epub
 
Падключыць
слоўнікі

Янка Купала

Князь

З-за далёкай стараны

Едзе, едзе князь, князь;

Конь пад князем буланы,

Капытамі бразь, бразь!

 

Зброя золатам гарыць,

Толькі ў сонцы зях, зях!

У руцэ меч князь дзяржыць,

Так і гэтак мах, мах!

 

Скача конь на паваду...

Ціха, косю, стой, стой!..

Чэрпе дзеўчына ваду,—

Як зірнула: ой, ой!

 

— Пачакай, бо даганю,

Дзяўчынанька, гэй, гэй!

Дай вады майму каню,

А мне песню спей! спей!

 

Князь і молад, і прыгож,

Як у садзе мак, мак,

І дзяўчына — як цвет рож,

Як лілея, так, так!

 

Піць дала каню з вядра,

Спела песню там, там,

Князь горсць кінуў серабра

І паехаў сам, сам.

 

Ўзяўшы ведзеркі свае,

Дому дзеўка йдзе, йдзе

І так жаласна пяе:

Доля, доля, дзе, дзе?

 

1919




Беларуская Палічка: http://knihi.com