epub
 
Падключыць
слоўнікі

Янка Купала

На штыхі!

На штыхі, пад званы і пажар,

Мы ўзрухнулі зямлі ўсёй абшар.

 

Фабрык мы грахатлівых сыны,

Мы ў крыві, мы ў агні, не адны.

 

Расплаўляем зямлю, як чыгун,

На вагнішчы ўсялюдных Камун.

 

Пад нагамі сусветны банкір,

На штыхах каранованы мір.

 

Мы, народы ўсіх нацый, краін,

Б’ём пабеду ў бубны, як адзін.

 

На змаганне з заўзятым ўрагом

Усясветна, ўсялюдна ідзём.

 

Падае голас Захаду Ўсход:

Гэй, пад сцягі, паўсталы народ!

 

Ад сусветных народных трыбун

Трубяць трубы злучоных Камун.

 

Крывёй пеніць пабедны бакал,

Згінь, згары, людаед-капітал!

 

Бой апошні — памерці, ці жыць,

На ўсясветным абшары гарыць.

 

На штыхах перакулены трон,

Руйнавальны трасе небам звон,

 

Руйнавальны той молат, чыгун

Нашых вольных працоўных Камун.

[1920-1925]




Беларуская Палічка: http://knihi.com