Шкода, сынку, што зноў я ў дарозе,
Што ў дзень гэты я зноў адзінок,
Ды я ў мыслях стаю на парозе
І віншую цябе, мой сынок.
А чаго ж я табе пажадаю
У твой дзень, што закончвае год?
Пажадаю — да роднага краю
Нам сабрацца ў шчаслівы паход.
Ды каб Юрку свайго мы сустрэлі,
Ды каб ён быў здароў і шчасліў,
Каб збыліся сны-мары на дзеле,
Аб якіх ты гадаў або сніў.
Абнімаю цябе я, мой сыне,
Да гарачага сэрца тулю.
Дык расці ж нам на радасць, краіне,
Каб праславіў ты нашу зямлю.
31/І 1943