epub
 
Падключыць
слоўнікі

Янка Купала

Для куска хлеба

Для куска хлеба, чорнага хлеба

Бядак прадаецца з душой,

Вольную волю, светлыя думы

Ў нядолі ён топіць цяжкой.

 

Каб як пражыці, голад змагаці,

Павінен забыцца на ўсё —

На светляныя душы парывы,

На ўсё чалавецтва сваё.

 

Царскі нявольнік, панскі нявольнік,

Нявольнік — слуга абадвух,—

Цару — салдатам, парабкам — пану,

А кепска, ох, жыці для слуг.

 

На другіх мусіць век працаваці,

А дзе што не так, не ўгадзіў,—

Плюнуць пагардай, выганяць з хаты,

Ідзі ў свет, бядак, як хадзіў...

 

Музыка, песні чутны з палацу —

Гуляюць за труд бедакоў,

Мучыцца ж бедны думкай штодзённай,

Каб голад са свету не звёў.

 

11 чэрвеня 1906




Беларуская Палічка: http://knihi.com