epub
 
падключыць
слоўнікі

Янка Купала

"Каб я меў загончык нівы..."

* * *

Каб я меў загончык нівы,

Каб я меў кусочак,—

З каласоў бы звіў вам, людзі,

Звіў бы я вяночак.

 

Каб я меў лажок над рэчкай,

Каб меў сенажатку,—

Назбіраў бы вам букет я

З незабудкаў, браткаў.

 

Каб я меў сваю хаціну,

Каб я меў сялібу,—

Запрасіў бы вас у госці,

На кут пасадзіў бы.

 

Дый не мне вас так вітаці

Шчыранька, як дзеці,—

Крыў Бог нівы, сенажаткі,

Хата — па ўсім свеце.

 

Хай хоць гэта мая думка

Ўспамін вам пакіне

Аб гаротным і маркотным

Беларускім сыне.

1910


1910

Тэкст падаецца паводле выдання: Поўны збор твораў. У 9 т. - Т. 2. Вершы, пераклады 1908-1910. - Мн.: Маст. літ., 1996. -342 с. [4] л. іл.
Крыніца: скан