Ад сталіцы да сталіцы,
З краю ў край
Ходзяць чуткі — навальніцы
Зноў чакай.
Бляск пагульвае крывавы
Ў пушчы хмар,
Голад скаліцца кастлявы:
Дай ахвяр!
План складаюць злыя сілы
Патайны.
Лічыць труны і магілы
Здань вайны.
На Саветы зрок пражоры
Косіць звер —
Майстар «расавых тэорый»,
Фюрэр гер.
Злыган з ім і Мусаліні,
Самурай.
На чужыя квапяць скрыні,
Дык зважай!
Кроў людская землі росіць
Трох краін!
Пан Бек стаўся «шворнам» восі
Рым — Берлін.
Тарахціць вайны павозка
Скрыпам злым,
Аж з-пад «шворна і падоска»
Ідзе дым.
Дык няхай на лбе запішуць
Ездакі:
Зломяць голаў, зубы скрышаць
Бандзюкі.
Разляцяцца ў прах іх спіцы
У пуці.
Ім савецкае граніцы
Не прайсці!
12/ІІ 1938