epub
 
падключыць
слоўнікі

Генадзь Бураўкін

«Я хачу прайсці па зямлі...»

Я хачу прайсці па зямлі

Самым верным, любімым сынам.

Каб дарогі мяне вялі

Пад вятрамі прасторам сінім,

 

Каб нямоўчна ў мяне на плячах

Росным раннем спявалі птушкі,

Каб я кветкамі ўсімі прапах

Ад падэшваў да самай макушкі,

 

Каб легенды глухой сівізны

Мне з даверам дубы шапталі

I крыніц залатыя званы

Для мяне калыхалі хвалі.

 

Я хачу прайсці па зямлі,

Каб мне людзі сэрца адкрылі,

Слёзы шчасця і мазалі

Па-братэрску са мной падзялілі,

 

Каб мне роўную частку далі

Сваёй ношы нялёгкай пранесці

I свае галасы ўплялі

У мае няхітрыя песні...


1960?

Тэкст падаецца паводле выдання: невядомае
Крыніца: http://znichka.ucoz.com/load/1-1-0-122