epub
 
Падключыць
слоўнікі

Янка Купала

Царскія дары

(З мінулага)

Цар грозны, маскоўскі — вясёлы,

Шчаслівы з пабедаў вялікіх —

У госці і з местаў, і з сёлаў

Нявольнікаў верных паклікаў.

 

Пад водгулле трубаў, літаўраў,

Пад рогаты ўпасвенай дворні

Падносіць падданым ён дары,—

Нявольнікі прымуць пакорне:

 

Дару я табе, украінцу,

Украйны капальні і стэпы,—

За гэта вуголь і пшаніцу

Ты звозіш мне ў свірны і склепы.

 

У Польшчы ты, польскі народзе,

Жыві сабе й думай аб славе,—

Мне толькі хай ткуць ткачы ў Лодзі;

Чуў — пекныя полькі ў Варшаве.

 

Хай Латвію возьмуць латвійцы

І рыбную ў Балтыцы лоўлю,—

Адно я да іхняй зямліцы

Баронаў дадам на гадоўлю.

 

Ты цешся, грузіне, краінай,

Тамарай грузінкаю слаўнай,—

Мне выдзеліш толькі часціну,

Дзе пыхкаюць нафтай фантаны.

 

Свой Крым, а з ім ханаў і мулаў

Бяры сабе, крымскі татарын,—

Мне ж мора пакінеш агулам

І ўсе санаторыі дарам.

 

Ты, мой туркестанскі сабрату,

Ідзі ў Туркестан разжывацца,—

Ўзамен я каракуль і вату

З тваіх пазбіраю плантацый.

 

Табе, сібірак, без граніцаў

Сібір аддаю, мо што выспіш,—

Але мне да ўласнай скарбніцы

Сібірскае золата ссыпеш.

 

А ты, беларусе нямрушчы,

Вазьмі Беларусь на ўспамінак,—

Твае ж прыдадуцца мне пушчы

Мой царскі вялічыць будынак.

 

І права даю для ўсіх разам

Пладзіцца, як маку зярняты,—

За што мне за першым наказам

Дасцё ўсе сыноў у салдаты.

 

Так грозны маскоўскі цар шчыра

Дзяліў між нявольнікаў дары,

Пад гікі прыдворных упыраў,

Пад водгулле трубаў, літаўраў.

 

1926




Беларуская Палічка: http://knihi.com