epub
 
падключыць
слоўнікі

Якуб Колас

Народу-барацьбіту

Няхай землю імгла аблягае

І звісае над ёю туман, —

Іх разгоніць вясна маладая,

Вытча новы зямлі сарафан.

 

Няхай цёмная сіла сваволіць

І злы намысел тоіць варʼят, —

Не было і не будзе ніколі,

Каб хадзіў ясны месяц назад.

 

Няхай вораг-звяруга лютуе

        І навалаю чорнай плыве, —

Ён магілу сабе сам рыхтуе

Пад асінаю ў дзікай траве.

 

  Няхай доўгія ночы находзяць

І трывожныя веюць вятры, —

Іх адолееш ты, мой народзе,

І табе зложаць гімн песняры.

 

Дык гуртуй жа магутныя сілы —

Вораг люты штурмуе наш дом.

Ты абруш на яго прах магілы,

        Разразіся над ім перуном!

 

16/Х 1941


16.10.1941

Тэкст падаецца паводле выдання: Якуб Колас. Т. 3 : Вершы, 1939―1945