epub
 
падключыць
слоўнікі

Якуб Колас

Панам

Эх, панове, «ніц не бэндзе»;

Сапсуе пан справу «вшэндзе»,

Бо занадта пан «гаронцы»!

І не ў панскіх інтарэсах

Здзек такі чыніць «на крэсах»,

Нечуваны здзек пад сонцам!

 

Дэфензівы і нагайкі,

Як было і ў Мікалайкі:

Цар — настаўнік ваш, панове!

Пастарункі ды касцёлы,

І ніводненькае школы

Беларусам у іх мове!

 

Уціск, гвалт і катаванне,

Здзек з народу, мардаванне,

Ідзе «польскасць» там нахрапам.

Як даўней, так і цяпер там

Паліцэйскі ходзіць фертам —

Ёсць разгон у вас сатрапам!..

 

Толькі ж спосаб ваш не новы:

Ён ужыты Мураўёвым,

Хоць не гэтак, мо, шырока...

Не збудуеш так дзяржавы —

Будзе панства без Варшавы,

Быў жа прыклад недалёка.

 

А ўсе вашы выкрунтасы

Не пагналі б зноў «до лясу» —

Ці той «ляс» забыла панства?

Няхай чыніць гвалт нялюдскі

Ваш «падкрулек», пан Пілсудскі,

«Круль» маны і ашуканства.

 

Вы ж ліжыце яму пяты,

Бо паны на гэта — хваты:

Вы — рабы або тыраны!

Вы забылі пра няволю,

Пра сваю і нашу долю,

Як сцякалі кроўю раны...

 

Услаўляйце ж вашых хватаў,

Як Мейштовіч, такіх катаў,

Папіхайце вольнасць ботам!

На ўсё плюйце — што законы!

Душыць вас прывід чырвоны —

У астрог паслоў, чаго там!..

 

А цяпер стаўляйце «круля»:

Ён мазгі ўжо вам намуляў,

Толькі ж «круль» не дасць збавення...

Злезьце лепей, паны, з даху:

Не збудуе панства «гмаху»

Заржавелым тым начэннем!

 

Вы не здольны жыць у згодзе —

«Мондры поляк, ды па шкодзе».

 

13/ІІ 1927


13.02.1927

Тэкст падаецца паводле выдання: Колас, Я. Збор твораў: у 20 т. Т. 2 : Вершы 1911―1938