, другі падыме таварыша свайго. Але гора таму, хто будзе адзін, калі ўпадзе, бо другога няма, каб памагчы яму падняцца».
- Далей, Том, - сказала маці. - Гавары далей.
- Яшчэ толькі крышачку засталося. «І зноў-такі, калі ляжаць двое, цёпла ім, а аднаму як сагрэцца? І калі хто пачне адольваць аднаго, двое ўстаяць супраць яго. І ўтрая звітая нітка не хутка парвецца».
- Гэта з Пісання?
- Так Кейсі сказаў. Кажа - Эклезіяст.
- Ш-ш... Чуеш?
- Гэта вецер, ма. Вецер, я ведаю. І вось што я яшчэ думаў, ма: у пропаведзях часцей за ўсё пра бедных гаворыцца, пра тое, што яны будуць заўсёды, і што калі ў цябе нічога няма, дык ты проста сядзі склаўшы рукі і пашлі ўсё к чорту - калі памрэш, табе на тым свеце падносіць будуць марожанае на залатым сподачку. А ў Эклезіяста гэтага сказана іншае: дваім больш адплаціцца за працу іхнюю.
- Дык што ты вырашыў рабіць, Том?
Ён доўга маўчаў.
- З галавы не выходзіць урадавы лагер - як там усё было, як людзі там самі пра сябе клапаціліся. Калі раптам распачнецца бойка, самі ўсё ўладзяць, і ніякіх табе палісменаў, ніхто рэвальверам не тыцкае, а парадак лепшы, чым з палісменамі. Зразумець не магу, чаму паўсюль так не могуць зрабіць? Прагнаць палісменаў - яны нам чужыя. Будзем усе разам працаваць сабе на карысць - гаспадарыць на сваёй зямлі.
- Што ж ты вырашыў рабіць, Том? - паўтарыла сваё пытанне маці.
- Тое, што і Кейсі.
- Але ж яго забілі.
- Забілі. Ён не паспеў ухіліцца ад удару. Супраць закону ён не ішоў, ма. Я тут страшэнна многа думаў. Пра ўсіх нас думаў. Вось мы жывём, як свінні, а побач добрая, урадлівая зямля ляжыць неўзараная альбо ў яе адзін гаспадар на мільён акраў, а сотня тысяч працавітых земляробаў жыве ўпрогаладзь. А што, думаю, калі ўсім нам сабрацца і закрычаць, як тыя крычалі, каля садовай плантацыі Гупера, толькі іх там было мала...
Маці сказала:
- Цябе зацкуюць, Том, як дзікага звера. Як з Флойдам было.
- Цкаваць усё роўна будуць. Увесь наш народ зацкаваны.
- Больш ты нікога не заб'еш, Том?
- Ну што ты. Я вось пра што думаю: раз я ўжо на ўцёках, дык, можа, мне... Чорт, я яшчэ не ва ўсім разабраўся. Ты цяпер мяне не трывож. Не трывож мяне, ма.
Яны памаўчалі, седзячы ў чорнай, як вугаль, цемры пад кустамі. Потым маці сказала:
- Як жа я пра цябе даведаюся? Цябе могуць забіць, а я нічога ведаць не буду. Ці пакалечаць. Як я даведаюся?
Том нявесела засмяяўся:
- Можа, Кейсі праўду казаў: у чалавека сваёй душы няма, а ёсць толькі часцінка адной агульнай душы... Значыць, тады...
- Што тады, Том?
- Тады ўсё добра. Тады ты і ў цемры мяне адчуеш. Я буду паўсюль - куды ты ні глянеш. Калі галодныя падымуцца на змаганне за кавалак хлеба, я з імі буду. Дзе палісмен замахнецца дубінкай, там буду я. Калі Кейсі ведаў, што гаворыць, значыць, я буду і з тымі, хто не сцерпіць і закрычыць... Я буду разам з дзецьмі смяяцца і радавацца, калі, прагаладаўшыся, яны прыбягуць дамоў і ўбачаць на стале вячэру. І калі нашы людзі будуць есці тое, што яны самі вырасцілі, будуць жыць у дамах, якія самі пабудавалі, - там буду і я. Разумееш? Божа мой, я загаварыў зусім як Кейсі! Гэта таму, што многа пра яго думаю. Часам мне здаецца, што я бачу яго перад сабой.
- Не разумею, пра што ты гаворыш. Не разбяруся.
- Я таксама яшчэ не зусім разабраўся, - сказаў Том. - Такія ў мяне думкі. Калі сядзіш на адным месцы, столькі ўсяго ў галаву лезе. Табе час ужо вяртацца, ма.
- Дык ты грошы вазьмі.
Том памаўчаў.
- Добра, - сказаў ён.
- Том, а потым... калі ўсё ўляжацца, ты вернешся? Ты знойдзеш нас?
- Ну вядома, знайду. А цяпер ідзі. Дай руку. - Том памог маці знайсці выхад. Пальцы яе моцна ўчапіліся ў яго запясце. Ён адвёў убок вецце і вылез за ёю. - Дойдзеш да поля, ідзі краем да явара, а там пераходзь рэчку. Бывай.
- Бывай, - сказала маці і шпарка пайшла прэч. У вачах у яе стаялі слёзы, але яна не плакала. Яна ішла праз зараснік, не тоячыся, пад яе нагамі шумна шамацела лісце. З цёмнага неба пасыпаў дождж, рэдкія, буйныя кроплі цяжка пляскалі па сухім лісці. Маці спынілася, пастаяла ў мокрым гушчары і павярнула назад - зрабіла тры крокі да вялікай купы ажынніку і раптам рэзка павярнула і пайшла ў лагер. Перабраўшыся цераз рэчку, яна выйшла да маставой трубы і па насыпе паднялася на шашу. Дождж сціх, але хмары засцілалі неба. Раптам яна пачула за спінай крокі і апасліва абярнулася. На дарозе цьмяна памільгваў агеньчык кішэннага ліхтарыка. Маці пайшла далей, Неўзабаве яе дагнаў нейкі чалавек. З далікатнасці ён не пасвяціў ёй у твар, а скіраваў прамень ліхтарыка на зямлю.
- Добры вечар, - павітаўся чалавек.
- Добрага здароўя, - адказала маці.
- Відаць, дажджы пачынаюцца.
- Не хацелася б. Спыніцца збор бавоўны. А нам трэба збіраць.
- І мне таксама трэба. Вы з гэтага лагера?
- Так, сэр.
Яны ішлі ў нагу.
- У мяне дваццаць акраў пад бавоўнай. Я крыху запазніўся з сяўбой, але цяпер бавоўна паспела ўжо. Дай, думаю, схаджу ў лагер, можа, зборшчыкаў знайду.
- Знойдзеце, вядома. У нас збор ужо да канца падыходзіць.
- Вось і добра. Да мяне ўсяго адна міля адсюль.
- Нас шасцёра, - сказала маці. - Трое мужчын, я і двое дзяцей.
- Я павешу аб'яву. За дзве мілі ад лагера на гэтай шашы.
- Мы раніцай прыедзем.
- Толькі каб дажджу не было.
- Ага. Дваццаць акраў абабраць нядоўга.
- Чым хутчэй, тым лепш. Запазнілася мая бавоўна. Зацягнуў я з пасадкай.
- А колькі вы плаціце, містэр?
- Дзевяноста цэнтаў.
- Мы пойдзем на збор. Кажуць, у наступным годзе семдзесят пяць будуць плаціць, а то і шэсцьдзесят.
- Я таксама такое чуў.
- Дабром гэта не скончыцца, - сказала маці.
- Вядома. Я сам ведаю. У такой драбязы, як я, выбару няма. Плату ўстанаўлівае Асацыяцыя, а з ёю не лічыцца нельга. Не палічышся - прапала твая ферма. На дробных гаспадароў увесь час наступаюць.
Яны падышлі да лагера.
- Мы пойдзем да вас, - сказала маці. - У нас тут бавоўны зусім ужо мала засталося. - Яна збочыла да крайняга вагона і паднялася па сходках. Цьмянае святло ліхтара кідала змрочныя цені навокал. Бацька, дзядзька Джон і трэці - пажылы мужчына сядзелі на кукішках, прыхінуўшыся да сцяны.
- Хэло, - сказала маці. - Добры вечар, містэр Уэйнрайт.
Уэйнрайт падняў галаву. Рысы твару ў яго былі тонкія, быццам вытачаныя, вочы сядзелі глыбока пад густымі брывамі. Мяккія сівыя валасы адлівалі блакітам. Чэрненае срэбра барады закрывала яго скулы і падбародак.
- Вечар добры, мэм, - адказаў ён.
- Заўтра пойдзем на збор, - паведаміла маці. - Каля мілі на поўнач адсюль. Дваццаць акраў.
- Відаць, лепш паехаць на грузавіку, - сказаў бацька. - Раней прыедзем - больш збяром.
Уэйнрайт парывіста ўскінуў галаву:
- А што, калі і нам пайсці?
- Канешне. Мы з гаспадаром разам ішлі сюды. Яму патрэбны зборшчыкі.
- Тут ужо мала што засталося. Другі раз амаль няма чаго збіраць. Нічога не заробіш. З першага разу ўсё падчыстую бяруць.
- Вы з намі можаце паехаць, - прапанавала маці. - Бензін папалам.
- Вось гэта па-сяброўску, мэм.
- І нам і вам выгада, - сказала маці.
Бацька сказаў:
- У містэра Ўэйнрайта праблема - прыйшоў да нас на раду. Мы тут сядзелі, разважалі.
- А што такое?
Уэйнрайт апусціў вочы.
- Ды вось Эгі, - сказаў ён. - Падрасла дзяўчына... шаснаццаты год канчаецца, зусім дарослая стала.
- Эгі ў вас прыгожанькая, - сказала маці.
- А ты перш паслухай, - абарваў яе бацька.
- Эгі і ваш Эл кожны вечар гуляюць. Эгі дзяўчына здаровая, нармальная, ёй мужа трэба, а то бяды чакаць нядоўга. У нас у сям'і ніколі нічога такога не было. А цяпер мы жывём у нястачы. Вось мы з місіс Уэйнрайт і непакоімся. Што, калі бяда з ёю здарыцца?
Маці расклала матрац і села на яго.
- Яны разам гуляць пайшлі? - запыталася яна.
- Заўсёды разам, - адказаў Уэйнрайт. - І так кожны вечар.
- Гм... Што ж, Эл хлопец добры. Пеўнік - гэта ў ім трохі ёсць, але хлопец ён добры, стойкі. Я лепшага сына і не хацела б.
- На Эла мы і не скардзімся! Як чалавек ён нам падабаецца. Але чаго мы з жонкай баімся... разумееце, Эгі ўжо дарослая дзяўчына. Вось мы куды-небудзь адлучымся ці вы, а вернемся і... Што тады? У нас у сям'і такой ганьбы ніколі не было.
Маці мякка прамовіла:
- Мы падумаем, параімся... Ганьбіць вас не будзем.
Госць паспешліва падняўся на ногі.
- Дзякую вам, мэм. Эгі ўжо дарослая. Яна дзяўчына добрая... добрая і сціплая. Калі ўберажаце яе ад ганьбы, мы будзем вам вельмі ўдзячныя. Эгі не вінаватая - вырасла дзяўчына.
- Бацька наш пагаворыць з Элам, - сказала маці. - Калі не захоча, дык я пагавару з ім.
Уэйнрайт сказаў:
- Дык добрай вам ночы, і вялікі дзякуй. - Ён пайшоў за брызентавы полаг. Чутно было, як ён на сваёй палове паведамляў жонцы пра вынікі перамоваў.
Маці з хвіліну прыслухоўвалася, потым сказала мужчынам:
- Перасядзьце сюды, бліжэй.
Бацька і дзядзька Джон цяжка падняліся з кукішак. Яны селі на матрац побач з маці.
- А малыя дзе?
Бацька паказаў на кут:
- Руці накінулася на Ўінфілда і ўрэзала яму. Я загадаў ім легчы спаць. Пэўна, заснулі. Разашарна пайшла да нейкай знаёмай жанчыны.
Маці ўздыхнула і ціха прамовіла:
- Я знайшла Тома. І... сказала, каб ён ішоў адгэтуль. Куды-небудзь далёка.
Бацька паволі паківаў галавой. Дзядзька Джон уткнуўся падбародкам у грудзі.
- Нічога больш яму не застаецца, - сказаў бацька. - Як ты думаеш, Джон?
Дзядзька Джон падняў галаву.
- Нічога разумнага я вам не скажу, - адказаў ён. - Апошнім часам жыву як у сне.
- Том у нас добры, - сказала маці. Потым дадала, нібы просячы прабачэння: - Гэта я не ў крыўду табе сказала, што сама пагавару з Элам.
