epub
 
Падключыць
слоўнікі

Янка Купала

Бледныя буднія дні...

Бледныя буднія дні

Сумна па роднай зямлі

Мутнай плывуць паласой;

Часам калі-нікалі

Дзе-нідзе бліснуць агні,

Глянуць крывавай расой.

 

Песні раздолля маўчаць,

Песні, што рабскія сны

З душ паднявольных змялі б,

Толькі заводзяць званы,

Толькі асіны скрыпяць

Над уміраннем сяліб.

 

Скрогат нясецца з асін...

Рабству паклоны біў дзед,

Гнуўся пад палкамі ў крук;

Бацька — за дзедам; услед

З бацькам пляцецца і сын;

Ты ж кудой пойдзеш, унук?..

 

1912




Беларуская Палічка: http://knihi.com