epub
 
падключыць
слоўнікі

Янка Купала

Дзве таполі

Там, за вёскай, у полі дзве стаялі таполі,

Як адна, дзве таполі стаялі,

І стагналі у полі сухавейна таполі,

Як адна, дзве таполі стагналі.

 

Аб Усходзе у полі ўсё шумелі таполі,

Як адна, дзве таполі шумелі,

І аб Захадзе ў полі лісцьмі пелі таполі,

Як адна, дзве таполі ўсё пелі,

 

Што пануюць у полі над дубамі таполі,

Як адна, дзве таполі пануюць,

Што начуюць у полі самаўладна таполі,

Як адна, дзве таполі начуюць...

 

Неба помсту у полі тут пачулі таполі,

Як адна, дзве таполі пачулі,

І навекі у полі дзве заснулі таполі,

Як адна, дзве таполі заснулі.

1911


1911

Тэкст падаецца паводле выдання: Поўны збор твораў. У 9 т. - Т. 3. Вершы, пераклады 1911-1914. - Мн.: Маст. літ., 1997. -342 с. [4] л. іл.
Крыніца: скан