epub
 
падключыць
слоўнікі

Якуб Колас

Заходняй Беларусі

Граніц няма шаленству катаў.

«Душы!» «Даві!»

«Крыві!» «Крыві!»

Вот лозунг панскіх «дэмакратаў».

 

Лютуе кат. Растуць магілы,

А на магілах — бурʼяны...

Краіны верныя сыны,

Клюе вас «ожэл» белакрылы!

 

Працяты жудасцю астрогі,

І стогнам поўняцца муры...

Хвала вам, гонар, змагары!

Не зарастуць вашы дарогі.

 

Вас судзіць суд прадажнай зграі,

Дзе панскі зброд,

Сумленне кінуўшы за плот,

На «крэсах» «цуды» утварае.

 

А на тых «крэсах» енк пакуты,

Гібее, чэзне там народ,

А той фашысцкі панскі бот

Ступае помсліва і люта.

 

О Беларусь у польскіх межах!

Цябе распялі на крыжы,

Твой дом запоўнілі вужы,

І дзеліць кат твае адзежы.

 

Але ўсяму свая ёсць мера:

Надыдзе неўнікнёны час,

І будзе суд загнаных мас, —

Адплату ён нясе вам, зверы!

 

16/ХІ 1932


16.11.1932

Тэкст падаецца паводле выдання: Колас, Я. Збор твораў: у 20 т. Т. 2 : Вершы 1911―1938