epub
 
Падключыць
слоўнікі

Янка Купала

Душачка, шынкарка...

Душачка, шынкарка,

Калі ў Бога верыш,

Дай, дай пахмяліцца,

Хоць чарку, хоць трошкі

 

Кепска трохі: грошы

Не маю сягоння,

Але ж мяне знаеш,—

Я круціць не ўмею.

 

Ўрэшце і заставу

Дам, калі захочаш;

Гэтага замала,—

Шчыра пацалую.

 

Эх, каб яго немач

З гэтакім і шчасцем!

Ты і ўцям не возьмеш,

Што спаткаці можа.

 

Так учора цвёрда

Меціўся не ўпіцца,—

Бач, сваяк сустрэўся,

І глядзі, што выйшла:

 

З сваяком пабіўся

Чуць дамоў заплёўся,

Ўхлёпаўся ў балота

І пасеяў шапку.

 

А пасля пахмелля

Смак ці знаеш гэты? —

І ў грудзях трасецца,

І лоб як не трэсне.

 

Дык, шынкарка-сэрца,

Калі ў Бога верыш,

Дай, дай пахмяліцца,

Хоць чарку, хоць капку!

 

[1922]




Беларуская Палічка: http://knihi.com