Яшчэ не стлеў у полі дрот калючы —
Агідны след знішчэння і вайны;
Яшчэ на могілках буяюць бурʼяны,
Дзе тысячы галоў зляглі ў крывавай бучы;
Яшчэ не зроўнены накопаныя кручы
І не засеяны аблогі-дзірваны, —
А вы, прыслужнікі драпежнага Ваала,
Зноў вострыце загнутыя дзюбы.
І сліна пырскае з запененай губы:
Вам трэба кроў — крыві пралітай мала:
Ражном у горле вам сябрына наша стала,
Дзе самі ўладары — нядаўнія рабы.
Ну, што ж? Пускайце ў ход і подкуп і намовы,
Нацкоўвайце сабак пад граканне варон,
Але вам не стрымаць той вольнасці разгон
І бег яго няўхільны, паступовы,
Што ў пух і прах развейвае аковы,
Каб іншы выснаваць парадак і закон!
1927