Прывет вам, племя маладое,
Зямель савецкіх яснацвет!
Дарога ваша — шлях герояў,
У новы дзень бліскучы след.
Як сонца, першыя ў паходзе,
Стыхіям злым наперакор,
Ішлі вы з песняй, як разводдзе,
На штурмы скал і дзікіх гор.
Ішлі вы, юнасць-чарадзеі,
Зʼяднанай сілай грамады,
Перамагаючы завеі,
Дажджы, і суш, і халады.
І голас вашай песні звонкай
Лавіў прастор нябёс, зямлі,
І ціш балот, і шчыт сасонкі,
Дзе густа збіліся камлі.
Усюды, дзе патрэбна зброя,
Каб перашкоды ўсе скрышыць,
Вы неслі сэрца маладое
І жар юнацкае душы.
І было крэпка ваша раме,
І не стамлялася рука,
Бо Ленін быў заўсёды з вамі,
Быў з вамі гарт бальшавіка.
І вам дарогу саступалі
Пустэлі, пушчы і снягі,
Бо даручаў таварыш Сталін
Вам камсамольскія сцягі.
Прывет вам, войска маладое,
Загартаванае ў баях!
Дарога ваша — след герояў,
Былінны эпас, зорны шлях.
Ідзіце ж гэтак жа і далей!
Прывет вам, родныя, прывет!
Пад камсамольскай гулкай хваляй
Ці ж устаіць варожы свет?!
8/ІІІ 1936