Аб змене чырвонай даўно грыміць слава.
Здабыў ты законнае права,
Атрад баявы камсамольскі, на гэта.
Вы ў першых шарэнгах са звонкаю песняй
Напорна ішлі, як прадвесне,
На штурмы стыхіі пад сцягам Саветаў.
Крышыліся скалы пад вашым напорам,
Вы смела ўзнімаліся к зорам,
Каб сталінскім шляхам прабіцца ў вышыні.
Вас ведаюць тундры, тайга, Запалярʼе,
Гарачы пясок Амударʼі,
Суровы Памір, Каракума пустыні.
Вас ведаюць нетры зямлі і глыб мора, —
Усюды ішлі вы ў дазоры,
І голас ваш звонкі ўзнімаўся над долам.
І ведае вораг, ліхі чужаніца,
Як моцна стаіць на граніцы
Адданая, мужная раць камсамола.
І ўсюды, дзе толькі вас партыя звала,
Ішлі вы, як буры навала,
З парывам юнацкім, з адважнаю воляй.
А следам за вамі пачэснай дарогай
Нязменна ішла перамога,
Як моладасць ваша, як светлая доля.
Дык з Новым жа годам вітаю вас шчыра!
Няхай яшчэ вышай і шырай
Узносіць вас юнасць у ясныя далі,
Каб новаю сілай і новым узлётам
Была ваша справа, работа,
Каб новыя песні пра вас мы складалі.
24/ХІІ 1937