epub
 
Падключыць
слоўнікі

Янка Купала

На добры стары лад

Забудзься і працуй!

Ні сэрца, ні душы,

Ні дум сваіх не чуй;

Ці ў шуме, ці ў глушы,—

Забудзься і працуй!

 

Хоць хаткаю тваёй

Трасуць штодзень вятры

І песняю сваёй

Разносяць стогн стары

Над хаткаю тваёй,—

Забудзься і працуй!

 

Нуды пажар тушы,

На вір жыцця не злуй,

Ці ў шуме, ці ў глушы,—

Забудзься і працуй!

 

Хоць ночка цемнатой

Заслала сцежкі ўсе,

Праходзіш ты кудой

Па слёз сваіх расе

З адвечнай цемнатой,—

Забудзься і працуй!

 

Прашкоды ўсе крышы,

На долю не крыўдуй,

Ці ў шуме, ці ў глушы,—

Забудзься і працуй!

 

Хоць гора ўслед бяжыць,

А каменем-гарой

На сэрцы жаль ляжыць,

Хоць смутна, Божа мой,—

Забудзься і працуй!

 

Ні сэрца, ні душы,

Ні дум сваіх не чуй,

Ці ў шуме, ці ў глушы,—

Забудзься і працуй!

 

[1905-1907]




Беларуская Палічка: http://knihi.com