- Я ведаю, - спакойна сказаў бацька. - Ад мяне цяпер карысці мала. Увесь час толькі і думаю пра тое, як было раней. Толькі і думаю пра наш дом там, у Аклахоме. Я яго больш ніколі ўжо не ўбачу.
- Тут мясціны лепшыя... прыгажэйшыя, - сказала маці.
- Яно так. Але я тут нічога нават не заўважаю - у думках бачу, як з нашай вярбы лісце асыпаецца. Бывае, раптам успомню: трэба дзірку забіць у плоце, што з паўднёвага боку. Дзіўна: жанчына кіруе сям'ёй! Жанчына камандуе: тое зробім, туды паедзем... А мне хоць бы што.
- Жанчыне лягчэй перамяніцца, - заспакойліва сказала маці. - У жанчыны ўсё яе жыццё ў яе на руках. А ў мужчыны - у галаве. Ты не тужы. Можа... можа, у наступным годзе ў нас будзе свой кут.
- У нас нічога няма, - сказаў бацька. - Цяпер ужо доўга не знойдзем работы, ураджаі сабраныя... Што далей будзем рабіць? Што есці будзем? Разашарне ўжо час падыходзіць. Так ужо нас прыціснула, што і падумаць страшна. Вось я і капаюся ў мінулым, каб думкі неяк адцягнуць. Відаць, скончана наша жыццё.
- Не, не скончана. - Маці ўсміхнулася. - Не скончана, бацька. Гэта жанчыне таксама дадзена ведаць. І вось што я заўважыла. Мужчына, ён жыве рыўкамі: дзіця народзіцца, памрэ хто - рывок; ферму купіць, страціць сваю ферму - рывок. А ў жанчыны жыццё цячэ роўна, як рэчка - дзе крыху завіецца на вірах, закіпіць на вадаскатах, але рэчка бяжыць усё далей і далей. Вось як жанчына разважае. Усе мы не памрэм. Народ, ён будзе жыць - можа, і пераменіцца трохі, але жыць будзе заўсёды.
- Адкуль ты ведаеш? - папытаўся дзядзька Джон. - Што можа перашкодзіць жыццю спыніцца? Людзі стаміліся, ім толькі каб легчы і забыцца.
Маці задумалася. Яна пацерла тыльны блішчасты бок адной рукі далонню другой і перапляла пальцы.
- На гэта адразу не адкажаш, - сказала яна. - Мне здаецца: усё, што мы робім, усё вядзе нас далей і далей. Так мне здаецца. Нават калі ты галадаеш, калі хварэеш; некаторыя памруць, але астатнія толькі мацнейшымі робяцца. Трэба дзень за днём трымацца, сённяшнім жыць.
Дзядзька Джон сказаў:
- Калі б яна не памерла тады...
- А ты жыві сённяшнім днём. Не развярэджвай сябе.
- Там у нас, можа, добры ўраджай будзе наступным летам, - сказаў бацька.
Маці страпянулася:
- Ш-ш... Слухайце!
На сходках пачуліся чыесці асцярожлівыя крокі, і з-за полага выступіў Эл.
- Вітанне, - сказаў ён. - А я думаў, вы даўно ўжо спіце.
- Эл, - сказала маці, - мы тут гутарым. Пасядзі з намі.
- Добра. Мне таксама трэба пагаварыць. Я хутка пайду ад вас.
- Табе нельга. Ты нам тут патрэбен. Чаму ты надумаў ісці?
- Ну, мы з Эгі Ўэйнрайт вырашылі пажаніцца, я буду працаваць у гаражы, ноймем домік і... - Ён люта глянуў на бацькоў. - Вось так, і ніхто нас не спыніць!
Усе моўчкі ўтаропіліся на яго.
- Эл, - нарэшце сказала маці, - мы радыя гэтаму. Мы вельмі радыя.
- Сапраўды?
- Ну вядома! Ты ўжо дарослы. Табе пара жаніцца. Толькі так адразу, Эл, не ідзі ад нас.
- Я ўжо абяцаў Эгі, - сказаў Эл. - Не, мы пойдзем адсюль. Мы больш не можам усё гэта цярпець.
- Пачакай да вясны, - упрошвала маці. - Толькі да вясны. Няўжо да вясны не застанешся з намі? Хто грузавік павядзе?
- Ну...
Раптам з-за брызенту высунулася галава місіс Уэйнрайт.
- Вы ўжо ведаеце? - запыталася яна.
- Так. Толькі што даведаліся.
- Ах ты, божачкі! Цяпер... цяпер каб пірог спячы... Вось каб цяпер... пірог ці што-небудзь такое...
- Я звару кавы і спяку аладак, - сказала маці. - А да іх у нас ёсць сіроп.
- Ах ты, божачкі! Вось я... ага, слухайце, я цукру прынясу. Будуць салодкія аладкі.
Маці наламала сухога голля, усунула ў печку, і яно хутка загарэлася ад гарачага вуголля, што засталося пасля гатавання вячэры. Руці і Ўінфілд выпаўзлі з-пад коўдры, як ракі-самотнікі са сваіх шкарлупін. Першыя хвіліны яны паводзілі сябе сціпла, стараючыся разведаць, даравалі ім іхнія правіннасці ці не. Пераканаўшыся, што ніхто не звяртае на іх ніякай увагі, яны асмялелі. Руці праскакала на адной назе да дзвярэй і назад, не дакранаючыся да сценкі.
Маці сыпала ў міску муку, калі Ружа Сарона паднялася па сходках у вагон. Яна выпрасталася ў дзвярах і насцярожана пайшла да маці.
- Што здарылася? - запыталася яна.
- У нас навіна! - усклікнула маці. - Зараз мы наладзім маленькі банкецік з выпадку заручын Эла і Эгі Ўэйнрайт.
Ружа Сарона застыла на месцы. Яна паволі перавяла позірк на Эла, які стаяў разгублены, усхваляваны.
Місіс Уэйнрайт крыкнула з другога канца вагона:
- Я памагаю Эгі надзець свежую сукенку. Мы зараз.
Ружа Сарона паволі павярнулася, падышла да шырокіх дзвярэй вагона і асцярожна спусцілася па сходках. Ступіўшы на зямлю, яна паволі пабрыла да рэчкі, а там пайшла сцежкай, што цягнулася па беразе. Яна ішла туды, куды незадоўга перад тым хадзіла маці, - у густы вярбняк. Вецер дзьмуў цяпер амаль без парываў, і вецце роўна шапацела. Ружа Сарона апусцілася на калені і на карачках палезла ў самы гушчар. Галінкі драпалі ёй твар, чапляліся за валасы, але яна не зважала на гэта. Яна спынілася толькі тады, калі вецце апляло яе з усіх бакоў. Ружа Сарона легла на спіну і адчула цяжар дзіцяці ў сваім улонні.
У цёмным вагоне заварушылася на сваім матрацы маці, потым адкінула коўдру і паднялася. Праз расчыненыя дзверы ў вагон слаба цадзілася шараватае святло зорак. Маці падышла да дзвярэй, спынілася ў праёме і абвяла позіркам наваколле. На ўсходзе зоркі пачалі ўжо бляднець. Слабы ветрык шастаў у густым вербалоззі, ціхі гоман вады даносіўся з рэчкі. Амаль увесь лагер спаў, толькі каля адной палаткі разгаралася невялікае вогнішча, і вакол яго стаялі людзі. Маці бачыла іх твары, асветленыя слабым яшчэ, няроўным полымем. Людзі паціралі азяблыя рукі, потым павярнуліся спінай да вогнішча і выставілі рукі назад, да цяпла. Вецер раз-пораз налятаў парывамі, у паветры адчувалася набліжэнне першых замаразкаў. Маці зябка пакурчылася і таксама пацерла рукі. Яна ціхенька вярнулася ў вагон і каля ліхтара намацала запалкі. Віскнуў шчыток. Маці запаліла кнот і, калі разгарэўся сіні агеньчык, крыху падкруціла кнот, і ў ліхтары засвяціўся жоўты круглаваты язычок агню. Маці панесла ліхтар да печкі, паставіла на пліту і, наламаўшы сухіх вярбовых галінак, усунула іх у топку. Праз момант гучна загуў у трубе агонь.
Ружа Сарона цяжка перавярнулася на бок і села на матрацы.
- Зараз я ўстану, - сказала яна.
- Паляжала б яшчэ крышачку, пакуль не сагрэецца, - параіла маці.
- Не, я ўстану.
Маці наліла з вядра вады ў кафейнік і паставіла яго на пліту, потым паставіла на агонь патэльню, шчодра змазаную салам, каб яна добра нагрэлася пад цеста для кукурузных праснакоў.
- Што з табой? - ціха запыталася маці.
- Я пайду, - сказала Ружа Сарона.
- Куды?
- Бавоўну збіраць.
- Нельга. Табе ўжо хутка раджаць.
- Яшчэ можна. Я пайду.
Маці ўсыпала каву ў ваду.
- Разашарна, ты ўчора не ела з намі аладак. - Ружа Сарона маўчала. - І чаго табе ў голаў прыйшло збіраць бавоўну? - Зноў маўчанне. - Гэта праз Эла і Эгі? - Маці пільна паглядзела на дачку. - Ды што ты, Разашарна! Табе хадзіць у поле няма ніякай патрэбы.
- Я пайду.
- Што ж, добра. Толькі не ператамляйся. Уставай, бацька! Прачніся, падымайся!
Бацька залыпаў вачамі і пазяхнуў.
- Не выспаўся, - прастагнаў ён. - Учора ў гадзін адзінаццаць леглі.
- Давайце, хутчэй падымайцеся, усе ўставайце, ідзіце мыцца.
Жыхары вагона мала-памалу ажывалі, вылазілі з-пад коўдраў і, пацепваючыся ад холаду, нацягвалі адзежу. Маці наразала скрылікамі саланіну на другую патэльню.
- Ідзіце мыйцеся, - падганяла яна.
У другой палове вагона ўспыхнула святло, пачуўся трэск сучча.
- Місіс Джоўд! - данёсся голас місіс Уэйнрайт. - Мы ўжо збіраемся. Хутка будзем гатовыя.
Эл прабурчаў:
- І нашто ў гэткую рань падымацца?
- Там усяго дваццаць акраў, - сказала маці. - Трэба прыехаць як найраней. Бавоўны мала. Трэба паспець, а то без нас збяруць. - Маці прыспешвала іх адзявацца, старалася, каб хутчэй паснедалі. - Ну, піце каву, пара ехаць.
- У цемры ж бавоўну не збіраюць, ма.
- Раней світання мы туды і не дабяромся.
- Там, пэўна, мокра.
- Дожджык быў дробны. Хутчэй піце каву. Эл, паснедаеш, рыхтуй машыну, - сказала маці і крыкнула: - Місіс Уэйнрайт, вы гатовыя?
- Канчаем снедаць. Праз хвілінку выходзім.
Лагер прачнуўся, ажывіўся. Каля палатак гарэлі вогнішчы. Над вагонамі клубіўся дым з труб.
Эл залпам выпіў каву і набраў поўны рот гушчы. Ён збег па сходках, адплёўваючыся на хаду.
- Місіс Уэйнрайт, мы ўжо гатовыя! - крыкнула маці. Яна павярнулася да Ружы Сарона: - Ты тут заставайся.
Ружа Сарона сцяла зубы.
- Я паеду таксама, - сказала яна. - Мне трэба ехаць, ма.
- У цябе ж мяшка няма. Ды і цягаць яго табе нельга.
- У твой буду класці.
- Паслухай мяне.
- Паеду.
Маці ўздыхнула:
- Што ж, буду за табой наглядаць. Добра было б доктару цябе паказаць.
Ружа Сарона ўсхвалявана захадзіла па вагоне. Надзела свой лёгкі жакет, зняла яго.
- Коўдру вазьмі, - параіла маці. - Захочаш адпачыць, не азябнеш. - За задняй сценкай вагона пачуўся гул матора. - Мы першыя паедзем, - зарадавалася маці. - Ну, бярыце свае мяшкі. Руці, не забудзься на кашулі, я іх зашыла, будзеце збіраць у іх.
У змроку Ўэйнрайты і Джоўды забраліся на грузавік. Пачаў марудна займацца бледны золак.
- Паварочвай налева, - сказала маці Элу. - А там будзе аб'ява.
Яны паволі ехалі па цёмнай дарозе. За імі ішлі іншыя машыны, а там, у лагеры, заводзіліся новыя маторы, людзі сем'ямі садзіліся ў кузавы, і машыны выязджалі на шашу і паварочвалі налева.
