epub
 
Падключыць
слоўнікі

Янка Купала

Настане такая часіна

Я веру — настане

такая часіна,

І руняй савецкай

уквецяцца гоні,

 

Дзе Віслы, дзе Сены,

дзе Тэмзы даліны,

Дзе праца людская

сягоння ў прыгоне.

 

Развеюцца ў попел

кароны і троны,

Стэрлінгі і франкі,

дукаты, далары;

 

Мікадаў, прэлатаў

банкіраў, баронаў

Захлынуць паўстанняў

народных пажары.

 

Рабочых грамады

ў свае возьмуць рукі

Заводы і фабрыкі,

шахты і домны,

 

Збудуюць палацы

сабе і для ўнукаў,

Дзе радасць і сонца

загосцяць векпомна.

 

Калгасны стальны плуг

засыпле навекі

Ў барозны-магілы

паноў-феадалаў,

 

Каб сейбіт старанны

не гнуўся пад здзекам,

Каб сочная ніва

буйней красавала.

 

Хрыстоў, магаметаў,

еговаў і будаў,

Бажніцы, капліцы

ўсіх вераў і нацый,

 

Як смецце на свеце,

як тухлыя груды,

Змяце дыктатура

раскованай працы.

 

А белыя, жоўтыя,

чорныя расы

Да мовы супольнай

прачысцяць дарогу...

 

Сунімуцца бітвы,

загубяцца класы,

Граніцы, заставы

парве перамога.

 

Н’ю-Йоркі, Парыжы,

і Вільні, Берліны,

Шанхаі, Варшавы,

Жэневы, Такіі

 

Аздобяцца ў сцягі

чырвонасці дзіўнай,

Што ў нас зіхацяцца —

у сцягі такія.

 

Пад ленінскім сцягам

пралетарыята

Паўстане рваць путы —

хто долі не ведаў,—

 

Хто сохне без хлеба,

хто гіне без хаты,

Хто корміць сваім

мазалём дармаедаў.

 

Ад мораў паўночных

да мораў паўдзённых

Уздымецца песня

свабодна і думна:

 

Хай праца пануе

на вольных загонах,

Хай зоры іскрацца

сусветнай камуны.

 

Я веру — настане

такая часіна,

І руняй савецкай

уквецяцца гоні,

 

Дзе Віслы, дзе Сены,

дзе Тэмзы даліны,

Дзе праца людская

сягоння ў прыгоне.

1932




Беларуская Палічка: http://knihi.com