epub
 
Падключыць
слоўнікі

Янка Купала

Дзе вы?

Дзе вы, хлопцы непакорныя,

Дзе вы з песняй удалою,

Як на поле на прасторнае

Вы хадзілі грамадою?

 

Ці пайшлі вы у далёкую

У старонку у чужую;

Ці ляглі вы, адзінокія,

У магілку у сырую?

 

Дзе вы, песні, дзе, свабодныя?

Дзе ваш водгалас магучы,

Як вы звалі, сыны родныя,

Да той працы да кіпучай?

 

Ці замёрлі вы нячутымі

Серад лесу, серад поля;

Ці і вас скавалі путамі,

Ці і вас змагла няволя?

 

Гэй, нявідна друга сільнага,—

Спіць. Хто ж сон яго ўстрывожа?

Гэй, ад енку ад магільнага

Песня вырвацца не можа!..

 

[1908]




Беларуская Палічка: http://knihi.com