epub
 
Падключыць
слоўнікі

Янка Купала

Арлянятам

1
2


1

Гэй, узвейце сваім крыллем,

Арляняты, буйна, бурна,

На мінулых дзён магіле,

Над санлівасцю хаўтурнай!..

 

У маланках перуновых,

З гулкім гоманам грымотаў

Для вякоў дыхтуйце новых

Нечувалыя ясноты.

 

Вам сярпы і косы ў рукі

Ды мячы, каваны з сталі,

Далі буры, завірухі,

Што тут вылі, бушавалі.

 

Цень мінуўшчыны праклятай,

Дзе бізун гуляў з нагайкай,

Змеціцё вы, арляняты,

Сваёй новай сілай, байкай.

 

Ужо выбіла часіна

На вялікую прыгоду

Выйсці з мутнай каляіны

Беларускаму народу.

 

Ў чарадзейным карагодзе,

Ў неабсяжнае свабодзе,

Без аковаў на прыволлі

Ўжо віхрыцца наша доля.

 

 

2

Вам на памяць Серп і Молат

Даравала доля,

Каб з вас кожны быў, як волат,

Не гнуў плеч ніколі.

 

Каб здабытую свабоду

Зналі, шанавалі

І у цяжкую прыгоду

Ўсталі грознай хваляй.

 

Зашумелі, загудзелі,

Як віхор сусветны,

Не праспалі у пасцелі

Волі агняцветнай.

 

*

Вам дасталіся ад продкаў

Сохі і бароны,

Каб вы ў час, пасля паводкаў,

Выйшлі на загоны.

 

І з’аралі сваю ніву

Шырака, глыбока,

Зерне ўкінулі шчасліва,

Чыстае, як вока.

 

Каб рунела зерне тое

Весела, яскрава

Побач з вашай маладою,

Сакалінай славай.

 

*

Вам пакінулі прадзеды

Гартаваны косы,

Каб вы з імі сонца следам

Выйшлі на пакосы;

 

Каб касілі да упаду

Пустацвет і зелле,

Што сваім пякучым ядам

Труцяць кроў у целе.

 

Каб звінелі вашы косы

Над зямлёю соннай

Ад начных да ранніх росаў

Звонка, векапомна.

 

*

Вам у спадчыне ад роду

Засталіся песні,

Каб быць вашай асалодай

У жыцця прадвесні.

 

Каб вы пелі, не сціхалі

Ў радасці і ў горы,

Гаманілі, нібы хвалі

У бурлівым моры.

 

Каб шоў гоман неспыняны

Ад поля да поля

І людзей, яшчэ скаваных,

Заклікаў на волю.

 

1923




Беларуская Палічка: http://knihi.com