Да працэсу над «Грамадой»
Браты, мы ведаем —
Няроўнае змаганне:
Супроць вас штык,
Астрогі, катаванне,
Прадажных сведак легіён
І панскі ўвесь сінедрыён —
Камедыя паноў,
Над праўдай наруганне.
Але вы не адны:
За вас, браты, мільёны
Нясуць панам
Праўдзівыя законы:
Гісторыяй асуджаны паны;
Ім не адпусціцца віна —
Прыпомніцца ім здзек,
Мейштовічам шалёным!
Бо дні іх злічаны,
І сходзяць іх часіны —
Калоцяцца паны,
Як горкія асіны,
А слова смелае
Наводзіць на іх жах...
Не, ідал не ўстаіць
На гліняных нагах, —
Затопіцца ў крыві
Замучанай краіны!
А Польшча — не паны
Тыранскае закваскі,
Пілсудчыны-маны
Прыслужнікі-падпаскі, —
Ёсць людзі там высокай чэсці,
Праціўна ім бруд панскі несці,
Наблізяць час яны развязкі.
Тады, паны, тады, пілаты,
Надыдзе грозны час расплаты!
24/IV 1928