Ты прыйдзі, вясна жаданая,
Прыйдзі!
Гукам жыцця, песняй працы
Загудзі.
На узгоркі, на нізіначкі
Зірні,
Сон трывожны, сон цяжкі наш
Разгані.
Ты нясі нам радасць, сілачку
Нясі,
Нашу ленасць і нядбаласць
Атрасі.
Ты ляці на крыллях выраю
Скарэй,
Абласкай цяплом пахілых,
Абагрэй.
Наша жыцце, нашу долечку
Пабач,
Над жытамі цёплым дожджыкам
Заплач.
Пракаціся громам-грукам
Угары.
Ты ідзі, нясі цудоўныя
Дары.
Узбагаць ты добрым засевам
Наш край.
Ты прыйдзі і з намі дружна
Заспявай.
Ўскалыхні ты струны сэрцайка
Жывей,
Каб было нам жыць на свеце
Весялей.
Дык ідзі да нас, жаданая,
Ідзі,
Раскатурхай нашу дрэму,
Абудзі!
1912