Да паштовай скрынкі з правага боку дарогі быў прымацаваны кавалак кардону з надпісам сінім алоўкам: «Патрабуюцца зборшчыкі бавоўны». Эл збочыў у вароты і пад'ехаў да гаспадарчага двара. На ім было ўжо шмат машын. Круглы электрычны ліхтар з краю белай адрыны асвятляў групу людзей - мужчын і жанчын, якія чакалі каля вагаў сваёй чаргі, трымаючы пад пахай скручаныя мяшкі. Некаторыя жанчыны накінулі мяшкі на плечы, прыкрываючы канцамі грудзі.
- Аказваецца, не так ужо мы і рана прыехалі, - сказаў Эл. Ён падвёў грузавік да агароджы і спыніў яго там. Абедзве сям'і злезлі на зямлю і далучыліся да людзей, што стаялі каля вагаў, а машыны ўсё зварочвалі з дарогі і спыняліся каля адрыны, і людзей усё прыбывала і прыбывала. Седзячы пад ліхтаром, гаспадар запісваў зборшчыкаў.
- Хоўлі? - перапытаў ён. - Х-о-ў-л-і? Колькі?
- Чацвёра. Уіл...
- Уіл.
- Бентан...
- Бентан.
- Эмілія...
- Эмілія.
- Клэр...
- Клэр. Хто наступны? Карпентэр? Колькі?
- Шасцёра.
Ён запісваў прозвішчы ў канторскую кнігу насупраць графы, у якой адзначалася вага сабранай бавоўны.
- Мяшкі ёсць? У мяне толькі некалькі штук. З вас будзе даляр. - А машыны адна за адной заязджалі ў двор. Гаспадар наставіў каўнер скураной курткі на аўчыне і закрыў ім горла. Ён заклапочана паглядзеў на пад'язную дарогу. - Мае дваццаць акраў нядоўга прастаяць пры такім наплыве народу, - сказаў ён.
Дзеці караскаліся на вялікі прычэп для перавозкі бавоўны, чапляючыся наскамі чаравікаў за абцягнутыя дробнай сеткай барты.
- Прэч адтуль! - крыкнуў гаспадар. - Злазьце! Яшчэ дрот парвяце. - І дзеці нехаця злазілі з прычэпа, маўклівыя, засаромленыя. Настала шэрае світанне. - Давядзецца збаўляць на расу, - сказаў гаспадар. - Калі ўзыдзе сонца, буду прымаць поўнай вагой. Зрэшты, калі хочаце, тады і пачынайце. Ужо досыць развіднела.
Зборшчыкі паспяшаліся на баваўнянае поле і разабралі рады. Яны прывязалі мяшкі да пояса і паляпвалі рукамі, каб разагрэць скарчанелыя пальцы, ад якіх патрабавалася спрытнасць. На ўсходзе неба над узгоркамі паружавела. Зборшчыкі доўгім ланцугом пайшлі па радах. А машыны ўсё зварочвалі з шашы і заязджалі на двор, пакуль ён зусім не перапоўніўся, і новыя машыны спыняліся ўжо за варотамі, выстройваючыся абапал шашы. У полі гуляў свежы вецер.
- І як гэта вы ўсе даведаліся? - гаварыў гаспадар. - Быццам бяздротавы тэлеграф. Гэтых дваццаці акраў не хопіць і да поўдня. Прозвішча? Х'юм? Колькі?
Зборшчыкі ланцугом перамяшчаліся па полі, і моцны заходні вецер раздзімаў іх адзежу. Пальцы жвава беглі да пушыстых каробачак, хуценька прабіраліся ў доўгія мяшкі, якія ўсё цяжэлі, цягнучыся ззаду па зямлі.
Бацька загаварыў да свайго суседа справа:
- У нашых краях такі вецер амаль заўсёды прыносіць дождж. Але цяпер ужо халаднавата на дождж. Вы даўно тут, на Захадзе? - Ён гаварыў, не адрываючы вачэй ад свайго куста.
Сусед адказаў, таксама не падымаючы галавы:
- Ужо хутка год.
- Як думаеце, будзе дождж?
- Прабачце, не скажу. Людзі тут усё жыццё жывуць і то ўгадаць не могуць. Як толькі збор, так і чакай, што дождж перашкодзіць. Вось як тут кажуць.
Бацька кінуў хуткі позірк на захад. Над узгоркамі пад гонам ветру шпарка плылі вялікія чорныя хмары.
- Як быццам дажджавыя, - сказаў бацька.
Яго сусед пакасіўся ў той бок.
- Хто іх ведае, - сказаў ён. І ўсе, хто быў на полі, азірнуліся і паглядзелі на неба. І яшчэ ніжэй сагнуліся спіны, рукі шпарчэй забегалі па кустах. Людзі збіралі бавоўну нібы навыперадкі, стараліся апярэдзіць час і хутчэй набіць мяшкі, апярэдзіць дождж і адзін аднаго - як мага больш сабраць, як мага больш зарабіць грошай. Прайшоўшы поле з канца ў канец, яны кінуліся разбіраць новыя грады. Цяпер ужо вецер дзьмуў ім у твар, і яны бачылі густыя шэрыя хмары, што беглі па небе насустрач узыходнаму сонцу. А новыя машыны спыняліся на абочынах, і новыя зборшчыкі падыходзілі да гаспадара запісвацца. Людзі з ліхаманкавай хуткасцю перамяшчаліся па полі, неслі мяшкі да адрыны, адзначалі вагу ў гаспадара, запісвалі і сабе ў кніжкі і беглі назад займаць рады.
Да адзінаццаці гадзін бавоўну ўсю сабралі - праца скончылася. Зацягнутыя сеткамі грузавікі ўзялі на буксір аплеценыя сеткамі прычэпы, выехалі на шашу і пакіравалі да бавоўнаачышчальнай машыны. Бавоўна вытыркалася праз вочкі сетак, і маленькія белыя воблачкі ляталі ў паветры, пушыстыя касмылі чапляліся за прыдарожны бур'ян і кудзеліліся на ветры. Зборшчыкі паныла пабрылі да адрыны і станавіліся ў чаргу на аплату.
- Х'юм Джэймс - дваццаць два цэнты. Ральф - трыццаць цэнтаў. Джоўд Томас - дзевяноста цэнтаў. Уінфілд - пятнаццаць цэнтаў. - Грошы былі складзеныя слупкамі - асобна манеты ў дзесяць цэнтаў, асобна пяціцэнтавікі, асобна цэнты. Атрымліваючы плату, кожны зборшчык зазіраў у сваю кніжку. - Уэйнрайт Эгнес - трыццаць чатыры цэнты. Тобін - шэсцьдзесят тры. - Чарга рухалася паволі. Людзі моўчкі ішлі да сваіх машын і няспешна выязджалі з двара.
Джоўды і Ўэйнрайты сядзелі на грузавіку, чакаючы, калі ачысціцца дарога да варот. На зямлю ўпалі першыя кроплі дажджу. Эл высунуў руку з кабіны, ловячы кроплі. Ружа Сарона сядзела пасярэдзіне, маці з краю. Вочы ў Ружы Сарона зноў патухлі.
- Не трэба было табе ехаць, - сказала маці. - І сабрала ты ўсяго дзесяць - пятнаццаць фунтаў. - Ружа Сарона глянула на свой выпнуты жывот і нічога не адказала. Раптам яна задрыжала і падняла галаву. Маці пільна паглядзела на яе, разгарнула свой баваўняны мяшок, накінула дачцэ на плечы і прыхінула яе да сябе.
Нарэшце праезд быў свабодны. Эл запусціў матор і выехаў на шашу. Рэдкія, але буйныя кроплі дажджу імкліва падалі ўніз і пляскалі па бетоне, і чым далей ехаў грузавік, тым кроплі рабіліся драбнейшыя і гусцейшыя. Дождж так гучна барабаніў па даху кабіны, што яго дробат быў чуваць скрозь грукат старога, спрацаванага матора. Уэйнрайты і Джоўды накінулі сабе на галовы і плечы мяшкі.
Ружа Сарона калацілася ўсім целам пад рукамі ў маці, і маці крыкнула Элу:
- Хутчэй, Эл. Разашарна прастыла. Ёй трэба ногі ў гарачую ваду.
Эл прыбавіў газу, матор загрукатаў яшчэ гучней, і, прыехаўшы ў лагер, Эл падвёў грузавік бліжэй да чырвоных вагонаў. Яны яшчэ не паспелі спыніцца, а маці ўжо раздавала загады.
- Эл, - камандавала яна, - ты, Джо і бацька сходзіце ў лазняк і прынесяце ўсё, што там ёсць сухога. Трэба добра нацепліць вагон.
- А дах не цячэ?
- Думаю, не. У нас будзе добра, суха, трэба толькі запасціся галлём. У вагоне павінна быць цёпла. Вазьміце з сабой Руці і Ўінфілда. Яны таксама трохі сучча прынясуць. Нешта сястрыца ваша занядужала. - Маці вылезла з кабіны, Ружа Сарона памкнулася за ёю, але калені ў яе падагнуліся, і яна цяжка апусцілася на падножку. Місіс Уэйнрайт убачыла гэта.
- Што такое? Ёй час прыйшоў?
- Не, думаю, яшчэ не, - адказала маці. - Яна празябла і, можа, прастудзілася. Дай мне руку.
Абедзве жанчыны ўзялі Ружу Сарона пад локці. Яна зрабіла некалькі крокаў, і сілы вярнуліся да яе - ногі прынялі цяжар цела.
- Мне ўжо лепш, - сказала яна. - Гэта толькі хвілінку было.
Жанчыны не адпускалі яе.
- Ногі ў гарачую ваду, - павучальна сказала маці. Яны памаглі Ружы Сарона падняцца па сходках у вагон.
- Вы разатрыце яе добра, - параіла місіс Уэйнрайт. - А я ў печы запалю. - Яна ўсунула ў топку апошняе сучча і распаліла моцны агонь.
Дождж ужо ліў як з вядра, па даху забегалі патокі вады. Маці падняла вочы ўгору.
- Дзякуй богу, дах цэлы, - сказала яна. - Палаткі, якія б яны ні былі добрыя, усё роўна працякаюць. Многа вады не стаўце, місіс Уэйнрайт.
Ружа Сарона нерухома ляжала на матрацы. Яна дазволіла зняць з сябе туфлі і расцерці ногі. Місіс Уэйнрайт нахілілася над ёю:
- Боляў не адчуваеш?
- Не. Проста нездаровіцца. Нядобра мне.
- У мяне ёсць болесуцішальнае і солі, - сказала місіс Уэйнрайт. - Калі трэба, бярыце, прашу вас. Калі ласка.
Ружа Сарона закалацілася ўсім целам.
- Укрый мяне, ма, мне холадна. - Маці сабрала ўсе коўдры і наваліла на дачку. Дождж гучна барабаніў па даху.
Вярнуліся збіральнікі паліва з вялікімі ахапкамі сучча. З іх капелюшоў і пінжакоў сцякала вада.
- Ну і лівень! - сказаў бацька. - Мігам вымачыў наскрозь.
Маці сказала:
- Вы б яшчэ схадзілі. Сушняк хутка прагарыць. Як бачыш сцямнее. - Руці з Уінфілдам прыйшлі мокрыя да ніткі, скінулі свае ношы на кучу сучча і павярнуліся да выхаду. - Не ідзіце больш, - спыніла іх маці. - Хадзіце да печкі, пасушыцеся.
Усё навокал серабрылася ад дажджу, мокрыя сцежкі блішчалі. Кусты бавоўніку з кожнай гадзінай рабіліся ўсё чарнейшымі і быццам скурчваліся. Бацька, Эл і дзядзька Джон зноў і зноў хадзілі ў вербалоззе і вярталіся адтуль з абярэмкамі ламачча. Яны скідалі яго каля дзвярэй у кучу, пакуль яна не паднялася пад самую столь, і толькі тады вырашылі больш не хадзіць і падышлі да печкі.
Вада з капелюшоў сцякала ім на плечы. Крыссе пінжакоў было мокрае, хоць выкручвай, у чаравіках пры хадзе хлюпала.
- Ну добра, хопіць. А зараз скідайце з сябе ўсё, - скамандавала маці. - Я вам каву зварыла. Пераапранайцеся - вунь сухія камбінезоны. Ну давайце, не стойце.
Змерклася рана. Людзі забіліся ў вагоны і сядзелі там, прыслухоўваючыся да шуму і плёскату вады на дахах.
