epub
 
падключыць
слоўнікі

Якуб Колас

Памяці П. Асіпенка і А. Сярова

Журбою заслаўся наш радасны дзень,

Паў смутак на сэрца краіны:

Жыцця маладога пагаснуў прамень —

Не стала Сярова, Паліны!

Я слоў не знаходжу, каб выказаць жаль

І вострую горыч утраты.

Ужо не сустрэне надземная даль

        Арліных іх крылляў разнятых.

Не ўчуюць раўніны і выступы гор

        Іх звонкую трэль перамогі,

Што край падымала далёка ў прастор

І новыя ткала дарогі.

Любімцы народа, героі вышынь

Не ведаюць страху ніколі,

І вышай ды вышай у ясную сінь

Імклівіць палёт іх саколлі.

Сляды агнявыя іх слаўных дарог

        Што здолее ў свеце зацерці?

Вясёлкаю вечнай шлях іхні пралёг, —

        Няма забыцця ім і смерці!

 

13/V 1939


13.05.1939

Тэкст падаецца паводле выдання: Якуб Колас. Т. 3 : Вершы, 1939―1945