epub
 
Падключыць
слоўнікі

Янка Купала

Лес

Ці знаеш ты, дзяцюк нядбалы,

І ты, дзяўчынка дарагая,

Лес гэты цёмны, лес падгалы,

Што з веку ў век нам байкі бае?

 

Цікавым вокам і душою

Шмат пераняць чаго там можна,

Як там усё само сабою

Жыве паважна, асцярожна.

 

Там звер туды-сюды шнуруе,

На галлі птушка там трасецца,

Там хвойка з хвойкаю талкуе,

Як дзе кума з кумой на рэчцы.

 

Зімой сапе сцюдзёнай думай,

Улетку песнямі уп’ешся,

А ўвосень там — ах, шумы, шумы!

Не чуй — слязою абліешся!

 

Няхай жа свісне ў ім сякера:

Застогне бедны ён, застогне...

О пушча, цёмная не ў меру,

Чыя душа з табой не дрогне?!

 

[1908-1910]




Беларуская Палічка: http://knihi.com