epub
 
падключыць
слоўнікі

Якуб Колас

На прастор!

Гэй, на волю, на разлогі

Смужных даляў і палёў,

Дзе ва ўсе канцы святоў

Леглі вольныя дарогі!

 

Дзе без хітрыкаў, праўдзіва

Колас гутарку вядзе,

І дзе дуб стары гудзе

Не лісліва і фальшыва,

 

А сваёй старой гудою,

Як і век ён гаварыў,

І дзе ўсю красу раскрыў

Луг шырокі над ракою.

 

Гэй, туды, дзе неба з долам

Абняліся, як браты, —

Хоць на міг забудзеш ты

Гэтай фальшы нудны шолам!

 

1914


1914

Тэкст падаецца паводле выдання: Колас, Я. Збор твораў: у 20 т. Т. 2 : Вершы 1911―1938