epub
 
падключыць
слоўнікі

Янка Купала

Ад мінскіх дзяцей

На прывітанне IV Усебеларускага з’езда Саветаў

1
2


1

Ад дзіцячай згоднай, буйнай,

Зацвітаючай Камуны

Чэсць, прывет вам, дэлегаты

З беларускіх ніў і хатаў!

 

Гэй, работнікі, сяляне!

Мазыране, бабруйчане,

Ігуменцы і случчане,

Ды барысаўцы й мінчане! —

 

Беларусы вы без плямаў,

Беларусы мы таксама,—

Хай на нашым на загоне

Век ніхто нас не разгоне.

 

Вы ўжо сталы, мы — йшчэ малы,

А як вырасцем, удала

Ўсе к вам пойдзем на падмогу

Церабіць к святлу дарогу,—

 

За тым шчасцем удагонцы

Пойдзем, пойдзем аж да сонца.

Гэй, работнікі, сяляне,

Беларусі грамадзяне!

 

2

Таварышы дэлегаты!

Для нас сягоння свята,

Што вы папрыязджалі,

Каб жыў Савет наш далей.

 

Ад сэрца вас вітаем!

Кіруйце нашым Краем,

Каб нашай Беларусі

Жылося не ў прымусе.

 

Дамоў жа хто паедзе,

Скажыце там суседзям,

Што мы, Камуны дзеці,

Жыць хочама на свеце.

 

Што хочам грэці плечы,

Як там у вас, ля печы,

Ды ласаваці часам

Яечню і каўбасы.

 

Што трэба нам святлічкі,

Кашулькі, чаравічкі,

Настаўнікі і кніжкі

Ды іншыя «ізлішкі».

 

Што як мець будзем гэта,

То на другое лета

Вам прыйдзем памагаці

Араць, касіць і жаці.

 

Дык не забудзьце дзетак,

З палеткаў вашых кветак,

Як вернецесь дахаты,

Сяброчкі-дэлегаты!

 

1922


1922

Тэкст падаецца паводле выдання: Янка Купала. Поўны збор твораў. У 9 т. - Т.4. Вершы, пераклады 1915 -1929. - Мн.: Маст. літ., 1997. - 446 с., [4] л. іл.
Крыніца: скан