З боку акіяна насунуліся і паплылі над высокімі гарамі і над далінамі ўзбярэжжа шэрыя хмары. Увышыні вецер дзьмуў шалёна і бязгучна, у хмызе ён свістаў, у лясах завываў. Хмары цягнуліся рванымі шматкамі, клубамі, слаямі, прымалі выгляд шэрых скал, а потым зліліся ў адно і нізка павіслі на захадзе над зямлёю. Раптам вецер сціх, пакінуўшы пасля сябе густую, шчыльную навісь хмар. Спачатку дождж налятаў перагонамі - то перастане, то хлыне ліўнем, а потым мала-памалу ён стаў раўнамерным: дробныя кроплі і іх аднастайны дробат - дождж нібы шэрая заслона перад вачамі, дождж, які ператварыў дзень у вечар. Сухая зямля ўсмоктвала вільгаць і паступова чарнела. Зямля піла дождж два дні, пакуль не наталіла смагу. Тады пачалі ўзнікаць лужыны, а ў нізінах на палях - азярыны. Мутная вада ў іх падымалася ўсё вышэй і вышэй, і ўпарты дождж хвастаў яе бліскатлівую паверхню. Нарэшце горы перанасыціліся вадой, і па схілах пабеглі ручаі, зліліся ў патокі, якія з ровам хлынулі па цяснінах у даліны. А дождж усё хвастаў і хвастаў. Ручаі і невялікія рэчкі ўзнімаліся ў берагах, падмывалі дрэвы, вымушаючы вербы нізка згінацца і тапіць свае лозы ў вадзе, вырывалі з карэннем таполі і валілі іх. Каламутная вада віравала і бурліла, падступала да самых берагоў і нарэшце хлынула на палі, у сады, на ўчасткі, дзе чарнелі голыя кусты бавоўніку. Роўныя палі ператварыліся ў азёры, шырокія, шэрыя, і дождж безупынна рашаціў іх паверхню. Потым заліло шашэйныя дарогі, машыны марудна рухаліся па іх, рассякаючы носам ваду і пакідаючы за сабой каламутны, пеністы след. Зямля ціха гаманіла пад ударамі дажджу, а ручаі і рэчкі раўлі пад напорам бурлівых патокаў з гор.
Калі дождж толькі пачаўся, вандроўнікі-перасяленцы згрудзіліся ў палатках і, седзячы там, гаварылі: гэта ненадоўга. І пыталіся: колькі ж гэта будзе доўжыцца?
А калі заблішчалі лужыны, мужчыны выйшлі пад дождж з рыдлёўкамі і насыпалі вакол палатак невялікія дамбы. Дождж сек па брызенце і нарэшце прамачыў яго наскрозь, і струменьчыкі вады пабеглі з унутранага боку. Потым земляныя валы змыла, вада прарвалася ў палаткі і намачыла матрацы і коўдры. Адзежа на людзях была мокрая. Тады паставілі скрыні адна на адну і паклалі між імі дошкі. На гэтых дошках людзі сядзелі дзень і ноч.
Каля палатак стаялі старэнькія машыны, і вада папсавала правады ад магнета, вывела са строю карбюратары. Маленькія шэрыя палаткі стаялі ў азёрах вады. І нарэшце людзі зразумелі: трэба выбірацца адсюль. Але маторы не заводзіліся, бо замкнуліся правады, а тыя машыны, у якіх маторы яшчэ працавалі, заселі коламі ў глыбокай гразі. І людзі пайшлі прэч па вадзе, несучы ў абярэмку мокрыя коўдры. Яны ішлі, плюхаючы па гразі, і неслі на руках дзяцей і драхлых старых. І калі дзе на высокім месцы стаяла якая адрына, яна была набітая людзьмі, азяблымі і поўнымі адчаю.
Некаторыя ішлі ў камісіі па выдачы дапамогі і сумныя вярталіся з горада да сваіх.
Тут правіла такое: каб атрымаць дапамогу, трэба пражыць у гэтым штаце не меней як год. Кажуць, урад збіраецца дапамагчы. А калі, невядома.
І непрыкметна да іх падкралася самае жахлівае, што можна сабе ўявіць.
Цэлыя тры месяцы працы не будзе ніякай.
Людзі сядзелі пад павецямі, у адрынах, збіўшыся ў кучу; на іх насоўваўся жах, і твары ў іх пашарэлі ад яго прадчування. Галодныя дзеці плакалі, а карміць іх не было чым.
Потым прыйшлі хваробы - запаленне лёгкіх і адзёр з ускладненнямі на вочы і на вушы.
А дождж ішоў не перастаючы, і вада залівала шашэйныя дарогі, бо маставыя трубы ўжо не паспявалі прапускаць яе.
І тады з палатак, з перапоўненых адрын сталі выходзіць прамоклыя да касцей людзі ў рванай адзежы, у разлезлых, аблепленых граззю чаравіках. Яны ішлі, плюхаючы па вадзе, у гарады, у пасялковыя крамы, у камісіі па дапамозе - ішлі вымольваць харч, вымольваць грашовую дапамогу, красці, як выпадзе шанц, і ілгаць. Ад гэтых мольбаў, ад гэтых прыніжэнняў у сэрцах у іх затлела бяссільнае абурэнне. І ў маленькіх гарадках жаль да прамоклых наскрозь людзей змяніўся злосцю, а злосць на гэтых галодных уступіла месца страху перад імі. Шэрыфы прыводзілі да прысягі свой штат - так званых шэрыфскіх памагатых, спешна рассылалі заказы на стрэльбы, на газ і на боепрыпасы. А галодныя тоўпіліся на задніх дварах бакалейных крам і прасілі хлеба, прасілі гнілой гародніны і пры выпадку кралі.
Ашалелыя людзі калацілі ў дзверы лекараў; але лекары заўсёды занятыя, несвабодныя. І прыгнечаныя горам людзі ішлі ў пасялковыя крамы і прасілі перадаць следчаму па справах аб смерці - коранеру, каб ён прыслаў машыну. А ў коранераў часу хоць адбаўляй. І закрытыя машыны задам пад'язджалі па гразі куды трэба, бралі нябожчыкаў і адвозілі.
А дождж настырна сек і сек, і рэчкі выходзілі з берагоў і затаплялі палі.
У людзей, што набіліся ў адрыны, у людзей, што ляжалі на прамоклым сене, голад і страх параджалі азлабленне. Падлеткі разбрыдаліся па наваколлі, але не жабраваць, а красці; і мужчыны нясмела разбрыдаліся - паспрабаваць што-небудзь украсці.
Шэрыфы набіралі новых памагатых, пасылалі заказы на новыя стрэльбы; а забяспечаныя людзі, якія жылі пад добрымі, надзейнымі дахамі, прасякліся спачатку жалем да перасяленцаў, потым агідай да іх і пад канец нянавісцю.
У адрынах з дзіравымі дахамі, на мокрым сене, жанчыны, задыхаючыся ад запалення лёгкіх, нараджалі дзяцей. А старыя, скурчыўшыся, валяліся ў закутках і паміралі там, і коранеры не маглі потым распраміць іх скарчанелыя целы. Па начах апанаваныя роспаччу людзі забіраліся ў куратнікі і выкрадалі курэй, якія нема кудахталі. Калі ў гэтых людзей стралялі, яны не кідаліся бегчы, а змрочна плюхалі па вадзе далей, і калі куля трапляла ў іх, яны стомлена валіліся ў гразь.
Дождж сціх. Палі былі залітыя вадой, у якой адбівалася шэрае неба, і ўсё наваколле поўнілася ціхім, як шэпт, плёскатам. Мужчыны выйшлі з адрын, з павецяў. Яны прыселі на кукішкі, пазіраючы на затопленыя палі. І маўчалі. Толькі зрэдку ціха перамаўляліся між сабой. Працы не будзе да вясны. Ніякай. А не будзе працы - не будзе ні грошай, ні ежы. Вось ёсць у чалавека коні, ён на іх арэ, і барануе, і косіць, а калі яны стаяць без справы, яму і ў голаў не прыйдзе выганяць іх на галодную смерць. Тое коні, а мы - людзі.
Жанчыны не спускалі вачэй з мужчын, хацелі выведаць, зламаліся яны ці не. Жанчыны стаялі моўчкі і сачылі за мужчынамі. І там, дзе мужчыны збіраліся купкамі па некалькі чалавек, страх пакідаў іхнія твары, уступаючы месца злосці. І жанчыны ўздыхалі з палёгкай, бо ведалі, што цяпер ужо не страшна, - мужчыны не зламаліся і ніколі не зломяцца, пакуль страх можа перарасці ў гнеў.
Маленечкія стрэлкі травы выбіваліся з зямлі, і праз некалькі дзён схілы ўзгоркаў бледнай зеленню адзначылі набліжэнне наступнага года.
Лагер вакол таварных вагонаў патанаў у лужынах, а дождж усё плюхаў і плюхаў па гразі. Рэчка спакваля падымалася па беразе, падбіраючыся да паляны.
На другі дзень пасля пачатку дажджу Эл зняў брызент, які вісеў пасярод вагона. Ён панёс яго да грузавіка, прыкрыў ім капот, вярнуўся ў вагон і сеў на матрац. Цяпер, калі не стала брызентавай перагародкі, абедзве сям'і з'ядналіся. Мужчыны сядзелі разам, змрочныя, прыгнечаныя. Маці падтрымлівала невялікі агонь у печцы, зрэдку падкідваючы галінкі, - яна берагла паліва. Патокі дажджу залівалі амаль зусім плоскі дах вагона.
На трэці дзень Уэйнрайты затрывожыліся.
- Можа, нам лепш паехаць адсюль? - сказала місіс Уэйнрайт.
Але маці хацела іх утрымаць.
- Куды вы паедзеце, дзе знойдзеце надзейны дах над галавой?
- Сама не ведаю, але нешта мне падказвае, што трэба адсюль выбірацца.
Жанчыны заспрачаліся; маці крадком паглядала на Эла.
Руці і Ўінфілд распачалі нейкую гульню, але неўзабаве і яны панура прыціхлі, а дождж без спыну барабаніў па даху.
На трэці дзень скрозь пошчак дажджу пачуўся гул вады. Бацька з дзядзькам Джонам стаялі ў дзвярах, пазіраючы на ўспучаную рэчку. З абодвух канцоў лагера вада падабралася зусім блізка да шашы, але самі вагоны яна агінала, так што яны былі абкружаныя ззаду дарожным насыпам, а спераду рэчкай. Бацька запытаўся:
- Ну, Джон, што скажаш? Калі рэчка выйдзе з берагоў, каб хоць нас не затапіла.
Дзядзька Джон раскрыў рот і пацёр далонямі шчаціністы падбародак.
- Эге... - сказаў ён. - Усё можа быць.
Ружа Сарона ляжала моцна прастуджаная, шчокі ў яе гарэлі, у вачах стаяў ліхаманкавы бляск. Маці падсела да яе з кубкам гарачага малака ў руцэ.
- Вось выпі, - сказала яна. - Я свінога сала туды падліла, сілы падмацоўвае. Ну, пі ж!
Ружа Сарона квола пакруціла галавой:
- Не хочацца.
Бацька правёў пальцам крывую лінію ў паветры.
- Выйсці б нам усім сюды з рыдлёўкамі і насыпаць плаціну. Ручаюся, усю ваду затрымалі б. Толькі трэба вунь адтуль і дагэтуль.
- Ага, - пагадзіўся дзядзька Джон. - Можна было б. Але не ведаю, ці пойдзе хто. Хутчэй захочуць выбірацца адсюль.
- Але ж тут у вагонах суха, - стаяў на сваім бацька. - Сушэйшае месца наўрад ці дзе знойдзем. Пачакай. - Ён выцягнуў з кучы ламачча пруток, збег па сходках уніз, заплюхаў па гразі да берага рэчкі і ўваткнуў пруток у зямлю каля самага краю бурлівай вады. Паспешліва вярнуўся ў вагон, сказаў: - Во каб яго, наскрозь прамок.
Абодва сачылі за тонкай галінкай, якая тырчала каля самай вады. Яны бачылі, як вада паволі акружала яе і папаўзла яшчэ вышэй па беразе. Бацька сеў на кукішкі ў дзвярах.
- Хутка прыбывае, - сказаў ён. - Па-мойму, трэба пагаварыць. Можа, згодзяцца вал насыпаць. А не, дык давядзецца ехаць. - Бацька кінуў позірк на другі канец вагона, дзе мясціліся Ўэйнрайты. Эл быў у іх - сядзеў побач з Эгі. Бацька пайшоў на тую палову. - Вада падымаецца, - сказаў ён. - А што, калі насыпаць плаціну? Толькі трэба, каб усе ўзяліся.
Уэйнрайт сказаў:
- А мы тут якраз раімся. Бадай што, лепш выбірацца адсюль.
Бацька не здаваўся:
- Вы тут шмат дзе пабылі. Самі ведаеце, які ёсць шанц знайсці сухое месца для жылля.
- Яно так. А ўсё ж такі...
Загаварыў Эл:
- Калі яны паедуць, я з імі, та.
Бацька атарапеў.
- Табе нельга, Эл. А грузавік?.. Ніхто з нас не ўмее яго вадзіць.
