epub
 
Падключыць
слоўнікі

Янка Купала

"На Гітлера-звера..."

* * *

 

На Гітлера-звера,

Сабачага сына —

З касой і сякерай,

З сярпом і дубінай!

 

Ўставайце, ідзеце

На чорнага змея,—

Няхай кроў ліецца

З твайго ліхадзея.

 

Парэзаў ён дзетак,

Тваіх малалетак,

Парэзаў ён матак,

Спаліў твой дастатак.

 

За матак, за дзетак, расстрэленых немцам,

За кроў, пралітую нявінна, і здзекі —

Ўставай, партызан, за смерць помсціці смерцю,

Ўставай, партызан, за зямлю, за свабоду навекі!

 

Хай вораг катуе,

Хай вораг лютуе —

Гадзюцы збаўлення няма!

 

Ты слухай, паслухай, таварыш мой мілы

З заходняй, з усходняй святой Беларусі,

Мы рылі французам і шведам магілы,—

Сваю рыць магілу мы Гітлера змусім.

 

Павер, мой народзе,

Ў пабедзе, ў свабодзе —

Ў Савецкім ззяць будзем Саюзе.

Ты будзеш шчаслівы

На родных на нівах!

 

[1942]




Беларуская Палічка: http://knihi.com