БЕЛАРУСКАЯ ПАЛІЧКА

Што за грукат навакола?

Што за шум, за гукі?

Два Іваны і Мікола

Цягнуць воз навукі.

Узяў прэзас дышаль мужна,

Здабывае ладу,

Два Іваны ў ногу дружна

Папіхаюць ззаду.

А на возе, Божа мілы,

          Колькі той паклажы!

Адзін толькі план завілы

Фунтаў з дзесяць важыць.

План не просты, адмысловы –

Прыпяцкай нізіны!

Эх, ламалі тут галовы,

Папагнулі спіны!

Чаму ж змоўкла ода-казка

Вакол таго плана?

Запытайце, калі ласка,

          Большага Івана.

Проста – оды, гімн прапеты

Кінулі ў бярэзнік.

Колькі ж грошай зʼеў план гэты,

Няхай скажа Рэзнік.

Ёсць між кладзі навуковай

Тарфяныя тлушчы,

І кляшчы з глухой дубровы

Белавежскай пушчы,

І карэнні кок-сагызу

          З балатнянай плошчы –

Хоць, як глянеш на іх зблізу,

Чэзлыя, бы мошчы.

Ёсць і вірусы таксама,

Што раслі ў палацы, –

Словам, вынік і праграма

Навуковай працы.

...............................................

Воз грыміць і ўсяму краю

Скарбаў суліць густа,

Для падняцця ж ураджаю

          На тым возе пуста...

Але як там ні было бы –

Ці слата, ці буры –

Цягнуць воз той тры асобы

І – без Мацапуры.