epub
 
падключыць
слоўнікі

Якуб Колас

Паэт, не насі гітары!

За паэтам бегаў лісам

Смех гадоў з паўсотні,

А калі паэт стаў лысым,

Смех – гаў! з падваротні:

 

– Стой, паэце, прыпыніся!

Што ж ты без гітары?

Ці любошчы апякліся

І паблеклі мары?

 

А казаў ты нам улетку,

        Што аб яе шчочку

Можна проста сігарэтку

Прыпаліць уночку.

 

Эх, паэце! Жыў ты, марыў

Аб жывой крыніцы,

А знайшоў пад гром гітары

Ты яе ў спадніцы!

 

Ну, зірні ж ты, мой бядача,

Як смуткуе хата,

А ў ёй хтось маленькі плача,

          Нібы кліча: «Та-а-та!»

 

Не хадзі ж у поўнач, браце,

І не лазь у гушчары:

Каб не быць шчэ трэцяй маці,

Не насі гітары.

 

30/ХІ 1953


30.11.1953

Тэкст падаецца паводле выдання: Якуб Колас. Т. 4