- А мне што? Мы з Эгі павінны быць разам.
- Не, пачакай. Вось хадзіце сюды, - сказаў бацька. Уэйнрайт з Элам падняліся з матраца, і ўсе трое падышлі да дзвярэй. - Бачыце? - Бацька паказаў рукой: - Мы зробім насып ад таго вунь месца і дасюль. - Ён глянуў на сваю вешку. Вада бурліла вакол яе, падкрадаючыся да краю берага.
- Тут працы шмат, а вада, можа, усё роўна перальецца, - не згаджаўся Ўэйнрайт.
- Чаму ж не папрацаваць, усё роўна сядзім склаўшы рукі. А такога добрага прыстанішча больш нідзе цяпер не знойдзем. Пайшлі. Пагаворым з суседзямі. Калі ўсе возьмемся, справімся.
Эл сказаў:
- Калі Эгі паедзе, я з ёю.
- Паслухай, Эл, - сказаў бацька. - Калі ніхто не згодзіцца, усім давядзецца ехаць. Ну, пайшлі пагаворым. - Яны ўцягнулі галовы ў плечы і хуценька спусціліся па сходках, падышлі да суседняга вагона і падняліся да адчыненых дзвярэй.
Маці сядзела каля печкі, падкладаючы сучча ў слабы агонь. Падышла Руці, прыціснулася да яе.
- Хачу есці, - заныла Руці.
- Ты не галодная, - сказала маці. - Толькі што добра паела кашы.
- Я хачу яшчэ такога печыва. Гуляць ні ў што нельга. Мне сумна.
- Хутка будзе весела, - сказала маці. - Пачакай крышку. Цяпер ужо зусім хутка. У нас будзе домік і ферма, ужо хутка.
- Я хачу сабаку.
- Будзе ў нас і сабака і кошка.
- Рыжая?
- Не прыставай, - узмалілася маці. - Перастань мяне мучыць, Руці. Бачыш, Разашарна хворая. Пасядзі смірна хоць хвілінку. Хутка зноў будзе весела.
Руці нездаволена адышла ад яе.
З таго кута, дзе на матрацы ляжала ўхутаная ў коўдры Ружа Сарона, данёсся рэзкі крык, які раптоўна абарваўся. Маці ўскочыла і падышла да яе. Ружа Сарона стаіла дыханне, у вачах у яе стаяў жах.
- Што з табой? - трывожна запыталася маці. Ружа Сарона перадыхнула і зноў стрымала дыханне. Маці раптоўна засунула руку пад коўдры і выпрасталася. - Місіс Уэйнрайт! - крыкнула яна. - Даражэнькая місіс Уэйнрайт!
Маленькая тоўстая жанчына пайшла па вагоне да іх.
- Вы клікалі?
- Гляньце! - Маці паказала на твар дачкі. Ружа Сарона прыкусіла ніжнюю губу, на лбе ў яе выступілі кропелькі поту, вочы блішчалі ад жаху.
- Відаць, пачынаецца, - сказала маці. - Раней часу.
Ружа Сарона глыбока ўздыхнула і расслабілася. Яна расціснула зубы і заплюшчыла вочы. Місіс Уэйнрайт нахілілася над ёю.
- Цябе ўсю схапіла - адразу? Глядзі на мяне, адказвай. - Ружа Сарона квола кіўнула галавой. Місіс Уэйнрайт павярнулася да маці. - Так і ёсць, - сказала яна. - Пачалося. Раней часу, кажаце?
- Можа, гэта ад гарачкі.
- Ёй трэба ўстаць. Няхай трохі паходзіць.
- Яна не зможа. У яе сілы няма.
- Але ж трэба, трэба. - Місіс Уэйнрайт паспакайнела, трымалася строга і дзелавіта. - Я не ў адной прыняла, - сказала яна. - Ну так, давайце прыкрыем дзверы. Каб не было скразняку. - Абедзве жанчыны налеглі на цяжкія дзверы і засунулі іх, пакінуўшы нешырокую шчыліну. - Зараз прынясу і нашу лямпу, - сказала місіс Уэйнрайт. Твар у яе гарэў ад узбуджэння. - Эгі! - крыкнула яна. - Адвядзі адсюль малых, займіся імі.
Маці згодна кіўнула галавой.
- Правільна. Руці! Пайдзіце з Уінфілдам да Эгі. Ну, хуценька!
- А чаму? - запыталіся дзеці.
- Таму што так трэба. У Разашарны будзе дзіця.
- Я хачу паглядзець, ма. Ну дазволь.
- Руці! Ідзі зараз жа. Хутчэй! - Калі гавораць такім тонам, спрачацца не даводзіцца. Руці і Ўінфілд нехаця папляліся ў другі канец вагона. Маці запаліла ліхтар. Місіс Уэйнрайт прынесла сваю лямпу-«маланку», паставіла яе на падлогу, і круглы язычок полымя ярка асвятліў вагон. Руці і Ўінфілд прытаіліся за кучай сухога галля і асцярожна вызіралі адтуль.
- У яе дзіця народзіцца, і мы ўсё ўбачым, - шапнула Руці Ўінфілду. - Ты стой ціха, а то ма не дасць нам глядзець. Калі яна гляне ў наш бок, ты затаіся за суччам. Мы ўсё ўбачым.
- Мала хто з дзяцей гэта бачыў, - сказаў Уінфілд.
- З дзяцей ніхто не бачыў, - з гордасцю заявіла Руці. - Толькі мы ўбачым.
А каля ярка асветленага лямпай матраца маці раілася з місіс Уэйнрайт. Даводзілася гаварыць голасна, бо па даху гулка барабаніў дождж. Місіс Уэйнрайт выняла з кішэні фартуха кухонны сякач і засунула яго пад матрац.
- Можа, і дарэмна гэта, - прабачлівым тонам сказала яна. - У нас заўсёды так рабілі. Але шкоды таксама ніякай.
Маці кіўнула галавой у знак згоды.
- А мы клалі лямеш. Але гэта ўсё роўна, абы востра было, каб схваткі абрэзала. Дай бог, не доўга будзе мучыцца. Ну як, крыху палягчэла?
Ружа Сарона нервова кіўнула галавой.
- Пачынаецца?
- Канешне, - адказала маці. - Народзіш добрае дзіця. Ты толькі нам памажы. Можаш падняцца і трохі пахадзіць?
- Паспрабую.
- Вось разумніца, - пахваліла місіс Уэйнрайт. - Ну што за разумніца! Мы цябе падтрымаем, золатка. Мы з табой паходзім.
Яны памаглі ёй падняцца і закалолі шпількай коўдру, накінутую на плечы. Потым маці падхапіла яе пад руку з аднаго боку, а місіс Уэйнрайт з другога. Яны падвялі яе да кучы сучча, паволі павярнулі і пайшлі назад, і так некалькі разоў, а дождж моцна барабаніў па даху.
Руці і Ўінфілд нецярпліва сачылі за імі.
- А калі яна пачне раджаць? - запытаўся Ўінфілд.
- Ш-ш!.. А то пачуюць і прагоняць нас.
Да іх далучылася Эгі, стала за суччам. Святло лямпы падала на худы твар і бялявыя валасы Эгі, а на сцяне скакаў цень ад яе галавы з доўгім вострым носам. Руці прашаптала:
- Ты калі-небудзь бачыла, як родзіцца дзіцяня?
- А то, - адказала Эгі.
- А хутка ўжо?
- О не, не хутка.
- Усё ж калі?
- Можа, толькі заўтра раніцай.
- Гэ! - сказала Руці. - Тады і падглядаць цяпер няма чаго. Ой! Гляньце!
Яна ўбачыла, што жанчыны раптам спыніліся, Ружа Сарона ўся напялася і застагнала ад болю. Яе паклалі на матрац і выцерлі ёй лоб, а яна толькі пакрэктвала, сціскаючы рукі ў кулакі. Маці ціха супакойвала яе:
- Нічога. Усё будзе добра, будзе добра. Сцісні рукі. Цяпер губу прыкусі. Вось так, вось так.
Схваткі спыніліся. Ёй далі крыху паляжаць і зноў паднялі, і ўсе трое сталі хадзіць узад і ўперад, узад і ўперад, перапыняючыся на час схватак.
Бацька прасунуў галаву ў шчыліну дзвярэй. З капелюша збягала вада.
- Чаго гэта вы дзверы засунулі? - запытаўся ён і ўбачыў жанчын, якія хадзілі сюды-туды па вагоне.
Маці сказала:
- Яе час прыйшоў.
- Значыць... хочаш не хочаш застаёмся.
- Ага.
- Значыць, трэба рабіць плаціну.
- Трэба.
Бацька вярнуўся, плюхаючы па гразі, да рэчкі. Вада паднялася па беразе на чатыры цалі вышэй яго вешкі. Каля рэчкі пад дажджом стаялі дваццаць чалавек. Бацька крыкнуў ім:
- Давядзецца рабіць плаціну. У дачкі маёй схваткі. - Яго акружылі з усіх бакоў.
- Родзіць?
- Ага. Цяпер мы не зможам ехаць.
Высокага росту мужчына сказаў:
- Родзяць не ў нас. Нам ехаць можна.
- Канешне, - сказаў бацька. - Вам можна. Едзьце. Вас ніхто не трымае. Рыдлёвак усяго восем штук.
Ён падбег да самай нізкай часткі берага і ўсадзіў рыдлёўку ў раскіслую зямлю. Паддзетая штыхом, яна, падымаючыся, чвякнула. Ён капнуў яшчэ раз і кінуў штых гразі на самае нізкае месца на беразе. А побач з ім выстраіліся і іншыя. Яны навальвалі доўгі насып, і тыя, каму рыдлёвак не хапіла, секлі вярбовае вецце, спляталі яго ў маты і ўтоптвалі нагамі ў насып. Ярасць працы, ярасць бітвы апанавала ўсіх. Кінутую рыдлёўку падхоплівалі іншыя. Працавалі, скінуўшы пінжакі і капелюшы. Мокрыя кашулі і штаны шчыльна прыліплі да целаў, чаравікі ператварыліся ў бясформенныя камякі гразі. Раптам з вагона Джоўдаў данёсся пранізлівы крык. Мужчыны спыніліся, трывожна прыслухаліся і зноў узяліся за працу. Невысокі земляны вал даўжэў і нарэшце прымкнуў з двух бакоў да шашэйнага насыпу. Усе стаміліся, рух рыдлёвак запаволіўся. І таксама павольна падымалася вада ў рэчцы. Яна пакрыла ўжо тое месца, куды былі кінуты першыя штыхі зямлі. Бацька пераможна засмяяўся.
- Каб не наш вал, рэчка ўжо выйшла б з берагоў! - закрычаў ён.
Вада паволі падступала ўшчыльную да свежага насыпу, вымываючы з яго вярбовыя маты.
- Вышэй! - крыкнуў бацька. - Трэба яшчэ вышэй!
Змерклася, але праца не спынялася. Людзі ўжо зусім выбіліся з сілы. Твары ў іх былі застылыя, змярцвелыя. Рухі сутаргавыя, як у аўтамата. Калі сцямнела, жанчыны паставілі ў дзвярах ліхтары, выставілі конаўкі з гарачай кавай, а самі адна за адной беглі да Джоўдавага вагона і праціскаліся ў яго праз вузкую шчыліну.
Цяпер схваткі зачасцілі, з прамежкамі ў дваццаць хвілін. Ружа Сарона ўжо страціла над сабой уладу. Яна моцна ўскрыквала ад нясцерпнага болю. А суседкі прыходзілі зірнуць на яе, гладзілі яе па валасах і вярталіся ў свае вагоны.
Маці добра распаліла печку і грэла ваду, наліўшы ва ўсе свае пасудзіны. Раз-пораз у дзверы зазіраў бацька.
- Усё добра? - пытаўся ён.
- Ага, здаецца, добра, - супакойвала яго маці.
Калі стала зусім цёмна, нехта прынёс да рэчкі кішэнны электрычны ліхтарык. Дзядзька Джон шалёна арудаваў рыдлёўкай, кідаў і кідаў зямлю на верх насыпу.
- Ты лягчэй, лягчэй, - стрымліваў яго бацька. - Пагубіш сябе.
- Іначай не магу. Чуць не магу яе крыкаў. Гэта... гэта як тады...
- Разумею, - сказаў бацька. - А ўсё ж такі ты лягчэй.
Дзядзька Джон усхліпнуў:
- Я ўцяку куды-небудзь. Далібог, уцяку, калі тут працы не будзе.
Бацька павярнуўся да яго спінай.
- Як там мая адзнака?
Чалавек з электрычным ліхтарыкам накіраваў прамень на вешку. Дождж белымі палоскамі заблішчаў на святле.
