Перад Новым, 1909 г.
Бывай здароў, мой год старэнькі!
У маіх ты думках будзеш жыць
І многа будзеш майму сэрцу
Ў мінуту жалю гаварыць.
Я буду помніць, доўга помніць:
Сваё бадзянне ў гэты год,
Свае надзеі і сумненні
За родны край, за свой народ,
І тых людзей, што йшлі са мною,
Хто зваў на працу, дух будзіў,
Хто весяліў мяне у смутку,
Каго я шчыра палюбіў...
Дык будзь здароў, мой год старэнькі!
Ў маёй душы ты будзеш жыць
І многа будзеш майму сэрцу
Ў мінуту жалю гаварыць.
[1908]