epub
 
Падключыць
слоўнікі

Янка Купала

Я люблю

Я люблю ўсходы нашых палеткаў,

І спавітыя ў зелень лугі,

І шум бору пануры, глухі,

І шаптанне крынічнае ўлетку...

 

Я люблю упрыгожану ў мхі

Нашу вёску — сваёй крыўды сведку,

Свой народ — гэту звяўшую кветку,

Цэлы край — родны мне й дарагі.

 

Я люблю ясны вочы і грудзі

І стан гібкі дзяўчыны-красы:

Аб ёй брэджу наяве і ў сне.

 

Я люблю і заву, бы ў нялюддзі,—

Чуюць кліч мой сухія лясы,

Кліч: хто ж любіць, хто любіць мяне?

 

1912




Беларуская Палічка: http://knihi.com