epub
 
падключыць
слоўнікі

Якуб Колас

Памяці Караленкі

Згас агонь жывога слова!

Ноч стаілася сурова —

Змоўкла чулая струна,

 

Што будзіла і ўздымала,

Да змагання выклікала, —

Перарвалася яна!..

 

Непадкупны, светлы, чысты,

Ты прайшоў свой шлях цярністы,

Не схіліўшы галавы,

 

І удумным, смелым словам

Ты нёс смерць ліхім намовам,

Брэд развейваў векавы.

 

Як прарок, ты нёс народу

Людскасць, праўду, вольнасць, згоду

І к дабру яго ты зваў.

 

З гэтай праўдаю глыбока

Празарлівым сваім вокам

Ў сэрцы нашы зазіраў...

 

Згас агонь жывога слова,

Змоўкла чулая струна!

Ноч маўкліва і сурова,

Цяжка стала цішыня!

 

 

[1922]


[1922]

Тэкст падаецца паводле выдання: Колас, Я. Збор твораў: у 20 т. Т. 2 : Вершы 1911―1938