epub
 
падключыць
слоўнікі

Якуб Колас

Думкі

Ой вы, думкі, думкі,

Сэрца майго раны!

Ці вы мае дзеці,

Ці вы кім насланы?

 

Што ж вы завіліся

Віхрам нада мною,

І няма ніколі

Мне ад вас спакою?

 

Рад бы я не думаць

І не знацца з вамі,

Ды без запытання

Плывяце вы самі,

 

Плача маё сэрца,

Хоць без слёз, ды горка,

Як пачнецца ваша

Смутная гаворка.

 

І на маю душу

Леглі вы туманам,

Мітуслівым роем,

Смутным караванам.

 

Ой вы, мае думкі!

Ці вы кім зражоны,

Што так невясёлы,

Што так засмучоны?

 

Рад бы я не думаць

І не знацца з вамі,

Толькі ж проці волі

Плывяце вы самі.

 

[1909]


[1909]

Тэкст падаецца паводле выдання: Колас, Я. Збор твораў: у 20 т. Т. 1: Вершы, 1898―1910