- Прыбывае.
- Цяпер будзе не так хутка, - сказаў бацька. - На тым беразе разальецца.
- А ўсё ж прыбывае.
Жанчыны зноў налілі кавы ў конаўкі і паставілі іх у дзвярах. З кожнай начной гадзінай рухі людзей рабіліся ўсё больш маруднымі, людзі з цяжкасцю, як ламавыя коні, выцягвалі ногі з глыбокай гразі. Яшчэ і яшчэ адна рыдлёўка зямлі на насып, яшчэ і яшчэ адзін мат з вярбовага вецця. А дождж упарта ліў. Калі прамень ліхтарыка падаў на чый-небудзь твар, ён выхопліваў з цемры ўтаропленыя ў пустату вочы і выступы жаўлакоў на шчоках.
З вагона Джоўдаў яшчэ доўга даносіліся крыкі, і раптам яны сціхлі.
Бацька сказаў:
- Каб нарадзіла, мяне паклікалі б. - І хмурна зноў узяўся за рыдлёўку.
Вада каля насыпу клекатала і віравала. Раптам непадалёк, на рэчцы, крыху вышэй за лагер, пачуўся рыплівы трэск. Ліхтарык асвятліў магутную таполю, якая нізка схілілася над рэчкай. Усе кінулі працу і сталі пазіраць у той бок. Голле таполі апусцілася ў ваду і выцягнулася па плыні, а вада ўсё падмывала і падмывала яе кароткае карэнне. Таполю паступова выцягнула з зямлі, і яна паволі паплыла ўніз па цячэнні. Знясіленыя людзі сачылі за ёю, раскрыўшы раты. Дрэва плыло паволі. Раптам адна галіна зачапілася за корч і не дала дрэву плысці далей. Цячэнне развярнула яго, і карэнне ўперлася ў свежы насып. Вада ў запрудзе ўвесь час прыбывала, і дрэва зноў паплыло і прабіла зверху насып. У прабоіну рынуўся струмень вады. Бацька кінуўся наперад і стаў закідаць зямлёй прабоіну. Запруджаная дрэвам вада пачала падымацца. І неўзабаве насып змыла, і вада хлынула на людзей, заліла іх да шчыкалатак, да каленяў. Людзі не вытрымалі і пабеглі, а вада роўным патокам разлілася па паляне, пайшла пад вагоны, пад аўтамашыны.
Дзядзька Джон бачыў, як вада прарвала плаціну. У змроку ён разгледзеў гэта. Непасільны цяжар цела пацягнуў яго ўніз. Ён паваліўся на калені і апынуўся па грудзі ў бурлівай вадзе, якая напірала на яго.
Бацька ўбачыў, як ён упаў.
- Гэй, Джон! Што з табой? - Ён памог яму падняцца на ногі. - Галава закружылася? Хадзем, вагон высокі.
Да дзядзькі Джона вярнуліся сілы.
- Сам не ведаю, як гэта здарылася, - сказаў ён выбачлівым тонам. - Ногі падкасіліся. Падкасіліся, і ўсё. - Бацька павёў яго да вагонаў.
Калі плаціну змыла, Эл павярнуўся і пабег. Бегчы было цяжка. Калі ён дабраўся да грузавіка, вада даставала яму да лытак. Ён сарваў брызент з капота і ўскочыў у кабіну. Адразу націснуў на кнопку стартэра. Той закруціўся, але матор не падаў голасу. Эл націснуў да канца на газ. Акумулятар усё павальней і павальней круціў падмоклы стартэр, рухавік маўчаў. Яшчэ некалькі ўжо зусім павольных абаротаў стартэра. Эл паставіў запальванне на самае ранняе, намацаў рукой пад сядзеннем завадную ручку і выскачыў з кабіны. Вада ўжо залівала падножку. Эл падбег да носа машыны. Картэр матора быў пад вадой. Як ашалелы, Эл прыладзіў завадную ручку і некалькі разоў пакруціў ёю, і пры кожным павароце яго рука, апускаючыся, расплёсквала ваду, якая ўсё прыбывала. І нарэшце шаленства яго выдыхлася. Ён здаўся. Матор заліты вадой, акумулятарная батарэя выйшла са строю... Непадалёк, на крыху вышэйшай мясціне, запрацавалі маторы дзвюх машын, успыхнулі фары. Машыны буксавалі ў гразі, колы грузлі ўсё глыбей, і нарэшце вадзіцелі выключылі маторы і знерухомелі за рулём, пазіраючы на святло фар. А дождж белымі палоскамі рассякаў іх промні. Эл не спяшаючыся падышоў да кабіны, працягнуў руку і выключыў запальванне.
Калі бацька дабраўся да свайго вагона, ён убачыў, што ніжні канец сходак плавае ў вадзе. Ён наступіў на яго, утапіў пад ваду і ўтаптаў у гразь.
- Ну, Джон, ты сам падымешся? - запытаўся бацька.
- Падымуся. Ідзі першы.
Бацька асцярожна падняўся па мастку і праціснуўся ў вузкую шчыліну дзвярэй. Кноты ў ліхтары і лямпе былі нізка прыкручаныя. Маці сядзела на матрацы побач з Ружай Сарона і абмахвала яе кавалкам кардону. Місіс Уэйнрайт пхала ў печку сучча, і сыры дым выбіваўся з-пад канфорак і разносіў па вагоне пах гарэлай анучы. Калі бацька ўвайшоў, маці ўзняла на яго вочы і зараз жа апусціла.
- Ну... як яна? - запытаўся бацька.
Маці не падняла галавы.
- Як быццам нічога. Спіць.
Паветра ў вагоне было цяжкае, нечым непрыемна пахла. Дзядзька Джон ледзьве пралез у вагон і прыхінуўся да сцяны. Місіс Уэйнрайт кінула свой занятак і падышла да бацькі. Яна кранула яго за локаць і павяла ў кут вагона. Там узяла з падлогі ліхтар і падняла яго над скрынкай з-пад яблыкаў. У скрынцы на газеце ляжала пасінелае, зморшчанае цельца.
- Так ні разу і не дыхнула, - ціха прамовіла місіс Уэйнрайт. - Нарадзілася мёртвае.
Дзядзька Джон павярнуўся і, цягнучы ад стомы ногі, пайшоў у цёмны кут вагона. Цяпер ужо дождж ціха лапатаў па даху, так ціха, што ўсе чулі стомленае сапенне дзядзькі Джона, якое даносілася з цемры.
Бацька паглядзеў на місіс Уэйнрайт, узяў ліхтар у яе з рук і паставіў на падлогу. Руці і Ўінфілд спалі на сваім матрацы, прыкрыўшы сагнутымі ў локцях рукамі вочы.
Бацька паволі падышоў да Ружы Сарона. Хацеў прысесці каля яе матраца на кукішкі, але стомленыя ногі не паслухаліся, і ён стаў на калені. А маці ўсё памахвала над дачкой кардонкай. Яна глядзела на бацьку, вочы ў яе былі вялікія, позірк нерухомы, як у лунаціка.
Бацька сказаў:
- Мы... усё зрабілі... што маглі.
- Я ведаю.
- Мы працавалі ўсю ноч. А дрэва разнесла нашу плаціну.
- Ведаю.
- Чуеш? Вада пад вагонам.
- Ведаю. Я ўсё чула.
- Думаеш, з ёю ўсё абыдзецца?
- Не ведаю.
- Можа... мы маглі... што-небудзь зрабіць?
Губы ў маці былі сухія, бяскроўныя.
- Не. У нас заставалася толькі адно... і мы гэта рабілі.
- Мы там працавалі, ледзь з ног не валіліся, і раптам дрэва... Цяпер дождж ужо аслабеў. - Маці глянула на столь і зноў апусціла галаву. Бацька працягваў гаварыць, быццам гэта быў яго абавязак. - Не ведаю, як высока падымецца. Можа і вагон заліць.
- Я ведаю.
- Ты ўсё ведаеш.
Яна прамаўчала, а кардонка ў яе ў руцэ паволі хадзіла ўзад і ўперад.
- Мы што-небудзь зрабілі не так? - шукаў сабе апраўдання бацька. - Маглі што-небудзь зрабіць інакш?
Маці неяк дзіўна паглядзела на яго. Яе пабялелыя губы расцягнуліся ў задумлівую, спагадлівую ўсмешку.
- Ты ні ў чым не вінаваты. Перастань. Усё будзе добра. Цяпер усё мяняецца... паўсюль.
- Можа, вада... Можа, трэба зараз жа ехаць адсюль.
- Прыйдзе час - паедзем. Што трэба будзе рабіць, тое і зробім. А цяпер памаўчы. А то разбудзіш яе.
Місіс Уэйнрайт ламала галінкі і падсоўвала іх у агонь, ад якога ішоў густы сыры дым.
Знадворку пачуўся злосны голас:
- Я сам пагавару з гэтым сукіным сынам.
І ўслед - голас Эла каля самых дзвярэй:
- Куды лезеш?
- Я дабяруся да гэтай сволачы Джоўда!
- Не пушчу. Што табе трэба?
- Каб не яго дурная плаціна, нас бы даўно ўжо тут не было. А цяпер машына стаіць, як мёртвая.
- А ты думаеш, наша дужа жывая?
- Прапусці.
Голас Эла прагучаў холадна:
- Паспрабуй прабіцца.
Бацька не спяшаючыся падняўся з каленяў і пайшоў да дзвярэй.
- Спакойна, Эл. Я іду. Спакойна. - Бацька спусціўся ўніз. Маці пачула, як ён сказаў: - У нас хворая. Пройдзем вунь туды.
Дождж лёгенька стукаў па даху, а вецер, які нядаўна ўзняўся, размятаў яго ў бакі. Місіс Уэйнрайт адступіла ад печкі і глянула на Ружу Сарона.
- Хутка заднее, мэм. Вы паспалі б. Я пасяджу каля яе.
- Не, - адказала маці. - Я зусім не стамілася.
- Так я вам і паверыла, - сказала місіс Уэйнрайт. - Кладзіцеся, адпачніце хоць крыху.
Маці паволі разганяла кардонкай паветра.
- Вы па-сяброўску паставіліся да нас, місіс Уэйнрайт, - сказала яна. - Мы вам вельмі ўдзячныя.
Поўная нізенькая жанчына ўсміхнулася:
- Дзякаваць няма за што. У нас ва ўсіх адна доля. А калі б што з намі здарылася? Вы нам памаглі б.
- Безумоўна. Мы памаглі б.
- Ці каму другому.
- Безумоўна. Раней кожны клапаціўся толькі пра сваю сям'ю. Цяпер не так. Цяпер нам да ўсіх ёсць справа. І чым горш людзям, тым больш у нас клопату.
- Яго нельга было ўберагчы.
- Я ведаю, - сказала маці.
Руці глыбока ўздыхнула і зняла руку з твару. Святло лямпы асляпіла яе, яна павярнула галаву і паглядзела на маці.
- Нарадзілася? - запыталася Руці. - Дзіця ўжо ёсць?
Місіс Уэйнрайт падняла з падлогі мяшок і прыкрыла ім скрынку з-пад яблыкаў.
- Дзе дзіця? - дапытвалася Руці.
Маці правяла языком па губах.
- Дзіцяці няма. Яго і не было. Мы памыляліся.
- Гэ! - Руці пазяхнула: - А я думала, будзе дзіця.
Місіс Уэйнрайт села каля маці, узяла ў яе кардонку і сама пачала ёю махаць. Маці склала на каленях рукі, яе стомленыя вочы не адрываліся ад твару Ружы Сарона, якая ад знямогі забылася моцным сном.
- Ну дык прыляжце, - сказала місіс Уэйнрайт. - Вы ж каля яе будзеце. Варта ёй глыбей уздыхнуць, і вы прачняцеся.
- Добра. - Маці прылегла на матрац побач з дачкой. А місіс Уэйнрайт сядзела каля іх на варце.
Бацька, Эл і дзядзька Джон сядзелі ў дзвярах, пазіраючы, як займаецца светла-шэры золак. Дождж сціх, але хмары па-ранейшаму спрэс засцілалі неба. Першыя пробліскі святла адбіваліся ў вадзе. З дзвярэй была відаць імклівая плынь рэчкі, якая несла з сабой цёмныя галіны дрэў, скрыні, дошкі. Круцячыся вірам, вада вылівалася на паляну. Ад насыпу і следу не засталося. На самой паляне вада была спакойная, як у завадзі. Разліў акаймоўвала жоўтая пена. Бацька нахіліўся і паклаў сучок на сходкі, крыху вышэй узроўню вады. Яны бачылі, як вада паціху падабралася да сучка, лёгенька падхапіла яго і паволі панесла з сабой. Бацька паклаў другую галінку на цалю вышэй вады і сеў, не спускаючы з яе вачэй.
