epub
 
Падключыць
слоўнікі

Янка Купала

На рынку

— Хадзеце, хадзеце, вясёлыя людзі!

А жыва да нас на таргоўлю:

Пакупка — гасцінчык вам кожнаму будзе

Чырвоненькі, хатняй гадоўлі!

 

Паціху... не бойцеся — пойдзе ўсё гладка,—

Крый божа, якога прымусу.

Маленькая рэч,— як матыль ці стрынатка...

Ўсёй куплі — душа беларуса...

 

Меў хату, меў поле; — прыйшлі і забралі...

Сам вінен: не ўмеў пільнаваці.

Ну, ўсякаму ж трэба як-небудзь жыць далей,—

Душу вось і можа прадаці...

 

Падходзь жа, паночку!.. знімі акуляры —

Лепш будзе агледзіць пакупку,

Ты, барынька, так жа падбліжся!.. мы нары

Дамо нават з ёю, галубкай...

 

Штось срэбнікаў з трыццаць — як піша ў законе

Узяў за Хрыста калісь Юда...

Аб гэткай цане ані снім мы сягоння:

Станела ўсё — душы і цуды.

 

Дасцё крыві з каплю, з гарошынку чэсці,

І — ваша душа ва ўсёй хвале...

Бо так — не купіўшы — не след на крыж весці,

Гатовы сказаць, што вы ўкралі...

 

1912




Беларуская Палічка: http://knihi.com