epub
 
Падключыць
слоўнікі

Янка Купала

Накарміліся панскаю ласкай...

Накарміліся панскаю ласкай,

Горкіх слёз напіліся дасыта.

Што здавалася ўчора йшчэ казкай

Прыйшло сёння ў сонцы спавітым.

 

Расплываліся ў небе туманы,

Разганяў вецер ссохшае лісце.

Салавейка спяваў над курганам,

Неяк быццам спяваў галасісцей.

 

Ішлі гоманы нівай наспелай,

Гарады аклікаючы й вёскі.

Белавежская пушча шумела

І шумеў цёмны лес Аўгустоўскі.

 

Пераклікі чуваць былі ў хвалях

Паміж Нёманам, Днепрам і Бугам

І да Волгі плылі, дабягалі

Шэпты хваляў ад Нёмана-друга.

 

Перад намі за панскай стражніцай,

За слупамі з арламі, а блізка,

Новы свет развідняўся зарніцай,—

Долі, волі народнай калыска.

 

Мы лавілі і думкай, і вухам

Стуль найменшае водгулле-рэха.

Вораг толькі стуль вестак не слухаў,

Упіваўся раз’юшаным смехам.

 

Выглядалі, чакалі цярпліва,

Як чакае з вайны маці сына,

Той хвіліны чароўнай, шчаслівай,

Калі прыйдуць з вялікай навінай.

 

І прыйшоў гэты час перамогі,

Вярнігорай прыйшоў ён з Усходу,

І руйнуе кайданы, астрогі,

На свабоду выводзіць народы.

 

Накарміліся панскаю ласкай,

Горкіх слёз напіліся дасыта.

Што здавалася ўчора йшчэ казкай,

Прыйшло сёння у сонца спавітым.

 

1939




Беларуская Палічка: http://knihi.com