- Думаеш, і ў вагон прабярэцца? - запытаўся Эл.
- Хто ведае. Яшчэ да чорта вады з гор хлыне. Хто ведае. Можа, і дождж зноў палье.
Эл сказаў:
- Я ўсё думаю: калі вада прабярэцца ў вагон, усё падмочыць, але...
- Канешне, падмочыць.
- Але больш як на тры-чатыры футы над падлогай не падымецца, бо вада перальецца цераз шашу і разальецца ўшыркі.
- Чаму ты так думаеш?
- А я там, за вагонам, добра ўсё разгледзеў, - Эл выцягнуў руку. - Вось на колькі падымецца, не больш.
- Ну і няхай, - сказаў бацька. - Што нам да гэтага? Нас тут не будзе.
- Не, мы тут будзем. Тут грузавік. Як сыдзе паводка, цэлы тыдзень яшчэ давядзецца сушыць яго і выціраць.
- А што ты прыдумаў?
- Можна разабраць барты грузавіка і зрабіць насціл у вагоне - пакладзём на яго ўсё, што ў нас ёсць, і самім будзе дзе сядзець.
- Во як? А гатаваць як будзем, што будзем есці?
- Затое нічога не падмочыцца.
Навокал шэрае святло мацнела, набыло металічны водсвет. Плынь злізнула са сходак і другую галінку. Бацька паклаў яшчэ адну, крыху вышэй.
- Прыкметна прыбывае, - сказаў ён. - Відаць, так і зробім.
Маці неспакойна заварушылася ў сне. Раптам яна шырока расплюшчыла вочы і крыкнула, нібы перасцерагаючы:
- Том! Ой, Том, Том!
Місіс Уэйнрайт сказала ёй нешта супакойлівае. Павекі ў маці адразу сплюшчыліся, і яна пакурчылася ў сваім трывожным сне. Місіс Уэйнрайт паднялася і падышла да дзвярэй.
- Паслўхайце, - ціха сказала яна. - Мы адсюль не хутка выберамся. - Яна паказала рукой на той кут, дзе стаяла скрынка з-пад яблыкаў: - Так нядобра. Лішняе гора і лішнія слёзы. Можа, вы б... вынеслі яго і пахавалі дзе-небудзь?
Мужчыны маўчалі. Нарэшце бацька сказаў:
- Па-мойму, правільна. Лішнія слёзы. Але па закону так проста нельга пахаваць.
- Ці мала мы робім супраць закону, калі нічога больш не застаецца?
- Гэта праўда.
Эл сказаў:
- Пакуль вада не паднялася яшчэ вышэй, трэба разабраць барты грузавіка.
Бацька павярнуўся да дзядзькі Джона:
- Можа, ты яго пахаваеш, а мы з Элам перацягаем сюды дошкі?
Дзядзька Джон панура адказаў:
- Чаму я павінен гэта рабіць? Чаму не вы? Мне гэта не па душы. - Памаўчаўшы, сказаў: - Добра. Зраблю. Добра, пахаваю. Ну, нясіце сюды, дайце мне яго. - І, павышаючы голас, паўтарыў: - Нясіце! Дайце мне яго!
- Ш-ш... Пабудзіце ўсіх, - сказала місіс Уэйнрайт. Яна прынесла скрынку да дзвярэй і беражліва расправіла зверху мяшок.
- Рыдлёўка там, за табой, - сказаў бацька.
Дзядзька Джон узяў рыдлёўку. Ён саслізнуў па дошках уніз і апынуўся амаль па пояс у вадзе, у павольнай плыні. Свабоднай рукой ён прыняў скрынку і ўзяў яе пад паху.
Бацька сказаў:
- Пайшлі, Эл. Прынясём дошкі.
У шэрым світальным сутонні дзядзька Джон, ідучы ў вадзе, абагнуў вагон, мінуў грузавік Джоўдаў і па слізкім дарожным насыпе падняўся на шашу. Ён пакрочыў па ёй міма вагоннага лагера і дайшоў да месца, дзе бурлівая рэчка паварочвала амаль да самай дарогі, уздоўж якой тут рос лазняк. Ён кінуў на дол рыдлёўку і, трымаючы скрынку перад сабой, прадраўся скрозь зараснік, да імклівага рачнога патоку. Пастаяў там з хвіліну, пазіраючы на вірлівую плынь, на камякі жоўтай пены, што аселі ў кустах. Ён падняў скрынку да грудзей. Потым нахіліўся, апусціў яе на ваду і прытрымаў рукой. Ён гнеўна сказаў:
- Плыві, раскажы ім усё. Плыві па вуліцах, ператварыся ў тлен і раскажы ім хоць так. Толькі так і можаш гаварыць. Я нават не ведаю, хто ты - хлопчык ці дзяўчынка. І не хачу ведаць. Плыві, спыніся дзе-небудзь сярод вуліцы. Можа, тады яны зразумеюць. - Мяккім рухам рукі дзядзька Джон падпіхнуў скрынку ў самае цячэнне і адпусціў. Скрынка нізка асела ў вадзе, пайшла бокам, закруцілася ў вірлівай вадзе і паволі перавярнулася ўверх дном. Мяшок паплыў, і, падхопленая імклівым цячэннем, скрынка шпарка паплыла ўслед за ім і знікла з вачэй за кустоўем. Дзядзька Джон вярнуўся да шашы, схапіў рыдлёўку і пакрочыў назад, да лагера. Ён з плёскатам увайшоў у ваду і дайшоў да грузавіка, з якога бацька з Элам знімалі бартавыя дошкі - адна цаля на шэсць.
Бацька азірнуўся на дзядзьку Джона:
- Ну што, зрабіў?
- Ага.
- Тады вось што - ты дапамажы Элу, а я схаджу ў краму, куплю што-небудзь з ежы.
- Вазьмі свіной грудзінкі, - папрасіў Эл. - Я мяса хачу.
- Добра, - сказаў бацька і саскочыў з грузавіка, а дзядзька Джон палез на яго месца.
Калі ўцягнулі дошкі ў вагон, маці прачнулася і села на матрацы.
- Што вы надумалі рабіць? - запыталася яна.
- Хочам збіць памост, каб не заліло.
- Навошта? Тут у нас суха.
- А хутка не будзе. Вада прыбывае.
Маці цяжка паднялася з матраца і падышла да дзвярэй.
- Трэба адсюль выбірацца.
- Нельга, - запярэчыў Эл. - Усё наша дабро тут. Грузавік тут. Усё, што ў нас ёсць.
- А бацька дзе?
- Пайшоў купіць што-небудзь на снеданне.
Маці зірнула ўніз, на ваду. Да падлогі вагона засталося ўжо толькі шэсць цаляў. Маці вярнулася да матраца і паглядзела на дачку. Іх позіркі сустрэліся.
- Ну, як ты сябе адчуваеш? - запыталася маці.
- Стамілася. Зусім без сіл.
- Зараз накармлю цябе снеданнем.
- Мне есці не хочацца.
Місіс Уэйнрайт падышла і стала каля маці.
- Выгляд у яе цяпер добры. Зусім малайчына.
Вочы Ружы Сарона пыталіся аб нечым у маці, але тая старалася ўнікнуць гэтага пытання. Місіс Уэйнрайт адышла ад печкі.
- Ма...
- Ну што табе?
- Усё... добра?
Маці не стрывала. Яна апусцілася каля дачкі на калені.
- У цябе яшчэ будуць дзеці, - сказала яна. - Мы зрабілі ўсё, што маглі.
Ружа Сарона пачала кідацца па матрацы і прыўзнялася на локці.
- Ма!
- Ты невінаватая.
Ружа Сарона зноў адкінулася назад і закрыла вочы сагнутымі ў локцях рукамі. Руці падабралася блізка да сястры і з жахам пазірала на яе. Потым хрыпла прашаптала:
- Яна хворая, ма? Яна памрэ?
- Ну што ты. Яна паправіцца. Паправіцца.
У вагон увайшоў бацька з пакункамі ў руках.
- Ну, як яна?
- Усё добра, - адказала маці. - Усё будзе добра.
Руці далажыла Ўінфілду:
- Яна не памрэ. Так ма сказала.
А Ўінфілд, калупаючы ў зубах трэсачкай, прамовіў, зусім як дарослы:
- Мне гэта і так вядома.
- Адкуль?
- Не скажу, - адказаў Уінфілд і выплюнуў з рота абломак трэсачкі.
Маці распаліла агонь у печцы апошнім суччам, падсмажыла грудзінкі і зрабіла да яе падліўку. Сярод бацькавых пакупак быў і заводскі хлеб. Убачыўшы яго, маці нахмурылася:
- Грошы яшчэ засталіся?
- Не, - адказаў бацька. - Але ж вельмі есці хочацца.
- І ты купляеш хлеб, - папракнула яго маці.
- Мы вельмі прагаладаліся. Усю ж ноч працавалі.
Маці ўздыхнула:
- А як далей будзем жыць?
Пакуль яны елі, вада падымалася ўсё вышэй і вышэй. Эл паспешліва праглынуў сваю порцыю і разам з бацькам пачаў збіваць памост. Пяць футаў шырынёй, шэсць футаў даўжынёй, чатыры футы ад падлогі. А вада падабралася ўжо да дзвярэй, доўга стаяла там, нібы ў нерашучасці, і нарэшце патроху прасачылася ў вагон, пачала заліваць падлогу. І зноў паліў дождж - цяжкія, буйныя кроплі запляскалі па вадзе, як і раней, гулка барабанілі па даху.
Эл сказаў:
- Ну, давайце падымем матрацы. І коўдры туды ж, а то намокнуць.
Яны навалілі ўвесь свой скарб на высокі памост; вада ўсё больш залівала падлогу. Бацька, маці, Эл і дзядзька Джон з чатырох рагоў паднялі матрац, на якім ляжала Ружа Сарона, і паклалі паверх рэчаў.
Ружа Сарона запратэставала:
- Я сама. Я здаровая.
А вада празрыстай плёнкай распаўзалася па падлозе. Ружа Сарона шапнула нешта маці, і тая ўсунула руку пад коўдру, памацала грудзі і кіўнула галавой.
У другім канцы вагона Ўэйнрайты стукалі малаткамі, майструючы і сабе памост. Дождж памацнеў, але неўзабаве сціх зусім.
Маці паглядзела сабе пад ногі. Вада ў вагоне паднялася ўжо на паўцалі.
- Гэй, Руці, Уінфілд, - спалохана закрычала маці, - залязайце наверх. Прастудзіцеся. - Яна падсадзіла дзяцей наверх, і яны нязручна прымасціліся каля матраца Ружы Сарона. І раптам маці сказала: - Трэба выбірацца адсюль.
- Нельга, - запярэчыў бацька. - Эл правільна кажа: усё наша дабро тут. Мы зараз дзверы знімем і пакладзём наверх - больш месца будзе.
Джоўды ўсёй сям'ёй згрудзіліся на памосце, маўклівыя, панурыя. Паводка затапіла вагон на шэсць цаляў вышэй падлогі, і толькі тады яе воды пераліліся цераз дарожны насып і залілі бавоўнішча па другі бок шашы. Астатак дня і ўсю ноч мужчыны спалі, прамоклыя, бок у бок адзін з адным на знятых з пазоў дзвярах. Маці ляжала разам з Ружай Сарона. Яна то перашэптвалася з дачкой, то ціха сядзела на матрацы ў глыбокім роздуме. Рэшткі куплёнага хлеба яна хавала пад коўдрай.
Дождж цяпер ішоў перагонамі - кароткія шквалы змяняліся зацішшам. Раніцай бацька пайшоў, плюхаючы па вадзе, па лагеры і вярнуўся з дзесяткам бульбін у кішэнях. Маці хмура пазірала, як ён выламаў некалькі дошак з унутранай абшыўкі вагона, распаліў печку і зачарпнуў вады ў кацялок. Потым усе елі рукамі гарачую бульбу, ад якой ішла пара. І калі гэтая апошняя іх ежа была з'едзена, усе моўчкі ўтаропіліся на шэрую ваду пад імі, а ноччу доўга не клаліся спаць.
Наступнай раніцай яны прачнуліся змрочныя. Ружа Сарона нешта шапнула маці на вуха, і тая паківала галавой і сказала:
- Ага. Самая пара. - І павярнулася да мужчын, якія ляжалі на знятых вагонных дзвярах. - Мы ідзём адсюль, - з суровай рашучасцю абвясціла яна. - Пашукаем дзе вышэйшага месца. Вы як хочаце - заставайцеся тут ці не, а я забяру з сабой Разашарну і малых.
- Нельга нам ісці, - слаба запратэставаў бацька.
- Дык не ідзіце. Данясіце толькі Разашарну да шашы і вяртайцеся. Дажджу ўжо няма, мы пойдзем.
- Добра. Мы таксама ідзём.
Эл сказаў:
- Я, ма, не пайду.
- Чаму гэта?
- Дык жа ж... Эгі... ну, мы з ёю...
Маці ўсміхнулася:
- Ну, канешне, канешне. Ты заставайся, Эл. Панаглядаеш тут за нашымі пажыткамі. Як спадзе вада, мы... вернемся. Давайце ж хутчэй, пакуль дажджу няма, - сказала яна бацьку. - Падымайся, Разашарна. Знойдзем сухое месца.
- Толькі я сама.
- Потым пройдзеш крыху там, на шашы. Ну, падстаўляй спіну, бацька.
Бацька саслізнуў па сходках у ваду і стаў чакаць каля вагона. Маці памагла Ружы Сарона злезці з памоста і падвяла яе да дзвярэй. Бацька ўзяў яе на рукі, падняў як мага вышэй і, асцярожна ступаючы ў глыбокай вадзе, абагнуў вагон і пайшоў да шашы. Там ён апусціў дачку на бетон, моцна трымаючы яе. Дзядзька Джон ішоў за ім следам з Руці на руках. Маці таксама саслізнула ў ваду, і спадніца на ёй узнялася пузыром.
- Ну, Уінфілд, садзіся мне на плечы. Эл... як вада спадзе, мы вернемся. Эл... - Маці памаўчала. - Калі... калі, можа, прыйдзе Том... скажы яму, што мы вернемся. Скажы, каб ён быў асцярожны. Уінфілд, садзіся на плечы... ага, вось так. Не матляй нагамі. - Пахістваючыся, яна пайшла па вадзе, якая даставала ёй да грудзей. Мужчыны памаглі ёй узабрацца на дарожны насып і знялі з яе плячэй Уінфілда.
Стоячы на шашы, яны паглядзелі на лагер - цёмна-чырвоныя прамавугольнікі таварных вагонаў, грузавікі і легкавыя машыны глыбока сядзелі ў вадзе, якая паволі калыхалася. Пакуль яны стаялі, замжэў дробны дожджык.
- Трэба ісці, - сказала маці. - Ты зможаш ісці сама, Разашарна?
- Галава крыху кружыцца. І ўсё цела баліць, як пабітае.
Бацька незадаволена буркнуў:
- Ісці... А куды ісці?
- Не ведаю. Ну, пайшлі, вазьмі Разашарну пад руку. - Маці ўзяла дачку пад правую руку, бацька пад левую. - Пашукаем сухога месца. А што рабіць? Вы ўжо другі дзень ходзіце ў мокрым.
Яны паволі пайшлі па шашы. Ім чуваць было, як недалёка ад насыпу шуміць імклівая рэчка. Руці і Ўінфілд ішлі разам крыху наперадзе, плюхаючы чаравікамі па мокрым бетоне. Джоўды доўга ішлі, не паскараючы кроку. Неба пацямнела, дождж памацнеў. Па шашы не праехала ніводнай машыны.
- Трэба спяшацца, - сказала маці. - Калі Разашарна моцна прамокне, проста не ведаю, што з ёю будзе.
- А куды нам спяшацца, ты не сказала, - з'едліва прамовіў бацька.
Дарога павярнула ўбок разам з лукавінай рэчкі. Маці акінула позіркам затопленыя палі. Далёка наперадзе, злева ад дарогі, на пакатым грудку стаяла пачарнелая ад дажджу адрына.
- Гляньце! - зарадавалася маці. - Вунь, вунь! Ручаюся, там суха. Пойдзем туды, перачакаем дождж.
Бацька ўздыхнуў:
- Каб гаспадар нас не прагнаў.
Наперадзе, на абочыне, Руці заўважыла чырвоную плямку. Яна кінулася туды. Кволая сцяблінка дзікай герані з адной толькі кветкай, пабітай дажджом. Руці сарвала яе. Яна асцярожна адшчыкнула адзін пялёстак і прыляпіла яго сабе на нос. Да яе падбег Уінфілд.
- Дасі мне адзін? - патрабавальна запытаўся ён.
- Не, сэр! Усё маё. Я сама знайшла, - адказала Руці і наляпіла сабе на лоб другі пялёстак, падобны на пунсовае сэрца.
- Дай мне, Руці, адзін, ну дай! - Уінфілд працягнуў руку, каб вырваць у яе кветку, але прамахнуўся, і Руці заляпіла яму аплявуху. Ён застыў на месцы, потым губы ў яго задрыжалі і да вачэй падступілі слёзы.
У гэты момант падышлі астатнія.
- Ну, што такое? - захвалявалася маці. - Што тут у вас?
- Ён хацеў забраць у мяне кветку.
Скрозь слёзы Ўінфілд сказаў:
- Мне толькі адзін пялёстак... Я таксама хачу на нос.
- Дай яму, Руці.
- Няхай сам знойдзе. Гэта маё.
- Руці! Дай яму адзін пялёстак.
У матчыным тоне дзяўчынка пачула пагрозу і перамяніла тактыку.
- На, калі ласка, - сказала яна, прытварыўшыся добранькай. - Толькі я сама табе прыляплю. - Дарослыя пайшлі далей. Уінфілд падставіў ёй твар, Руці наслініла языком пялёстак і балюча прыпляснула яго да носа Ўінфілда. - Ах ты, сволач! - ледзь чутна сказала яна. Уінфілд пакратаў пялёстак пальцам і прыціснуў яго яшчэ шчыльней. Дзеці пабеглі даганяць дарослых. Руці ўжо страціла ўсякую цікавасць да кветкі. - На, бяры, - сказала яна Ўінфілду. - Вось табе яшчэ. Наляпі на лоб.
Раптам справа ад дарогі на рэчку са свістам наляцеў дождж. Маці закрычала:
- Хутчэй! Зараз як ліне! Лезьце праз агароджу. Тут бліжэй. Спяшайцеся! Пацярпі, Разашарна, ужо блізка.
Бацька з маці ледзь не волакам пацягнулі Ружу Сарона цераз прыдарожную канаву і памаглі ёй пралезці праз агароджу. І тут лівень дагнаў іх. Патокі вады абрынуліся на іх. Яны пайшлі па гразкай зямлі і падняліся на грудок. Цёмнай адрыны амаль не было відаць за шчыльнай завесай дажджу. Ён свістаў і гучна плюскатаў, і парывы ветру гналі яго перад сабой. Ружа Сарона раптам паслізнулася і павісла на чужых руках.
- Бацька, можа, ты яе данясеш?
Бацька нахіліўся і падхапіў Ружу Сарона на рукі.
- Усё роўна ўжо прамоклі, - сказаў ён. - Уінфілд, Руці, хутчэй! Бяжыце наперад.
Цяжка дыхаючы, яны дабраліся да адрыны, якая добра прамокла ад дажджоў, і, пахістваючыся ад стомы, зайшлі пад павець. З гэтага боку дзвярэй не было. На зямлі валяліся ржавыя сельскагаспадарчыя прылады, дыскавы плуг, паламаны культыватар, жалезнае кола. Дождж калаціў па даху і, як полагам, закрываў уваход. Бацька беражліва апусціў Ружу Сарона на запэцканую маслам скрынку.
- Божа літасцівы! - выгукнуў ён.
Маці сказала:
- Можа, дзе тут ёсць сена. Гляньце, вунь дзверы. - Яна расчыніла дзверы, якія зарыпелі на ржавых завесах. - Сена! - закрычала яна. - Ідзіце сюды.
У адрыне было цёмна. Святло прабівалася толькі праз шчыліны ў дашчанай сцяне.
- Кладзіся, Разашарна, - сказала маці. - Кладзіся адпачні. Трэба цябе як-небудзь абсушыць.
Раптам пачуўся голас Уінфілда:
- Ма!.. - але стукат дажджу заглушыў яго словы. - Ма!
- Ну што там? Што табе?
- Глянь! Вунь туды, у кут.
Маці паглядзела ў той бок. У паўзмроку віднеліся дзве чалавечыя постаці - у куце ляжаў на спіне мужчына, каля яго сядзеў хлопчык і вялікімі вачамі пазіраў на прышлых. Потым ён паволі падняўся на ногі, падышоў да маці і запытаўся хрыплым голасам:
- Вы тут гаспадары?
- Не, - адказала маці. - Проста мы хаваемся ад дажджу. У нас хворая. Ці няма ў вас сухой коўдры, каб накінуць на яе, пакуль не прасушым яе адзежу?
Хлопчык пайшоў у свой кут, прынёс адтуль брудную ватовую коўдру і падаў яе маці.
- Дзякуй, - сказала яна. - А што з тым чалавекам?
Хрыплым голасам хлопчык прагаварыў на адной ноце:
- Спачатку ён хварэў... а цяпер памірае з голаду.
- Што?
- З голаду памірае. Захварэў на зборы бавоўны. Шэсць ужо дзён нічога не еў.
Маці пайшла ў кут адрыны і паглядзела на чалавека, які там ляжаў. Яму было гадоў пяцьдзесят. Зарослы шчаціннем худы, нібы абцягнуты скурай твар, адсутны, застылы погляд шырока расплюшчаных вачэй. Хлопчык стаў побач з ёю.
- Твой тата? - запыталася маці.
- Ага.. То казаў, есці не хочацца, то - толькі што паеў. Усё мне аддаваў. А цяпер зусім аслабеў. Варухнуцца не можа.
Стукат дажджу па даху цяпер перайшоў у супакойлівае шастанне. На высахлым твары чалавека варухнуліся губы. Маці апусцілася каля яго на калені і падставіла яму вуха. Яго губы зноў варухнуліся.
- Ага, так, так, - сказала маці. - Вы не трывожцеся. З ім усё будзе добра. Пачакайце, я толькі зніму мокрую сукенку з дачкі.
Маці вярнулася да Ружы Сарона.
- Скідай усё, - загадала яна і загарадзіла яе падшыванай коўдрай. Ружа Сарона зняла з сябе ўсё, і маці абкруціла яе коўдрай.
Хлопчык зноў падышоў да маці.
- Я нічога не ведаў. Ён гаварыў, што паеў ці што есці не хоча. Учора позна вечарам я пайшоў, разбіў акно і ўкраў хлеба. Даў яму трохі пажаваць. А яго вырвала, і пасля гэтага ён яшчэ больш аслабеў. Яму каб супу ці малака. У вас няма грошай на малако?
Маці сказала:
- Ты памаўчы, хлопчык. Супакойся. Што-небудзь прыдумаем.
Хлопчык закрычаў:
- Ён памірае, я ж кажу вам! Я кажу вам, ён з голаду памірае.
- Памаўчы, - паўтарыла маці і паглядзела на бацьку і дзядзьку Джона, якія разгублена і бездапаможна пазіралі на нямоглага. Матчыны вочы на момант сустрэліся з вачамі дачкі, потым зноў іх позіркі сышліся. І абедзве жанчыны глыбока зазірнулі ў душу адна адной. Ружа Сарона дыхала цяжка, перарывіста. Яна сказала:
- Добра.
Маці ўсміхнулася:
- Я так і ведала. Я ведала! - Яна апусціла галаву і ўтаропілася на свае моцна сашчэпленыя на каленях рукі.
Ружа Сарона прашаптала:
- Вы... усе вы... выйдзеце?
Дождж цяпер біў па даху з мяккім шапатлівым шумам.
Маці падалася наперад і далонню адкінула зблытаныя валасы з ілба дачкі і пацалавала яе ў лоб, потым рашуча ўстала.
- Пойдзем адсюль усе, - сказала яна. - Пойдзем усе ў павець.
Руці раскрыла рот, каб нешта сказаць.
- Маўчы, - загадала маці. - Маўчы і ідзі. - Яна прапусціла ўсіх міма сябе, павяла з сабой хлопчыка і зачыніла рыплівыя дзверы.
З хвіліну Ружа Сарона нерухома сядзела ў шапатлівай адрыне. Потым цяжка падняла сваё стомленае цела і захуталася ў коўдру. Яна марудна прайшла ў кут і спынілася, пазіраючы на змарнелы твар, на шырока расплюшчаныя спалоханыя вочы чалавека. Потым паволі лягла каля яго. Ён слаба пакруціў галавой. Ружа Сарона адкінула край коўдры і агаліла грудзі.
- Так трэба, - сказала яна, прыціснулася да яго і прыгарнула яго галаву да грудзей. - Ну вось... - прамовіла яна, - вось так... - Рука яе прасунулася яму за галаву, падтрымліваючы яе. Пальцы ласкава гладзілі яго валасы. Яна падняла вочы, скіравала позірк у глыбіню адрыны, губы яе стуліліся і застылі ў таямнічай усмешцы.